ཡལ་འདབ་དོན་གཅིག་པ་ནས་བརྒྱད་ཅུ་པའི་བར།
༈ ཡལ་འདབ་དོན་གཅིག་པ་ནི། འཕགས་པ་ཀུན་དགའ་བོ་རྒྱལ་བྱེད་ཀྱི་ཚལ་ན་བཞུགས་པའི་ཚེ། ཁྱིམ་བདག་ཤཱ་ནའི་གོས་ཅན་གྱིས་ལོ་ལྔར་དགེ་འདུན་རྣམས་ལ་དུས་སྟོན་ཆེན་པོ་
བྱས་ཏེ་མཐར་འཕགས་པའི་བཀས་རབ་ཏུ་བྱུང་། རིམ་གྱིས་སྡེ་སྣོད་གསུམ་འཛིན་པ་དང་། དགྲ་བཅོམ་པ་གཉིས་ཀའི་ཆ་ལས་རྣམ་པར་གྲོལ་བར་གྱུར་ཏོ། །རྒྱལ་པོ་མ་སྐྱེས་དགྲ་ཡང་འདས་ཏེ་ཡུད་ཙམ་དམྱལ་བར་སྐྱེས་ནས་ལྷར་འཕོས་པ་འཕགས་པ་འདི་ལས་ཆོས་ཉན་པས་རྒྱུན་ཞུགས་ཐོབ། སློབ་མ་དགྲ་བཅོམ་པ་སྟོང་དུ་ཉེ་བ་ཙམ་བྱུང་། སྔོན་རྒྱལ་པོ་མ་སྐྱེས་དགྲ་ཡོད་པའི་ཚེ་བྲམ་ཟེའི་རིགས་ཆོས་དང་མི་ལྡན་པ་ཤིན་ཏུ་གདུག་ཅིང་གཏུམ་པ་ཁ་ཟས་ཀྱང་གཙང་རྨེ་མེད་པར་སྤྱོད་ཅིང་། སྲོག་ཆགས་སྣ་ཚོགས་ཀྱི་སྲོག་གཅོད་པ། པ་ན་དང་། ན་པ་ཞེས་བྱ་བ་གཉིས་ཤིག་ཡོད་དོ། །དེ་གཉིས་ཀྱིས་ཁྱིམ་འགའ་ཞིག་ཏུ་རྐུན་པོ་བྱས་པའི་རྒྱུས། རྒྱལ་པོས་ལག་པ་བཅད་པ་ན། དེ་རྣམས་ཤིན་ཏུ་ཁྲོས་པས་དགྲ་བཅོམ་པ་མང་པོ་ལ་གདུགས་ཚོད་གསོལ་ཏེ། དགེ་བའི་རྩ་བ་འདིས་གནོད་སྦྱིན་དུ་གྱུར་ཏེ་རྒྱལ་པོ་དང་མ་ག་དྷཱ་པ་རྣམས་འཇོམས་པར་གྱུར་ཅིག་ཅེས་སྨོན་ལམ་བཏབ་བོ། །དུས་ལན་གཅིག་ན་དེ་གཉིས་རིམས་ཀྱིས་བཏབ་སྟེ་ཤི་ནས་གནོད་སྦྱིན་དུ་སྐྱེས་སོ། །གང་གི་ཚེ་རྒྱལ་པོ་ལག་བཟང་གིས་རྒྱལ་སྲིད་བྱས་ནས་ལོ་བདུན་ནམ་བརྒྱད་ལོན་པའི་ཚེ། དེ་གཉིས་མ་ག་དྷཱར་གནོད་སྦྱིན་གྱི་ས་ཐོབ་པར་གྱུར་ཏེ། ཡུལ་དུ་རིམས་ནད་ཆེན་པོ་བཏང་སྟེ། དེར་མི་ཕྱུགས་མང་པོ་ཤི་ཞིང་རིམས་ཆད་དུ་མ་འདོད་པ་ན་ལྟས་མཁན་རྣམས་ཀྱིས་དེ་ཚུལ་ཤེས་པས། མ་ག་དྷཱའི་ཡུལ་པ་རྣམས་ཀྱིས་མཉན་ཡོད་ནས་འཕགས་པ་ཤཱ་ནའི་གོས་ཅན་སྤྱན་དྲངས་ཏེ་གནོད་
སྦྱིན་དེ་གཉིས་འདུལ་བར་གསོལ་བ་བཏབ་བོ། །དེས་ཀྱང་དེ་གཉིས་གནས་པའི་རི་གུརྤ་ཞེས་བྱ་བར་གཤེགས་ཏེ་གནོད་སྦྱིན་གྱི་ཕུག་པར་བཞུགས་པ་ན། དེའི་ཚེ་གནོད་སྦྱིན་དེ་གཉིས་གནོད་སྦྱིན་གཞན་གྱི་མདུན་སར་སོང་བ་ལས་གྲོགས་གནོད་སྦྱིན་གཞན་ཞིག་གིས་སྦྲན་ཏེ། སླར་འོངས་ནས་རབ་ཏུ་ཁྲོས་པས་ཕུག་པའི་བྲག་རྣམས་གཏིབ་པ་ན། ཡང་ཕུག་པ་གཞན་ཞིག་བྱུང་སྟེ། དེ་ན་འཕགས་པ་ཤཱ་ནའི་གོས་ཅན་འདུག་གོ །དེ་ལྟར་ལན་གསུམ་སོང་བ་ན། དེ་གཉིས་ཀྱིས་མེ་སྦར་བས། དགྲ་བཅོམ་པས་དེ་བས་ཆེས་ཆེ་བའི་མེ་ཕྱོགས་བཅུར་སྦར་ཏེ། གནོད་སྦྱིན་གཉིས་སྐྲག་སྟེ་བྲོས་པ་ན། ཕྱོགས་ཐམས་ཅད་འབར་བས་འབྲོས་པའི་ས་ཡང་མ་རྙེད། དེར་ཤཱ་ནའི་གོས་ཅན་ལ་སྐྱབས་སུ་སོང་བས་མེ་ཞིའོ། །དེ་ནས་ཆོས་བསྟན་པས་ཤིན་ཏུ་དད་པར་གྱུར་ཏེ། སྐྱབས་སུ་འགྲོ་བ་དང་བསླབ་པའི་གནས་ལ་བཀོད། དེ་མ་ཐག་རིམས་ཀྱང་ཞི། དེ་ལྟ་བུའི་ཆོ་འཕྲུལ་བསྟན་པ། བྲམ་ཟེ་དང་ཁྱིམ་བདག་བརྒྱ་སྟོང་གིས་མཐོང་ངོ་། །ཤཱ་ནའི་གོས་ཅན་འདིས་སྔ་ཕྱིར་གདམས་ངག་བསྟན་པས་བདེན་པ་མཐོང་བ་ནི་འབུམ་ཙམ་མོ། །དགྲ་བཅོམ་པ་ནི་ལྔ་ཁྲི་ཙམ་བྱུང་ངོ་། །༈ ཡལ་འདབ་དོན་གཉིས་པ་ནི། མདོ་སྡེ་མཛངས་༼ཨ༽བླུན་ལེའུ་ཞེ་བདུན་པར་འབྱུང་བ་ཅུང་ཟད་བསྡུ་ན། སྟོན་པ་རྒྱལ་བྱེད་ཀྱི་ཚལ་ན་བཞུགས། ཡུལ་དེ་ན་བྲམ་ཟེ་ཀུན་ཏུ་རྒྱུ་ཉེར་སྦས་ཞེས་
མཁས་ཤིང་ཡིད་བརྟན་པ་ཞིག་ཡོད་པ་དེ་སྟོན་པའི་སྤྱན་སྔར་འོངས་ནས་བདག་རབ་ཏུ་འབྱུང་ན་ཤེས་རབ་དང་། སྤོབས་པ་ཤཱ་རིའི་བུ་དང་མཉམ་པ་ཞིག་འོང་ངམ་དྲིས་པས། དེ་ཙམ་མི་འབྱུང་གསུངས་པས་ཁྱིམ་དུ་གནས་སོ། །སྟོན་པས་འཁོར་རྣམས་ལ་ང་མྱ་ངན་ལས་འདས་ནས་ལོ་བརྒྱ་ཕྲག་ལོན་པ་ན་བྲམ་ཟེ་འདི་རབ་ཏུ་བྱུང་ཞིང་དགྲ་བཅོམ་པས་སེམས་ཅན་གྱི་དོན་བྱེད་ཅིང་བསྟན་པ་གསལ་བར་བྱ་བར་སངས་རྒྱས་རང་དང་མཉམ་པར་འགྱུར་ཞེས་ལུང་བསྟན་པ་ལྟར། འཕགས་པ་ཀུན་དགའ་བོས་ཤཱ་ནའི་གོས་ཅན་ལ་བསྟན་པ་གཏད་ནས། ཉེར་སྦས་རབ་ཏུ་བྱུང་ཞིག་ཅེས་བཀའ་སྩལ་ཏོ། །ཝཱ་རཱ་ཎ་སཱིར་ཁྱིམ་བདག་སྦས་པ་ཤཱ་ནའི་གོས་ཅན་གྱི་སྦྱིན་བདག་ཏུ་གྱུར་པར། བུ་གསུམ་བྱུང་བའི་ཐ་ཆུང་ཉེར་སྦས་ལ་འཕགས་པས་ཆོས་བསྟན་ནས་སེམས་ཅན་རྩེ་གཅིག་པ་ཡིད་ལ་བྱེད་དུ་བཅུག་སྟེ། དགེ་བའི་རྟོག་པར་རྡེའུ་དཀར་པོ་དང་། མི་དགེ་བར་རྡེའུ་ནག་པོ་བསོག་ཅིག་གསུངས་པས། ཐོག་མར་ནག་པོ་མང་། བར་དུ་ཆ་སྙོམས། ཐ་མར་དཀར་པོ་ཤས་ཆེ་བར་བྱུང་། གྲོང་དེའི་སྨད་འཚོང་མས་བྲན་མོ་ཉེར་སྦས་ཚོང་བྱེད་པའི་སར་མེ་ཏོག་ཉོ་བར་བཏང་བས་མེ་ཏོག་མང་དུ་བསྐུར། དེར་སྨད་འཚོང་མ་དེ་དགའ་ནས་འདོད་པའི་ཕྱིར་བོས་ཀྱང་ཉན་དུ་མ་འདོད། གཡོན་ཅན་མ་དེས་རྒྱལ་པོའི་བུ་ལ་འདོད་པ་སྤྱད་ཟིན་ནས་རྒྱན་ལ་ཆགས་པས་བསད་པའི་རོ་སྦས་པ། ཁྱིམ་བཤེར་བས་རྒྱན་མཐོང་ཞིང་རོ་རྙེད་དེ། རྒྱལ་པོར་ཞུས་པས་ཁྲིམས་ལ་སྦྱར་ཏེ་རྐང་ལག་གཏུབ། རྣ་བ་དང་སྣ་ཡང་བཅད་ཅིང་ཤིང་ཁར་བཏགས་ཏེ།
