བཞི་བ་གྲངས་ངེས་པའི་རྒྱུ་མཚན།

བཞི་བ་གྲངས་ངེས་པའི་རྒྱུ་མཚན་ནི།

མཚོ་ཊཱིཀ་ལས། བསྟན་བཅོས་འདི་ལ་བརྗོད་བྱ་མེད། དེ་མེད་པས་དེ་རྟོགས་པའི་དགོས་པ་མེད། དེ་མེད་པས་འབྲེལ་བ་དང་ཉིང་དགོས་མེད་སྙམ་པའི་ལོག་རྟོག་བཞི་བསལ་བའམ། བརྗོད་བྱ་ལ་སོགས་པ་དེ་དག་ཕལ་ཆེར་མེད་ལས་ཆེ་སྙམ་པའི་ཐེ་ཚོམ་བཞི་བསལ་བའི་ཕྱིར། དགོས་འབྲེལ་ཡན་ལག་བཞིར་གྲངས་ངེས་ཏེ། ཊཱི་ཀ་ལས། འདུལ་བའི་མདོ་ལ་བརྗོད་པར་བྱ་བ་མེད་པར་དོགས་པ་བསལ་བའི་ཕྱིར་བརྗོད་པར་བྱ་བ་བསྙད་དོ། །འབྲས་བུ་མེད་པར་དོགས་པ་བཟློག་པའི་ཕྱིར་དགོས་པ་བརྗོད་དོ། །ཐབས་མེད་པར་དོགས་པ་སྤང་བའི་ཕྱིར་འབྲེལ་པ་བཤད་དོ། །འདོད་པའི་དོན་གྲུབ་པར་བྱ་བའི་ཕྱིར་དགོས་པའི་ཡང་དགོས་པ་བསྟན་ཏོ། །ཞེས་དང༌། ལོག་རྟོག་ཙམ་པོ་ལས་གཞན། རྟོག་ལྡན་བསྟན་བཅོས་ལ་འཇུག་པའི་གེགས་སུ་འགྱུར་ངེས་ཀྱི་ལོག་རྟོག་བཞིར་གྲངས་ངེས་པ་དེ་དག་སེལ་བ་ལ་དགོས་འབྲེལ་ཡན་ལག་བཞིར་གྲངས་ངེས་སོ། །ཞེས་གསུངས་སོ། །དེ་བཞིར་གྲངས་ངེས་པར་མི་འཐད་པར་ཐལ། ཀུན་བཏུས་ས་འགྲེལ་༢༢ལས། འགྲེལ་ཆེན་མང་པོར། བརྗོད་པར་བྱ་བ་དང་རྗོད་པར་བྱེད་པ་དང་འབྲེལ་བ་དང་དགོས་པ་དང་དགོས་པའི་དགོས་པ་སྟེ་ལྔར་གསུངས་པས་དངོས་པོ་ལ་གྲུབ་པའི་གྲངས་དང་གོ་རིམ་ངེས་པ་མེད་ཅིང༌། འོན་ཀྱང་འགའ་ཞིག་གི་བློ་ཡུལ་དུ་བསྟན་བཅོས་ལ་འཇུག་པའི་གེགས་བརྗོད་བྱ་ལ་སོགས་པ་མེད་དོ་ཞེས་འཛིན་པ་སྐྱེ་སྲིད་པས་དེ་དག་སེལ་བ་ལ་དགོས་འབྲེལ་གྱི་ངག་བཞིར་ཡོད་པར་བསྟན་ཏོ། །ཞེས་གསུངས་པ་དང༌། འགྲེལ་ཆེན་དྲི་མེད་འོད་ལས། བཅོམ་ལྡན་འདས་དུས་ཀྱི་འཁོར་ལོ་ནི་འདིར་བརྗོད་པར་བྱ་བའོ། །འདི་སྟོན་པར་བྱེད་པའི་ལེའུའི་ཚོགས་རྒྱུད་ཀྱི་རྒྱལ་པོ་ནི་རྗོད་པར་བྱེད་པའོ། །ཞེས་དང༌། བརྗོད་བྱ་རྗོད་བྱེད་ཀྱི་འབྲེལ་བའོ། །ཞེས་གསུངས་པའི་ཕྱིར་ཟེར་ན་ཞིབ་ཆ་དགོས་སོ། །