གཉིས་པ་རང་ལུགས་བཤད་པ།

གཉིས་པ་རང་ལུགས་བཤད་པ་ལ།

གཅིག་གི་མཚན་ཉིད་ཡོད་དེ། སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། ཡང་ན། གཏན་ཚིགས་རིགས་པའི་དོན་བསྡུས་ལས། གཅིག་དང་ཐ་དད་ལ། མཚན་ཉིད་ནི་རིམ་པ་ལྟར། ཆོས་གང་མིང་གཅིག་ལ་བརྟེན་ནས་དོན་སྤྱི་གཅིག་ཏུ་འཆར་དུ་རུང་བ་དང༌། མིང་སོ་སོ་ལ་བརྟེན་ནས་དོན་སྤྱི་སོ་སོར་འཆར་དུ་རུང་བའོ། །ཞེས་གསུངས་པའི་ཕྱིར། གཅིག་ལ་མིང་རིགས་ཀྱི་དབྱེ་ན། རང་ལྡོག་གཅིག་པ་དང༌། ངོ་བོ་གཅིག་པ་དང༌། རིགས་གཅིག་པ་དང་གསུམ། རང་ལྡོག་གཅིག་གི་མཚན་ཉིད་ཡོད་དེ། རང་ལྡོག་སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། མཚན་གཞི་ནི། ལམ་དང་ལམ་ལྟ་བུའོ། ། མི་རྟག་པ་དང་རང་ལྡོག་གཅིག་གི་མཚན་ཉིད་ཡོད་དེ། མི་རྟག་པ་དང་རང་ལྡོག་སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། མི་རྟག་པ་དེ་ཡིན་པའི་ཕྱིར། དེས་གཞན་ལ་ཡང་རིགས་བསྒྲེ། ངོ་བོ་གཅིག་གི་མཚན་ཉིད་ཡོད་དེ། ངོ་བོ་སོ་སོ་བ་མ་ཡིན་པའི་ཆོས་ཅན་དེ་ཡིན་པའི་ཕྱིར། ངོ་བོ་གཅིག་པ་དང༌། རང་བཞིན་གཅིག་པ་དང༌། བདག་ཉིད་གཅིག་པ་རྣམས་དོན་གཅིག་གོ །ཤེས་བྱ་དང་ངོ་བོ་གཅིག་གི་མཚན་ཉིད་ཡོད་དེ། ཤེས་བྱ་དང་ངོ་བོ་སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ།ཡོད་པ་དེ་ཡིན་པའི་ཕྱིར། གཞན་ལ་རིགས་བསྒྲེ་བར་བྱ། རྫས་གཅིག་གི་མཚན་ཉིད་ཡོད་དེ། རྫས་ཀྱི་སྒོ་ནས་སོ་སོ་བ་མ་ཡིན་པར་སྐྱེས་པའི་རྫས་དེ་ཡིན་པའི་ཕྱིར། མཚན་གཞི་ནི་ཡོད་དེ། བུམ་པ་དང་བུམ་པའི་མཆུ་གཉིས་དེ་ཡིན་པའི་ཕྱིར། རིགས་གཅིག་གི་མཚན་ཉིད་ཡོད་དེ། རིགས་སོ་སོ་བ་མ་ཡིན་པའི་ཆོས་དེ་ཡིན་པའི་ཕྱིར། རིགས་གཅིག་ལ་དབྱེ་ན། ལྡོག་པ་རིགས་གཅིག་པ་དང༌། རྫས་རིགས་གཅིག་པ་གཉིས་ཡོད་པའི་ཕྱིར། ལྡོག་པ་རིགས་གཅིག་པ་ལ་དབྱེ་ན་གཉིས་ཡོད་དེ། སྒྲུབ་པར་གྱུར་བའི་ལྡོག་པ་རིགས་གཅིག་པ་དང༌། དགག་པར