དུར་ཁྲོད་དུ་བཙུགས་སོ། །ཉེར་སྦས་དེར་སྙིང་རྗེའི་སྟོབས་ཀྱིས་སོང་ནས་མི་རྟག་པའི་ཆོས་བཞི་བསྟན་པས་ཆོས་ཀྱི་མིག་ཐོབ། ཉེར་སྦས་ཀྱང་ཕྱིར་མི་ལྡོག་པའི་འབྲས་བུ་ཐོབ་པ་ན། ཤཱ་ནའི་གོས་ཅན་ལས་རབ་ཏུ་བྱུང་ནས་དགྲ་བཅོམ་སྟེ་འཁོར་མང་པོ་ལ་ཆོས་བསྟན་པ་ན་བདུད་སྡིག་ཏོ་ཅན་འཁྲུགས་ནས་ཉིན་དང་པོར་གསེར་གྱི་དོང་རྩེའི་ཆར། ཉིན་གཉིས་པར་མེ་ཏོག་གི་ཆར། གསུམ་པར་གླང་པོ་ཆེ་མཐོན་མཐིང་ཁ་ནས་མཆེ་བ་དྲུག་བྱུང་བའི་མཆེ་བ་རེ་རེ་ལ་རྫིང་བུ་རེ་རེ་ཡོད་པ། རྫིང་བུ་རེ་རེ་ལ་མེ་ཏོག་བདུན་བདུན་ཡོད་པ། མེ་ཏོག་རེ་རེའི་ནང་དུ་ཤེལ་གྱི་བུ་མོ་བདུན་བདུན་ཡོད་པ། བུ་མོ་དེ་དག་ཀྱང་སོ་སོ་ནས་རོལ་མོ་མང་པོ་བྱེད་ཅིང་། གླང་པོ་ཆེ་གོམ་པ་པདྨ་ལ་དལ་གྱིས་འགྲོ་བ་བསྟན་པ་སོགས་ཆོ་འཕྲུལ་བྱུང་། བཞི་པར་ན་ཆུང་བཟང་མོ་ཤིན་ཏུ་མཛེས་ཤིང་བཟང་བ་ཞིག་འཁོར་གྱི་ནང་དུ་འོངས་པར་སྤྲུལ་བ་འཕགས་པས་ཀེང་རུས་དཀར་པོར་བསྒྱུར་བས་འཁོར་རྣམས་སྐྱོ་ནས་ཆོས་ཉན་ཏེ་འབྲས་བུ་ཐོབ་པ་མང་། ཆོས་ཞུ་བའི་རྗེས་འབྲངས་ཁྱི་ཞིག་ཡོད་པས་ཆོས་ཐོས་པའི་ཕན་ཡོན་གྱིས་ཤི་མ་ཐག་ལྷའི་རིས་དྲུག་པར་སྐྱེས་ཏེ་བདུད་དང་སྟན་གཅིག་ལ་སྡོད་པ་ཐོབ་པས། བདུད་ཀྱིས་དེའི་སྐྱེ་བ་ཤེས་པས་སེམས་འཁྲུགས་ནས་འཕགས་པ་ཏིང་ངེ་འཛིན་ལ་བཞུགས་པའི་དབུར་རིན་པོ་ཆེའི་ཅོད་པན་ཞིག་བཞག་པས། དེ་ཏིང་ངེ་འཛིན་ལས་བཞེངས་པ་ན་དེ་ལྟར་མཐོང་བས་བདུད་བཀུག་སྟེ། མེ་ཏོག་གི་ཕྲེང་བའི་ཟོལ་གྱིས་མགོ་བོར་སྦྲུལ་གྱི་རོ། །སྐེད་པར་མི་རོ་དང་ཁྱི་རོ་རུལ་པ་བཅིངས་པས་མི་འདོད་དོ། །དོར་བར་བྱས་ཀྱང་མ་ནུས་
ནས་བརྒྱ་བྱིན་དང་ཚངས་པ་སོགས་ལ་ཞུས་ཀྱང་ཐབས་རྡུག་པས། སླར་འཕགས་པ་ལ་བཟོད་པར་གསོལ་བ་ན། སེམས་ཅན་ཀུན་ལ་བྱམས་པའི་སེམས་བསྐྱེད་ན་རིན་པོ་ཆེའི་ཕྲེང་བར་འགྱུར་ཞིང་སྡིག་སེམས་སྐྱེས་ན་ཁྱི་རོ་ཉིད་དོ་གསུངས་པས་བདུད་ཀྱང་སྐྲག་ནས་དེ་ཕྱིན་དུལ་ལོ། །འཕགས་པས་བདུད་ལ་སངས་རྒྱས་སུ་སྤྲུལ་པར་བསྐུལ་བས་དེས་ཀྱང་སྤྲུལ་ལོ། །ཉེར་སྦས་འདིའི་སློབ་མ་དགྲ་བཅོམ་ཐོབ་པའི་མི་རེས་ཚུལ་ཤིང་སོར་བཞི་པ་རེ་དོར་བས་ཁང་པ་མཐོ་ཁྱད་ཁྲུ་དྲུག་ཅུ་པ་ཆུ་ཞེང་གབ་པའི་ནང་ཡོངས་སུ་གང་བར་གྱུར། ཉེ་སྦས་ཡོངས་སུ་མྱ་ངན་ལས་འདས་ཏེ་གདུང་ཡང་། ཤིང་བུ་དེ་རྣམས་ཀྱིས་ཞུགས་ལ་ཕུལ་བས་རིང་བསྲེལ་གཅིག་ཏུ་གྱུར་པ་ལྷ་རྣམས་ཀྱིས་ཁྱེར་རོ། །ཞེས་གྲགས་སོ། །༈ ཡལ་འདབ་དོན་གསུམ་པ་ནི། རྒྱལ་པོ་མྱ་ངན་མེད་ཀྱིས་ཚོང་པ་ལྔ་བརྒྱ་ཙམ་རྒྱ་མཚོར་ནོར་བུ་ལེན་པར་མངགས་ནས་དེ་རྣམས་ཀྱིས་ཀྱང་གྲུ་ལེགས་པར་གྲུབ་སྟེ། རིན་པོ་ཆེ་སྣ་ཚོགས་པས་བཀང་ནས་ཚུར་འོང་། རྒྱ་མཚོའི་ཚུར་འགྲམ་དུ་ངལ་གསོ་ཞིང་བསྡད་པ་ལས། ཀླུ་རྣམས་ཀྱིས་མཚོ་རླབས་བཏང་སྟེ་ཟོང་ཐམས་ཅད་རྒྱ་མཚོར་ཁྱེར་རོ། །དེ་ནས་དེ་རྣམས་འཚོ་བ་གཞན་ལ་རག་ལས་ཤིང་རིམ་གྱིས་འོངས་པས། ནམ་ཞིག་ན་ཞག་བདུན་ན་ཚོང་པ་རྣམས་པ་ཊ་ལི་པུ་ཏྲར་སླེབ་པར་གྲགས་ཤིང་དེ་
རྣམས་ཀྱིས་ཇི་ལྟར་གྱུར་པའི་གཏམ་མ་ཐོས་པས། བྲམ་ཟེ་དང་། ཀུན་ཏུ་རྒྱུ་དང་། སྐྱེ་བོའི་ཚོགས་དཔག་ཏུ་མེད་པ་དག་འདུས་ཏེ་ནོར་བུ་རྣམས་ཀྱི་ཁ་དོག་དང་། ངོ་མཚར་བའི་ཡོན་ཏན་གང་ཡིན་པ་དེ་མཐོང་བར་འགྱུར་རོ་ཞེས་ཞག་བདུན་པའི་ཉིན་པར་རྒྱལ་པོ་དང་སྐྱེ་བོའི་ཚོགས་བཅས་སྐྱེད་མོས་ཚལ་དུ་སོང་བ་ལས་ཚོང་པ་དེ་དག་སྟོད་གཡོག་ཁོ་ན་དང་བཅས་ཤིང་ཉམ་ཐག་པས་འོངས་པ་ན། ཧ་ཅང་མ་རིགས་ཏེ་གད་མོས་བཏབ་ནས་སྐྱེ་བོའི་ཚོགས་རྣམས་གྱེས་སོ། །རྒྱལ་པོས་རྒྱུ་དྲིས་པས། ཚོང་པ་རྣམས་ཀྱིས་ལོ་རྒྱུས་བཤད་དོ། །ལྷས་འདི་ལ་སླར་ཡང་ཀླུ་རྣམས་ཐུལ་འོག་ཏུ་ཆུད་པར་མ་མཛད་ན་ཕྱིན་ཆད་ནོར་བུ་ལེན་པར་སྤྲོ་བ་སུ་ཡང་མི་འབྱུང་གི་ལྷས་ཐབས་མཛད་པ་རིགས་སོ། །ཞེས་བསྐུལ། དེར་རྒྱལ་པོ་ཡིད་ཁོང་དུ་ཆུད་ཅིང་མཁས་པ་རྣམས་ལ་ཐབས་དྲིས་པ་ན། བྲམ་ཟེ་དང་ཀུན་ཏུ་རྒྱུ་ལ་སོགས་པ་རྣམས་ཀྱིས་མ་ཤེས། དེར་དགྲ་བཅོམ་མངོན་ཤེས་དྲུག་དང་ལྡན་པ་གཅིག་གིས་བསམ་པ་ན། དེའི་ཐབས་ལྷས་སྟོན་པར་འགྱུར་བ་ཡང་ཤེས། གལ་ཏེ་དགྲ་བཅོམ་པ་ཉིད་ཀྱིས་བསྟན་ན། འདི་ནི་དགེ་སློང་གི་ཕྱོགས་འཛིན་པ་ཡིན་ནོ་སྙམ་དུ་རྒྱལ་པོ་ཡང་ཐེ་ཚོམ་སྐྱེ་ཞིང་མུ་སྟེགས་ཅན་རྣམས་ཀྱིས་ཀྱང་ཁ་ཟེར་བར་འགྱུར་རོ་སྙམ་ནས། རྒྱལ་པོ་ཆེན་པོ་ཐབས་ཡོད་དེ། དོ་ནུབ་ཁྱིམ་གྱི་ལྷས་སྟོན་པར་འགྱུར་རོ་ཞེས་གསུངས་སོ། །དེ་ནས་ཐོ་རངས་ཀྱི་ཚེ། ཁྱིམ་གྱི་ནམ་མཁའ་ལ་གནས་པའི་ལྷས་རྒྱལ་པོ་སངས་རྒྱས་ལ་མཆོད་པ་རྒྱ་ཆེར་གྱིས་ཤིག །ཀླུ་ཐུལ་བར་འགྱུར་རོ། །ས་ལ་
