བདུན་པ། ལས་ཚོགས་ཀྱི་ལེའུ།
དེ་ནས་ལས་ཚོགས་ཀྱི་རིམ་པ་ལ། རིལ་བུ་བཟའ་བ། ཚེ་དང་འབྱོར་པ་སྤེལ་བ། གཏོར་མ། དབང་དུ་བསྡུ་བ། ངག་བསྡུ་བ། མངོན་ཤེས་སྒྲུབ་པ། རིག་པ་འཛིན་པ། ཞལ་ལ་བལྟ་བ་དང་བརྒྱད་ལས། དང་པོ་ནི། དེ་ལྟར་བསྒྲུབས་པའི་རྟགས་(༢༦)རྣམས་རྫོགས་ཤིང་སྦྱིན་སྲེག་བྱས་པའི་རྗེས་ལ། མདུན་གྱི་རིལ་བུ་རྣམས་བཟའ་བའི་ལས་ཚོགས་ནི། སྒྲུབ་པ་དང་སྦྱིན་སྲེག་ཐོན་པའི་ནངས་པར་མདུན་གྱི་དབྱངས་ཅན་མ་ལ་སངས་རྒྱས་དང་བྱང་ཆུབ་སེམས་དཔས་བསྐོར་བ་རྣམས་འོད་དུ་ཞུ་ནས་རིལ་བུའི་རང་བཞིན་དུ་བསམ་པ་ལས་འོད་འཕྲོས་པས་ཕྱོགས་བཅུའི་ཚེ་དང་དཔལ་འབྱོར་དང་། གཟི་བརྗིད་དང་། ཁྱད་པར་དུ་གང་འདོད་པའི་དངོས་གྲུབ་ཤེས་རབ་དག་བསྡུས་ནས་དེ་ལ་ཐིམ་པས་ཚེ་དང་བཀྲག་དང་གཟི་བརྗིད་རྒྱས་པར་འདོད་ན། རིལ་བུ་རྣམས་ཡེ་ཤེས་ཀྱི་བདུད་རྩི་ཁ་དོག་ལྔ་དང་ལྡན་པར་བསམས་ལ། འཁོར་ལོས་དྲིལ་ལ་མགུལ་དུ་བཅངས་ནས་ཞག་ཉི་ཤུ་རྩ་གཅིག་གི་ཉི་མ་རྩེ་ཤར་ལ་རིལ་བུ་དེ་རྣམས་ཀྱི་ནང་ནས་རིལ་བུ་ལྔ་ལྔ་བདུད་རྩིར་བསམས་ཏེ། རང་ཉིད་འཇམ་དཔལ་དུ་མོས་པས་ཁོང་དུ་མིད་པས་ཚེ་དང་བཀྲག་དང་གཟི་བརྗིད་རྒྱས་པར་བསམས་ལ། ལྷག་མ་བརྒྱད་སྒྲུབ་པའི་དངོས་གྲུབ་ཀྱི་རྟེན་དུ་ལུས་དང་མི་འབྲལ་བར་བཅང་ངོ་། །དེ་བཞིན་དུ་འཆད་པ་ལ་དཔལ་བེའུ་དང་། རྩོད་པ་ལ་རལ་གྲི་དང་། རྩོམ་པ་ལ་པདྨ་དཀར་པོ་དང་། གྲགས་པ་ཕུན་སུམ་ཚོགས་པ་ལ་དུང་དང་། འབྱོར་པ་རྒྱས་པར་འདོད་པ་ལ་ཡིད་བཞིན་ནོར་བུ་དང་། འགྲོ་བ་དབང་དུ་བསྡུ་བ་ལ་ལི་ཁྲི་དང་། བསམས་པ་ཐམས་ཅད་འགྲུབ་པར་འདོད་པ་ལ་བུམ་པ་བཟང་པོར་བསམས་ལ་བཟའ་འོ། །དེས་ནི་ཇི་ལྟར་འདོད་པའི་དོན་ཡིད་བཞིན་དུ་འགྲུབ་པར་འགྱུར་རོ། །དེ་རྣམས་ལྷག་མ་བརྒྱད་ནི་རྟེན་དུ་བྱས་ཏེ་བཅངས་ལ། ཕྱིས་སྒྲུབ་པ་བྱེད་ནའང་དེའི་གསེབ་ཏུ་བཏགས་པས་ཉིས་འགྱུར་གྱིས་འགྲུབ་ཐག་ཉེ་ཞིང་བྱིན་རླབས་ཆེ་བ་ཡིན་ནོ། །རིལ་བུ་བཟའ་བའི་ལས་ཚོགས་སོ། །
