གསེར་འོད་གཡང་སྐྱབས།
སྟོན་པ་སངས་རྒྱས།

རྒྱ་གར་སྐད་དུ། །ཨཱརྱ་སུ་ཝརྞ་ས་ཏ་ནཱ་མ་མ་ཧཱ་ཡ་ན་སཱུ་ཏྲ་ཧུ་ཡེ། །བོད་སྐད་དུ། །འཕགས་པ་གསེར་འོད་དམ་པ་མདོ་སྡེའི་དབང་པོའི་རྒྱལ་པོ་ལས་གཡང་སྐྱབས་ཞེས་བྱ་བ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རིའི་རྩེ་མོ་ཆོས་ཀྱི་དབྱིངས་ཀྱི་སྤྱོད་ཡུལ་ན་དེ་བཞིན་གཤེགས་པ་བཞུགས་སོ། །དེའི་ཚེ་ཉན་ཐོས་ཀྱི་དགེ་སློང་གི་དགེ་འདུན་འབུམ་ཕྲག་གྲངས་མེད་པ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་ཚད་མེད་གྲངས་མེད་པ་དང༌། ལི་ཙ་བྱི་གཞོན་ནུ་སྟོང་ཕྲག་ལྔ་བཅུ་རྩ་བརྒྱད་དང༌། ལྷའི་བུ་བཞི་ཁྲི་ཉིས་སྟོང་དང༌། ཀླུའི་བུ་མོ་སུམ་ཁྲི་དྲུག་སྟོང༌། ནམ་མཁའ་ལྡིང་གི་རྒྱལ་པོ་བཞི་ཁྲི་དགུ་སྟོང་དང༌། དྲི་ཟ་དང༌། ལྷ་མ་ཡིན་དང༌། མིའམ་ཅི་དང༌། ལྟོ་འཕྱེ་ཆེན་པོ་དང༌། རི་དང༌། ནགས་ཚལ་དང༌། རྒྱ་མཚོ་དང་ཆུའི་ལྷ་ལ་སོགས་པ་ཐམས་ཅད་བཅོམ་ལྡན་འདས་ག་ལ་བ་དེར་ལྷགས་ནས། བཅོམ་ལྡན་འདས་ཀྱི་ཞབས་ལ་ཕྱག་འཚལ་ཞིང་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་སྟེ། སེམས་རྩེ་གཅིག་ཏུ་བྱས་ཤིང་ཐལ་མོ་སྦྱར་ནས་མིག་མི་འཛུམ་པར་བཅོམ་ལྡན་འདས་ཀྱི་ཞབས་ལ་བལྟ་ཞིང་གསོལ་བ་འདེབས་སོ། །དེ་ནས་བཅོམ་ལྡན་འདས་ཀྱིས་འཁོར་འདུས་པ་མང་པོ་ལ་ཐུགས་བརྩེ་བའི་སྤྱན་གྱིས་གཟིགས་ནས་ཚིགས་སུ་བཅད་པ་འདི་དག་བཀའ་སྩལ་ཏོ། །མདོ་སྡེའི་དབང་པོ་རྒྱལ་པོ་སྟེ། །ཉན་ན་ཤིན་ཏུ་ཟབ་པ་དང༌། །ཡོངས་སུ་བརྟགས་ན་ཟབ་པ་ཉིད། །གསེར་འོད་དམ་པ་འདི་འཆད་དོ། །ཕྱོགས་བཞིར་སངས་རྒྱས་རྣམས་ཀྱིས་ནི། །བྱིན་གྱིས་བརླབས་ཏེ་བརྗོད་པར་བྱ། །མི་འཁྲུགས་པས་ནི་ཤར་ཕྱོགས་སུ། །རིན་ཆེན་ཏོག་གིས་ལྷོ་ཕྱོགས་སུ། །འོད་དཔག་མེད་ཀྱིས་ནུབ་ཕྱོགས་སུ། །རྔ་སྒྲ་ཡིས་ནི་བྱང་ཕྱོགས་སུ། །སྡིག་པ་ཐམས་ཅད་གཞིག་པའི་ཕྱིར། །བཤད་པ་དམ་པ་བཀྲ་ཤིས་པ། །སྡིག་པ་ཐམས་ཅད་ཟད་བྱེད་པ། །སྡུག་བསྔལ་ཐམས་ཅད་འཇིག་པར་བྱེད། །ཐམས་ཅད་མཁྱེན་པ་ཉིད་ཀྱི་གཞི། །དཔལ་ཀུན་གྱིས་ནི་ལེགས་པར་བརྒྱན། །བྱིན་གྱིས་བརླབས་ཏེ་བརྗོད་པར་བྱ། །སེམས་ཅན་གང་དག་དབང་པོ་ཉམས། །ཚེ་ཟད་པ་དང་ཚེ་ཉམས་དང༌། །ཕུན་སུམ་ཚོགས་མིན་གང་ཆགས་དང༌། །ལྷ་རྣམས་རྒྱབ་ཀྱིས་ཕྱོགས་པ་དང༌། །མཛའ་སྡུག་སྐྱེ་བོ་སྡང་བ་དང༌། །བྲན་བཟའ་ལ་སོགས་གཙེས་པ་དང༌། །ཕན་ཚུན་མཐུན་པ་མ་ཡིན་དང༌། །ནོར་འགྲིབ་པས་ནི་གནོད་པ་དང༌། །མྱ་ངན་ངལ་དང་གནོད་པ་དང༌། །འཇིགས་པ་དང་ནི་འཕོངས་པ་དང༌། །གཟའ་དང་རྒྱུ་སྐར་བྱད་སྟེམས་དང༌། །མི་བཟད་གདོན་གྱི་ཉེན་པ་དང༌། །མྱ་ངན་ངལ་ལས་བྱུང་བ་ཡི། །རྨི་ལམ་སྡིག་པ་མཐོང་ན་ཡང༌། །དེ་ནི་རབ་བཀྲུས་ གཙང ་མ་ཡིས། །མདོ་སྡེ་དམ་པ་ཉན་པར་བྱ། །གང་དག་ཡིད་དགེ་སེམས་དང་ཞིང༌། །གོས་ གཙང ་གིས་ནི་རབ་བརྒྱན་ཏེ། །ཟབ་མོ་སངས་རྒྱས་སྤྱོད་ཡུལ་བ། །མདོ་སྡེ་འདི་ནི་ཉན་བྱེད་ན། །མདོ་སྡེ་འདི་ཡི་གཟི་བརྗིད་ཀྱིས། །ཤིན་ཏུ་མི་བཟད་འདི་འདྲ་བ། །དེ་དག་རབ་ཏུ་ཞི་བར་འགྱུར། །འཇིག་རྟེན་སྐྱོང་བ་བདག་ཉིད་དང༌། །བློན་པོའི་ཚོགས་ཀྱི་དབང་ཕྱུག་བཅས། །གནོད་སྦྱིན་བྱེ་བ་དུ་མ་ཡིས། །དེ་དག་ལ་ནི་སྲུང་བར་བྱེད། །ལྷ་མོ་ཆེན་མོ་དབྱངས་ཅན་དང༌། །ན་ར་ཛ་ནར་གནས་པ་དང༌། །འབྱུང་པོའི་མ་མོ་འཕྲོག་མ་དང༌། །ས་ཡི་ལྷ་མོ་བརྟན་མ་དང༌། །ཚངས་པའི་དབང་དང་ལྷ་དབང་དང༌། །ཀླུ་དབང་མཐུ་ཆེན་རྣམས་དང་ནི། །མིའམ་ཅི་དང་ལྷ་མིན་དབང༌། །དེ་བཞིན་ནམ་མཁའ་ལྡིང་དབང་རྣམས། །སྡེ་དང་སྟོབས་དང་གཞོན་པར་དང༌། །བཅས་ཏེ་དེ་དག་ལྷགས་ནས་ནི། །ཉིན་དང་མཚན་མོ་མི་གཡེལ་བར། །དེ་དག་ལ་ནི་སྲུང་བར་བྱེད། །ཟབ་མོ་སངས་རྒྱས་སྤྱོད་ཡུལ་བ། །སངས་རྒྱས་ཀུན་གྱིས་གསུངས་པ་སྟེ། །བསྐལ་པ་བྱེ་བ་སྤྱོད་དཀའ་བར། །མདོ་འདི་རབ་ཏུ་བཤད་པར་བྱ། །གང་དག་མདོ་འདི་ཉན་པ་དང༌། །གང་དག་གཞན་ལས་ཐོས་བྱེད་དང༌། །གང་དག་རྗེས་སུ་ཡི་རང་དང༌། །གང་དག་མཆོད་པ་བྱེད་པ་ཡི། །དེ་དག་རྣམས་ལ་ལྷ་དང་ཀླུ། །མི་དང་མིའམ་ཅི་དག་དང༌། །ལྷ་མིན་གནོད་སྦྱིན་དུ་མ་ཡིས། །བསྐལ་པ་དུ་མར་མཆོད་པར་འགྱུར། །སྲོག་ཆགས་བསོད་ནམས་བྱེད་པ་རྣམས། །དེ་དག་བསོད་ནམས་ཕུང་པོ་ནི། །མཐའ་ཡས་གྲངས་ཀྱང་མེད་པ་དང༌། །བསམ་གྱིས་མི་ཁྱབ་སྐྱེ་བར་འགྱུར། །ཕྱོགས་བཅུར་བཞུགས་པའི་སངས་རྒྱས་དང༌། །དེ་བཞིན་ཟབ་མོ་སྤྱོད་པ་ཡི། །བྱང་ཆུབ་སེམས་དཔའ་རྣམས་ཀྱིས་ཀྱང༌། །རབ་ཏུ་བཟུང་བར་འགྱུར་བ་ཡིན། ། གཙང ་མའི་གོས་རྣམས་རབ་བགོས་ལ། །དྲི་ཞིམ་པ་ཡི་གོས་འཆང་ཞིང། །བྱམས་པའི་སེམས་ནི་ཉེར་བཞག་ནས། །གཡེལ་བ་མེད་པར་མཆོད་པར་བྱ། །རང་གི་སེམས་ནི་དྲི་མེད་ཅིང༌། །རྒྱ་ཆེ་བར་ཡང་རབ་བྱེད་ལ། །སེམས་ཀྱང་ཤིན་ཏུ་དད་བྱེད་ཅིང༌། །མདོ་སྡེ་དམ་པ་མཉན་པར་གྱིས། །གང་དག་མདོ་འདི་ཉན་པ་ནི། །དེ་དག་མི་ནོར་ལེགས་པར་འོང༌། །མི་ཡི་སྲིད་པ་ལེགས་པར་ཐོབ། །འཚོ་བ་བདེ་བས་འཚོ་བར་འགྱུར། །གང་གི་རྣ་བའི་བུ་གར་ཡང༌། །བཤད་པ་འདི་ནི་གྲག་གྱུར་པ། །དེ་དག་དགེ་རྩ་སྦྱངས་པ་སྟེ། །སངས་རྒྱས་མང་པོས་རབ་ཏུ་བསྔགས། །ཕྱི་མར་གྱུར་པའི་དུས་ཉིད་དུ། །མི་རྣམས་བསོད་ནམས་ཉམས་པ་དང། །ཆོ་ག་འདི་ལ་བརྩོན་བྱས་ན། །ཡིད་བཞིན་ནོར་བུ་རིན་ཆེན་ལྟར། །དགོས་འདོད་ཐམས་ཅད་སྟེར་བར་བྱེད། །ཤིན་ཏུ་དབེན་ཞིང་ཉམས་དགའ་བར། །གཞི་མ་དཀར་ གཙང ་སྟེང་དུ་ནི། །དཀོན་མཆོག་མཆོད་པ་རྒྱ་ཆེར་བཤམས། །ཡི་དམ་ཆོས་སྐྱོང་གཏོར་མ་དང༌། །ཕྱོགས་སྐྱོང་ནོར་ལྷ་སྡེ་བརྒྱད་ལ། །དཀར་མངར་མཆོད་པ་རྒྱ་ཆེར་བཤམས། །མདའ་དར་ཕྱེ་མར་གསེར་སྐྱེམས་མཆོད། །རིན་ཆེན་བུམ་པ་མར་ཁུས་བཀང༌། །སྦ་སྨྱུག་རིན་ཆེན་གསེར་གཡུ་དང༌། །གཡང་གི་ར་བ་རིན་ཆེན་མར་གྱིས་བཀང༌། །མར་ལུག་དུང་ཤྭ་ཆང་ཕུད་སོགས། །ཕྱག་རྒྱ་སྔགས་ཀྱིས་བྱིན་བརླབས་ཏེ། །བྱང་ཕྱོགས་གནོད་སྤྱིན་གཏེར་ནང་ནས། །རིན་ཆེན་སྣ་ཚོགས་མཛེས་པར་བྱས། །སེམས་བསྐྱེད་ཡན་ལག་ཚངས་བྱས་ནས། །དར་དཀར་གཡབ་ཅིང་སྤྱན་འདྲེན་ན། །ཆོས་ཀྱི་རྒྱལ་པོ་བཅོམ་ལྡན་འདས། །ཆོས་ཀུན་རྣམས་ལ་མངའ་མཛད་པ། །ཕྱོགས་བཅུའི་སངས་རྒྱས་སྲས་བཅས་རྣམས། །བཀྲ་ཤིས་སྐྱིད་རྟགས་གནས་འདིར་བྱོན། །དར་དཀར་གཡབ་ཅིང་གཡང་དུ་ལེན། །ཐུགས་རྗེའི་བྱིན་རླབས་ཆེན་པོ་ཡིས། །ཕྱྭ་དང་གཡང་དུ་བསྐྱབ་ཏུ་གསོལ། །ཆོས་རྣམས་གང་དག་མེ་ལོང་འདྲ། །རྣམ་རྟོག་བྲལ་བས་མེ་ལོང་ལྟར། །མི་སྐྱེ་མི་འགག་གཟུགས་སྐུ་འཆར། །དྲི་མེད་འཇའ་ཚོན་ཇི་བཞིན་དུ། །གཡང་དག་ཐབས་ཤེས་སྐུ་རུ་གསལ། །གཡང་བརྟན་མི་འགྱུར་རྡོ་རྗེའི་སྐུ། །བཀྲ་ཤིས་གནས་འདིར་གཡང་ལ་བྱོན། །དར་དཀར་གཡབ་ཅིང་གཡང་དུ་བླན། །བྱིན་རླབས་ཕྱྭ་དང་གཡང་དུ་འདུས། །དགེ་འདུན་བྱང་ཆུབ་ཕྱིར་མི་ལྡོག །མི་རྟོག་རབ་དགའི་ས་ལ་བཞུགས། །གཞན་དོན་མ་རིག་མུན་སེལ་བ། །བཀྲ་ཤིས་སྐྱིད་རྟགས་གཡང་ལ་བྱོན། །དར་དཀར་གཡབ་ཅིང་གཡང་དུ་ལེན། །རྒྱུ་སྦྱོར་ཡོན་གྱི་བདག་པོ་ལ། །གལ་ཏེ་འདི་ལ་བགེགས་ཡོད་ན། །དཀོན་མཆོག་གསུམ་གྱིས་བྱིན་རླབས་དང༌། །ཁྲོ་བོ་བདུད་རྩི་འཁྱིལ་བ་ཡིས། །མགོ་བོ་ཚལ་པ་བརྒྱར་འགས་ཤིང༌། །ལུས་ཀྱང་དུམ་བུ་སྟོང་དུ་འཇིག ཨོཾ་ཨཱ་བཛྲ་ཀྲོ་དྷ་ཧཱུྃ་ཕཊ། ཆོས་ཀྱི་དབྱིངས་ཀྱི་ཕོ་བྲང་ནས། ཡུམ་ཆེན་ཤེས་རབ་ཕ་རོལ་ཕྱིན། །ཕྱོགས་བཅུའི་སངས་རྒྱས་སྲས་དང་བཅས། དར་དཀར་གཡབ་ཅིང་གཡང་དུ་ལེན། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་སྲོག་བསྐྱབ་ཏུ་གསོལ། །འོག་མིན་ཆོས་ཀྱི་གཞལ་ཡས་ནས། །བཅོམ་ལྡན་རྣམ་པར་སྣང་མཛད་དང༌། །ས་བཅུའི་བྱང་ཆུབ་སེམས་དཔའ་རྣམས། །དར་དཀར་གཡབ་ཅིང་གཡང་དུ་ལེན། །འཁོར་དང་བཅས་པ་འདིར་བྱོན་ལ། ཡོན་བདག་ཚེ་གཡང་བསྐྱབ་ཏུ་གསཽལ། །བྱ་རྒོད་ཕུང་པོའི་རི་བོ་ནས། །བཅོམ་ལྡན་ཤཱཀྱ་ཐུབ་པ་དང༌། །ཉན་ཐོས་ཆེན་པོ་མཆོག་བརྒྱད་རྣམས། །དར་དཀར་གཡབ་ཅིང་གཡང་དུ་ལེན། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །སེང་གེ་བསྣོལ་བའི་ཁྲི་སྟེངས་སུ། །ཉི་ཟླ་པདྨའི་གདན་སྟེང་ན། །བཅོམ་ལྡན་རྣམ་པར་སྣང་མཛད་ནི། །སྐུ་མདོག་དཀར་ལ་འོད་ཟེར་འཕྲོ། །ཕྱག་ན་གསེར་གྱི་བུམ་པ་བསྣམས། །ཞལ་ནས་གཡང་རབ་དམ་པ་འདོན། །ཨོཾ་ཤྲཱི་བཛྲ་བཻ་རོ་ཙ་ན་རཏྣ་སིདྡྷི་ཧཱུྃ་ཧྲཱི་ཋཱ། །དར་དཀར་གཡབ་ཅིང་སྤྱན་འདྲེན་ན། །བདེ་ལྡན་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །འདི་ནས་ཤར་ཕྱོགས་ཞིང་ཁམས་ན། །གླང་ཆེན་བསྣོལ་བའི་ཁྲི་སྟེངས་སུ། །ཉི་ཟླ་པདྨའི་གདན་སྟེང་ན། །རྡོ་རྗེ་སེམས་དཔའ་འཁོར་བཅས་ནི། །སྐུ་མདོག་དཀར་གསལ་རྒྱན་དང་ལྡན། །ཕྱག་ན་གསེར་གྱི་ལྷུང་བཟེད་བསྣམས། །ཞལ་ནས་གཡང་རབ་དམ་པ་འདོན། །ཨོཾ་བཛྲ་རཏྣ་ཧཱུྃ་ཧྲཱི་ཋཱ། །དར་དཀར་གཡབ་ཅིང་སྤྱན་འདྲེན་ན། །བདེ་ལྡན་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །འདི་ནས་ལྷོ་ཕྱོགས་རོལ་པ་ན། །རིན་ཆེན་འབར་བའི་གཞལ་ཡས་ན། །རྟ་མཆོག་བསྣོལ་བའི་ཁྲི་སྟེང་དུ། །ཉི་ཟླ་པདྨའི་གདན་སྟེང་ན། །བཅོམ་ལྡན་རིན་ཆེན་འབྱུང་ལྡན་ནི། །སྐུ་མདོག་གསེར་གྱི་ལྷུན་པོ་འདྲ། །ཕྱག་ན་གཡང་གི་དུང་ཞལ་བསྣམས། །ཞལ་ནས་གཡང་རབ་དམ་པ་འདོན། །ཨོཾ་ཨཱ་བཛྲ་རཏྣ་སརྦ་བྷ་ཝ་ཧཱུྃ་ཧྲཱི་ཋཱ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་ཚེ་གཡང་བསྐྱབ་ཏུ་གསོལ། །འདི་ནས་ནུབ་ཀྱི་ཕྱོགས་རོལ་ན། །རྨ་བྱ་བསྣོལ་བའི་ཁྲི་སྟེང་དུ། །ཉི་ཟླ་པདྨའི་གདན་སྟེང་ན། །བཅོམ་ལྡན་མགོན་པོ་ཚེ་དཔག་མེད། །ཚེ་ལ་དབང་བའི་ལྷ་དང་བཅས། །སྐུ་མདོག་དམར་པོ་འོད་ཟེར་འབར། །ཕྱག་ན་ཚེ་ཡི་བུམ་པ་བསྣམས། །ཞལ་ནས་གཡང་རབ་དམ་པ་འདོན། །ཨོཾ་ཨཱ་བཛྲ་ཨ་མྲྀ་ཏ་པདྨ་སཾ་བྷ་ཝ་ཧཱུྃ་ཧྲཱི་ཋཱ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་ཚེ་གཡང་བསྐྱབ་ཏུ་གསོལ། །བྱང་གི་ཕྱོགས་ན་བཞུགས་པ་ནི། །ཤང་ཤང་བསྣོལ་བའི་ཁྲི་སྟེང་དུ། །ཉི་ཟླ་པདྨའི་གདན་སྟེང་ན། །བཅོམ་ལྡན་དོན་ཡོད་གྲུབ་པ་ནི། །ལྗང་ཁུ་ཨིནྡྲ་ནཱི་ལའི་མདོག །འཕྲིན་ལས་གྲུབ་པའི་ལྷ་དང་བཅས། །ཕྱག་ན་གཡུ་ཡི་ལྷུང་བཟེད་ནི། །རིན་ཆེན་གཡང་གིས་གང་བ་བསྣམས། །ཞལ་ནས་གཡང་རབ་དམ་པ་འདོན། །ཨོཾ་ཨཱ་མོ་གྷ་ཀརྨྨ་སིདྡྷི་སརྦྦ་ཛ་ཧཱུྃ་ཧྲཱི་ཋཱ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་ཚེ་གཡང་བསྐྱབ་ཏུ་གསོལ། །དབུས་ཀྱི་གཙོ་ལ་བཞུགས་པ་ནི། །གཙུག་ཏོར་དཀར་མོ་ལྷ་མོ་ཆེ། །སྐུ་མདོག་དཀར་མོ་གངས་རི་འདྲ། །དབུ་སྟོང་སྤྱན་གྱིས་ཀུན་ཏུ་གཟིགས། །ཕྱག་མཚན་རྣམ་གྲངས་སྟོང་དང་ལྡན། །ཐུགས་རྗེས་འགྲོ་བ་ཀུན་ལ་སྙོམས། །མི་དང་ནོར་གྱི་བདག་པོ་སྟེ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་རྟགས་གནས་འདི་རུ། །འཁོར་དང་བཅས་པ་འདིར་བྱོན་ལ། །ཡོན་བདག་ཚེ་གཡང་བསྐྱབ་ཏུ་གསོལ། །ཤར་གྱི་ཕྱོགས་ན་བཞུགས་པ་ནི། །རྡོ་རྗེ་གཙུག་ཏོར་ལྷ་མོ་སྟེ། །ཕྱག་ན་རྡོ་རྗེ་རྩེ་ལྔ་བསྣམས། །གཡོན་ན་གཡུ་ཡི་དྲིལ་བུ་གསིལ། །བདེ་ལྡན་སྐྱིད་པའི་གནས་འདི་རུ། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་འདིར་བྱོན་ལ། །བདག་ཅག་ཚེ་གཡང་བསྐྱབ་ཏུ་གསོལ། །ལྷོ་ཡི་ཕྱོགས་ན་བཞུགས་པ་ནི། །རིན་ཆེན་གཙུག་ཏོར་ལྷ་མོ་ཆེ། །ཕྱག་ན་ཡིད་བཞིན་ནོར་བུ་བསྣམས། །གསེར་གྱི་དྲིལ་བུ་གསུང་སྙན་སྒྲོག །མི་གཡང་སྡུད་པའི་བདག་མོ་སྟེ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདུ་རུ། །འཁོར་དང་བཅས་པ་འདིར་བྱོན་ལ། །བདག་ཅག་མི་གཡང་བསྐྱབ་ཏུ་སོལ། །ནུབ་ཀྱི་ཕྱོགས་ན་བཞུགས་པ་ནི། །པདྨ་གཙུག་ཏོར་ལྷ་མོ་སྟེ། །ཕྱག་ན་པདྨ་འདབ་བརྒྱད་བསྣམས། །གཡོན་ན་གཡང་གི་ཞགས་པ་འཛིན། །ཕྱུགས་གཡང་སྡུད་པའི་བདག་པོ་སྟེ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །ཡོན་བདག་ཕྱུགས་གཡང་བསྐྱབ་ཏུ་གསོལ། །བྱང་གི་ཕྱོགས་ན་བཞུགས་པ་ནི། །ལས་ཀྱིགཙུག་ཏོར་ལྷ་མོ་ཆེ། །ཕྱག་ན་རྡོ་རྗེ་རྒྱ་གྲམ་བསྣམས། །གཡོན་པ་འབྲས་ཀྱི་སྙེ་མ་འཛིན། །ལོ་གཡང་སྡུད་པའི་བདག་མོ་སྟེ། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །བདག་ཅག་ལོ་གཡང་བསྐྱབ་ཏུ་གསོལ། །གྲྭ་ཡི་ཕྱོགས་ནི་ཀུན་ཏུ་ཡང༌། །རིགས་ཀྱི་ཡུམ་དང་གསང་བའི་ཡུམ། །དགོས་པ་རྣམས་ནི་སྟེར་བ་དང༌། །ལོ་ཙཱ་དང་ནི་མ་མཱ་ཀཱི། །དཀར་མོ་སྒྲོལ་མ་ལ་སོགས་རྣམས། །དར་དཀར་གཡབ་ཅིང་སྤྱན་འདྲེན་ན། །དུམ་བུ་བཞི་ལ་གཡང་རྟེན་གསོལ། །ལྷ་ཡི་དབང་པོ་བརྒྱ་བྱིན་ཡང༌། །ལྷ་རྣམས་ཀུན་ལ་དབང་བསྒྱུར་ཞིང༌། །ཕ་རོལ་ཆོས་ཀྱི་དགེ་སློང་མཛད། །ལྷ་བྲན་མང་པོར་སྒྲ་སྒྲོག་ཅིང༌། །བཀྲ་ཤིས་སྐྱིད་པའི་གནས་འདི་རུ། །ཡིད་བཞིན་ནོར་བུ་གཡང་དུ་བཏགས། །གཡས་པས་ལྷ་ཡི་ཕོ་བྲང་དུ། །བཀྲ་ཤིས་གཡང་རྣམས་བརྟན་པ་ཡིས། །དོན་གྲུབ་ལྷ་མོ་འཕྲིན་ལས་ཆུ། །ལྕགས་ཀྱུ་ཞགས་པ་ལྕགས་སྒྲོག་དྲིལ། །དར་དཀར་གཡབ་ཅིང་སྤྱན་འདྲེན་ན། །གནས་འདིར་བསྲུང་བའི་ལས་མཛོད་ཅིག །དེ་རིང་ཡོན་བདག་འཁོར་བཅས་ལ། །མི་ཡི་ཚེ་དང་ནོར་གྱི་གཡང༌། །ཟས་ཀྱི་བཅུད་དང་སྐོམ་གྱི་བཅུད། །རྟ་ཕྱུགས་སྲོག་ཆགས་ཀུན་གྱི་གཡང༌། །མི་རྣམས་ཀུན་ལ་བསྐྱབ་ཏུ་གསོལ། །ཁྱེད་ཅག་ཀུན་ལ་བདེ་ལེགས་ཤོག །དེ་དག་སྡིག་པར་མ་གྱུར་ཅིག །ཉི་མ་ཐམས་ཅད་དགེ་བ་ཡིན། །རྒྱུ་སྐར་ཐམས་ཅད་བཟང་པོ་ཡིན། །སངས་རྒྱས་ཐམས་ཅད་རྫུ་འཕྲུལ་ཆེ། །དགྲ་བཅོམ་ཐམས་ཅད་ཟག་པ་ཟད། །བདེན་པའི་བདེན་ཚིག་འདི་བརྗོད་པས། །བདག་ཅག་རྣམས་ལ་བདེ་ལེགས་ཤོག །ལོ་བརྒྱ་འཚོ་ཞིང་སྟོན་བརྒྱ་མཐོང་པར་ཤོག །སྐབས་འདིར་གཏོར་མ་འབུལ། །དཀོན་མཆོག་ལ་གསོལ་བ་འདེབས། །ཆོས་སྐྱོང་ལ་བསྟོད་བསྐུལ་དྲག་པོ་བྱ། །དེ་ནས་ནོར་ལྷ་རྣམས་ལ་གཡང་བླན་པ་ནི་ཕྱེ་མར་དང༌། །གསེར་སྐྱེམས་ཀྱིས་མཆོད་དེ་འདི་སྐད་དོ། །ཧཱུྃ་བཅོམ་ལྡན་ཕྱག་ན་རྡོ་རྗེ་ནི། །གདུག་པ་མ་ལུས་འདུལ་བའི་ཕྱིར། །རྡོ་རྗེ་བསྣམས་ལ་ཕྱག་འཚལ་ལོ། །ཁྱེད་ཀྱི་བཀའ་ཉན་གསུང་སྡོད་ནི། །ཅི་འདོད་རེ་བ་སྐོང་མཛད་པ། །མཐུ་ཆེན་སྟོབས་དང་ལྡན་པ་པོ། །གནོད་སྦྱིན་སུམ་ཁྲི་དྲུག་སྟོང་ལ། །མཐུན་པའི་དམ་རྫས་འབུལ་བ་ནི། །ཕྱེ་མར་མདའ་དར་རིན་ཆེན་དང༌། །བདུད་རྩི་གསེར་སྐྱེམས་སིལ་སྙན་སོགས། །དཀར་མངར་སྨན་གྱི་མཆོད་པ་འབུལ། །ནོར་གྱི་དངོས་གྲུབ་སྩལ་དུ་གསོལ། །བྱང་ཕྱོགས་དཀོར་མཛོད་ཕོ་བྲང་ནས། །ནོར་ལྷའི་རྒྱལ་པོ་རྣམ་ཐོས་སྲས། །གནོད་སྦྱིན་ཀུན་གྱི་གཙོ་བོ་སྟེ། །སྐུ་ལ་བསེ་ཁྲབ་འབར་བ་གསོལ། །ཕྱག་ན་བ་དན་རྩེ་བརྒྱད་འཕྱར། །གཡོན་པ་རིན་ཆེན་ནེའུ་ལེ་འཛིན། །གསེར་གྱི་མཆོད་རྟེན་སེར་པོ་ལས། །དགོས་འདོད་རིན་ཆེན་ཆར་ལྟར་འབབ། །ཆིབས་སུ་སེང་གེ་འགྱིང་བ་ཆིབས། །ནོར་ལྷ་བྱེ་བའི་འཁོར་གྱིས་བསྐོར། །ཀུན་ཀྱང་རིན་ཆེན་རྒྱན་ཆ་ཅན། །ལ་ལ་རིན་ཆེན་ནེའུ་ལེ་འཛིན། །དར་དཀར་གཡབ་ཅིང་སྤྱན་འདྲེན་ན། །བཀྲ་ཤིས་སྐྱིད་པའི་གནས་འདི་རུ། །འཁོར་དང་བཅས་པ་འདིར་བྱོན་ལ། །རིན་ཆེན་དངོས་གྲུབ་བདག་ལ་སྩོལ། །ཨོཾ་བཻ་ཤྲ་མ་ཎཱ་ཡ་རཏྣ་སིདྡྷི་ས་མ་ཡ་ཧཱུྃ་ཧྲི་ཋཱ། །བཅོམ་ལྡན་ལྷ་མོ་ནོར་རྒྱུན་མ། །ཕྱག་གཡས་མཆོག་སྦྱིན་ཕྱག་རྒྱ་ཡིས། །འཇིགས་པ་བརྒྱད་སྐྱོབས་འགྲོ་བ་སྡུད། །གཡོན་པའི་ཕྱག་གིས་ཐུགས་ཀ་རུ། །རིན་ཆེན་འབྲས་ཀྱི་སྙེ་མ་འཛིན། །དགོས་འདོད་རེ་བ་སྐོང་མཛད་པ། །དཔག་བསམ་ཤིང་ཆེན་རྒྱས་པ་ལྟར། །དབུལ་བ་སེལ་ཞིང་ཉོན་མོངས་འཇོམས། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །རྟ་གླང་རིན་ཆེན་གོས་དང་འབྲུ། །ཁྲུས་ཀྱི་རྫིང་བུ་ལ་སོགས་པ། །རིན་ཆེན་དངོས་གྲུབ་བདག་ལ་སྩོལ། །ཨོཾ་བྷ་ཏཾ་ཛམྦྷ་སེ་མ་ས་རཱ་ག་ནི་མ་ཀ་ར་བཛྲ་རཏྣ་ཏིང་ཏི་སརྦ་ཛ་ཧཱུྃ་ཧྲི་ཋཱ། །ཡིད་བཞིན་ནོར་བུ་རིན་ཆེན་གཏེར་མཛོད་ནས། །ནོར་ལྷའི་རྒྱལ་པོ་ཨཱརྱ་ཛམྦྷ་ལ། །བཙོ་མ་གསེར་མདོག་གཟི་བརྗིད་ལྡན། །རིན་ཆེན་རྒྱན་ལྡན་ཕན་སེམས་ཅན། །ཕྱག་གཡས་ནོར་བུ་སྟེར་མཛད་པ། །ཕྱག་གཡོན་ནེའུ་ལེའི་རྐྱལ་པ་བསྣམས། །སྒྲུབ་པ་པོ་ལ་དངོས་གྲུབ་གཏེར། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །མི་ནོར་ཟས་གོས་དངོས་གྲུབ་སྩོལ། །ཨོཾ་ཛམྦྷ་ལ་ཛ་ལེནྡྲ་ཡ་རཏྣ་སིདྡྷི་ཛ་ཧཱུྃ་ཧྲཱི་ཋཱ། །གནོད་སྦྱིན་རྒྱལ་པོ་རིན་ཆེན་སྦྱིན། །རིན་ཆེན་གཏེར་མཛོད་བདག་པོ་སྟེ། །ནོར་བུ་རིན་ཆེན་ཆར་ལྟར་འབེབས། །བདག་ལ་ནོར་གྱི་དངོས་གྲུབ་སྩོལ། །དར་དཀརགཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀྱིས། །འདོད་ཡོན་ལྔ་ལ་ལོངས་སྤྱོད་དང༌། །བླ་ན་མེད་པ་ཆེན་པོའི་ནོར། །ཅི་འདོད་ཕུན་སུམ་ཚོགས་པ་ཡི། །དངོས་གྲུབ་ཆེན་པོ་བདག་ལ་སྩོལ། །ཨོཾ་ཧྲཱི་ཨ་པ་ར་ཙི་ཏི་ཏི་བདག་ལ་སིདྡྷི་ཛ་ཧཱུྃ། གནོད་སྦྱིན་རྒྱལ་པོ་གཏེར་བདག་པོ། །བཞུགས་པ་རི་རབ་རྩེ་ལ་བཞུགས། །ཐུགས་ནི་འཛམ་གླིང་ཀུན་ལ་ཁྱབ། །སྐུ་མདོག་དམར་སེར་གཟི་བརྗིད་ལ། །ནོར་རྒྱུན་མ་ཡི་ཡུམ་དང་བཅས། །ཞབས་གཉིས་བརྐྱང་བསྐུམ་འབྱུང་པོ་མནན། །རིན་ཆེན་བཟང་པོ་ཁྱོད་ལ་བསྟོད། །ཨོཾ་ཨ་ཕུ་ཡུ་ཎི་ཤ་ཡཱ་དྷ་ར་དྷ་ར་དྷི་རི་དྷ་རི་སྭཱ་ཧཱ། ནོར་ལྷའི་རྒྱལ་པོ་རྣམ་ཐོས་སྲས། །སྐུ་མདོག་མ་ངེས་ཅི་ཡང་སྟོན། །ཕྱག་མཚན་མདུང་དང་བ་དན་བསྣམས། །མཆོད་རྟེན་རིན་ཆེན་ནེ་ལེ་འཛིན། རི་རབ་གླིང་བཞི་མི་ཡི་བཅུད། །རྣམ་རྒྱལ་ཁང་བཟང་ནོར་གྱིས་འགེངས། །ཡིད་བཞིན་ནོར་གྱིས་གཡང་འབེབས་པ། །རེ་བ་བསྐོང་ཞིང་ནོར་རྣམས་སྦྱིན། །ཞལ་ནས་གཡང་རབ་དམ་པ་འདོན། །ན་མོ་རཏྣ་ཏྲ་ཡཱ་ཡ། ན་མོ་བཻ་ཤྲ་མ་ཎཱ་ཡ་མ་ཧཱ་རཱ་ཛཱ་ཡ། ཏདྱ་ཐཱ། སུ་མུ་སུ་མུ། ཙན་དྷ་ཙན་དྷ། ཙ་ར་ཙ་ར། ཀ་ར་ཀ་ར། ཀི་ལི་ཀི་ལི། ཀུ་རུ་ཀུ་རུ། མུ་རུ་མུ་རུ། ཙུ་རུ་ཙུ་རུ། སནྡྷ་པ་ཡེ། ཨད་མ་ན་མ་ཉིད་ཏན། ཨ་ན་ད་ར་དྷུ་ར་སྭཱ་ཧཱ། ན་མོ་བཻ་ཤྲ་མ་ཎཱ་ཡ་སྭཱ་ཧཱ། དྷ་ན་དྷ་ཡེ་སྭཱ་ཧཱ། ན་མོ་རཏྣ་པ་རི་སྭཱ་ཧཱ། མི་ནོར་ཟས་གསུམ་ཐམས་ཅད་དྷི་ཤ་མ་ན་ཡེ་ཧེ་བེ་རྣ་རཏྣ་སིདྡྷི་སྭཱ་ཧཱ། རིན་ཆེན་རྒྱལ་བ་རྒྱས་ཤིང་འཕེལ། །སྒྱུ་མའི་བང་མཛོད་ནམ་མཁའ་མཉམ། །ཀར་ཤ་པ་ཎི་བརྒྱ་སྟོང་ཕྲག །ཉིན་རེ་བཞིན་དུ་གནང་བར་མཛོད། མི་ཡིའཁོར་ལོ་སྒྱུར་བ་དེ། །མི་རྣམས་ཀུན་ལ་མངའ་བརྙེས་པ། །སྐྱེ་བོ་མང་པོ་འཕེལ་ཞིང་རྒྱས། དཀོན་མཆོག་ཡོན་བདག་མཛད་པ་ཡི། །འཁོར་ལོ་སྒྱུར་བའི་རྒྱལ་པོ་ཁྱོད། །མི་རྣམས་བདེ་དང་སྐྱིད་པའི་དོན། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །རིན་ཆེན་སྣ་བདུན་བདག་ལ་སྩོལ། །རྟ་ལྷ་ཨཱརྱ་རེ་མནྟ། །རྔོག་ཆགས་ཀུན་ལ་དབང་བསྒྱུར་ཞིང། །དགྲ་ལྷའི་མཆོག་སྟེ་ཉི་མའི་སྲས། །ཁྱོད་ནི་དགྲ་ལྷའི་མཆེད་ཡིན་ཏེ། །ཆིབས་སུ་སྔོན་པོ་སྒལ་ནག་ཆིབས། །བཞེངས་ན་སྟག་གཉིས་སྔོན་ལ་འགྲོ། །སེང་ཆེན་གཉིས་ནི་ཕྱི་ནས་འབྲང༌། །ཁྱུང་ཆེན་གཉིས་ནི་ཀླད་ལ་ལྡིང༌། །ཕྲག་པར་ལྕགས་ཀྱི་བྱ་ཁྲ་འཕུར། །དཔལ་འབར་ལམ་ལྷ་ཚེ་བསྲུང་ཞིང༌། །ལམ་དང་གཡུལ་གྱི་དགྲ་ལས་རྒྱལ། །ནོར་དང་འབྲུ་རྣམས་འཕེལ་བ་ཡི། །ནོར་གྱི་དངོས་གྲུབ་བསྩལ་བའི་ཕྱིར། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་བྱོན། །འབྲུ་རྣམས་འཕེལ་བའི་དངོས་གྲུབ་སྩོལ། །ཨོཾ་ཨཱརྱ་རེ་མནྟ་གྷོ་ར་སིདྡྷི་རཏྣ་སིདྡྷི་ཧཱུྃ་ཧྲཱི་ཋཱ། ཕྱུགས་ལྷ་ཀུན་གྱི་རྒྱལ་པོ་ནི། །གླང་ཆེན་ས་ལ་རབ་བརྟན་ཏེ། ཁྱུ་མཆོག་ཀུན་ལ་མངའ་མཛད་པ། །ཕྱག་ན་གཡང་གི་ཞགས་པ་བསྣམས། །བེའུ་རྣམ་རྒྱལ་འཁོར་དང་བཅས། །ཕྱུགས་རྣམས་འཕེལ་ཞིང་རྒྱས་པའི་ཕྱིར། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །ཕྱུགས་ཀྱི་དངོས་གྲུབ་བདག་ལ་སྩོལ། །ཨོཾ་ཨ་བ་ཤ་རཏྣ་སིདྡྷི་ཕ་ལ་ཧཱུྃ་ཧྲཱི་ཋཱ། །ལྷ་རྒྱལ་ཨཱརྱ་ཙ་མུཎྜི། །ནོར་བསྲུང་པ་རྣ་ཤ་ཝ་རི། །ཡོ་བྱད་གྱེན་དུ་བསྲུང་བའི་ལྷ། །ལྷ་དང་ཀླུ་དང་ལྷ་མ་ཡིན། །ཀླུ་རྒྱལ་ཆར་འབེབས་ལོ་ཏོག་སྲུང༌། །ཀླུ་རྒྱལ་འབྲུ་བཅུད་སྤེལ་མཛད་པ། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །ཨོཾ་ཨ་ན་སིདྡྷི་ཧཱུྃ་ཧྲཱི་་ཋཱ། །ནོར་ལྷའི་འཕྲིན་ལས་བསྐུལ་བ་ནི། །ཧཱུྃ་ཤར་གྱི་ཕྱོགས་ནས་གཡང་སྡུད་པ། །མ་ཧཱ་དེ་བ་ཡབ་སྲས་བཞི། །ཁྲོ་བོ་དཀར་གསལ་བརྗིད་པ་ལ། །ཕྱག་ན་དངུལ་གྱི་ལྕགས་ཀྱུ་བསྣམས། །མི་གཡང་ཐམས་ཅད་འགུགས་པར་བྱེད། །གཡོན་ན་གཡུ་ཡི་དྲིལ་བུ་གསིལ། བར་ཆད་ཐམས་ཅད་སེལ་བར་མཛད། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །མི་ཡི་ཚེ་གཡང་བརྟན་པར་གསོལ། །ལྷོ་ཡི་ཕྱོགས་ནས་གཡང་སྡུད་པ། །མ་ཧཱ་དེ་བ་སྲས་དང་བཅས། །ཁྲོ་བོ་སེར་པོ་མི་བཟད་པ། །ཕྱག་ན་གསེར་གྱི་ཕྲེང་བ་བསྣམས། །གསེར་དངུལ་རིན་ཆེན་དབང་དུ་སྡུད། །གཡོན་ན་གཡུ་ཡི་དྲིལ་བུ་འཛིན། །གནོད་བྱེད་ཐམས་ཅད་སྐྲག་པར་བྱེད། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