གསུམ་པ་རྩོད་པ་སྤོང་བ།
གསུམ་པ་རྩོད་པ་སྤོང་བ་ལ།
ཁ་ཅིག་ན་རེ། སྒྲ་ལྟ་བུའི་ཆོས་གཅིག་ལ་སྒྲ་མ་ཡིན་པའི་ཤེས་བྱ་ཇི་སྙེད་ཡོད་པ་དེ་སྙད་ཀྱི་གྲངས་དང་མཉམ་པའི་དེ་དག་ལས་ལོག་པའི་ལྡོག་པ་ཡོད་པར་ཐལ། རྣམ་འགྲེལ་ལས། གང་ཕྱིར་དངོས་ཀུན་རང་བཞིན་གྱི། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱི་དངོས་དག་ལ། །ལྡོག་པ་ལ་ནི་རྟེན་པ་ཅན། །ཞེས་གསུངས་པའི་ཕྱིར། འདོད་ན། སྒྲ་ལ་ལྡོག་པ་དུ་མ་ཡོད་པར་ཐལ། སྒྲ་ལྟ་བུའི་ཆོས་གཅིག་ལ་སྒྲ་མ་ཡིན་པའི་ཤེས་བྱ་ཇི་སྙེད་ཡོད་པ་དེ་སྙེད་ཀྱི་གྲངས་དང་མཉམ་པའི་དེ་དག་ལས་ལོག་པའི་ལྡོག་པ་ཡོད་པའི་ཕྱིར་ན་མ་ཁྱབ་སྟེ། སྒྲ་ལ་རྟག་པ་ལས་ལྡོག་པ་དང༌། མ་བྱས་པ་ལས་ལྡོག་པ་སོགས་སྒྲ་མ་ཡིན་པའི་ཤེས་བྱ་ཇི་སྙེད་ཡོད་པ་དེ་དག་ལས་ལོག་པའི་ལྡོག་པ་མཐའ་ཡས་པ་ཡོད་ཀྱང་དེ་དག་སྒྲའི་ལྡོག་པ་ཡིན་པར་མ་གསུངས་པའི་ཕྱིར་རོ།། །།