རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོའི་དཀྱིལ་འཁོར་དུ་རས་བྲིས་ལ་བརྟེན་ཏེ་སྒྲུབ་མཆོད་བྱ་བ་ལ་ཉེ་བར་མཁོ་བའི་ཆོ་ག་ཕན་བདེའི་ཉི་མ། མདོ་སྔགས་བསྟན་འཛིན་བཟང་པོ།

རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོའི་དཀྱིལ་འཁོར་དུ་རས་བྲིས་ལ་བརྟེན་ཏེ་སྒྲུབ་མཆོད་བྱ་བ་ལ་ཉེ་བར་མཁོ་བའི་ཆོ་ག་ཕན་བདེའི་ཉི་མ་ཞེས་བྱ་བ་བཞུགས་སོ། །ༀ་སྭ་སྟི་པྲ་ཛཱ་བྷྱཿ རྒྱལ་བ་ཀུན་ཡུམ་ཤེས་རབ་ཕར་ཕྱིན་མ། །འཇིག་རྟེན་དགེ་ལེགས་སྒྲུབ་ཕྱིར་གཟའ་རྣམས་ཀྱི། །ཡུམ་དུ་ཟློས་པའི་རིག་པ་ཆེན་མོ་དང་། །དབྱེར་མེད་རྗེ་བཙུན་བླ་མ་གཙུག་ཏུ་མཆོད། །གང་གི་དཀྱིལ་འཁོར་མཆོད་པའི་མན་ངག་ནི། །འཇམ་མགོན་བླ་མས་གསལ་བར་ཕྱེས་མོད་ཀྱང་། །དབང་གི་ཆོ་ག་གཞན་ལ་ལྟོས་པ་ལས། །མེད་ཕྱིར་བརྒྱུད་པའི་ཕྱག་བཞེས་བཞིན་དུ་འབྲི། །འདིར་རྣམ་འབྱོར་གྱི་དབང་ཕྱུག་ཆེན་པོ་འགྲན་ཟླ་དང་བྲལ་བ། །མཁས་པ་རྣམས་ཀྱི་གཙུག་གི་ནོར་བུར། །དཔལ་བིར་བའི་གསུང་གི་མན་ངག་འཛམ་བུའི་གླིང་གི་རྒྱན་དམ་པ་སློབ་དཔོན་ཞི་བ་འཚོ་ལས་བརྒྱུད་དེ། །འཁོན་ནཱ་གནྡྲེ་རཀྵི་ཏ་ལ་སོགས་པ་འཁོན་གདུང་གོང་མ་རྣམས་ལ་བཀའ་བབས་པའི་རྗེ་བཙུན་མ་རིག་པ་ཆེན་མོའི་རས་བྲིས་ཀྱི་དཀྱིལ་འཁོར་དུ་དབང་བསྐུར་བ་ལ་སྟ་གོན་དང་དངོས་གཞི་གཉིས་ལས། དང་པོ་ནི། གནས་ཡིད་དུ་འོང་བར་སྟེགས་བུ་རས་བཟང་པོས་བཀབ་པའི་སྟེང་དུ། མཎྜལ་ལ་དྲིའི་ཐིག་ལེ་དང་མེ་ཏོག་གི་ཚོམ་བུ་ལྷ་གྲངས་བཞིན་བཀོད་པ་མཉྫིའི་སྟེང་དུ་བཤམས། དེའི་འོག་ཏུ་ས་ལྷའི་ཚོམ་བུ་མཆོད་གཏོར་བཅས་དང་། མཐའ་སྐོར་དུ་དཀྱིལ་འཁོར་གྱི་སྤྱི་མཆོད་མཚམས་འཛིན་གྱི་མེ་ཏོག་དང་། ཆུ་གཉིས་ཉེས་སྤྱོད་ལྔས་གཡས་སྐོར་དུ་གྲུ་བཞིར་བཤམ་ཞིང་། དེའི་ཕྱི་རོལ་དུ་སྒོས་མཆོད་སྤོས་མར་མེ་ཞལ་ཟས་གསུམ་ལྷ་གྲངས་དང་མཉམ་པའམ་ཅི་འབྱོར་བ་བཤམ། མཆོད་ཆོག་ཏུ་གཟའ་བརྒྱད་སོ་སོའི་མཎྜལ་དང་ཉེར་སྤྱོད་བཤད་པ་བཞིན་འབྱོར་ན་དགོས་མོད། དབང་བསྐུར་གྱི་སྐབས་སུ་ནི་ཕལ་ཆེར་སྤྱི་འགྲོ་འདི་ཙམ་གྱིས་ཆོག་པར་མཛད། ཤར་དུ་དཀྱིལ་འཁོར་བའི་གཏོར་མ་དང་། ལྷོར་ཆ་གསུམ་གཏོར་མ་དང་། ལོགས་ཤིག་ཏུ་སྔོན་འགྲོའི་གཏོར་མ་དང་། སློབ་མ་སྟ་གོན་ལ་དགོས་པའི་ཡོ་བྱད་རྣམས་ཚོགས་པར་བྱ། སློབ་དཔོན་གྱི་མདུན་དུ་བུམ་པ་གཉིས་ལ་ནང་རྫས་ཉེར་ལྔ་ཁ་རྒྱན་མགུལ་ཆིངས་སོགས་སྤྱི་ལྟར་དང་། རྡོ་རྗེ་དྲིལ་བུ་འདུས་བྱས་ལ་གྲུབ་ན་ཐེག་ཆེན་གསོ་སྦྱོང་བླང་བ་ནས་སྔོན་གཏོར་དང་བདག་བསྐྱེད་བཟླས་པ་མཆོད་བསྟོད་གསོལ་གདབ་བཅས་དཀྱིལ་ཆོག་བདེ་ལེགས་ཀུན་ཕན་ལྟར་གྲུབ་ནས། སྟ་གོན་དངོས་ལ་བཞི་ལས། ས་ལྷ་སྟ་གོན་ནི། ཚོམ་བུ་བསང་སྦྱངས་སྟོང་པའི་ངང་ལས་པྂ་ལས་པདྨ་དང་ཨ་ལས་ཟླ་བའི་སྟེང་དུ་བྂ་ལས་སའི་ལྷ་མོ་སྐུ་མདོག་སེར་མོ་ཞི་བའི་ཆ་ལུགས་དང་། རྒྱན་གྱིས་བཀླུབས་པ། ཕྱག་གཉིས་ཀྱིས་རིན་པོ་ཆེའི་བུམ་པ་ཐུགས་ཀར་འཛིན་པ། དེའི་དཔྲལ་བར་ༀ། །མགྲིན་པར་ཨཱཿ ཐུགས་ཀར་ཧཱུྃ། རང་གི་ཐུགས་ཀའི་ཧཱུྃ་ལས་འོད་ཟེར་འཕྲོས་པས། ས་འོག་ནས་སའི་ལྷ་མོ་འཁོར་དང་བཅས་པ་ༀ་བཛྲ་ས་མཱ་ཛ༔ ཛཿ་ཧཱུྃ་བཾ་ཧོ། སླར་ཡང་ཐུགས་ཀའི་ཧཱུྃ་ལས་འོད་ཟེར་འཕྲོས་པས་དབང་གི་ལྷ་རིགས་ལྔ་འཁོར་དང་བཅས་པ་ༀ་བཛྲ་ས་མཱ་ཛ༔ དེ་བཞིན་གཤེགས་པ་ཐམས་ཅད་ཀྱིས་འདི་ལ་མངོན་པར་དབང་བསྐུར་བ་སྩལ་དུ་གསོལ། དེ་བཞིན་གཤེགས་པ་རྣམས་ཀྱིས་བུམ་པའི་ཆུས་སྤྱི་བོ་ནས་དབང་བསྐུར། སྐུ་གང་། དྲི་མ་དག་ཆུའི་ལྷག་མ་ཡར་ལུད་པ་ལས་རིན་ཆེན་འབྱུང་ལྡན་གྱིས་དབུར་བརྒྱན་པར་བསམ། དེ་ལ། ༀ་པྲི་ཐི་ཝཱི་དེ་ཝཱི་ས་པ་རི་ཝཱ་ར་ཨརྒྷྂ་པྲ་ཏཱིཙྪ་སྭཱ་ཧཱ། ཤབྡའི་བར་མཚམས་སྔགས་རེ་རེ་བཞིན་སྦྱར་བས་མཆོད། གཏོར་མ་ཆུས་བྲན་ལ། བསང་སྦྱངས། སྟོང་པའི་ངང་ལས་ༀ་ལས་རིན་པོ་ཆེའི་སྣོད་དུ་གཏོར་མ་འདོད་ཡོན་ལྔ་དང་ལྡན་པ་བདུད་རྩིའི་རྒྱ་མཚོ་ཆེན་པོར་གྱུར། ༀ་ཨཱཿཧཱུྃ། ལན་གསུམ་གྱིས་བྱིན་གྱིས་བརླབས། ༀ་པྲི་ཐི་དེ་ཝཱི་ས་པཱ་རི་ཝཱ་ར་ༀ་ཨ་ཀ་རོ་སོགས་ལན་གསུམ་ལ་མཆོག་སྦྱིན་སེ་གོལ་གཏོགས་པ་དང་བཅས་པས་ཕུལ། སྤོས་དང་རྡོར་དྲིལ་འཛིན་པ། སྐྱོབ་པ་སངས་རྒྱས་ཐམས་ཅད་ཀྱི། །སྤྱོད་པའི་ཚུལ་དང་ཁྱད་པར་གྱི། །ས་དང་ཕ་རོལ་ཕྱིན་པ་ལ། །ལྷ་མོ་ཁྱོད་ནི་དཔང་དུ་གྱུར། །ཤཱཀྱ་སེང་གེ་སྐྱོབ་པ་ཡིས། །ཇི་ལྟར་བདུད་ཀྱི་སྡེ་བཅོམ་པ། །དེ་བཞིན་བདག་གིས་བདུད་སྡེ་ལས། །རྒྱལ་བར་བྱས་ཏེ་དཀྱིིིལ་འཁོར་འབྲི། །ཞེས་ལན་གསུམ་གསོལ། རིག་པ་འཛིན་པ་ཁྱོད་དཀྱིལ་འཁོར་གྱི་ལས་ཅི་བདེ་བར་གྱིས་ཤིག །ཅེས་གནང་བ་བྱིན་པར་བསམས་ལ། ལག་གཡས་ས་ལ་རེག་སྟེ། ༀ་བཛྲ་མུཿ སའི་ལྷ་མོ་ས་དེ་ཉིད་ལ་ཐིམ་ཞེས་བརྗོད། ལྷ་སྟ་གོན་ནི། མཆོད་པ་རྣམས་བྱིན་རླབས་གོང་ལྟར་ལ། དྷརྨ་ར་ཎི་མི་དགོས། ཚོམ་བུ་བསང་སྦྱངས་ནས་མདུན་བསྐྱེད་བཞིན་གཙོ་འཁོར་རྒྱས་པ་བསྐྱེད་བསྟིམ་དང་། བསྟོད་པ་བཏང་ནས་འདས་གཏོར། ཆ་གསུམ་གཏོར་མ་སྤྱི་ལྟར་ལ་ཕྱོགས་འབྱུང་གཉིས་ཀྱི་མགོར་འབྲུ་གསུམ་ལན་གསུམ་བརྗོད་པས་བྱིན་རླབས། བདེན་བདར་གྱི་སྔོན་དུ་ཨ་མྲི་ཏ་བཟླ་གཞན་འདྲའོ། །སྙན་གསན་དབབས་པ་ནི། སྤོས་དང་བཅས་པའི་རྡོར་དྲིལ་འཛིན་པས། །བཅོམ་ལྡན་འདས་མ་གཟའ་རྣམས་ཡུམ། །རིག་པའི་རྒྱལ་མོར་ཕྱག་འཚལ་བསྟོད། །དཀྱིལ་འཁོར་ཐུགས་རྗེ་ཆེའི་བདག་ཉིད། །མགོན་པོ་བདག་ནི་འབྲི་བར་འཚལ། །སློབ་མ་རྣམས་ལ་བརྩེ་བ་དང་། །ཁྱེད་ལ་མཆོད་པ་བྱ་བའི་ཕྱིར། །བཅོམ་ལྡན་བདག་ནི་གུས་པ་ལ། །དེ་བས་བཀའ་དྲིན་མཛད་པར་འོས། །འགྲོ་བ་འཁོར་ལོའི་དོན་མཛད་པའི། །སངས་རྒྱས་བདག་ལ་དགོངས་སུ་གསོལ། །འབྲས་གནས་བྱང་ཆུབ་སེམས་དཔའི་དང་། །སྔགས་ཀྱི་ལྷ་གཞན་གང་ལགས་དང་། །འཇིག་རྟེན་སྐྱོང་བའི་ལྷ་རྣམས་དང་། །གང་ཡང་འབྱུང་པོ་མཐུ་ཆེན་དང་། །གངས་སུ་རྡོ་རྗེའི་སྤྱན་ལྡན་རྣམས། །བདག་ལ་དགོངས་པར་མཛད་དུ་གསོལ། །རིག་པ་འཛིན་པ་བདག་གིས་ནི། །རིག་པ་ཆེན་མོའི་དཀྱིལ་འཁོར་འདི། །འགྲོ་བ་དག་ཕྱིར་བདག་འབྲི་བས། །བདག་དང་སློབ་མར་བཅས་པ་ལ། །ཐུགས་རྗེས་ཐུགས་དཔག་མཛད་ནས་ཀྱང་། །དཀྱིལ་འཁོར་བར་བཅས་ཐམས་ཅད་ཀྱིས། །ཐུགས་རྗེས་དགོངས་ཏེ་གནང་བར་མཛོད། །ཅེས་ལན་གསུམ་གྱིས་སྙན་གསན་ཕབ་པའི་མཐར། རིག་པ་འཛིན་པ་ཁྱོད་གཞན་དོན་རྒྱ་ཆེ་བར་གྱིས་ཤིག །ཅེས་གནང་བ་བྱིན་པར་བསམ་མོ། །བུམ་པ་སྟ་གོན་ནི། རྣལ་རྒྱལ་བུམ་པའི་སྟེང་དུ་མཆོད་ཡོན་གཟུངས་རྡོར་བཅས་བཞག་ལ། བསང་སྦྱངས་ནས་བཟུང་འོད་ཞུ་བར་བུམ་བསྐྱེད་ཇི་ལྟ་བ་བཞིན་དང་སློབ་མ་སྟ་གོན་ནི་གཞན་དུ་ཤེས་ཤིང་། རྗེས་ནི་མཆོད་པ་རྣམས་ཁ་གསོས་ལ་བསང་སྦྱངས་བྱིན་གྱིས་བརླབས། མཆོད་བསྟོད་འདོད་དོན་གསོལ་གདབ་ཡིག་བརྒྱས་ནོངས་པ་བཟོད་གསོལ་བཅས་གོང་གི་བུམ་ཆོག་ལྟར་བྱས་ལ། རྡོ་རྗེ་དྲིལ་བུ་འཛིན་པས་མཐེའུ་ཆུང་སྦྲེལ། མཛུབ་མོ་བརྐྱངས་ཏེ་རྩེ་སྤྲོད་པས་སྤྱི་བོར་བཟློག་ཅིག །ༀ་བཛྲ་བེ་ག་ཀྲ་མ་ཧོཿ སྟ་གོན་གྱི་ལྷ་རྟེན་དང་བརྟེན་པར་བཅས་པ་ནམ་མཁར་བཞུགས་པར་གྱུར། རང་གི་དཔྲལ་བར་ༀ་སོགས་ཀྱིས་སྲུང་བ་དང་། བསྔོ་བ་བཀྲ་ཤིས་བཅས་བྱ་བ་ནི་སྟ་གོན་ནོ། །གཉིས་པ་དངོས་གཞི་དང་རྗེས་སོགས་ནི་དཀྱིལ་ཆོག་བདེ་ལེགས་ཀུན་ཕན་བཞིན་དང་། དབང་བསྐུར་དངོས་སྟར་དང་རྡུལ་ཚོན་གྱི་བྱ་བ་སོགས་ནི་གཞན་དང་གཞན་དུ་ཤེས་དགོས་པ་ཁོ་ནའོ། །སྨྲས་པ། འཇིག་རྟེན་དར་རྒུད་བྱེད་པོ་གཟའ་སྐར་རྣམས། །འཕགས་མའི་ཐ་ཚིག་རྡོ་རྗེའི་ཁོར་ཡུག་ལས། །གཞར་ཡང་མི་འདའ་དེ་ཕྱིར་ཡུམ་སྲས་ཀྱི། །དཀྱིལ་འཁོར་བསྙེན་དང་མཆོད་ལ་ཅིས་མ་བརྩོན། །འོན་ཏང་འཇུག་ཅིང་མངོན་པར་དབང་བསྐུར་བའི། །ཆོག་གཞུང་རང་སྐྱ་ཐུབ་པ་མི་སྣང་བས། །སྔགས་གྲྭའི་སྲོལ་དང་བརྒྱུད་པའི་གསུང་སྒྲོས་ལས། །འཇམ་དབྱངས་ལྷ་ལྔའི་དབང་དང་མཐུན་ཞེས་འབྱུང་། །དེ་བཞིན་གཡར་ཁྲལ་ཙམ་མིན་ལྷག་བསམ་གྱིས། །སྡེབ་པའི་དགེ་བས་འགྲོ་རྣམས་རྫོགས་ལྡན་པའི། །དུས་སྟོན་གསར་བས་རོལ་ཞིང་སྒྲིབ་བྲལ་དབྱིངས། །ཐམས་ཅད་རིག་པའི་ཡེ་ཤེས་ཆུབ་གྱུར་ཅིག །ཅེས་རྗེ་བཙུན་མ་གཟའ་ཐམས་ཅད་ཀྱི་ཡུམ་རིག་པ་ཆེན་མོའི་དཀྱིལ་འཁོར་དུ་སློབ་མ་དབང་བསྐུར་བའི་ཆོ་ག་ཕན་བདེའི་ཉི་མ་ཞེས་བྱ་བ་འདི་ནི་སྔོན་ཆད་བརྒྱུད་པའི་ཕྱག་བཞེས་ཀྱིས་ཨ་ར་པ་ཙ་ན་ལྷ་ལྔ་དབང་ཆོག་ལ་ཕྲི་བསྣན་ཁ་བསྒྱུར་གང་དགོས་མཛད་པ་ལས་དཀྱིལ་ཆོག་རང་སྐྱ་ཐུབ་བ་མེད་པར་བརྟེན། དབང་རྒྱུན་ཡང་ཤིན་ཏུ་དཀོན་པས་ཁོ་བོ་སྤྲང་བཙུན་ངག་དབང་ལེགས་གྲུབ་ཀྱིས་ཀུན་གཟིགས་འཇམ་དབྱངས་བླ་མའི་ཞབས་དྲུང་དུ་འབད་པ་ཆེན་པོས་ཞུས་པའི་རྗེས་སུ། སྔགས་གྲྭ་ཆེན་པོ་གོང་དཀར་རྡོ་རྗེ་གདན་གྱི་སྒྲུབ་མཆོད་པ་རྣམས་ཀྱི་ངག་འདོན་ཐོ་ཆུང་ཞིག་འདུག་པ་དང་། འཇམ་དབྱངས་ལྷ་ལྔའི་དཀྱིལ་ཆོག་སྔ་ཕྱི་རྣམས་ལ་བརྟེན་ནས་མདོ་སྨད་ཤར་ཁར་སྡོམ་བུར་ཆས་པའི་ལམ་བར་རྣམས་སུ་བྲིས་པའོ། །ཞེས་པ་འདི་ལ་སྟ་གོན་དང་། དངོས་གཞིའི་ཆོ་ག་བལྟབ་བདེ་བཀླག་ཆོག་མ་སོ་སོར་དཔལ་སྤྲུལ་མདོ་སྔགས་བསྟན་འཛིན་བཟང་པོས་སྡེབས་པ་སརྦ་ཐཱ་མངྒལཾ།། །།