་སྐྱིད་པའི་གནས་འདི་རུ། །རིན་ཆེན་སྣ་བདུན་རྒྱས་པར་མཛོད། །ནུབ་ཀྱི་ཕྱོགས་ནས་གཡང་སྡུད་པ། །མ་ཧཱ་དེ་བ་ལྕམ་དྲལ་ལ། །ཁྲོ་བོ་དམར་པོ་མི་བཟད་པ། །ཕྱག་ན་གཡང་གི་ཞགས་པ་བསྣམས། །ཕྱུགས་གཡང་ཐམས་ཅད་འགུགས་པར་བྱེད། །ཡོན་ན་གསེར་གྱི་དྲིལ་བུ་འཛིན། །ཚེ་གཡང་ཐམས་ཅད་འགུགས་པར་བྱེད། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །རྐང་བཞི་ནོར་གྱི་དངོས་གྲུབ་སྩོལ། །བྱང་གི་ཕྱོགས་ནས་གཡང་སྡུད་པ། །མ་ཧཱ་དེ་བ་ཡབ་ཡུམ་གཉིས། །ཁྲོ་བོ་སྔོ་སྐྱ་བརྗིད་པའི་སྐུ། །ཕྱག་ན་འབྲས་ཀྱི་སྙེ་མ་བསྣམས། །ལོ་གཡང་ཐམས་ཅད་སྡུད་པར་བྱེད། །གཡོན་ན་སྨན་གྱི་ལྷུང་བཟེད་འཛིན། །སྡུག་བསྔལ་ནད་ལས་ཐར་བར་བྱེད། །དར་དཀར་གཡབ་ཅིང་སྤྱན་འདྲེན་ན། །འཁོར་དང་བཅས་པ་ཐམས་ཅད་ཀུན། །བཀྲ་ཤིས་གནས་འདིར་གཡང་ལ་འདུས། །འབྲུ་མཆོག་དངོས་གྲུབ་སྩལ་དུ་གསོལ། །ལི་ཁྲིས་ཁ་དོག་གསལ་བར་བྱེད། །དུང་གིས་སྨྲ་བསམ་བརྗོད་ལས་འདས། །བང་མཛོད་ནམ་མཁའི་མཛོད་དང་མཉམ། །འབྲས་དཀར་འབྲུ་བཅུད་ཀུན་གྱི་མཆོག །གི་ཝཾ་སྨན་མཆོག་ཀུན་གྱི་དངོས། །ཀུ་ཤ་བྱོལ་སོང་ཀུན་གྱི་གསོས། །ཡུངས་ཀར་ཁྲོ་བོ་ཀུན་གྱི་རྒྱལ། །བདུན་པོ་དེ་ཡང་གཡང་ལ་རྟེན། །འཁོར་ལོ་རིན་ཆེན་གླིང་བཞི་དབང༌། རྟ་མཆོག་རིན་ཆེན་སྤྲིན་གྱི་ཤུགས། །གླང་པོ་རིན་ཆེན་ཐེག་ཆེན་སྟོབས། །ནོར་བུ་རིན་ཆེན་དགོས་འདོད་རེ་བ་སྐོང༌། །བཙུན་མོ་རིན་ཆེན་བདེ་མཆོག་ལྡན། །ཁྱིམ་བདག་རིན་ཆེན་དགོས་འདོད་སྦྱོར། །བློན་པོ་རིན་ཆེན་བློ་གྲོས་ལྡན། །དམག་དཔོན་རིན་ཆེན་ཚར་གཅོད་མཛད༌། །རྒྱལ་སྲིདརིན་ཆེན་སྣ་བདུན་ཡང༌། །དེ་རིང་བདག་ཅག་འཁོར་བཅས་ཀྱི། །ཕྱྭ་དང་གཡང་ལ་བརྟན་པར་ཤོག །ཨོཾ་ཨཱ་རཏྣ་ཙཀྲ་ཧཱུྃ་རཏྣ་ཀ་སིདྡྷི་པྲ་ཛྙཱ་མ་ཧཱ་མནྟ་ཀན་ཏིད་ཀ་སིདྡྷི་ཧཱུྃ་ཧྲི་ཋཱ། །དེ་ནས་མི་རབས་མཆེད་བཞི་དེས། །གསེར་གྱི་ས་གཞིའི་སྟེང་དུ་ནི། །གཡང་གཞི་དཀར་པོ་དྲི་མེད་བཏིང། །ཕྱག་ན་གཡང་ནས་སྔོན་པོ་བཀོད། །མེ་ཏོག་ཧ་ལོ་གཅལ་དུ་བཀྲམ། །ཕྱྭ་གཞི་གཡང་གཞིའི་སྟེང་དུ་ནི། །འདོད་འཇོ་དུང་གི་བ་དཀར་དང༌། །རིན་ཆེན་མར་གྱི་ལུ་གུ་གཉིས། །འཕྱོང་དང་དེ་ནི་རྦ་ན་འཛིན། །མི་རྣམས་ཀུན་གྱི་ཕྱྭ་ལོངས་ལས། །ཕྱུགས་རྣམས་ཀུན་ལ་གཡང་ཁུགས་སོ། །དཀོན་མཆོག་གསུམ་གྱི་བྱིན་རླབས་ཀྱིས། །མི་རབས་མཆེད་བཞི་ཆེན་པོ་དེ། །འཁོར་ལོས་སྒྱུར་བའི་རྒྱལ་པོར་གྱུར། །རིན་ཆེན་བདུན་ལ་ལོངས་སྤྱོད་པའི། །བྱིན་རླབས་ཕྱྭ་དང་གཡང་གི་སྟོབས། །བྱང་ཕྱོགས་དཔལ་རི་ལྷུན་པོ་ལ། །དཔལ་གྱི་སྦ་སྨྱུག་ལྡེམ་པ་སྐྱེས། །ཚིགས་བདུན་ཚིགས་དགུ་བཅུ་གསུམ་པ། །འཁོར་ལོ་སྒྱུར་བའི་གཡང་རྟེན་ལགས། །དེ་ལྟར་ལོངས་སྤྱོད་རྒྱས་པ་ཡང༌། །བཀྲ་ཤིས་སྦ་སྨྱུག་རྒྱས་པ་དེ། །འཁོར་ལོ་སྒྱུར་བའི་གཡང་ཕུར་བྱས། །རྒྱལ་པོ་ལོངས་སྤྱོད་རྒྱས་པ་ལྟར། །དེ་རིང་སྨྱུག་རྒོད་ཚིགས་གསུམ་པ། །ཡོན་བདག་འདི་ཡི་ཕྱྭ་གཡང་ལགས། །བཀྲ་ཤིས་ཕྱྭ་གཡང་ཕུར་ལ་རྟེན། །འཁོར་ལོས་སྒྱུར་བའི་རྟ་ཕུར་ལྟར། །ཡོན་བདག་ཕྱྭ་གཡང་ཕུར་ལ་རྟེན། །གཡང་མོ་ལུག་གི་གཡང་འདི་ནི། །ཨཱརྱ་ཙ་མུཎྜ་ལ་རྟེན། །འབྲས་ཟན་ཞལ་དཀར་ཕྱྭ་གཡང་རྟེན། །ཕྱུགས་གཡང་ཚེ་གཡང་ནོར་གཡང་རྣམས། །ཧུ་ཡེ་ཧུ་ལྡན་ཕྱྭ་ལྡན་ནོ། །མགོ་ནག་མི་ཡི་ཕྱྭ་ལོངས་ཤིག །དུད་འགྲོ་ཕྱུགས་ཀྱི་གཡང་ཁུགས་སོ། གཡང་ལ་གཡང་འབྲོག་གནག་གིས་གང༌། །གཡང་ལ་གཡང་འཕེལ་ལུག་གིས་གང༌། །གཡང་ལ་གཡང་འཕེལ་རྟ་ཡིས་གང༌། །ནོར་ལ་གཡང་འཕེལ་བོང་བུས་གང༌། །ནོར་ལ་གཡང་འཕེལ་ཕྱུགས་ཀྱིས་གང༌། །ཁྱིམ་ལ་གཡང་འཕེལ་མི་ཡིས་གང༌། །བང་མཛོད་གཡང་འཕེལ་འབྲུ་ཡིས་གང༌། །ཚེ་ལ་གཡང་འཕེལ་ར་ཡིས་གང༌། །ར་བར་གཡང་འཕེལ་ཕྱུགས་ཀྱིས་གང༌། །དེ་ལྟར་བདག་ལ་སྩལ་དུ་གསོལ། །དེ་ནས་ལྷ་རྣམས་གཡང་དུ་བླན། །མི་རྗེ་མོན་དཀར་བྱ་བ་དེ། །དེ་རིང་ཕྱྭ་དང་གཡང་དུ་བླན། །སྲས་རྗེ་འབྲི་ལྡོག་བྱ་བ་དེ། །དེ་རིང་ཕྱྭ་དང་གཡང་དུ་བླན། །ལྷ་བུ་ལྷ་བྲན་བྱ་བ་དེ། །དེ་རིང་ཕྱྭ་དང་གཡང་དུ་བླན། །ད་ནི་དཔལ་རྣམས་གཡང་དུ་བླན། །དཔལ་གྱི་མདའ་ནི་ལི་དམར་ལ། །གཡུ་ཡི་ཉི་མ་སྤུ་གྲི་རྒྱལ། །བཏགས་པ་ཕྱྭ་དང་གཡང་དུ་བླན། །རྣོ་མཚོན་སྲ་ཞིང་དཔལ་དུ་བྱོན། །དེ་རིང་ཧུ་ཡེ་ཧུ་ལྡན་ནོ། །དེ་རིང་ཕྱྭ་ཡེ་ཕྱྭ་ལྡན་ནོ། །ཕོ་ལྷ་གཡང་དུ་བླན་པ་ནི། །ཕ་ནི་བླ་རྗེ་དམར་པོ་ཡིན། །མ་ནི་དམ་སྲི་མ་ཡིན་ནོ། །བུ་ནི་ཕོ་ལྷ་དཀར་པོ་དང། །མོ་ལྷ་དེ་ནི་དཀར་མོ་ཡིན། །དེ་རིང་ཕྱྭ་དང་གཡང་དུ་བླན། །ད་ནི་ཁྱིམ་ལྷ་གཡང་དུ་བླན། །ཕ་ནི་སྤྱི་ལྷ་གང་པོ་དང༌། །མ་ནི་སྤྱི་གཙུག་རྒྱལ་མོ་ཡིན། །བུ་ནི་ཁྱིམ་ལྷ་གེ་ཐུང་ཡིན། །དེ་རིང་ཕྱྭ་དང་གཡང་དུ་བླན། །དེ་རིང་ཕྱྭ་ཡེ་ཕྱྭ་ལྡན་ནོ། །དེ་རིང་ཧུ་ཡེ་ཧུ་ལྡན་ནོ། །གསེར་གྱི་ཀ་བ་མ་ཞིག་ཅིག །གཡུ་ཡི་གདུང་མ་མ་ཆག་ཅིག །མཐིང་བུ་ལྷོག་ལྷོག་མ་བྱེད་ཅིག །ཕུ་རུ་གཡུ་སྦྲང་མ་ཞར་ཅིག །དབྱར་གསུམ་སྦྲ་ལ་ཐོག་མ་ལྷུང༌། །དགུན་གསུམ་གུར་ལ་མེ་མ་ཤོར། །དུང་གི་བྱ་ལག་མ་འཐོར་ཅིག །དངུལ་གྱི་ཆོན་ཐག་མ་འཆད་ཅིག །ཕྱི་སྒོ་ཕྱེ་བའི་ནང་ཤེད་ན། །རིན་ཆེན་གསེར་གྱི་མི་བོ་ཆེ། །གསེར་གྱི་སྦ་འཁར་ཕྱག་ན་བསྣམས། །ནང་སྒོ་ཕྱུག་མོ་བྱ་བ་ནི། །ལྕགས་ཀྱི་རྟེན་འཁར་ཕྱག་ན་བསྣམས། །ཕྱི་མི་སྐྱ་བོ་ནང་ལ་མ་གཏོང་ཅིག །ནང་མི་སྨུག་པོ་ཕྱིར་རུ་མ་འབུད་ཅིག །ལྷ་ལུག་ཐང་ལ་མ་འབུད་ཅིག །སྲིད་ཀྱི་གླང་ཆེན་ནང་ལ་མ་གཏོང་ཅིག །ཁྱིམ་ལྷ་ཕྱྭ་དང་གཡང་དུ་བླན། །ད་ནི་ཞིང་ལྷ་གཡང་དུ་བླན། །ཕ་ནི་སྤྲིན་སྟོང་ཡོངས་ཀྱི་རྗེ། །མ་ནི་བྱ་བཟང་མཐོང་གི་བཙུན། །སྲས་ནི་ཞིང་ལྷ་ཕ་ཝང་ཡིན། །ལོ་ལེགས་ལྗང་བའི་དུས་ནས་ལེགས། །དེ་རིང་ཞིང་ལྷ་གཡང་དུ་བླན། །ཕྱུགས་ལྷ་གཡང་དུ་བླན་པ་ནི། །ཕ་ནི་ཟླ་བཞི་ཕྱུག་པོ་ཡིན། །མ་ནི་ཉེར་བཞི་ཕྱུག་མོ་ཡིན། །སྲས་ནི་ཕྱུག་ལྷ་ཉེར་བུ་ཡིན། །དེ་རིང་ཕྱུགས་ལྷ་གཡང་དུ་བླན། །རྟ་ཡི་ལྷ་ནི་བྲེས་པོ་ཡིན། །འབྲི་ཡི་ལྷ་ནི་ཤམ་པོ་དང༌། །གཡག་གི་ལྷ་ནི་དུང་ཕོ་དང༌། །མཛོ་ཡི་ལྷ་ནི་དགེ་གོང་དང༌། །ལུག་གི་ལྷ་ནི་མེན་བུ་དང༌། །ར་ཡི་ལྷ་ནི་ཚེར་མོ་རྣམས། །དེ་རིང་ཕྱྭ་དང་གཡང་དུ་བླན། །ཐབ་ལྷ་གཡང་དུ་བླན་པ་ནི། །ཕ་ནི་བཙན་ལྷ་ཕུར་བུ་དང༌། །མ་ནི་བྱ་ལྡན་བཙུན་མོ་ཡིན། །བུ་ནི་ཐབ་ལྷ་རོག་པོ་ཡིན། །དེ་རིང་ཐབ་ལྷ་གཡང་དུ་བླན། །རྒན་པ་རྣམས་ཀྱི་ཚེ་སྲིངས་ལ། །གཞོན་པ་རྣམས་ཀྱི་དཔལ་བསྐྱེད་ཅིག །དེ་རིང་ཧུ་ཡེ་ཧུ་ལྡན་ནོ། །དེ་རིང་ཕྱྭ་ཡེ་ཕྱྭ་ལྡན་ནོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། །བྱང་ཆུབ་སེམས་དཔའ་ཆེན་པོ་རྣམས་དང་ལྷ་དང༌། ཀླུ་དང༌། གནོད་སྦྱིན་དང༌། །ནམ་མཁའ་ལྡིང་དང༌། །ལྷ་མ་ཡིན་དང་དྲི་ཟ་དང༌། །རྒྱ་མཚོ་དང་ཆུའི་ལྷ་ལ་སོགས་པ་ཐམས་ཅད་ཡི་རངས་ཏེ། །བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ།། །།