ལྔ་བ་གཅིག་དང་ཐ་དད་ཀྱི་རྣམ་བཞག་བཤད་པ།

ལྔ་བ་གཅིག་དང་ཐ་དད་ཀྱི་རྣམ་བཞག་བཤད་པ་ལ།

རྣམ་འགྲེལ་ལས། དེ་ཕྱིར་ཁྱད་པར་གང་གི་ཆོས། །གང་གི་གོ་བར་གྱུར་བ་དེ། །དེ་ལས་གཞན་གྱིས་ནུས་མ་ཡིན། །དེས་ན་ཐ་དད་རྣམ་པར་གནས། །ཞེས་ཐ་དད་ཀྱི་དོན་དང། གང་ཕྱིར་དངོས་ཀུན་རང་བཞིན་གྱི། །རང་རང་ངོ་བོ་ལ་གནས་ཕྱིར། །མཐུན་དངོས་གཞན་གྱི་དངོས་དག་ལ། །ལྡོག་པ་ལ་ནི་རྟེན་པ་ཅན། །ཞེས་པའི་རིགས་གཅིག་དང་ཐ་དད་ཀྱི་དོན་བཤད། དངོས་པོའི་ངོ་བོ་ཉིད་གཅིག་ཕྱིར། །ངོ་བོ་ཐ་དད་བློ་གང་བློས། །ཞེས་པས་ངོ་བོ་གཅིག་དང་ཐ་དད་ཀྱི་དོན་བཤད་པ་སོགས་སོ། །དེའི་མཐའ་དཔྱད་པ་ལ། དགག་བཞག་སྤོང་གསུམ་ལས།དང་པོ་ནི། ཁ་ཅིག་ན་རེ། གཞི་གྲུབ་ན་ངོ་བོ་གཅིག་དང་ཐ་དད་གང་རུང་ཡིན་པས་ཁྱབ་ཟེར་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ངོ་བོ་གཅིག་དང་ཐ་དད་གང་རུང་ཡིན་པར་ཐལ། གཞི་གྲུབ་པའི་ཕྱིར། ཁྱབ་པ་ཁས། མ་གྲུབ་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། གཞི་གྲུབ་པར་ཐལ། ཤེས་བྱའི་དབྱེ་བ་ཡིན་པའི་ཕྱིར། མ་གྲུབ་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ཤེས་བྱའི་དབྱེ་བ་ཡིན་པར་ཐལ། ཤེས་བྱ་ཁྱོད་ཀྱི་དབྱེ་གཞི་ཡིན་པའི་ཕྱིར། བདེན་གཉིས་གསལ་བའི་ཉི་མ་ལས། དབྱེ་གཞི་ནི་ཤེས་བྱ་ཙམ་མོ། །ཞེས་གསུངས་པའི་ཕྱིར། རྩ་བར་འདོད་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ངོ་བོ་གཅིག་དང་ཐ་དད་གང་རུང་མ་ཡིན་པར་ཐལ། ངོ་བོ་གཅིག་མ་ཡིན་པ་གང་ཞིགངོ་བོ་ཐ་དད་ཀྱང་མ་ཡིན་པའི་ཕྱིར། རྟགས་དང་པོ་མ་གྲུབ་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ངོ་བོ་གཅིག་མ་ཡིན་པར་ཐལ། ངོ་བོ་གཅིག་པ་བཀག་པའི་ཐ་དད་ཡིན་པའི་ཕྱིར། རྟགས་གཉིས་པ་མ་གྲུབ་ན། དོན་དམ་བདེན་པ་དང་ཀུན་རྫོབ་བདེན་པ་གཉིས་ཆོས་ཅན། ངོ་བོ་ཐ་དད་མ་ཡིན་པར་ཐལ། གཅིག་ཤོས་ཆོས་ཅན་དང་གཅིག་ཤོས་ཆོས་ཉིད་ཡིན་པའི་ཕྱིར། ཁ་ཅིག་ན་རེ། བདག་ཉིད་གཅིག་ཡིན་ན་གཅིག་ཡིན་པས་ཁྱབ་ཟེར་ན། བྱས་མི་རྟག་གཉིས་ཆོས་ཅན། གཅིག་ཡིན་པར་ཐལ། བདག་ཉིད་