གནས་པའི་ལྷས་རྒྱལ་པོ་དགྲ་བཅོམ་པའི་དགེ་འདུན་རྣམས་ལ་མཆོད་པར་གྱིས་ཤིག །དེས་ཐུལ་བར་འགྱུར་རོ་ཟེར། ནང་པར་སྐྱེ་བོའི་ཚོགས་ཐམས་ཅད་བསྡུས་ནས་ལྷའི་ལུང་བསྟན་བཤད་དེ་ད་ནི་ཇི་ལྟར་བགྱི་བྱས་པས་བློན་པོ་རྣམས་ན་རེ། ཁར་སང་ལུང་སྟོན་པ་པོའི་དགྲ་བཅོམ་པ་ཉིད་ལ་དྲིས་ཤིག་ཟེར་བས། དེ་སྤྱན་དྲངས་ཏེ་ཞུས་པ་ན་འདི་ལ་ཡིད་ཆེས་པའི་ཐབས་བྱའོ་ཞེས། རྒྱལ་པོ་མྱ་ངན་མེད་ཀྱི་བཀའ་ཀླུ་རྣམས་ཉོན་ཅིག །ཅེས་བྱ་བ་ལ་སོགས་པས་མཚམས་སྦྱར་ཏེ། ཚོང་པ་རྣམས་ཀྱིས་བླངས་པའི་ནོར་བུ་གང་ཡིན་པ་སླར་ཡང་ཚོང་པ་རྣམས་ལ་བྱིན་ཅིག་ཅེས་བྱ་བའི་ཡི་གེ་ཟངས་ཀྱི་གླེགས་བུ་ལ་བྲིས་ཏེ་གངྒཱ་ལ་བསྐྱུར། གྲོང་ཁྱེར་གྱི་ལམ་གྱི་གཞི་མདོ་ཆེན་པོར་རྡོ་རིང་ཤིན་ཏུ་མཐོ་བའི་རྩེ་མོར་ཨཥྚ་དྷཱ་རུའི་སྣོད་དུ་རྒྱལ་པོ་དང་ཀླུའི་གཟུགས་གསེར་ལས་བྱས་པ་རེ་རེ་བཞག །དེའི་ནང་པར་བལྟས་པས་ཀླུ་རྣམས་འཁྲུགས་ཏེ་རླུང་གི་འཚུབ་མ་ཆེན་པོ་དང་བཅས་ཟངས་ཀྱི་གླེགས་བུ་ཕོ་བྲང་གི་སྒོ་དྲུང་དུ་བོར། རྒྱལ་པོའི་གཟུགས་བརྙན་དེས་ཀླུའི་གཟུགས་བརྙན་ལ་ཕྱག་འཚལ་བར་སོང་བ་ལ། རྒྱལ་པོས་དགྲ་བཅོམ་པ་ལ་དྲིས་པས། ད་ལྟ་འདི་ནི་ཀླུ་རྣམས་བསོད་ནམས་ཆེ་བ་ཡིན་པས། སླར་ཡང་རྒྱལ་པོ་ཉིད་ཀྱི་བསོད་ནམས་བསྐྱེད་པའི་ཕྱིར། སངས་རྒྱས་དང་། དགེ་འདུན་ལ་མཆོད་པ་མཛོད་ཅིག་ཅེས་བསྐུལ་པས་སྐུ་གཟུགས་དང་མཆོད་རྟེན་ལ་མཆོད་པ་སྔར་གྱི་ལས་བདུན་འགྱུར་དུ་ཕུལ། དགྲ་བཅོམ་པ་དེས་ལྷ་དང་ཀླུ་ལ་སོགས་པའི་གནས་རྣམས་སུ་སྐད་ཅིག་གིས་སོང་སྟེ། དགྲ་བཅོམ་པ་ཐམས་ཅད་ལ་སྙན་གསན་ཕབ།
རྒྱལ་པོས་ཀྱང་དུས་སྟོན་གྱི་ཁང་པ་ཆེན་པོ་བརྩེགས་ཏེ། དགྲ་བཅོམ་པས་གཎྜི་བརྡུངས་པས་རི་རབ་དང་ཁོར་ཡུག་ལ་གནས་པ་ཚུན་ཆད་ཀྱི་དགྲ་བཅོམ་པ་ཀུན་འདུས་ཏེ། དགྲ་བཅོམ་པ་སྟོང་ཕྲག་དྲུག་ཅུ་ཚོགས་པ་ལ་ཟླ་བ་གསུམ་དུ་ཡོ་བྱད་ཐམས་ཅད་ཀྱིས་མཆོད་པར་བྱས་སོ། །དེའི་ཚེ་ཉིན་རེ་བཞིན་རྒྱལ་པོའི་གཟུགས་བརྙན་ཇེ་སྐྱེན་ལ་སོང་སྟེ་ཞག་བཞི་བཅུ་ཞེ་ལྔ་ན་རྒྱལ་པོ་དང་ཀླུའི་གཟུགས་བརྙན་གཉིས་པོ་མཉམ་པར་འགྲེང་བ་ཙམ་བྱུང་། དེ་ནས་ཉིན་རེ་བཞིན་ཀླུ་གཟུགས་ཇེ་གུག་ལ་སོང་སྟེ། སླར་ཞག་ཞེ་ལྔ་ན་ཀླུའི་གཟུགས་བརྙན་གྱིས་རྒྱལ་པོའི་གཟུགས་བརྙན་རྐང་པ་ལ་ཕྱག་འཚལ་བར་སོང་ངོ་། །སྐྱེ་བོ་ཐམས་ཅད་ཀྱང་དཀོན་མཆོག་མཆོད་པའི་བསོད་ནམས་ནི་འདི་འདྲའོ་ཞེས་ངོ་མཚར་ཆེན་པོ་སྐྱེས། དེ་ནས་སྔར་གྱི་ཟངས་གླེགས་གངྒཱར་འཕངས་པས་དེའི་ནང་པར་ཀླུའི་ཕོ་ཉ་མིར་སྤྲུལ་ནས་བྱུང་སྟེ། རིན་པོ་ཆེ་རྣམས་རྒྱ་མཚོའི་འགྲམ་ན་བསྐྱལ་ཡོད་ཀྱིས་ཚོང་པ་རྣམས་ལེན་དུ་ཐོང་ཞིག་ཟེར་བ་ལ། རྒྱལ་པོས་དེ་ལྟར་བྱེད་པར་བརྩམས་པ་ན། སྔར་གྱི་དགྲ་བཅོམ་པས། རྒྱལ་པོ་འདི་ནི་ངོ་མཚར་མི་ཆེ་ཡི། ཁྱེད་རྣམས་ཀྱིས་ཞག་བདུན་ནས་ནོར་བུ་འདིར་སྐྱོལ་ཅིག་ཅེས་སྤྲིངས་ཤིག་གསུངས་པ་བཞིན་བྱས་པས་ཞག་བདུན་པའི་ཉིན་པར་རྒྱལ་པོ་སྐྱེ་བོའི་ཚོགས་དཔག་ཏུ་མེད་པས་བསྐོར་བའི་དབུས་སུ་ཀླུ་རྣམས་ཚོང་པའི་གཟུགས་ཀྱིས་འོངས་ནས་ནོར་བུ་རྣམས་ཕུལ། རྒྱལ་པོའི་ཞབས་ལ་གཏུགས། སྐྱེ་བོའི་ཚོགས་ལ་ལྟད་མོར་བྱས་ཏེ། དེའི་དུས་སྟོན་ཆེན་པོ་ཡང་བྱས་སོ། །
༈ ཡལ་འདབ་དོན་བཞི་པ་ནི། རྒྱལ་པོ་
དེའི་སྐུ་ཚེའི་མཇུག་ཏུ་ཉི་འོག 
