གུ་རུའི་ཐུགས་སྒྲུབ་ཀྱི་ཆ་ལག་ཚེ་འགུགས་བསྡུས་པ།
གུ་རུའི་ཐུགས་སྒྲུབ་ཀྱི་ཆ་ལག་ཚེ་འགུགས་བསྡུས་པ་ནི། བླ་ཚེ་ཆད་ཉམས་ཡར་བ་དགུག་པའི་ཕྱིར། །མདའ་དར་སྣ་ལྔ་ཐོགས་ལ་འདི་ལྟར་བརྗོད།། ཧཱུྃ་ཧྲཱིཿ ཆོས་སྐུའི་ཚེ་བདག་ཀུན་བཟང་སྣང་མཐའ་ཡས། །ཁྱེད་ཀྱི་མཁྱེན་བརྩེ་ནུས་པའི་དཔལ་ཡོན་གྱིས། །དོན་བརྒྱུད་དགོངས་པ་ཆོས་སྐུའི་ཚེ་བཅུད་བསྡུས། །སེམས་ཀྱི་ཁམས་ནས་ཉམས་པའི་བླ་ཚེ་གསོས། །འཁྲུལ་མེད་ཐུགས་ཀྱི་ཚེ་དབང་དངོས་གྲུབ་སྩོལ། །མཉམ་ཉིད་བློ་འདས་ཏིང་འཛིན་རྒྱས་ཐོབ་ཅིག །ཨོཾ་གུ་རུ་དྷརྨ་ཀཱ་ཡ་ཨ་ཡུ་སིདྡྷི་ཧཱུྃ་ཧྲཱིཿ ཧཱུྃ་ཧྲཱིཿ ལོངས་སྐུའི་ཚེ་བདག་ཐོད་ཕྲེང་རིགས་མཆོག་ལྔ། །ཁྱེད་ཀྱི་མཁྱེན་བརྩེ་ནུས་པའི་དཔལ་ཡོན་གྱིས། །ཁ་སྦྱོར་བདུན་ལྡན་ལོངས་སྐུའི་ཚེ་བཅུད་བསྡུས། །ངག་གི་ཁམས་ནས་ཉམས་པའི་བླ་ཚེ་གསོས། །འགགས་མེད་གསུང་གི་དངོས་གྲུབ་སྩལ་དུ་གསོལ། །གཞོམ་མེད་སྒྲ་གྲགས་སྔགས་ཀྱི་རྒྱས་ཐོབ་ཅིག །ཨོཾ་གུ་རུ་སམ་བྷོ་ཀཱ་ཡ་ཨ་ཡུ་སིདྡྷི་ཧཱུྃ་ཧྲཱིཿ ཧཱུྃ་ཧྲཱིཿ སྤྲུལ་སྐུའི་ཚེ་བདག་རིག་འཛིན་པདྨ་འབྱུང་། །ཁྱེད་ཀྱི་མཁྱེན་བརྩེ་ནུས་པའི་དཔལ་ཡོན་གྱིས། །སྟོབས་སོགས་མཐའ་ཡས་སྤྲུལ་སྐུའི་ཚེ་བཅུད་བསྡུས། །ལུས་ཀྱི་ཁམས་ནས་ཉམས་པའི་བླ་ཚེ་གསོས། །འགྱུར་མེད་སྐུ་ཡི་ཚེ་དབང་དངོས་གྲུབ་སྩོལ། །མ་འདྲེས་གསལ་སྟོང་མཚན་དཔེའི་རྒྱས་ཐོབ་ཅིག །ཨོཾ་གུ་རུ་ནིརྨ་ཀཱ་ཡ་ཨ་ཡུ་སིདྡྷི་ཧཱུྃ་ཧྲཱིཿ ཧཱུྃ་ཧྲཱིཿ ཚེ་དང་ཡེ་ཤེས་དཔག་མེད་བཅོམ་ལྡན་འདས། །ཁྱེད་ཀྱི་མཁྱེན་བརྩེ་ནུས་པའི་དཔལ་ཡོན་གྱིས། །སྲིད་དང་ཞི་བའི་ཁམས་ཀྱི་ཚེ་བཅུད་བསྡུས། བླ་ཚེ་ཆད་ཉམས་ཡར་བ་སོར་ཆུད་ཅིང་། །མི་ཤིགས་རྡོ་རྗེ་གསུམ་གྱི་ཚེ་དབང་སྩོལ། །མི་འགྱུར་ལྷུན་གྱིས་གྲུབ་པའི་རྒྱས་ཐོབ་ཅིག །ཨོཾ་ཨ་མི་དྷེ་ཝ་ཨ་ཡུ་སིདྡྷི་ཧཱུྃ་ཧྲཱིཿ ཧཱུྃ་ཧྲཱིཿ ཆེ་མཆོག་ཡོངས་འདུས་དབང་དྲག་ཧེ་རུ་ཀ །ཁྱེད་ཀྱི་མཁྱེན་བརྩེ་ནུས་པའི་དཔལ་ཡོན་གྱིས། །མཐུ་རྩལ་སྟོབས་ནུས་དྲེགས་བྱེད་ཚེ་བཅུད་བསྡུས། །འཁྱམས་དང་བརྐུས་ཕྲོག་ཁྱེར་བའི་བླ་ཚེ་ཁུག །སྐྱེ་འཆིའི་འཇིགས་བྲལ་ཚེ་དབང་དངོས་གྲུབ་སྩོལ། །ཡོན་ཏན་ཕྲིན་ལས་སྟོབས་ཀྱི་རྒྱས་ཐོབ་ཅིག །ཨོཾ་གུ་རུ་ཤྲཱི་ཧེ་རུ་ཀ་ཨ་ཡུ་སིདྡྷི་ཧཱུྃ་ཧྲཱིཿ ཚེ་དང་ཡེ་ཤེས་དཔག་མེད་གཟུངས་ཀྱང་བརྗོད། །རྒྱ་གྲམ་མགོར་བཞག་རྒྱས་གདབ་བྱ་བ་ནི།། ཧཱུྃ་ཧྲཱིཿ ངོ་བོ་སྐྱེ་མེད་རྣམ་དག་ཆོས་སྐུའི་རྒྱ། །རང་བཞིན་འགགས་མེད་གསལ་སྟོང་ལོངས་སྐུའི་རྒྱ། །ཐུགས་རྗེ་ཀུན་ཁྱབ་འགྲོ་འདུལ་སྤྲུལ་སྐུའི་རྒྱ། །སྐུ་གསུམ་བདེ་གཤེགས་དགོངས་པས་རྒྱས་གདབ་བོ། །ཨོཾ་དྲ་དྲ་ཤག །མུ་ཏྲ་ཧོ། རཀྵནྟུ། ཏིཥྛ་ལྷན། ཞེས་བརྗོད་སྐབས་ཀྱི་སྨོན་ལམ་ཤིས་བརྗོད་བྱ། །རིན་ཆེན་སྨན་འབྲུ་མེ་ཏོག་སིལ་མ་འཐོར། །ཨི་ཐི་རྒྱ༔