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བྱས་མི་རྟག་གཉིས་ཆོས་ཅན། བདག་ཉིད་གཅིག་ཡིན་པར་ཐལ། ངོ་བོ་གཅིག་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བདག་ཉིད་གཅིག་པ་ངོ་བོ་གཅིག་པ་རང་བཞིན་གཅིག་པ་རྣམས་དོན་གཅིག་ཡིན་ཁྱབ་མཉམ་ཡིན་པའི་ཕྱིར། རྩ་བར་འདོད་ན། བྱས་མི་རྟག་གཉིས་ཆོས་ཅན། གཅིག་མ་ཡིན་པར་ཐལ། ཕན་ཚུན་ཐ་དད་ཡིན་པའི་ཕྱིར། མ་གྲུབ་ན། བྱས་མི་རྟག་གཉིས་ཕན་ཚུན་ཐ་དད་ཡིན་པར་ཐལ། བྱས་པ་མི་རྟག་པ་དང་ཐ་དད། མི་རྟག་པ་བྱས་པ་དང་ཐ་དད་ཡིན་པའི་ཕྱིར། ཁ་ཅིག་ན་རེ། ངོ་བོ་གཅིག་ཡིན་ན་རྫས་གཅིག་ཡིན་པས་ཁྱབ་ཟེར་ན། ཡོད་པ་དང་ཤེས་བྱ་གཉིས་ཆོས་ཅན། རྫས་གཅིག་ཡིན་པར་ཐལ། ངོ་བོ་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཡོད་པ་དང་ཤེས་བྱ་གཉིས་ཆོས་ཅན། ངོ་བོ་གཅིག་ཡིན་པར་ཐལ། རང་བཞིན་གཅིག་ཡིན་པའི་ཕྱིར། མ་གྲུབ་ན། ཡོད་པ་དང་ཤེས་བྱ་གཉིས་རང་བཞིན་གཅིག་ཡིན་པར་ཐལ། ཡོད་པ་ཤེས་བྱ་དང་རང་བཞིན་གཅིག་ཡིན་པ་གང་ཞིག ཤེས་བྱ་ཡོད་པ་དང་བདག་ཉིད་གཅིག་ཡིན་པའི་ཕྱིར། རྟགས་དང་པོ་མ་གྲུབ་ན། ཡོད་པ་ཆོས་ཅན། ཤེས་བྱ་དང་རང་བཞིན་གཅིག་ཡིན་པར་ཐལ། དོན་དམ་མ་ཡིན་པའི་ཤེས་བྱ་ཡིན་པའི་ཕྱིར། རྟགས་གཉིས་པ་མ་གྲུབ་ན། ཤེས་བྱ་ཆོས་ཅན། ཡོད་པ་དང་རང་བཞིན་གཅིག་ཡིན་པར་ཐལ། དོན་དམ་མ་ཡིན་པའི་ཡོད་པ་ཡིན་པའི་ཕྱིར། །རྩ་བར་འདོད་ན། ཡོད་པ་དང་ཤེས་བྱ་གཉིས་ཆོས་ཅན། རྫས་གཅིག་མ་ཡིན་པར་ཐལ། རྫས་མ་ཡིན་པའི་ཕྱིར། མ་གྲུབ་ན། ཡོད་པ་དང་ཤེས་བྱ་གཉིས་ཆོས་ཅན། རྫས་མ་ཡིན་པར་ཐལ། བཏགས་ཡོད་འབའ་ཞིག་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། བཏགས་ཡོད་འབའ་ཞིག་པ་དང་རྫས་གཉིས་འགལ་བའི་ཕྱིར། ཁ་ཅིག་ན་རེ། གཟུགས་དང་རྫས་གཅིག་ཡིན་ན་རྫས་གཅིག་ཡིན་པས་ཁྱབ་ཟེར་ན། ཀ་བ་དང་བུམ་པ་གཉིས་ཆོས་ཅན། རྫས་གཅིག་ཡིན་པར་ཐལ། གཟུགས་དང་རྫས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཀ་བ་དང་བུམ་པ་གཉིས་ཆོས་ཅན། གཟུགས་དང་རྫས་གཅིག་ཡིན་པར་ཐལ། གཟུགས་ཀྱི་བྱེ་བྲག་ཡིན་པའི་ཕྱིར། རྩ་བར་འདོད་ན། ཀ་བ་དང་བུམ་པ་གཉིས་ཆོས་ཅན། རྫས་གཅིག་མ་ཡིན་པར་ཐལ། རྫས་ཐ་དད་ཡིན་པའི་ཕྱིར། མ་གྲུབ་ན། ཀ་བ་དང་བུམ་པ་གཉིས་ཆོས་ཅན། རྫས་ཐ་དད་ཡིན་པར་ཐལ། རྫས་ཡོད་གང་ཞིག