གཤིན་རྗེ་གཤེད་ནག་པོའི་སྒྲུབ་པའི་ཐབས།
གྷོ་ཥ་བཛྲ།
རྒྱ་གར་སྐད་དུ། །ཀྲྀཥྞ་ཡ་མཱ་རི་སཱ་དྷ་ནཾ། བོད་སྐད་དུ། །གཤིན་རྗེ་གཤེད་ནག་པོའི་སྒྲུབ་པའི་ཐབས། བཅོམ་ལྡན་འདས་གཤིན་རྗེ་གཤེད་པོ་ལ་ཕྱག་འཚལ་ལོ། །དཔལ་ལྡན་གཤིན་རྗེ་གཤེད་ནག་ལ། །ཕྱག་འཚལ་ནས་ནི་དཔལ་འཛིན་གྱི། །གདམས་པ་ལ་བརྟེན་སྒྲུབ་ཐབས་ནི། །མདོར་བསྡུས་བྱིས་པས་རྟོགས་ཕྱིར་བྲི། །དེ་ལ་སྔགས་པ་ངེས་པར་འགྲོ་བ་ཐམས་ཅད་བསྒྲལ་བར་འདོད་པའི་བློ་དང་ལྡན་པས་དུར་ཁྲོད་ལ་སོགས་པའི་བསམ་གཏན་གྱི་གནས་སམ། གནས་ལ་ལར་ཙནྡན་ལ་སོགས་པས་བྱུགས་ལ། འདོད་ཆགས་ལ་སོགས་པའི་ཉོན་མོངས་པ་དང་ལྡན་པའི་སེམས་ཅན་རྣམས། བསོད་ནམས་ཀྱི་ཚོགས་དང་མི་ལྡན་པས་འཁོར་བ་ལས་བསྒྲལ་བར་མི་ནུས་པས་ན། དང་པོར་བསོད་ནམས་ཀྱི་ཚོགས་བསག་པར་བྱ་བའི་ཕྱིར་བདེ་བའི་སྟན་ལ་འདུག་སྟེ། རང་གི་སྙིང་གར་སྣ་ཚོགས་པདྨ་དང་ཉི་མའི་སྟེང་དུ། ཡ་སྔོན་པོ་འོད་ཟེར་དང་བཅས་པ་བལྟས་ལ། དེའི་འོད་ཟེར་གྱིས་སེམས་ཅན་ཐམས་ཅད་གཤིན་རྗེ་གཤེད་དུ་བྱས་ནས་ཡང་འོད་ཟེར་དེས་བླ་མ་དང་སངས་རྒྱས་ལ་སོགས་པ་མདུན་དུ་སྤྱན་དྲངས་ཏེ། དེ་དག་ལ་མངོན་པར་ཕྱག་བྱས་ལ་ས་བོན་གྱི་འོད་ཟེར་སྔོན་པོ་ལས་བྱུང་བའི་མཆོད་པའི་སྤྲིན་སྣ་ཚོགས་སྒེག་མོ་ལ་སོགས་པ་དང༌། མེ་ཏོག་ལ་སོགས་པའི་ཞེན་པ་དང་བྲལ་བས་ཡང་དག་པར་མཆོད་དོ། །དེ་ནས་སྡིག་པ་བཤགས་ཤིང་བསོད་ནམས་ལ་རྗེས་སུ་ཡི་རང་བ་དང༌། ཡོངས་སུ་བསྔོ་བ་དང༌། གསུམ་ལ་སྐྱབས་སུ་འགྲོ་བ་ལ་སོགས་པ་བྱའོ། །དེ་མ་ཐག་པའི་ཞིང་ལ་ཚད་མེད་པ་བཞི་བསྒོམ་མོ། །དེ་ནས་རྟེན་མུཿ་ཡིས་གཤེགས་སོ། །དེ་ནས་ཡེ་ཤེས་ཀྱི་ཚོགས་ལ་ནན་ཏན་བྱ་སྟེ། སྣ་ཚོགས་སྟོང་པ་ཉིད་དུ་བསྒོམ་ཞིང༌། ཨོཾ་ཤཱུ་ནྱ་