དྲུག་པ། བཏགས་པས་གྲོལ་བའི་སྙིང་པོ་བསྟན་པའི་ལེའུ།
༈ ད་ནི་ལེའུ་དྲུག་པ་འགྲོལ་ཏེ། ཁམས་ལ་བསླབ་པའི་ཐབས་ཡོད་པས། །ཞེས་པའི་དོན་ནི། ཁམས་ལ་ཞེས་པ་མེ་རླུང་ནམ་མཁའི། དེ་དག་ཐམས་ཅད་འདུས་པ་བྱང་སེམས་དཀར་དམར་རོ། །བསླབ་པའི་ཞེས་པ་ཟུང་འཇུག་ལ། ཐབས་ཡོད་པས་ཞེས་པ་སངས་རྒྱ་བའི། དྲན་རྫོགས་ཕྱག་རྒྱའི་ངང་དུ་སྦྱོར། །ཞེས་པའི་དོན་ནི། དྲན་རྫོགས་ཞེས་པ་སྐད་ཅིག་ལ། ཕྱག་རྒྱའི་ཞེས་པ་ལས་དམ་ཚིག་ཆོས་ཕྱག་རྒྱ་ཆེན་པོའོ། །ངང་དུ་སྦྱོར་ཞེས་པ་དབུགས་ལ་སླེབ་ཅིང་བཏགས་པ་ཙམ་གྱིས། དབང་པོའི་ཞེན་པ་བཟློག་པའི་ཕྱིར། །ཞེས་པའི་དོན་ནི། དབང་པོའི་ཞེས་པ་སྒོ་ལྔའི། ཞེན་པ་ཞེས་པ་རང་རྒྱུད་པ་སྟེ། བཟློག་པའི་ཕྱིར་ཞེས་པ་རིགས་ལྔ་ཡུམ་ལྔར། ཀརྨ་རཀྵ་གྷི་ཧང་ཧི། །ཞེས་པའི་དོན་ནི། ཉོན་མོངས་པའི་བདུད་རང་སར་དག་པར་བྱེད་པའི་སྙིང་པོའོ། །ཕུང་པོའི་ཞེན་པ་བཟློག་པའི་ཕྱིར། །ཞེས་པའི་དོན་ནི། ཕུང་པོའི་ཞེན་པ་ཞེས་པ་གཟུགས་ཚོར་བ། འདུ་ཤེས་འདུ་བྱེད་རྣམ་པར་ཤེས་པའོ། །ཞེན་པ་ཞེས་པ་རང་རྒྱུད་པ་དེ། བཟློག་པའི་ཕྱིར་ཞེས་པ་རིགས་ལྔ་ཡབ་ལྔར། བྷེ་ག་ར་ན་སོ་གད་གླིང་། །ཞེས་པའི་དོན་ནི། ཕུང་པོའི་བདུད་རང་སར་གྲོལ་བར་བྱེད་པའི་སྙིང་པོའོ། །ཡུལ་ཀུན་ཞེན་པ་བཟློག་པའི་ཕྱིར། །ཞེས་པའི་དོན་ནི། ཡུལ་ཀུན་ཞེས་གཟུགས་སྒྲ་དྲི་རོ་རེག་གོ། །ཞེན་པ་ཞེས་པ་རང་རྒྱུད་པ་དེ། བཟློག་པའི་ཕྱིར་ཞེས་པ་ཞིང་ཁམས་སུ། པུ་ཀ་རི་ལ་བྷ་དྷུ་ཏྲི། །ཞེས་པའི་དོན་ནི། ལྷའི་བུའི་བདུད་རང་སར་གྲོལ་བར་བྱེད་པའི་སྙིང་པོའོ། །སེམས་ཀྱི་(༨༥)དངོས་པོ་སྤུར་བའི་ཕྱིར། །ཞེས་པའི་དོན་ནི། སེམས་ཀྱི་ཞེས་པ་མི་དྲན་དགུ་དྲན་འདི། དངོས་པོ་ཞེས་པ་སྐུ་གསུམ། སྤུར་བའི་ཕྱིར་ཞེས་པ་ཀ་དག་ཏུ། རམ་པ་ཀ་ལ་ས་མི་ཁྱེ། །ཞེས་པའི་དོན་ནི། འཆི་བདག་གི་བདུད་རང་སར་གྲོལ་བར་བྱེད་པའི་སྙིང་པོའོ། །བྱུང་ཚོར་གནས་སུ་གཅད་པའི་ཕྱིར། །ཞེས་པའི་དོན་ནི། བྱུང་ཚོར་ཞེས་པ་བདེ་སྡུག་གཉིས། གནས་སུ་ཞེས་པ་གཞི་ལ། གཅད་པའི་ཕྱིར་ཞེས་པ་དངོས་མེད་དུ། མ་ཏང་ཕ་ཕེར་རས་མི་ཏི། །ཞེས་པའི་དོན་ནི། ཀུན་གཞི་རང་སར་གྲོལ་བར་བྱེད་པའི་སྙིང་པོའོ། །འདུས་ཚོགས་སྣང་བ་ངོས་གཟུང་ཕྱིར། །ཞེས་པའི་དོན་ནི། འདུས་ཚོགས་ཞེས་པ་འཁོར་འདས་ཀྱི་ཆོས་མ་ལུས་པ། སྣང་བ་ཞེས་པ་མངོན་སུམ། ངོས་གཟུང་ཕྱིར་ཞེས་པ་རང་སྣང་དུ། ཁ་ཌ་རེ་ཀྚ་ས་མིག་རླུང་། །ཞེས་པའི་དོན་ནི། རང་སྣང་རང་སར་གྲོལ་བར་བྱེད་པའི་སྙིང་པོའོ། །རིག་པ་བཙོན་རར་གཞུག་པའི་ཕྱིར། །ཞེས་པའི་དོན་ནི། རིག་པ་ཞེས་པ་མཚན་ཉིད་འཛིན་པའི་རིག་པ་མི་དྲན་དགུ་དྲན་འདི། བཙོན་རར་ཞེས་པ་གཞི་འཛིན་པའི་རིག་པ་རྡོ་རྗེ་ལུ་གུ་རྒྱུད། གཞུག་པའི་ཕྱིར་ཞེས་པ་ཟབ་པའི་གནད་ལ་བརྟེན་ནས། ཨ་ཀེ་ར་ན་བྷེ་ཙག་ཤ །ཞེས་པའི་དོན་ནི། ཕྱིར་མི་ལྡོག་པར་བྱེད་པའི་སྙིང་པོའོ། །འཁྲུལ་པའི་རང་རྒྱུད་ཁུངས་གཅད་ཕྱིར། །ཞེས་པའི་དོན་ནི། འཁྲུལ་པའི་ཞེས་པ་ཁམས་གསུམ་གྱི་སེམས་ཅན། རང་རྒྱུད་ཅེས་པ་དངོས་པོར་འཛིན་པ། ཁུངས་གཅད་ཕྱིར་ཞེས་པ་ངོ་བོ་རང་བཞིན་ཐུགས་རྗེ་གསུམ། ཡ་རི་མུ་ཊ་ས་གྷུ་ལི། །ཞེས་པའི་དོན་ནི། ཁམས་གསུམ་རང་སར་གྲོལ་བར་བྱེད་པའི་སྙིང་པོའོ། །རིགས་དྲུག་རིམ་གྱིས་བསྒྲལ་བའི་ཕྱིར། །ཞེས་པའི་དོན་ནི། རིགས་དྲུག་ཅེས་པ་འགྲོ་བ། རིམ་གྱིས་ཞེས་པ་གོང་ནས་གོང་སྟེ། སྡིག་ཅན་ཉན་ཐོས་རྣམས་དང་མཉམ་པས་མངོན་ནོ། །
