ཡོངས་འཛིན་དམ་པའི་ཞབས་ཟུང་གཙུག་ཏུ་ཕོག་སྟེ་གུས་པ་ཆེན་པོས་ཚུལ་བཞིན་བསྟེན་པའི་བསྐོར་གྱི་རྣམ་ཐར།

དེ་ནས་སྒོ་མང་གྲྭ་ཚང་གི་ཟུང་ཆུ་ཁམས་ཚན་དུ་ཞུགས་ཏེ། གནས་སྐབས་ཉིན་བཅུ་ཡས་མས་ལ་དོན་བདུན་ཅུའི་འཛིན་གྲྭའི་ནང་དུ་བཞུགས། སྐབས་དེར་གྲྭ་ཚང་ཆེན་མོ་དེའི་སྒྲིག་གཞི་ན། གསར་འབྱོར་བ་སླེབས་ན་དོན་བདུན་ཅུ་འཛིན་གྲྭའི་བར་གང་དུ་ཞུགས་ན་རང་མོས་དང༌། དེའི་གོང་དུ་ཞུགས་དགོས་ན་རྩོད་རྒྱུགས་བླངས་ཏེ་ཚད་གཞིར་ལོངས་མིན་ལྟ་དགོས་པ་ལྟར། རྩོད་རྒྱུགས་ཕུལ་ནས་ཕར་ཕྱིན་ལོ་རིམ་ལྔ་ལས་ལོ་རིམ་གསུམ་པ་གཞུང་གོང་མ་འཛིན་གྲྭར་ཞུགས། དོན་བདུན་ཅུ་དང༌། གཞུང་འོག་མ་འཛིན་གྲྭ་གཉིས་ཀྱི་ལོ་འཁོར་རྒྱུགས་སྤྲོད་རྣམས་ཀྱང་གཞུང་གོང་མ་དང་སྐབས་དང་པོའི་འཛིན་གྲྭའི་སྐབས་སུ་ལོ་རེ་བཞིན་ཉིས་རྒྱུགས་སྤྲད་ནས། རྒྱུགས་འབྲས་ཨང་དང་པོ་བླངས། མཁས་བཙུན་བཟང་པོའི་བདག་ཉིད་བཀའ་དྲིན་གྱི་ཁུར་ཆེན་པོས་ཡོངས་སུ་བསྐྱངས་པ་དགེ་བའི་བཤེས་གཉེན་ལྷ་རམས་པ་བློ་བཟང་དགེ་འདུན་མཆོག་གི་ཞལ་སྔ་ནས་ཀྱི་ཞབས་རྡུལ་སྤྱི་བོས་བླངས་ཏེ་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན། བཤེས་གཉེན་རིན་པོ་ཆེ་འདི་ཉིད་སྤྱིར་བླ་མ་བསྟེན་ཚུལ་གྱི་རྣམ་པར་ཐར་བ་ཧ་ཅང་ཞིབ་པ་དང༌། ཁྱད་པར་དུ་དགེ་བའི་བཤེས་གཉེན་དམ་པ་བློ་བཟང་དགེ་འདུན་འདི་ཉིད་ཀྱི་བཀའ་དྲིན་ལྷག་པར་བརྗོད་རྒྱུ་ཞིག་ཡིན། ཁོང་གིས་ཛ་འགོའི་རི་ཁྲོད་དུ་བཤད་གྲྭ་སྐྱོང་སྐབས་ཤིག་ལ། ཕྲན་ཁོང་གི་མདུན་སར་བཅར་ནས་ཞོར་འཕྲོས་ཀྱི་སྐད་ཆ་ཞིག་ཏུ། འཇམ་དབྱངས་བཞད་པའི་རྟགས་རིགས་ཀྱི་ཆོས་ཁྲིད་ཅིག་ཆོས་གྲོགས་ཤིག་གིས་སྒྲོག་གིན་འདུག་སྟེ། དེ་ཁྱེད་ཀྱི་དགེན་གྱི་གསུང་རེད་ཟེར་གྱིན་འདུག་ཞུས་པ་ན། དེ་ན་ཁོང་ལ་དེ་ཅིག་ལོན་ཐབས་ཀྱིས་དང་ཡིན་མིན་ཞིག་ལྟ་དགོས་གསུངས་པ་ལྟར། ཕྱི་ཉིན་ཞིག་ལ་ཁོང་གི་སར་ཁྱེར་བ་ན་རྩིས་འཕྲུལ་ནང་དུ་བཞག་ནས་བལྟས་དུས། རེད་ངའི་དགེན་གྱི་གསུང་རེད་གསུངས་ཏེ་གསུང་སྐད་ཐོས་པས་སྤྱན་ཆབ་འཁྲིགས་བཞིན་ཞལ་གྱི་མདོག་ཀྱང་སྐྱོ་ཤས་ཀྱི་ཉམས་གློ་བུར་དུ་ལྷགས་ཤིང༌། རིག་བྱེད་ཀྱི་གཟུགས་ལས་རིག་མིན་གྱི་ཐུགས་དཔོག་ནུས་པའི་མོས་གུས་ཁྱད་པར་ཅན་དང་ལྡན་པར་མཐོང་ཞིང༌། དེ་ནས་ཁོང་གི་སར་བཅར་དུས་ཐེངས་ཁ་ཤས་ལ་ངལ་གསོ་ཞོར་དུ་སྒྲ་དེ་བཏང་ནས་འདུག །ལན་གཅིག་ཞལ་སྔ་ནས། ཁྱེད་ཅག་གི་ངོས་ནས་ཀྱང་ཁོང་གིས་གསུང་བའི་སྒྲ་ལ་ཉན་ན་གཞན་དང་མི་གཅིག་པར་ངེས་པ་སྟེར་ཚབ་ཆེ་བ་ཞིག་ཡོད་སྙམ་པ་ཡིན། ཁ་ནས་གསུང་རྒྱུ་གཅིག་ཡིན་ན་ཡང་ཕན་ཐོགས་དང་མི་ཐོགས་ཀྱི་ཁྱད་ཆེན་པོ་ཡོད་པ་རེད། རང་གིས་དོན་རྟོགས་ནས་བརྗོད་པ་དང༌། གོ་ཡུལ་ཙམ་ཞིག་བརྗོད་པ་དང༌། ཚིག་ཟློས་པ་ཁོ་ནས་བཤད་པ་རྣམས་ཕ་རོལ་པོ་ལ་ཡང་གོ་བ་སྟེར་ཐུབ་མིན་ཁྱད་འགྱུར་ཆེན་པོ་ཡོད་པ་ཡིན། དགེ་རྒན་བཀའ་དྲིན་ཅན་འདི་བ་ཚང་གི་གསུང་ནི་ཀུན་ལས་ངེས་པ་སྟེར་ཚབ་ཆེན་པོ་ཅན་ཞིག་ཡིན། ངས་ཀྱང་ཁོང་གི་གསུང་སྐད་ཙམ་རྣ་ལམ་དུ་ཐོས་འདུག་ན་སེམས་ལ་སྤྲོ་མོ་འདྲ་རེད། དེས་ན་མང་པོ་ཞིག་སྒྲོག་བཞིན་པ་ཡིན་གསུངས་སོང༌། དེས་ནི་དེང་སང་གི་བླ་མ་གླ་བའི་འདུ་ཤེས་དང་ཆོས་ལ་གླ་རྩིའི་བསམ་པ་ཅན་གྱི་སློབ་གཉེར་བ་མང་པོ་ཞིག་ཡོངས་སུ་ཟིལ་གྱིས་མནན་པ་ཡིན་ཏེ། ཉིན་གྱི་ཁར་མཚན་བསྣན་ནས་གཞུང་ལུགས་ཁྲིད་པར་མ་ཟད། འགྲོ་ལུགས་འདུག་སྟངས་ཡན་ཆད་ཕ་མས་བུ་ཕྲུག་ལ་སློབ་པ་ལྟར་བྱས་ཀྱང༌། ཤེས་མེད་ཅི་མི་སྙམ་པའི་དཔེ་ཆ་བ་སྐད་པ་མང་པོ་ཞིག་མཐོང་རྒྱུ་འདུག་སྟེ། རྟེན་འབྲེལ་མགོ་ནས་མ་འགྲིག་ཟེར་བ་དེ་ངེས་པར་ཡིན་པ་འདྲ། དགེ་རྒན་བསྟེན་ཚུལ་དྲག་ཤོས་ཡིན་ཟེར་བའི་ནང་ན་ཡང༌། དགེ་རྒན་བཀའ་དྲིན་ཅན་གྱི་གསུང་སྐད་རྣ་བར་གོ་ན། སྐྱོ་བ་སེལ་བྱེད་དུ་འགྲོ་བཞིན་པ་ཇི་འདྲ་འདུག །གླུ་གཞས་དང་སྒྲ་སྙན་མོ་ཞིག་བཏང་ན་ཡིད་གཡོ་གཡོ་བ་བྱེད་པ་ལས། ངལ་གསོ་དུས་དང་རང་དགར་འདུག་དུས་དགེ་རྒན་བཀའ་དྲིན་ཅན་གྱི་གསུང་སྐད་བསྒྲགས་ནས་ཡིད་སེམས་གསོ་མཁན་མང་པོ་ནི་ཡོད་པར་མི་སེམས་ལ། ཁྱད་པར་དུ་ལོག་པར་རྟོག་པའི་མིག་ཅན་ཕྲན་ལྟ་བུས་ཀྱང་ད་སྔོན་བགྲང་བྱ་ཧ་ཅང་མང་པོ་ཞིག་ལ་ཆོས་ཁྲིད་ཞུས་འོང་བ་རེད་དེ། དེང་སང་ཁོང་ལྟ་བུ་ཟ་ངེ་ཟིང་ངེ་ལ་ཐུགས་གཏིང་ནས་ལོགས་པ་གཞན་སུ་ཡོད་སྙམ་པ་ཞིག་ཡིན། གླུ་གཞས་དང་སྒྲ་སྙན་མོ་སྒྲོག་པ་དང་གློག་བརྙན་ལེའུ་གཅིག་ལ་ལྟ་བ་ཕར་ཞོག །ཐ་ན་ཁོང་གི་ཕྱག་ཁྱེར་ཁ་པར་དང་རྩིས་འཕྲུལ་ནང་དུ་དེ་ཚོ་རྡོག་གཅིག་བླངས་པ་ཙམ་ཡང་ཡོད་མྱོང་མི་སྲིད་པ་ཡིན། སློབ་མ་རྣམས་དང་སྤང་ཐང་ན་སྐྱོ་བསང་ལ་ཕྱིན་སྐབས་སུ། རྩེད་མོ་ཁ་ཤས་ལ་ལྟ་བ་དེ་ཡང་སློབ་མ་རྣམས་ཀྱི་ངོར་མཐུན་འཇུག་བྱས་ཏེ་བཞུགས་པ་ལས། ཐུགས་མཚར་སྣང་དང་སྤྲོ་བ་ཤུགས་འབྱུང་དུ་མེད་པ་བལྟས་ཚོད་ཙམ་གྱིས་མངོན་ཐུབ་པ་ཞིག་ཡོད། རྒྱུན་ལྡན་དུ་བཞུགས་དུས་ཀྱང༌། རང་ཅག་ལ་མཚོན་ན་ཁམས་བསང་འདྲ་བྱས་ཏེ། ཕྱི་རོལ་ཀྱི་ཡུལ་ལ་བག་ཡངས་ཀྱི་རྣམ་པ་ལན་རེ་བསྟེན་ན་འཕྲོད་མོ་འདྲ་ཡོད་མོད། བཤེས་གཉེན་རིན་པོ་ཆེ་གང་ནི་ནང་དུ་ཡང་དག་སེམས་པ་ཁོ་ནས་སྐྱོ་བ་སེལ་བ་དང་བག་ཡངས་བྱེད་མཁན་ཞིག་ཡིན་གྱི། ཐ་མལ་རང་ཅག་གིས་དགའ་རྐྱེན་སྡུག་རྐྱེན་ཐམས་ཅད་ལས་རྣམ་པར་ཐར་བའི། ཐུགས་ངོགས་ཀྱི་འཚོ་བ་བསམ་གྱིས་མི་ཁྱབ་པ་ཞིག་གི་དགའ་སྟོན་གྱིས་རྒྱུད་ཡོངས་སུ་འགེངས་པར་རྒྱུས་ཡོད་ཐམས་ཅད་ཀྱིས་ཤེས་ཐུབ་རྒྱུ་ཞིག་ཡིན་པས། ཧ་ཅང་སྤོམ་ཡོར་གྱིས་བསྟོད་པ་བྱས་བཞག་པ་ཞིག་ལར་ནས་མིན་ནོ། །ཞེས་པ་ཞར་ལ་རང་གི་འཆར་སྣང་གི་སྐད་ཆ་ཙམ་འདིར་ཐལ་བ་ཡིན། ཕྱི་ལོ། ༢༠༠༨ བོད་རབ་གནས་ས་བྱི་ལོར་བཤེས་གཉེན་རིན་པོ་ཆེ་གང་ཉིད་ཀྱིས་ལུང་སྐྱ་དགོན་དུ་མཛད་འཕྲིན་རྒྱ་ཆེན་མཛད་པའི་སྐབས་སུ། བཀའ་དྲིན་ཆེ་བའི་དགེ་རྒན་བློ་བཟང་དགེ་འདུན་སྐུ་བསྙུན་བཞེས་ཏེ་དགོངས་པ་ཆོས་ཀྱི་དབྱིངས་སུ་བསྡུས། སྐུ་གྲོངས་རྒྱུར་ཐུག་ཐག་ཆོད་པའི་དུས་ཙམ་ན། བཤེས་གཉེན་རིན་པོ་ཆེ་ཉིད་ལ་ཕྱག་ཁྱེར་ཁ་པར་བརྒྱུད་དེ། ཁོ་བོ་ཡིན་ན་ནད་ཅིག་ཐེབས་པས་ད་ཕན་ཚེ་འདིར་འགྲོ་དོན་རྒྱ་ཆེན་འབྱུང་རྒྱུ་དཀའ་མོ་རེད་དེ། ཁྱོད་ཡིན་ན་མཛད་པ་འཕྲིན་ལས་འགྲོ་དོན་རྒྱ་ཆེན་འབྱུང་གིན་འདུག །མ་འོངས་པར་ཤུགས་བརྒྱབ་ནས་བསྟན་པ་དང་འགྲོ་བའི་བདེ་སྐྱིད་ཀྱི་དོན་དུ་ཕྱག་ལས་ལྷོད་མི་ཉན་ཞེས་སོགས། བླ་སློབ་ཐུགས་ཡིད་འདྲེས་ཤིང་བསྟན་དང་འགྲོ་བ་འབའ་ཞིག་ལ་སེམས་པའི་ངེས་པ་དོན་གྱི་སྐྱེས་བུ་དམ་པའི་རང་རྟགས་མངོན་པའི་གསུང་གི་ཐ་མ་བསྩལ། ཕྱི་ལོ། ༢༠༠༡ རབ་གནས་ལྕགས་སྦྲུལ་ལོ་སྟེ། དབུ་མ་གསར་བའི་ལོ་ནས་སྒོ་མང་མཁན་ཡོན་ཏན་དམ་ཆོས་མཆོག་ཀྱང་བསམ་སྦྱོར་གཉིས་ཀྱིས་ཚུལ་བཞིན་དུ་བསྟེན་པར་བྱས། དགེ་རྒན་འདིས་ནི་བླ་སློབ་ཀྱི་འབྲེལ་བ་མ་བྱུང་གོང་ནས་བཤེས་གཉེན་རིན་པོ་ཆེ་གང་ལ་ཐུགས་བརྩིས་ཆེ་བའི་གསུང་གླེང་མང་པོ་ཕེབས་མྱོང་མཁན་ཞིག་ཡིན་འདུག་ཅིང༌། དུས་ཕྱིས་སུ་ཡང་ཁ་ཁོག་མི་འཛིན་པར་བཀའ་སློབ་གསུང་མོལ་མང་པོས་སྒོ་ནས་ཉེ་བར་སྐྱོང་མཁན་ཞིག་ཡིན་པར་མ་ཟད། སུ་ལ་སྐད་ཆ་གསུང་ན་འཇིག་རྟེན་མཐུན་འཇུག་མེད་པར་ཆོས་པ་གཤའ་མའི་ངང་ཚུལ་ལྷན་སྐྱེས་སུ་མངའ་ཞེས། ཞལ་སྔ་ནས་ཡང་ཡང་གསུངས་པ་ཐོས། བཤེས་གཉེན་རིན་པོ་ཆེ་གང་ཉིད་ཀྱིས་ཆོས་ཐང་དགོན་པར་མཛད་འཕྲིན་སྐྱོང་སྐབས། ཕྱི་ལོ། ༢༠༡༦ རབ་གནས་མེ་སྤྲེལ་ལོའི་སྨད་ཅིག་ལ། མཁན་རིན་པོ་ཆེ་ཡོན་ཏན་དམ་ཆོས་མཆོག་ཞིང་མ་བརྗེས་པའི་ཉིན་ཤས་གོང་དུ། ཁོང་གི་ཉེ་གནས་ཀྱི་ཕྲིན་ཕྲན་ལས་གསུང་སྐད་གསལ་ལ་མི་གསལ་བའི་མཚམས་སུ་བཀའ་གསུང་འགའ་བསྐུར་བ་ཕྲན་ནས་ཐོས་པར། རྒྱལ་བ་རྫོགས་པའི་སངས་རྒྱས་ཀྱི་ལུང་རྟོགས་ཀྱི་བསྟན་པ་རིན་པོ་ཆེ་འདི་ཉིད་འཇིག་རྟེན་གྱི་ཁམས་འདིར་ཕན་བདེ་འབྱུང་བའི་གཞི་གཅིག་པུ་ལགས་ན། ད་ལྟའི་ཆར་བསྟན་པའི་སྙིང་པོ་ཉམ་ཆུང་ཞིང་ཉག་ཕྲ་བའི་གནས་སུ་ལྷགས་འདུག །ཁྱེད་ཀྱིས་ནི་ཐུགས་བསྐྱེད་བླ་ན་མེད་པའི་ངོས་ནས་བསྟན་འགྲོའི་དོན་དུ་འབད་འབུངས་ཡོད་དགུ་བྱེད་བཞིན་བདོག་པས། ཞུ་དགོས་གང་ཡང་མི་འཚལ་ཡང༌། རྒྱལ་བའི་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་བྱེད་པར་ཐུགས་ལྷོད་མ་གཏོང་ཞེས་ཞུ་འདོད་པ་དེ་ཁ་བརྡ་ཞིག་བྱས་པ་ཡིན། ཞེས་བཀའ་གསུང་གི་ཐ་མ་ཕུལ་འདུག་ལ། བཀའ་སློབ་དེ་ཐོས་ཕྲལ་བཤེས་གཉེན་རིན་པོ་ཆེ་ཉིད་ནས་སྤྱན་ཆབ་ཐེངས་མང་པོ་བཏོན་ཞིང༌། སྤྱིར་རྒྱལ་བའི་བསྟན་པ་རིན་པོ་ཆེ་ལ་ཤུགས་ལོས་རྒྱག་སྟེ། ད་སྔོན་ཡན་ཆད་ལ་ནུས་ཤུགས་ཡོད་དགུས་ནུས་པ་ཅི་ཡོད་ཅིག་སྒྲུབ་པའི་ཁུལ་བྱས་ཡོད། ད་ནི་བྱ་བ་ཇེ་ཉུང་དུ་བཏང་ནས་རང་གི་མཚམས་བསྙེན་སྒྲུབ་ཀྱི་ལས་ཀ་རེ་ལ་འབུངས་དགོས་མིན་བསམ་གྱིན་ཡོད་དེ། བླ་མ་བཀའ་དྲིན་ཅན་དག་གིས་གཅིག་རྗེས་གཉིས་མཐུད་ཀྱིས་བསྟན་འགྲོའི་ལས་དོན་བྱེད་དགོས་ཞེས་པའི་གསུང་གི་ཁུར་སྤྱི་བོར་འབོགས་ཀྱིན་འདུག་ན། བཀའ་དྲིན་འཁོར་མཐའ་བྲལ་བའི་དགེ་རྒན་དག་གི་གསུང་ལྡོག་པ་གཏན་ནས་མི་ཕོད་ཅེས་གསུངས་སོ། །དེ་ལྟར་བླ་སློབ་དགོངས་པ་ཆོས་དང་མཐུན་པར་དད་པ་དག་སྣང་གིས་སྣང་བ་འགྱུར་བཞིན་དུ། གཞུང་ཆེན་སློབ་གཉེར་གྱི་ཞར་ལ་དགུང་གྲངས་བཅོ་བརྒྱད་ནས་ཕར་ཕྱིན་དམ་བཅའི་བར་བགྲང་བྱ་བཅུ་བཞིར་ཉེ་བའི་རིང༌། འཇམ་དབྱངས་བསྙེན་པ་ཨ་ར་པ་ཙཱའི་བཟླས་པ་དུང་ཕྱུར་གཅིག་ལྷག་བྱས། མཚུངས་མེད་བཤེས་གཉེན་རིན་པོ་ཆེ་གང་ཉིད་ནི། ད་ལྟའི་ཐོས་བསམ་པ་ཕལ་གྱིས་དཔེ་ཀློག་རེ་དང་ཆོས་སྐད་ཐན་ཐུན་བྱང་རབ་ཙམ་གྱིས་འགྲན་པའི་ཟླ་མེད་པ། ནང་དུ་འོད་གསལ་བདེ་སྟོང་གི་ཉམས་མྱོང་རྒྱུན་ཆད་མེད་པ། དུས་སྐབས་ཐམས་ཅད་དུ་ཚོགས་གསོག་སྒྲིབ་སྦྱང་གི་མཛད་པ་ལྷོད་མ་མྱོང་བ། ཡི་དམ་ལྷག་པའི་ལྷའི་རྣལ་འབྱོར་དང་བཟླས་བརྗོད་ཆགས་མེད་དུ་མཛད་པ་ཞིག་ཡིན་པས། སྔོན་བྱོན་དམ་པ་གོང་མའི་སློབ་གཉེར་གནང་སྟངས་ཐོས་སྒོམ་ཟུང་དུ་འཇུག་པ་ཟཻར་བ་དེ་འདི་འདྲ་ཞིག་ཡིན་ངེས་སོ། །རང་རེ་ཐོས་བསམ་སྒོམ་གསུམ་བྱེད་པོ་སུ་ཡིན་ན་ཡང་ཡ་བྲལ་རྐྱང་བ་ཞིག་ཏུ་མ་སོང་བར་འདི་ལྟའི་རྣམ་ཐར་དངོས་སུ་ལག་ལེན་ལ་མ་ཐེབས་ཀྱང༌། བསམ་པ་དེའི་ཕྱོགས་སུ་འཁོར་ཐུབ་པ་ཞིག་ཅིས་ཀྱང་མེད་དུ་མི་རུང་སྟེ། རྗེ་སྒམ་པོ་ལས། ལར་སློབ་མ་བྱ་བ་དེ་བླ་མའི་རྣམ་ཐར་རྗེས་སུ་སློབ་པ་བྱ་བ་ཡིན་གསུངས་པ་ལྟར་རོ། །

གཟུར་གནས་བློ་ལྡན་དོན་གཉེར་བརྩོན་པ་དང༌། །

བཀའ་བཞིན་སྒྲུབ་ལ་སྙེལ་མེད་རང་བཞིན་སོགས། །

ཚད་ལྡན་སློབ་མའི་མཚན་ཉིད་ཅི་ཙམ་ཀུན། །

གཅིག་ཏུ་བཟླུམས་པ་འདི་འདྲ་མ་ལགས་སམ།

སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་ཡོངས་འཛིན་དམ་པའི་ཞབས་ཟུང་གཙུག་ཏུ་ཕོག་སྟེ་གུས་པ་ཆེན་པོས་ཚུལ་བཞིན་བསྟེན་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་པའོ། །