ངོམ་ཡུལ་བསང་མཆོད།
མཆོད་པ་གཅིག་བྱས་ལ། ཀྱཻ། ཡང་གཅིག་བསང་ཞིང་མཆོད་པ་ནི། །རྡོ་རྗེ་གདན་གྱི་བྱང་ཕྱོགས་ན། །རི་བོ་རྩེ་ལྔའི་ནུབ་ཕྱོགས་ན། །རི་རྒྱལ་ལྷུན་པོའི་ལྷོ་ཡི་ཕྱོགས། །གངས་དཀར་ཏི་སེའི་ཤར་ཕྱོགས་ན། །ཐུགས་རྗེ་ཆེན་པོའི་ཞིང་ཁམས་མཆོག །རྒྱལ་བས་ལུང་བསྟན་གདོང་མར་ཡུལ། །མདོ་ཁམས་གླིང་ཁྲི་བར་མ་ན། །ངོམ་དུ་རུང་བའི་ཡུལ་གྱི་སྟོད། །རིན་ཆེན་རི་བོ་བརྗིད་ཆགས་པ། །དགུན་གསུམ་དཀར་པོ་དུང་གི་རི། །དཔྱིད་གསུམ་སྨུག་པོ་མཆོང་གི་རི། །དབྱར་གསུམ་ལྗང་ཁུ་གཡུ་ཡི་རི། ། སྟོན་གསུམ་སེར་པོ་གསེར་གྱི་རི། །རྫ་བྲག་རིན་ཆེན་སྤུངས་པ་འདྲ། །གསེར་སྤང་སེར་པོ་ལམས་སེ་ལམ། །གཡུ་ཡི་ནེའུ་སིང་ཀྱི་ལི་ལི། །ཤེལ་གྱི་ཆུ་མིག་ཤ་ར་ར། །བཟང་ཤིང་ནགས་ཚལ་ཐིབས་སེ་ཐིབ། །གཡུ་ཡི་ན་བུན་ཕྱུ་རུ་རུ། །ལྷོ་སྤྲིན་སྨུག་པོ་ཐིབས་སེ་ཐིབ། །བསྐལ་པའི་འབྲུག་སྒྲ་འུ་རུ་རུ། །དྲག་པོའི་གློག་དམར་ཁྱུགས་སེ་ཁྱུག ། དུང་གི་ཁུ་འཕང་ཤ་ར་ར། །སྦྲང་ཆར་ཟིམ་བུ་སི་ལི་ལི། །འཇའ་སྤྲིན་ཉི་ཟླ་ཏ་ལ་ལ། །བྱ་རིགས་སྐད་སྙན་ཏངས་སེ་ཏང་། །གཅན་གཟན་ངར་སྐད་འུ་རུ་རུ། །རི་དྭགས་རྩེ་
ཀྱུ་སྤྲིངས་སེ་སྤྲིང་། །དེ་འདྲ་གནས་ཀྱི་མངའ་བདག་ནི། །རི་རྒྱལ་ཀོ་དོ་ཞེས་སུ་གྲགས། །མི་སྨུག་རལ་པའི་ཅོད་པན་ཅན། །ལོངས་སྤྱོད་མངའ་ཐང་ཕུན་སུམ་ཚོགས། །སྤྲུལ་པ་ཚོང་དཔོན་ཆེན་པོར་བརྫུ། །ཁྱོད་ལ་མཆོད་པ་འབུལ་བ་ནི། །ཕྱེ་མར་འོ་ཞོ་ཇ་ཆང་ཕུད། །འབྲུ་སྣ་ཟས་ཕུད་མཆོད་པ་འབུལ། །བཟང་ཤིང་སྣ་ཚོགས་དུད་པས་བསང། །ཀོ་དོའི་ཕུ་མདའ་ཉིན་སྲིབ་ཀྱི། །མཚོ་དང་ཆུ་མིག་ནེའུ་སིང་ལ། །གནས་པའི་ཀླུ་ཡི་རྒྱལ་པོ་ནི། །སྐུ་མདོག་ལྗང་སེར་འོད་ཟེར་འབར། །སྦྲུལ་མགོ་བདུན་གྱི་གདེངས་ཀ་ཅན། །ཕྱག་མཚན་ཕྱག་ན་པདྨ་བསྣམས། །སྐུ་སྨད་གདུག་པ་སྦྲུལ་དུ་འཁྱིལ། །འཁོར་ནི་མཚོ་སྨན་མང་པོས་བསྐོར། །སྤྲུལ་པ་བན་དེ་ཆེན་པོར་བརྫུ། །ཀླུ་ཆེན་འཁོར་དང་བཅས་པ་ལ། །དཀར་གསུམ་མངར་གསུམ་མཆོད་པ་དང་། །ཀླུ་སྨན་སྣ་ཚོགས་མཆོད་པ་འབུལ། །བཟང་ཤིང་རྩི་སྨན་དུད་པས་བསང་། །རི་རྒྱལ་ཀོ་དོ་གཉན་པོ་ཡི། །རྒྱབ་ཀྱི་ཕྱོགས་ལ་གནས་པ་ཡི། །ལྷ་ཆེན་ལྕང་སྡེ་རག་ཕྲོམ་དང་། །བཙག་ཏི་མོ་ནོ་འཁོར་བཅས་བསང་། །གཡས་ཀྱི་ཕྱོགས་ན་གནས་པ་ཡི། །ལུང་ཡང་རག་ཟོར་
སུམ་གཙུག་དང་། །ཆོས་བཤད་ཆོས་ཉན་འཁོར་བཅས་བསང་། །ལྷག་གཟར་བྲག་དམར་རི་ནག་སོགས། །གཡས་རིའི་རྒྱུད་ལ་གནས་པ་བསང་། ཤེས་དམར་ཤོག་རིང་དགོན་ལུང་དང་། །རམ་ཁུང་ཡར་ཤོག་མར་ཤོག་དང་། །རྒན་མོ་བྱ་ཁྲིད་ལ་སོགས་པ། །གཡོན་རིའི་རྒྱུད་ལ་གནས་པ་བསང་། །ཞྭ་དཀར་མཆེད་གསུམ་འོད་ཟེར་རི། །ལྕམ་ཆེན་ལྕམ་ཆུང་ཁྲ་རི་དང་། །བང་རྟག་བྱ་ལོང་ལ་སོགས་པ། །མདུན་རི་རྣམས་ལ་གནས་པ་བསང་། །ཡུལ་ལྷ་གཞི་བདག་ཁྱེད་རྣམས་ལ། །མཆོད་དོ་གཙང་མའི་ཕུད་ཀྱིས་མཆོད། །འབུལ་ལོ་དཀར་གསུམ་མཆོད་པ་འབུལ། །བསང་ངོ་རྩི་སྨན་དུད་པས་བསང་། །བསྟོད་དོ་ངོ་སོ་གྱེན་དུ་བསྟོད། །རྣལ་འབྱོར་བདག་དང་ཡོན་བདག་གི །ཕ་མྱེས་སྔ་རབས་མན་ཆད་ནས། །བུ་ཚ་ཕྱི་རབས་ཕན་ཆོད་ཀྱི། །ཐུགས་དང་འགལ་བར་གྱུར་པའི་ལས། །ཤིང་བཅད་ཐབ་གཡོས་རྡོ་རྨོག་དང་། །ཁང་ལས་འཕྲུ་འདུལ་ལིང་བྱས་སོགས། །ཉེས་པ་གང་མཆིས་ཐམས་ཅད་བསང་། །ཁྱེད་རྣམས་ཡུལ་འདིར་གནས་པའི་ལྷ། །བདག་ཅག་ཡུལ་འདིར་གནས་པའི་མི། །གནས་མགྲོན་གཉིས་
ཀྱི་དམ་ཚིག་སྲུངས། །མིས་ཀྱང་ལྷ་ལ་དུས་སུ་མཆོད། །ལྷས་ཀྱང་མི་ལ་ཁ་འཛིན་མཛོད། །བྱ་ར་མེལ་ཆེ་བསུ་སྐྱེལ་དང་། །སྡོང་གྲོགས་མགོན་སྐྱབས་རྫི་བོ་གྱིས། །རིང་རང་ཅི་ལྟར་ནུས་པ་ཡི། །དངོས་གྲུབ་མ་ལུས་ཐམས་ཅད་སྩོལ། །ལོ་ལེགས་ཕྱི་ནང་འཁྲུག་པ་ཞི། །ཆར་ཆུ་དུས་འབེབས་སད་སེར་དང་། །བཙའ་འབུ་ལོ་ནད་མེད་པར་མཛོད། །དགྲ་རྐུན་ཅེ་སྤྱང་གནོད་པ་ཟློག །ནོར་ཕྱུགས་འཕེལ་ཁ་ཆེ་བར་མཛོད། །ཡམས་ནད་རིམས་ནད་ཞི་བ་དང་། །ཡུན་རིང་འཚོ་ཞིང་བདེ་ལེགས་མཛོད། །ཁྱེད་རྣམས་མཐུ་རྩལ་ཅི་གདའ་ལྟ། །མ་གཡེལ་བཅོལ་བའི་ཕྲིན་ལས་མཛོད། །ཅེས་བརྗོད། དཀར་གཏོར་གཡག་ལུག་ཡོད་ན་བྲན་ལ་བཀྱག ༈ བྷྲཱུཾ་ལས་རིན་ཆེན་སྣོད་དུ་གཏོར་མ་ནི། །དཀར་གསུམ་མངར་གསུམ་ཟག་མེད་བདུད་རྩིའི་མཚོ། །ཨོཾ་ཨཱཿཧཱུྃ་གིས་ཟག་མེད་བདུད་རྩི་བསྒྱུར། །གཡག་ལུག་ར་གསུམ་ལ་སོགས་མཐུན་པའི་རྫས། །ཟག་མེད་འདོན་ཡོན་ལྔ་ཡི་གཏེར་ཁ་འདི། །ཡུལ་ལྷ་གཞི་བདག་གཉན་པོ་ཐམས་ཅད་དང་། །ཁྱད་པར་ཀོ་དོ་ལ་གནས་གཞི་ཡི་བདག །ལྷ་ཀླུ་དགེ་བསྙེན་རྣམས་ལ་མཆོད་པ་འབུལ། །ཐམས་ཅད་
མ་ལུས་མཉེས་ཤིང་ཚིམ་གྱུར་ཅིག །ཧཱུྃ། སྔོན་ཚེ་སློབ་དཔོན་པདྨ་འབྱུང་གནས་ཀྱིས། །རྡོ་རྗེ་གྲོ་ལོད་ཅེས་བྱར་སྤྲུལ་ནས་ཀྱང་། །དཔལ་གྱི་བསམ་ཡས་བྲག་དམར་རྩ་བ་རུ། །བོད་ཀྱི་ལྷ་འདྲེ་ཐམས་ཅད་དབང་བསྡུས་ནས། །སྲོག་སྙིང་བླངས་ནས་དམ་ལ་བཏགས་པའི་ཚེ། །ཀོ་དོ་ལ་སོགས་ལྷ་ཀླུ་ཁྱེད་རྣམས་ཀྱིས། །ཇི་ལྟར་ཁས་བླངས་དམ་ལ་མ་འདའ་བར། །གཏོར་མ་འདི་བཞེས་བདག་གི་ཕྲིན་ལས་སྒྲུབས། །ཡང་གཅིག་སྤྲུལ་སྐུ་པདྨ་འབྱུང་གནས་ཀྱིས། །ཁམས་ཀྱི་སེངྒེ་བྲག་གི་དབེན་གནས་སུ། །གུ་རུ་དྲག་པོ་རིགས་ལྔར་སྐུ་སྤྲུལ་ནས། །ཁམས་ཕྱོགས་ལྷ་འདྲེ་གཅིག་ཀྱང་མ་ལུས་པ། །དབང་དུ་བསྡུས་ནས་དམ་ལ་བཏགས་པའི་ཚེ། །ཀོ་དོའི་ཡུལ་ལྷ་ཀླུ་གཉན་ཁྱེད་རྣམས་ཀྱང་། །དེ་དུས་ཇི་ལྟར་ཁས་བླངས་མ་བརྗེད་པར། །གཏོར་མ་འདི་བཞེས་བདག་གི་ཕྲིན་ལས་སྒྲུབས། །དེ་འོག་བསམ་ཡས་མཆིམས་ཀྱི་ཕུག་པ་རུ། །སློབ་དཔོན་ཆེན་པོ་པདྨ་འབྱུང་གནས་ཀྱིས། །གསང་འདུས་དྲག་པོའི་སྐུ་རུ་སྤྲུལ་ནས་ཀྱང་། །ལྷ་སྲིན་མ་ལུས་དམ་ལ་བཏགས་པའི་ཚེ། །ཀོ་དོའི་ཡུལ་ལྷ་ཀླུ་གཉན་ཁྱེད་རྣམས་ཀྱང་། །དེ་ཚེ་དེ་