བསྒྲལ་བའི་ཕྱིར་ཞེས་པ་འཁོར་བ་ལས། ཡ་སིང་ར་རླུང་པ་ལ་ཡ། །ཞེས་པའི་དོན་ནི། རིགས་དྲུག་རང་སར་གྲོལ་བར་བྱེད་པའི་སྙིང་པོའོ། །འཁོར་བ་དོང་ནས་གདོན་པའི་ཕྱིར། །ཞེས་པའི་དོན་(༨༦)ནི། འཁོར་བ་ཞེས་པ་ངན་སོང་གསུམ་དུ། དོང་ནས་ཞེས་པ་ཞེ་འཇིགས་ཤིང་གཏིང་རིང་བ་ཐོན་དུས་མེད་པའོ། །གདོན་པའི་ཕྱིར་ཞེས་པ་བྱིན་བརླབས་རང་བབས་འདིས། མ་མ་ཀོ་ལིང་སཱ་མཱ་ཏ། །ཞེས་པའི་དོན་ནི། ངན་སོང་དོང་ནས་སྤྲུག་པར་བྱེད་པའི་སྙིང་པོའོ། །མི་ཤི་བའི་དུས་སུ་ཡང་རིགས་དྲུག་གི་དཀྱིལ་འཁོར་བཞེངས་ཏེ། སྙིང་པོ་འདི་ཛབ་ཏུ་བགྲང་ཞིང་། ཞག་དྲུག་ལ་ཚེ་འདས་དམིགས་པས་རིམ་པ་བཞིན་རིགས་དྲུག་ལས་དྲངས་ཏེ། བདུན་པ་ལ་འོད་གསལ་གྱི་དཀྱིལ་འཁོར་ཐིག་ལེ་ཆེན་པོ་ལྟར་བཞེངས་ཏེ། རྫོགས་པར་རང་བྱུང་གི་ལམ་བསྟན་པའི་ཚིག་རྣམས་ཀྱིས་ངོ་སྤྲད་པས། ནམ་མཁའ་ལ་འཇའི་ཚོགས་འཁྲུགས་ཤིང་ཚེ་འདས་གྲོལ་བ་ལ་ཐེ་ཚོམ་མེད་དོ། །ཆོས་ཅན་ཐུར་དུ་གཞུག་པའི་ཕྱིར། །ཞེས་པའི་དོན་ནི། ཆོས་ཅན་ཞེས་པ་སྤྱི། ཐུར་དུ་ཞེས་པ་དོན་འགྱུར་བ་མེད་པའི། གཞུག་པའི་ཕྱིར་ཞེས་པ་ཐིག་ལེ་ཉག་གཅིག་ལ། གྷ་རིང་ཡཾ་པ་རི་མཾ་ཏི། །ཞེས་པའི་དོན་ནི། ཡང་དག་དོན་ལ་སྐྱེལ་བར་བྱེད་པའི་སྙིང་པོའོ། །རོལ་པའི་བྱུང་ཁུངས་སྤུར་པའི་ཕྱིར། །ཞེས་པའི་དོན་ནི། རོལ་པའི་ཞེས་པ་ཆོས་ཉིད་ཀྱི། བྱུང་ཁུངས་ཞེས་པ་དང་པོའོ། །སྤུར་བའི་ཕྱིར་ཞེས་པ་ནམ་མཁའ་ལ་མངོན་སུམ་དུ། བུ་ག་སིང་ཧ་ཕ་གྷ་ལ། །ཞེས་པའི་དོན་ནི། རང་ཤར་རང་གྲོལ་བར་བྱེད་པའི་སྙིང་པོའོ། །ཞེན་པའི་འཕྲེང་ཐག་གཅད་པའི་ཕྱིར། །ཞེས་པའི་དོན་ནི། ཞེན་པའི་ཞེས་པའི་འཁོར་བ་ལས། འཕྲེང་ཐག་ཅེས་པ་འཛིན་པའི། གཅད་པའི་ཕྱིར་ཞེས་པ་ཡུལ་རིག་སྣང་དུ། ར་མི་སི་པཱི་ཁེ་ཏ་པ། །ཅེས་པའི་དོན་ནི། ཞེན་ཡུལ་དབྱིངས་སུ་གྲོལ་བར་བྱེད་པའི་སྙིང་པོའོ། །ལུག་རྒྱུད་ཨར་ལ་གཏད་པའི་ཕྱིར། །ཞེས་པའི་དོན་ནི། ལུག་རྒྱུད་ཅེས་པ་ཟུང་འཇུག་གཉིས་མེད་དུ་འབྲེལ་ཆགས་པའི། ཨར་ལ་ཞེས་པ་ཡོལ་སྒྲིབ་མེད་པར། གཏད་པའི་ཕྱིར་ཞེས་པ་ཉམས་ལེན་གྱིས། བི་ཁུ་མ་ལ་པ་ཏཾ་ཀི །ཞེས་པའི་དོན་ནི། ཉམས་གོང་ནས་གོང་དུ་འཕེལ་ཞིང་གྲོལ་བར་བྱེད་པའི་སྙིང་པོའོ། །ལྷ་ཡི་ཕྱག་རྒྱ་བལྟ་བའི་ཕྱིར། །ཞེས་(༨༧)པའི་དོན་ནི། ལྷ་ཡི་ཞེས་པ་རིག་སྐུ་རིགས་ལྔའི། ཕྱག་རྒྱ་ཞེས་པ་བཅུ། ལྟ་བའི་ཕྱིར་ཞེས་པ་མཐོང་བྱེད་ཀྱི་རིག་པས། ས་མཱ་ཉི་བ་དྷེ་ར་པ། །ཞེས་པའི་དོན་ནི། རིག་པ་ཚད་ལ་ཕེབས་ཤིང་ཞིང་ཁམས་ཤེས་བྱེད་ཀྱི་རིག་པར་གྲོལ་བར་བྱེད་པའི་སྙིང་པོའོ། །ལྟ་སྒོམ་ལོག་པ་དག་བྱའི་ཕྱིར། །ཞེས་པའི་དོན་ནི། ལྟ་སྒོམ་ཞེས་པ་མཚན་ཉིད་འཛིན་པའི་རིག་པ་རིག་སྟོང་ཟུང་འཇུག་གི། ལོག་པ་ཞེས་པ་དམ། དག་བྱའི་ཕྱིར་ཞེས་པ་ཡེ་བསྲུངས་ཆེན་པོའི་དམ་ཚིག་གིས། བཛྲ་སཏྭ་ཌི་ཌྷོ་མེ། །
ཞེས་པའི་དོན་ནི། རྡོ་རྗེ་སེམས་དཔའི་རིག་པ་ལ་རང་རྫོགས་སུ་གྲོལ་བར་བྱེད་པའི་སྙིང་པོའོ། །ས་ལམ་དུས་གཅིག་གཅད་པའི་ཕྱིར། །ཞེས་པའི་དོན་ནི། ས་ལམ་ཞེས་པ་ཐེག་པ་དགུའི། དུས་གཅིག་ཅེས་པ་དོན་མཐོང་བའི། གཅད་པའི་ཕྱིར་ཞེས་པ་མངོན་སུམ་དུ། གྷེ་བ་སུ་གྷར་རྣ་མ་ཡེ། །ཞེས་པའི་དོན་ནི། ས་ལམ་ཆིག་རྫོགས་གྲོལ་བར་བྱེད་པའི་སྙིང་པོའོ། །ཡིད་དཔྱོད་ལྟ་བ་ཁུངས་གཅད་ཕྱིར། །ཞེས་པའི་དོན་ནི། ཡིད་དཔྱོད་ཅེས་པ་དོན་མ་རྟོགས་པའི། ལྟ་བ་ཞེས་པ་རང་བཞིན་གྱི། ཁུངས་གཅད་ཕྱིར་ཞེས་པ་རིག་པའི་རྡོ་རྗེ་ལུ་གུ་རྒྱུད་དུ། དྷརྨ་པ་ཏི་ས་གྷུ་ལཱི། །ཞེས་པའི་དོན་ནི། གོལ་ས་ཐམས་ཅད་རང་ཐོག་ཏུ་གྲོལ་བར་བྱེད་པའི་སྙིང་པོའོ། །སྐུ་གསུམ་ལམ་དུ་བླང་བའི་ཕྱིར། །ཞེས་པའི་དོན་ནི། སྐུ་གསུམ་ཞེས་པ་ཆོས་སྐུ་ལོངས་སྐུ་སྤྲུལ་སྐུའོ། །ལམ་དུ་ཞེས་པ་ལྟ་སྒོམ་སྤྱོད་པའི་དུས་སུ། བླང་བའི་ཕྱིར་ཞེས་པ་རིག་པ་མངོན་སུམ་དུ། རས་རྨི་ས་མཱ་ཁ་རྒད་ཚེ། །ཞེས་པའི་དོན་ནི། སྐུ་གསུམ་ལམ་དུ་ཆོད་ཅིང་འཛིན་པ་རང་སར་གྲོལ་བར་བྱེད་པའི་སྙིང་པོའོ། །སྣང་བ་དངོས་སུ་བླང་བའི་ཕྱིར། །ཞེས་པའི་དོན་ནི། སྣང་བ་ཞེས་པ་ཆོས་ཉིད་མངོན་སུམ་གྱི། དངོས་སུ་ཞེས་པ་ཡིད་དཔྱོད་མ་ཡིན་པར། བླང་བའི་ཕྱིར་ཞེས་པ་རང་སྣང་ལྷུན་གྲུབ་ཏུ། རུ་པ་ས་མི་མི་ཏ་ལཾ། །ཞེས་པའི་དོན་ནི། ཅེར་གྲོལ་དུས་མཉམ་ལ་གྲོལ་བར་བྱེད་པའི་སྙིང་པོའོ། །སྒྲ་ཡི་ཞེན་པ་མཐའ་གཅད་ཕྱིར། །ཞེས་པའི་དོན་ནི། སྒྲའི་ཞེས་པ་(༨༨)འབྱུང་བཞིའམ། ཞེན་པ་ཞེས་པ་རང་རྒྱུད་དུ། མཐའ་གཅད་ཕྱིར་ཞེས་པ་བརྗོད་དུ་མེད་པར། ང་ཏིག་པ་ཡཾ་ཀ་ལི་ས། །ཞེས་པའི་དོན་ནི། བརྗོད་མེད་ཆིག་འདས་སུ་གྲོལ་བར་བྱེད་པའི་སྙིང་པོའོ། །བསམ་གཏན་ཆེན་པོའི་ས་གནོན་ཕྱིར། །ཞེས་པའི་དོན་ནི། བསམ་གཏན་ཞེས་པ་ངོ་བོ་རང་བཞིན་ཐུགས་རྗེ་གསུམ་ལ། ཆེན་པོའི་ཞེས་པ་གོང་ན་མེད་པའི། ས་གནོན་ཕྱིར་ཞེས་པ་བཅུ་དྲུག་རྫོགས་ཆེན་རང་བཞིན་གྱི། ག་ཚ་པ་ལ་ས་ཨི་ཊཾ། །ཞེས་པའི་དོན་ནི། ས་ལམ་ཆིག་ཆོད་ལ་གྲོལ་བར་བྱེད་པའི་སྙིང་པོའོ། །འཕྲིན་ལས་མཐའ་རུ་དབྱུང་བའི་ཕྱིར། །ཞེས་པའི་དོན་ནི། འཕྲིན་ལས་ཞེས་པ་སངས་རྒྱས་ཀྱི། མཐའ་རུ་ཞེས་པ་ཚེ་འདིའི་མཐའ་དབུགས་ཆད་པ་དང་། དབྱུང་བའི་ཕྱིར་ཞེས་པ་རྩོལ་མེད་ལྷུན་གྲུབ་ཏུ། ཀརྨ་ཨེ་ཀ་ཨ་ནུ་ས། །ཞེས་པའི་དོན་ནི། ངོ་བོ་རང་བཞིན་ཐུགས་རྗེ་གསུམ་གྱི་མཛད་པར་གྲོལ་བའི་སྙིང་པོའོ། །སངས་རྒྱས་མངོན་ཞེན་བཟློག་པའི་ཕྱིར། །ཞེས་པའི་དོན་ནི། སངས་རྒྱས་ཞེས་པ་འཁྲུལ་པ་སངས་པའི་བར་བ། ཡེ་ཤེས་རྒྱས་པའི་རང་སྣང་ལ། མངོན་ཞེན་ཞེས་པ་ཐེག་པ་ཐུན་མོང་པས་རང་བྱུང་དུ་མ་ཤེས་ཏེ། ཡིད་བསྒོམ་བག་ཆགས་ཀྱིས་ཐོབ་པར་འདོད་པ་ལ། བཟློག་པའི་ཕྱིར་ཞེས་པ་སྐུ་གསུམ་རང་སྣང་རང་བྱུང་དུ། སང་ཀྲི་མ་མ་ཀརྨ་ཏ། །ཅེས་པའི་དོན་ནི། སྐུ་གསུམ་ཀ་དག་ཏུ་གྲོལ་བར་བྱེད་པའི་སྙིང་པོའོ། །རྒྱལ་སྲས་རྣམས་ཀྱི་གནས་བཙལ་ཕྱིར། །ཞེས་པའི་དོན་ནི། རྒྱལ་སྲས་ཞེས་པ་ཡང་དག་པར་རྫོགས་པའི་སངས་རྒྱས་ཀྱི་རིགས་འཛིན་པ། རྣམས་ཀྱི་ཞེས་པ་ཟག་བཅས་མི་སྣང་བར་ཕུང་པོ་ལྷག་མེད་དུ་གཤེགས་པ། གནས་བཙལ་ཕྱིར་ཞེས་པ་ངོ་བོ་སྐྱེ་བ་མེད་པའི་གནས་ངོས་བཟུང་དང་བྲལ། རང་བཞིན་འགྲིབ་པ་མེད་པའི་གནས་ཕྱི་ནང་དང་བྲལ། ཐུགས་རྗེ་འགག་པ་མེད་པའི་གནས་ཉེ་རིང་དང་བྲལ་བ། དེ་གསུམ་ལ་འཛིན་པ་མེད་པའི་གནས་ཀ་ནས་དག་པ་སེམས་ཅན་རྣམས་ཀྱི། ང་ལ་ཁེ་པ་ཀི་ལི་ས། །ཞེས་པའི་དོན་ནི། (༨༩)འདི་ཉིད་བཏགས་ཤིང་དབུགས་ལ་སླེབ་ཚད་གྲོལ་བར་བྱེད་པའི་སྙིང་པོའོ། །འདི་ཀུན་རང་ཤུགས་ཚིག་ཏུ་བྱུང་། །ཞེས་པའི་དོན་ནི། འདི་ཀུན་ཞེས་པ་གཉིས་སུ་མེད་པའི་དགོངས་པ། རང་ཤུགས་ཞེས་པ་སྟོང་རིག་མ་འགགས་པའི། ཚིག་ཏུ་བྱུང་ཞེས་པ་སེམས་ཅན་གྲོལ་བར་བྱེད་པའི་སྙིང་པོའོ། །ཞེས་པ་ཀུན་བཟང་ཡབ་ཡུམ་གཉིས་སུ་མེད་པའི་དགོངས་པ། རེ་རེས་གྲོལ་བར་བྱེད་པ་ཆོས་ཉིད་ཀྱི་རང་སྒྲ་ཐིག་ལེ་ཉི་ཤུ་རྩ་ལྔ་པའོ། །ཨཱ་ལུས་གྲོལ་བར་བྱེད་པའི་སྙིང་པོའོ། །ཨཱཿངག་གྲོལ་བར་བྱེད་པའི་སྙིང་པོའོ། །ཧཱུྃ་ཡིད་གྲོལ་བར་བྱེད་པའི་སྙིང་པོའོ། །ལྔ་ལྡན་རྡོ་རྗེའི་ལྟེ་བ་ཐིག་ལེ་མཐིང་ཀ་ལ་བྲིའོ། །ཡང་ཀུན་ཏུ་བཟང་པོའི་དགོངས་པའོ། །ཨེ་མ་ཀི་རཱི་ཀི་རཱི། མས་དྷ་བྷ་ལ་བཱ་ལི། ས་མི་ཏ་སུ་རུ་སུ་རུ། ཀུན་དྷ་ལི་མ་སུ་མ་སུ། ཨེ་ཀ་ར་སུ་ལི་བྷས་ཏ་ཡེ། ཙ་ཀི་ར་བྷུ་ལི་ཏ་ལྕེ་ཡེ། ས་མུན་ཏ་ཙ་ཡེ་སུ་གྷ་ཡ། བྷི་ཏི་ལ་ས་ན་བྷྱ་གྷུ་ལི་ཡེ། ས་ཀ་རི་དྷུ་ཀ་ནི། མ་ཏ་རི་བྷེ་ཏ་ན། བ་ར་ལི་ཧི་ས་ན། མ་ཁར་ཏེ་ཀེ་ལ་ན་སཾ། སམ་བྷུ་ར་ཏ་མེ་ཀ་ཙ་ར་ཏཾ་པ། ཨུ་རྒྱ་གྷ་ཏ་ར་ཨེ་པ་ཤན། ན་ར་བྷི་ཧི་ས་གྷུ་ཏི་པ་ཡཱ། གྷུ་ར་གྷུ་ར་ཕ་ག་ཁ་ར་ན་ལཾ། ན་ར་ན་རཱ་ཨི་ཐ་ར་ས་ཌ་ལཾ། སིར་ན་སིར་ན་བྷེ་ས་བྷེ་ས་རས་པ་ལ། བྷུདྡྷ་བྷུདྡྷ་བྷུད་ཚི་ཥ་ས་ཀྱི་ལཾ། ས་སཱ། རི་རཱི། ལ་ཁཱེ། ཨི་ཨཱི། མ་མཱ༔ རི་རཱི༔ ལ་ཏ་ཨ། གཞི་འཛིན་པའི་རིག་པ་རྡོ་རྗེ་ལུ་གུ་རྒྱུད་དུ་གྲོལ་བར་བྱེད་པའི་སྙིང་པོའོ། །ཚིག་བར་ཉི་ཤུ་རྩ་དྲུག་པའོ། །ཡུམ་ཀུན་ཏུ་བཟང་མོའི་དགོངས་པའོ། །སྨས་ཏ་བྷ་ས་ལི། ས་མི་ཏ་སུ་རུ་སུ་རུ། ཀུན་དྷ་ལི་མ་སུ། ཨི་ཀི་རི་ལི་བྷི་ཏ་ཡེ། ཙ་ཀ་བྷུ་ལི་ཏ་ལྕེ་ཡེ། ས་མུན་ཏ་ཙརྱ་སུ་གྷ་ཡེ། བྷི་ཏི་སན་བྷན་གྷུ་ཡཱེ། ཀི་རི་དྷ་ཀི་ན། དྷ་ཀ་མཧཱ་བྷོ་རེ། ཏ་ན་བ་ར་བ་ལི་དྷི། ས་ན་ཁ་ར་ཏ་ཀེ་ལ་ན། སམ་བྷུ་དྷ་ར་ཏ། ཨེ་ཀ་ཙ་ར་ས་བྷ་ས་ཏཾ། ཏ་པ་སུརྱ་གྷ་ཏ་ར་ཨ། མ་ན་པ་ར་བྷི་ཧོ། ཏིང་གྷུ་ར་ལ། མ་སྨིན་པ་གྷུ་ཏི་(༩༠)ལ། ཏ་ཡ་གྷུ་ར་གྷུ་ར་རླངས་ག་ཁ་བར་ན་ལཾ། ན་ར་ནཱ་རཱ་ལཾ། ཨེ་ཐ་ར་པ་ཊ་ལཾ། སིརྣ་སིརྣ་བྷེ་ས་རས་པ་ལམ། ས་ཀི་ལཾ། ས་སཱ། རི་རཱི། ལི་ལཱི། ཨི་ཨཱི། མ་མཱ། ར་རཱ། མཚན་ཉིད་འཛིན་པའི་རིག་པ་འགྱུར་སྟོང་ཅི་མེད་དུ་གྲོལ་བར་བྱེད་པའི་སྙིང་པོ་ཚིག་བར་ཉི་ཤུ་རྩ་དགུ་པ་དང་། གཉིས་ཐིག་ལེའི་དབྱིངས་ལ་བྲིའོ། །ལོངས་སྐུ་ཞི་ཁྲོའི་དགོངས་པ། འ་ཨ་ཤ་ས་མ་ཧ། རིགས་དྲུག་ཀློང་དུ་གྲོལ་བར་བྱེད་པའི་སྙིང་པོ་ཐིག་ལེ་དྲུག་པའོ། །སྤྲུལ་སྐུ་འགག་པ་མེད་པའི་དགོངས་པ། ཨ་ཨཱ། ཨི་ཨཱི། ཨུ་ཨཱུ། ར྇་རཱ྇། ལ྇་ལཱ྇། ཨེ་ཨཻ། ཨོ་ཨཽ། ཨཾ་ཨཱཿ སྐྱེ་བ་མེད་པར་གྲོལ་བར་བྱེད་པའི་སྙིང་པོ་ཚིག་བར་བརྒྱད་པའོ། །ཀ་ཁ་ག་གྷ་ང་། ཙ་ཚ་ཛ་ཛྷ་ཉ། ཊ་ཋ་ཌ་ཌྷ་ཎ། ཏ་ཐ་ད་དྷ་ན། པ་ཕ་བ་བྷ་མ། ཡ་ར་ལ་ཝ། ཤ་ཥ་ས་ཧ། ཀྵཿ འགག་པ་མེད་པར་གྲོལ་བར་བྱེད་པའི་སྙིང་པོ་ཚིག་བར་བརྒྱད་པའོ། །བསྟན་པ་ཐམས་ཅད་མི་འགྱུར་བའི་དགོངས་པ་ཡེ་དྷརྨཱ་ཧེ་ཏུ་པྲ་བྷཱ་བ། ཧེ་ཏུན་ཏེ། ཥཱནྟ་ཐཱ་ག་ཏོ་ཧྱ་བ་དད། ཏེ་ཥཱཉྩ་ཡོ་ནི་རོ་དྷ་ཨེ་བཾ་བཱ་དཱི་མཧཱ་ཤྲ་མ་ཎ་ཡེ་སྭཱ་ཧཱ། གནས་པ་རྒྱུན་དུ་གྲོལ་བར་བྱེད་པའི་སྙིང་པོ་ཚིག་བར་བཅུ་གཉིས་པའོ། །དེ་ལྟར་འཇའ་ཚོན་ལྷ་སྐུ་རིང་བསྲེལ་ཀྱི་སྙིང་པོ་མི་འདྲ་བ་བརྒྱད་པོ་ལ་འཕྲིན་ལས་མཐའ་རྒྱས་ཤིང་ཤམ་བུ་ནི་ནད་དང་གདོན་དང་འཇིགས་པ་བརྒྱད་དང་། སྒྲིབ་པ་ཐམས་ཅད་རིག་པར་ཞི་བ་ཤཱན་ཏིཾ་ཀུ་རུ་ཡེ་སྭཱ་ཧཱ། ཚེ་དང་བསོད་ནམས་དང་ཞིང་ཁམས་ཐམས་ཅད་རིག་པར་རྒྱས་པར་གྱུར་ཅིག་པུཥྚིཾ་ཀུ་རུ་ཡེ་སྭཱ་ཧཱ། དགྲ་བགེགས་དང་སངས་རྒྱས་དང་ཆོས་དང་དགེ་འདུན་དང་འཁོར་འདས་རིག་པའི་དབང་དུ་སྡུས་ཤིག་པ་ཤཾ་ཀུ་རུ་ཡེ་སྭཱ་ཧཱ། དུག་ལྔ་དུག་གསུམ་རིག་པའི་ངང་དུ་མཱ་ར་ཡ་སོད་སོད་སྭཱ་ཧཱ། ཞེས་པ་དང་ཡེ་ཤེས་རྣམ་པ་ལྔས་བསྐོར་བ་ནི་གཞི་མི་འགྱུར་བའི་ཐིག་ལེ་ཆེན་པོའོ། །ཞེས་བཏགས་པས་གྲོལ་བའི་སྙིང་པོ་བསྟན་པའི་ལེའུ་སྟེ་དྲུག་པ་(༩༡)རྫོགས་སོ།། །།