་གི་ཕྱོགས་དང་། ཁ་ཆེ་དང་། ཐོ་གར་ཡུལ་གྱི་དགེ་འདུན་རྣམས་ལ་གསེར་བྱེ་བ་ཕྲག་བརྒྱ་རེ་འབུལ་བར་དམ་བཅས་ནས། ཁ་ཆེ་དང་ཐོ་གར་གྱི་དགེ་འདུན་རྣམས་ལ་རྫོགས་པར་ཕུལ། ཡོ་བྱད་གཞན་ཡང་དེ་དང་མཉམ་པ་ཕུལ། ཉི་འོག་གི་དགེ་འདུན་རྣམས་ལ་གསེར་དང་ཡོ་བྱད་བྱེ་བ་བཞིར་མ་ལོངས་པའི་གནས་སྐབས་སུ་རྒྱལ་པོ་ཉིད་ནད་ཚབས་ཆེན་པོས་ཟིན་ཏེ། རྒྱལ་པོའི་ཚ་བོ་ནོར་ལྷས་བྱིན་ཞེས་བྱ་བ་གསེར་གྱི་མཛོད་གཉེར་བ་ཡིན་པ་དེས་རྒྱལ་པོའི་ངག་བཅག་སྟེ་གསེར་ལྷག་མ་དགེ་འདུན་ལ་མ་ཕུལ་ལོ། །དེའི་ཚེ་རྒྱལ་པོའི་དྲུང་དུ་དགྲ་བཅོམ་པ་མང་པོ་ལྷགས་པ་ལ་རྒྱལ་པོའི་སྐོམ་པ་སེལ་བའི་སྐྱུ་རུ་ར་སྙིལ་པ་ཕྱེད་ཡོད་པ་ཤིན་ཏུ་དད་པའི་སེམས་ཀྱིས་དགེ་འདུན་ལ་ཕུལ་བས། དགྲ་བཅོམ་པ་དེ་རྣམས་ཀྱིས་མགྲིན་གཅིག་ཏུ་རྒྱལ་པོ་ཁྱོད་ཀྱིས་སྔོན་ཐམས་ཅད་རང་དབང་དུ་གྱུར་པའི་ཚེ། གསེར་བྱེ་བ་དགུ་བཅུ་རྩ་དྲུག་ཏུ་ཕུལ་བ་ལས་ད་ལྟ་འདི་ཕུལ་བ་བསོད་ནམས་ལྷག་པར་ཆེའོ་ཞེས་བསྔགས། དེ་ནས་གཡོག་མོ་ཞིག་རྔ་ཡབ་ནོར་བུའི་ཡུ་བ་ཅན་གཡོབ་ཅིང་ཡོད་པ་ལས་ཉིན་མོ་ཚད་པའི་དུག་གིས་གཉིད་ཡུར་ཏེ་རྔ་ཡབ་ལག་ནས་ལྷུངས་པ་རྒྱལ་པོའི་ལུས་ལ་ཕོག་པས་སྔོན་ནི་རྒྱལ་པོ་ཆེན་པོ་རྣམས་ཀྱིས་ཀྱང་རྐང་པ་
འཁྲུ་བ་ལ་སོགས་པ་བྱེད་པ་ཡིན་ན། ད་ལྟ་བྲན་གྱི་ཐ་མ་འདི་ལྟ་བུས་ཀྱང་བརྙས་སོ་སྙམ་ནས་ཁྲོས་པའི་སེམས་དང་བཅས་ཏེ་དུས་ལས་འདས་སོ། །དེར་ཁྲོས་པའི་རྐྱེན་གྱིས་པ་ཊ་ལི་པུ་ཏྲ་དེ་ཉིད་དུ་མཚོ་ཆེན་པོའི་ནང་དུ་ཀླུར་སྐྱེས་པ་ན་དགྲ་བཅོམ་གྲགས་པས་རྒྱལ་པོ་ཆོས་དང་ལྡན་པ་གང་དུ་སྐྱེས་ཞེས་བརྟགས་པས་མཚོ་དེར་ཀླུར་སྐྱེས་པར་ཤེས། དགྲ་བཅོམ་པས་མཚོ་དེའི་འགྲམ་དུ་འོངས་པ་ན་སྔོན་གྱི་བག་ཆགས་ཀྱིས་རབ་ཏུ་དགའ་བའི་ཤུགས་ཀྱིས་མཚོ་དེའི་སྟེང་དུ་འོངས་ནས་དགྲ་བཅོམ་པའི་དྲུང་དུ་འདུག་པ་ལས། བྱ་དང་སྲོག་ཆགས་རྒྱུ་བ་ཟ་བར་རྩོམ་པའི་ཚེ་རྒྱལ་པོ་ཆེན་པོ་བག་ཡོད་པར་མཛོད་ཅིག་ཅེས་སོགས་ཆོས་བསྟན་པས། དེ་ཉིད་དུ་ཁ་ཟས་བཅད་དེ་ཤི་ནས་དགའ་ལྡན་གྱི་ལྷ་རྣམས་ཀྱི་ནང་དུ་སྐྱེས་སོ་ཞེས་གྲགས། རྒྱལ་པོ་དེས་རང་གིས་དབང་བསྒྱུར་བའི་ཡུལ་ཐམས་ཅད་དུ་གཙུག་ལག་ཁང་དང་། ཆོས་ཀྱི་གཞི་མང་པོ་དག་བྱས་པས་ཕྱོགས་ཐམས་ཅད་དུ་སངས་རྒྱས་ཀྱི་བསྟན་པས་ཁྱབ་པར་གྱུར་ཏོ། །གང་གི་ཚེ་སངས་རྒྱས་ཀྱི་བསྟན་པ་ལ་དད་པ་ཐོབ་པ་དེ་ཕྱིན་ཆད་ནས་སྔར་གྱི་མིང་འགྱུར་ཏེ། དྷརྨཱ་ཨ་ཤོ་ཀ་སྟེ་ཆོས་རྒྱལ་མྱ་ངན་མེད་དུ་གྲགས་སོ། །ཉི་འོག་གི་དགེ་སློང་ཁག་ལ་གསེར་བྱེ་བ་དགུ་བཅུ་རྩ་དྲུག་ལས་འབུལ་མ་ཐུབ་པའི་སྐབས་དེར་བློན་པོ་བློ་གྲོས་ཅན་ཞིག་གིས་ཐབས་ཡོད་དེ་རྒྱལ་སྲིད་ཐམས་ཅད་དགེ་འདུན་ལ་གཏོད་དང་གསེར་བྱེ་བ་བརྒྱ་ནི་དེ་ཉིད་ཀྱི་ཁོངས་ན་གནས་སོ་ཟེར་བ་ལྟར་རྒྱལ་སྲིད་དགེ་འདུན་ལ་ཕུལ་བས། རྒྱལ་པོའི་བསོད་ནམས་འཕེལ་
བའི་དོན་དུ་ཉིན་ཞག་གཉིས་དགེ་འདུན་གྱིས་རྒྱལ་སྲིད་བསྐྱངས། དེར་དགེ་འདུན་ལ་གསེར་དང་དབྱིག་དཔག་ཏུ་མེད་པ་ཕུལ་ཏེ། རྒྱལ་སྲིད་བླངས་ནས་མྱ་ངན་མེད་ཀྱི་ཚ་བོ་མྱ་ངན་བྲལ་རྒྱལ་སྲིད་ལ་བསྐོས་སོ། །༈ ཡལ་འདབ་དོན་ལྔ་པ་ནི་གོ་སླའོ། །༈ ཡལ་འདབ་དོན་དྲུག་པ་ནི། མདོ་སྡེ་༼ཧ༽ལས་བརྒྱ་པའི་སྡོམ་གཉིས་པའི་སྒམ་པོ་དང་དོན་མཐུན་པས་བསྡུས་ཏེ་འཆད་ན། སྟོན་པས་མཉན་ཡོད་ཀྱི་སྐྱེ་བོ་རྣམས་སྐྱོ་བ་བསྐྱེད་པས་འདུལ་བར་དགོངས་ནས། ཆུ་ཀླུང་ཁང་ལྡན་གྱི་འགྲམ་དུ་འཁོར་རྣམ་བཞི་དང་བཅས་ཕེབས་པ་ན་སྐྱེ་བོའི་ཚོགས་དུ་མ་ཡང་འདུས་སོ། །ཆུ་ཀླུང་དེར་སེམས་ཅན་ཉའི་རྣམ་པ་ལུས་ཆེ་ཞིང་མིག་ལོང་བ། ལུས་ཐམས་ཅད་རྨས་གང་བ། དེའི་སྤྱི་བོ་མན་ཆད་རྐང་མཐིལ་ཡན་ཆད་སྲིན་བུ་ཞུགས་པས་དེས་ན་ཚ་མི་བཟོད་པར་ཕན་ཚུན་དུ་རྒྱུགས་པས་གལ་ཏེ་ཐང་ལ་འགྲོ་ན་ནི་དེ་ཉིད་ནས་ཤིང་ཤ་མ་ལིའི་ཚལ་འབྱུང་བར་འགྱུར་ཏེ། དེ་ལ་དེར་རལ་གྲི་དང་། མདུང་ཐུང་དང་། མདའ་བོ་ཆེ་དང་། རྡོ་རྗེ་རྩེ་གཅིག་པ་དང་། མདུང་ཁ་ལེབ་རྣམས་རླུང་གིས་སྦགས་ཏེ་དེའི་སྟེང་དུ་བབ། རྩིག་པའི་གསེབ་བམ་རི་ཡི་སུལ་ལམ་བྱ་སྐྱིབས་དག་ཏུ་འགྲོ་བ་ན་དེ་ཉིད་ནས་ལས་ལས་སྐྱེས་པའི་མི་དག་འབྱུང་ནས་གོང་གི་མཚོན་ཆ་སྣ་ལྔས་