་གྱུར་བའི་ལྡོག་པ་རིགས་གཅིག་པ་གཉིས་ཡོད་པའི་ཕྱིར། སྒྲུབ་པར་གྱུར་བའི་ལྡོག་པ་རིགས་གཅིག་གི་མཚན་ཉིད་ཡོད་དེ། གང་ཟག་གང་དང་གང་གིས་ཡིད་གཏད་པས་མཐོང་ཙམ་ཉིད་ནས་འདི་དང་འདི་འདྲའོ་སྙམ་པའི་བློ་ངང་གིས་བསྐྱེད་ནུས་པའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། གསེར་བུམ་ཟངས་བུམ་གཉིས་དེ་ཡིན་པའི་ཕྱིར། སྒྲུབ་པར་གྱུར་བའི་ལྡོག་པ་རིགས་གཅིག་ལ་དབྱེ་ན་གསུམ་ཡོད་དེ། ཤེས་པར་གྱུར་བའི་ལྡོག་པ་རིགས་གཅིག་པ་དང༌། གཟུགས་སུ་གྱུར་བའི་ལྡོག་པ་རིགས་གཅིག་པ་དང༌། ལྡན་མིན་འདུ་བྱེད་དུ་གྱུར་བའི་ལྡོག་པ་རིགས་གཅིག་པ་དང་གསུམ་ཡོད་པའི་ཕྱིར། དང་པོ་ཡོད་དེ། ལྷས་སྦྱིན་གྱི་མིག་ཤེས་དང༌། མཆོད་སྦྱིན་གྱི་མིག་ཤེས་གཉིས་དེ་ཡིན་པའི་ཕྱིར། གཉིས་པ་ཡོད་དེ། ཙནྡན་གྱི་ཀ་བ་དང༌། ཤུག་པའི་ཀ་བ་གཉིས་དེ་ཡིན་པའི་ཕྱིར། གསུམ་པ་ཡོད་དེ། དམ་བཅའ་བའི་འཆི་བ་དང༌། རིགས་ལུང་བའི་འཆི་བ་གཉིས་དེ་ཡིན་པའི་ཕྱིར། དགག་པར་གྱུར་བའི་ལྡོག་པ་རིགས་གཅིག་གི་མཚན་ཉིད་ཡོད་དེ། དགག་བྱ་རིགས་གཅིག་བཀག་པའི་ཐ་དད་པའི་དགག་པ་དེ་ཡིན་པའི་ཕྱིར། རྫས་རིགས་གཅིག་གི་མཚན་ཉིད་ཡོད་དེ། རང་གི་ཉེར་ལེན་གཅིག་ལས་སྐྱེས་པའི་ཐ་དད་པའི་འདུས་བྱས་དེ་ཡིན་པའི་ཕྱིར། རྫས་རིགས་གཅིག་ལ་དབྱེ་ན་གསུམ་ཡོད་དེ། ཤེས་པར་གྱུར་བའི་རྫས་རིགས་གཅིག་པ་དང༌། གཟུགས་སུ་གྱུར་བའི་རྫས་རིགས་གཅིག་པ་དང༌། ལྡན་མིན་འདུ་བྱེད་དུ་གྱུར་བའི་རྫས་རིགས་གཅིག་པ་དང་གསུམ་ཡོད་པའི་ཕྱིར། དང་པོ་ཡོད་དེ། ཉེར་ལེན་གཅིག་ལས་སྐྱེས་པའི་རྣམ་ཤེས་ཐ་དད་པ་གཉིས་དེ་ཡིན་པའི་ཕྱིར། གཉིས་པ་ཡོད་དེ། རང་གི་ཉེར་ལེན་འཇིམ་གོང་གཅིག་ལས་སྐྱེས་པའི་རྫ་བུམ་དཀར་དམར་གཉིས་དེ་ཡིན་པའི་ཕྱིར། གསུམ་པ་ཡོད་དེ། སྡུག་བདེན་གྱི་མི་རྟག་པ་དང་སྡུག་བདེན་གྱི་བྱས་པ་ལྟ་བུའོ། །ཐ་དད་ཀྱི་མཚན་ཉིད་ཡོད་དེ། སོ་སོ་བའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