རྫས་ཕན་ཚུན་འབྲེལ་མེད་དོན་གཞན་ཡིན་པའི་ཕྱིར། ཁ་ཅིག་ན་རེ། ཤེས་བྱ་དང་བདག་ཉིད་གཅིག་ཡིན་ན་བདག་ཉིད་གཅིག་ཡིན་པས་ཁྱབ་ཟེར་ན། ཀ་བ་དང་བུམ་པ་གཉིས་ཆོས་ཅན། བདག་ཉིད་གཅིག་ཡིན་པར་ཐལ། ཤེས་བྱ་དང་བདག་ཉིད་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཀ་བ་དང་བུམ་པ་གཉིས་ཆོས་ཅན། ཤེས་བྱ་དང་བདག་ཉིད་གཅིག་ཡིན་པར་ཐལ། ཤེས་བྱ་དང་བདག་ཉིད་སོ་སོ་མ་ཡིན་པའི་གཟུགས་ཡིན་པའི་ཕྱིར། ཁྱབ་སྟེ། ཤེས་བྱ་དང་བདག་ཉིད་སོ་སོ་མ་ཡིན་པའི་ཆོས་དེ་ཤེས་བྱ་དང་བདག་ཉིད་གཅིག་གི་མཚན་ཉིད་ཡིན་པའི་ཕྱིར། རྩ་བར་འདོད་ན། ཀ་བ་དང་བུམ་པ་གཉིས་ཆོས་ཅན། བདག་ཉིད་གཅིག་མ་ཡིན་པར་ཐལ། འབྲེལ་མེད་དོན་གཞན་ཡིན་པའི་ཕྱིར། ཁ་ཅིག་ན་རེ། རིགས་གཅིག་ཡིན་ན་བདག་ཉིད་གཅིག་ཡིན་པས་ཁྱབ་ཟེར་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། བདག་ཉིད་གཅིག་ཡིན་པར་ཐལ། རིགས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། རིགས་གཅིག་ཡིན་པར་ཐལ། ལྡོག་པ་རིགས་གཅིག་ཡིན་པའི་ཕྱིར། མ་གྲུབ་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། ལྡོག་པ་རིགས་གཅིག་ཡིན་པར་ཐལ། གང་ཟག་གང་དང་གང་གིས་ཡིད་གཏད་པས་མཐོང་ཙམ་ཉིད་ནས་འདི་དང་འདི་འདྲའོ་སྙམ་པའི་བློ་ངང་གིས་སྐྱེད་ནུས་པའི་ཆོས་ཡིན་པའི་ཕྱིར། རྩ་བར་འདོད་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། བདག་ཉིད་གཅིག་མ་ཡིན་པར་ཐལ། བདག་ཉིད་ཐ་དད་ཡིན་པའི་ཕྱིར། མ་གྲུབ་ན། བ་ལང་དཀར་ཟལ་དང་ནག་རྒུར་གཉིས་ཆོས་ཅན། བདག་ཉིད་ཐ་དད་ཡིན་པར་ཐལ། ཕན་ཚུན་འབྲེལ་མེད་དོན་གཞན་ཡིན་པའི་ཕྱིར། ཁ་ཅིག་ན་རེ། ཤེས་བྱར་རིགས་གཅིག་ཡིན་ན་རིགས་གཅིག་ཡིན་པས་ཁྱབ་ཟེར་ན། རྟ་དང་བ་ལང་གཉིས་ཆོས་ཅན། རིགས་གཅིག་ཡིན་པར་ཐལ། ཤེས་བྱར་རིགས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། རྟ་དང་བ་ལང་གཉིས་ཆོས་ཅན། ཤེས་བྱར་རིགས་གཅིག་པར་ཐལ། ཁྱོད་ཤེས་བྱ་ཡིན་པར་རིགས་འདྲ་བའི་ཕྱིར། རྩ་བར་འདོད་ན། རྟ་དང་བ་ལང་གཉིས་ཆོས་ཅན། རིགས་གཅིག་མ་ཡིན་པར་ཐལ། རིགས་ཐ་དད་ཡིན་པའི་ཕྱིར། མ་གྲུབ་ན། རྟ་དང་བ་ལང་གཉིས་ཆོས་ཅན། རིགས་ཐ་དད་ཡིན་པར་ཐལ། རིགས་མི་མཐུན་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། རིགས་མི་མཐུན་པ་ཡིན་པར་ཐལ། རིགས་མི་འདྲ་བ་ཡིན་པའི་ཕྱིར། མ་གྲུབ་ན།སྤྱིར་རྟ་དང་བ་ལང་གཉིས་རིགས་མི་འདྲ་བར་ཡིན་པར་ཐལ། དེ་གཉིས་རིགས་མི་འདྲ་བར་མི་འཇོག་ན་གཞན་རིགས་མི་འདྲ་བ་འཇོག་རྒྱུ་མི་རྙེད་པའི་ཕྱིར། ཁ་ཅིག་ན་རེ། རིགས་གཅིག་ཡིན་ན་སྒྲུབ་པར་གྱུར་བའི་ལྡོག་པ་རིགས་གཅིག་ཡིན་པས་ཁྱབ་ཟེར་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། སྒྲུབ་པར་གྱུར་བའི་ལྡོག་པ་རིགས་གཅིག་ཡིན་པར་ཐལ། རིགས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། རིགས་གཅིག་ཡིན་པར་ཐལ། དགག་བྱ་རིགས་གཅིག་ཡིན་པའི་ཕྱིར། མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། དགག་བྱ་རིགས་གཅིག་ཡིན་པར་ཐལ། ཐ་དད་གང་ཞིག དགག་བྱ་རིགས་གཅིག་བཀག་ཙམ་གྱི་མེད་དགག་ཡིན་པའི་ཕྱིར། རྟགས་དང་པོ་སླ། གཉིས་པ་མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། དགག་བྱ་རིགས་གཅིག་བཀག་ཙམ་གྱི་མེད་དགག་ཡིན་པར་ཐལ། དགག་བྱ་བདག་བཀག་ཙམ་གྱི་མེད་དགག་ཡིན་པའི་ཕྱིར། མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན།དགག་བྱ་བདག་བཀག་ཙམ་གྱི་མེད་དགག་ཡིན་པར་ཐལ། ཁྱོད་ཀྱི་དགག་བྱ་བདག་མི་འཇོག་ན་གཞན་འཇོག་རྒྱུ་མེད་པ་གང་ཞིག ཁྱོད་མེད་དགག་ཡིན་པའི་ཕྱིར། རྩ་བར་འདོད་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། སྒྲུབ་པར་གྱུར་བའི་ལྡོག་པ་རིགས་གཅིག་མ་ཡིན་པར་ཐལ། སྒྲུབ་པ་མ་ཡིན་པའི་ཕྱིར། མ་གྲུབ་ན། བུམ་པའི་བདག་མེད་དང་ཀ་བའི་བདག་མེད་གཉིས་ཆོས་ཅན། སྒྲུབ་པ་མ་ཡིན་པར་ཐལ། དགག་པ་ཡིན་པའི་ཕྱིར། མ་གྲུབ་ན། དེ་ཆོས་ཅན། དགག་པ་ཡིན་པར་ཐལ། མེད་དགག་ཡིན་པའི་ཕྱིར། གཞན་ཡང་བུམ་