བདུད་རྩི་སྨན་གྱི་རྒྱལ་མོའི་གསོལ་མཆོད།
བདུད་རྩི་སྨན་གྱི་རྒྱལ་མོའི་གསོལ་མཆོད་བཞུགས་པའི་དབུ་ཕྱོགས་ལགས་སོ།།
མདུན་དུ་དུར་ཁྲོད་ཆེན་པོའི་ནང་། །མེ་འབར་ཁྲག་ཞག་རྒྱ་མཚོའི་དབུས། །ཐོད་པ་སྐམ་རློན་གཞལ་ཡས་སུ། །ཨོ་ལས་དུད་སོལ་ལྷ་མོ་ནག །ཞལ་གཅིག་ཕྱག་བཞི་རལ་གྲི་དང་། །ཐོད་ཁྲག་ཤཀྟི་རྩེ་གསུམ་འཛིན། །དུད་ཁྲོད་ཆས་བརྒྱན་མི་རོ་གསོལ། །བ་གླང་ལྤགས་པ་རེ་ལྡེ་བསྒོས། །སྦྲུལ་རྒྱན་ཞབས་གཉིས་ལྕགས་སྒྲོག་གསོལ། །བོང་བུ་གྲྭ་དམར་ཆིབས་པའོ། །ཐུགས་ཀར་འོད་འཕྲོས་སྔགས་ཕྲེང་ལས། །ཧཱུྃ་ལས་ཧཱུྃ་བྱུང་བྷ་གར་ཐིམ། །ཧཱུྃ་ལཱ་སྱ་རཱ་ག་ཡ་མི་སིཾ། ཧཱུཾ། རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེའུ་
མཐིང་དཀྱིལ་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནི། །གྲུ་གསུམ་འབར་བའི་གཞལ་ཡས་ཁང་། །དཔལ་ལྡན་ལྷ་མོ་དུད་སོལ་མ། །སྐུ་མདོག་ནག་མོ་འཇིགས་པའི་གཟུགས། །ཞལ་གཅིག་ཕྱག་བཞི་བོང་བུ་ཆིབས། །འཁོར་ཡང་ནག་མོ་འབུམ་དང་བཅས། །གནས་འདིར་སྤྱན་འདྲེན་གཤེགས་སུ་གསོལ། །ༀ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་ཨེ་ཨ་ར་ལི་ཧཱུྃ་ཧཱུྃ་ཛཿ བྷྱོ༔ རླུང་དམར་དྲག་པོའི་ཤུགས་ལྡན་བོང་བུ་སྟེང་། །དུར་ཁྲོད་ཆས་ལྡན་ཞབས་ལ་ལྕགས་སྒྲོག་གསོལ། །ཞལ་གདངས་མཆེ་
གཙིགས་ཀཱི་ལི་ཀཱི་ལ་སྒྲོགས། །དཔལ་ལྡན་འདོད་ཁམས་དབང་ཕྱུག་བརྟན་པར་བཞུགས། །ས་མ་ཡ་ཙཱ། དཔལ་ལྡན་ལྷ་མོ་ཁྱོད་ཀྱི་སྐུ་མྱུར་དུ་བདག་ལ་སྟོན་ཅིག །གལ་ཏེ་སྐུ་མི་སྟོན་ན་བདག་གི་ཡིད་ལ་ཅི་བསམ་པ་དེ་འགྲུབ་པར་གྱིས་ཤིག །ས་མ་ཡ་ཧཱ་ན་ཧཱན་མ་ཏི་ཀྲ་མ་ན་ཧཱུཾ་ཕཊ། དཔལ་ལྡན་ལྷ་མོ་འཁོར་བཅས་ལ། །ཁྲག་ཆེན་འབར་བའི་ཨརྒྷཾ་་དང་། །ཞག་ཆེན་མཁྲིས་པའི་ཞབས་བསིལ་དང་། །དབང་པོ་ལྔ་ཡི་མེ་ཏོག་དང་། །ཤ་ཆེན་གསུར་དང་ཞུན་ཆེན་མེ། །སྣ་ཚོགས་དྲི་ཡི་བྱུག་པ་དང་། །ཤ་ཆེན་ལྔ་ཡི་ཞལ་ཟས་དང་། །ཐོད་ཆེན་རྔ་དང་རྐང་ཆེན་དུང་། །དགྱེས་པའི་ཚུལ་གྱིས་བཞེས་སུ་གསོལ། །དེ་བི་ཀཱ་ལི་ས་པཱ་རི་ཝཱ་ར་ཨབྷཾ་སོགས། སྭ་བྷཱ་ཝ་སོགས། སྟོང་པའི་ངང་ལས་བྷནྡྷའི་སྣོད་སྟོང་གསུམ་དང་མཉམ་པའི་ནང་དུ་གཏོར་མ་ཁ་དོག་དྲི་རོ་ཕུན་སུམ་ཚོགས་པར་གྱུར། །ཨོཾ་ཨཱཿཧཱུྃ་ཧ་ཧོ་ཧི༔ ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ཨི་དཾ་བྷ་ལི་ཏ་ཁཱ་ཧི། མ་ཧཱ་མཱི་ས་ལ་ཁཱ་ཧི། མ་ཧཱ་རཀྟ་ལ་ཁཱ་ཧི། མ་ཧཱ་ཙིཏྟ་ལ་ཁཱ་ཧི། མ་ཧཱ་བ་སུ་ཏ་ལ་ཁཱ་ཧི། མ་ཧཱ་ཀཾ་ནི་རི་ཏི་ལ་ཁཱ་ཧི། མ་ཧཱ་ཨ་མྲྀ་ཏ་ལ་ཁཱ་ཧི། དཔལ་ལྡན་ལྷ་མོ་དུད་
པའི་སོལ་བ་མ། སྙིང་འཕྲོག་མ་གསུམ། རིགས་བཞིའི་ལྷ་མོ་དུར་ཁྲོད་ཀྱི་བདག་མོ་བརྒྱད། །ཕྲ་མེན་མ་བརྒྱད། །སྒོ་མ་བཞི། འཁོར་ནག་མོ་འབུམ་སྡེ་ལ་སོགས་པ་སྲིད་པའི་མ་མོ་ཐམས་ཅད་ཀྱི་ཞལ་དུ་དམ་རྫ་ས་བདུད་རྩིའི་གཏོར་མ་རྒྱ་ཆེན་པོ་འདི་འབུལ་ལོ། །ཡོངས་སུ་བཞེས་ལ་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་།། ཁྱད་པར་དུ་བདག་ཅག་འཁོར་དང་བཅས་པ་ལ། རླུང་མཁྲིས་བད་ཀན་ལས་གྱུར་པའི་ནད་ཐམས་ཅད་ཞི་བ་དང་ཡམས་ནད་རིམས་ནད་ཕྱུགས་ནད་ཐམས་ཅད་རྒྱུན་ཆད་པའི་ཕྲིན་ལས་དུས་རྟག་ཏུ་མཛོད་ཅིག །ལྷ་མོའི་དེ་ལྟར་བགྱིའོ་གསུངས་པར་བསམ། བྷྱོ། དགའ་བ་ཚལ་གྱི་དུར་ཁྲོད་ནས། །འདས་དང་མ་བྱོན་ད་ལྟར་གྱིས། །བསྟན་པ་སྲུང་བར་ཁས་བླངས་པའི། །དུད་སོལ་ལྷ་མོ་ཁྱོད་ལ་བསྟོད། །བྷྱོ། ལྷ་ལ་དབང་བསྒྱུར་ལྷ་མོ་དཔལ་འབར་མ། །དབང་ཕྱུག་སྲས་མོ་དཀར་མོ་དུང་སྐྱོང་མ། །སུམ་ཅུ་རྩ་གསུམ་གནས་ཀྱི་གཙོ་མོ་མཛད། །ལྷ་མོ་དཔལ་འབར་མ་ལ་བདག་བསྟོད་དོ། །ཧཱུཾ། ཀླུ་ལ་དབང་བསྒྱུར་ཀླུ་མོ་དཔལ་འབར་མ། །གཙུག་ན་རིན་ཆེན་བུ་མོ་ཡིད་འོང་མ། །རོལ་པའི་མཚོ་
བདུན་གནས་ཀྱི་གཙོ་མོ་མཛད། །ཀླུ་མོ་དཔལ་འབར་མ་ལ་བདག་བསྟོད་དོ། ། བྷྱོ། གནོད་སྦྱིན་དབང་བསྒྱུར་གནོད་སྦྱིན་དཔལ་འབར་མ། །གང་བ་བཟང་པོའི་བུ་མོ་ཤིང་། གྲིབ་ཅན། །ནགས་ཚལ་དྲྭ་བ་ཅན་གྱི་གཙོ་མོ་མཛད། །གནོད་སྦྱིན་དཔལ་འབར་མ་བདག་བསྟོད་དོ། །ཧཱུྃ། བདུད་ལ་དབང་བསྒྱུར་བདུད་མོ་དཔལ་འབར་མ། །རེ་ལྡེ་མགོ་ཉག་བུ་མོ་རེ་མ་ཏི། །བདུད་མཁར་རྩེ་དགུ་གནས་ཀྱི་གཙོ་མོ་མཛད། །བདུད་མོ་དཔལ་འབར་མ་ལ་བདག་བསྟོད་དོ། །དམ་རྫས་བརྒྱན་པའི་གཏོར་མ་འདི་བཞེས་ལ། །ཐུགས་དམ་རྒྱུད་བསྐུལ་བཅོལ་བའི་ཕྲིན་ལས་མཛོད། །ཕྱོགས་བཅུའི་འཇིག་རྟེན་བདུད་རྩིའི་བཅུད་བསྡུས་ལ། །ཟླ་བའི་དཀྱིལ་འཁོར་དག་ལ་ཐིམ་པར་མཛོད། །བདུད་རྩི་རླངས་པ་དཀར་པོའི་ཕྱོགས་རྣམས་ཀྱིས། །བཞི་བརྒྱ་རྩ་བཞིའི་ནད་རྣམས་རྩད་གཅོད་མ། །བདུད་རྩི་སྨན་གྱི་རྒྱལ་མོས་དམ་ལ་འདུས། །ཕྱོགས་བཅུའི་འཇིག་རྟེན་དུག་གི་བཅུད་བསྡུས་ནས། །ཉི་མའི་དཀྱིལ་འཁོར་དག་ལ་ཐིམ་པར་མཛོད།། །དུག་གི་རླངས་པ་ནག་པོའི་ཕྱོགས་རྣམས་ཀྱིས། །བཞི་བརྒྱ་རྩ་བཞིའི་ནད་རྣམས་སློང་མཛད་མ། །དེ་ཕྱིར་ནད་
ཀྱི་བདག་མོས་དམ་ལ་འདུས། །གང་ཞིག་ཁྱོད་ལ་དད་ན་མ་བས་བྱམས། །དེ་ཕྱིར་མ་གཅིག་ནད་བདག་སྨན་གྱི་གཙོ། །ལྷ་མོ་ཁྱོད་ལ་བདག་གིས་རྟག་ཏུ་བསྟོད་། །སངས་རྒྱས་ཤཱཀྱ་ཐུབ་པའི་སྤྱན་སྔ་རུ། །བདག་གི་དེང་ནས་ཇི་སྲིད་འཁོར་བའི་བར། །དཀར་པོའི་ཕྱོགས་ཀྱི་ནད་དང་སྡུག་བསྔལ་ཀུན། །།ཞི་བར་བྱ་ཕྱིར་ཚེ་དང་ལོངས་སྤྱོད་འཕེལ། །ནག་པོའི་ཕྱོགས་རྣམས་འགུགས་ཤིང་དབང་དུ་སྡུད། །སྨྱོ་འབོག་བསད་པ་ལ་སོགས་ལས་འདི་དག་།བསྟན་པ་སྲུང་ཞིང་བདག་གིས་བསྒྲུབ་པར་བགྱི། །དེ་ལས་འགལ་ན་རྒྱལ་བའི་བཀའ་བསླུས་པས། །དུས་གསུམ་རྒྱལ་བའི་རྡོ་རྗེའི་མགོ་འགེམ་ཤོག །དེ་སྐད་རྒྱལ་བའི་སྤྱན་སྔར་དམ་བཅས་པའི། །དམ་བཅས་བཞིན་དུ་ལས་རྣམས་འགྲུབ་པར་མཛོད། །རྣལ་འབྱོར་བདག་དང་བདག་གི་འཁོར་རྣམས་ལ། །ཞལ་ནས་བདུད་རྩི་ཆར་གྱི་རྒྱུན་ཕོབ་ལ། །ནད་སོགས་སྡུག་བསྔལ་ཚོགས་ནི་ཞི་བར་མཛོད། །ཚེ་དང་བསོད་ནམས་དཔལ་འབྱོར་རྒྱས་པར་མཛོད། །ཟང་ཟིང་ལོ་ཏོག་འབུ་ཡི་ཕུང་པོ་དང་། །རིན་ཆེན་རྐང་འགྲོའི་ཕྱུགས་རྣམས་འཕེལ་བར་མཛོད། །ཨོཾ་ཧཱུྃ་ཤྲཱི་ཡ་
དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ནད་སརྔ་ཤཱནྟཾ་ཀུ་རུ་ཡེ་སྭ་ཧཱ། སྔགས་དེ་ཅི་ནུས་བཟླས་པ་བྱ་བའི་ཚེ། །ལྷ་མོའི་ཐུགས་ཀར་ཉི་མའི་དཀྱིལ་འཁོར་སྟེང་། །ཧཱུྃ་མཐིང་དེ་ལ་སྔགས་ཕྲེང་གཡོན་དུ་འཁོར། །ཧཱུྃ་གི་ཐིག་ལེའི་ཉི་མའི་དཀྱིལ་འཁོར་གྱུར། །དེ་ལས་འོད་འཕྲོས་བདག་དང་བསྲུང་བྱ་ཡི། །ནད་ཀུན་སིབ་སིབ་བསྡུས་ནས་ཉི་མར་བསྟིམ། །ཧཱུྃ་གི་ཟླ་ཚེས་ཟླ་བའི་དཀྱིལ་འཁོར་གྱུར། །དེ་ལས་འོད་འཕྲོས་འཇིག་རྟེན་ཁམས་རྣམས་ཀྱི། །བདུད་རྩི་བཅུད་བསྡུས་ལྷ་མོའི་སྤྱི་བོ་རུ། །བུམ་པ་དཀར་པོའི་ནང་ཞུགས་བདུད་རྩི་གྱུར། །ལྷ་མོའི་ཞལ་ཞུགས་སྐུ་ལུས་ངང་ལྟེམས་གང་། །ལྷ་མོའི་སྐུ་མདོག་སྟོན་ཀའི་ཟླ་ལྟར་གྱུར། །བདུད་རྩིའི་ཟེག་མ་འཁོར་ཀུན་ཞལ་དུ་ཞུགས། །ལུས་གང་ཐམས་ཅད་དཀར་པོ་ཤ་སྟག་གྱུར། །གཙོ་མོའི་བདུད་རྩི་མ་ཤོང་སྐྱུག་པའི་ཚུལ། །འོ་མའི་མདོག་འདྲ་བདེ་བའི་རེག་བྱ་ཅན། །ཆར་བབ་བཞིན་ནམ་ཆུ་བོའི་གཞུང་བཞིན་བབས། །རང་དང་བསྲུང་བྱ་ཀུན་གྱི་ཚངས་དབུག་གང་། །ཁ་ནས་ཞུགས་ཏེ་ལུས་ཀུན་ངང་ལྟེམ་གང་། །མ་མོའི་གདུག་རྩུབ་མཁའ་འགྲོའི་ཁ་རླངས་དང་། །ནད་རིམས་ཐམས་ཅད་རླངས་པ་སྔོ་དམར་གྱི། །ཚུལ་དུ་དབང་པོའི་སྒོ་དང་བ་སྤུ་ཡི། །བུ་ག་ནས་ཐོན་ནམ་མཁའི་འཇའ་ལྟར་ཡལ། །ལྷ་མོ་གཙོ་འཁོར་སེམས་ཀྱི་སྣང་བ་རྣམས། །རང་ལས་གཞན་དུ་མ་གྲུབ་སེམས་ཉིད་འདི། །ཡེ་ནས་འཕགས་བཞི་བསྐྱེད་མཛད་ཡུམ་ཆེན་མོ། །དོན་དམ་ལྟ་བའི་ངང་ལ་མཉམ་པར་བཞག །བུད་མེད་རྒྱན་ལྡན་དཀར་གསུམ་
སྟེར་བ་དང་། །ཁྲུས་བྱེད་ཉི་མ་ཤར་ཕྱོགས་ལྟས་བཟང་འབྱུང་། །གལ་ཏེ་ཐུན་མཚམས་གཏོར་མ་འབུལ་འདོད་ན། །བཀུག་པ། ཞུག་བྱའམ་མ་བྱས་ནའང་རུང་། །ངོ་བོ་གནོད་བྱེད་དགྲ་བགེགས་ཤ་ཁྲག་ལ། །རྣམ་པ་ཡེ་ཤེས་བདུད་རྩིའི་རྒྱ་མཚོ་དམིགས། ཧཱུྃ། དུར་ཁྲོད་བདག་མོ་དངོས་གྲུབ་ཞལ། །གཏུམ་མོ་གཅིགས་བྱེད་ཡི་དྭགས་ཁ། །དམ་ཚིག་སྲུང་མ་ཁྲག་དགའ་མ། །ཀཱི་ལའི་སྒྲ་སྒྲོག་སྦྱོར་ཟིན་མ། །དུར་ཁྲོད་རོ་ཡི་ཚར་དབུས་སུ། །ཚོགས་དང་ཕོ་ཉར་བཅས་པ་རུ། །གཅིགས་བྱེད་ལྷ་མོ་དུད་སོལ་མ། །གསོལ་ཅིག་བཞེས་ཤིག་དམ་ཚིག་ལྷ། །གནས་སུ་གནས་པར་མཛད་དུ་གསོལ། །བདག་གི་ཡིད་ལ་ཅི་འདོད་པ། །དེ་ནི་ཁྱེད་ཀྱིས་འགྲུབ་པར་མཛོད། །བདག་གི་ལས་ནི་ཅི་བྱེད་ཀྱང་། །དེ་ལ་ཀུན་གྱིས་གྲོགས་གྱིས་ཤིག །ཨོཾ་གྷྲི་ཧྞ་གྷྲི་ཧྞ་སརྦ་ཥྚཾ་བྷཀྵ་ཕ་ཕྲུཾ་ཕྲེཾ་སམ་ཧཱུཾ་ཕཊ། གཏོར་མ་བྱང་ཤར་ལྷ་མོ་གནས་ཕྱོགས་ཡུལ། །ལྷ་མོ་འཁོར་བཅས་དེ་ཕྱོགས་གཤེགས་པར་བསམ། །སྐུ་གཟུགས་དར་ནག་ཡོད་ན་དེ་ལ་བསྟིམ་པར་དམིགས། །ཞེས་པ་འདི་ནི་རྒྱལ་ཟླའི་དམར་ཕྱོགས་ཀྱི། ཚེས་དབུ་ལྷ་མོ་རྒྱུ་བའི་དུས་ཆེན་གྱི། སྲོད་ཐུན་ལྷ་མོ་བྱོན་པའི་དུས་ཆེན་ལ། མི་དབང་ཆེན་པོའི་ཐུགས་བཞེད་བཀའང་བའི་སླད། རྭ་ག་ཨ་སྱས་ངག་ནས་སྨོད་པ་ལྟར། བེ་ཁྲོས་དགེ་བཤེས་
པདྨ་སྦྱིན་པས་བྲིས། །ཉེས་འགལ་མཆིས་ན་ལྷ་མོའི་ཚོགས་ལ་བཤགས། །དགེའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།