། བདེན་པ་གཉིས་དེ་ཡིན་པའི་ཕྱིར། ཆོས་ཀྱི་ཤན་འབྱེད་ལས། ཐ་དད་ཀྱང་ཡིན་པའི་ཕྱིར་ཏེ། ངོ་བོ་གཅིག་པ་བཀག་པའི་ཐ་དད་ཡིན་ཏེ། དེ་ཉིད་དང་གཞན་དུ་བརྗོད་དུ་མེད་པའི་ཐ་དད་དོ། །ཞེས་གསུངས་སོ། །ཐ་དད་ལ་དབྱེ་ན་གསུམ་མམ་བཞི་ཡོད་དེ། ཆོས་ཀྱི་ཤན་འབྱེད་ལས། གཞུང་ལུགས་རྣམས་ཀྱི་སྐབས་སུ་ཐ་དད་ཀྱི་རྣམ་བཞག་གསུམ་མམ་བཞི་གསུངས་པའི། ཞེས་པ་ནས། ངོ་བོ་ཐ་དད་པ་དང༌། ངོ་བོ་གཅིག་ལ་ལྡོག་པ་ཐ་དད་པ་དང༌། མིང་གི་རྣམ་གྲངས་ཙམ་གྱི་ཐ་དད། ཞེས་པ་ནས། ངོ་བོ་གཅིག་པ་བཀག་པའི་ཐ་དད། ཅེས་གསུངས་པའི་ཕྱིར། ཡང་ན་རང་ལྡོག་ཐ་དད་པ་དང༌། ངོ་བོ་ཐ་དད་པ་དང༌། རིགས་ཐ་དད་པ་དང་གསུམ་ཡོད་པའི་ཕྱིར། རང་ལྡོག་ཐ་དད་ཀྱི་མཚན་ཉིད་ཡོད་དེ། རང་ལྡོག་སོ་སོ་བའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། བྱས་མི་རྟག་ལྟ་བུ་དེ་ཡིན་པའི་ཕྱིར། ཤེས་བྱ་དང་རང་ལྡོག་ཐ་དད་ཀྱི་མཚན་ཉིད་ཡོད་དེ། ཤེས་བྱ་དང་རང་ལྡོག་སོ་སོ་བའི་ཆོས་དེ་ཡིན་ཕྱིར། མཚན་གཞི་ནི་ཡོད་དེ། སྙིང་རྗེ་དེ་ཡིན་པའི་ཕྱིར། ཆོས་གཞན་ལ་རིགས་འགྲེ། ངོ་བོ་ཐ་དད་ཀྱི་མཚན་ཉིད་ཡོད་དེ། ངོ་བོ་སོ་སོ་བའི་ཆོས་དེ་ཡིན་པའི་ཕྱིར། མཚན་གཞི་ནི་ཡོད་དེ། བདག་འཛིན་དང་བདག་མེད་རྟོགས་པའི་ཤེས་རབ་ལྟ་བུའོ། །ངོ་བོ་ཐ་དད་པ་དང༌། རང་བཞིན་ཐ་དད་པ་དང༌། བདག་ཉིད་ཐ་དད་པ་རྣམས་དོན་གཅིག རིགས་ཐ་དད་ཀྱི་མཚན་ཉིད་ཡོད་དེ། རིགས་སོ་སོ་བའི་ཆོས་དེ་ཡིན་པའི་ཕྱིར། རིགས་ཐ་དད་པ་དང༌། རིགས་མི་མཐུན་པའི་ཆོས་དང༌། རིགས་མི་འདྲ་བའི་ཆོས་དང༌། རིགས་མི་གཅིག་པའི་ཆོས་རྣམས་དོན་གཅིག རིགས་མི་འདྲ་བ་ལ་དབྱེ་ན་གཉིས་ཡོད་དེ། ལྡོག་པ་རིགས་མི་འདྲ་བ་དང༌། རྫས་རིགས་མི་འདྲ་བ་གཉིས་ཡོད་པའི་ཕྱིར། ལྡོག་པ་རིགས་མི་འདྲ་བ་བཞག་ཏུ་ཡོད་དེ། རྟ་དང་བ་ལང་གཉིས་དེ་ཡིན་པའི་ཕྱིར། རྫས་རིགས་མི་འདྲ་བ་བཞག་ཏུ་ཡོད་དེ། གཟུགས་ཤེས་གཉིས་དེ་ཡིན་པའི་ཕྱིར།