ཞིང་ཁམས་ཡུལ་གྱི་གནད།
རྒྱ་གར་སྐད་དུ༔ སརྦ་བ་གུ་ལི༔ བོད་སྐད་དུ༔ ཞིང་ཁམས་ཡུལ་གྱི་གནད༔ སྣང་བ་རང་སངས་ཆེ་ལ་ཕྱག་འཚལ་ལོ༔ དྲི་མ་རྣམས་ནི་རང་དག་པས༔ ཡེ་ནས་སྐུ་གསུམ་རྫོགས་པའི་ཞིང༔ རང་གི་ལྷ་རྣམས་མངོན་སྣང་བས༔ ཡི་དམ་ལྷ་ནི་མ་བསྐྱེད་རྫོགས༔ ཀྱེ་ཧོ༔ རྡོ་རྗེ་འཛིན་པ་ཆེ༔ སྣང་བ་གོམས་པར་གང་བྱེད་པ༔ འཁོར་འདས་གཏིང་(༤༠)ནས་བཟློག་པའི་ཕྱིར༔ རུ་ཤན་འབྱེད་པའི་སྤྱོད་པ་ཡིས༔ འཁོར་འདས་རུ་ཤན་མ་ཕྱེད་ན༔ རྟག་ཏུ་འཁོར་བ་ལ་གནས་གྱུར༔ ལུས་ངག་རྣལ་དུ་མ་ཕབ་ན༔ རྟག་ཏུ་བྱ་བྱེད་གཡེང་བར་འགྱུར༔ ལུས་ཀྱི་གནད་རྣམས་མ་གཟིར་ན༔ ཡེ་ཤེས་མངོན་དུ་འབྱིན་མི་ནུས༔ ལུག་རྒྱུད་གོམས་པར་མ་བྱས་ན༔ ཐ་མལ་རྣམས་དང་ཁྱད་མེད་འགྱུར༔ སྣང་བ་གོང་དུ་མ་སྤེལ་ན༔ འབྱུང་བའི་དགྲ་དང་བྲལ་མི་འགྱུར༔ རིག་པ་ཚད་ལ་མ་ཕབ་ན༔ ཡིད་དཔྱོད་འབྲས་བུ་ཐུག་མེད་འགྱུར༔ ཆོས་རྣམས་ཟད་སར་མ་བསྐྱལ་ན༔ དངོས་པོ་རྣམས་དང་ཁྱད་ཅི་ཡོད༔ ཀྱེ་ཀྱེ་རྡོ་རྗེ་འཛིན་པ་ཉོན༔ དེ་ལྟར་གཏན་ལ་མ་ཕབ་ན༔ ཡིད་དཔྱོད་འཛིན་པ་རྣམས་དང་ནི༔ ཁྱད་པར་ཅི་ཡང་མེད་པར་འགྱུར༔ དེ་ཕྱིར་ངེས་གསང་སྙིང་པོ་འདི༔ མུན་པ་ལས་ནི་མར་མེ་འམ༔ བ་གླང་རྣམས་ལས་གླང་ཆེན་ནམ༔ གཅན་གཟན་རྣམས་ལས་སེང་གེ་འམ༔ རྐང་ཐང་ལས་ནི་རྟ་པ་བཞིན༔ ཀུན་གྱི་ནང་ནས་ཁྱད་པར་རོ༔ ཞེས་བཀོད་པ་ཆེན་པོ་ལས་རང་བཞིན་ཞིང་ཁམས་ཀྱི་གནད་གཏན་ལ་དབབ་པ་སྟེ་བཅུ་པ་རྫོགས་སོ༔ རྒྱ་རྒྱ་རྒྱ༔ ལས་ཅན་ཅིག་དང་འཕྲད་པར་ཤོག༔
རྒྱ་གར་སྐད་དུ༔ པྲ་བྷ་ས་ར་ཡ༔ བོད་སྐད་དུ༔ བྱ་བྱེད་ལམ་སྣང༔ བཅོམ་ལྡན་འདས་རྡོ་རྗེ་བཀོད་པ་ཆེ་ལ་ཕྱག་འཚལ་ལོ༔ རྣལ་འབྱོར་འབྲས་བུ་གང་འདོད་པ༔ རྟག་ཏུ་ལག་གི་འདུ་བྱེད་བསྒོམ༔ བརྡའ་ལ་གོམས་པར་བྱེད་པ་ཡིས༔ སྣང་དང་མི་སྣང་ལ་སོགས་བསྒོམ༔ རྣལ་འབྱོར་དེ་ལྟར་གང་བསྒོམས་པ༔ ཡན་ལག་རྣམས་ནི་ཕྱག་རྒྱར་གྲོལ༔ སྒྲ་ཡི་འདུ་བྱེད་གང་བསྒོམས་པ༔ དབང་པོ་རྣམས་ནི་ཕྱག་རྒྱར་གྲོལ༔ ཁ་དོག་ཉིད་ལ་སུ་གོམས་པ༔ ལུས་ནི་ཕྱག་རྒྱ་ཆེན་པོར་གྲོལ༔ ངག་གི་སྒྲ་ལ་གང་གོམས་པ༔ ངག་གི་ཕྱག་རྒྱ་ཆེན་པོར་གྲོལ༔ ཡི་གེའི་འཕྲོ་འདུ་གང་གོམས་པ༔ སེམས་ནི་ཕྱག་རྒྱ་ཆེན་པོར་གྲོལ༔ རླུང་ལ་གོམས་པར་གང་བྱེད་པ༔ བླ་མེད་གསང་བ་མཆོག་ལ་སྤྱོད༔ འདི་དག་རྣམས་ནི་སུ་གོམས་པ༔ ཕྱག་རྒྱ་ཆེན་པོ་ཉིད་ཐོབ་བོ༔ ཞེས་(༤༡)བཀོད་པ་ཆེན་པོ་ལས༔ ལུས་ངག་གི་བྱ་བྱེད་གཙོ་བོར་བྱེད་པ་གཏན་ལ་ཕབ་པ་སྟེ་བཅུ་གཅིག་པ་རྫོགས་སོ༔