དཔལ་ལྡན་འབྲས་དཀར་སྤུངས་སུ་སློབ་གཉེར་ཇི་ལྟར་བྱས་པའི་བསྐོར་གྱི་རྣམ་ཐར།

དགུང་གྲངས་ཉེར་བརྒྱད་ཀྱི་ལོ་འགོར་འཕགས་ཡུལ་འབྲས་དཀར་སྤུངས་སུ་སློབ་གཉེར་གྱི་དབུ་བཙུག་སྟེ། རྡོ་རུས་ཐུག་པའི་དཔེ་ལྟར་ཉིན་མཚན་ལྷོད་མེད་དུ་བགྲང་བྱ་གསུམ་གྱི་རིང་ལ། ཤེས་རབ་ཀྱི་ཕ་རོལ་ཏུ་ཕྱིན་པའི་གཞུང་ལ་སློབ་གཉེར་ཚུལ་བཞིན་དུ་མཛད་དེ། དཔེ་ཆ་ལྟ་ཟེར་ན་དངོས་གྲུབ་དཔལ་འདྲ་དགོས་པ་རེད་ཅེས་ཐུན་མོངས་མ་བགྲོས་རང་མཐུན་གྱིས་ཚད་འཛིན་ས་དང་དམིགས་དཔེ་བལྟ་ཡུལ་དུ་གྱུར། སྐབས་དེར་གྲྭ་ཚང་གི་ཆོས་ར་ན་དངོས་གྲུབ་དཔལ་གྱིས་ཀུན་མཁྱེན་ཕར་ཕྱིན་མཐའ་དཔྱོད་བློ་འགྲོ་གིན་འདུག་ཅེས་གླེང་རྒྱུར་ཆགས་པ་ཐོས་ཀྱང༌། བཤེས་གཉེན་རིན་པོ་ཆེ་ཁོང་ལ་དྲིས་པར། ཕར་ཕྱིན་མཐའ་དཔྱོད་དབུ་ཞབས་བྱས་ཏེ་བློར་འདོན་ཐུབ་པ་མིན་ཏེ། གལ་གནད་བསྐོར་དང་ལུང་འདྲེན་རྣམས་བློ་ཐོག་ནས་ཧ་ལམ་མི་ཐོན་པ་མེད། ཡིག་འབྲུ་གཉིས་གསུམ་ཙམ་རེ་ཐོས་པས་སྐབས་དེའི་གོང་འོག་འདི་དང་དེ་རེད་བསམ་པར་ནུས་པ་བྱུང་བ་ཡིན་གསུངས། དགུང་གྲངས་སུམ་ཅུ་ཐམ་པ་ཕར་ཕྱིན་ལོ་རིམ་ཐ་མ་ལོའི་བོད་ཟླ་བཅུ་གཅིག་པའི་ནང༌། དགའ་ལྡན་ཤར་རྩེར་དགུན་ཆོས་ཚོགས་སྐབས་སུ་གདན་ས་གསུམ་གྱི་གྲྭ་ཚང་དྲུག་དང༌། ར་སྟོད། རྒྱུད་སྨད་སོགས་ཀྱི་གྲྭ་མང་འདུས་པ་རྒྱ་མཚོའི་དབུས་སུ་ཚད་མ་རྣམ་འགྲེལ་ལུང་འགལ་གྱི་དམ་བཅའ་མཛད་པས། བརྒལ་བརྟག་ཅི་བྱུང་ཡང་ཁས་ལེན་གྱི་ཟུར་ཙམ་ཡང་གཞུང་དང་མཐུན་པའི་སྟེང་ནས་ཉམས་དགོས་མ་བྱུང་བས་མཁས་པའི་སྙན་པ་འབར། དགུན་ཆོས་ཆེན་མོ་དེ་ཅུང་མ་གྲོལ་གོང་ནས་ཕྱིར་དཔལ་ལྡན་འབྲས་དཀར་སྤུངས་སུ་ཕེབས་ཏེ། ཕར་ཕྱིན་དུས་བཟང་དང༌། ཕར་ཕྱིན་དམ་བཅའ་ཆེན་མོ་གནང༌། དེའི་ཕྱི་ལོ་སྟེ་རབ་རྒྱན་ལྕགས་སྦྲུལ་ལོར། དབུ་མ་དགོངས་པ་རབ་གསལ་དང༌། འཇམ་དབྱངས་བཞད་པའི་དབུ་མ་ལུང་རིགས་གཏེར་མཛོད་སོགས་ཀྱི་བདེན་གཉིས་ཡན་ཆད་གསན་བསམ་གནང་ནས་རྒྱུགས་སྤྲོད་ཨང་དང་པོ་བླངས། ལོ་དེར་དགེ་བའི་བཤེས་གཉེན་ཆེན་པོ་བློ་བཟང་དགེ་འདུན་མཆོག་རྒྱུད་སྨད་དུ་ཕེབས་སྟབས། སྒོ་མང་མཁན་ཡོན་ཏན་དམ་ཆོས་མཆོག་གི་མདུན་དུ་དཔེ་ཁྲིད་ལ་ཕེབས། འབོ་ར་དགེ་བཤེས་ཡོན་ཏན་གྱི་མདུན་ནས་མཛོད་རྩ་སྡོམ་དང༌། པོད་ལྔའི་རྩ་བའི་ལུང་ཞུས། དེའི་ཕྱི་ལོ་དབུ་མ་རྙིང་བའི་ལོ་དེར་འབྲས་སྤུངས་སྒོ་མང་གྲྭ་ཚང་ནས་དབུ་མའི་ཚོགས་ལངས་དང༌། དབུ་མའི་ཐལ་བཟློག་གི་མཚན་ཕུད་ཀྱི་དམ་བཅའ་ཆེན་མོར་བཞུགས། དབུ་མའི་ཐལ་བཟློག་མཚན་ཕུད་ཀྱི་དམ་བཅའ་ལ་ཉེ་བའི་ཟླ་གཅིག་ལྷག་གི་ཡུན་ལ་དཔེ་མཚམས་དམ་པོར་བསྡམས་ནས། ཟླ་བ་གྲགས་པའི་རྩ་ཤེས་འགྲེལ་བ་དབུ་མ་ཚིག་གསལ་ལས་ཐལ་བཟློག་བསྐོར་དང༌། རྗེ་བདག་ཉིད་ཆེན་པོའི་དྲང་ངེས་ལེགས་བཤད་སྙིང་པོའི་ཐལ་རང་གི་བསྐོར། འཇུག་ཊཱིཀ་དགོངས་པ་རབ་གསལ་གྱི་ཐལ་བཟློག །རྩ་ཤེས་ཊཱིཀ་ཆེན་གྱི་ཐལ་རང་གི་བསྐོར། དབུ་མ་ལུང་རིགས་གཏེར་མཛོད་ཀྱི་ཐལ་བཟློག་གི་བསྐོར་ཐམས་ཅད་ཤོག་གྲངས་ཉིས་བརྒྱ་ཡས་མས་ཙམ་ཐུགས་འཛིན་གནང༌། ཁྱད་པར་དྲང་ངེས་ལེགས་བཤད་སྙིང་པོ་དབུ་ནས་སེམས་ཙམ་བསྐོར་ཆ་ཚང་སྔོན་ནས་བློ་འཛིན་བྱས་ཚར་ཞིང༌། འོག་མ་རྣམས་ནས་ཀྱང་གལ་གནད་ཐོར་བུ་ཁོལ་དུ་ཕྱུང་སྟེ་བར་མཚམས་འགའ་རེ་མ་གཏོགས་ཕལ་ཆེར་ཐུགས་འཛིན་གནངས་བ་ཡིན་གསུངས། དབུ་མའི་ཐལ་བཟློག་མཚན་ཕུད་དམ་བཅའ་ཆེན་མོ་དབུ་ནས་གཞུག་གི་རིང་ལ་གཞུང་གི་ཚིག་ཟིན་ལྟར་ཁས་ལེན་ཟུར་གཅིག་ཀྱང་མ་ཉམས་པར་བཟུང་བས། ཀུན་ངོ་མཚར་བའི་གནས་སུ་བཀོད་ཅིང༌། དགེ་བཤེས་རྒན་པ་རེས། སྒོ་མང་གྲྭ་ཚང་ལ་འདི་འདྲའི་དཔེ་ཆ་བ་ཡག་པོ་འདུག །ད་ཤི་ཡང་བློ་བདེ་བ་ཡིན་གསུངས་སྐད། མཁས་མཆོག་ཀུན་མཁྱེན་ཉ་དབོན་པས། བླུན་པོས་མཁས་ཞེས་བཀུར་བས་མཁས་པ་མིན། །མཁས་པས་མཁས་ཞེས་བསྟོད་ན་མཁས་པ་ཡིན། །མཁས་སམ་མི་མཁས་རྩོམ་འཆད་རྩོད་ན་མངོན། །བདག་ནི་འཆད་རྩོད་རྩོམ་ལ་སྤོབས་པ་དགེ། །ཞེས་པ་ལྟར་མཚན་དོན་དང་ལྡན་པའི་མཁས་པའི་སྙན་པ་མཁས་མང་འདུས་པའི་དབུས་སུ་ཁྱབ་པར་བྱས་སོ། །དེ་ལྟར་དབུ་མའི་གཞུང་ལ་གཞན་དྲང་མི་འཇོག་པའི་མཁས་པར་བསླབས་ཏེ། ཕྱི་ལོ་ཆུ་མོ་ལུག་གི་ལོར་དམ་པའི་ཆོས་མངོན་པ་མཛོད་ཀྱི་འཛིན་གྲྭར་ཞུགས་ཏེ། ལོ་འཁོར་རྒྱུགས་སྤྲོད་ཆེན་མོར་གྲུབ་འབྲས་ཨང་དང་པོ་བླངས། དེའི་ཕྱི་ལོ་སྟེ་དགུང་ལོ་སུམ་ཅུ་རྩ་བཞི་བཞེས་པ་ན་མཛོད་རྙིང་བའི་འཛིན་གྲྭར་ཞུགས་ནས་སློབ་གཉེར་གནང་ངོ། །སྐབས་དེར་བཤེས་གཉེན་རིན་པོ་ཆེ་དང་ལྷན་དུ་ཆ་རྒྱུས་ཡོད་པའི་རྔ་བའི་མཁན་པོ་རེས་ཁོང་གི་བསྐོར་ནས་གསུང་བཤད་གནང་བར། དངོས་གྲུབ་དཔལ་ཟེར་ན་རུས་པ་མཁྲེགས་པོ་སྡུག་རུས་ཅན་ཡིན་པ་རེད། རང་ཚུགས་དང་དཔེ་ཆ་ལྟ་ལུགས་ལ་གྲྭ་ཚང་ཡོངས་རྫོགས་ཧ་ལས་སོང་བ་རེད། ངལ་གསོ་དང་བར་གསེང་དག་ལ་ཡང་འཁྱམ་འཁྱམ་འགྲོ་རྒྱུ་དང༌། ཐ་མལ་གྱི་ལོང་གཏམ་བཤད་ནས་འདུག་རྒྱུ་ཕལ་ཆེར་སྲིད་རྒྱུ་མ་རེད་ཅེས་བཤད་ན་ཡང་ཆོག་གི་རཻད། མི་ལ་ཁ་མང་བོ་གྲག་མཁན་ཞིག་ཡིན་པ་མ་རེད། ཁོང་ལ་ཞུ་དགོས་རེ་ཡོད་ཚེ་ནང་ལ་འགྲོ་བ་མིན། སྒོའི་ངོ་ལ་ཡི་གེ་སྦྱར་བཞག་པ་ཡིན། དེ་མིན་ནང་ལ་སོང་ན་ནམ་རྒྱུན་ཁོང་གིས་འཛིན་སྦྱོང་ཀློག་གསུམ་བྱས་ནས་བསྡད་ཡོད་པས་བར་ཆད་བྱེད་བཞག་གི་རེད། དོན་དག་མེད་ན་ཁ་བརྡ་བྱེད་གྲོགས་བྱེད་ཀྱང་བྱེད་པ་མ་རེད། ཁོང་ལ་ང་ཚོ་ནང་བཞིན་གྱི་རྣམ་གཡེང་དང་འཁྱམ་ཉུལ་བྱེད་གྲོགས་གཅིག་ཀྱང་ཡོད་མྱོང་བ་མ་རེད། འཛིན་གྲྭ་གོང་འོག་ནས་དངོས་གྲུབ་དཔལ་ལ་སྐད་ཆ་བཤད་གྲོགས་དང་འགྲོ་རོགས་འདུག་རོགས་མི་དགོས་པས། ཕལ་ཆེར་རང་རྒྱལ་རིགས་ཅན་ཡིན་ས་རེད་ཅེས་ལྐོག་ནས་ཁ་མཚར་བཤད་རྒྱུ་ལྟ་བུ་ཡིན། ཁོང་སྐུ་བཙུན་པ་ཡང་དེ་ལས་མཐར་ཐུག་པ་མེད་པའི་ཚོད་ཡིན། དེ་རིང་སུ་ལ་དྲིས་བཞག་ན་ཡང་དངོས་གྲུབ་དཔལ་ཀུན་སྤྱོད་གང་འདྲ་ཡོད་ཟེར་ན། ཧ་མི་ལས་མཁན་གཅིག་ཀྱང་ཡོད་རྒྱུ་མ་རེད་གསུངས་བྱུང༌། སྐབས་དེར་ཡུན་རིང་འདྲེས་པའི་མགོ་ལོག་གི་དགེ་བཤེས་ཤིག་གི་གསུང་རྒྱུར། ཁོང་གྲྭ་ཚང་གི་ལས་ཀར་འགྲོ་ན་ཡང་ཞར་ཞོར་ལ་དཔེ་ཆ་ལྟ་རྒྱུ་བསྐྱུར་གི་མ་རེད། ལས་ཀའི་བར་གསེང་དུ་ངལ་གསོ་ཉུང་ངུ་ཞིག་རྒྱབ་ན་ཐད་ཀར་དཔེ་ཆ་ཀློག་བཞག་གི་རེད། ལས་ཀའི་ཞར་ལ་ལུང་ཚིག་བློ་ལ་འཛིན་ཞོར་བྱེད་རྒྱུ་ལས། ཁོམ་ཁོམ་བྱས་ནས་བསྡད་ཟེར་བ་ཡོད་པ་མ་རེད། གཞན་དང་མི་འདྲ་བ་ཞིག་ལ། ཁོང་གིས་དཔེ་ཆ་གཟིགས་ཚར་བ་དེ་བརྗེད་རྒྱུ་མི་འདུག་ཟེར་སྲོལ་ཞིག་ཡོད། དེ་རིང་གཞུང་གང་ཡིན་ཡང་མཚམས་གང་ཞིག་ནས་དྲིས་ན་ཡང༌། དཔེ་ཆ་རང་ཉིད་ཁ་ཕྱེས་པ་འདྲ་བའི་ངེས་ཆ་ཡོད་པ་རེད། འགའ་རེས་ཨ་མཚར་དང་འདྲེས་མས་དངོས་གྲུབ་དཔལ་སྒོ་མང་གི་ཡིག་ཆ་རེད་ལབ་རྒྱུ་ལྟ་བུ་ཡིན། ད་དུང་དམ་བཅའ་བཞུགས་དུས་དཀའ་གནས་ལ་ཐུན་མོང་མིན་པའི་གོ་བ་བཤད་རྒྱུ་ཡོད་པ་རེད། ཐ་ན་ལོ་སར་དུས་ལྟ་བུ་ལ་ཡང་གསོལ་ཟས་མཆོད་སྐབས་མ་གཏོགས་དཔེ་ཀློག་མཛད་པ་ལས་ངལ་གསོ་མཛད་པའི་གོམས་གཤིས་གཞི་ནས་མེད་པ་ལྟ་བུ་སྟེ། ཟོལ་བསྟོད་དང་ཐག་རིང་གི་སྐད་ཆ་ཙམ་མ་ཡིན་པར་འཛིན་གྲྭ་གོང་འོག་ཡོངས་རྫོགས་ན་ཧ་ལས་སོང་བ་ཞིག་ཡིན་གསུངས་བྱུང༌། བཤེས་གཉེན་རིན་པོ་ཆེ་གང་ཉིད་ཀྱི་ཞལ་སྔ་ནས་ངེད་ཅག་ལ་བཀའ་སློབ་ཅིག་བསྩལ་སྐབས་སུ། དེང་སང་དཔེ་ཆ་ལྟ་མི་མང་ཆེ་བ་ཞིག་གིས་བློ་རྩེ་གཅིག་ཏུ་དྲིལ་ནས་ལྟ་ཐུབ་ཀྱིན་མི་འདུག །ཕྱི་རོལ་གཡེང་རྐྱེན་རྣམ་པ་སྣ་ཚོགས་ལ་སེམས་འཆོར་ཞོར་ནང་པ་སངས་རྒྱས་པའི་གཞུང་ཆེན་ཁག་གི་མཐིལ་ལོན་དགོས་ཟེར་ན་ཧ་ཅང་དཀའ་མོ་རེད། ད་དུང་ཡུལ་བ་ཉེ་དུ་སོགས་ཀྱི་དགྲ་གཉེན་འཁོར་བའི་དོན་དག་ཚང་མ་ལ་འགན་ཁུར་ཞོར་དང༌། སེམས་ཁྲལ་བཟོ་བཞིན་འདུག །རང་ལ་མཚོན་ན་ཡོན་ཏན་ཆེན་པོ་མེད་ན་ཡང༌། དཔེ་ཆ་སློབ་གཉེར་བྱེད་སྐབས་བློ་རྩེ་གཉིས་སུ་མ་བཏང་བར་བསམ་རྒྱུ་དྲན་རྒྱུ་སྣ་གཅིག་ཁོ་ན་ལ་གཏད་པ་ཡིན། རྒྱ་གར་ན་ཡོད་དུས་ལོ་ངོ་བདུན་བརྒྱད་ཅིག་གི་རིང་ལ་ཡུལ་ཕྱོགས་སུ་ཐེངས་གཉིས་འབྲེལ་བ་བྱེད་མྱོང་མ་གཏོགས། ངའི་གནས་ཚུལ་འདི་ཡིན་གན་ཡིན་ཡུལ་ལ་ཟེར་བ་མིན་ལ། ཡུལ་བས་གང་བྱེད་ཀྱིན་ཡོད་ཚུར་ལ་ཡང་འདྲི་བ་མིན། ཞེས་གསུངས་སོ། །གདན་སར་འབྱོར་བའི་ལོ་དེ་ནས་བཟུང་སྟེ། བསྡུས་རྟགས་དང༌། གྲུབ་དོན་ས་གསུམ། དབུ་ཕར་སོགས་ཀྱི་དཔེ་ཁྲིད་ཉིན་རེ་བཞིན་དུ་མཛད། སྔོན་གྱི་སྐབས་ཅི་ཡིན་ཆ་མི་འཚལ་མོད། རིག་གསར་རྗེས་ཀྱི་བསྟན་པ་ཡང་དར་ཚུན་ལ་འཕགས་བོད་ཀྱི་གདན་ས་གསུམ་པོ་གང་

རུང་དུ་ཇོ་ནང་གི་བླ་མ་གཞན་ལ་དཔེ་ཁྲིད་བྱེད་མི་བྱུང་བའི་ཐོག་མ་ཡིན་འདུག་གོ། །

ལས་ཀྱིས་བསྡུས་པའི་ཕ་ཡུལ་རྒྱབ་ཏུ་བསྐྱུར་ཏེ། །

སེམས་ལ་ཉལ་བའི་དགྲ་གཉེན་ཐག་པ་བཀྲོལ་ནས། །

བས་མཐའི་ཡུལ་དུ་སྤོང་དང་ཀློག་པའི་རྣམ་ཐར། །

འགྱུར་མེད་མི་གཞིའི་བརྟན་ལྷིང་འདི་འདྲ་དཀོན་མོ། །

སྙིགས་དུས་ཀྱི་བསྟན་པའི་གསལ་བྱེད་ཆེན་པོ་ངག་དབང་འཇིགས་མེད་དངོས་གྲུབ་དཔལ་བཟང་པོའི་མཛད་བཟང་བསླབ་གསུམ་ནོར་བུའི་གླིང་ཁ་ཞེས་བྱ་བ་ལས་དཔལ་ལྡན་འབྲས་དཀར་སྤུངས་སུ་སློབ་གཉེར་ཇི་ལྟར་བྱས་པའི་བསྐོར་གྱི་རྣམ་ཐར་མདོར་བསྡུས་པ་སྟེ་བཅུ་གཅིག་པའོ། །