གཉིས་པ་ཚེ་དང་འབྱོར་པ་སྤེལ་བ་ནི། གོང་གི་རིལ་བུ་དེ་རྣམས་སྒྲུབ་དུས་ནས་ཚེ་དང་འབྱོར་པ་ཐམས་ཅད་བསྡུས་ཏེ་རིལ་བུར་ཐིམ་པར་བསམས་ལ། ཞག་ཉེར་གཅིག་ཏུ་བསྒྲུབས་ནས་ཁྱད་པར་དུ་རིལ་བུ་རྣམས་སེར་པོས་ཁ་བསྒྱུར་ཞིང་། ལྷ་ཡབ་ཡུམ་གཉིས་ཀའང་སེར་པོ་བསམས་ནས་བསྒྲུབས་ཐོན་པ་དང་རིལ་བུ་སྔ་མ་བཞིན་ཟོས་ན་ཚེ་ཉི་ཟླ་དང་མཉམ་ཞིང་འབྱོར་པ་རྒྱལ་པོ་དང་འདྲ་བར་འགྱུར་རོ། །ཚེ་དང་འབྱོར་པ་སྤེལ་པའི་ལས་ཚོགས་སོ། །
གསུམ་པ་གཏོར་མ་ནི། གོང་གི་སྒྲུབ་པའི་ཐུན་མཚམས་དང་དུས་རྒྱུན་དུ་མ་ཆག་པར་ཕྱག་ལེན་དུ་མཛད་པ་དེའི་མན་ངག་ནི། རིན་པོ་ཆེ་ལ་སོགས་པའི་སྣོད་གཙང་མར་དཀར་གསུམ་མངར་གསུམ་དྲི་བཟང་སྨན་འབྲུ་ལ་སོགས་པ་བླུགས་ཏེ། སྭ་བྷཱ་ཝས་སྟོང་པར་བསམས་པའི་ངང་ལས། ྃ་ལས་རིན་པོ་ཆེའི་སྣོད་ཡངས་ཤིང་རྒྱ་ཆེ་བའི་ནང་དུ་ༀ་ཨཱཿཧཱུྃ་གསུམ་ཡོངས་སུ་གྱུར་པ་ལས་བདུད་རྩིའི་རྒྱ་མཚོ་ནམ་མཁའ་དང་མཉམ་པའི་ནང་དུ་གང་ལ་ཅི་དགོས་པའི་ཡོ་བྱད་ལྷ་དང་མིའི་ཕུན་སུམ་ཚོགས་པ་ཐམས་ཅད་བསམས་ལ། ༀ་ཨཱཿཧཱུྃ་གསུམ་གྱིས་བྱིན་(༢༧)གྱིས་བརླབས་ཏེ། མདུན་གྱི་ནམ་མཁར་པདྨའི་སྡོང་པོ་ཡངས་ཤིང་རྒྱ་ཆེ་བ་འདབ་མ་བྱེ་བ་ཕྲག་མང་པོས་བསྐོར་བའི་དབུས་སུ་འཇམ་པའི་དབྱངས་ཡབ་ཡུམ་བསམ་པའི་འདབ་མ་རྣམས་ལ་སངས་རྒྱས་དང་བྱང་ཆུབ་སེམས་དཔའ་དང་བླ་མ་བརྒྱུད་པའི་ཚོགས་དང་བཅས་པ་རྣམས་བཞུགས་པར་བསམ། དེ་ཡང་པདྨའི་འདབ་མ་མཐོ་དམན་སུམ་རིམ་དུ་ཡོད་པའི་སྟེང་གི་ནམ་མཁའ་ལ་བླ་མ། དབུས་ཀྱི་ལྟེ་བར་ཡི་དམ། འདབ་མ་བརྒྱད་པའི་དང་པོ་ལ་སངས་རྒྱས། བར་པ་ལ་བྱང་ཆུབ་སེམས་དཔའ། ཐ་མ་ལ་སྲུང་མ་དམ་ཚིག་ཅན་དང་འགྲོ་བ་རིགས་དྲུག་སྲིད་པ་བར་མ་དོའི་སེམས་ཅན་སྐྱེ་བ་བཞི་དང་བཅས་པ་རྣམས་བསམས་ལ། རང་གི་སྙིང་ག་ནས་དྷཱིཿལས་འོད་འཕྲོས་པས་དེ་ཁོ་ན་འདྲ་བའི་ཡེ་ཤེས་པ་བྱོན་ནས་དེ་རྣམས་ལ་སོ་སོར་ཐིམ་པ་བསམས་ལ། རྩ་སྔགས་ཀྱི་མཐར་