དེའི་ལུས་གཅོད་ཅིང་གཏུབ་པའི་སྡུག་བསྔལ་གྱི་ཚོར་བ་དྲག་པོ་ཉམས་སུ་མྱོང་སྟེ་ཉམ་ཐག་པའི་སྐད་འབྱིན་ཅིང་ངུའོ། །སངས་རྒྱས་བཅོམ་ལྡན་འདས་ཐབས་མཁས་ལ་ཐུགས་རྗེ་ཆེན་པོ་དང་ལྡན་པ་དེ་ཉིད་ཀྱི་ཡེ་ཤེས་ཀྱི་གཟིགས་པས་འཇིག་རྟེན་ཁམས་སུ་དུས་དྲུག་ལ་རྟག་པར་འཇུག་པ་ཆོས་ཉིད་དེ། འདི་རེས་མཉན་ཡོད་ཀྱི་མི་རྣམས་སྐྱོ་བ་བསྐྱེད་པས་འདུལ་བར་གཟིགས་པའི་ཕྱིར་སེམས་ཅན་དེ་རྫུ་འཕྲུལ་གྱིས་བཀུག་ནས་ཆུ་ཀླུང་ཁང་ལྡན་གྱི་འགྲམ་དུ་བཞག་པ་ན། དེར་ཡང་ན་ཚ་མི་བཟོད་ནས་ཕན་ཚུན་དུ་རྒྱུག་པར་བྱེད་ལ། དེ་ཐང་དུ་འགྲོ་ན། དེ་ཉིད་ནས་སེངྒེ་དང་། སྟག་གཟིག་དྲེད་མོང་སོགས་གཅན་གཟན་ལྕགས་ཀྱི་མཆེ་བ་ཅན་འབྱུང་ནས་དེའི་ཤ་རྣམས་བཅད་ཅིང་བཟའ་ལ། ཆུར་འགྲོ་ན་ཆུ་སྲིན་མ་ཀ་ར་ལྕགས་ཀྱི་མཆེ་བ་ཅན་འབྱུང་། གལ་ཏེ་ནམ་མཁར་འགྲོ་ན་དེ་ཉིད་ནས་བྱ་རོག་དང་བྱ་རྒོད་དང་ཆུན་ལག་ལྕགས་མཆུ་ཅན་དག་འབྱུང་བས་ཟ་བར་བྱེད་དོ། །ནགས་དང་རྩིག་པ་སོགས་སུ་འགྲོ་ན་རིམ་བཞིན། ཤ་མ་ལིའི་ཚལ་སྐྱེས་པའི་གསེབ་ནས་མཚོན་ཆ་ལྔས་འབིགས་པ་དང་། ལས་ལས་སྐྱེས་པའི་མི་དག་གིས། རལ་གྲི་དང་། མདུང་ཐུང་དང་། མདའ་བོ་ཆེ་དང་། རྡོ་རྗེ་རྩེ་གཅིག་པ་དང་། མདུང་ཁ་ལེབ་རྣམས་ཐོགས་ནས་དེའི་ལུས་ལ་འདེབས་ནས་བཅད་གཏུབ་བྱེད་དེ། རྒྱུ་དེས་སྡུག་བསྔལ་ཤིན་ཏུ་མི་བཟད་པ་མྱོང་སྟེ་ཉམ་ཐག་པའི་སྐད་འབྱིན་ནོ། །དེ་ནས་དེའི་ཀུ་ཅོའི་སྒྲས་མཉན་ཡོད་ཀུན་གང་བ་ན། དེར་གནས་པའི་སྐྱེ་བོ་ཕལ་པོ་ཆེས་ཐོས་སོ། །ཐོས་ནས་ཀྱང་སྲོག་ཆགས་
འདི་རྒྱུ་མཚན་གང་ཞིག་སྙམ་མོ། །དེས་སངས་རྒྱས་ཀྱིས་སྲོག་ཆགས་དེ་མི་སྐད་སྨྲ་ཤེས་པར་བྱིན་གྱིས་བརླབས་ནས་དྲི་བཤད་མཛད་པ་ན། སྐྱེ་བོའི་ཚོགས་ཀྱིས་དེའི་སྔོན་འབྱུང་སྟོན་པར་ཞུས་པས་འདི་ལྟར་གསུངས་ཏེ། སྔོན་རྫོགས་པའི་སངས་རྒྱས་འོད་ཟེར་ཅན་གྱི་དུས། དགྲ་བཅོམ་པ་ལྔ་བརྒྱ་ལྗོངས་རྒྱུར་སོང་བ་རྒྱལ་པོའི་སྐྱེད་ཚལ་དུ་བཞུགས་པ་ན། རྒྱལ་པོ་དང་བཙུན་མོའི་ཚོགས་སྐྱེད་ཚལ་དུ་རྒྱུ་བའི་སྐབས། བཙུན་མོའི་ཚོགས་ཀྱིས་སྔར་མཐོང་ནས་ཐམས་ཅད་ལ་ཕྱག་འཚལ་ཞིང་། དེ་རྣམས་ལས་ཆེས་བགྲེས་པའི་མདུན་དུ་ཆོས་ཉན་པའི་ཕྱིར་འཁོད་དོ། །རྒྱལ་པོས་སྐྱེད་ཚལ་དུ་སྐྱེས་པའི་སྒྲ་ཐོས་པས་ཁྲོས་འཁྲུགས་རྔམ་ནས་རལ་གྲི་ཐོགས་ཏེ་རྒྱུག་པས་མཐོང་མ་ཐག་མ་བརྟགས་པར་དགྲ་བཅོམ་པ་དེ་རྣམས་ལྕག་གིས་གཞུས་ཤིང་། གཤེད་མ་རྣམས་ལ་གཏད་དེ། ཁ་ཅིག་གསལ་ཤིང་ལ་བསྐྱོན་ནས། རལ་གྲི་དང་། མདུང་ཐུང་དང་། མདའ་བོ་ཆེ་དང་། རྡོ་རྗེ་རྩེ་གཅིག་པ་དང་། མདུང་ཁ་ལེབ་རྣམས་ཀྱིས་བསྣུན། ཁ་ཅིག་གསོན་པོར་ཁྱི་ལ་ཟར་བཅུག །ཁ་ཅིག་ལུས་དུམ་བུ་དྲུག་ཏུ་བཅད་དེ་ཕྱོགས་ཀུན་ཏུ་བོར་བའི་རྒྱལ་པོ་དེའི་རྣམ་སྨིན་ཡིན་གསུངས། ད་རུང་སངས་རྒྱས་ལྔ་བརྒྱའི་རིང་ལས་ངན་འདི་མྱོང་། དེ་ནས་རིགས་ངན་ཞིག་གི་ཁྱིམ་དུ་མི་ལུས་ཐོབ། དེར་རྔོན་པར་གྱུར་ནས་རི་དྭགས་ལ་རྒྱ་བཙུགས་པས་རང་སངས་རྒྱས་ཤིག་བྱུང་ནས་རི་དྭགས་འབྲོས། དེར་ཁྲོས་ཏེ་རང་སངས་རྒྱས་བསད་ནས་ཡང་སེམས་ཅན་དམྱལ་བར་ལོ་སྟོང་ཕྲག་དུ་མར་ལྟུང་། དེ་ནས་མིར་སྐྱེ་བ་ཐོབ་ནས་སངས་རྒྱས་
བླ་མ་ཞེས་བྱ་བའི་བསྟན་པར་རབ་ཏུ་བྱུང་ནས་ཉོན་མོངས་པ་ཐམས་ཅད་སྤངས་ཏེ་དགྲ་བཅོམ་པ་ཉིད་མངོན་སུམ་དུ་བྱེད་པར་འགྱུར་རོ། །དེར་ཡང་རྒྱལ་པོའི་སྐྱེད་ཚལ་དུ་གནས་བཅས་པ་དང་བཙུན་མོ་རྣམས་ཀྱིས་ཆོས་ཉན་པ་ན། རྒྱལ་པོས་ཕྲག་དོག་གིས་ལུས་ལྕག་གིས་གཞུས་ནས། ལུས་དུམ་བུ་དྲུག་ཏུ་བཅད་དེ་གསོན་པོར་གསལ་ཤིང་ལ་བཙུགས་ནས། རལ་གྲི་དང་། མདུང་ཐུང་དང་། མདའ་བོ་ཆེ་དང་། རྡོ་རྗེ་རྩེ་གཅིག་པ་དང་། མདུང་ཁ་ལེབ་རྣམས་ཀྱིས་ལུས་ལ་བསྣུན་ནས་ཁྱི་ལ་བྱིན་པར་འགྱུར་ཏེ། དེ་ནི་སྐྱེ་བའི་ཐ་མ་ཡིན་ནོ་ཞེས་གསུངས་སོ། །༈ ཡལ་འདབ་དོན་བདུན་པ་ནི། སྟོན་པ་ཡུལ་ཨ་དུ་མ་ན་འབྱུང་པོའི་ཁྱིམ་ན་བསམ་གཏན་ལ་བཞུགས་སོ། །ཡུལ་དེར་འབྲུག་སྒྲ་དང་ཐོག་བབ་སྟེ། གླང་བཞི་དང་། ཁྱིམ་བདག་ཞིང་པ་སྤུན་གཉིས་བསད་པས་སྐྱེ་བོའི་ཚོགས་ཀྱང་སྒྲ་ཆེན་པོ་བྱུང་། ཡུལ་མི་ཞིག་དང་སྟོན་པ་དྲི་བཤད་མཛད་པ་ན། སྟོན་པས་གནས་པའི་བསམ་གཏན་ཉེ་བར་ཞི་ནས་ཐོག་དང་འབྲུག་གི་སྒྲ་མ་གསན་པ་ཐོབ་པས་ཤིན་ཏུ་ངོ་མཚར་སྐྱེས་སོ། །ཡུལ་དེར་དྲང་སྲོང་ཀཻ་ནེ་ཡ་ཞེས་བྱ་བ་འཁོར་ལྔ་བརྒྱ་ཡོད་པ་མངོན་པར་ཤེས་པ་ལྔ་དང་ལྡན་པ་ཞིག་དང་། དེ་དང་ཉེ་བའི་ནགས་ཁྲོད་ཅིག་ན་དེ་ཉིད་ཀྱི་སྲིང་མོའི་བུ་དྲང་སྲོང་རི་བོ་ཞེས་འཁོར་ལྔ་བརྒྱ་ཡོད་པ་ཞིག་གནས་སོ། །སྟོན་པས་དྲང་སྲོང་དེ་
