སྔོན་འགྲོ་འདོན་སྒོམ་ཟུང་འབྲེལ་བྱ་ཚུལ་ཉུང་ངུ་། མཁན་ཆེན་མཁྱེན་བརྩེ་ནོར་བུ།
སྔོན་འགྲོ་འདོན་སྒོམ་ཟུང་འབྲེལ་བྱ་ཚུལ་ཉུང་ངུ་། མཁན་ཆེན་མཁྱེན་བརྩེ་ནོར་བུ། རང་ཅག་གཉིས་ལྟ་བུའི་རྨོངས་པ་རྣམས་ཀྱིས་སྔོན་འགྲོ་འདོན་སྒོམ་ཟུང་འབྲེལ་འདི་ལྟར་བྱ། རང་གི་སྤྱི་བོར་པད་ཟླའི་སྟེང་དུ་རྩ་བའི་བླ་མ་ཉིད་སློབ་དཔོན་ཆེན་པོའི་སྐུའི་རྣམ་པས་བཞུགས་པར་གྱུར། དཔལ་ལྡན་རྩ་བའི་བླ་མ་རིན་པོ་ཆེ། །བདག་གི༴བླ་མ་མཁྱེན། བདག་གིས་ཆོས་སྒྲུབ་པའི་ལུས་རྟེན་ཁྱད་པར་ཅན་འདི་འདྲ་ཞིག་ཐོབ་ཀྱང་ཡུན་རིང་པོར་མི་འགོར་བར་མྱུར་དུ་འཆི་བར་ངེས། ཚེ་འདིར་སྡིག་པ་བསགས་པ་ནི་ཚད་མེད། དགེ་བ་རྣམ་དག་ནི་སྣ་གཅིག་ཀྱང་མ་འགྲུབ་པས་ཤི་བའི་རྗེས་སུ་ངན་སོང་གསུམ་པོ་གང་རུང་ཞིག་ཏུ་ནི་འགྲོ་བར་ཐག་ཆོད། དེ་གསུམ་གང་དུ་སྐྱེས་ཀྱང་སྡུག་བསྔལ་བཟོད་དཀའ་བར་མ་ཟད་བདེ་འགྲོའི་གནས་སུ་སྐྱེས་ནས་བདེ་བ་ལ་ལོངས་སྤྱོད་རྒྱུ་བྱུང་ཡང་རྟག་པ་མེད་པས་མཐར་ངན་སོང་དུ་འགྲོ་དགོས་པའི་དུས་ཤིག་ནི་འོང་། དེས་ན་འཁོར་བ་འདི་མཐོ་དམན་གང་དུ་སྐྱེས་ཀྱང་སྡུག་བསྔལ་བའི་རང་བཞིན་ལས་མི་འདུག །རང་སྡུག་བསྔལ་བ་བཞིན་རིགས་དྲུག་གི་སེམས་ཅན་ཐམས་ཅད་ཀྱང་སྡུག་བསྔལ་བ་ལ་ནི་ཁྱད་པར་མེད། དེ་དག་སྔར་རང་གི་ཕ་མར་མ་གྱུར་པ་དང་དྲིན་མི་ཆེ་བ་ཡང་མེད་པས་རང་གཞན་སེམས་ཅན་ཐམས་ཅད་འཁོར་བ་དང་ངན་སོང་གི་སྡུག་བསྔལ་ལས་ཐར་བའི་དོན་དུ་སྐྱབས་གནས་ཀུན་འདུས་བླ་མ་ཡིད་བཞིན་ནོར་བུ་ལ་འདི་ཕྱིའི་བློ་གཏད་གཅིག་ཆོག་ཏུ་བཟུང་ནས་སྐྱབས་སུ་འགྲོ་བར་བགྱིའོ། །ན་མོ་བླ་མ་ལ་སྐྱབས་སུ་མཆིའོ། །སོགས་སྐྱབས་འགྲོ་བཞི་སྐོར་གང་མང་བརྗོད། ཀྱེ་མ་སྡུག་བསྔལ་གྱིས་རྟག་པར་མནར་བའི་སེམས་ཅན་དེ་དག་གི་དོན་དུ་བདག་གིས་བླ་མ་རྡོ་རྗེ་འཆང་གི་གོ་འཕང་འཐོབ་པར་བྱ། དེའི་ཆེད་དུ་བསགས་སྦྱང་གཉིས་དང་ལམ་ཟབ་མོ་བླ་མའི་རྣལ་འབྱོར་ལ་བརྩོན་པར་བགྱིའོ། །ཞེས་ལན་གསུམ་བརྗོད། བདག་གི་སྐྱེ་བ་སྔོན་མ་རྣམས་སུ་མི་དགེ་བ་ལ་གོམས་