ཨི་དཾ་གྲ྇ཧྞ་བ་ལིཾ་ཏ་ཁ་ཁ་ཁཱ་ཧི་ཁཱ་ཧི་བཏགས་ལ་ལྔའམ་བདུན་གྱིས་ཕུལ་བས། དེ་དག་གི་ཞལ་ནས་ལྗགས་རྡོ་རྗེའི་སྦུ་གུ་ཅན་ལས་འོད་བྱུང་གཏོར་མ་ལ་གསོལ་ཞིང་ཉེ་བར་མཁོ་བའི་དངོས་པོ་བསྣམས་པར་བསམས་ལ། བསྟོད་པས་བསྟོད་ནས་མཉེས་པ་ལ་བཟོད་པར་གསོལ་ཏེ། ཡེ་ཤེས་པ་དང་འཇིག་རྟེན་པའི་འཁོར་རྣམས་གཤེགས་པར་བསམ་ཞིང་། འཇིག་རྟེན་ལས་འདས་པའི་དམ་ཚིག་པ་རྣམས་རང་ལ་བསྡུས་ལ་མི་དམིགས་པའི་ངང་ལ་དར་ཅིག་བཞག་ནས་བསྔོ་བ་བྱ། དེས་ནི་དངོས་གྲུབ་ཉེ་ཞིང་བར་ཆད་ཀྱིས་མི་ཚུགས་པ་ཡིན་ནོ། །གཏོར་མའི་ལས་ཚོགས་སོ། །
བཞི་པ་དབང་དུ་བྱ་བ་ལ། འགྲོ་བ་ཕལ་པ་དབང་དུ་བསྡུ་བ་དང་། མཆོག་དབང་དུ་བསྡུ་བའོ། །
དང་པོ་ལ་གཉིས་ལས། འགྲོ་བ་སྤྱི་དབང་དུ་བྱ་བ་ནི། སྔར་གྱི་རྫས་བཅུ་གཉིས་ཀྱི་སྟེང་དུ་ལི་ཁྲི་དང་། སེང་ལྡེང་སིནྡྷུ་ར་རྣམས་སྦྱར་ལ་རྒྱ་སྐྱེགས་ཀྱིས་ཁ་བསྒྱུར་ལ། སྔར་གྱི་འཁོར་ལོ་ལ་འགྲོ་བ་ཐམས་ཅད་དབང་དུ་སྡུས་ཤིག་གི་སྤེལ་ཚིག་བྲིས་པར་བསྡུས་ལ། ལྷ་རྣམས་དམར་པོར་གསལ་བཏབ་ནས་སྔ་མ་བཞིན་སྒྲུབ་ཅིང་ཁྱད་པར་དུ་མདུན་གྱི་རིལ་བུ་དབྱངས་ཅན་མ་དམར་མོར་བསམ་པའི་ཐུགས་ཀའི་རལ་གྲི་དང་ཧྲཱིཿལས་འོད་ཟེར་འཕྲོས་པས། ལྷ་དང་ཀླུ་དང་གནོད་སྦྱིན་དང་དྲི་ཟ་དང་སྣོད་བཅུད་ཐམས་ཅད་ལ་ཕོག །འོད་དུ་ཞུ་རིལ་བུ་ལ་ཐིམ་པར་བསམ་ཞིང་། ༀ་ཧྲཱིཿདྷཱིཿམ་མེ་དཱི་པ་མཉྫུ་ཤྲཱི་མཱུྃཿཧྲཱིཿཤྲཱི་སེང་ཧོ་ཥཿམུ་པ་ཏ་མཉྫུ་ཤྲཱི་ལོ་ཀ་སརྦ་པ་ཤཾ་ཀུ་རུ་སྭཱ་ཧཱ། ཞེས་ཁྲི་ཕྲག་གཅིག་ཏུ་བཟླས་པས་རིལ་བུ་ལས་འོད་དང་། རླངས་པ་དང་། མེ་ཏོག་གི་ཆར་བྱུང་ན་འགྲུབ་པ་རབ། རྨི་ལམ་དུ་བྱུང་ན་འབྲིང་། ཐ་མ་ཡང་ཕ་རོལ་སྙིང་ལ་དུང་དུང་པ་བྱུང་ན་རིལ་བུ་འཁོར་ལོས་དྲི་བ་སྔ་མ་བཞིན་མགུལ་དུ་བཏགས་ཏེ་ཕུད་ཁ་ཅིག་བཟའ། ཁ་ཅིག་བཅང་། གཞན་རྣམས་རྒྱལ་པོའི་ཕོ་བྲང་ངམ། གླིང་ངམ། ལམ་གྱི་བཞི་མདོ་(༢༨)འམ། ཚོང་དུས་སམ། མདོར་ན་མི་མང་པོ་འདུ་བའི་སར་བ་དམར་སེར་གྱི་ལྕི་བ་དང་བསྲེས་ལ་དུད་པ་བཏང་ན་དེ་ཐམས་ཅད་དབང་དུ་འགྱུར་རོ། །
