ཐུན་མོང་མ་ཡིན་པའི་གླེང་གཞི།
གཉིས་པ་ཐུན་མོང་མ་ཡིན་པའི་གླེང་གཞི་ནི། སྒྲ་ཐལ་འགྱུར་ལས། གཞན་ལས་ཁྱད་པར་འཕགས་དོན་དུ། །ཐུན་མོང་མིན་པས་ལུས་ལ་སྦྱར། །ཞེས་གསུངས་པས། སྔར་བསྟན་པའི་ཚུལ་གྱིས་ཐུན་མོང་བའི་ཐེག་པའི་གླེང་གཞི་ལྔ་ལས་ཁྱད་པར་དུ་འཕགས་པའི་རྡོ་རྗེ་སྙིང་པོའི་གླེང་གཞི་ཕུན་སུམ་ཚོགས་པར་བསྟན་པ་དེ་ཡང་བརྗོད་བྱེད་ཚིག་གི་གླེང་གཞིའི་རིམ་པ་སྟེ། གླེང་གཞི་དེས་མཚོན་པའི་བརྗོད་བྱ་དོན་གྱི་གླེང་གཞི་ནི་ཟབ་ཅིང་རྒྱ་ཆེ་བ་སྟེ། དེ་ཡང་གདོད་མ་གཞིའི་དུས་ནའང་ཕུན་སུམ་ཚོགས་པ་ལྔ་ལྡན་དུ་བཞུགས་ཤིང་། དེ་ལས་འཁྲུལ་ཏེ་ཁམས་གསུམ་འཁོར་བའི་སེམས་ཅན་གྱི་དུས་ནའང་ཕུན་སུམ་ཚོགས་པ་ལྔ་ལྡན་དུ་ཡོད་ལ། འཁྲུལ་པ་(༣༣)དེ་མཐར་ཐུག་གྲོལ་བའི་དུས་ནའང་ཕུན་སུམ་ཚོགས་པ་ལྔ་ལྡན་དུ་གནས་པར་བསྟན་པས་ན་འདི་ལ་དོན་རྣམ་པ་གསུམ་སྟེ། གཞི་འདུག་ཚུལ་གྱི་ཕུན་སུམ་ཚོགས་པ་ལྔ། ལམ་ཉམས་སུ་བླང་བའི་ཕུན་སུམ་ཚོགས་པ་ལྔ། མཐར་ཐུག་འབྲས་བུའི་ཕུན་སུམ་ཚོགས་པ་ལྔའོ། །དང་པོ་ལ་ལྔ་ཡོད་པའི། གཞིའི་གནས་ཕུན་སུམ་ཚོགས་པ་ནི་ཆོས་ཀྱི་དབྱིངས་སྤྲོས་པ་དང་བྲལ་བའོ། །གཞིའི་སྟོན་པ་ཕུན་སུམ་ཚོགས་པ་ནི་རང་བྱུང་གི་ཡེ་ཤེས་སོ། །གཞིའི་འཁོར་ཕུན་སུམ་ཚོགས་པ་ནི་སྐུ་དང་ཡེ་ཤེས་སོ། །གཞིའི་བསྟན་པ་ཕུན་སུམ་ཚོགས་པ་ནི་བདེ་ཆེན་འགགས་པ་མེད་པའོ། །ཞེས་ཀྱང་འདུག །གནས་ལུགས་རྫོགས་པ་ཆེན་པོའི་དེ་བཞིན་ཉིད་དོ། །གཞིའི་དུས་ཕུན་སུམ་ཚོགས་པ་ནི་ཐོག་མ་དང་ཐ་མ་མེད་པའོ། །དེ་སྐད་དུའང་རིན་ཆེན་སྤུངས་པ་ལས། མེད་པའི་སྟོང་གནས་ཆོས་འབྱུང་ལས། །ཡེ་ཐོག་དང་པོའི་སངས་རྒྱས་ཀྱིས། །རིགས་དང་ཡེ་ཤེས་ཁྱད་པར་ལས། །ཆོས་ཉིད་སྟོང་པའི་རང་སྒྲར་ནི། །ཡེ་ནས་ཆོས་ཀྱི་འཁོར་ལོ་བསྐོར། །ཐོག་མ་བར་དང་མཐའ་མེད་པར། །ཞེས་སོ། །
