ཟབ་ལམ་བདེ་གཤེགས་ཀུན་འདུས་ཀྱི་གཏུམ་མོའི་ཁྲིད་ཡིག་ཟབ་གནད་གསལ་སྒྲོན། ལོ་ཆེན་དྷརྨ་ཤྲཱི།
ཟབ་ལམ་བདེ་གཤེགས་ཀུན་འདུས་ཀྱི་གཏུམ་མོའི་ཁྲིད་ཡིག་ཟབ་གནད་གསལ་སྒྲོན་ཞེས་བྱ་བ་བཞུགས་སོ། །ལོ་ཆེན་དྷརྨ་ཤྲཱི། ༀ་སྭ་སྟི། ཟབ་ལམ་བདེ་གཤེགས་ཀུན་འདུས་ཀྱི་གཏུམ་མོ་ཟབ་རྒྱ་བཅུ་གཅིག་པའི་ཁྲིད་ཡིག་ཟབ་གནད་གསལ་བའི་སྒྲོན་མེ་ཞེས་བྱ་བ། དཔལ་བདེ་ཆེན་གར་གྱི་དབང་ཕྱུག་གི་ངོ་བོ་བླ་མ་དམ་པའི་ཞབས་ལ་གུས་པས་ཕྱག་འཚལ་ལོ། །མཆོག་ཏུ་མི་འགྱུར༵་ཟག་མེད༵་བདེ་བ་ཆེ། །རྒྱལ་ཀུན་གསང་གསུམ་རྡོ༵་རྗེ༵ར་བྱང་ཆུབ་པ།། དྲིན་ཅན་བླ་མའི་ཞབས་ལ་ཕྱག་བགྱིའོ། །ཡི་དམ་ལྷན་སྐྱེས་བདེ་བའི་བཀའ་དྲིན་སྩོལ། །འདིར་གསང་བའི་དབང་བསྐུར་བ་ཐོབ་ཅིང་དམ་ཚིག་ལ་ཡིད་རྟོན་པའི་སྐལ་ལྡན་གྱི་སློབ་མ་ཚེ་འདི་ཉིད་ལ་ཕྱག་རྒྱ་ཆེན་པོ་མཆོག་གི་དངོས་གྲུབ་ཐོབ་པར་འདོད་པས། ཉོན་མོངས་ལམ་བྱེད་བདེ་མྱུར་གྱི་ཐབས་རྨད་དུ་བྱུང་བའི་ལམ་ཟབ་མོ་གཏུམ་མོའི་ཁྲིད་ཀྱི་རིམ་པ་ཉམས་སུ་བླང་བར་བྱ་བའོ། །འདི་ལ་གསུམ་སྟེ། སྔོན་འགྲོ། དངོས་གཞི། རྗེས་ཀྱི་རིམ་པའོ། །དང་པོ་ལའང་སྤྱི་དང་ཁྱད་པར་བ་གཉིས་ལས། དང་པོ་སྤྱིའི་སྔོན་འགྲོ་ནི། དང་པོ་སྔོན་འགྲོས་རྒྱུད་སྦྱངས་ནས༔ ཞེས་གསུངས་པས། ཐུན་གྱི་སྔོན་འགྲོ་དང་། ངེས་འབྱུང་གི་བློ་བཅོས་པ་སྔོན་དུ་འགྲོ་བས། སྐྱབས་སེམས་ནས། བླ་མའི་རྣལ་འབྱོར་གྱི་བར་ལམ་གྱི་སྣོད་རུང་དུ་བྱེད་པའི་སྔོན་འགྲོ་རྣམས་རྩ་ཁྲིད་ལྟར་བྱ་བའོ། །གཉིས་པ་ཁྱད་པར་བ་ནི། ལུས་ལ་བསྐུ་མཉེ་དང་ཁྲུས་བྱས་ཏེ༑ ངལ་དུབ་དང་དྲག་ཤུལ་སྤང་། ངག་ལོང་གཏམ་གྱི་རྒྱུན་བཅད་ལ་གྲགས་སྟོང་དུ་ཤེས་
པར་བྱ། ཡིད་རྣམ་རྟོག་གི་རྒྱུན་བཅད་ནས་ཏིང་ངེ་འཛིན་སྒོམ་པ་ལ་འཇུག་སྟེ། དེའི་རིམ་པ་ནི། ཁྱད་པར་ཅན་གྱི་སྔོན་འགྲོ་ལ༔ སྲུང་འཁོར་ཚོགས་བསག་སྦྱང་བ་བྱ༔ ཞེས་པས་གསུམ་སྟེ། སྲུང་བའི་འཁོར་ལོ་བསྒོམ་པ། ཚོགས་བསག་ཉམས་ཆག་བསྐང་བ། སྦྱང་བ་གསུམ་བྱ་བའོ། །དང་པོ་ནི། བདེ་བའི་སྟན་ལ་ལུས་གནད་ཀྱིས༔ ཞེས་སོགས་ཀྱིས་བསྟན་ཏེ༑ སྟན་བདེ་བ་ལ་ལུས་གནད་རྐང་པ་རྡོ་རྗེ་སྐྱིལ་ཀྲུང་ལག་གཉིས་ཁུ་ཚུར་པུས་མོ་ལ་བཀབ། སྒལ་ཚིགས་བསྲང་། རོ་སྟོད་དགྱེ། མགྲིན་པ་དགུ། ལྕེ་རྩེ་རྐན་ལ་སྦྱར། མིག་གི་ལྟ་སྟངས་ཐད་ཀར་ཆེ་རེ་བལྟ། སེམས་ཀྱི་གནད་རང་ཐ་མལ་གྱི་ལུས་འདི་ནམ་མཁའ་ལ་འཇའ་ཡལ་བ་ལྟར་སྦྱངས་ཏེ་མི་དམིགས་པ་ལས། སྐད་ཅིག་གིས་རང་ལུས་ཕྱི་དབྱིབས་ཐུགས་རྗེ་ཆེན་པོ་བདེ་གཤེགས་ཀུན་འདུས་ཀྱི་སྐུར་ལམ་གྱིས་གསལ་བཏབ་པའི་ལུས་ནང་ཁོང་སྟོང་དྭངས་གསལ་སྒྲིབ་ཐོགས་མེད་པའི་རྣམ་པ་ཅན་ལ་སེམས་གཏད་དེ་བསྒོམ། དེ་གསལ་བ་དང་སྙིང་གར་ཟླ་བའི་དཀྱིལ་འཁོར་ཉ་གང་བའི་སྟེང་དུ་རྡོ་རྗེ་དམར་པོ་འོད་ཟེར་འཕྲོ་བ་འགྲེང་སྟབས་སུ་གནས་པར་བསམ་ལ། རླུང་རོ་བསལ་ནས། རླུང་ཕྱིར་འབྱིན་པའི་ཚེ་སྙིང་གའི་རྡོ་རྗེ་ལས་རྡོ་རྗེ་ཕྲ་མོ་འོད་ཟེར་འཕྲོ་བའི་ཚོགས་ཉི་ཟེར་གྱི་རྡུལ་ལྟར་འཕྲོས་པ་སྣ་སྒོ་ནས་ཐོན། ནམ་མཁའི་ཁམས་ཀུན་གང་། རླུང་ཕྱིར་འཛིན་གྱི་ཚེ་ནམ་མཁའི་རྡོ་རྗེ་རྣམས་འདུས་པ་རྡོ་རྗེའི་ས་གཞི་རྭ་གུར་དུ་གྱུར་པས་ཅིས་ཀྱང་མི་ཤིགས་པར་བསམ། རླུང་ནང་དུ་རྔུབ་པའི་ཚེ་རྭ་གུར་ནང་གི་བར་སྣང་ལ་གནས་པའི་རྡོ་རྗེ་ཕྲ་མོའི་ཚོགས་རྣམས་སྣ་སྒོ་ནས་ཞུགས། རང་ལུས་སྤྱི་བོ་ནས་རྐང་མཐིལ་གྱི་བར་རྡོ་རྗེའི་རྡུལ་ཕྲ་རབ་ཀྱིས་བར་མེད་དུ་གཏམས་པས་གཞོམ་མེད་དུ་བཅིངས་པར་བསམས་ལ་རླུང་ནང་དུ་གཟུང་ངོ་། །གཉིས་པ་ནི། ཚོགས་བསག་ཉམས་ཆག་བསྐང་བ་ནི༔ ཞེས་སོགས་ཏེ། རང་གི་སྙིང་གར་ཉི་མའི་དཀྱིལ་འཁོར་གྱི་སྟེང་དུ་ངོ་བོ་བླ་མ་ལ་རྣམ་པ་གར་དབང་ཐུགས་རྗེ་ཆེན་པོའི་སྐུ་ཚོན་གང་བའི་ཚད་ཙམ་པ་ཞིག་གསལ་བཏབ་ལ་ཐེབས་པ་དང་རླུང་རོ་བསལ་ནས། རླུང་ཕྱིར་འབྱིན་པ་དང་མཉམ་དུ་སྙིང་ག་ནས་རྡོ་རྗེ་རྒྱ་གྲམ་དམར་སྐྱ་ཞིག་དབུགས་རྒྱུ་ཕྱོགས་ཀྱི་
སྣ་བུག་ནས་ཐོན་པ་རང་གི་སྤྱི་བོའི་ཐད་ནས་ཁྲུ་གང་ཙམ་གཞལ་བའི་ནམ་མཁའ་ལ་གདན་སྟབས་སུ་འཁོད། རླུང་ཕྱི་རུ་འཛིན་པའི་ཚེ་སྙིང་གའི་བླ་མའི་སྐུ་ཡང་སྣ་སྒོ་ལས་ཐོན་པ་རྒྱ་གྲམ་གྱི་སྟེང་དུ་བཞུགས་པར་བསམས་ལ་མོས་གུས་དུང་དུང་བ་བྱས། རླུང་ནང་དུ་འཇུག་པའི་ཚེ་དབུགས་མི་རྒྱུ་བའི་ཕྱོགས་ཀྱི་སྣ་བུག་ལས་ཞུགས་པ་སྙིང་གར་བྱོན། རླུང་ནང་དུ་འཛིན་པའི་ཚེ་སྙིང་གའི་ཉི་མའི་ཐིག་ལེ་ལ་དགྱེས་འཛུམ་གྱི་ཉམས་ཡལ་ལེ་བཞུགས་པར་བསམས་ལ། ཡིད་གཉིས་སྤངས་པའི་མོས་གུས་གདུང་ཤུགས་རྩེ་གཅིག་པ་ལ་མཉམ་པར་བཞག་གོ །གསུམ་པ་སྦྱང་བ་ལ། ལུས་སྦྱང་བ། རྩ་སྦྱང་བ། རླུང་སྦྱང་བ་གསུམ་ལས། དང་པོ་ནི། ལུས་སྦྱོང་རྣམ་སྣང་ཆོས་བདུན་བྱ༔ ཞེས་སོགས་ཏེ། ལུས་གནད་ཆོས་བདུན་བཅས་ལ། རླུང་རོ་བསལ་ནས་བུམ་ཅན་འགའ་རེ་བཟུང་། དེ་ནས་ལྟེ་བར་རླུང་ཁ་སྦྱར་ཏེ་བུམ་ཅན་དྲག་ཏུ་བཅིངས་རྗེས་འོག་རླུང་རང་བབས་ལ་སྟེང་རླུང་གནོན་པའི་སྦྱོར་བ་གཅིག་དང་བསྟུན་ལུས་ཀྱི་འཁྲུལ་འཁོར་བྱ་སྟེ། དང་པོ་ཁུ་ཚུར་དཔུང་མགོར་བརྡེག །གཉིས་པ་རྐང་རྟིང་དཔྱི་མགོར་བརྡེག །གསུམ་པ་རོ་སྟོད་གཅུ་ཞིང་སྤྲུག །བཞི་པ་མགོ་བསྐོར་ཕྱོགས་བཞིར་འཕང་། །ལྔ་པ་ཧ་ཞེས་སྒྲ་བཅས་བཏང་། །དེ་ཚེ་འབེབས་ཆུང་ལུས་ཀུན་སྤྲུག །དེ་ལྟར་སྤེལ་བའི་ལུས་སྦྱོང་ལན་བདུན་བསྐྱར་ཞིང་། དེས་རྩ་རྣམས་ཀྱི་ནང་ལ་རླུང་བརྒྱུས་པས་སྐུད་པ་ཐང་ལྷོད་དུ་འཐེན་པ་ལྟར་བྱས་པས་རྩ་རེངས་པ་དང་འཆུས་པ་སོགས་སོར་ཆུད་ནས་མཉེན་པོར་འགྲོ་ཞིང་། མཐར་རླུང་གཏོང་ཞིང་སྤྲུག་པའི་ཚེ་ལུས་ནང་བཤལ་བ་ལྟར་སང་གིས་སོང་བར་བསྒོམ་པའོ། །གཉིས་པ་རྩ་སྦྱང་བ་ནི། རྩ་སྦྱང་རང་ལུས་ལྷ་ཡི་སྐུ༔ ཞེས་སོགས་ཏེ། ལུས་གནད་བཅའ། རང་ཐུགས་རྗེ་ཆེན་པོའི་སྐུར་གསལ་བའི། ལུས་སྣང་དྭངས་གསལ་སྒྲིབ་ཐོགས་མེད་པའི་དབུས་དྲང་པོར། རྩ་ཨ་བ་དྷཱུ་ཏི་ཡར་སྣ་སྤྱི་བོ་ནས། མར་སྣ་ལྟེ་འོག་སོར་བཞིའི་བར་ཆུ་ཤིང་གི་སྡོང་པོ་ལྟར་དྲང་བ། ཏིལ་གྱི་མར་མེ་ལྟར་གསལ་ཞིང་རང་འོད་འཕྲོ་བ༑ རྒྱ་ཚོས་ཀྱིས་བཙོས་པ་ལྟར་དམར་བ། པདྨའི་སྣལ་མ་ལྟར་ཤིན་ཏུ་སྲབ་ཅིང་དྭངས་པ་
སྟེ་མཚན་ཉིད་བཞི་དང་ལྡན་པ། སྦོམ་ཕྲ་མདའ་སྨྱུག་འབྲིང་པོ་ཙམ་པ་ལ། རྩེ་གཅིག་ཏུ་མཉམ་པར་བཞག་ནས་སེམས་མ་ཟིན་བར་དུ་ལྟ་སྟངས་དང་བཅས་ནས་བསྒོམ། དེ་ལ་སེམས་ཟིན་པ་དང་། དབུ་མ་དེ་ཇེ་ཆེ་ཇེ་ཆེར་འཕེལ་ནས། སྦ་ལྕག་ཙམ་ནས་ལུས་ནང་དབུ་མར་འདྲེས་པར་བསམ། དེ་ནས་ཀྱང་རིམ་པར་འཕེལ་བས། ནམ་མཁས་གར་ཁྱབ་དབུ་མས་ཀྱང་ཁྱབ་པར་བསྒོམ། སླར་ཡང་ཇེ་ཕྲ་ཇེ་ཕྲར་གྱུར་པ་ལས་རིམ་པར་ཞོ་མདོང་དང་། སྦ་ལྕག་དང་། མདའ་སྨྱུག་དང་། གྲོ་སོག་དང་། སྐྲ་རྩེ་ཙམ་གྱི་བར་དུ་ཡང་ཁོང་སྟོང་དྭངས་གསལ་གྱི་རྣམ་པར་བསྒོམ་མོ། །དེ་ལྟར་སྦྱངས་པས་མི་རྟོག་པའི་ཉམས་སྐྱེ་ཞིང་རྩ་ལམ་འབྱོངས་པར་འགྱུར་རོ། །གསུམ་པ་རླུང་སྦྱང་བ་ནི། རླུང་སྦྱང་དྷཱུ་ཏིའི་གཡས་གཡོན་གྱི༔ ཞེས་སོགས་ཏེ། ལུས་ནང་དུ་དབུ་མ་མཚན་ཉིད་བཞི་ལྡན་སྔར་ལྟར་གསལ་བཏབ་པའི་གཡས་སུ་རོ་མ་དམར་པོ་དང་། གཡོན་དུ་རྐྱང་མ་དཀར་པོ་གཉིས་དབུ་མ་ལས་ལྡབ་འགྱུར་གྱིས་ཕྲ་བ། སྤྱི་བོ་ནས་ལྟེ་འོག་སོར་བཞིའི་བར་དབུ་མ་དང་ལྷན་ཅིག་གསུམ་གཤིབས་སུ་སོང་བའི་རོ་རྐྱང་གི་ཡས་སྣ་གཉིས་སྨིན་མཚམས་ནས་སྣ་བུག་གཉིས་སུ་ཟུག་པ། མས་སྣ་གཉིས་དབུ་མ་ལས་ཅུང་ཟད་རིང་བ་ཡར་ལོག་སྟེ། ལྟེ་འོག་སོར་བཞིའི་ཐད་དུ་དབུ་མའི་མས་སྣ་གནས་པའི་ནང་དུ་ཆུག་པ་དྭངས་གསལ་སྦུབས་སྟོང་གི་རྣམ་པར་བསམས་ལ་ནད་གདོན་སྡིག་སྒྲིབ་ཐམས་ཅད་སང་གིས་སོང་བར་མོས་ཏེ་རླུང་རོ་དལ་ལ་རིང་བ་གསུམ་བསལ། བརྟན་གཡོ་འཁོར་འདས་ཀྱི་དྭངས་མ་ཐམས་ཅད་རླུང་གི་རྣམ་པར་སྣ་བུག་གཉིས་ནས་རོ་རྐྱང་གི་ལམ་བརྒྱུད་དེ་སོང་བ་ལྟེ་འོག་དབུ་མའི་སྒོར་སླེབས་པར་མོས་ལ་སྟེང་རླུང་ཤར་གྱིས་བརྔུབས་པ་སྟེ་འོག་ཏུ་བསྐྱུར་ཐབས་སུ་མནན། དེ་དང་མཉམ་དུ་འོག་རླུང་བསྐུམས་པས་ཐུར་སེལ་གྱི་རླུང་མདུང་ཚུགས་སུ་ལངས་པ་དབུ་མའི་མས་སྣར་ཚུད། དེ་ལྟར་སྲོག་རོ་རྐྱང་དང་ཐུར་སེལ་གྱི་རླུང་གསུམ་པོ་གཅིག་ཏུ་འདུས་པ་དབུ་མའི་ནང་དུ་བཅུག་ནས། སེམས་དབུ་མའི་ནང་དུ་གཏད་ལ་ཁ་སྦྱོར་འཇམ་ཞིང་རན་པར་བཟུང་ཅུང་ཟད་མི་བདེ་ན་སླར་ཡང་རྔུབ་ཆུང་བྱས་ཏེ་གཡས་གཡོན་དབུས་གསུམ་དུ་ཐེན་གནོན་བྱ། མི་ཐུབ་པ་ན་སྣ་བུག་གཉིས་
ནས་དལ་བུས་ཕྲ་ལ་རིང་པའི་ཤུགས་ཀྱིས་ཕྱིར་སང་གིས་འཕང་། དེ་མ་ཐག་ཡང་བརྔུབས་ཏེ་བརྩོན་པ་དྲག་པོས་གོམས་པར་བྱའོ། །དེ་ལྟར་རླུང་སྦྱོར་བ་བཞི་ལྡན་ལ་འབད་རྩོལ་ཆེན་པོས་སྦྱངས་པས་རླུང་ཡུན་རིང་བཀག་ཀྱང་ཐང་ཆད་པ་དང་མི་བདེ་བ་མི་འབྱུང་ན་ཅུང་ཟད་བྱང་བའི་རྟགས་ཡིན་ནོ། །གཉིས་པ་དངོས་གཞི་ལ་གཉིས་ཏེ། རྩ་བའི་དམིགས་པ་དང་། དེ་ལས་འཕྲོས་པའོ།། དང་པོ་ནི། དེ་ནས་གཏུམ་མོའི་རྣལ་འབྱོར་ལ༔ དྲོད་བསྐྱེད་དམ་ཚིག་གཏུམ་མོ་དང༔ བདེ་བ་ཆོས་ཀྱི་གཏུམ་མོ་དང་༔ བདེ་དྲོད་སྟོང་པར་རྒྱས་འདེབས་པ༔ ཡེ་ཤེས་གཏུམ་མོར་ཡང་དག་བཤད༔ ཅེས་པ་ལྟར་གསུམ་ལས། དང་པོ་དྲོད་སྐྱེད་པ་དམ་ཚིག་གི་གཏུམ་མོ་ནི། ལུས་གནད་མེ་ཐབ་གྲུ་བཅིངས་ལ། །ཞེས་སོགས་ཏེ། ལུས་གནད་མེ་ཐབ་གྲུ་བཅིངས་བཅས་པར་པུས་འཁྱུད་ཀྱིས་བསྡམས་ནས། རང་ལྷར་གསལ་བའི་ལུས་ནང་དུ་རྩ་གསུམ་སྔར་ལྟར་གསལ་བཏབ་པའི། དབུ་མའི་མས་སྣ་ར་གསུམ་འདུས་མདོར་ཨཾ་ཡིག་དམར་པོ་མགོ་བོ་གྱེན་བསྟན་མེའི་རང་བཞིན་ཚ་ཞིང་རྩུབ་ལ་དབུ་མའི་ཡས་སྣར་ཧཾ་ཡིག་དཀར་པོ་མགོ་བོ་ཐུར་བལྟ་གསལ་འཚེར་དྭངས་པ་སྣུམ་ཞིང་འདྲིལ་བ་བདེ་བའི་རང་བཞིན་འཛག་ལ་ཁད་པ། དེའི་སྟེང་སྤྱི་བོར་རྩ་བའི་བླ་མ་དཀར་དམར་བཀྲག་མདངས་གཟི་བྱིན་འབར་བ་རྡོར་དྲིལ་ཐུགས་ཀར་བསྣོལ་བས་ཡུམ་ཡེ་ཤེས་ཀྱི་མཁའ་འགྲོ་མ་དམར་གསལ་གྲི་ཐོད་འཛིན་པ་དང་མཉམ་པར་སྦྱོར་བ་དགྱེས་ཤིང་འཛུམ་པའི་ཉམས་ཅན་སྐྱབས་གནས་ཀུན་འདུས་སུ་བསམ། དེ་ལྟར་གསལ་ཐེབས་པ་ན། རླུང་རོ་བསལ། སྟེང་རླུང་དྲངས་པ་རོ་རྐྱང་བརྒྱུད་རྩ་གསུམ་འདུས་མདོར་སླེབས། འོག་རླུང་བསྐུམ་པའི་ཐུར་སེལ་གྱེན་དུ་ལངས་པ་དབུ་མའི་སྣར་ཚུད་དེ༑ རླུང་གསུམ་གཅིག་ཏུ་གྱུར་པ་དེས་ཨཾ་ལས་བུས་པས། ཨཾ་ལས་གཏུམ་མོ་ཡེ་ཤེས་ཀྱི་མེ་ལྕེ་འུར་གྱིས་འབར་ཏེ། ཕྲ་བ། གསལ་བ། འཚེར་བ། རྩེ་མོ་རྣོ་བ་འབར་ཞིང་འཁྱུག་པ་ཇེ་རིང་ཇེ་རིང་དུ་སྦར་བས་རླུང་ཐེངས་འགའ་རེ་སོང་བ་ན་ལུས་ནང་གི་རྩ་ཀུན་གང་བས་ལུས་ནང་ཐམས་ཅད་ཁྱབ་ནས་དྲོད་ཚ་འུར་གྱིས་སྐྱེས་པར་མོས་ཤིང་མེ་འབར་བ་ཁོ་ན་ལ་
སེམས་གཏད་དེ་རྩེ་གཅིག་ཏུ་བསྒོམ། ཡང་རེས་འགའ་མེ་ལྕེ་ཕྲ་ཞིང་དྭངས་པ་ཟངས་ཁབ་ལྟ་བུ་དམར་བྲེང་གིས་འབར་བ་དང་། རེས་འགའ་ཅི་ཡང་མི་དམིགས་པའི་ངང་གདངས་བསྐྱང་ཞིང་མཉམ་པར་འཇོག དེ་ཀུན་ལ་རླུང་གནད་རེ་དང་སྦྱར་ཏེ་རླུང་བདེ་བར་ཟིན་གྱི་བར་དུ་མནན། མི་བདེ་ན། ཧ་ཅང་དྲག་པ་མ་ཡིན་པར་བུས་ལ་ཡང་བཟུང་། དམིགས་པ་འཛིན་པའི་བར་ལ་རླུང་མི་འཇུག་ཅིང་གསལ་བ་དང་སྟེང་རླུང་བརྔུབས་ཏེ་མཆིལ་མའི་རྟ་ལ་བསྐྱོན་ནས་གནོན་པ་དང་འོག་རླུང་འཐེན་ལ་ལྟེ་བར་ཁ་སྦྱོར་རན་པར་འཆིང་། དམིགས་པ་གསལ་ཞིང་དྲག་ལ་འཇུར་བ་དང་ཐུན་ཆུང་ལ་གྲངས་མང་བར་བསླབ། སྒོམ་ཉམས་བཟང་ཕྲོ་ལ་བཅད་དེ་སྒོམ་གྱི་སྣ་མ་འདྲོགས་པར་བསྐྱང་། ཁམས་ངན་ན་རེ་ཞིག་ངལ་གསོ་ཞིང་ཀློད། ཟས་ལན་ཚྭ་ཆེས་པ་སོགས་སྤངས་ཏེ་ཁ་ཟས་ཡང་ཞིང་བཅུད་ཆེ་བ་དང་སྤྱོད་ལམ་ཧ་ཅང་འཇུར་བ་མ་ཡིན་པའི་ལྕག་གིས་བསྣུན། ཉི་མ་དང་མེ་དང་། རླུང་ཆེ་ས་རྣམས་སུ་མི་སྡོད། ལུས་ལས་རྔུལ་འཐོན་པའི་ལས་མི་བྱ། ཉིན་མོ་གཉིད་དང་། ཁམས་ཉམས་པ་སྤང་། ཉམས་མཐོ་དམན་བདེ་སྡུག་ཅི་སྐྱེས་ཀྱང་དགག་སྒྲུབ་མི་བྱེད་པར་བྱུང་རྒྱལ་དུ་བསྐྱང་། མཚན་མོ་ཉལ་དུས་ལུས་གནད་རབ་སྐྱིལ་ཀྲུང་། འབྲིང་ཙོག་པུ། ཐ་མ་སྔས་མཐོ་བར་བྱས་ལ་གློ་གཡས་འོག་ཏུ་བཅུག པུས་བྲང་སྦྱར་བའི་ལུས་སུམ་བལྟབ་དུ་ཉལ། གང་ལྟར་ཡང་ལག་མདུན་དུ་བསྣོལ་ནས་མཐིལ་གཉིས་ཀྱིས་མཁལ་ཁུང་གཡས་གཡོན་བཀབ། གཏུམ་མོ་འབར་བ་ལ་སེམས་གཏད་ནས་བར་རླུང་ཅུང་ཟད་བཟུང་བའི་ངང་ལ་གཉིད་དུ་འགྲོ་བར་བྱ༑ དེས་གཉིད་ཀྱི་འོད་གསལ་ཟིན་པ་དང་། ཉིན་མོ་བསྒོམས་པའི་དྲོད་ཀྱི་རྒྱུན་མཚན་མོ་མི་ཡལ་བའི་དགོས་པ་ཡོད། གལ་ཏེ་དྲོད་སྐྱེ་བ་བུལ་ན། ལུས་གནད་ཐབས་ལམ་དུ་གསུངས་པ་ལྟར་གཙུབ་ཤིང་གཙུབ་སྟན་གྱི་འཁྲུལ་འཁོར་ལ་འབད། རླུང་སྔ་མ་བཏང་བའི་རྗེས་དེ་མ་ཐག་ཏུ་ཡང་བརྔུབས་ཏེ་རྩོལ་བ་དྲག་པོས་བསྒོམ། མ་གོམས་བར་དུ་ངལ་བསོ་ན། རླུང་ཐེངས་བཞིའམ། བརྒྱད་དམ། བཅུ་གཉིས་སོགས་བཞི་ཚན་རེ་རེ་རིམ་པར་བསྐྱེད་པའི་མཚམས་སུ་ངལ་གསོ་བ་ལས་གང་འདོད་དུ་མི་འཇོག དམིགས་པའང་ཕྱིར་མ་ཤོར་བར་
བྱས་ལ་མེ་དམིགས་ཁོ་ནར་ཤེས་པ་གཏོད། དྲོད་ལུས་ཐམས་ཅད་དུ་ཁྱབ་པར་མ་སྐྱེས་ན་གང་དྲོད་ཆུང་སར་མེ་དམིགས་དྲག་ཏུ་བསྒོམ་ཞིང་ལག་མཐིལ་གྱིས་མཉེ་བར་བྱའོ། །གཉིས་པ་བདེ་བ་ཆོས་ཀྱི་གཏུམ་མོ་ནི། དེ་ཉིད་བདེ་བར་རྒྱས་འདེབས་པ། ཞེས་སོགས་ཏེ༑ ལུས་གནད་ཆོས་བདུན་བཅས་ལ། དམིགས་པ་གཏུམ་མོ་སྦར་བའི་བར་སྔར་ལྟར་ལས། གཏུམ་མོའི་མེ་ཆོས་བཞི་ལྡན་གློག་གི་ཟེར་མ་ལྟར་འབར་བ་དྷཱུ་ཏིའི་ལམ་བརྒྱུད་སྤྱི་བོའི་ཧཾ་ལ་རེག བླ་མ་ཡབ་ཡུམ་ལ་བདེ་དྲོད་ཀྱི་མཆོད་པ་ཕུལ་བས་རྗེས་ཆགས་ཀྱི་བདེ་བ་ཆེན་པོས་དགྱེས་ཤིང་ཚིམས་ནས་བདུད་རྩིར་ལྡེམ་གྱིས་ཞུ་བ་ཧཾ་ལ་ཐིམ་པས་ཧཾ་ཡིག་ལས་ནུ་མ་བཞོས་པ་བཞིན་བྱང་སེམས་དྭངས་གསལ་བདེ་བའི་རང་བཞིན་བ་ཐག་ལྟར་སྐྱ་ནར་གྱིས་སམ། མུ་ཏིག་གི་རྡོག་མ་ལྟར་ཐིགས་ཐིགས་བབས་པ་ལྟེ་བའི་ཨཾ་ལ་ཐིམ་པས་སྡོང་རྩ་མར་ཁུས་བརླན་པ་ལྟར་མེའི་གསོས་བྱས་ནས་ཆེར་འབར་བས་ཟླ་བ་བདུད་རྩིར་ཞུ་བའི་དྭངས་མས་དབུ་མ་གང་། དེ་ལས་རྩ་ཕྲན་ཐམས་ཅད་དུ་ཟགས་པས་ལུས་ཀྱི་བ་སྤུ་ཡན་ཆད་ཐམས་ཅད་མེར་གྱིས་གང་བ་ལ་བདེ་བའི་རོས་ཁྱབ་པར་བསམ་ཞིང་། རླུང་བུམ་ཅན་དང་སྦྱར་ནས་འབར་འཛག་སྐྲ་ཤད་འཛིངས་པ་ལྟར་རྒྱུན་མི་ཆད་པར་བྱ། དེས་ལུས་ལ་བདེ་བ་དང་སེམས་ཐོག་ཏུ་དགའ་བ་སྐྱེས་ཚེ་དེ་ཁའི་རང་ཞལ་ལ་བལྟ་ཞིང་ངང་གདངས་སྐྱོང་ལ་མཉམ་པར་འཇོག་གོ །དེ་ལྟར་བདེ་དྲོད་ཞལ་སྦྱོར་ལ་འབད་པས་ལུས་ཀུན་དྭངས་མས་གང་བའི་བདེ་བ་རང་ཤར་དུ་སྐྱེས་པའི་ཚེ། དེ་ཉིད་རྩོལ་མེད་ཡུན་དུ་གནས་པའི་ཐབས་ནི། སྤྱི་བོའི་ཧཾ་ཡིག་ལས་དབུ་མའི་ལམ་བརྒྱུད་ལྟེ་བའི་བར་བྱང་སེམས་ཀྱི་རྒྱུན་དར་དཀར་གྱི་སྐུད་པ་བཞིན་དུ་སྐྱ་བྲེང་ངེ་གནས་པར་བསམས་ལ། དེའི་བདེ་བའི་ངང་ལ་རྩེ་གཅིག་ཏུ་སེམས་བཟུང་ངོ་།། གསུམ་པ་བདེ་དྲོད་སྟོང་ཉིད་དུ་རྒྱས་འདེབས་པ་ཡེ་ཤེས་ཀྱི་གཏུམ་མོ་ནི། བདེ་དྲོད་དབྱེར་མེད་སྟོང་ཉིད་དུ༔ ཞེས་སོགས་ཏེ། དམ་ཚིག་དང་ཆོས་ཀྱི་གཏུམ་མོ་ལ་བསླབས་པས་བདེ་དྲོད་ཀྱི་ཉམས་སྐྱེས་པའི་ཚེ། ལུས་གནད་ཆོས་བདུན་སྤྱི་ལྟར་ལས་ཁྱད་པར་ལག་ངར་བསྲངས་བའི་རྡོ་རྗེ་ཁུ་ཚུར་ཁ་སྦུབ་པའམ་གན་སྐྱལ་གང་རིགས་བརླར་བཞག རླུང་གནད་
བུམ་པ་ཅན་བཟུང་། ཉིན་མོ་སྤྲིན་དང་བསིར་བུ་མེད་ཅིང་ནམ་མཁའ་དྭངས་པའི་སྐབས་ཁང་ཐོག་ལྟ་བུ་བླ་གབ་མེད་པའི་སར་ལུས་ལ་རླུང་དང་ཉི་མ་སྐྱོབ་པའི་ཐབས་བྱས་ཏེ། སྔ་དྲོ་ཁ་ནུབ་དང་ཕྱི་རོ་ཁ་ཤར། ས་ཁད་ཡངས་པར་བལྟ་བདེ་ན་གུང་ལ་ཁ་བྱང་དུ་ཕྱོགས་པས། མིག་གནད་རྫི་མ་མི་རྡེག་ཅིང་། མིག་འབྲས་མི་འགྱུར་བ་ཤིན་ཏུ་གདངས་པ་དྲག་པོའི་མིག་གི་ལྟ་སྟངས་སྨིན་མཚམས་ནས་ཁྲུ་གང་ཙམ་གྱི་ཐད་ཀའི་ནམ་མཁར་གཏད་པ་ལ་སེམས་མི་འཕྲོ་བའི་རྟེན་ཙམ་བྱས་ཏེ། དུས་གསུམ་གྱི་རྣམ་པར་རྟོག་པའི་སྤྲོས་པ་ཐམས་ཅད་སྤངས་ནས་རླུང་སེམས་ནམ་མཁའ་གསུམ་འདྲེས་པ་ལྟ་བུའི་ངང་ལ་རེས་གྲིམ། རེས་གློད་པ་རེ་མོས་ཀྱིས་མཉམ་པར་འཇོག མཚན་མོ་ལུས་གནད་དང་རླུང་གནད་འདྲ་བ་ལས་ཁྱད་པར་ཐད་ཀའི་ལྟ་སྟངས་མིག་ཕྱེད་གདངས་ཀྱིས་རྫི་མ་མི་རྡེག་ཅིང་མིག་འབྲས་མི་འགུལ་བས་གང་དུ་གཏད་པའི་བར་སྣང་ནག་ཐིང་ངེ་བ་ལ་སེམས་མི་འཕྲོ་བའི་རྟེན་བྱས་ཏེ། སེམས་གནད་སྔར་བཞིན་གྲིམ་གློད་རེས་འཇོག་གིས་བསྒོམ། གང་ལྟར་ཡང་ལུས་གནད་དང་ལྟ་སྟངས་བཅུན་ལ་སྒོམ་ཉམས་བཟང་འཕྲོ་ལ་བཅད་དེ་ཐུན་ཆུང་ལ་གྲངས་མང་བས་ཡང་ཡང་བསླབ། དེས་སྐྱོ་ན། སེམས་ཧ་ཅང་མ་བསྒྲིམས་ཧ་ཅང་མི་གློད་པར་རང་བབས་སུ་ཤིག་གེ་བཞག་ལ་ངལ་སོས། དེ་ལྟར་ཉིན་མཚན་གྱི་རྣལ་འབྱོར་གཉིས་གཅིག་ཏུ་དྲིལ་ཏེ་ཉམས་སུ་བླངས་པས་སེམས་ཟིན་པས་རླུང་ཟིན། དེ་ཟིན་པ་ལས་སྟོང་གཟུགས་ཀྱི་རྣམ་པ་འཆར་ཏེ། དུ་བའི་ཉམས་སུ་དུ་བ་འཕྱུར་བ་དང་དུ་གདང་ཆགས་པ་ལྟ་བུ་དང་། སྨིག་རྒྱུའི་ཉམས་ཆུ་འགྲོ་བ་དང་ཆར་ཟིལ་འབེབས་པ་ལྟ་བུ་དང་། སྲིན་བུ་མེ་ཁྱེར་ཉམས་དམར་ཙེག་ཙེག་དང་དམར་ཕྲ་ཕྲ་བ་ལྟ་བུ་དང་། མར་མེའི་ཉམས་སྒྲོན་མེ་འབར་བ་དང་མར་མེ་མང་པོ་བསྒྲིགས་པ་ལྟ་བུ་དང་། ནམ་མཁའ་ལྟ་བུའི་ཉམས་སྟོན་ཀའི་ནམ་མཁའ་སྤྲིན་དང་བྲལ་བ་ལྟ་བུ་ལ་སོགས་ཏེ་མཐོང་སྣང་མཐའ་ཡས་པ་དང་། ལུས་ཉམས། སེམས་ཉམས། རྨིས་ཉམས་སོགས་གང་བྱུང་ངོ་ཤེས་པར་བྱས་ལ། སྣང་བ་གང་ཤར་དགག་སྒྲུབ་མེད་པར་བསྐྱང་དུ་བཅུག སྟོང་གཟུགས་ཀྱི་མཐོང་སྣང་རྣམས་མི་གཡོ་བར་བརྟན་ན། མིག་འབྲས་བསྒྱུར་བ་དང་བར་ཐག་རིང་ཐུང་མ་
ངེས་པའི་མཁའ་ལ་ཁྲིད་དེ་རྟགས་སྣང་རྣམས་ལ་ལྟ་སྟངས་གཏད་ནས་མ་ཡེངས་པར་ཆེ་རེ་བལྟ་བ་དང་། སྟེང་འོག་མ་ངེས་པར་ཤུགས་ཕྱུང་སྟེ་རྟགས་སྣང་མཁའ་ལ་མཐོང་ན་ལྟ་སྟངས་རིམ་གྱིས་ཕབ་སྟེ་ལས་སྣང་གང་རུང་ཞིག་གི་སྟེང་དུ་སེམས་བཟུང་བ་དང་། སྟོང་གཟུགས་མིག་གི་ཐད་ཀའམ་འོག་ཏུ་འཆར་ན་ལྟ་སྟངས་རིམ་གྱིས་གཏོད་དེ་ལས་སྣང་དང་བསྲེས་པས་ལས་སྣང་དེའང་སྟོང་གཟུགས་སུ་འཆར་ཞིང་དེ་དག་ལ་སེམས་བཟུང་བས་མ་དག་པའི་ལས་སྣང་འགགས་ནས་སྣང་བ་ཐམས་ཅད་སྟོང་གཟུགས་སུ་འཆར་བ་དང་། མགོ་དྲང་པོར་བཞག་ནས་སྣ་བུག་གཉིས་ཀྱི་ཐད་ཀར་གཏད་དེ་སྟོང་གཟུགས་བཟུང་ན་རླུང་ལྔའི་ཁ་དོག་མཐོང་བ་དང་། ལྟེ་འོག་སྤུ་དཀར་ནག་གི་མཚམས་སུ་བཟུང་ནས་བདེ་དྲོད་འཆར་ཞིང་མཐར་དབུ་མ་དང་རྩ་འཁོར་རྣམས་ཀྱང་མཐོང་བར་བཤད། རྟགས་སྣང་མཐར་ཐུག་འོད་ཀྱི་ཐིག་ལེ་ཤར་བ་ལ་མ་ཆགས་མི་གཡོ་བར་བལྟས་པས་བོགས་འབྱིན་པར་བྱེད་དེ་བརྟན་པ་ན་དེའི་དབུས་སུ་བརྟན་གཡོའི་འཇིག་རྟེན་གྱི་ཁམས་སོགས་དག་མ་དག་གི་སྣང་བ་དཔག་ཏུ་མེད་པ་སྒྲིབ་མེད་གསལ་པོར་མཐོང་བར་འགྱུར་ཞིང་། ལུས་སེམས་བདེ་གསལ་རྣམ་པར་མི་རྟོག་པའི་རང་བཞིན་འོད་གསལ་གྱི་ངང་ཉིད་དུ་གནས་པའི་ཉམས་བཟང་པོ་དང་སྤྱན་དང་མངོན་པར་ཤེས་པ་ལ་སོགས་པའི་ཡོན་ཏན་མང་པོ་འཆར་བར་གསུངས་སོ། །གཉིས་པ་དེ་ལས་འཕྲོས་པ་ལ་ལྔ་ལས། དང་པོ་ཉམས་སྣང་གཏན་འབེབས་ནི། དེ་ལྟར་གསུམ་གྱི་དང་པོ་ལ༔ ཞེས་སོགས་ཚིགས་བཅད་གཅིག་གིས་བཤད་མ་ཐག་པའི་གཏུམ་མོ་གསུམ་གྱི་ལུས་གནད་དང་རླུང་གནད་བསྟན་ཏེ། རང་རང་གི་ཐད་ཀར་བཤད་ཟིན་ནས་འདིར། དེ་ལྟར་བསྒོམས་པས་ཉམས་གསུམ་འོང༔ ཞེས་སོགས་ཏེ། དེ་ལྟར་འབད་པས་བསྒོམས་པ་ན། ཉམས་ཀྱི་རིམ་པ་གསུམ་འོང་སྟེ། རང་བཞིན་གྱི་ཉམས། རྟོགས་པའི་ཉམས། འོད་གསལ་གྱི་ཉམས་སོ། །དང་པོ་ནི། བདེ་བ་སྐྱེས་པའི་རྣམ་རྟོག་ཁ་འཁྱིལ་བ་ན་མགོ་དང་རོ་སྟོད་ལྗི། སེམས་ཉམས་རྣམ་རྟོག་མི་འགྱུར་བར་གསལ་ཆ་དང་དྭངས་ཆ་མེད་པར་ཧར་རེ་ཚོམ་མེ་ལུས་པའི་བྱིང་ཉམས་ཆེན་པོ་འབྱུང་སྟེ། དེ་ཀ་བྱུང་རྒྱལ་དུ་བསྐྱངས་པས་སངས་
ནས་ཡོན་ཏན་དུ་འགྲོ་བ་ཡོད་ནའང་། དེ་བསལ་ན་བོགས་ཆེ་བས། ལྟ་སྟངས་གཏོད། ཤེས་པ་ལ་ངར་བཏགས། རིག་པ་ཧུར་ཕྱུང་ནས་བལྟ། སྣ་ཚོགས་ཡུལ་གྱི་བདུད་རྩི་བསྟེན་པ་ཞེས་བྱ་བ་ཡུལ་གཟུགས་སྒྲ་དྲི་རོ་རེག་བྱ་ལ་སོགས་པའི་ངོ་མཚར་བའི་ལྟད་མོ་སྣ་ཚོགས་ལ་བལྟས་པས་སེལ་ལོ། །གཉིས་པ་ནི། རྣམ་རྟོག་རགས་ཤིང་བདེ་བའི་ཉམས་གསལ་བ་འབྱུང་སྟེ། དེའི་ཚེ་ལྟ་སྟངས་ཀྱིས་སེམས་བཅུན་ནས་རྣམ་རྟོག་གི་རང་ངོ་ལ་ཆེར་གྱིས་བལྟས་ལ༑ དེ་གའི་ངང་ལ་བསལ་བཞག་མེད་པར་རང་བབས་སུ་གློད་ལ་གཞག་པར་བྱའོ། །གསུམ་པ་ནི། གང་ཤར་གྱི་རང་ཞལ་ལ་བལྟས་པས་གསལ་ལ་ངོས་གཟུང་མེད་པ། བདེ་ལ་ཞེན་པ་མེད་པ། མི་རྟོག་ལ་འཆར་སྒོ་མ་འགགས་པའི་ཉམས་ཏེ། མདོར་ན་བདེ་གསལ་གྱི་སྣང་བ་མ་འགགས་ལ། དེའི་རང་བཞིན་གང་དུ་ཡང་ངོས་གཟུང་དུ་མེད་པ་ཡུལ་ཡུལ་ཅན་རོ་གཅིག་པའི་བློ་འདས། རང་རིག་རང་གསལ་སྤྲོས་པ་ཐམས་ཅད་དང་བྲལ་བས་བདེ་གསལ་སྟོང་པ་མི་རྟོག་པ་རྣམ་ཐར་བཞི་ལྡན་གྱི་ཡེ་ཤེས་སུ་རང་ཤར་བ་ནི་སྒོམ་ཉམས་མཐར་ཐུག་གོ། གཉིས་པ་གེགས་སེལ་གནད་ཀྱི་མན་ངག་ནི། གཏུམ་མོ་བསྒོམ་པའི་རྣལ་འབྱོར་ལ༔ ཞེས་སོགས་ཏེ། འདི་ལ་བཞི་ལས། རླུང་ལོག་གི་གེགས་སེལ་ནི། རླུང་ཕྱིར་བསྒོམས་པས་ཤེས་པ་འཕྱོ་བ། སྙིང་མི་དགའ་བ། རོ་སྟོད་ན་བ། མགོ་ལ་ཟུག་ཟེར་སོགས་སྐྱེས་ན། དེ་བསལ་བ་ནི། རང་ལུས་སྟོང་ར་བསྒོམས་ལ་རླུང་ཐེངས་འགའ་རེ་བསྒོམས་རྗེས། སྔ་མ་གསུམ་ལ་སྙིང་གའི་ཐད་ཀྱི་མདུན་རྒྱབ་དང་། མགོ་གཟེར་བ་སོགས་ལུས་ཀྱི་ཆ་ཤས་ན་བ་ལ་གང་ན་སར་བུ་ག་ཧར་བྱུང་དུ་དོད་པ་ལས་རླུང་རྣམས་ཉི་ཟེར་གྱི་རྡུལ་བཞིན་དུ་བུན་བུན་ཐོན་པས་ལུས་ནང་སྟོང་སང་སང་སོང་བར་མོས་ལ། ལག་གཉིས་ཁུ་ཚུར་གྱི་རྒྱབ་ནུ་སྟེང་དང་ལག་ངར་རྩིབ་ལོགས་ལ་རྡེག་པ་དང་མཉམ་དུ་ཧ་ཐུང་དྲག་ཏུ་བཏོན་པས་ཕན་ནོ། །དྲོད་ཀྱི་གེགས་སེལ་ནི། གཏུམ་མོ་བསྒོམས་པས། ཐོག་མར་ཕྱི་རུ་དྲོད་བྱུང་ན་ལྡེང་པོ་ཙམ་ལས་བོགས་མི་འབྱུང་བས། དེ་སྡུད་པ་ནི་སྲིན་ཞལ་འབྱེད་འཛུམ་མང་པོ་བྱས་པས་འདུས་པར་འགྱུར་རོ། །གལ་ཏེ་ཐོག་མར་སྙིང་གར་དྲོད་སྐྱེས་ན་མྱུར་དུ་ཡལ་འགྲོ་བས་དེ་འབེབས་པའི་
གནད་ནི། ལྟེ་འོག་ཏུ་རླུང་ཁ་སྦྱོར་དྲག་པོ་བསྒོམས་པས་སེལ་ལོ། །ཞར་བྱུང་སྨད་ཀུན་དྷའི་གེགས་སེལ་ནི། ཆོས་ཀྱི་གཏུམ་མོ་བསྒོམས་པས་བདེ་བ་རྒྱས་ནས་ཁམས་འཕོ་བ་སྙམ་བྱེད་ན༑ དེ་བསལ་བ་ལ། ཆགས་སྲེད་བག་ཆགས་ཀྱི་རྒྱུ་ལས་བྱུང་བ་ཡིན་ན། ཆགས་རྟོག་གི་བདེ་བ་ལ་མ་ཆགས་པར་བྱས་ནས་བདེན་མེད་དུ་སྦྱངས་པས་སེལ། གྲིབ་དང་དམ་སེལ་གྱིས་འཛག་ན་དབང་ཞུ་ཞིང་ཚོགས་འཁོར་སོགས་ཉམས་གྲིབ་སེལ་བའི་ཐབས་ལ་འབད། གང་བས་འཛག་པ་དང་ནད་ཀྱིས་འཛག་ན། འཛིན་ལྡོག་དགྲམ་པའི་གནད་ཐབས་ལམ་དུ་བཤད་པ་ལྟ་བུས་བསལ། གང་ལྟར་འཛག་ཀྱང་ཐབས་གཅིག་གིས་བསལ་བ་ནི། ཐོག་མར་རླུང་ཁུག་པ་གཅིག་གཉིས་ཙམ་བཟུང་རྗེས། རང་གི་ལུས་ནང་སྤྱི་བོ་ནས་གསང་གནས་བར་དབུ་མ་དྭངས་གསལ་སྦུབས་སྟོང་གི་རྣམ་པ་ཡངས་ཁྲོལ་ལེ་བར་བསྒོམས་པའི་གསང་བའི་འཁོར་ལོའི་ཐད་དུ་ཧཱུྃ་ཡིག་དམར་པོ་མགོ་ནང་དུ་བསྟན་པ། རྡོ་རྗེ་ནོར་བུའི་བུ་གའི་ཕྱི་ན་པདྨ་འདབ་མ་རྒྱས་པའི་རྩ་བ་བ་ཐག་ལྟ་བུ་དེ་ནོར་བུའི་བུ་གའི་ནང་ནས་ཡར་སོང་བ་ཧཱུྃ་གི་ཞབས་ཀྱུ་དང་འབྲེལ་བར་བསྒོམས་ལ། ལུས་ཉྭ་བཞི་བསྒྲིམས། ལྟོ་བ་ཚིག་པ་ལ་གཅེར། ལྕེ་ཕུགས་སུ་ལྡོགམིག་སྤྱི་བོར་གཏད། ལག་པ་གཙུག་ཏོར་གྱི་ཕྱག་རྒྱ་སྤྱི་བོར་མགོ་མཇུག་ལྡོག་ལ་བཅའ། ངག་ཏུ་ཧཱུྃ་འདྲེན་དྲག་ལ་རིང་བ་བྱ། དེ་དུས་དམིགས་པ་གསང་བའི་ཧཱུྃ་གྱེན་དུ་མདའ་འཕངས་པ་ལྟར་སོང་བས། དེའི་ཞབས་ཀྱུས་པདྨའི་རྩ་བ་ནས་ཐོན་པས་འདབ་མ་བུ་གར་མ་ཤོང་སྟེ། རྡོ་རྗེ་རྒྱུ་མ་ཕྱི་ནང་སློག་པ་བཞིན་སོང་ནས་དབུ་མའི་ལམ་བརྒྱུད་སྤྱི་བོའི་སྟེང་དུ་ཧཱུྃ་དང་ནོར་བུ་ཕྱི་ནང་སློག་པ་སྤྱི་བོར་རྒྱང་ངེ་འདུག་པར་བསམ་ཞིང་རླུང་ཕྱིར་བཟུང་། འདི་ཡང་ཡང་བསྒོམས་པས་འཛག་པའི་རིགས་གང་ཡིན་ཡང་ཆོད། ལར་བྱང་སེམས་ཉམས་པའི་རྐྱེན། ཧ་ཅང་ལུས་བྲེལ་བ་དང་། ཧ་ཅང་ཚ་བ་དང་། ཧ་ཅང་འཁྱགས་པར་མི་བྱ། འཕོ་བ་སྙམ་བྱེད་པའི་ཚེ་ལུས་དགུར་བ་དང་འདར་བ་སོགས་ཡེ་མི་བྱ་བར་བཟུང་བའི་ཐབས་སླེབས་པ་གནད་དུ་ཆེ། གལ་ཏེ་བཤང་གཅི་དང་མཉམ་དུ་འཛག་ན་འདོར་བའི་ཚེ་སོར་མོ་བསྐུམ། མིག་དང་ལྕེ་གྱེན་དུ་ལྡོག ལྟེ་བར་བུམ་ཅན་ཅི་ནུས་བཟུང་རྗེས་དོར་བས་སེལ། རྨི་ལམ་དུ་འཛག་
དོགས་ན། རྡོ་རྗེ་པགས་པས་མགོ་གཏུམས་ལ་ཁོང་པར་སྦས་པ་རྟིང་པ་གཡས་གཡོན་གང་རིགས་ཀྱིས་བསྟེན་ནས་ཉལ་བས་མི་འཛག་གོ །མི་རྟོག་པའི་གེགས་སེལ་ནི། རྣམ་རྟོག་ཐམས་ཅད་མི་རྟོག་པའི་དབྱིངས་སུ་ཐིམ་པས་རང་གཞན་གྱི་སྣང་བ་ཐམས་ཅད་ཅི་ཡང་མེད་པ་འདྲ་བའི་སྣང་བས་འཇིགས་སྐྲག་སྐྱེ་བ་ནི་སྟོང་པའི་ཉམས་ཏེ། དེའི་ཚེ་སྣ་རྩེར་ཉི་མའི་དཀྱིལ་འཁོར་བསྒོམས་པས་སེལ་ལོ། །གསུམ་པ་རགས་པ་བེམ་པོའི་རླུང་ཉིད་ཕྲ་བའི་རླུང་དང་བསྲེ་བ་ལ། ཤེས་པའི་རླུང་དང་བསྲེ་བ་དང་། བདེ་བའི་རླུང་དང་བསྲེ་བ་གཉིས་ལས། དང་པོ་ཤེས་པ་དང་བསྲེ་བ་ནི། རགས་པའི་རླུང་ནི་རྣམ་ཤེས་དང༔ ཞེས་སོགས་ཏེ། རྩ་བར་སྤྱི་བོའི་བུམ་ཅན་ཐོག་མར་བཤད་ནས། དེ་རྩ་འཁོར་གཞན་ལ་རིགས་འགྲེ་བར་གསུངས་ནའང་། འཁོར་ལོ་ལྔའི་བུམ་ཅན་ནི། ཕྱག་བཞེས་སུ་གེགས་ཆུང་ཁྱད་ཐོག་མར་ལྟེ་བ་ནས་བརྩམས་ཏེ་སྤྱི་བོའི་བར་མས་རིམ་དང་། གསང་བུམ་ཀུན་གྱི་མཐའ་མར་མཛད་དོ། །དེས་ན་ལྟེ་བའི་བུམ་ཅན་ནི། ལུས་གནད་ཆོས་བདུན་ལས་ལག་གཉིས་ཁུ་ཚུར་པུས་མོའི་སྟེང་བཀབ། རང་ལྷར་གསལ་བའི་ལུས་ཀྱི་དབུས་སུ་རྩ་གསུམ་གསལ་བཏབ་པའི་འཁོར་ལོའི་ཐད་དུ་རོ་རྐྱང་གཉིས་དབུ་མ་ལ་ཐིམ་ནས་ནང་ཁོང་འབྲེལ་བ། དེ་ལས་གྱེས་པའི་ལྟེ་བ་སྤྲུལ་པའི་འཁོར་ལོ་རྩ་འདབ་དྲུག་ཅུ་རྩ་བཞི་པ་རྣམས་གསལ་བཏབ་ལ། རླུང་རོ་བསལ། འོག་རླུང་ཅུང་ཟད་བསྡམས། སྟེང་རླུང་རྫོགས་པར་བཅུག་སྟེ་ལྟེ་འོག་ཏུ་ནོན་པ་ཞིག་བྱ། དེ་ནས་འོག་རླུང་དྲག་ཏུ་བསྡམས། སྟེང་རླུང་དྲག་པོ་མི་ནོན་པར་ནན་ཙམ་བྱས་ཏེ་ལྟེ་ཁུང་གི་ཐད་དུ་སྲོག་ཐུར་ཁ་སྦྱར། དམིགས་པ་ལྟེ་བའི་འཁོར་ལོའི་རྩ་འདབ་རྣམས་འཇའ་ཚོན་ལྟར་དྭངས་པ་ལ་རྩེ་གཅིག་ཏུ་མཉམ་པར་བཞག དེ་བརྟན་ནས་སྙིང་གའི་བུམ་ཅན་ནི། སྙིང་ག་ཆོས་ཀྱི་འཁོར་ལོ་རྩ་འདབ་བརྒྱད་པ་འཇའ་ཚོན་ལྟར་དྭངས་པ་ལ་སེམས་བཞག་ནས། ལྟེ་བའི་བུམ་ཅན་བཅས་ཟིན་ནས་དེ་སྙིང་གར་དྲངས། ལུས་གནད་ལག་པ་གཉིས་རྒྱབ་ཏུ་བསྣོལ་བས་རྡོ་རྗེ་སྐྱིལ་ཀྲུང་གི་རྐང་མཐེབ་གཡས་གཡོན་ནས་ཐེན་པས་བྲང་ཐེར་གྱིས་ཡོང་བ་བྱའོ། །དེ་ནས་མགྲིན་པའི་བུམ་ཅན་ནི། ལོངས་
སྤྱོད་ཀྱི་འཁོར་ལོ་རྩ་འདབ་བཅུ་དྲུག་པ་འཇའ་ཚོན་ལྟར་དྭངས་པ་ལ་སེམས་བཞག་ནས། རྐང་པ་སྐྱིལ་ཀྲུང་བཅས་ཏེ། པུས་མོའི་ནང་ཁུགས་སུ་གྲུ་མོ་བཙུགས། སོར་མོ་བསྣོལ་བས་ལྟག་པ་ནས་མནན་ཏེ་མགོ་སྒྱུར། རླུང་ཁ་ནས་བརྔུབས་ཏེ་ལྟག་པའི་ཐད་ཀར་ཤུགས་སྒྲིལ་ལ་ལྐོག་མས་ཨོལ་མདུད་མནན། ལྟེ་བ་ཚིགས་པ་ལ་སྦྱར་ནས་འོག་རླུང་མགྲིན་པའི་བར་དྲང་བའོ། །དེ་ནས་སྤྱི་བོའི་བུམ་ཅན་ནི། བདེ་ཆེན་འཁོར་ལོ་རྩ་འདབ་སུམ་ཅུ་རྩ་གཉིས་པ་འཇའ་ཚོན་ལྟར་དྭངས་པ་ལ་སེམས་བཞག་ནས། ལུས་གནད་གཞན་སྔར་ལྟར་ལས་ཁྱད་པར་སོར་མོ་བསྣོལ་བས་སྤྱི་བོ་ནས་འཐེན། རླུང་ཡང་ཁ་ནས་བརྔུབས་པ་རྐན་ཕུགས་སུ་ཡར་སྐྱིལ་ལ་ཨོལ་མདུད་མནན། མིག་འབྲས་གྱེན་དང་ཡས་ཀྱི་མིག་ལྤགས་ཐུར་དུ་མནན། འོག་རླུང་སྤྱི་བོའི་བར་དྲང་བ་སྔར་བཞིན་ནོ། །དེ་ནས་གསང་བའི་བུམ་ཅན་ནི། བདེ་སྐྱོང་གི་འཁོར་ལོ་རྩ་འདབ་བཞི་པ་འཇའ་ཚོན་ལྟར་དྭངས་པ་ལ་སེམས་བཞག་ནས། ལུས་གནད་རྟིང་པ་གཅིག་གིས་བཤང་སྒོ་བསྟེན། གཅིག་གིས་གསང་བ་ནས་མནན། ལག་གཉིས་གཞུག་ཆུང་ནས་འཁྱིད་གང་ཙམ་གཞལ་བའི་སར་བཙུགས། གདོང་གྱེན་དུ་ཕྱོགས་པས་སྟེང་རླུང་དྲག་ལ་རིང་བ་མནན། ཐུར་སེལ་འོག་སྒོ་གཉིས་ཀ་ནས་ལན་མང་དུ་དྲངས་ལ་རྒྱུ་ཞབས་ཀྱི་འོག་ཏུ་ཁ་སྦྱོར་འཆིང་། དེ་ཡང་འཁོར་ལོའི་བུམ་ཅན་རྣམས་བསྒོམས་པས་འདར་དང་འཁོར་དང་འབིགས་པ་གསུམ་གྱི་རྟགས་བྱུང་ན་དམིགས་པ་བསྒྱུར་བ་སོགས་ཀྱི་གནད་ཤེས་པར་བྱ། སྙིང་ག་ཡན་ཆད་ཁམས་ཚོད་གཟུང་གིན་མ་བསྒོམས་ན་གེགས་ཆེན་པོ་འོང་བས་རན་ཙམ་བསྒོམ་ཞིང་། འདིར་སྔ་མ་སྔ་མ་བརྟན་ནས་ཕྱི་མ་ཕྱི་མ་སྒོམ་པའི་དབང་དུ་བྱས་ལ། གཞན་དུ་ལས་དང་པོ་པས་ཐོག་མ་ནས་ཐམས་ཅད་བསྒོམ་ན། ལྟེ་བའི་བུམ་ཅན་ཚར་ཉི་ཤུ་ཙམ་བསྒོམས་རྗེས། དེས་སྙིང་གར་དྲངས་ནས་ལན་གཅིག་གམ་གཉིས་བསྒོམ། དེ་འདྲ་བ་ལན་གཉིས་ཀྱི་མཐར་མགྲིན་པའི་བུམ་ཅན་གཅིག་བསྒོམ་པ་སོགས་རིམ་གྱིས་ཆ་བརྩིས་ནས་བསྒོམ་པ་དང་། འཁོར་ལོ་བཞིའི་མཐར་གསང་བའི་བུམ་ཅན་ལན་གཅིག་བསྒོམ་པ་རྣམས་བྱ་ཞིང་། སྤྱི་མགྲིན་སྙིང་གའི་བུམ་ཅན་གསུམ་གྱི་རླུང་གཏོང་ཁར་ལྟེ་འོག་ཏུ་ཕབ་ནས་སང་