གཉིས་འདུལ་བར་དགོངས་ནས་མཚོ་དལ་བབ་ཀྱི་འགྲམ་དུ་བྱོན་ནས་འཇིག་རྟེན་པའི་ཐུགས་བསྐྱེད་པ་ན་རྒྱལ་ཆེན་བཞི་ཆོས་ཉན་པར་འདུས་པའི་འཁོར་དུ་མི་མ་ཡིན་མང་བས་དྲང་སྲོང་གཉིས་ལ་གནོད་པ་སྲུང་བར་རྒྱལ་པོ་བཞིས་གཡོག་ཅིག་མངགས་པ་དེས་རྒྱུ་མཚན་རྣམས་དྲང་སྲོང་རྣམས་ལ་བཤད་དོ། །དེར་རྒྱལ་པོ་ཆེན་པོ་ཡུལ་འཁོར་སྲུང་དྲི་ཟ་སྟོང་ཕྲག་དུ་མ་དང་བཅས། འཕགས་སྐྱེས་པོ་གྲུལ་བུམ་སྟོང་ཕྲག་དང་བཅས། མིག་མི་བཟང་ཀླུ་དབང་སྟོང་ཕྲག་དང་བཅས། རྣམ་ཐོས་བུ་གནོད་སྦྱིན་སྟོང་ཕྲག་དུ་མ་དང་བཅས་པས་ལྷའི་མེ་ཏོག་དང་། རིན་པོ་ཆེ་དང་། མུ་ཏིག་དང་། གསེར་དངུལ་སོགས་ཀྱིས་ཐུ་བ་བཀང་སྟེ་གཏོར་ནས་སྟོན་པའི་དྲུང་དུ་ཕྱོགས་བཞིར་འཁོད་དོ། །ཡུལ་འཁོར་སྲུང་དང་འཕགས་སྐྱེས་པོ་ལ་དབུས་པའི་སྐད་དུ་ཆོས་གསུངས། སྤྱན་མི་བཟང་དང་རྣམ་ཐོས་སྲས་ལ་མཐའ་འཁོབ་པའི་སྐད་དེ། སྔ་མར། ཨེ་ནེ་མེ་ནེ་དབ་ཕུ། ད་དབ་ཕུ་དང་། རྗེས་མར། མཱ་ཤཱ་ཏུ་ཤཱ། སང་ཤཱ་མཱ། སརྦ་ད་ཏྲ་བི་ར་ཏྲཱི། སོགས་ཀྱིས་ཆོས་གསུངས་པས། དེ་དག་ཆོས་མཐོང་ཆོས་རྙེད་ཆོས་ཀྱི་གཏིང་སླེབས་ནས་བཅོམ་ལྡན་འདས་ལ་ཕྱག་འཚལ་ཏེ་དོང་ངོ་། །རྒྱལ་པོ་བཞིའི་སྔོན་འབྱུང་། སངས་རྒྱས་འོད་སྲུང་གི་དུས་རི་རབ་ཀྱི་བང་རིམ་ལ་ཀླུའི་རྒྱལ་པོ་དབུགས་ཆེན་དང་དབུགས་ཆུང་གཉིས་གནས་པས་སྐྱབས་འགྲོ་དང་། བསླབ་པའི་གཞི་བླངས་ནས་བག་ཡངས་སུ་འཁོད་པར། ནམ་མཁའ་ལྡིང་སྒྲ་སྙན་དང་སྒྲ་ཆུང་གིས། གནོད་པར་བརྩམས་ཀྱང་མ་ནུས་པས་ཀླུ་ལ་དོན་
དྲིས་པས་སངས་རྒྱས་ཀྱི་བསྔགས་པ་ཐོས་ནས། དེ་གཉིས་ཀྱང་སངས་རྒྱས་ལས་སྐྱབས་འགྲོ་དང་བསླབ་པའི་གཞི་བླངས། འཆི་ཀར་དེ་བཞིས་སྨོན་ལམ་བཏབ་པ་བདག་ཅག་གིས་སངས་རྒྱས་འོད་སྲུང་ལས་ཚེ་གཅིག་ཏུ་སྐྱབས་འགྲོ་དང་། བསླབ་པའི་གཞི་རྣམས་བསྲུངས་པའི་དགེ་བའི་རྩ་བས་གང་དང་གང་དུ་སྐྱེས་ཀྱང་གཙོ་བོར་སྨོས་པ་དང་། སངས་རྒྱས་ཤཱཀྱ་ཐུབ་པ་བདག་ཅག་གིས་མཉེས་པར་བྱེད་པར་གྱུར་ཅིག །ཅེས་བྱས་སོ། །དེ་ནས་དྲང་སྲོང་ཀཻ་ནེ་ཡ་ཡང་སྟོན་པ་ལྷ་དང་མི་རྣམས་ལས་ཁྱད་པར་དུ་འཕགས་པར་ཤེས་ནས་སྤྱན་སྔར་ཕྱིན་ཏེ། ཕྱག་འཚལ་ཞིང་ཆོས་ཉན་པས་ཀཻ་ནེ་ཡས་ཕྱིར་མི་འོང་བའི་འབྲས་བུ་མངོན་ཏུ་བྱས། དེས་བཅོམ་ལྡན་འདས་ལ་དུས་མ་ཡིན་པར་གསོལ་དུ་རུང་བའི་བཏུང་བ་བརྒྱད་དེ། ཀུ་ཤུ་དང་། ཆུ་ཤིང་གི་འབྲས་བུ་དང་། རྒྱ་ཤུག་གི་འབྲས་བུ་དང་། ཨ་ཤྭཏྠའི་འབྲས་བུ་དང་། ཨུ་དུམྦཱ་རའི་འབྲས་བུ་དང་། པ་རུ་ཤ་ཀའི་འབྲས་བུ་དང་། འབྲ་གོ་དང་། རྒུན་འབྲུམ་རྣམས་ཀྱི་ཁུ་བའི་བཏུང་བ་རྣམས་ཕུལ་ཞིང་། ཞལ་ཟས་བསོད་པ་སྟ་གོན་བྱས་པ་རི་བོས་ཚོར་ནས་རྒྱུན་མཚན་དྲིས་པས། སངས་རྒྱས་ལ་སོགས་པ་དགེ་སློང་གི་དགེ་འདུན་སང་བཤོས་ལ་འདྲེན་ནོ་སྨྲས་པས། རི་བོས་སངས་རྒྱས་ཀྱི་སྒྲ་སྔར་མ་ཐོས་པ་ཐོས་པས་དགའ་བ་སྐྱེས་ནས་འཕྲལ་དུ་རི་བོ་སྟོན་པའི་སྤྱན་སྔར་ཕྱིན་ཆོས་ཉན་པས་ཕྱིར་མི་འོང་བའི་འབྲས་བུ་ཐོབ་ནས་འཁོར་ལྔ་བརྒྱ་དང་བཅས་རབ་ཏུ་བྱུང་ཟིན་པས་སངས་རྒྱས་དང་ལྷན་ཅིག་ཀཻ་ནེ་ཡའི་གདུགས་ཚོད་
ལ་འོང་ངོ་། །ཀཻ་ནེ་ཡ་འཁོར་ལྔ་བརྒྱ་དང་བཅས་པའང་རབ་ཏུ་བྱུང་ནས་དྲང་སྲོང་གཉིས་དགྲ་བཅོམ། དེ་གཉིས་ཀྱི་འཁོར་དགེ་སློང་ལྔ་བརྒྱ་བྲམ་ཟེ་ཀ་པི་ན་ཆེན་པོ་ལ་གཏད་པ་དགྲ་བཅོམ། ཉིས་བརྒྱ་ལྔ་བཅུ་ཤཱ་རིའི་བུ་ལ་གཏད་པས་རྒྱུན་ཞུགས་ཐོབ། ཉིས་བརྒྱ་ལྔ་བཅུ་མོའུ་འགལ་བུ་ལ་གཏད་པས་ཕྱིར་མི་འོང་བ་ཐོབ། སླར་དབྱར་གནས་གྲོལ་ནས་དགེ་སློང་དེ་དག་ཐམས་ཅད་སངས་རྒྱས་ཀྱི་སྤྱན་སྔར་འཚོགས་པས་ལྷག་མ་ལྔ་བརྒྱ་པོས་ཀྱང་དགྲ་བཅོམ་པ་ཉིད་མངོན་སུམ་དུ་བྱས་སོ། །འཁོར་རྣམས་ཀྱིས་རྒྱུ་མཚན་ཞུས་པས། ཀ་པི་ནའི་སློབ་མ་རྣམས་དབང་རྣོན། མོའུ་འགལ་བུའི་སློབ་མ་རྣམས་དབང་འབྲིང་། ཤཱ་རིའི་བུའི་སློབ་མ་རྣམས་དབང་པོ་ཐ་མ་ཡིན་པས་དེ་ཀ་པི་ན་ལ་གཏད་ན་དྲོ་བར་འགྱུར་བ་ཡང་བསྐྱེད་མི་ནུས་གསུངས། སྔོན་འབྱུང་རི་ཞིག་ལ་དྲང་སྲོང་འཁོར་ལྔ་བརྒྱ་དང་ལྡན་པ་གཉིས་གནས། དེ་དང་ཉེ་བར་ཡང་དྲང་སྲོང་འཁོར་ལྔ་བརྒྱ་དང་ལྡན་པ་གཉིས་ཡོད་དོ། །རེ་ཞིག་དྲང་སྲོང་བསྒྲེས་པ་ཤི་ནས། དེའི་སློབ་མ་རྣམས་ཀྱིས་རུས་བུ་ལ་མཆོད་པ་བྱས་ནས་དྲང་སྲོང་ཅིག་ཤོས་ཀྱི་རྩར་འོང་བ་ན། དེས་ཀྱང་རང་ཉིད་ཀྱང་ན་ཚོད་ལོངས་པས་འཁོར་སྐྱོང་དཀའ་ཞིང་། སླར་ཤི་བའི་རྗེས་སུ་སྔ་མ་ལྟར་སློབ་མ་རྣམས་མགོན་མེད་འགྱུར་དོགས་པས། དྲང་སྲོང་ཉེ་བ་དེ་ལ་གཡོག་སྟོང་རྣམས་བྱིན་ནས་བསླབ་བྱ་དང་བཅས་སྐྱོང་བར་བསྐུལ་ལོ། །དྲང་སྲོང་དེ་ལ་སློབ་མ་མཆོག་གསུམ་ཡོད་པས། གཅིག་ལ་བྲམ་ཟེའི་ཁྱེའུ་
