འདིར་སྨྲས་པ།
འདིར་སྨྲས་པ། འགྲོ་ལ་ཕན་བཞེད་རྒྱལ་བ་མཆོག་དེ་ཡིས། །འགྲོ་ཁམས་ཚ་གྲང་ནད་པར་སྨན་པ་བཞིན། །འགྲོ་བློར་འཚམས་ཕྱིར་ཆོས་ཀྱི་གོ་རིམ་ནི། །འགྲོ་ཀུན་ཐར་པར་བགྲོད་ལ་ཐེམ་སྐས་ལྟར། །དེ་ལས་དབང་པོར་རབ་ལ་བླ་མེད་ཀྱི། །དེ་ཉིད་སྟོན་བྱེད་བསྐྱེད་རྫོགས་གཉིས་མེད་གསུམ། །དེ་དོན་ཉམས་སུ་ལེན་ལ་བསམ་གླིང་པ། །དེ་ཉིད་ལྔ་བདོར་པད་འབྱུང་དངོས་བྱོན་བཞིན། །གང་དེའི་ཆོས་བརྒྱུད་ཨུཏྤལ་དཀར་པོའི་ཚལ། །བཤད་སྒྲུབ་ཟླ་གཞོན་འོད་ཀྱིས་ཕྱེ་བ་ན། །གྲུབ་འབྲས་དྲི་བསུང་སྤྲོ་བས་བདག་ཡིད་ལ། །ཚིམ་པ་སྟེར་མཛད་དཔལ་ལྡན་ཆོས་རྒྱལ་ཞབས། །མགོན་དེ་གཏེར་སྟོན་མཆོག་དེས་ལུང་བསྟན་དང་། །རྗེས་མཐུན་རང་གི་འཁྲུལ་སྣང་ཆ་མཐུན་པས། །ཆོས་ཚུལ་འདི་ལ་མཚམས་སྒྲུབ་གནད་སྨིན་གྱི། །དོན་འབྲས་གཞུང་བཤད་རྩོམ་ལ་སྤྲོ་བ་སྐྱེས། །དེ་ཡང་སྐྱེས་སྦྱངས་ཡོན་ཏན་ཆ་ཕྲའི་གོས། །
རིམ་གཉིས་ཟབ་གནད་སྦོམ་པའི་ལུས་ཀྱི་ཆར། །མི་འཚམས་ཉེས་བཤད་རྒྱན་གྱིས་ནོངས་པ་ན། །མཁས་དང་གྲུབ་པའི་བཟོ་བོས་འཆོས་པར་རིགས། །སྔོན་བྱོན་དམ་པའི་ལེགས་བཤད་མེ་ཏོག་ཚལ། །བདག་བློའི་རྐང་དྲུག་རྒྱུ་བས་འཐད་འོས་ཀྱི། །རྩི་བཅུད་བསྡུས་པའི་རོ་འདི་མངར་བའི་དགེས། །འགྲོ་རྣམས་སྲིད་པ་མཐའ་ཅན་བྱེད་པར་སྨོན། །ཁྱད་པར་བཀའ་དྲིན་མཆོག་ཐོབ་ལྷ་འབྲང་པའི། །ཡང་སྲིད་འཁྲུལ་མེད་ཡི་གེས་རྒྱས་ཐེབས་གང་། །བསྟན་འགྲོའི་མཁར་ལ་འཆར་ནུབ་སྤངས་པའི་ཉིས། །སྔ་འགྱུར་དཔལ་གོས་ཕྱོགས་བརྒྱར་གྲོལ་བར་སྨོན། །བདག་ཀྱང་སྐྱེ་ཀུན་རྒྱལ་བ་འོད་མཐའ་ཡས། །ལྷག་པའི་ལྷར་བསྟེན་ཚེ་འཕོས་གྱུར་མ་ཐག །བདེ་ཆེན་ཞིང་དུ་རྒྱལ་སྲས་ཐུ་བོར་སྐྱེས། །དོན་གཉིས་ལྷུན་གྲུབ་མཆོག་ཟུང་རྗེས་འགྲོར་ཤོག །ལྷང་ལྷང་ཤིས་བརྗོད་ཏམྦུ་ར་ཡི་སྒྲ། །སྙན་སྙན་སྐལ་ལྡན་རྣ་བར་བསྒྲགས་པ་ན། །མཛེས་མཛེས་རྫོགས་ལྡན་དགའ་སྟོན་དར་དྲག་པས། །
ཁྱབ་ཁྱབ་བཀྲ་ཤིས་མེ་ཏོག་ས་གསུམ་ཁྱབ། །དེ་ལྟར་ཞིང་སྒྲུབ་བཤད་པ་འདི་རང་ལ་ཁྱབ་བདག་རྡོ་རྗེ་འཆང་དབང་གྲུབ་བརྙེས་དཔལ་ལྡན་ཆོས་རྒྱལ་གྱིས་དབང་ལུང་གི་རྗེས་སུ་བཟུང་བའི་བཀའ་དྲིན་སྩལ་སྐབས་ཆོས་འདིའི་བདག་པོར་དབུགས་དབྱུང་ཞིང་འཆད་སྤེལ་ཉམས་ལེན་གང་ལའང་བརྩོན་པ་ལྷོད་མི་ཉན་པའི་བཀའ་ནན་ལྟར་རང་ནས་ཀྱང་ཡི་དམ་གྱི་རྩ་བར་བཟུང་ཞིང་། མཁྱེན་བརྩེ་ནུས་ལྡན་མཆོག་སྤྲུལ་བྱང་ཆུབ་རྡོ་རྗེ་ལ་ཡང་མ་དང་མཁའ་འགྲོས་ལུང་སྐུལ་ལྟར་ཉམས་ལེན་མཛད་སྐབས་ལས་བྱང་འདི་ལ་འབྲུ་འགྲེལ་ཞིག་དགོས་ཞེས་ཞུ་རྟེན་གྱི་སྐྱེས་དང་བཅས་བསྐུལ་ཞིང་། ལྷ་འབྲང་རྗེ་དབོན་རིན་པོ་ཆེ་སངས་རྒྱས་བཀྲ་ཤིས་ནས་ཀྱང་གནང་སྐྱེས་བཅས་ཞིང་སྒྲུབ་ཆོ་ག །དབང་། བྱང་ཆོག །སྦྱིན་སྲེག་བཅས་ཀྱི་རྩ་འགྲེལ་རྫོགས་རིམ་ལྟོ་སྦྱར་ཟིན་བྲིས་གསལ་རྒྱས་ཁུངས་ཐུབ་པར་དུ་སྤེལ་ལོ་བ་ཞིག་དགོས་པའི་གསུང་ནན་དང་། ཟུར་གསལ་དྲི་རྟོག་ཞུས་ལན་ཡང་སྩལ་བས་འཕྲལ་དུ་སྒྲུབ་གལ་ཆེ་ཡང་། ཆོས་བརྒྱད་རྣམ་གཡེངས་དང་དགོན་ཧྲུལ་ཁ་འཛིན་གྱིས་ཡུན་དུ་འགྱངས་པ། རབ་ཡིད་ཕུར་བུ་ཞེས་པ་ས་སྤྲེལ་ས་ག་ཟླ་བའི་དམར་ཕྱོགས་ལ། དམ་པའི་གདན་ས་ཞེ་ཆེན་བསྟན་གཉིས་དར་རྒྱས་གླིང་གི་དགོན་སྟོད་ནོར་བུ་རྩེའི་རང་ཤག་བདེ་ཆེན་མངོན་དགའི་ཞོལ་བདེ་བ་ཅན་ཞེས་པར་ཤཱཀྱའི་དགེ་སློང་སྤྲུལ་མིང་འཆང་བ་འགྱུར་མེད་མཐུ་སྟོབས་རྣམ་རྒྱལ་ལམ། བརྡའ་སྤྲོད་ཀུན་བཤད་ཀྱི་མིང་དུ་འཇམ་དབྱངས་དགྱེས་པའི་བློ་གྲོས་མཚོ་སྐྱེས་བཞད་པའི་སྒྲ་དབྱངས་སུ་ཀཿཐོག་པི་ཏ་
