༡༠ དགོས་མེད་དོན་གྱི་རྡོ་རྗེའི་མགུར།

༈ ན་མོ་གུ་རུ་བྷྱཿ ཆོས་རྗེ་བླ་མ་དེ་ཉིད་བདེ་ཆེན་ལྷུན་གྲུབ་གླིང་གི་དབེན་གནས་ན་བཞུགས་པའི་ཚེས་བརྒྱད་ཅིག་གི་དུས་སུ། བླ་མ་གོང་མའི་མཛད་སྤྱོད་དང་བཀའ་དྲིན་དྲན་ཞིང་། རང་གཞན་གྱི་སྣང་བ་ལ་སྐྱོ་ཤས་དྲག་པོ་སྐྱེས་ནས་དགོས་མེད་དོན་གྱི་མགུར་འདི་སྐལ་ལྡན་རྣམས་ལ་གསུངས་པ། གསོལ་བ་འདེབས་སོ་བླ་མ་རིན་པོ་ཆེ། །ཐུགས་རྗེས་དགོངས་ལ་བྱིན་གྱིས་བརླབ་ཏུ་གསོལ། །འདི་དང་ཕྱི་མ་བར་དོའི་དུས་ཀུན་ཏུ། །མགོན་མེད་བདག་གི་སྐྱབས་དང་དཔུང་གཉེན་མཛོད། །བདག་འཛིན་འཁྲུལ་པའི་གནས་ལ་བརྟེན་བརྟེན་ནས། །ཆོས་ཉིད་དོན་གྱི་དགོངས་པའི་ས་ཟིན་མེད། །གནས་ལུགས་རིག་པའི་གཏན་ཡུལ་མ་ཟིན་ན། །ཡུལ་མཁར་ཁྱིམ་གྱིས་བདག་ལ་དགོས་པ་མེད། །ཉོན་མོངས་འཁྲུལ་པའི་གྲོགས་ལ་ཆགས་ཆགས་ནས། །གཉུག་མ་ལྷན་ཅིག་སྐྱེས་པའི་ཡེ་ཤེས་རིང་། །འདུ་འབྲལ་མེད་པའི་གྲོགས་དང་མ་འགྲོགས་ན། །བཟའ་ཚང་འཁྲུལ་པས་བདག་ལ་དགོས་པ་མེད། །ལན་ཆགས་བུ་ཚའི་གཉེར་ཀ་བྱེད་བྱེད་ནས། །རང་བྱུང་ཡེ་ཤེས་རིག་པའི་རང་མདངས་སྟོར། །སེམས་ཉིད་འོད་གསལ་ཁྱེའུ་ཆུང་མི་ལྡན་ན། །ལན་ཆགས་བུ་ཚས་བདག་ལ་དགོས་པ་མེད། །མཛའ་བཤེས་གཉེན་འདུན་འཁོར་ལ་ཆགས་ཆགས་ནས། །རང་ཆས་ཡོན་ཏན་ཡིད་བཞིན་དཔུང་གཉེན་སྟོར། །འབྲལ་མེད་ཡེ་ཤེས་འཁོར་དང་མི་ལྡན་ན། །མཛའ་བཤེས་གཉེན་འདུན་བདག་ལ་དགོས་པ་མེད། །ལོངས་སྤྱོད་འབྱོར་བདེ་ཕུན་ཚོགས་གཉེར་གཉེར་ནས། །ཡེ་ནས་ལྷུན་གྲུབ་རིག་པའི་དགའ་བདེ་སྟོར། །ཉམས་རྟོགས་ཏིང་འཛིན་ལོངས་སྤྱོད་མི་ལྡན་ན། །ཚེ་འདིའི་ལོངས་སྤྱོད་བདག་ལ་དགོས་པ་མེད། །འཁྲུལ་སྣང་སྒྱུ་མའི་ནོར་ལ་ཞེན་ཞེན་ནས། །སེམས་ཉིད་འོད་གསལ་ཡིད་བཞིན་ནོར་བུ་སྟོར། །ཆོག་ཤེས་འཕགས་པའི་ནོར་དང་མི་ལྡན་ན། །ལོངས་སྤྱོད་ཟང་ཟིང་བདག་ལ་དགོས་པ་མེད། །མིང་དང་གཟུགས་ཀྱི་ཕོ་བཟོ་བྱེད་བྱེད་ནས། །སྒྲུབ་པ་མཐར་ཕྱིན་དངོས་གྲུབ་ཐོབ་དུས་མེད། །སྙིང་ནས་བརྩོན་པས་དམ་ཆོས་མ་བསྒྲུབས་ན། །ཕུན་སུམ་ཚོགས་ལོས་བདག་ལ་དགོས་པ་མེད། །རྣམ་གཡེང་འཁྲུལ་(༡༦)པས་ཉིན་མཚན་འདའ་འདའ་ནས། །ལྟ་སྒོམ་རྟོགས་པའི་གདེང་ཚད་ཐོབ་དུས་མེད། །གོང་མ་རྣམས་ཀྱི་རྗེས་སུ་མ་སྙོགས་ན། །འདོད་ཡོན་འདུ་འཛིའི་བདག་ལ་དགོས་པ་མེད། །རྙེད་བཀུར་སྙན་གྲགས་རོ་ལ་ཆགས་ཆགས་ནས། །འཇིག་རྟེན་ཆོས་བརྒྱད་འདི་དང་འབྲལ་དུས་མེད། །ཞེན་ཆགས་འཁྲུལ་པ་མཁའ་ལྟར་མ་དག་ན། །བླ་མ་བཟང་ལོས་བདག་ལ་དགོས་པ་མེད། །ཚེ་འདིའི་མཛེས་ཆོས་གཞན་སྣང་བསྒྱུར་བསྒྱུར་ནས། །རང་སྣང་བསླུ་མེད་བཙན་ས་ཟིན་དུས་མེད། །སྙིང་ནས་དགོས་མེད་རྒྱུད་ལ་མ་སྐྱེས་ན། །ངོ་མཚར་ཆེ་ལོས་བདག་ལ་དགོས་པ་མེད། །རང་དོན་ཤོར་བའི་གཞན་དོན་བྱེད་བྱེད་ནས། །རང་དབང་བདེ་དལ་དམ་ཆོས་འགྲུབ་དུས་མེད། །དུས་ངན་འཁོར་སློབ་བརྟེན་འདྲིས་མ་སྤངས་ན། །གཞན་ཕན་ཆེ་ལོས་བདག་ལ་དགོས་པ་མེད། །དོན་མེད་འཁྲུལ་པའི་བྱ་བར་བསྟུན་བསྟུན་ནས། །རང་སྣང་གཉིས་མེད་ཡེ་ཤེས་བརྟན་དུས་མེད། །མཐུན་འཇུག་རྩིག་པ་རྨང་ནས་མ་འགྱེལ་ན། །ངོ་སྲུང་སེམས་འཛིན་བདག་ལ་དགོས་པ་མེད། །ཉིན་མཚན་ཚེ་འདིའི་བྱ་བས་གཡེང་གཡེང་ནས། །བྱར་མེད་ཆོས་ཉིད་གཏན་སྲིད་ཟིན་དུས་མེད། །བྱ་བྱེད་འཁྲུལ་པ་ཅོག་གིས་མ་བཞག་ན། །དོན་མེད་བྱ་བས་བདག་ལ་དགོས་པ་མེད། །དུ་མ་འདུས་པའི་གནས་ལ་བརྟེན་བརྟེན་ནས། །གཅིག་པུར་དབེན་པའི་དམ་ཆོས་འགྲུབ་དུས་མེད། །མི་མེད་ལུང་སྟོང་འགྲིམ་པར་མ་བྱས་ན། །འདུ་འཛིའི་གནས་ཀྱི་བདག་ལ་དགོས་པ་མེད། །འདི་དང་འདྲེས་པའི་དགེ་སྦྱོར་བྱེད་བྱེད་ནས། །གཏན་གྱི་ལམ་སྣ་ད་རེས་ཟིན་དུས་མེད། །ཚེ་འདིའི་མཛེས་ཆོས་སྙིང་ནས་མ་སྤངས་ན། །དགེ་སྦྱོར་བཟང་ལོས་བདག་ལ་དགོས་པ་མེད། །དམིགས་བཅས་ལྟ་བསྒོམ་ཆོས་ལ་ཞེན་ཞེན་ནས། །ཆོས་ཉིད་རིག་པའི་གནམ་འཕང་གཅོད་དུས་མེད། །བློས་བྱས་གཟུང་འཛིན་ཞེན་པ་མ་དག་ན། །དྲོད་རྟགས་ཕྲ་མོས་བདག་ལ་དགོས་པ་མེད། །རིམ་རྩོལ་བློ་ཡི་ཆོས་ལ་བརྟེན་བརྟེན་ནས། །བློ་བྲལ་དོན་གྱི་དགོངས་པ་རྟོགས་དུས་མེད། །རྫོགས་ཆེན་སྙིང་ཐིག་དོན་ལ་མ་བསྒོམས་ན། །མཐར་འཛིན་ཆོས་ཀྱི་བདག་ལ་དགོས་པ་མེད། །ཨེ་མ་དད་ལྡན་ཐར་པ་འདོད་པ་དག །གསང་ཆེན་བླ་མེད་དོན་ལ་རབ་ཞུགས་ཏེ། །གཅིག་པུར་དབེན་པར་སྒྲུབ་པ་སྙིང་པོར་མཛོད། །ཚེ་འདིར་ཆོས་སྐུའི་གཏན་སྲིད་ཟིན་པ་ལགས། །གླུ་འདི་ཐེག་པའི་རྒྱལ་པོ་རྣལ་འབྱོར་པ། །ཀློང་ཆེན་རབ་འབྱམས་བཟང་པོས་ལེགས་པར་བླངས། །དགེ་བ་དེ་ཡིས་མ་ལུས་འགྲོ་བ་ཀུན། །འབད་མེད་ཡོངས་གྲོལ་ཀུན་ཏུ་བཟང་པོར་ཤོག །དགོས་མེད་དོན་གྱི་རྡོ་རྗེའི་མགུར། རང་བཞིན་རྫོགས་པ་ཆེན་པོའི་རྣལ་འབྱོར་པ་ཀློང་ཆེན་རབ་འབྱམས་ཀྱིས་ལྷུན་གྲུབ་གླིང་གི་དབེན་གནས་སུ་བཞེངས་པ་དགེའོ།། །།