དྲི་བ་བཅུ་བ་ནི།སྦྱོར་བཞིའི་མཚན་ཉིད་དབྱེ་བ་ས་མཚམས་ནང་ཕན་ཚུན་འགལ་ལམ་ནང་ཕན་ཚུན་རྫས་གཅིག་གམ་ཐ་དད་གང་ཡིན་ཞེས་པའི་ལན།
དྲི་བ་བཅུ་བ་ནི།སྦྱོར་བཞིའི་མཚན་ཉིད་དབྱེ་བ་ས་མཚམས་ནང་ཕན་ཚུན་འགལ་ལམ་ནང་ཕན་ཚུན་རྫས་གཅིག་གམ་ཐ་དད་གང་ཡིན་ཞེས་པའི་ལན།
སྦྱོར་བཞིའི་མཚན་ཉིད་དབྱེ་བ་ས་མཚམས་ནང་ཕན་ཚུན་འགལ་ལམ་ནང་ཕན་ཚུན་རྫས་གཅིག་གམ་ཐ་དད་གང་ཡིན་ཞེས་པའོ། །དེའི་ལན་ནི། དེ་དག་གི་མཚན་ཉིད་དབྱེ་བ་ས་མཚམས་ཉ་ཊཱིཀ་ལྟར་ན་མཁྱེན་པ་གསུམ་ལ་དབང་བསྒྱུར་ཐོབ་པའི་ཕྱིར་དུ་མཁྱེན་གསུམ་བསྡུས་ནས་བསྒོམ་པའི་བྱང་ཆུབ་སེམས་དཔའི་སྦྱོར་བ་དེ། རྣམ་རྫོགས་སྦྱོར་བའི་མཚན་ཉིད། དབྱེ་ན་སློབ་ལམ་བཞི་འམ་སྦྱོར་བ་ཉི་ཤུ། ས་མཚམས་ནི་ཚོགས་ལམ་ནས་རྒྱུན་མཐའི་བར་ནའོ། །དེ་ལྟར་འཐད་དེ། ཉ་ཊཱིཀ་ཡིད་ཀྱི་མུན་སེལ་ལས། དེས་ན་ཐེག་ཆེན་ཚོགས་ལམ་ནས་རྒྱུན་མཐའི་བར་ན་ཡོད། ཅེས་དང༌། དེས་ན་མཚན་ཉིད།མཚོན་བྱ། གཞི་གསུམ་ལས། དང་པོ་ནི། མཁྱེན་པ་གསུམ་ལ་དབང་གྱུར་ཐོབ་པའི་ཕྱིར་དུ་མཁྱེན་གསུམ་བསྡུས་ནས་བསྒོམ་པའི་བྱང་ཆུབ་སེམས་དཔའི་སྦྱོར་བ། ཞེས་དང༌། གསུམ་པ་ནི། ཐེག་ཆེན་སློབ་ལམ་བཞིའམ་སྦྱོར་བ་ཉི་ཤུའོ། །ཞེས་གསུངས་སོ། །མཁྱེན་གསུམ་གྱི་རྣམ་པ་བསྡུས་ནས་སྒོམ་པའི་རབ་ཏུ་གྱུར་བའི་སྦྱོར་བ་དེ། རྩེ་སྦྱོར་གྱི་མཚན་ཉིད། དབྱེ་ན་རྩེ་མོ་བདུན། ས་མཚམས་དྲོད་ནས་རྒྱུན་མཐའི་བར་ན་ཡོད་དོ། །དེ་ལྟར་འཐད་དེ། ཉ་ཊཱིཀ་ལས། དེས་ན་མཚན་ཉིད། མཚོན་བྱ། གཞི་གསུམ་ལས། དང་པོ་ནི། གསུམ་བསྡུས་བསྒོམ་རབ་ཏུ་གྱུར་བའི་སྦྱོར་བ་སྟེ། དེ་རབ་ཅེས་དང༌། རྩེ་མོའི་མངོན་རྟོགས་ནི། ཐམས་ཅད་མཁྱེན་པ་ཉིད་གསུམ་གྱི་རབ་ཀྱི་གནས་སྐབས་སོ་ཞེས་འདིར་བཤད་དོ། །གཉིས་པ་ནི། བསྡུས་བསྒོམ་སྔར་བས་རྩེ་མོ་སྟེ་རབ་