རྒན་པོའི་ཐད་གྲོལ་རིག་པའི་གཏམ། ཁྲག་འཐུང་བདུད་འཇོམས་རྡོ་རྗེ།
༄༅། །རྒན་པོའི་ཐད་གྲོལ་རིག་པའི་གཏམ་བཞུགས། ན་མོ་གུ་རུ་བུདྡྷཱ་ཡ། སེམས་ཉིད་རྒྱ་མཚོ་ལྟ་བུ་ལ། །འཁོར་འདས་གཟུགས་བརྙན་བཀྲ་བཞིན་ལགས། །གཟུགས་བརྙན་རྒྱ་མཚོ་གཅིག་གིས་ཆིངས། །རྒྱ་མཚོ་མངོན་གྱུར་ངང་ལ་ཞོག །སེམས་ཉིད་ནམ་མཁའི་རང་བཞིན་ལ། །སྣོད་བཅུད་མེད་བཞིན་སྣང་བ་སྟེ། །སྣོད་བཅུད་ནམ་མཁའ་གཅིག་གིས་ཆིངས། །ནམ་མཁའ་མངོན་གྱུར་ངང་ལ་ཞོག །སེམས་ཉིད་སྟོང་པ་ཁྱབ་བརྡལ་ལ། །ཆོས་ཀུན་རྟེན་འབྲེལ་སྒྱུ་མར་སྣང་། །ཆོས་ཀུན་སྟོང་ཉིད་གཅིག་གིས་ཆིངས་། །སྟོང་ཉིད་མངོན་གྱུར་ངང་ལ་ཞོག །སེམས་ཉིད་དག་མཉམ་རིག་པ་ལ། །འཁོར་འདས་དག་མཉམ་ཆེན་པོར་རྫོགས། །འཁོར་འདས་རིག་པ་གཅིག་གིས་ཆིངས། །རིག་པ་མངོན་གྱུར་ངང་ལ་ཞོག །སེམས་ཉིད་ཀ་དག་ཆོས་སྐུ་ལ། །སེམས་དང་སྣང་བ་མེད་བཞིན་ཤར། །སེམས་སྣང་ཆོས་སྐུ་གཅིག་གིས་ཆིངས། །ཆོས་སྐུ་མངོན་གྱུར་ངང་ལ་ཞོག །ལྟ་སྒོམ་སྤྱོད་པ་ལོགས་ན་མེད། །རྣམ་རྟོག་འགྱུ་བ་སྐྱེ་འགག་ཅན། །འཚོ་སྐྱོང་བྱས་ཀྱང་ཐོབ་ལེན་མེད། །ཁྱབ་བརྡལ་ཆེན་པོའི་དགོངས་པ་སྐྱོངས། །སངས་རྒྱས་ཀུན་གྱི་དགོངས་པ་ཡིན། །སྐལ་བར་ལྡན་ན་ཉམས་སུ་ལོངས་། །བདུད་འཇོམས་པས་སོ།། །།
༈ སྔོན་བྱོན་རྣལ་འབྱོར་དམ་པ་མང་པོ་ཡིས། །ཚེ་དང་སྒྲུབ་པ་མཉམ་སོང་རྟེན་འབྲེལ་འགྲིག །དེ་ཚེ་གནས་དང་བྱིན་རླབས་ཐོབ་ཡོད་དེ། །མདོ་མང་དགོན་གནས་དེ་ཡི་ཉེ་ཚལ་དུ། །སྒོམ་དང་སྒྲུབ་པ་ཉམས་ལེན་ཞིག་ཏུ་རེམ། །ལྷ་ས་བསམ་ཡས་ཡར་ལུང་ཁྲ་འབྲུག་སོགས། །གནས་ཆེན་རྣམས་ཀྱང་གོང་མའི་བྱིན་རླབས་ལས། །ས་དང་རི་ཕུག་བྱིན་ལྡན་ཡོད་མ་ཡིན། །དེ་ཚུལ་སོམས་ལ་གནས་དེར་མཚམས་སྒྲུབ་རེམ། །རྗེ་བཙུན་བཞད་པ་རྡོ་རྗེའི་ཞལ་ན་རེ། །ནམ་མཁའ་སྒོམ་དུ་བདེ་ལགས་ཀྱང་། །ལྷོ་སྤྲིན་བསྒོམ་དུ་ཅུང་མ་བདེ། །ལྷོ་སྤྲིན་ནམ་མཁའི་ཆོ་འཕྲུལ་ཡིན། །ནམ་མཁའ་རང་གི་ངང་ལ་ཞོག །གསུངས་པའི་དོན་དེ་ཡིད་ལ་དྲན་མཛོད་ལ། །ནམ་མཁའི་ངང་མངོན་ཆེན་པོ་རང་ལ་ཞོག །འཁོར་འདས་ཡོངས་ཀྱི་སྤྱི་གཞི་མ་ལགས་སམ། །བསྒོམ་བཅོས་མྱོང་ཞེན་མེད་པར་ཡིད་ཆེས་མཛོད། །རྒྱ་མཚོ་སྒོམ་དུ་བདེ་ལགས་ཀྱང་། །རྦ་རླབས་བསྒོམ་དུ་ཅུང་མ་བདེ། །རྦ་རླབས་རྒྱ་མཚོའི་ཆོ་འཕྲུལ་ཡིན། །རྒྱ་མཚོ་རང་གི་ངང་ལ་ཞོག །ཅེས་གསུངས་པས། རྒྱ་མཚོའི་གཟའ་སྐར་རྒྱ་མཚོར་མི་གཞན་བཞིན། །སྣང་སེམས་ཐམས་ཅད་ངོ་བོ་ལས་མི་གཞན། །ངོ་བོ་མངོན་གྱུར་ངང་ལ་ཡིད་ཆེས་ནས། །བྱར་མེད་བློ་མེད་སྤྲོས་བྲལ་རྗེན་པར་ཞོག །སེམས་ཉིད་བསྒོམ་དུ་བདེ་ལགས་ཀྱང་། །འགྱུ་བ་བསྒོམ་དུ་ཅུང་མ་བདེ། །འགྱུ་བ་སེམས་ཀྱི་ཆོ་འཕྲུལ་ཡིན། །སེམས་ཉིད་རང་གི་ངང་ལ་ཞོག །ཅེས་གསུངས་པས། སེམས་ཉིད་འཁོར་འདས་སྟོང་ཉིད་ཆེན་པོ་ཉིད། །མངོན་གྱུར་ངང་བཞག་སྒོམ་གྱི་དམ་པ་རུ། །ཤེས་ནས་ཡིད་ཆེས་ངང་དུ་བྱར་མེད་ཞོག །ད་ནི་འོད་གསལ་ཐོད་རྒལ་མྱུར་ལམ་ལ། །བརྟེན་ནས་ཚེ་སྒྲུབ་མཉམ་པ་ཞིག་ཏུ་རེམ། །གོ་གོ་ཤེས་ཤེས་རིག་རིག་མང་ན་ཡང་། འཆི་ཁ་ཕན་པ་ཨེ་བྱུང་རྒྱུད་ལ་བརྟག །ནམ་འཆི་ཚོད་ལ་སེམས་ཀྱིས་ཚད་མི་ཐེམས། །མྱུར་དུ་འཆི་ཆོས་གཤའ་མ་ཞིག་ལ་རེམ། །ཕྱི་ནང་བདེ་སྡུག་རེ་དོགས་ན་ཚ་རྐྱེན། །སྒྱུ་མ་རྨི་ལམ་ལྟ་བུ་ཉམས་ཀྱི་རིས། །བདེན་འཛིན་ཞེན་པ་མེད་པའི་ངང་ལ་ཞོག །མི་ཁྱོད་ཚེ་དང་སྒྲུབ་པ་མཉམ་པ་ཞིག །བྱུང་ན་མངོན་འཚང་རྒྱ་འགྱུར་ཐེ་ཚོམ་མེད། །མི་རྒན་གོམས་པའི་ཉམས་མྱོང་ལབ་མོ་དེས། །ཁྱོད་ཀྱི་རྒྱུད་ལ་ཕན་བདེ་འབྱུང་བར་ཤོག །རིག་འཛིན་རྡོ་རྗེའི་ངོར་བདུད་འཇོམས་པས་སྨྲས་པ་དགེའོ། །