གཉིས་པ་བྱེ་བྲག་ཏུ་སྐྱེས་པ་བུད་མེད་དབང་དུ་བྱ་བ་ལ། སྔར་གྱི་རྫས་རྣམས་ཀྱི་སྟེང་དུ་པདྨ་རཀྟ་དང་གི་ཝཾ་བསྲེས་ལ་རིལ་བུ་དམར་པོ་བྱ། འཁོར་ལོ་ལ་ཡང་དེ་དང་མཐུན་པར་བྲིས་ལ་རིལ་བུ་དྲིལ་ནས་མདུན་དུ་བཞག་ལ། རང་ཉིད་འཇམ་དཔལ་དང་དབྱངས་ཅན་མར་བསྐྱེད་པ་གཉིས་ལས། ཕོ་དབང་དུ་བྱེད་ན་རང་ཉིད་དབྱངས་ཅན། མདུན་གྱི་རིལ་བུ་འཇམ་དཔལ་དུ་བསྐྱེད་ལ་ཡེ་ཤེས་པ་བཅུག་པའི་འོད་ཟེར་གྱིས་བསྒྲུབ་བྱའི་རྣམ་ཤེས་བཀུག་ནས་རིལ་བུར་བསམ་ཞིང་། མོ་དབང་དུ་བྱེད་ན་དེ་ལས་ལྡོག་པས་བསྒྲུབ་བྱ་མོའི་རྣམ་ཤེས་རང་དང་མདུན་གྱི་ལྷའི་འོད་ཟེར་གྱིས་བཀུག་པ་བདག་ལ་ཆགས་བཞིན་དུ་རིལ་བུ་ལ་ཐིམ་པར་བསམས་ལ། རྩ་སྔགས་ཀྱི་སྤེལ་ཚིག་ཏུ་ཆེ་གེ་པ་ཤཾ་ཀུ་རུ་ཧོཿབཏགས་ལ་བཟླས་ཏེ་རྟགས་བྱུང་བ་དང་སྔ་མ་བཞིན་རང་བཟའ་ཞིང་བཅང་། ཕ་རོལ་པོ་དེ་ཉིད་ཀྱི་གོས་སམ་བཟའ་བཏུང་ལ་བྱུགས་ཏེ་བྱིན་ན་གང་དབང་དུ་བྱ་བ་དེ་འགྲུབ་པར་འགྱུར་རོ། །དེ་བཞིན་དུ་འབངས་ལ་ཚ་བ་གསུམ། སྐྱེས་པ་ལ་གུར་གུམ། བུད་མེད་ལ་ཟླ་བའི་ཁུ་བ། མི་ཕལ་པ་ལ་སེང་ལྡེང་སྦྱར་ལ་བསྒྲུབ་ན་ཇི་ལྟར་འདོད་པ་དེ་དབང་དུ་འགྱུར་རོ། །
གཉིས་པ་མཆོག་དབང་དུ་བསྡུ་བ་ནི། སྔར་གྱི་རྫས་བཅུ་གཉིས་པོའི་སྟེང་དུ། རྒྱལ་པོ་ལ་ལྕགས་ཕྱེ། བཙུན་མོ་ལ་གི་ཝཾ། བློན་པོ་ལ་མགྲོན་བུ། དགེ་བའི་བཤེས་གཉེན་ལ་རིན་པོ་ཆེ། སྨན་པ་ལ་ཨ་རུ་ར་མཆུ་སྙུང་བཏང་ལ་སྔ་མ་བཞིན་སོ་སོའི་མིང་སྤེལ་ཏེ་བསྒྲུབས་པའི་རིལ་བུ་དེ་དག་ལ་བྱུག་པའམ། བཟའ་བཏུང་དུ་སྦྱར་བ་འམ། དུད་པ་བཏང་ཞིང་། རང་གི་དཔྲལ་བར་ཐིག་ལེ་བྱས་ལ་བསྒྲུབ་བྱ་ལ་བལྟས་ན་དེ་ཉིད་དབང་དུ་འགྱུར་རོ། །དབང་དུ་བསྡུ་བའི་ལས་ཚོགས་སོ། །
ལྔ་པ་ངག་བསྡུ་བ་ནི། པཎྜི་ཏའམ། དགེ་བའི་བཤེས་སམ། སྔགས་པ་ནུས་པ་ཅན་ནམ། རིགས་ཀྱི་གཙོ་བོ་དྲན་པ་ཅན་ནམ། བསྒྲུབ་བྱ་ཤེས་རབ་ཅན་ནམ། ཤགས་སམ། རྩོད་པ་དྲག་པོས་རྒོལ་བ་རྣམས་ལ་བྱ་སྟེ། དེ་ཡང་ངག་རྐུ་བ་དང་འཕྲོག་པ་གཉིས་ལས། པཎྜི་ཏའམ་དགེ་བའི་བཤེས་གཉེན་ལ་སོགས་པ་ཡུལ་མཆོག་རྣམས་ཀྱི་ངག་བརྐུ་བར་བྱ་སྟེ། དེ་ཡང་བསྒྲུབ་བྱ་དེའི་ལྕེ་ཡི་སྟེང་ན་པདྨ་དམར་པོ་འདབ་མ་བརྒྱད་པ་ཁ་ཐུར་དུ་ལྟ་བ་དང་། སྙིང་གི་ནང་དུ་པདྨ་དམར་པོ་འདབ་མ་བརྒྱད་པ་ཁ་གྱེན་དུ་བསྟན་པ་གཉིས་ཁ་སྦྱོར་གྱི་ནང་དུ། ཁོ་ཡི་རྣམ་པར་ཤེས་པ་དང་ཤེས་རབ་ཀྱི་ངོ་བོ་ཨཱ་ལི་དམར་པོ་དང་ཀཱ་ལི་དཀར་པོས་མེར་གྱིས་ཁེངས་པ་ལ། རང་གི་སྙིང་ཀའི་དྷཱིཿལས་འོད་འཕྲོས་པས་ཕྱོགས་བཅུའི་སངས་རྒྱས་ལ་སོགས་པའི་ཤེས་རབ་ཐམས་ཅད་བསྡུས་(༢༩)ནས་དེ་ལ་ཐིམ་པས་བསྒྲུབ་བྱ་དེ་ཤེས་རབ་དང་ལྡན་པར་བསམ། དེ་ནས་རང་གི་སྙིང་གའི་དྷཱིཿལས་རྣམ་ཤེས་ཀྱི་བུང་བ་དམར་པོ་གྲངས་མེད་པ་འཕྲོས་ནས་བསྒྲུབ་བྱའི་ཁོང་པར་སོང་ནས་ཨཱ་ལི་ཀཱ་ལི་རྣམས་སོ་སོར་ཁྱེར་ནས་རང་གི་སྙིང་ག་དང་ལྕེ་ཡི་སྟེང་དུ་ཐིམ་པར་བསམ་ཞིང་། རྩ་སྔགས་ཀྱི་མཐར་ཆེ་གེ་མོའི་ངག་བྷི་ཤི་ཀུ་རུ་ཧོཿཞེས་བརྒྱ་རྩ་བརྒྱད་ལ་སོགས་པ་བཟླས་ལ། ཁོ་ཡི་སྙིང་དང་ལྕེའི་པདྨ་རང་གི་སྙིང་དང་ལྕེ་ཡི་པདྨ་ལ་ཐིམ་པས། རང་གི་སྙིང་གར་འཇམ་དཔལ་དང་ལྕེ་སྟེང་དུ་དབྱངས་ཅན་མའི་འཁོར་ལོ་གསལ་བཏབ་ལ་སྔགས་བཟླས་པས། ཁོ་ཡི་དྲན་པ་དང་ཤེས་རབ་ཉམས་ནས་རང་ལ་རྒྱས་པར་འགྱུར་རོ། །
ངག་འཕྲོག་པ་ནི། གཙོ་བོའི་རྩོད་པ་དང་ཤག་འགྲན་པའི་ཟླ་ལ་སོགས་པ་རང་བས་ཡུལ་དམན་པ་རྣམས་ལ་བྱ་སྟེ། དེ་ཡང་བསྒྲུབ་བྱ་དེ་ཡི་ལུས་ཀྱི་ནང་ན་རྩ་ཨ་ཝ་དྷཱུ་ཏི་རྒྱུ་མ་ཕུས་བཏབ་པ་དྲང་པོར་གྱེན་དུ་ལངས་པ་ལྟ་བུའི་མར་སྣ་གསང་གནས་དང་ཡར་སྣ་སྨིན་མཚམས་ལ་ཐུག་པའི་ནང་དུ་ཤེས་རབ་ཀྱི་ངོ་བོ་ཁོ་ཡི་རྣམ་ཤེས་ཨ་དཀར་པོས་ཐག་གིས་གང་བའི་སྨིན་མཚམས་སུ་བུག་པ་གྲུ་གསུམ་ལ་རྩ་དེའི་ཁ་བསྟན་ནས་ཨ་རྣམས་དཀར་ཉུག་ཉུག་ཡོད་པར་བསམ། དེ་ནས་རང་གི་ཐུགས་ཀའི་དྷཱིཿལས་འོད་དམར་པོ་འཕྲོས་པས་ཁོ་ཡི་སྨིན་མཚམས་ཀྱི་བུག་པའི་ཨ་རྣམས་ལ་ཕོག །ཨ་རྣམས་རིམ་པས་ཚུར་དྲངས་ཏེ་རང་གི་ཁོང་པར་ཐིམ་པས་འཕྲལ་ལ་ཤེས་རབ་ཀྱིས་གང་ཞིང་། ཁོ་ཡི་ཤེས་རབ་འཕྲལ་ལ་ཟད་དེ་སྟོང་སངས་སོང་བར་བསམ་ཞིང་སྔར་གྱི་སྔགས་བཟླས་ཏེ། མཐར་ཁོ་ཡི་ལུས་སྟོང་པར་སོང་། རང་གི་ལུས་གང་ནས་ཤེས་རབ་རྒྱས་པར་བསམས་ལ། ཁོ་ཡི་དྲན་པ་ཉམས་ཤིང་རང་གི་དྲན་པ་སྔོན་ལས་ཁྱད་པར་དུ་འཕགས་པ་ཐོབ་པར་འགྱུར་རོ། །སླར་ཡང་བླ་མ་དམ་པ་ལས་བརྒྱུད་པའི་གདམས་པ་ནི། བསྒྲུབ་བྱ་ཕ་རོལ་པོ་ཤེས་རབ་དང་ལྡན་པ་རྣམས་ཀྱི་སྙིང་གར་པདྨའི་སྡོང་པོ་འདབ་མ་རྒྱས་པའི་སྟེང་དུ་རྣམ་ཤེས་ཀྱི་ངོ་བོ་ཨཱ་ལི་ཀཱ་ལི་རེ་བསམས་ལ། རང་གི་སྙིང་གར་འཇམ་དཔལ་གྱི་རལ་གྲིའི་དྷཱིཿལས་རྣམ་ཤེས་ཀྱི་བུང་བ་མང་པོ་འཕྲོས་པས་ཁོ་ཡི་ཁོང་པར་ཞུགས་ནས་ཡི་གེ་རྣམས་བསྡུས་ཏེ་རང་གི་ཁོང་པར་ཐིམ། ཡང་བུང་བ་རྣམས་ཁོ་ཡི་ཁོག་པར་སོང་བས་པདྨ་རྣམས་ཀྱི་བཅུད་དང་བཀྲག་དང་གཟི་མདངས་ཐམས་ཅད་འཇིབས། རང་གི་ཁོང་པའི་དྷཱིཿལ་ཐིམ་པས་ཤེས་རབ་དང་བཀྲག་མདངས་གཟི་བརྗིད་རྒྱས། ཡང་དེ་བཞིན་དུ་ཡང་ནས་ཡང་དུ་བསམ་པའི་མཐར་ཁོ་ཡི་ཁོང་པའི་པད་སྡོད་རྙིངས་ཤིང་ནུས་པ་མེད་ལ། རང་གི་སྙིང་གའི་དྷཱིཿདང་འཁོར་ལོའི་བཀྲག་མདངས་རྒྱས་ཤིང་ནུས་པ་དང་ལྡན་པར་བསམས་ནས་སྔགས་བཟླས་ན་གཞན་གྱི་ཤེས་རབ་དང་གཟི་བརྗིད་ཚེ་དང་བསོད་ནམས་ཐམས་ཅད་རང་ལ་འཕོ་བར་འགྱུར་རོ། །འདི་ནི་ཤིན་ཏུ་(༣༠)གསང་བའི་མན་ངག་ཕྱི་རབས་ཀྱི་དོན་དུ་ཡི་གེར་བཀོད་པའོ། །དབང་དུ་བྱ་བའི་ཁྱད་པར་ལས་ཤེས་རབ་རྒྱས་པར་བྱེད་པ་སྟེ། ངག་བསྡུ་བའི་ལས་ཚོགས་སོ། །