ཏུ་ཕྱིན་པའམ་སོན་པའོ། །གསུམ་པ་ནི། བདུན་ཡོད་ལ་ས་མཚམས་དྲོད་ནས་རྒྱུན་མཐའི་བར་ན་ཡོད་དེ་འོག་ཏུ་འཆད་དོ། །ཞེས་གསུངས་སོ། །མཁྱེན་གསུམ་ཀྱི་རྣམ་པ་བསྡུས་ནས་གོ་རིམ་དུ་སྒོམ་པའི་སྦྱོར་བའམ་སྦྱིན་སོགས་དཀར་ཆོས་བཅུ་གསུམ་གོ་རིམ་གྱིས་བསྒོམ་པའི་སྦྱོར་བ་དེ། མཐར་སྦྱོར་གྱི་མཚན་ཉིད། དབྱེ་ན་བཅུ་གསུམ། ས་མཚམས་ཚོགས་ལམ་ནས་རྒྱུན་མཐའི་སྔ་ལོགས་ཚུན་ཆད་ནའོ། །དེ་དག་ནི་ཉ་ཊཱིཀ་གི་གསུངས་ཟིན་ལྟར་བཞག་པ་ཡིན་ཏེ། ཉ་ཊཱིཀ་ལས། འདི་ལ་མཚན་ཉིད། མཚོན་བྱ། གཞི་གསུམ་ལས་དང་པོ་ནི། གསུམ་བསྡུས་བསྒོམ་གོ་རིམ་དུ་བསྒོམ་པའི་སྦྱོར་བའམ་སྦྱིན་སོགས་དཀར་ཆོས་བཅུ་གསུམ་གོ་རིམ་གྱིས་བསྒོམ་པའི་སྦྱོར་བ་སྟེ། ཞེས་པ་ནས། སློབ་དཔོན་ལྟར་ན་རྩེ་སྦྱོར་ཐོབ་ནས་ཞེས་བསྣན་ཏེ་འདི་མི་ལེགས་སོ། །གཉིས་པ་ནི། བསྡུས་བསྒོམ་མམ་བཅུ་གསུམ་པོ་མཐར་གྱིས་ཏེ་སྔ་མའི་རྗེས་སུ་ཕྱི་མ་འབྲེལ་བར་རིམ་གྱིས་བསྒོམ་པ་ཅན་ཡིན་པས་མཐར་གྱིས་པའོ། །ཞེས་དང༌། ས་མཚམས་མ་མཐའ་ཚོགས་ལམ་ནས་དངོས་སུ་བྱུང་ཞིང་ཡ་མཐའ་རྒྱུན་མཐའི་བར་ན་ཡོད་པར་ཨཱརྱ་བཞེད་པར་མངོན་ཏེ། ཞེས་དང༌། ཐུག་གི་བར་ཞེས་པ་སྔ་ལོགས་ཚུན་ཆད་ཀྱི་དོན་ཡིན་པས་རྒྱུན་མཐའི་སྔ་ལོགས་ཚུན་ཆད་ཅེས་གསུངས་སོ། །མདོ་ལུགས་མའི་གསུངས་ཟིན་ལྟར་ན་མཐར་སྦྱོར་གྱི་ས་མཚམས་མདོ་ལུགས་མ་༢༩༤ལས།འདིར་སེམས་དང་པོ་བསྐྱེད་པ་ནས་ཞེས་པ་ནི་ཆོས་ཐམས་ཅད་སྒྱུ་མ་ལྟ་བུར་མཐོང་བའི་རྩེ་སྦྱོར་ཐོབ་ནས་བཟུང་སྟེ།ཞེས་པའི་དོན་ཏོ། །ཞེས་གསུངས་སོ། །མཁྱེན་གསུམ་བསྡུས་སྒོམ་མཐར་ཐུག་པའི་སྦྱོར་བ་དེ། སྐད་ཅིག་སྦྱོར་གྱི་མཚན་ཉིད། དབྱེ་ན་བཞི། ས་མཚམས་རྒྱུན་མཐའ་ཁོ་ན་ལ་ཡོད་དོ། །དེ་ལྟར་འཐད་དེ། ཉ་ཊཱིཀ་ལས། དེས་ན་མཚན་ཉིད། མཚོན་བྱ། གཞི་གསུམ་ལས་དང་པོ་ནི། གསུམ་བསྡུས་བསྒོམ་མཐར་ཐུག་པའི་སྦྱོར་བའོ། །ཞེས་པ་ནས། གསུམ་པ་ནི། ངོ་བོ་གཅིག་ཉིད་ཡུལ་དང་དེ་རྟོགས་ཚུལ་གྱི་སྒོ་ནས་ལྡོག་པའི་དབྱེ་བས་བཞི་ཡོད་ཅིང་ས་མཚམས་རྒྱུན་མཐའ་ཁོ་ནར་ཡོད་པར་སྡུད་འགྲེལ་ལ་སོགས་སུའོ། །ཞེས་དང༌། མདོ་ལུགས་མ་ལས། ཡེ་ཤེས་འདི་ནི་ངེས་འབྱུང་སྒྲུབ་པའི་གནས་སྐབས་བར་ཆད་མེད་པའི་ཏིང་ངེ་འཛིན་ས་བཅུའི་རྒྱུན་མཐའི་སྐད་ཅིག་མ་རྡོ་རྗེ་ལྟ་བུའི་ཏིང་ངེ་འཛིན་ནི། ཞེས་སོགས་དང༌། སྔོན་མེད་ལེགས་བཤད་༡༥༣ལས། མངོན་རྟོགས་འདི་ནི་རྒྱུན་མཐའི་སྐབས་ཁོ་ན་ཡིན་ཀྱང་བསམ་གྱིས་མི་ཁྱབ་པའི་གནས་ལ་དབང་བསྒྱུར་བ་ཡིན་པས་ན་སྐད་ཅིག་ལ་བསྐལ་བར་སྟོན་པ་སོགས་འབྱུང་བའི་ཕྱིར། དུས་ཡུན་རིང་ཐུང་འདི་ཙམ་ཞེས་བསམ་པར་མི་ནུས་སོ། །ཞེས་དང༌། ཉ་ཊཱིཀ་༡༥༢ལས། དབང་ཐོབ་པའི་སྐད་ཅིག་བསྐལ་བར་བྱིན་གྱིས་རློབ་ནུས་པས་སོ། །ཞེས་གསུངས་སོ། །སྦྱོར་བ་བཞིའི་ས་མཚམས་སྔོན་མེད་ལེགས་བཤད་ཀྱི་གསུངས་ཟིན་འདི་ལྟ་སྟེ། ཇི་སྐད་༡༥༢དུ། སྦྱོར་ལམ་ནས་རྒྱུན་མཐའི་སྔ་ལོགས་ཀྱི་བར་དུ་ཡོད་དོ་ཞེས་གསུངས་པ་ལྟར་ན་བདག་གི་རྣམ་པར་རྟོག་པ་ནི་སྦྱོར་ལམ་ཡང་བཟོད་པ་ལ་བྱ་དགོས་པར་སེམས་སོ། །ཞེས་དང༌། ཚོགས་ལམ་ན་རྣམ་རྫོགས་ཡོད་ཀྱི་རྩེ་མོ་མེད་དོ། །བྱང་ཞིང་འཕེལ་བ་སྦྱོར་ལམ་དྲོད་རྩེ་གཉིས་ནས་ཡོད་ཀྱང༌། རྣམ་པ་མང་པོས་རྣམ་པ་མང་པོ་ལ་རྒྱས་ཐེབས་པ་དེ་ན་མེད་པས། རྩེ་སྦྱོར་ཡོད་ཀྱང་མཐར་གྱིས་པ་མེད་དོ། །བཟོད་པ་ནས་ནི་རྒྱས་ཐེབས་ཚུལ་དེ་ཡོད་པའི་ཕྱིར་མཐར་གྱིས་པ་ཡང་ཡོད་དེ། དེ་ནས་བཟུང་བརྩམས་ཏེ་གསུམ་ག་སྤེལ་མར་འབྱུང་ངོ༌། །རྩེ་སྦྱོར་མ་ཐོབ་པའི་སྔོན་དུ་མཐར་གྱིས་པ་ཡོད་པར་འདོད་པ་མི་འཐད་དེ། ཞེས་གསུངས་སོ། །སྦྱོར་བཞིའི་ཡིན་པ་མེད་པས་ནང་ཕན་ཚུན་འགལ་ཀྱང་རྣམ་རྫོགས