གིས་གཏོང་བའང་གནད་དོ། །རླུང་རོ་འཁྱམས་ཀྱིས་དོགས་ན་སྙིང་གའི་བུམ་ཅན་མཐར་རོ་སྟོད་གཅུ་ཞིང་ཧ་འདོན། མགྲིན་པའི་མཐར་ཁ་བཙུམས་ནས་མགྲིན་པའི་རླུང་དྲངས་ཏེ་འབུད། སྤྱི་བོའི་མཐར་སྣ་བཀག་ནས་ཐོད་པའི་རླུང་དྲངས་ལ་འབུད། འཁོར་ལོ་སོ་སོའི་གེགས་སེལ་གྱི་འབེབས་ནི། སེམས་སྐྱིལ་གྱི་པུས་མོ་ཅུང་ཟད་བཏེགས་པ་ལག་གཉིས་བརྐྱངས་པས་བསྟེན་རླུང་དང་སྦྱར་ལ་གནས་སོ་སོ་བསྐོར་ཞིང་གཅུས་མཐར་ཧ་ཞེས་འུར་དིར་ལ་འཕོངས་རྡེག་ཆུང་དང་ཧ་འདོན་ལ་ཁུ་ཚུར་གྱི་རྒྱབ་ནུ་སྟེང་དང་ལག་ངར་རྩིབ་ལོགས་ལ་རྡེག་པ་དང་མཉམ་དུ་སྐྱིལ་ཀྲུང་ས་ལ་འབེབས་པ་གཉིས་སྤེལ་བ་ལན་འགའ་བཟླས་མཐར་སྤྲུག་གོ །དེ་ནས་རྒྱུ་བ་ལ་སོགས་པའི་རླུང་ལྔ་དབང་པོའི་སྒོ་ལ་གནས་ནས་རྣམ་ཤེས་དང་འདྲེས་ཏེ་ཡུལ་ལ་འཇུག་པའི་བྱ་བ་བྱེད་པས། མིག་སོགས་དབང་པོའི་སྒོ་རྣམས་ནས་ཡུལ་གཟུགས་སོགས་ལ་ཚོར་བ་གསུམ་འདྲེན་པའི་རྒྱུ་རླུང་འཇུག་གནས་ལྡང་གསུམ་འབྲུ་གསུམ་གྱི་གདངས་དང་སྦྱར་ཏེ། རླུང་སེམས་ཕྱིར་འགྲོ་བ་ན་ཧཱུྃ་ཞེས་མོས་པས་ཕྱི་རོལ་དུ་ཡུལ་གྱི་རྣམ་པར་འཆར་བ་ལ་སེམས་གཏད། རླུང་སེམས་ནང་དུ་འཇུག་པ་ན་ༀ་ཞེས་ཡུལ་འཛིན་གྱི་རྣམ་རྟོག་འགག་པ་ལ་སེམས་གཏད། རླུང་སེམས་ནང་དུ་གནས་པའི་ཚེ་ཨཱཿཞེས་ཤེས་པ་མི་འཕྲོ་བར་གནས་པ་ལ་སེམས་གཏད་དེ་མཉམ་པར་འཇོག དེ་གསུམ་གྱི་དཔེ་ནི། མར་མེ་སྐར་ཁུང་ནས་བཏོན་པས་འོད་ཕྱིར་འབྱུང་བ་དང་། མར་མེ་ནང་དུ་ཁྱེར་བས་ཕྱིའི་འོད་ནང་དུ་ནུབ་པ་དང་། མར་མེ་མཛོད་ཕུག་ཏུ་བཅུག་པ་ལྟ་བུར་ཤེས་པར་བྱའོ། །འདི་དག་ལ་གོམས་པ་མཐར་ཕྱིན་པ་ན། རླུང་གནོད་པ་མེད་པར་བསྡམ་ནུས་ཤིང་གར་བཟུང་དུ་ཟིན་པ་དང་། གང་འདོད་ཀྱི་སྒོ་ནས་རླུང་འགྲོ་འོང་བྱེད་ནུས་ཤིང་། རླུང་ཕྱི་ནང་བསྲེ་ནུས་པས་ཁམས་འཛིན་འདྲེན་ལ་ནུས་པ་ཐོབ་པ་སོགས་ཡོན་ཏན་མཐའ་ཡས་སོ། །གཉིས་པ་བདེ་བའི་རླུང་དང་བསྲེ་བ་ནི། དེ་ནས་བདེ་བའི་རླུང་དང་བསྲེ༔ ཞེས་སོགས་ཏེ། ལུས་གནད་ཆོས་བདུན་བཅས་ལ། རང་ལུས་ཀྱི་དབུས་སུ་དྷཱུ་ཏི་ཆོས་བཞི་ལྡན་གསལ་བཏབ་ནས། དབུ་མ་ལས་འོད་ཟེར་རེ་རེ་འཕྲོས་པ་རེག་པ་ཙམ་གྱིས་ལུས་ཀྱི་དངོས་འཛིན་དྭངས་ཏེ། གང་ལའང་
ཆགས་ཐོགས་དང་སྒྲིབ་པ་མེད་པ་འཇའ་ཚོན་ལྟ་བུའི་ལུས་བདེ་བའི་རང་བཞིན་ཅན་དུ་གྱུར་པར་བསྒོམས་ལ་རླུང་དྲག་ཏུ་བཀག་པས། རགས་པ་བེམ་པོའི་རླུང་འགགས་ནས་ཕྲ་བ་བདེ་རླུང་ཤེས་པ་དང་འདྲེ་བའི་རླུང་དུ་གནས་འགྱུར་བར། དེའི་རྟགས་བདེ་བས་གཉིས་སྣང་བསྲེ་ནུས་པས་རྡོས་བཅས་ཀྱི་དངོས་པོ་ཀུན་ལ་ཐོགས་པ་མེད་པ་ལ་སོགས་པའི་ཡོན་ཏན་འཆར་བར་འགྱུར་རོ། །བཞི་པ་འབྱུང་བ་རོ་སྙོམས་ཀྱི་མན་ངག་ནི། འབྱུང་བཞི་ཆ་ནི་མ་སྙོམས་ན༔ ཞེས་སོགས་ཏེ༑ རླུང་བསྒོམས་པས་འབྱུང་བ་སོ་སོའི་རླུང་སྐྱེ་འབྲི་ཆ་མ་སྙོམས་པའི་གེགས་བྱུང་ན་རོ་སྙོམས་ཀྱི་ཐབས་ཀྱིས་བསལ་བར་བྱ། དེ་ཡང་སའི་རླུང་རྒྱས་པའི་སྐྱོན་གྱིས་ལུས་སེམས་ལྕི་ཞིང་བྱིང་བའི་ཉམས་བྱུང་ན། རླུང་དཀྱིལ་ལྗང་གུ་གཞུ་བདུངས་པ་ལྟ་བུའི་སྟེང་དུ་རང་གི་རྐང་པ་བཞག་ནས་མཆོག་མའི་བ་དན་གཡོས་པས་ཡེད་ཡེད་འདེབས་པར་བསམས་ལ་ལྟ་སྟངས་གཏོད་ཅིང་ཤེས་པ་ལ་ངར་བཏགས། ལུས་གནད་སྐྱིལ་ཀྲུང་བཅས་པའི་པུས་མོ་ལ་ལག་འཇུས་ནས། རླུང་གནད་ཁ་སྣ་གསུམ་ནས་རླུང་དྲངས་ཞིང་འབུད་པ་ནའང་ལམ་གསུམ་ལས་ཤུགས་བསྐྱེད་ནས་བུས་པས་སེལ་ལོ། །ཡང་རླུང་གི་རླུང་རྒྱས་པའི་སྐྱོན་གྱིས་ས་གཅིག་ཏུ་མི་ཚུགས་པར་ཡེད་ཡེད་འགྲོ་བར་འདོད་པའི་ཉམས་བྱུང་ན། རང་གི་ལྟེ་བར་ས་དཀྱིལ་སེར་པོ་ལྕི་ཞིང་འཐས་པ་ཞིག་བསྒོམས་ལ། ལྟ་སྟངས་སྨད། རླུང་ལྟེ་བར་མནན་པས། ལྟེ་བའི་ས་དཀྱིལ་དེ་ཇེ་ཆེ་ཇེ་ཆེར་སོང་ནས་སྣང་རིག་ཐམས་ཅད་གསེར་དུ་སེར་ཆམ་གྱིས་སོང་བ་ལ་བློ་བཞག་པས་སེལ་ལོ། །ཡང་ཆུ་རླུང་རྒྱས་པའི་སྐྱོན་གྱིས་ལུས་དྲོད་ཆུང་ཞིང་འདར་བ་དང་གྲང་ཞུམ་བྱེད་ན། གསང་གནས་སུ་མེ་དཀྱིལ་གྲུ་གསུམ་པ་འབར་བ་ལ་སེམས་གཏད་ནས་རླུང་སྣ་ནས་འདྲེན་དགུག་དྲག་ཏུ་བྱས་པས་སེལ་ལོ། །ཡང་མེ་རླུང་རྒྱས་པའི་སྐྱོན་གྱིས་ལུས་ཚ་ཞིང་གཙེས་ན། སྙིང་གར་ཆུ་དཀྱིལ་ཟླུམ་པོ་འཁྱིལ་ཞིང་བསིལ་བ་ལས་ཇེ་ཆེར་མཆེད་ནས་སྣང་རིག་ཆུར་མེར་གྱིས་སོང་བར་མོས་ལ། རླུང་ཁ་ནས་སྒྲ་བཅས་སུ་གཞུག་ཅིང་ཧའི་སྒྲས་དབྱུང་བས་སེལ་ལོ། །གལ་ཏེ་འོག་སྒོ་བཙན་ཐབས་སུ་འགགས་པ་ལྟ་བུ་འགྱུར་
