བརྒྱད་པ་བྱང་ཆུབ་ཀྱི་སྙིང་པོར་གཤེགས་པའི་མཛད་པ།
༈ བརྒྱད་པ་བྱང་ཆུབ་ཀྱི་སྙིང་པོར་གཤེགས་པའི་མཛད་པ་ནི། དེ་ནས་རི་གྷ་ཡའི་རྩེར་གཤེགས་ཏེ་ཏིང་ངེ་འཛིན་བསྒོམས་པས་བྲག་རལ་ཞིང་ས་གཡོས་པ་ན། ས་ཕལ་གྱིས་མི་བརྟེན་པར་དགོངས་ནས་མ་ག་དྷ་རྡོ་རྗེའི་གདན་དུ་གཤེགས་སོ། །རྡོ་རྗེའི་གདན་དེ་ཡང་ཉན་ཐོས་པ་ལྟར་ན། དབང་ཆེན་གསེར་གྱི་ས་གཞི་ལ་ཐུག་གི་བར་དུ་རྒྱུ་རིན་པོ་ཆེ་སྣ་ཚོགས་ལས་གྲུབ་ཅིང་། སངས་རྒྱས་ཐམས་ཅད་ཀྱི་བྱིན་གྱིས་བརླབས་པ་ལས་རང་བྱུང་བ། འོག་རྡོ་རྗེ་རྒྱ་གྲམ་དུ་གནས་པའི་ལྟེ་བ་ལས་བྱང་ཆུབ་ཀྱི་ཤིང་སྐྱེས་པ། རྡོ་རྗེའི་རྩེ་མོ་བཞིའི་སྟེང་ན་རྡོ་རྗེ་ཕུར་པའི་མཆོད་རྟེན་བཞི་གནས་པ། མཆོད་རྟེན་བཞིའི་བར་གྱི་ཐད་ལ་མདའ་རྒྱང་འབྲིང་པོ་རེ་ཡོད་པའི་དབུས་ན་རྡོ་རྗེ་ཕ་ལམ་ལས་གྲུབ་པའི་གདན་ཁྲི་རྒྱར་ཕྱོགས་རེ་ལ་འདོམ་གསུམ་གསུམ་དཔངས་སུ་ཁྲུ་གསུམ་གྱི་དབུས་ནས་བྱང་ཆུབ་ཀྱི་ཤིང་སྐྱེས་པ། སངས་རྒྱས་ཐམས་ཅད་ཀྱིས་བྱིན་གྱིས་བརླབས་པ་ལས་གྲུབ་པ་འཇིག་པའི་བསྐལ་པ་བྱུང་ཡང་མེ་བདུན་ཆུ་གཅིག་གིས་མི་འཇིག་པར་ནམ་མཁའ་ལ་ཟོ་བ་དཔྱངས་པ་བཞིན་དུ་གནས་པར་འདོད་དོ། །དེར་སྔོན་རྒྱལ་བ་རྣམས་རྩྭའི་གདན་ལ་བཞུགས་པར་དགོངས་པ་དང་། བརྒྱ་བྱིན་གྱིས་ཤེས་ཏེ་རི་སྤོས་ངད་ནས་ཤིང་བལ་ལྟར་རེག་ན་བདེ་བའི་རྩྭ་ཁུར་གཅིག་བླངས་རྩྭ་འཚོང་བཀྲ་ཤིས་སུ་སྤྲུལ་ནས་ཕུལ་བ་བཞེས་ནས་རྩྭའི་རྩེ་མོ་ནང་དུ་བསྟན་པའི་སྟེང་དུ། ཞལ་ཤར་དུ་ཕྱོགས་རྡོ་རྗེའི་སྐྱིལ་ཀྲུང་བཅས་ཏེ་སྐུ་དྲང་པོར་བསྲངས་ཕྱག་མཉམ་བཞག་མཛད་ནས་བཞུགས་ཏེ། སྟན་འདིར་བདག་གི་ལུས་འདི་སྐམ་ཡང་རུང་། །པགས་པ་རུས་པའི་ཤ་རྣམས་ཞིག་ཀྱང་རུང་། །དེ་སྲིད་དུ་ནི་སྲོག་གི་མཐར་ཐུག་ཀྱང་། །བསྐལ་མང་རྙེད་དཀའི་བྱང་ཆུབ་མ་ཐོབ་བར། །སྟན་འདི་ལས་ནི་ལུས་བསྐྱོད་མི་བྱའོ། །ཞེས་གསུངས་ཏེ་བཞུགས་སོ། །