ལྔ་བརྒྱ་གཏད་པས་བསམ་གཏན་བཞི་དང་མངོན་པར་ཤེས་པ་བསྐྱེད་པ་དེ་ཀ་པི་ན་འཁོར་བཅས་ཡིན། གཅིག་ལ་ཉིས་བརྒྱ་ལྔ་བཅུ་གཏད་པས། གཟུགས་མེད་ཀྱི་ཁམས་སུ་བཀོད་པ་མོའུ་འགལ་བུ། གཅིག་ལ་ཉིས་བརྒྱ་ལྔ་བཅུ་གཏད་པས་གཟུགས་ཁམས་ལ་བཀོད་པ་ཤཱ་རིའི་བུ་ཡིན་གསུངས་སོ། །དྲང་སྲོང་གཙོ་བོ་གཉིས་ཀྱི་སྔོན་འབྱུང་ནི། སངས་རྒྱས་འོད་སྲུང་གི་དུས། ཝཱ་རཱ་ཎ་སཱིར་ཁྱིམ་བདག་མཛའ་ཞིང་བཤེས་པ་གཉིས་ཡོད། དེ་གཉིས་རབ་ཏུ་བྱུང་ཞིང་སོ་སོར་སློབ་མ་ལྔ་བརྒྱ་ལྔ་བརྒྱ་ཡོད་པས་འཁོར་བཅས་ཀྱིས་ཚངས་པར་སྤྱོད་པ་སྤྱད་ནས་འཆི་ཀར་སྨོན་ལམ་བཏབ་པ། དགེ་བ་འདིས་སངས་རྒྱས་ཤཱཀྱ་ཐུབ་པའི་བསྟན་པ་ལ་རབ་ཏུ་བྱུང་ནས་དགྲ་བཅོམ་པར་གྱུར་ཅིག་ཅེས་སྨོན་ལམ་བཏབ་པ་ཡིན་གསུངས་སོ། །༈ ཡལ་འདབ་དོན་བརྒྱད་པ་ནི། སྟོན་པས་མཆོག་གཉིས་རབ་ཏུ་བྱུང་བའི་རྗེས་སུ་ལྷའི་དབང་པོ་བརྒྱ་བྱིན་འཁོར་བརྒྱད་ཁྲི་དང་བཅས་བདེན་པ་ལ་བཀོད་པར་དགོངས་ནས། རྒྱལ་པོའི་ཁབ་ཀྱི་ལྷོ་ཕྱོགས་ན་བྲམ་ཟེའི་གྲོང་ཨ་མྲའི་ནགས་ཁྲོད་ཅེས་བྱ་བ་དེའི་བྱང་ཕྱོགས། རི་བི་དེ་ཧའི་དབང་པོའི་བྲག་ཕུག་ཏུ་གཤེགས་ནས་མེའི་ཁམས་ལ་སྙོམས་པར་ཞུགས་སོ། །ལྷའི་དབང་པོ་བརྒྱ་བྱིན་འཁོར་བརྒྱད་ཁྲི། ལྷ་མ་ཡིན་གྱི་བུ་མོ་བདེ་སོགས་མ་དང་། དྲི་ཟ་ཟུར་ཕུད་ལྔ་པ་དང་ཐབས་ཅིག་དབང་པོའི་
བྲག་ཕུག་ཏུ་སོང་བས་བཅོམ་ལྡན་འདས་ཏིང་ངེ་འཛིན་ལས་བཞེངས་པར་མ་སྤོབས་པས། དྲི་ཟ་གཙུག་ཕུད་ལྔ་པ་བསྐུལ་ཏེ། དེ་གཡོག་འཁོར་ལྔ་བརྒྱ་དང་བཅས་བཻཌཱུརྱའི་པི་ཝཾ་བླངས་ནས་གཙོ་བོ་ལ་འོས་པ་དང་། དགྲ་བཅོམ་པ་ལ་འོས་པའི་ཚིགས་བཅད་བརྗོད་པ་ན་བཅོམ་ལྡན་འདས་ཀྱང་བཞེངས་སོ། །སྟོན་པས་དབང་པོའི་བྲག་ཕུག་ཤིན་ཏུ་ཡངས་པར་བྱིན་གྱིས་བརླབས་ནས་ལྷའི་དབང་པོ་སོགས་ལ་ཆོས་བསྟན་ཞིང་ཞུ་ལན་མང་དུ་མཛད་དེ། ལྷའི་དབང་པོ་བརྒྱ་བྱིན་དང་ལྷ་བརྒྱད་ཁྲི་ཆོས་རྣམས་ལ་ཆོས་ཀྱི་མིག་རྡུལ་མེད་ཅིང་དྲི་མ་དང་བྲལ་བ་སྐྱེས་ཏེ། བདེན་པ་མཐོང་། ལྷའི་དབང་པོ་ཡང་སྟན་དེ་ཁོ་ནར་ཤི་འཕོས་ནས་སྟན་དེ་ལ་ཕྱིར་སྐྱེས་པས་དགའ་མགུ་རངས་ནས་བཅོམ་ལྡན་འདས་ལ་ཆེད་དུ་བརྗོད་པ་ཡང་བྱས། དྲི་ཟའི་བུ་གཙུག་ཕུད་ལྔ་པ་དྲིན་གཟོར་དྲི་ཟའི་རྒྱལ་པོ་དུམ་བུ་རུའི་བུ་མོ་བཟང་མོ་བྱིན་ནོ། །བརྒྱ་བྱིན་དེའི་སྔོན་འབྱུང་། སངས་རྒྱས་འཁོར་བ་འཇིག་གི་ཕྱིར་དུ་རྒྱལ་པོ་མཛེས་པས་གཙུག་ལག་ཁང་ལྔ་བརྒྱ་བརྩིགས་ཏེ། གནས་ཁང་དྲུག་སྟོང་བྱས་ནས་ཕུལ། གཙུག་ལག་ཁང་དུ་ཡོ་བྱད་ཐམས་ཅད་སྦྱར་ནས། འཁོར་བརྒྱད་ཁྲི་དང་བཅས་པས་སངས་རྒྱས་འཁོར་བཅས་མཆོད། སངས་རྒྱས་མྱ་ངན་ལས་འདས་ནས་སྐུ་གདུང་ལ་མཆོད་པ་བྱས་ནས་མཆོད་རྟེན་བརྩིགས་ནས་སྨོན་ལམ་བཏབ་པ་ཡིན་གསུངས་སོ། །
༈ ཡལ་འདབ་དོན་དགུ་པ་གོ་སླའོ། །༈ ཡལ་འདབ་བརྒྱད་ཅུ་པ་ནི། སྟོན་པ་མྱ་ངན་ལས་འདས་པར་ཉེ་ནས་རྩྭ་ཅན་དུ་བྱོན། དེའི་ཚེ་ཀུན་ཏུ་རྒྱུ་རབ་བཟང་ཞེས་བྱ་བ། ལོ་བརྒྱ་ཉི་ཤུ་ལོན་པ། ཕྱོགས་དེའི་སྐྱེ་བོ་རྣམས་ཀྱིས་དགྲ་བཅོམ་པར་བཀུར་བ་ཞིག་ཡོད་དེ། དེ་རྫིང་བུ་དལ་འབབ་ཀྱི་འགྲམ་ཨུ་དུམྦཱ་རའི་ཚལ་ན་ཉིན་པར་གནས་ཏེ། དེས་བལྟས་པ་ན་སྟོན་པ་ལྷུམས་སུ་ཞུགས་པའི་ཚེ་ཨུ་དུམྦཱ་རའི་མེ་ཏོག་ཁ་འབུས། སྐུ་བལྟམས་དུས་ཁ་བྱེ། གཞོན་ནུ་རོལ་པའི་ཚེ་རྒྱས། དཀའ་བ་སྤྱོད་པའི་ཚེ་ཅུང་ཟད་རིད། སངས་རྒྱས་པ་ན་མེ་ཏོག་ཁ་བྱེ། ཆོས་ཀྱི་འཁོར་ལོ་བསྐོར་བའི་ཚེ་ལྷན་ནེ་ལྷམ་མེ་ལྷང་ངེར་འདུག །གཟིམས་མལ་གྱི་ཐ་མ་ན་བཞུགས་པའི་སྐབས་དེར་ཤིན་ཏུ་རྙིང་པར་མཐོང་། ལྷ་རྣམས་ཀྱིས་ཀྱང་དོ་ནུབ་སྟོན་པ་འདའ་འོ་ཟེར་བ་ཐོས་ནས་བདག་གི་ཐེ་ཚོམ་བསལ་བར་བྱ་སྙམ་སྟེ། ཤིང་སཱ་ལ་ཟུང་གི་ཚལ་དུ་སོང་བ་ན། ཀུན་དགའ་བོ་ཕྱི་རོལ་ན་འཆག་པ་དང་འཕྲད་དེ། དགེ་སྦྱོང་གཽ་ཏ་མ་དོ་ནུབ་འདའ་ཞེས་ཐོས་ན་བདག་ཐེ་ཚོམ་གྱི་ཕྱོགས་འགའ་ཞིག་ཞུའོ། །ཟེར་བ་ལ་རབ་བཟང་དེ་བཞིན་གཤེགས་པ་ལ་འཚེ་བར་མ་བྱེད་ཅིག་ཅེས་ཀུན་དགའ་བོས་བཟློག་གོ །རབ་བཟང་གིས་ལན་གསུམ་དུ་སྨྲས་ཀྱང་ཀུན་དགའ་བོས་བཟློག་པ་ན། དེ་བཞིན་གཤེགས་པས་གསན་ཏེ། ང་དང་མུ་སྟེགས་བྱེད་ལྷན་ཅིག་གཏམ་བྱེད་པའི་ཐ་མ་འདི་ཡིན་གྱིས་ཐོང་ཞིག་ཅེས་