དྲུག་པ་མངོན་ཤེས་སྒྲུབ་པ་ནི། ལྷུང་བཟེད་ཀྱི་འཁོར་ལོའི་ནང་དུ་སྔར་གྱི་སྨན་རྣམས་ཀྱི་སྟེང་དུ་མུ་ཏིག་དམར་པོ་དང་ཀ་ར་སྦྱར་བའི་རིལ་བུ་བྱས་ལ། འཇམ་དཔལ་དང་དབྱངས་ཅན་མའི་སྒོམ་རིམ་སྔར་བཞིན་བྱེད་ཅིང་། ༀ་ཧྲཱིཿདྷཱིཿམ་མེ་དཱི་པ་མཉྫུ་ཤྲཱི་མཱུྃཿཧྲཱིཿཔྲཛྙཱ་དྷཱ་ཏུ་ནི་ཧྲཱིཿ། ཝཱ་ཀཱི་ཤྭ་རི་མཱུྃཿཞེས་ཁྲི་ཕྲག་གཅིག་བཟླས་ལ། ཕྱིས་ཉི་ཟླ་གཟས་འཛིན་པའི་ཚེ་དེ་བཞིན་དུ་བསྒྲུབས་ཏེ་ཟོས་ན་མངོན་པར་ཤེས་པ་དྲུག་ཁྲི་དང་ལྡན་པར་འགྱུར་རོ། །འདིར་གཞུང་ཁ་ཅིག་ལས་མུ་ཏིག་དམར་པོ། ཨ་ག་རུ་ནག་པོ། སྤང་སྤོས། ཀ་ར་རྣམས་བ་དམར་སྐྱའི་འོ་མས་རིལ་བུ་བྱས་ཏེ་སྔ་མ་བཞི་སྒོམ་བཟླས་བྱས་ནས། ཉི་ཟླ་གཟས་ཟིན་པའི་ཉིན་པར་རིལ་བུ་ཟོས་ན་མངོན་པར་ཤེས་པ་འགྲུབ་པར་འགྱུར་རོ། །ཞེས་བཀོད་པ་རང་སྣང་ངོ་། །མངོན་པར་ཤེས་པ་སྒྲུབ་པའི་ལས་ཚོགས་སོ། །
བདུན་པ་རིག་པ་སྒྲུབ་པ་ནི། སྔར་བཤད་པའི་རིམ་པས་སྒྲུབ་ཅིང་། ན་མོ་མཉྫུ་ཤྲཱི་ཀུ་མཱ་ར་བྷཱུ་ཏཱ་ཡ། ཏདྱ་ཐཱ། ༀ་ཨ་ར་ཛེ་བི་ར་ཛེ། ཤུདྡྷེ་ཤུདྡྷེ། བི་ཤུདྡྷེ་བི་ཤུདྡྷེ། ཤོ་དྷ་ནི་ཤོ་དྷ་ནི། བི་ཤོ་དྷ་ནི་བི་ཤོ་དྷ་ནི། ཨ་མ་ལེ། བི་མ་ལེ། ཛ་ཡ་བ་ཏི། རུ་རུ་ཙ་ལེ་ཧཱུྃ་ཧཱུྃ་ཧཱུྃ་ཕཊ་ཕཊ་ཕཊ་སྭཱ་ཧཱ། འབུམ་ཕྲག་གཅིག་བཟླས་ན་མཁས་པར་འགྱུར་རོ། །གཉིས་བཟླས་ན་རིག་པ་འཛིན་པར་འགྱུར་རོ། །གསུམ་བཟླས་ན་འཇམ་དཔལ་གྱི་ཞལ་མཐོང་བར་འགྱུར་རོ། །བཅངས་པ་ཙམ་གྱིས་སྐྱེ་བ་དྲན་པར་འགྱུར་རོ། །གལ་ཏེ་མཚམས་མེད་པ་ལ་སྤྱོད་པ་ཡིན་ཡང་དེ་ལྟར་སྦྱོར་བ་ཉིད་གུས་པས་བསྒྲུབ་ན་དེ་དག་གི་མཐའ་དག་བདག་གིས་རྫོགས་པར་བགྱིའོ། །གལ་ཏེ་དེ་ལྟར་མ་བགྱིས་ན་བདག་གིས་སངས་རྒྱས་བཅོམ་ལྡན་འདས་རྣམས་བསླུས་པར་འགྱུར་རོ། །ཞེས་ཞལ་གྱིས་བཞེས་ཤིང་ཡི་དམ་དུ་མཛད་པའོ། །ཁ་ཅིག་ནི་བཟླས་པ་ཙམ་གྱིས་འགྲུབ་ཅེས་འདོད་ཀྱང་། བདག་གི་ལམ་ནི་སྒྲུབ་པ་དང་འབྲེལ་དགོས་ཞེས་བཞེད་དོ། །གཞན་ཡང་སྔར་གྱི་རྫས་བཅུ་གཉིས་པོའི་སྟེང་དུ་རྟའི་མགྲིན་པའི་ཤ་བཏང་ནས་སྔར་བཞིན་བསྒྲུབ་ན་རྐང་མགྱོགས་འགྲུབ་པར་འགྱུར་རོ། །འུག་པ་མཐིལ་རིལ་གྱི་མིག་འབྲས་བཏང་ནས་འོག་གི་གཏེར་མཐོང་བ་དང་མིག་རྣོ་བར་འགྱུར་རོ། །ཕུག་རོན་བྱ་རྒོད་འདབ་ཆགས་ཀྱི་མཁྲིས་པ་བཏང་ན་མངོན་ཤེས་འགྲུབ་པར་འགྱུར་རོ། །སྔགས་ཀྱི་ཤམ་བུ་ནི་ཇི་ལྟར་འདོད་པ་དེ་ཉིད་སྤེལ་ལོ། །རིག་པ་སྒྲུབ་པའི་ལས་ཚོགས་སོ། །