གཉིས་པ་ལ། གནས་པ་ལུས་ཀྱི་ཕུན་སུམ་ཚོགས་པ་ལྔ་དང་འཆར་བ་ཡུལ་གྱི་ཕུན་སུམ་ཚོགས་པ་ལྔ་སྟེ་གཉིས་ལས། དང་པོ་ལུས་ཀྱི་གནས་ཕུན་སུམ་ཚོགས་པ་ནི་ཙིཏྟ་དང་དུང་ཁང་གི་གཞལ་ཡས་སོ། །དེ་ན་གནས་པའི་སྟོན་པ་ཕུན་སུམ་ཚོགས་པ་ནི་ངོ་བོ་ཀ་དག་རིག་པའི་སྙིང་པོ་ཅན་ནོ། །དེའི་འཁོར་ཕུན་སུམ་ཚོགས་པ་ནི་ལྷུན་གྲུབ་རང་གསལ་གྱི་ཚོམ་བུའོ། །དེའི་བསྟན་པ་ཕུན་སུམ་ཚོགས་པ་ནི་རྩ་རླུང་ཐིག་ལེའི་ཡོན་ཏན་འོད་གསལ་བའོ། །དེའི་དུས་ཕུན་སུམ་ཚོགས་པ་ནི་ལུས་ཀྱི་རྟེན་འབྲེལ་ཚང་བའོ། །དེ་སྐད་དུ། ཐལ་འགྱུར་ལས། འཁོར་དང་འདས་པའི་ཐོག་མར་ནི། །རང་བྱུང་བྱས་པ་མེད་པ་ལས། །འབྱུང་བ་འདུས་པའི་ཕུང་པོར་ཤར། །ས་ཆུ་མེ་རླུང་རིན་ཆེན་གཞི། །འདུས་ཤིང་བསྐྱེད་པའི་གཞལ་མེད་ན། །རང་བྱུང་རིག་པ་བཅོས་པ་མེད། །འཁྲུལ་པ་ཡོངས་སུ་དག་པ་ལ། །བདེ་ཆེན་འདུས་པའི་འཁོར་གྱིས་བསྐོར། །སྐུ་དང་ཡེ་ཤེས་ཤེས་རབ་རླུང་། །མི་ཕྱེད་སྣ་ཚོགས་དམིགས་པ་ཡི། །རྩ་རླུང་ཐབས་ཀྱི་བདེ་ཆེན་ཆོས། །སོ་སོའི་ཉམས་དང་མཐུན་པར་བཤད། །འདས་དང་མ་འོངས་ད་ལྟར་མེད། །མ་ཕྱེ་འབྱེད་པ་ཡོངས་སུ་མེད། །ཐམས་ཅད་རང་བྱུང་ཡེ་ཤེས་སོ། །ཞེས་སོ། །
གཉིས་པ་འཆར་བ་ཡུལ་གྱི་གནས་ཕུན་སུམ་ཚོགས་པ་ནི། ཕྱི་དབྱིངས་ནམ་མཁའ་སྟོང་པ་སྤྲིན་དང་བྲལ་བ་ལ། ནང་དབྱིངས་རྣམ་པར་དག་པའི་སྒྲོན་མ་ཤར་བའོ། །དེའི་སྟོན་པ་ནི་རྡོ་རྗེ་ལུ་གུ་རྒྱུད་དོ། །དེའི་འཁོར་ཕུན་སུམ་ཚོགས་པ་ནི་སྐུ་དང་ཐིག་ལེའི་སྣང་བའོ། །(༣༤)དེའི་བསྟན་པ་ཕུན་སུམ་ཚོགས་པ་ནི་རང་རིག་གསལ་ལ་རྣམ་པར་མི་རྟོག་པའོ། །དེའི་དུས་ཕུན་སུམ་ཚོགས་པ་ནི་ལྟ་སྟངས་དང་གཟིགས་སྟངས་གང་རུང་ལ་འཛོམ་པའོ། །དེ་སྐད་དུའང་ཉི་ཟླ་ཁ་སྦྱོར་ལས། དེ་ཉིད་ཕྱི་དང་ནང་ཁྱད་ལས། །རང་རིག་སྔོན་བྱུང་སྟོན་པ་སྟེ། །སྐུ་དང་ཡེ་ཤེས་ཐིག་ལེ་རྣམས། །མི་རྟོག་རྣམ་གྲངས་འཁོར་དུ་བྱུང་། །གདམས་པ་ཉམས་ལེན་བསྟན་པའི་ཚུལ། །དེ་ཉིད་གོམས་པས་དུས་ཀྱང་ཡིན། །ཞེས་སོ། །
གསུམ་པ་མཐར་ཐུག་འབྲས་བུའི་ཕུན་སུམ་ཚོགས་པ་ལྔ་ནི། གནས་ཕུན་སུམ་ཚོགས་པ་ནི་གདོད་མའི་ཟད་ས་ཀ་དག་ཆོས་ཀྱི་དབྱིངས་ཆེན་པོའོ། །དེའི་སྟོན་པ་ཕུན་སུམ་ཚོགས་པ་ནི་རང་རིག་པའི་ཡེ་ཤེས་ཐམས་ཅད་མཁྱེན་པའོ། །དེའི་འཁོར་ཕུན་སུམ་ཚོགས་པ་ནི་སྐུ་དང་ཡེ་ཤེས་སུ་སྣང་བའི་ཚོམ་བུ་ལ་ལོངས་སྤྱོད་པའོ། །དེའི་བསྟན་པ་ཕུན་སུམ་ཚོགས་པ་ནི་ཟག་པ་མེད་པའི་བདེ་ཀློང་གཅིག་ཏུ་འཁྱིལ་བའོ། །དེའི་དུས་ཕུན་སུམ་ཚོགས་པ་ནི་སྐུ་གསུམ་འདུ་འབྲལ་མེད་པ་མཐར་ཐུག་པའི་རྟོགས་པ་མངོན་དུ་གྱུར་པ་ནའོ། །དེ་སྐད་དུའང་སྒྲོན་མ་འབར་བ་ལས། སྟོང་པ་ཉིད་ཀྱི་གཞི་ཚད་མེད་པ་གསལ་བའི་དཀྱིལ་འཁོར་ནས། མི་མཇེད་ཆེན་པོའི་འདུག་སྟངས་སོ་སོ་མ་ཡིན་ཐ་དད་པ་མ་ཡིན་པའི་སྣང་བ་ཆེན་པོ་རྣམ་པར་བཀོད་ཅིང་ཡེ་ནས་རང་གསལ་ཆེན་པོའི་སྤྱོད་པ་འགགས་མེད་དུ་ཤར་བའི་ཀློང་ནས། འགགས་པ་མེད་པའི་རིག་པ་རང་ཤར་ནས། བརྗོད་དུ་མེད་པའི་དོན་འདི་གསུངས་སོ། །ཞེས་སོ། །དེ་ལྟར་གླེང་གཞི་རྣམ་པ་གཉིས་ཀྱིས་ཚིག་དོན་མཐར་ཐུག་པའི་ཕུན་སུམ་ཚོགས་པ་ལྔ་ལེགས་པར་བསྟན་ཏོ། །མདོར་ན་ཡང་དག་པའི་སྟོན་པ་སྐུ་གསུམ་འདུ་འབྲལ་མེད་པའི་དགོངས་པས་གར་ཁྱབ་པ་ན་སྙིང་པོ་དོན་གྱི་ཡེ་ཤེས་ཕུན་སུམ་ཚོགས་པ་ལྔ་ལྡན་གྱི་བདག་ཉིད་ཆེན་པོར་འཁོར་འདས་ཐམས་ཅད་ལ་ཡེ་ཁྱབ་ཆེན་པོར་ལྷུན་གྱིས་གྲུབ་པས་ཐམས་ཅད་ཡེ་ནས་སངས་རྒྱས་པའོ། །དེ་དག་གིས་གླེང་གཞི་ཕུན་སུམ་ཚོགས་པའི་གདམས་པ་མདོར་བསྟན་པ་བཤད་ཟིན་ཏོ།། །།