ཆེན་པོས་སྩལ་བས་སྦྱར་བ། ཡི་གེ་གཉིས་པར་སྤེལ་པ་པོ་རང་སློབ་ལྔ་རིག་པ་ཆེན་པོ་སྒྲ་རབ་དགེ་སློང་བློ་གྲོས་མཆོག་རྒྱས་སོ། །༈ ༀ་སྭ་སྟི། ངོ་བོ་ཀ་དག་ཆོས་དབྱིངས་གདོད་མའི་མགོན། །རང་བཞིན་ལྷུན་གྲུབ་ལྔ་ལྡན་ལོངས་སྤྱོད་རྫོགས། །ཐུགས་རྗེ་འགག་མེད་སྤྲུལ་བསྒྱུར་མཐའ་ཡས་པའི། །སྐུ་གསུམ་སྟོན་པ་མཆོག་ལ་གུས་ཕྱག་འཚལ། །འོད་མཚན་སྟོང་འབར་ཐུགས་བསྐྱེད་སྒྱུ་འཕྲུལ་གར། །སིནྡྷུའི་མཚོ་དབུས་པདྨ་གེ་སར་ལས། །ལེགས་འཁྲུངས་སྔགས་ཀྱི་སྟོན་པ་མཚོ་སྐྱེས་རྗེ། །པདྨ་ཀ་ར་ཚེ་རབས་གཏན་གྱི་སྐྱབས། །དབང་ཆེན་པདྨ་གསུང་གི་གྲུབ་བརྙེས་མཆོག །མཆོག་དབྱངས་རྣམ་སྤྲུལ་མཚུངས་མེད་གཏེར་ཆེན་རྗེ། །རྗེ་བཙུན་ཆེན་པོ་རིག་འཛིན་བསམ་གཏན་གླིང་། །གླིང་མཆོག་འདི་ན་ཉི་ཟླ་ལྟ་བུར་གྲགས། །དམ་པ་མཆོག་དེའི་ཟབ་གཏེར་ཆོས་བདག་ཏུ། །འཁྲུལ་མེད་རྡོ་རྗེའི་གསུང་གིས་ལུང་བསྟན་པ། །
གྲུབ་གཉིས་མངོན་མཛད་དཔལ་ལྡན་ཆོས་ཀྱི་རྒྱལ། །རང་རིག་གདོད་མའི་མགོན་དུ་ངེས་པ་རྙེད། །ཕུལ་བྱུང་མཁྱེན་རབ་ཉིན་བྱེད་འོད་སྟོང་གིས། །རྒྱལ་བསྟན་རིན་ཆེན་མཆོག་དུ་གསལ་མཛད་པ། །ངེས་པ་དོན་ཀྱི་པཎ་ཆེན་ཐམས་ཅད་མཁྱེན། །འཇམ་དབྱངས་དགྱེས་པའི་བློ་གྲོས་བསྟན་འགྲོའི་མགོན། །གང་དེའི་ཞལ་ལུང་འོད་སྣང་ཞིང་སྒྲུབ་ཀྱི། །ཟིན་བྲིས་ཐར་ལམ་སྣང་བའི་སྒྲོན་མེ་མཆོག ། གཅིག་ལས་དུ་མར་སྣང་བའི་ངོ་མཚར་འཕྲུལ། །མི་ཟད་ཆོས་ཀྱི་སྦྱིན་པ་འདི་ན་སྤེལ། །ཚུལ་འདི་གསང་ཆེན་བླ་མེད་ཐེག་པ་ཡི། །སྨིན་གྲོལ་རིམ་གཉིས་ནོར་བུའི་བང་མཛོད་ལ། །རང་དབང་བསྒྱུར་བའི་ལྡེ་མིག་མཆོག་ཡིན་པས། །ཐར་འདོད་རྣམས་ཀྱིས་གཅེས་པའི་ནོར་བུ་ཟུང་། །འདིར་འབད་ལྷག་བསམ་སྟོན་ཟླ་ལྟར་དཀར་དང་། །དུས་གསུམ་བསགས་པའི་དགེ་ཚོགས་ལ་བརྟེན་ནས། །རྒྱལ་བསྟན་སྤྱི་དང་བྱེ་བྲག་སྔ་འགྱུར་གྱི། །རིང་ལུགས་དབྱར་གྱི་མཚོ་ལྟར་འཕེལ་རྒྱས་ཤོག །
དེ་འཛིན་མཆོག་རྣམས་བསྐལ་བརྒྱར་ཞབས་པད་བརྟན། །བསྟན་པའི་སྦྱིན་བདག་ཆོས་རྒྱལ་མངའ་ཐང་རྒྱས། །འགྲོ་ཀུན་རྣམ་དཀར་དགེ་བཅུར་ལེགས་སྤྱོད་པས། །དུས་བསྐལ་རྫོགས་ལྡན་དཔལ་ལ་འདྲེན་ནུས་ཤོག །བདག་ཀྱང་སྐྱེ་ནས་སྐྱེ་བ་ཐམས་ཅད་དུ། །མདོ་སྔགས་བསྟན་ལ་བྱ་བ་མཐར་ཕྱིན་ཅིང་། །དབང་དང་རིམ་གཉིས་ཡེ་ཤེས་ལ་བརྟེན་ནས། །རང་གཞན་དོན་གཉིས་ལྷུན་གྲུབ་འབྱུང་བར་ཤོག །མཁའ་ཁྱབ་འགྲོ་ཀུན་བསོད་ནམས་ཡེ་ཤེས་ཀྱི། །ཚོགས་གཉིས་མཐར་ཕྱིན་བདེ་ལྡན་ཞིང་ཁམས་སུ། །འོད་སྣང་དཔག་ཏུ་མེད་པའི་ཞལ་མཐོང་ཞིང་། །ཀུན་ཀྱང་རྫོགས་པའི་སངས་རྒྱས་མཆོག་ཐོབ་ཤོག །ཅེས་བདེ་ཆེན་ཞིང་སྒྲུབ་ཀྱི་ཟིན་བྲིས་ཐར་ལམ་སྣང་བའི་སྒྲོན་མེ་འདི་ཉིད་ལྷ་འབྲང་སྒྲུབ་སྡེར་ཆོས་སྦྱིན་འཛད་པ་མེད་པའི་པར་དུ་བསྒྲུབ་སྐབས་ལྷ་འབྲང་རྗེ་དབོན་རིན་པོ་ཆེ་མཆོག་ནས་ཕྲན་ལ་ཞུས་དག་དགོས་པའི་བཀའ་ཕེབས་བཞིན་ཞབས་ཕྱི་ཞུས་ཤིང་པར་བྱང་ཉུང་ཙམ་འདི་ཡང་རང་དང་གཞན་གྱི་གྲུབ་པའི་མཐའ་མང་དུ་ཐོས་པ་དྲུང་མིང་ཕྲིན་ལས་རྒྱ་མཚོར་འབོད་པས་བྲིས་པ་དགེ་ཞིང་བཀྲ་ཤིས་པར་གྱུར་ཅིག །སརྦ་མངྒལཾ། དགེའོ། །དགེའོ། །དགེའོ།། །།