གཏུམ་པོ་མཐིང་གའི་བླ་མའི་རྣལ་འབྱོར།
༈ ༡ མི་གཡོ་བ་རིགས་བཞིའི་རྫོགས་རིམ་ཆོས་དྲུག་གི་གཏུམ་མོའི་སྐབས། གཏུམ་པོ་མཐིང་གའི་བླ་མའི་རྣལ་འབྱོར་བསྒོམ་པར་སྤྲོ་ན། ཨ༔ རང་མདུན་ནམ་མཁར་འོད་ལྔའི་ཀློང་༔ པད་ཉི་ལྷ་བུའི་བདུད་ཀྱི་སྟེང་༔ བླ་མ་འོད་གསལ་མི་གཡོ་བ༔ ཨིནྡྲ་ནི་ལ་དྭངས་པའི་མདོག༔ ཞབས་གཡས་པུས་བཙུགས་གདན་ལ་རོལ༔ གཡོན་པ་བཞེངས་མ་སྟབས་སུ་བཞུགས༔ ཕྱག་གཉིས་རལ་གྲི་སྡིགས་མཛུབ་ལས༔ ཡེ་ཤེས་མེ་ལྕེ་དུམ་བུར་འཕྲོ༔ ཁྲོ་གཏུམ་བཟོད་དཀའི་གཟི་བྱིན་ཅན༔ དར་དང་རིན་ཆེན་སྦྲུལ་གྱིས་བརྒྱན༔ ཆུ་ཟླ་འཇའ་ཚོན་ལྟ་བུ་ཡི༔ གནས་གསུམ་ཨོཾ་ཨཱཧཱུྃ་གིས་མཚན༔ ཞེས་སོགས་སྦྱར། བཟླས་པའི་སྐབས། རྩ་བའི་མཚན་སྔགས་ཁོ་ནས་ཀྱང་རུང་མོད། སོ་སོར་བཟླ་བར་སྤྲོ་ན། ཨོཾ་ཨཱཿཧཱུྃ་མ་ཧཱ་གུ་རུ་ཙཎྜ་མ་ཧཱ་རོ་ཥ་ཎ་ཀཱ་མ་དེ་བ་མཱ་ར་སེ་ན་པྲ་མཛྙཱ་ན་སྭཱ་ཧཱ། །ཞེས་སྦྱར་
རོ། །སྒྱུ་ལུས་སོགས་ཆོས་དྲུག་ལྷག་མ་རྣམས་ཀྱི་སྐབས། གཏུམ་པོ་སེར་པོའི་བླ་མའི་རྣལ་འབྱོར་ནི། ཨ༔ རང་མདུན་ནམ་མཁར་འོད་ལྔའི་ཀློང་༔ པད་ཉི་ཕུང་པོའི་བདུད་ཀྱི་སྟེང་༔ བླ་མ་སྣང་– སྟོང་མི་གཡོ་བ༔ གསེར་མདོག་ཁྲོ་གཏུམ་བརྗིད་པའི་ཉམས༔ རྡོ་རྗེ་དྲིལ་བུ་ཐུགས་ཀར་བསྣོལ༔ ཞབས་གཉིས་རྡོ་རྗེའི་སྐྱིལ་སྒྲུང་བཞུགས༔ འོད་ཟེར་རབ་འབར་སྤྱན་གསུམ་པ༔ དར་དང་རིན་ཆེན་སྦྲུལ་གྱིས་བརྒྱན༔ སྣང་བཞིན་སྟོང་ལ་སྟོང་བཞིན་སྣང་༔ མེ་ལོང་དྭངས་པར་གཟུགས་བརྙན་བཞིན༔ ཆུ་ཟླ་དང་ནི་འཇའ་ཚོན་ལྟར༔ རང་བཞིན་མ་གྲུབ་ཅིར་ཡང་གསལ༔ སྒྱུ་འཕྲུལ་དྲྭ་བ་ཆེན་པོའི་ཚུལ༔ ཡེ་ཤེས་མེ་ཕུང་འབར་བའི་ཀློང་༔ གསལ་འགྲིབ་བྲལ་བའི་ཕྱག་རྒྱར་ཤར༔ གནས་གསུམ་ཨོཾ་ཨཱཿཧཱུྃ་གིས་མཚན༔ སོགས་སྦྱར། སྔགས། ཨོཾ་ཨཱཿཧཱུྃ་མ་ཧཱ་གུ་རུ་ཙཎྜ་མ་ཧ་རོ་ཥ་ཎ་ཧཱུྃ་ཧཱུྃ་ཧཱུྃ་སྭཱ་ཧཱ༔ ཞེས་སོ། །ཐབས་ལམ་སྐབས་གཏུམ་པོ་དམར་པོའི་བླ་མའི་རྣལ་འབྱོར་ནི༔ ཨ༔ རང་མདུན་ནམ་མཁར་འོད་ལྔའི་ཀློང་༔ པད་ཉི་ཉོན་མོངས་བདུད་ཀྱི་སྟེང་༔ བླ་མ་བདེ་ཆེན་མི་གཡོ་བ༔ སྐུ་མདོག་དམར་གསལ་ཆགས་པའི་ཉམས༔ ཕྱག་གཡས་དབང་སྡུད་ཕྱག་རྒྱ་ཡིས༔ རྡོ་རྗེའི་གྲི་གུག་ནམ་མཁར་གདེང་༔ གཡོན་པའི་སྡིགས་མཛུབ་ཞགས་པ་བསྣམས༔ ཞབས་ཟུང་པུས་གཡོན་གདན་
ལ་བཙུགས༔ གཡས་པ་བཞེང་ཚུལ་སྟབས་ཀྱིས་བཞུགསཿ དར་དང་རིན་ཆེན་སྦྲུལ་རྒྱན་བཅས༔ ཡེ་ཤེས་མེ་ཕུང་དབུས་ན་རོལཿ སྣང་སྟོང་སྒྱུ་མའི་སྐུར་གསལ་བའི༔ གནས་གསུམ་ཨོ་ཨཱཧཱུྃ་གི་མཚན༔ སོགས་དང་། སྔགས། ཨོཾ་ཨཱཿཧཱུྃ་མ་ཧཱ་གུ་རུ་ཙཎྜ་མ་ཧཱ་རོ་ཥ་ཎ་མ་ཧཱ་སུ་ཁ་སིདྡྷི་ཧཱུྃ་ཧཱུྃ་ཧཱུྃ་སྭཱ་ཧཱ། །ཞེས་སྦྱར་རོ། །ༀ་ཙཎྜ་མ་ཧཱ་རོ་ཥ་ཎ་ཧཱུྃ་ཕཊ། །མི་གཡོ་བའི་སྔགས་ཡི་གེ་བཅུ་པ་མངྒ་ལཾ།། །།