བ་བྱུང་ན་འགེགས་པའི་གནད་ནི། ལུས་གནད་སྐྱིལ་ཀྲུང་ལས་རྐང་སེན་རྣམས་དྲག་ཏུ་བསྐུམ། ལག་གཉིས་རྡོ་རྗེ་ཁུ་ཚུར་བཅིངས་པའི་གཡས་འཕྱར་ཞིང་གཡོན་ཁ་ཕྱིར་བསྟན་ཏེ་ལྟེ་བར་བརྟེན། མིག་གཉིས་སྟེང་དུ་བགྲད། འོག་སྒོ་འབྱེད་འཛུམ་གྱི་སྦྱོར་བས་འཐེན་གློད་རེ་མོས་ཀྱིས་མང་དུ་བྱ། རླུང་རོ་བསལ་ནས་སྟེང་རླུང་དྲག་ཏུ་བརྔུབས་ཏེ་གསང་བར་ཤུགས་ཆེན་པོས་མནན། སེམས་གནད་ནམ་མཁའི་དབྱིངས་སུ་འཕངས་ཏེ་བཞག་པས་སེལ་ལོ།། ཡང་དྲི་ཆེན་འགགས་པ་ལ། སྣ་བུག་གཡས་ནས་དྲག་ཏུ་བརྔུབས་ཏེ་ལྟེ་འོག་ཏུ་ཤུགས་ཀྱིས་མནན་ལ་གཏོང་བ་ན་གཡོན་ནས་དྲག་ཏུ་འབུད་པ་དང་། དྲི་ཆུ་འགགས་པ་ལ་དེ་ལས་ལྡོག་སྟེ་ཡང་ཡང་བསྐྱར་བས་གྲོལ་ཞིང་། རླུང་འཛིན་གཏོང་མི་བྱེད་པའི་ཕྱོགས་ཀྱི་སྣ་བུག་དེ་དང་དེའི་ཕྱོགས་ཀྱི་གུང་མཛུབ་ཀྱིས་དགག་པའང་གནད་དོ། །གཞན་ཡང་ཚ་གྲང་གི་སྐྱོན་གང་ཡིན་ངོ་ཤེས་པར་བྱས་ལ། ཚ་བའི་སྐྱོན་ཡིན་ན་དངུལ་ཆུ་སྦྱངས་པ་ག་པུར་དང་བསྲེས་པའི་སྨན་དང་། གྲང་པ་ཡིན་ན་ཛ་དངུལ་སྦྱངས་པའི་སྨན་རང་གི་སྣ་སྒོ་ནས་བསྟེན་པས་ཕན་པར་འགྱུར་རོ། །ལྔ་པ་གནོད་སྡིག་གི་གེགས་བསལ་ལ་གཉིས་ལས། དང་པོ་བགེགས་ཀྱི་གནོད་པ་བསལ་བ་ནི། གང་ཞིག་བགེགས་ཀྱི་བར་ཆད་ཀྱིས༔ ཞེས་སོགས་ཏེ། གདོན་བགེགས་གནོད་པས་ཏིང་འཛིན་ལས་སུ་མི་རུང་ན། ལུས་གནད་སྐྱིལ་ཀྲུང་། ལག་གཉིས་པུས་མོ་ལ་བཀབ་ལ། ལྟེ་འོག་སོར་བཞིའི་ཐད་ན་མེ་དཀྱིལ་དམར་པོ་གྲུ་གསུམ་རཾ་ཡིག་གིས་མཚན་པ་དང་དེའི་འོག་ཏུ་རླུང་དཀྱིལ་སྔོན་པོ་གཞུའི་དབྱིབས་ཅན་མ ཆོག་མ་གཉིས་ལ་བ་དན་གྱིས་མཚན་པ་གཡོ་བའི་རང་བཞིན་ཅན། སྙིང་གར་གནོད་བྱེད་གདོན་གྱི་ངོ་བོ་ཏྲི་ཡིག་ནག་པོ་རྣམས་གསལ་བཏབ་ལ་རླུང་ཁ་སྦྱོར་དུ་བཅིངས་པ་ན། རླུང་དཀྱིལ་གྱི་བ་དན་བསྐྱོད་པས་རླུང་གཡོས། དེས་བསྐུལ་བས་མེ་དཀྱིལ་རཾ་ལས་མེ་འུར་གྱིས་འབར་བས་ལུས་ནང་ཁེངས། དེས་སྙིང་གའི་ཏྲི་ནག་ཐུལ་གྱིས་བསྲེགས་ཤིང་སྦྱངས་ནས་ཐལ་བའང་ཕྱིར་གཏོར་བར་མོས། རླུང་འབྱིན་པའི་ཚེ་བ་སྤུའི་བུ་ག་ལ་སོགས་པའི་སྒོ་ནས་མེ་ལྕེ་ཚ་ཞིང་རྩུབ་པས་བདས་ཏེ་
བགེགས་རྣམས་སྐྲོད་ཅིང་འབྱེར་བར་བསམ་པའོ། །གཉིས་པ་སྡིག་སྒྲིབ་བསལ་བ་ནི། སྡིག་སྒྲིབ་སྦྱོང་ན་པཾ་དམར་པོ༔ ཞེས་སོགས་ཏེ། གཞན་འདྲ་བ་ལས་སྙིང་གར་སྡིག་སྒྲིབ་ཀྱི་ངོ་བོ་པཾ་ཡིག་དམར་པོ་བསམས་ལ་བསྲེགས་སྦྱངས་གཏོར་བ་སྔར་བཞིན་བྱ་བ་ཡིན་ནོ། །གསུམ་པ་རྗེས་ཀྱི་རིམ་པ་ནི། དེ་ལྟར་གདམས་པའི་ངོ་བོ་རྣམས༔ ཞེས་སོགས་ཏེ། གཏུམ་མོ་རྩོལ་བའི་གནད་བྱ་བ་ཡིན་པས། ལས་དང་པོ་པ་རྣམས་ཀྱིས་ཉིན་མཚན་གཉིས་ཀ་ལ། སྔ་ཐུན་རེ་དང་ཕྱི་ཐུན་གཉིས་གཉིས་ཏེ། ཐུན་དྲུག་ཏུ་བཅད་ནས་ཁམས་ཚོད་གཟུང་གིན་བརྩོན་འགྲུས་དྲག་པོས་བསྒོམས་པས་ཉམས་རྟོགས་དབྱར་གྱི་མྱུ་གུ་བཞིན་སྐྱེ་བར་འགྱུར་ལ། ཇི་ལྟར་སྐྱེས་པ་དེ་ལྟར་ཉམས་མྱོང་ཅན་གྱི་བླ་མས་ངོ་སྤྲོད་རིམ་པར་བཏབ་ལ་ངེས་ཤེས་བསྐྱེད་པར་བྱ་བ་ཡིན་ནོ། །ཟབ་དོན་གཏུམ་མོའི་མན་ངག༵་ཡིད་བཞིན་དབང༵་། །རྣམ་རོལ་ཆོས༵་མཆོག་རྒྱལ་མཚན་རྩེར་བཀོད་ནས། །ལེགས་བཤད་བྱི་དོར་བསྒྲུབས་ལས་གྲུབ་གཉིས་ཆར། །འདོད་དགུར་སྙིལ་བའི་བཀྲ་ཤིས་དཔལ༵་འབར་ཤོག །ཅེས་ཟབ་ལམ་བདེ་གཤེགས་ཀུན་འདུས་ཀྱི་གཏུམ་ མོ་ཟབ་རྒྱ་བཅུ་གཅིག་པའི་ཁྲིད་ཡིག་གོ་དོན་གྱིས་བཤད་པ་བཏང་སྙོམས་སུ་བྱས་ནས་ཉམས་ལེན་དམིགས་པའི་ཕྱག་བཞེས་ཀྱི་གནད་གཙོ་བོར་བཏོན་པ་ཟབ་གནད་གསལ་སྒྲོན་ཞེས་བྱ་བ་འདི་ཡང་པད་གླིང་ལྔ་པ་གསུང་སྤྲུལ་ངག་དབང་ཀུན་བཟང་རྡོ་རྗེའི་བཀའ་སྩལ་སྤྱི་བོར་ལྷུངས་པ་དང་། ཉེ་ལམ་སྡེ་པ་གྲུབ་ཆེན་ཀུན་སྤངས་པ་འགྱུར་མེད་ཀློང་གྲོལ་གྱིས་དོན་གཉེར་ཆེན་པོས་བསྐུལ་བའི་ངོར་རྒྱལ་ཀུན་སྤྱི་གཟུགས་བླ་མ་དམ་པ་གཏེར་ཆེན་ཆོས་ཀྱི་རྒྱལ་པོའི་བཀའ་དྲིན་གྱིས་འཚོ་བའི་གཉོས་བཙུན་རྨོངས་པ་དྷརྨ་ཤྲཱིས་ཨོ་རྒྱན་སྨིན་གྲོལ་གླིང་གི་ཆོས་གྲྭར་ཟིན་རིས་སུ་སྤེལ་བའོ། །འདིས་ཀྱང་བསྟན་པ་དང་སེམས་ཅན་དཔག་ཏུ་མེད་པ་ལ་ཕན་པའི་རྒྱུར་གྱུར་ཅིག །དགེའོ།། །།