དུས་ཁས་བླངས་དྲན་མཛོད་ལ། །གཏོར་མ་འདི་བཞེས་ཕྲིན་ལས་འགྲུབ་པར་མཛོད། །དེ་རྗེས་ཨོ་རྒྱན་པདྨ་ཐོད་ཕྲེང་གིས། །སྐུ་ཡི་སྤྲུལ་པ་བྱེ་བ་གྲངས་མེད་ཀྱིས། །བོད་ཁམས་ས་གཞི་ཏིལ་ཙམ་མ་ལུས་པ། །ཞབས་ཀྱིས་བཅགས་ནས་ལྷ་སྲིན་དམ་ལ་བཏགས། །དེ་ཚེ་ཀོ་དོའི་ཀླུ་དང་ཡུལ་ལྷ་ཁྱོད། །ཇི་ལྟར་དམ་བཅས་ཁས་བླངས་དེ་བཞིན་དུ། །གཏོར་མ་འདི་བཞེས་རྣལ་འབྱོར་ཕྲིན་ལས་སྒྲུབས། །དེ་ནས་རིག་འཛིན་པདྨ་འབྱུང་གནས་དེ། །ལྷོ་ནུབ་སྲིན་པོ་འདུལ་དུ་འབྱོན་དགོངས་ཚེ། །ཆུ་བོ་ལོ་ཧི་ཏ་ཡི་ཀླུང་འགྲམ་དུ། །བོད་ཁམས་ལྷ་འདྲེ་གཅིག་ཀྱང་མ་ལུས་པ། །དེ་རུ་འཚོགས་ནས་སློབ་དཔོན་བཤོལ་བའི་ཚེ། །ང་ཡི་བརྒྱུད་འཛིན་བསྟན་པ་སྲུངས་ཤིག་དང་། །ང་དང་འདུ་འབྲལ་མེད་གསུངས་བཀའ་བསྒོས་ཚེ། །ཀོ་དོའི་ཀླུ་དང་ཡུལ་ལྷ་ཁྱེད་རྣམས་ཀྱང་། །ཁས་བླངས་དམ་བཅའ་ཕུལ་བ་དྲན་མཛོད་ལ། །གཏོར་མ་འདི་བཞེས་བདག་གི་ཕྲིན་ལས་སྒྲབས་་།ང་ནི་སློབ་དཔོན་པདྨའི་བརྒྱུད་འཛིན་ཡིན། །ཁྱེད་ནི་ལྷ་འདྲེ་དེ་ཡིན་དེ་ཡི་རིགས། །དེ་ཕྱིར་སློབ་དཔོན་ཆེན་པོའི་བཀའ་མ་བཅག །དམ་རྫ་ས་བརྒྱན་པའི་གཏོར་
མཆོད་འདི་བཞེས་ལ། །སངས་རྒྱས་བསྟན་པ་དར་ཞིང་རྒྱས་པ་དང་། །འཇིག་རྟེན་ཁམས་འདི་བདེ་ཞིང་སྐྱིད་པ་དང་། །རྣལ་འབྱོར་བདག་དང་རྒྱུ་སྦྱོར་ཡོན་བདག་རྣམས། །ཚེ་རིང་ནད་མེད་དཔལ་འབྱོར་རྒྱས་པ་སོགས། །ཇི་ལྟར་ནུས་པའི་དངོས་གྲུབ་བསྩལ་དུ་གསོལ། །ཨོཾ་དྷེ་ཝ་ཙཀྲ་ནཱ་ག་རཱ་ཛ་ས་པཱ་རི་ཝཱ་ར་ཨི་དཾ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི། ཅེས་གཏོར་མ་འདིའི་རྩེ་དང་གཡག་ལུག་གི་མགོ་བསང་ནང་དུ་འབུལ། འདི་ཁ་རྐྱང་ཡིན་ན་ཁ་འཛིན་ཁུ་ཡེ་གཤེགས་བསྡུ་སོགས་རང་གཞུང་ལྟར་བྱའོ། །ཞེས་ཨ་མཆོད་ལྷ་ལུས་རིང་ནས་བསྐུལ་བར་ལྟར། ཤིང་ཕོ་རྟའི་ལོ་ཁྲུམས་ཀྱི་ཟླ་བའི་ཡར་ཚེས་བཅུ་གཉིས་སྔ་དྲོར་རྫོགས་པར་བྲིས་པ་ལ། ཉེས་པ་མཆིས་ན་ལྷ་ལ་བཤགས་ཤིང་། དགེ་བས་འཇིག་རྟེན་བདེ་སྐྱིད་འབྱུང་བར་གྱུར་ཅིག །ཅེས་རྣལ་འབྱོར་པ་ཨ་རཱ་གས་སོ།། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།