་སྦྱོར་བ་དང་མཐར་སྦྱོར་དང་རྩེ་སྦྱོར་གསུམ་གྱི་ཡིན་པ་ལ་མཐོང་ལམ་མཐར་སྦྱོར་བཞག་ན་འགལ་བ་མེད་སྙམ་ལ། རྒྱུན་མཐའི་ཡེ་ཤེས་ནི། རྣམ་རྫོགས་སྦྱོར་དང༌། རྩེ་སྦྱོར་དང༌། སྐད་ཅིག་སྦྱོར་དང་གསུམ་ཀ་ཡིན་ནོ། །རྒྱུ་འབྲས་སུ་གྱུར་བའི་སྦྱོར་བཞི་ནི་རྫས་ཐ་དད་ཡིན་ཡང་སྤྱིར་རྫས་ཐ་དད་མ་ཡིན་པར་རྣམ་རྫོགས་སྦྱོར་བ་སྤྱི་དང་སྐད་ཅིག་སྦྱོར་དང་མཐའ་སྦྱོར་དང༌། རྩེ་སྦྱོར་བྱེ་བྲག་ཏུ་བཞག་པ་ལ་འགལ་བ་མེད་པར་སྣང་སྟེ། སྔོན་མེད་ལེགས་བཤད་ལས། སྔ་མ་སྔ་མ་ལ་བརྟེན་ནས་ཕྱི་མ་ཕྱི་མ་སྐྱེ་ཞིང༌། ཞེས་པ་དང༌། ཉ་ཊཱིཀ་༡༦༢ལས། བཞི་བོ་ནང་ཕལ་ཆེར་ངོ་བོ་གཅིག་ལ་གནས་སྐབས་རྫས་ཐ་དད་པ་ཡང་ཡོད་དེ། ཚོགས་ལམ་ན་རྩེ་སྦྱོར་མེད་ཅིང་རྣམ་ཀུན་དང་མཐར་སྦྱོར་ཡོད་པ་ལྟ་བུའོ། །ཞེས་པ་དང༌། གོང་དུ་བཤད་པའི་མཚན་ཉིད་དང་ས་མཚམས་དག་གིས་གྲུབ་པའི་ཕྱིར་རོ། །སྔོན་མེད་ལེགས་བཤད་ལས་ཚོགས་ལམ་དུ་མཐར་སྦྱོར་མེད་པ་ལྟ་བུ་གསུངས་པ་ནི། རྣམ་པ་མང་པོས་རྣམ་པ་མང་པོ་ལ་རྒྱས་ཐེབས་པའི་མཐར་སྦྱོར་མེད་པ་དང་མངོན་རྟོགས་རྒྱན་ལས་བསྟན་རིམ་གྱི་དབང་དུ་བྱས་ན་རྩེ་སྦྱོར་གྱི་རྗེས་སུ་མཐར་སྦྱོར་བསྟན་པས་ན་རྒྱུད་གཅིག་པའི་དབང་དུ་བྱས་ནས་རྩེ་སྦྱོར་གྱི་འབྲས་བུའི་མཐར་སྦྱོར་ལ་དགོངས་པ་ཡིན་ནམ་དཔྱད་པར་བྱའོ། །སྦྱོར་བཞིའི་ཡིན་པ་མེད་པར་བཤད་པ་ནི་རྒྱུན་མཐའི་སྔ་རོལ་ཏུ་སྐད་ཅིག་སྦྱོར་མེད་པས་དབང་དུ་བྱས་པའོ། །འོན་ཀྱང་སྔོན་མེད་ལེགས་བཤད་ལས། སྐད་ཅིག་མའི་སྦྱོར་བ་ཙམ་ཡིན་ཏེ། འདི་ནི་རྒྱུན་མཐའི་སྔོན་རོལ་ནས་ཡོད་ཅིང་སྐད་ཅིག་མའི་མངོན་རྟོགས་ནི་མ་ཡིན་ནོ། །ཞེས་སྐད་ཅིག་མའི་སྦྱོར་བ་དང་སྐད་ཅིག་མའི་མངོན་རྟོགས་གཉིས་ལས་སྔ་མ་རྒྱུན་མཐའི་སྔ་རོལ་ནས་ཡོད་པ་ལྟ་བུར་གསུངས་པ་ལ་དཔྱད་པར་བྱའོ། །