པའི་ནམ་མཁའ་དང་ཁང་བའི་ནམ་མཁའ་ལ་རིགས་བསྒྲེ་བར་བྱའོ། །ཁ་ཅིག་གྲུབ་བདེ་གཅིག་ཡིན་ན། གྲུབ་བདེ་རྫས་གཅིག་ཡིན་པས་ཁྱབ་ཟེར་ན། བུ་རམ་གྱི་དྲི་རོ་གཉིས་ཆོས་ཅན། གྲུབ་བདེ་རྫས་གཅིག་ཡིན་པར་ཐལ། གྲུབ་བདེ་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། བུ་རམ་གྱི་དྲི་རོ་གཉིས་ཆོས་ཅན། གྲུབ་བདེ་གཅིག་ཡིན་པར་ཐལ། གྲུབ་པ་དུས་མཉམ་གནས་པ་དུས་མཉམ་ལྡོག་པ་དུས་མཉམ་ཡིན་པའི་ཕྱིར། མ་གྲུབ་ན། བུ་རམ་ཆོས་ཅན། ཁྱོད་ཀྱི་དྲི་རོ་གཉིས་གྲུབ་པ་དུས་མཉམ་གནས་པ་དུས་མཉམ་ལྡོག་པ་དུས་མཉམ་ཡིན་པར་ཐལ། ཁྱོད་རྡུལ་རྫས་བརྒྱད་འདུས་ཀྱི་གོང་བུ་ཡིན་པའི་ཕྱིར། རྩ་བར་འདོད་ན། བུ་རམ་གྱི་དྲི་རོ་གཉིས་ཆོས་ཅན། གྲུབ་བདེ་རྫས་གཅིག་མ་ཡིན་པར་ཐལ། རྫས་གཅིག་མ་ཡིན་པའི་ཕྱིར། མ་གྲུབ་ན། བུ་རམ་གྱི་དྲི་རོ་གཉིས་ཆོས་ཅན། རྫས་གཅིག་མ་ཡིན་པར་ཐལ། རྫས་ཐ་དད་ཡིན་པའི་ཕྱིར། མ་གྲུབ་ན། བུ་རམ་ཆོས་ཅན། ཁྱོད་ཀྱི་དྲི་རོ་གཉིས་རྫས་ཐ་དད་ཡིན་པར་ཐལ། ཁྱོད་རྡུལ་རྫས་བརྒྱད་འདུས་ཀྱི་གོང་བུ་ཡིན་པའི་ཕྱིར། ཁ་ཅིག་ན་རེ། རྫས་རིགས་གཅིག་ཡིན་ན་རྫས་གཅིག་ཡིན་པས་ཁྱབ་ཟེར་ན། ཉེར་ལེན་ནས་ལྡོག་གཅིག་ལས་སྐྱེས་པའི་ནས་འབྲུ་ཆེ་ཆུང་གཉིས་ཆོས་ཅན། རྫས་གཅིག་ཡིན་པར་ཐལ། རྫས་རིགས་གཅིག་ཡིན་པའི་ཕྱིར། ཁྱབ་པ་ཁས། མ་གྲུབ་ན། ཉེར་ལེན་ནས་ལྡོག་གཅིག་ལས་སྐྱེས་པའི་ནས་འབྲུ་ཆེ་ཆུང་གཉིས་ཆོས་ཅན། རྫས་རིགས་གཅིག་ཡིན་པར་ཐལ། ཐ་དད་གང་ཞིག རང་གི་ཉེར་ལེན་གཅིག་ལས་སྐྱེས་པ་ཡིན་པའི་ཕྱིར། མ་ཁྱབ་ན་ཁྱབ་པ་ཡོད་པར་ཐལ། ཆོས་དེ་གཉིས་རྫས་རིགས་གཅིག་མི་གཅིག་ཉེར་ལེན་གཅིག་མི་གཅིག་ལ་བྱེད་དགོས་པའི་ཕྱིར། རྩ་བར་འདོད་ན། ཉེར་ལེན་ནས་ལྡོག་གཅིག་ལས་སྐྱེས་པའི་ནས་འབྲུ་ཆེ་ཆུང་གཉིས་ཆོས་ཅན། རྫས་གཅིག་མ་ཡིན་པར་ཐལ། བདག་ཉིད་གཅིག་མ་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། བདག་ཉིད་གཅིག་མ་ཡིན་པར་ཐལ། ངོ་བོ་ཐ་དད་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། ངོ་བོ་ཐ་དད་ཡིན་པར་ཐལ། ཕན་ཚུན་འབྲེལ་མེད་དོན་གཞན་ཡིན་པའི་ཕྱིར་རོ། །