ལྔ་བ་དབྱེ་བ་སོ་སོའི་རང་བཞིན།

ལྔ་བ་དབྱེ་བ་སོ་སོའི་རང་བཞིན་ནི།

དགོས་འབྲེལ་ཡན་ལག་བཞི་པོ་རེ་རེ་ལ་གཉིས་གཉིས་སུ་ཕྱེ་བས་བརྒྱད་ཡོད་པ་ལས། བརྗོད་བྱ་ལ་གཉིས་ཏེ། དངོས་ཀྱི་བརྗོད་བྱ་དང༌།ཞེན་པའི་བརྗོད་བྱའོ། ། དགོས་པ་ལ་གཉིས་ཏེ། དགོས་པ་དོན་གྱི་ཆོས་སུ་བཞག་པ་དང༌། དགོས་པ་ཤེས་པའི་ཆོས་སུ་བཞག་པའོ། །ལྡོག་པ་ཐ་དད་ཀྱི་སྒོ་ནས་ཕྱེ་བའོ། །འབྲེལ་པ་ལ་གཉིས་ཏེ། བསྟན་བཅོས་དང་དགོས་པ་འབྲེལ་པ་དང༌། དགོས་པ་དང་ཉིང་དགོས་འབྲེལ་པའོ། །ཉིང་དགོས་ལ་གཉིས་ཏེ། དགོས་པའི་དགོས་པ་གནས་སྐབས་པ་དང༌། དགོས་པའི་དགོས་པ་མཐར་ཐུག་པའོ། །དེ་ཡང་ཟག་མེད་ཀྱི་ལམ་དང་མྱ་ངན་ལས་འདས་པ་སྟེ་གོ་རིམ་བཞིན་ནོ། །ཞེས་མཚོ་ཊཱིཀ་ལས་སོ། །དྲུག་པ་ངག་འདིས་དགོས་འབྲེལ་བསྟན་ལུགས་ནི། བརྗོད་བྱ་དང་ཉིང་དགོས་ནི། ཚུལ་ཁྲིམས་ཀྱི་ཞེས་པ་དང༌། ངེས་པར་འབྱུང་བའི་ཞེས་པས་དངོས་སུ་བསྟན་ལ། བརྗོད་བྱ་བསྟན་པའི་ཤུགས་ཀྱིས་དགོས་པ་དང་འབྲེལ་པ་གཉིས་བསྟན་ཏེ། ཊཱི་ཀ་ལས། བརྗོད་པར་བྱ་བ་དང་དགོས་པའི་དགོས་པ་ནི་ཚུལ་ཁྲིམས་དང་ངེས་པར་འབྱུང་བའི་སྒྲ་གཉིས་ཀྱིས་གོ་རིམ་བཞིན་དུ་མངོན་སུམ་དུ་བསྟན་ལ། འབྲེལ་པ་དང་དགོས་པ་ནི་ཤུགས་ཀྱིས་བསྟན་ཏེ། ཞེས་གསུངས་པའི་ཕྱིར་རོ། །མཐར་ཐུག་པའི་ཉིང་དགོས་མྱ་ངན་ལས་འདས་པ་དང་དེ་ཐོབ་པ་དང་གཉིས་ཡོད་དེ།ཊཱི་ཀ་ལས། ངེས་པར་འབྱུང་བ་ནི་ངེས་པར་འབྱུང་བ་སྟེ། ཕྱིར་མི་ལྡོག་པ་ཐོབ་པར་བྱ་བ་ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་འདས་པ་ཐོབ་པ་ཞེས་བྱ་བའི་ཐ་ཚིག་གོ །ཞེས་གསུངས་པའི་ཕྱིར། སྔ་མ་ནི་འདུས་མ་བྱས་ཡིན་ལ། ཕྱི་མ་ནི་འདུས་བྱས་སོ། ། མཚོ་ཊཱིཀ་ལས། ཉིང་དགོས་གནས་སྐབས་པ་དང་མཐར་ཐུག་པ་གཉིས་ལས། དང་པོ་ནི་ཟག་མེད་ཀྱི་ལམ་ཡིན་ལ། གཉིས་པ་ནི་མྱ་ངན་ལས་འདས་པ་ཡིན་གྱི་ཟག་མེད་ཀྱི་ལམ་མ་ཡིན་ཏེ། ཉིང་དགོས་མཐར་ཐུག་པའི་དབང་དུ་བྱས་ནས། ཊཱི་ཀ་ལས། དེའི་ཕྱིར་དགོས་པའི་ཡང་དགོས་པ་བརྗོད་པར་བྱ་སྟེ། དེ་ཡང་ངེས་པར་འབྱུང་བ་ཞེས་སྨོས་པས་བསྟན་ཏོ། །ངེས་པར་འབྱུང་བ་ནི་མྱ་ངན་ལས་འདས་པ་སྟེ། ཞེས་གསུངས་སོ། །ཟག་མེད་ཀྱི་ལམ་ནི་མཐར་ཐུག་པའི་ཉིང་དགོས་མ་ཡིན་ཏེ། ཊཱི་ཀ་ལས། ཅིའི་ཕྱིར་ཟག་པ་མེད་པའི་ལམ་མ་གཟུང་ཞེ་ན། གཙོ་བོ་མ་ཡིན་པའི་ཕྱིར་རོ། །ལམ་ནི་ གཙོ་བོ་མ་ཡིན་ཏེ། དེ་མྱ་ངན་ལས་འདས་པའི་དོན་དུ་ཡིན་པའི་ཕྱིར་རོ། །གཙོ་བོ་དང་གཙོ་བོ་མ་ཡིན་པ་གཉིས་ནི་གཙོ་བོ་ལ་འབྲས་བུར་ཡིད་ཆེས་སོ། །ཞེས་གསུངས་པའི་ཕྱིར་རོ། །དེ་དག་ལས་ཟག་མེད་ལམ་བདེན་གནས་སྐབས་ཀྱི་ཉིང་དགོས་ཡིན་པར་གསུངས་པ་ནི་སློབ་པའི་ལམ་བདེན་ལ་དགོངས་པ་ཡིན་ནམ་ཅི། དེ་ཡིན་ན་མི་སློབ་ལམ་མཐར་ཐུག་གི་ཉིང་དགོས་སུ་འགྱུར་དགོས་པ་ལས་གོང་དུ་བཀོད་པ་ལྟར་ཊཱི་ཀ་ལས་མཐར་ཐུག་ཉིང་དགོས་མྱང་འདས་དང་དེའི་ཐོབ་པ་ལས་གཞན་མ་གསུངས་པའི་རྒྱུ་མཚན་གང་ཡིན་འཚོལ་དགོས་སོ། །ཊཱི་ཀ་ལས་ལྷག་མེད་མྱང་འདས་ཀྱི་ཐོབ་པ་ཉིང་དགོས་བཞག་པ་དང༌། མཛོད་ལས། མྱ་ངན་འདས་སོགས་གོང་ནས་གོང༌། །འཐོབ་པ་ལ་ནི་དབང་བྱེད་ཕྱིར། །ཀུན་ཤེས་བྱེད་དང་ཀུན་ཤེས་དང༌། །དེ་བཞིན་ཀུན་ཤཻས་ལྡན་དབང་བོ། །ཞེས་གསུངས་པ་ལ། མཛོད་རང་འགྲེལ་ལས། ཀུན་ཤེས་པར་བྱེད་པའི་དབང་བོ་ནི། ཀུན་ཤེས་པའི་དབང་བོ་འཐོབ་པར་བྱེད་པ་ལ་དབང་བྱེད་དོ། །ཀུན་ཤེས་པའི་དབང་བོ་ནི། ཀུན་ཤེས་པ་དང་ལྡན་པའི་དབང་བོ་འཐོབ་པར་བྱེད་པ་ལ་དབང་བྱེད་དོ། །ཀུན་ཤེས་པ་དང་ལྡན་པའི་དབང་བོ་ནི། ཡོངས་སུ་མྱ་ངན་ལས་འདའ་བ་ལ་དབང་བྱེད་དེ། ཞེས་ཀུན་ཤེས་པ་དང་ཀུན་ཤེས་དང་ལྡན་པའི་དབང་བོ་གཉིས་ཐོབ་པ་ལ་དབང་བྱེད་པ་ཞེས་སྦྱར་ལ། མྱ་ངན་ལས་འདའ་བ་ལ་དབང་བྱེད་དེ། ཞེས་པ་ལས་ཐོབ་པ་ཞེས་མ་གསུངས་པ་ལ་གནད་ཅིག་ཡོད་པའི་ཕྱིར་དང༌། དེའི་ཐོབ་པ་ཡོད་ན་མཛོད་ལས། ཐོབ་དང་མ་ཐོབ་རང་རྒྱུད་དུ། །ཞེས་འབྱུང་བས་ལྷག་མེད་པའི་གང་ཟག་གདོན་མི་ཟ་བར་ཁས་བླང་དགོས་ལ། དེ་ལྟར་ན་དགྲ་བཅོམ་ཐ་མའི་སེམས་ཀྱི་དེ་མ་ཐག་རྐྱེན་ཡོད་དགོས་པ་ལ་དེ་མི་རིགས་ཏེ། མཚོ་ཊཱིཀ་༢༧ལས།དགྲ་བཅོམ་ལྷག་མེད་དུ་མྱ་ངན་ལས་འདའ་ཁའི་སེམས་རྒྱུན་ཐ་མ་ནི་མ་གཏོགས་སོ། །ཞེས་སོགས་གསུངས་པ་དང༌། མཛོད་ལས། སྨོན་པ་མེད་པ་ནི། །དེ་ལས་གཞན་བདེན་རྣམ་པ་ཅན། །ཞེས་པ་ལྟར་ལམ་བདེན་ལྷག་མེད་སྐབས་རྒྱུན་ཆད་པས་སྨོན་མེད་དུ་བཞག་པའི་ཕྱིར་རོ་ཟེར་ན་མྱ་ངན་ལས་འདའ་བ་ལ་དབང་བྱེད་པ་ལས་ལྷག་མེད་མྱང་འདས་ཀྱི་ཐོབ་པ་མེད་ཟེར་ན་ཊཱི་ཀས་དེ་ཉིང་དགོས་བཞག་པ་དང་འགལ་བས་དཔྱད་པར་བྱའོ། །