ཨེ་མ་ཧོཿབདེ་གཤེགས་སྙིང་པོས།

ཨེ་མ་ཧོ༔ བདེ་གཤེགས་སྙིང་པོའི་ངང་མདངས་ཟླ་རྒྱས་བཞིན༔ གདུལ་བྱའི་སྣང་ངོར་ཆུ་ཟླའི་རྣམ་འགྱུར་ངོམ༔ རང་སྣང་སྟོན་པ་མཆོག་དེར་གསོལ་བ་འདེབས༔ བདག་རྟོགས་འཁྲུལ་བ་ཞིག་པར་བྱིན་གྱིས་རློབས༔ མེད་བཞིན་འཁྲུལ་བ་མངོན་ཞེན་འཐས་པ་ཡི༔ གདུལ་བྱ་བློ་དམན་རིགས་རྣམས་ཁ་དྲངས་ཕྱིར༔  བརྒྱུད་གསུམ ་བླ་མར་གྲགས་ལ་གསོལ་བ་འདེབས༔ གནས་ལུགས་མངོན་དུ་གྱུར་བར་བྱིན་གྱིས་རློབས༔ བསྐལ་བཟང་སངས་རྒྱས་མངོན་བྱོན་བླ་མ་མཆོག༔ རྣལ་འབྱོར་དབང་ཕྱུག་ནུས་ལྡན་རྡོ་རྗེ་གྲགས༔ ཤེས་རབ་ཕུལ་ཕྱིན་འཕགས་པ་ཤྭ་རིས་བུ༔ ཡང་དག་མངོན་གྱུར་རིག་འཛིན་ཧཱུྃ་ཀ་ར༔ ཁྲོ་ལོད་དངོས་གྱུར་འགྲོག་བན་ཁྱེའུ་ཆུང་༔ ཆོས་ཉིད་མངོན་གྱུར་གྲུམ་གྱི་མཁར་ནག་བ༔ སྨོན་ལམ་གྲུབ་པ་ཧེ་པ་ཆོས་འབྱུང་བ༔ གྲུབ་པ་བརྒྱད་བརྙེས་བདུད་འདུལ་རྡོ་རྗེ་རྩལ། མཁའ་སྤྱོད་གནས་ཉུལ་བདུད་འདུལ་རོལ་བ་རྩལ༔ ཆོས་ཉིད་ཀློང་རྡོལ་རྡོ་རྗེ་ཁྲོ་བོ་ལོད༔ འགྲོ་འདྲེན་སྤྲུལ་པ་བརྒྱ་ཕྲག་རིག་འཛིན་ཤར༔ རྒྱལ་ཀུན་དགོངས་པ་འདུས་པར་གསོལ་བ་འདེབས༔ འཁོར་བ་དོང་སྤྲུགས་ནུས་པར་བྱིན་གྱིས་རློབས༔ ཕྱི་མའི་དུས་སུ་རྡོ་རྗེ་དྲག་པོ་རྩལ༔ གདུལ་བྱ་ཐེར་འབུམ་དང་བཅས་དབྱེར་མེད་དུ༔ ཤམ་པ་ལ་རུ་རྡོ་རྗེ་རྣོན་པོར་འགྱུར༔ མ་འོངས་སངས་རྒྱས་མོས་པ་མཐའ་ཡས་ཀྱི༔ ཁམས་གསུམ་འཁོར་བ་དོང་ནས་སྤྲུགས་པར་བྱེད༔ བླ་མེད་བླ་མ་མཆོག་ལ་གསོལ་བ་འདེབས༔ ཁྱེད་ལ་རྩེ་གཅིག་གསོལ་བ་བཏབ་པའི་མཐུས༔ ཁྲེགས་ཆོད་ཆོས་ཉིད་བདེན་པ་མངོན་མཐོང་ཞིང་༔ ཐོད་རྒལ་སྣང་བཞིའི་ཉམས་ལེན་མཐར་ཕྱིན་ནས༔ གཞོན་ནུ་བུམ་སྐུར་ཡང་དག་སངས་རྒྱས་ཤོག༔ ཅེས་པ་འདི་ནི་ཐེག་པ་མཆོག་གི་ལམ་ལ་སྔོན་སྨོན་ལམ་གྱི་འབྲེལ་བའི་སྐྱེས་བུ་མཉྫུ་ཤྲིས་ནན་ཏུ་བསྐུལ་ངོར་བདུད་འཇོམས་པས་སྨྲས་པའོ། །དགེའོ། །དགེའོ། །དགེའོ། །སརྦ་མངྒ་ལཾ། །