པའི་དབང་གིས་ཚེ་འདིར་ཡང་དགེ་བ་མ་འགྲུབ་པའི་སྟེང་དུ་མི་དགེ་བའི་ལས་ངན་སོང་དུ་སྐྱེ་ངེས་མང་པོ་བྱས་ཚར་བ་འདི་ཤིན་ཏུ་མ་ལེགས། ད་ཕྱིན་ཆད་ནག་པོའི་ལས་རྣམས་མི་བགྱིད་ངེས་པ་ལགས་ན་སྔར་བསགས་ཟིན་གྱི་སྡིག་ལྟུང་དེ་དག་འདག་པའི་སྐྱབས་བླ་མ་དང་རྡོར་སེམས་དབྱེར་མེད་ཀྱིས་མཛད་དུ་གསོལ། ༀ་བཛྲ་སཏྭ་སོགས་ཡིག་བརྒྱ་ཅི་མང་བཟླ། བདག་གི་ལུས་ལོངས་སྤྱོད་དགེ་རྩ་སྟེ་བདག་ཏུ་འཛིན་པའི་གཞི་གསུམ་པོ་རི་གླིང་ཉི་ཟླ་སོགས་སྣོད་བཅུད་ཀྱི་འབྱོར་པ་ཡིད་དུ་འོང་བའི་རྣམ་པར་མོས་ཏེ་དེ་དག་སྐྱབས་གནས་ཀུན་འདུས་ཀྱི་ངོ་བོ་དཔལ་ལྡན་བླ་མའི་སྤྱན་སྔར་འབུལ་བ་ལགས་ན། རང་གཞན་གྱི་རྒྱུད་ལ་ཚོགས་གཉིས་རྒྱ་ཆེན་པོ་རྫོགས་པར་མཛད་དུ་གསོལ། ས་གཞི་སྤོས་ཆུས་སོགས་གང་མང་བརྗོད། བླ་མ་རིན་པོ་ཆེ་ཁྱེད་ཡོན་ཏན་གྱི་ངོས་ནས་སངས་རྒྱས་ཐམས་ཅད་དང་དགོངས་པ་མཉམ་པར་བཞུགས་ཀྱང་བཀའ་དྲིན་གྱི་ངོས་ནས་སངས་རྒྱས་ལས་ཀྱང་ཆེས་ཆེར་ལྷག་པས་ཁྱེད་ཉིད་སངས་རྒྱས་ཀུན་འདུས་ཀྱི་ངོ་བོར་མོས་ཏེ་རེ་ལྟོས་གཞན་འཚོལ་མེད་པར་བློ་གཏད་ལིང་སྐྱུར་གྱིས་གསོལ་བ་རྩེ་གཅིག་ཏུ་འདེབས་པ་ལགས་ན་བདག་གི་རྒྱུད་མ་རུང་བ་འདི་ད་ལྟ་ཉིད་དུ་བྱིན་གྱིས་བརླབ་ཏུ་གསོལ། ཧཱུྃཿཨོ་རྒྱན་ཡུལ་གྱི༴སོགས་ཚིག་བདུན་གསོལ་འདེབས་ཅི་མང་མཐར། བཛྲ་གུ་རུ༴གྲངས་བསགས་རྗེས། བླ་མའི་སྐུ་ལས་བྱིན་རླབས་དང་དངོས་གྲུབ་ཐམས་ཅད་འོད་ཟེར་དཀར་དམར་མཐིང་གསུམ་གྱི་རྣམ་པར་ཐོན། རང་གི་ལུས་ལ་ཐིམ་པས་རྒྱུད་བྱིན་གྱིས་བརླབས། རང་ལུས་འོད་དུ་ཞུ་བའི་དྭངས་མ་འོད་དམར་སྲན་འབྲུ་ཙམ་དུ་གྱུར་པ་དེ་རྒྱངས་སེ་སོང་བླ་མའི་ཐུགས་ཀར་ཐིམ། བླ་མ་ཡང་བར་སྣང་ནས་ཇེ་མཐོར་སོང་བ་མཐར་ནམ་མཁའ་དང་ཁྲིག་གེ་འདྲེས་པར་གྱུར། ཞེས་པའི་མཐར་ཀ་དག་གི་ངང་ལ་མཉམ་པར་བཞག་དེ་ནས་དགེ་བ་འདི་ཡིས་མྱུར༴ཅེས་བསྔོ་སྨོན་བྱའོ། །བྱང་དུ་དགེ་བསྙེན་རྒན་པོ་ངག་དབང་ཆོས་ལྡན་ཞེས་པའི་དོན་དུ་མཁྱེན་ནོར་པས་བྲིས།