ཀར་གླིང་ཞི་ཁྲོའི་སྐབས།
ཀར་གླིང་ཞི་ཁྲོའི་སྐབས། བདག་དོན་དུ་བསྙེན་པ་སྔོན་དུ་བཏང་བ་ལ་སྒོམ་རིམ་ལྷན་སྐྱེས་རང་གྲོལ་ལྟར་ལས་ཆོ་ག་དང་མ་འབྲེལ་ནའང་རུང་མོད། ད་ལྟ་ཧེ་པ་ཆོས་འབྱུང་གིས་གཏེར་གཞུང་གི་གནས་ལུགས་དང་མཐུན་པར་ཛ྄བ་ཁང་དབྱེ་བ་དང་། བཟླས་དམིགས་སྒྲུབ་ཆེན་ལྟར་འཕྲོ་འདུ་ཕྲིན་ལས་ཀྱི་རིམ་པ་ལས་གཞན་མ་བསྟན་པ་ནི། ལུས་དཀྱིལ་ལྟར་བསྙེན་པ་སྔོན་དུ་བཏང་དགོས་པའི་གསལ་ཁ་ཛ྄བ་བསྐུལ་མགོར་ཡིག་ཆུང་དུ་བཤད་པ་བཞིན་དང་། དེ་ལྟར་ནའང་མདུན་བསྐྱེད་ཛ྄བ་བསྐུལ་གྱི་དུས་སུ་ཛ྄བ་ཁང་དབྱེ་བ་མ་ཡིན་ནམ་སྙམ་ན། བཀའ་བརྒྱད་རང་ཤར་རྣམ་བཤད་ལས། བདག་མདུན་དབྱེར་མེད་སྐབས་དེ་ལྟར་དང་། མདུན་བསྐྱེད་ཡོད་ཚེ་དེ་ཉིད་གསལ་ཡང་གདབ་ཙམ་དུ་གསུངས་སོ། །དེས་ན་གྲོང་ཆོག་གི་སྐབས་སུ་མཆོད་རྫས་བྱིན་རླབས་ནས་སྒོམ་རིམ་ལྟར་བསྙེན་པ་སྔོན་དུ་བཏང་སྟེ། སྟོང་ཆེན་དེ་བཞིན་ཉིད་ཀྱི་ཏིང་ངེ་འཛིན་ངང་སྔ་མ་བསྡུ་ཞིང་། ཕྱི་མ་ལྡང་བ་ཡིན་ཅིང་། དེའི་ངང་ནས་ཤར་བ་ཉིད་བསྐྱེད་རྫོགས་ཟུང་འཇུག་གམ། བདག་མདུན་དབྱེར་མེད་ཡིན་ཕྱིར། གཏེར་གཞུང་ལས། ཕྱི་སྣོད་གཞལ་ཡས་ཁང་ཆེན་ཉིད༔ ནང་བཅུད་ལྷ་དང་ལྷ་མོར་གསལ༔ ལྷ་ཉིད་རང་ལ་རང་ཉིད་ལྷ༔ དབྱེར་མེད་དུ་མ་རོ་གཅིག་གནས༔ ཞེས་གསུངས་པ་ལྟར། ངོ་བོ་བདག་མདུན་བུམ་གསུམ་དབྱེར་མེད་ཡིན་པ་ལ། རྣམ་པ་སྒྱུ་འཕྲུལ་སོགས་ཀྱི་གླེང་གཞི་ལྟར། སྤྲུལ་གཞི་ཞི་བ་ལས་སྤྲུལ་པ་ཁྲོ་བོའི་དཀྱིལ་འཁོར་བྱུང་བ་སྟེ། གཏེར་གཞུང་ལས། སྣང་སྲིད་གཞིར་བཞེངས་རང་བྱུང་དཀྱིལ་འཁོར་དུ༔ ཆོས་སྐུ་ཞི་བའི་རིག་རྩལ་ཆོ་འཕྲུལ་ལས༔ གསུངས་པ་ལྟར༔ དེ་ཡང་སོར་སྐྱེས་མོས་པ་ལམ་བྱེད་ལྟར་བློས་ཀུན་ཏུ་བརྟག་པའི་བསྐྱེད་རིམ་ལ་སྟོང་
པས་རྒྱས་འདེབས་པ་ཉིད་ལ་ཟུང་འཇུག་གི་ཐ་སྙད་བརྟག་པ་ཙམ་མ་ཡིན་པར། གདོད་ནས་མ་སྐྱེས་ཡེ་ནས་རྣམ་དག་པའི༔ གསུངས་པ་བཞིན་ཡེ་ནས་ཡིན་པ་ལ་ཡིན་པ་བཞིན་ལམ་དུ་བྱས་ནས་མངོན་དུ་གྱུར་པའི་ཐབས་ཁྱད་དུ་འཕགས་པའོ། །བུམ་བཟླས་སྐབས། རྡོ་རྗེ་གསུམ་མཚོན་བྱེད། བུམ་པ། དུང་ཆུ། གཟུངས་རྡོར་གསུམ་མས་ནས་རིམ་བཞིན་བརྩེགས་པ་ལ་རྡོ་རྗེ་གསུམ་གྱི་ལྷ་སོ་སོར་གསལ་བ་ཉིད། མཐར་འབྲུ་གསུམ་བརྗོད་པས་འོད་དུ་ཞུ་ནས་སློབ་མའི་སྒོ་གསུམ་སྨིན་རུང་དུ་སྒྲུབ་པ་ནི་སྔ་འགྱུར་བའི་རྒྱུད་སྡེ་སྤྱི་དང་ཚོགས་ཆེན་འདུས་འགྲེལ་ལས་གསུངས་པས། རྒྱུད་སྡེ་འོག་མས་མཆོད་ཡོན་ཕུལ་བ་དང་མི་འདྲའོ། །འདི་དག་མཁས་གྲུབ་ཟམ་མ་ཆད་པ་ཀཿཐོག་བརྒྱུད་པའི་ཕྱག་བཞེས་ཡིན་པས་རང་སོར་བཞག་པར་བྱའོ། །