འཇམ་དཔལ་གྱི་ཞལ་ལྟ་བ་ནི། སྔར་གྱི་རྫས་རྣམས་ཀྱི་སྟེང་དུ་ག་བུར་དང་གི་ཝཾ་བསྲེས་པའི་རིལ་བུ་བྱས་ལ་སྔ་མ་བཞིན་བསྒོམ་ཞིང་། ༀ་ཧྲཱིཿདྷཱིཿམ་མེ་དཱི་པཾ་མཉྫུ་ཤྲཱི་མཱུྃཿཧྲཱིཿཔྲཛྙཱ་བརྡྷ་ནི་ཧྲཱིཿདྷཱིཿསྭཱ་ཧཱ། ན་མོ་མཉྫུ་ཤྲཱི་སིངྷ་ནི་ཡ་མཱནྟ་ཀ་ནི་ཧཱུྃ་ཕཊ། ཅེས་ཁྲི་ཕྲག་གཅིག་བཟླསཔའི་རིལ་བུ་ཆུ་གཙང་མ་དང་བསྲེས་ལ་རང་འཇམ་དཔལ་དུ་བསམ་པའི་ལག་མཐིལ་དུ་བླུགས་ཏེ་སྔགས་བརྒྱ་རྩ་བརྒྱད་བཟླས་ཏེ་མིག་ལ་བྱུག་ན་འཇམ་དཔལ་མཐོང་བར་འགྱུར་རོ། །གཞུང་ཁ་ཅིག་ལས་ག་བུར་གི་ཝཾ་བསྲེས་པའི་ཆུ་ལག་མཐིལ་གཡོན་དུ་བླུགས་ལ། རང་འཇམ་དཔལ་དུ་མོས་པས་སྔགས་བཟླས་ཏེ་མིག་ལ་བྱུགས་པས་ཞལ་མཐོང་བར་འགྱུར་རོ་ཞེས་བཀོད་པར་སྣང་ངོ་། །བདག་གི་བླ་མས་ནི་སྔ་མ་བཞིན་མཛད་པས་ཞལ་མཐོང་བ་ཉིད་ཡིན་ནོ། །ཞལ་ལྟ་བའི་ལས་ཚོགས་སོ། །ལས་ཚོགས་ཀྱི་ལེའུ་སྟེ་བདུན་པའོ།། །།
དེ་ལྟར་རྗེ་བཙུན་འཇམ་པའི་དཔལ་ནི་ལེགས་པར་སྒྲུབ་པའི་བསོད་ནམས་གང་། །སྟོན་མཁའ་ཡིད་མཁའི་དྲི་མ་མེད་ལ་མཚན་དཔེའི་འོད་རབ་གསལ་བའི་སྐུ། །མཛད་པའི་ཟེར་གྱིས་རྣམ་གྲོལ་རབ་བརྟན་གདུལ་བྱའི་འཇིག་རྟེན་འགེངས་པ་ཡིས། །མ་ལུས་བདེ་འབྱུང་གེ་སར་འཛུམ་པས་འགྲོ་བའི་བསམ་པ་འགྲུབ་པར་ཤོག །ཚུལ་འདི་གངས་རིའི་ཁྲོད་ཀྱི་སྙན་ངག་མཁན། །དཔལ་ལྡན་ཚུལ་ཁྲིམས་བློ་གྲོས་བཟང་པོ་ཡིས། །བློ་གྲོས་དོན་གཉེར་ཀུན་གྱི་གཙུག་རྒྱན་དུ། །བསམ་ཡས་ལྷུན་གྱིས་གྲུབ་པའི་གནས་སུ་སྦྱར། །འཕགས་པ་འཇམ་དཔལ་གྱི་སྒྲུབ་ཐབས་ཡིད་བཞིན་ནོར་བུ་ཞེས་བྱ་བ། མང་དུ་ཐོས་པའི་སྙན་ངག་མཁན་བསམ་ཡས་པ་ངག་གི་དབང་པོས་གཞུང་དང་གདམས་པ་དང་རང་གིས་ཉམས་སུ་བླངས་པ་རྣམས་ཕྱོགས་གཅིག་ཏུ་བཀོད་པ་རྫོགས་སོ།། །།མངྒ་ལཾ།། །།