གསུངས། རབ་བཟང་ནང་དུ་བཏང་། དེས་ཀྱང་ཞུ་བ་ཞུས་པ་ལ་བཀའ་སྩལ་པ། རབ་བཟང་ངས་ནི་ན་ཚོད་ཉི་ཤུ་དགུ་ལོན་ཏེ། །རབ་ཏུ་བྱུང་ནས་ལོ་གྲངས་ལྔ་བཅུ་ལྷག་ཅིག་ཏུ། །དགེ་བ་གང་ཡིན་ཅི་ཞེས་གསལ་བར་བྱས་གྱུར་ཅིང་། །རབ་བཟང་ངས་ནི་རབ་ཏུ་བྱུང་བ་དེ་ཡི་ཚེ། །ཚུལ་ཁྲིམས་དང་ནི་ཏིང་འཛིན་རིག་པ་རྐང་པ་དང་། །ང་ཡིས་རྩེ་གཅིག་སེམས་ནི་ཀུན་ཏུ་བསྒོམས་བྱས་ཏེ། །རིགས་པའི་ཆོས་ནི་ཕྱོགས་ཙམ་བཤད་པར་བྱས་གྱུར་ན། །འདི་ལས་ཕྱི་རོལ་དག་ན་དགེ་སྦྱོང་གཞན་ཡང་མེད། །ཅེས་དང་། དེ་བཞིན་དུ་འཕགས་ལམ་ཡན་ལག་བརྒྱད་ཡོད་པ་ལ་དགེ་སྦྱོང་ཡོད་ཀྱི། དེ་མེད་པ་ལ་དེ་ཡང་མེད་པར་གསུངས་པས། རབ་བཟང་གིས་བདེན་པ་མཐོང་། ཚུར་ཤོག་གིས་བསྙེན་པར་རྫོགས་ནས་དགྲ་བཅོམ་པ་ཐོབ་ནས། སྟོན་པ་མྱ་ངན་ལས་མ་འདས་པའི་སྔོན་དུ། དེས་གནས་ལྔ་བྱིན་གྱིས་བརླབས་ནས་འདས་སོ། །གནས་ལྔ་ནི། རབ་བཟང་རང་གི་ལུས། དགེ་སློང་གིས་བལྟས་ན་དགེ་སློང་གི་ཆ་བྱད་དང་། མུ་སྟེགས་པས་བལྟས་ན་མུ་སྟེགས་ཅན་གྱི་ཆ་བྱད་དུ་མཐོང་བ་དང་གཅིག །གདུང་འདེགས་པའི་ཁྱོགས་དགེ་སློང་ལས་མུ་སྟེགས་ཅན་གྱིས་འདེགས་མི་ནུས་པ་དང་གཉིས། རྫིང་བུ་ཞིག་སྤྲུལ་པ་དེར་དགེ་སློང་རྣམས་མི་བྱིང་ཞིང་མུ་སྟེགས་རྣམས་བྱིང་བ་དང་གསུམ། རྫིང་དེར་ཉ་དང་རུས་སྦལ་གྱིས་མུ་སྟེགས་ལ་གནོད་ཅིང་དགེ་སློང་རྣམས་ལ་མི་གནོད་པ་དང་བཞི། གདུང་བསྲེགས་པའི་མེ་མུ་སྟེགས་རྣམས་ཀྱིས་སྦར་མི་ནུས་ལ་དགེ་སློང་རྣམས་ཀྱིས་སྦར་ནུས་པ་སྟེ་ལྔའོ། །དེ་ལྟར་ཀུན་ཏུ་རྒྱུ་རབ་བཟང་ཆོ་འཕྲུལ་དང་
བཅས་ཏེ་མྱ་ངན་ལས་འདས་པ་ན་མུ་སྟེགས་བྱེད་རྣམས་ཀྱིས་ཐོས་པས་རྒྱལ་མཚན་བསྒྲེངས་ཤིང་ལམ་སྲང་རྣམས་བསྐོར་ཏེ། གཽ་ཏ་མས་ངའི་བསྟན་པ་ལས་གཞན་དུ་མྱ་ངན་ལས་འདས་པ་ཐོབ་པ་མེད་ཅེས་ཟེར་ན། དེང་ཁོ་བོ་ཅག་གི་ཚངས་པ་མཚུངས་པར་སྤྱོད་པས་ཀུན་ཏུ་རྒྱུ་རབ་བཟང་མྱ་ངན་ལས་འདས་པ་ཐོབ་བོ། །ཞེས་ཟེར་རོ། །དེར་གྱད་ལ་སོགས་པ་སྐྱེ་བོའི་ཚོགས་དཔག་ཏུ་མེད་པ་འདུས། རྫིང་དེའི་དབུས་སུ་རྡོ་སྟེགས་ཀྱི་སྟེང་དུ་ཞུགས་ལ་འབུལ་བར་བྱས་ནས། དགེ་སློང་རྣམས་དང་མུ་སྟེགས་བྱེད་རྣམས་བདེན་པའི་སྟོབས་བོར་ནས། རབ་བཟང་འདི་སངས་རྒྱས་པའམ། མུ་སྟེགས་བྱེད་པའི་ཚངས་པར་མཚུངས་སྤྱོད་ཡིན་པ་དེས། གདུང་འདེགས་ཐུབ་པ་དང་། རྫིང་གི་ཆུ་ལ་མི་བྱིང་བ་དང་། རྫིང་གི་ཉ་ལ་སོགས་པས་མི་གནོད་པ་དང་། གདུང་ལ་མེ་སྦར་ནུས་པར་འགྱུར་ལ། མ་ཡིན་པ་དེས་མི་ནུས་སོ་བྱས་ནས་བྱ་བ་དེ་དག་ལ་ཞུགས་པ་ན། མུ་སྟེགས་པ་རྣམས་ཀྱིས་དེ་དག་མ་ནུས་ལ་དགེ་སློང་རྣམས་ཀྱིས་དེ་དང་དེ་ནུས་ཏེ། དེར་སྐྱེ་བོའི་ཚོགས་ཆེན་པོ་དེས་མུ་སྟེགས་རྣམས་ཚར་བཅད་ལ། གྱད་རྣམས་དེ་བཞིན་གཤེགས་པ་ལ་ལྷག་པར་དད་པ་གྱུར་ཏོ། །འདིའི་སྔོན་འབྱུང་འདུལ་བ་༼ང༽ལུང་ཕྲན་ཚེགས་ནས་འབྱུང་སྟེ། སྔོན་ལུང་པ་ཞིག་ན་རི་དྭགས་ཀྱི་ཁྱུ་དཔོན་རི་དྭགས་མང་པོའི་ཚོགས་སྟོང་གིས་བསྐོར་བ་མཁས་ཤིང་གསལ་བ། ཡིད་གཞུང་པ་ཞིག་གནས་ཏེ། དེ་རྔོན་པས་མཐོང་ནས་རྒྱལ་པོ་ལ་སྨྲས་པས་དཔུང་ཚོགས་ཡན་ལག་བཞི་དང་བཅས་བྱུང་ནས་རི་
དྭགས་ཐམས་ཅད་བསྐོར་རོ། །དེར་ཆུ་བོ་ཆེན་པོ་རྦ་ཀློང་འཁྲུགས་ཤིང་དྲག་ཏུ་འབབས་པ་ཞིག་གི་རྩར་རི་དྭགས་རྣམས་བྲོས་ཏེ་དཔོན་པོ་ཆུར་ཞུགས་ནས། དབུས་སུ་འདུག་སྟེ་ཟམ་སྟེགས་བྱས་ནས་རི་དྭགས་རྣམས་ཆུ་བོའི་ཕ་རོལ་ཏུ་བྲོས་སོ། །རི་དྭགས་དཔོན་པོའི་རྒྱབ་ཏུ་དེ་རྣམས་ཀྱི་རྨིག་པ་དག་གིས་ཕོག་སྟེ། པགས་པ་ཡང་རལ། ཤ་ཁྲག་རུས་པ་དག་བྱུང་ཡང་བརྩོན་འགྲུས་མ་བཏང་ངོ་། །སླར་རི་དྭགས་ཕྲུ་གུ་གཅིག་ལུས་པ་ཡང་འབད་པས་རྒྱབ་ཏུ་བཀལ་ནས་ཆུ་བོ་ལས་བསྒྲལ་ཏེ་དེ་འཆི་བ་ན་སྨོན་ལམ་བཏབ་པས་སོ། །རི་དྭགས་ཀྱི་དཔོན་ནི་སངས་རྒྱས། རི་དྭགས་རྣམས་གྲོང་ཁྱེར་རྩྭ་ཅན་གྱི་གྱད། ཕྲུ་གུ་ཤུལ་དུ་ལུས་པ་རབ་བཟང་ཡིན་གསུངས། ཡང་སངས་རྒྱས་འོད་སྲུང་གི་དུས། དེའི་དཔོན་པོ་མྱ་ངན་མེད་རབ་ཏུ་བྱུང་ཡང་ལེ་ལོ་ཆེ་བས་བརྩོན་པ་མ་བསྐྱེད་པ། འོད་སྲུང་མྱ་ངན་ལས་འདའ་ཁར་དེ་ཤིང་ལྗོན་པ་ཞིག་གི་དྲུང་ན་གནས་པར་ལྗོན་པའི་ལྷ་ངུས་པའི་མཆི་མ་ཐིགས་པ་གཅིག་ལུས་ཀྱི་སྟེང་དུ་ལྷུང་བར་རྒྱུ་མཚན་དྲིས་པས་དེ་ལྟར་བཤད་པ་ན་མྱ་ངན་གྱིས་འགྱེལ་ཞིང་ངུ་བ་ལྷ་དེས་སངས་རྒྱས་ཀྱི་དྲུང་དུ་བསྐྱལ་ནས་ཆོས་ཐོས་པ་ན་དགྲ་བཅོམ་སྟེ་མྱ་ངན་ལས་འདས་སོ། །ལྷ་དེས་ཀྱང་དེའི་ཡོན་ཏན་མཐོང་བས་དགའ་ནས་མ་འོངས་པ་ན་ཤཱཀྱ་ཐུབ་པའི་སྐབས་མྱ་ངན་ལས་འདའ་ཀར་རབ་ཏུ་བྱུང་ནས་དགྲ་བཅོམ་སྟེ་སྟོན་པའི་སྔོན་དུ་མྱ་ངན་ལས་འདས་པར་སྨོན་ལམ་བཏབ་པའི་ལྷ་དེ་རབ་བཟང་འདི་ཡིན་གསུངས་སོ། །