ཏཱ་ཛྙཱ་ན་བཛྲ་སྭ་བྷཱ་ཝ་ཨཱཏྨ་ཀོ྅ཧཾ། ཞེས་བརྗོད་ལ། དེ་ནས་སྟོང་པའི་བདག་ཉིད་ལས། ཨཾ་ལས་ཉི་མའི་སྟེང་དུ། ཧཱུཾ་ལས་རྡོ་རྗེ་སྔོན་པོ་ཁ་གྱེས་པ་བསྒོམ་པར་བྱའོ། དེ་ལས་བྱུང་བའི་རྡོ་རྗེའི་ཚོགས་ཀྱིས་རྡོ་རྗེའི་ས་གཞི་དང༌། ར་བ་དང་གུར་བསྒོམ་པར་བྱའོ། །
དེའི་དབུས་སུ་སྐད་ཅིག་གིས་ཆོས་འབྱུང་གྲུ་གསུམ་པ་དཀར་པོའི་ནང་དུ། སྣ་ཚོགས་པདྨ་དང༌། སྣ་ཚོགས་རྡོ་རྗེའི་ལྟེ་བ་ལ་པཾ་ཡོངས་སུ་གྱུར་པ་ལས། སྣ་ཚོགས་པདྨའི་སྟེང་དུ་རཾ་ལས་ཉི་མའི་དཀྱིལ་འཁོར་གྱི་སྟེང་དུ་ཡཾ་ཡིག་ལས་རྡོ་རྗེ་སྔོན་པོ་འོད་ཟེར་བཅས་པ་བསམས་ཏེ། དེའི་འོད་ཀྱིས་ཐོག་མ་མེད་པ་ནས་གྲུབ་པའི་གཤིན་རྗེ་གཤེད་གསལ་བར་བྱས་ནས། སླར་བཀུག་སྟེ། དེ་དག་ཡོངས་སུ་གྱུར་པ་ལས་གཤིན་རྗེ་གཤེད་དུ་བསྒོམ་པར་བྱའོ། །དེ་ཡང་སྐུ་མདོག་ནག་པོ་གཡས་དཀར་ཞིང༌། གཡོན་དམར་བ། རྡོ་རྗེ་རལ་གྲི་དང༌། འཁོར་ལོ་དང་པདྨ་དང༌། གྲི་གུག་དང་ཐོད་པ་བསྣམས་པའི་ཕྱག་དྲུག་པ། མ་ཧེའི་སྟེང་ན་གཡོན་བརྐྱང་བས་བཞུགས་པ། སྤྲུལ་གྱི་རྒྱན་གྱིས་བརྒྱན་པ། མི་མགོ་རློན་པའི་ཕྲེང་བ་འཕྱང་བ། སྟག་གི་པགས་པའི་ཤམ་ཐབས་ཅན། རུས་པའི་རྒྱན་གྱིས་བརྒྱན་པ། དབུ་སྐྲ་དང་སྨ་ར་སེར་པོ་གྱེན་དུ་ལངས་པ། ཞལ་མཆེ་བ་རྣམ་པར་གཙིགས་པ་བསམས་ལ། དེ་ནས་སྤྱི་བོ་དང་མགྲིན་པ་དང་སྙིང་ག་རྣམས་སུ་ཨོཾ་ཨཱཿ་ཧཱུཾ་ཞེས་བྱ་བའི་ཡི་གེ་རྣམས་བསམ་པར་བྱའོ། །དེ་ནས་མིག་ལ་སོགས་པ་སྐྱེ་མཆེད་བྱིན་གྱིས་བརླབ་པར་བྱ་སྟེ། མིག་ཏུ་ཀྵིཾ་ངོ༌། །རྣ་བ་དག་ཏུ་ཛྲིཾ་ངོ༌། །སྣ་ལ། ཁཾ་ངོ༌། །དཔྲལ་བར་ནི་ཀཾ་ངོ༌། །ལྟེ་བར་ནི་སཾ་ངོ༌། །དེ་ནས་སྙིང་གའི་འོད་ཟེར་གྱིས་བསྐུལ་བས་དེ་བཞིན་གཤེགས་པའི་སྤྲུལ་པ་རྡོ་རྗེ་ཙ་རྩི་ཀཱ་ལ་སོགས་པས་བདུད་རྩི་རྣམ་པ་ལྔས་གང་བའི་བུམ་པ་བཟུང་ནས་དབང་བསྐུར་བར་བྱའོ། །དེ་ནས་སྙིང་གའི་འོད་ཟེར་ལྕགས་ཀྱུ་ལྟ་བུས་ཡེ་ཤེས་ཀྱི་རྡོ་རྗེ་མདུན་དུ་བལྟས་ཏེ། དེ་ལ་མཆོད་པ་ལྔས་ཡང་དག་པར་མཆོད་ལ། ཛཿ་ཧཱུཾ་བཾ་ཧོཿ་ཞེས་བརྗོད་པས་དགུག་པ་དང་གཞུག་པ་དང༌། བཅིང་བ་དང་དབང་དུ་བྱ་བའོ། །དེ་ནས་ཆོ་ག་བཞིན་དུ་མཆོད་པར་བྱའོ། །དེ་ནས་བསྒོམས་པས་སྐྱོ་ན་བཟླས་པ་བྱ་སྟེ། ཨོཾ་ཧྲཱིཿ་ཥྚྲཱྀཾཿ་ཝི་ཀྲི་ཏཱ་ན་ན་ཧཱུཾ་ཧཱུཾ་ཕཊ་ཕཊ་སྭཱ་ཧཱ། ལྡང་བའི་དུས་སུ་ཡང་མཆོད་པ་བྱས་ལ། ཨོཾ་ཨཱཿ་ཧཱུཾ་མུཿ་ཞེས་བྱ་བས་ཡེ་ཤེས་ཀྱི་རྡོ་རྗེ་གཤེགས་སུ་གསོལ་ལོ། །ཐུན་སོ་སོ་ལ་ཇི་ལྟར་རྙེད་པའི་གཏོར་མ་བདུད་རྩི་ལྔའི་ངོ་བོར་སྦྱངས་ལ། སྔགས་འདིས་ཕྱོགས་སྐྱོང་རྣམས་ལ་དབུལ་བར་བྱའོ། །ཨོཾ་ཨིནྡྲཱ་ཡ་ཧཱུཾཿ་ཡ་མཱ་ཡ་ཥྚྲྀཿ་ཝ་ར་ཎཱ་ཡ་ཝི།
ཀུ་བེ་རུ་ཡ་ཀྲྀ། ཨི་ཤྭ་ནཱ་ཏ། ཨགྣ་ཡེ་ཨཱ། ནཻ་རྀར་ཏ་ཡེ་ན། བཱ་ཡ་བེ་ན། ཨཱརྐ་ཡེ་ཧཱུཾ། ཙནྡྲ་ཡེ་ཧཱུཾ། བྲཧྨ་ཎྀ་ཕཊ། བ་སུ་དྷ་ར་ཡེ་ཕཊ། བེ་མ་ཙི་ཏྲ་ཡེ་སྭཱ། སརྦ་བྷཱུ་ཏེ་བྷྱོ་ཧཱ། ཧ་ཧཱ་ཧི་ཧཱི། ཧཱུཾ་ཧཱུཾ་ཕེཾ་ཕེཾ་སྭཱ་ཧཱ། དེ་ནས་ཟས་ཟ་བའི་ཆེ་ན། བུད་རྩི་རྣམ་པ་ལྔས་སྦྱངས་ལ། དེ་ཉིད་གསུམ་གྱིས་བྱིན་གྱིས་བརླབས་ཏེ། ལྕེ་རྡོ་རྗེའི་སྦྱོར་བས་བཟའ་བར་བྱའོ། །གཤིན་རྗེ་གཤེད་ཀྱི་སྒྲུབ་ཐབས་འདི། །བྱས་པས་དགེ་བ་གང་ཐོབ་པ། །འཇིག་རྟེན་གསུམ་ནི་མ་ལུས་པ། །ནག་པོའི་ལས་འདིས་འདའ་བར་ཤོག །གཤིན་རྗེའི་དགྲ་ནག་པོ་སྒྲུབ་པའི་ཐབས་སློབ་དཔོན་གྷོ་ཥ་བཛྲས་མཛད་པ་རྫོགས་སོ།། །།བལ་པོའི་མཁན་པོ་སུ་མ་ཏི་ཙནྡྲའི་ཞལ་སྔ་ནས་དང༌། བོད་ཀྱི་ལོ་ཙཱ་བ་བནྡེ་ཚོགས་ཆག་ཆུང་བས་བསྒྱུར་ཅིང་ཞུས་ཏེ་གཏན་ལ་ཕབ་པའོ།།