བཅུ་གཉིས་པ་གཏན་ལ་དབབ་པར་བསྟན་པའི་སྡེ་གང་།

བཅུ་གཉིས་པ་གཏན་ལ་དབབ་པར་བསྟན་པའི་སྡེ་གང་ཞེ་ན།

གསུང་རབ་གང་མདོ་ལ་སོགས་པའི་ཆོས་རྣམས་ཀྱི་རང་དང་སྤྱིའི་མཚན་ཉིད་ཕྱིན་ཅི་མ་ལོག་པར་བསྟན་པའི་མདོ་དག་ཡིན་ཏེ། མངོན་པ་ཀུན་བཏུས་ལས། གཏན་ལ་དབབ་པར་བསྟན་པའི་སྡེ་གང་ཞེ་ན། གང་དུ་ཆོས་ཀྱི་མཚན་ཉིད་ཕྱིན་ཅི་མ་ལོག་པར་བསྟན་པའོ། །ཞེས་སོ། །དེ་འདྲའི་གསུང་རབ་ཡན་ལག་བཅུ་གཉིས་འཇོག་ཚུལ་ནི་གཙོ་བོ་མངོན་པ་ཀུན་བཏུས་ལྟར་བཤད་པའོ། །དེ་བཅུ་གཉིས་སྡེ་སྣོད་གསུམ་དུ་འདུ་ཚུལ་བསྟན་པ་ལ་བརྗོད་ཚུལ་གྱི་སྒོ་ནས་ཕྱེ་བའི་མདོའི་སྡེ་ལ་སོགས་པ་གསུང་རབ་ཡན་ལག་བཅུ་གཉིས་པོ་འདི་དག་ནི་བརྗོད་བྱ་བསླབ་པ་གསུམ་སྟོན་པའི་སྒོ་ནས་བསྡུ་ན་སྡེ་སྣོད་གསུམ་དུ་འགྱུར་ཏེ། དེའང་མདོའི་སྡེ་དང་དབྱངས་ཀྱིས་བསྙད་པའི་སྡེ་དང་ལུང་དུ་བསྟན་པའི་སྡེ་དང་ཚིགས་སུ་བཅད་པའི་སྡེ་དང་ཆེད་དུ་བརྗོད་པའི་སྡེ་ལ་ཉན་ཐོས་ཀྱི་སྡེ་སྣོད་ལ་ཡོད་པ་དང༌། ཐེག་ཆེན་ལ་ཡོད་པ་དང་ཆ་གཉིས་ལས་སྔ་མ་དག་ནི་ཉན་ཐོས་ཀྱི་སྡེ་སྣོད་དོ། །ཐེག་ཆེན་པ་ལ་དེ་རྣམས་ཡོད་པ་ནི་ཤིན་ཏུ་རྒྱས་པ་དང་རྨད་དུ་བྱུང་བར་འདུས་པར་ས་བཟང་གི་ཀུན་བཏུས་འགྲེལ་བ་ལས་གསུངས་སོ། །དེས་ན་ཀུན་བཏུས་ལས། མདོའི་སྡེ་ལ་སོགས་པ་འདི་དག་ནི་སྡེ་སྣོད་གསུམ་དུ་འགྱུར་ཏེ། མདོའི་སྡེ་དང༌། དབྱངས་ཀྱིས་བསྙད་པའི་སྡེ་དང༌། ལུང་བསྟན་པའི་སྡེ་དང༌། ཚིགས་སུ་བཅད་པའི་སྡེ་དང༌། ཆེད་དུ་བརྗོད་པའི་སྡེ་གང་ཡིན་པ་འདི་ནི་ཉན་ཐོས་ཀྱི་མདོ་སྡེའི་སྡེ་སྣོད་དོ། །ཞེས་པའི་དགོངས་པ་ཡང་དེ་བཞིན་ནོ། །གླེང་གཞིའི་སྡེ་དང་རྟོགས་པ་བརྗོད་པའི་སྡེ་དང་དེ་ལྟ་བུ་བྱུང་བའི་སྡེ་དང་སྐྱེས་པ་རབས་ཀྱི་སྡེ་འཁོར་དང་བཅས་པ་འདི་ནི་ཐེག་པ་ཆེ་ཆུང་གཉིས་ཀའི་འདུལ་བའི་སྡེ་སྣོད་ཅེས་བྱ་སྟེ། ཀུན་བཏུས་ལས། གླེང་གཞིའི་སྡེ་དང༌། རྟོགས་པ་བརྗོད་པའི་སྡེ་དང༌། དེ་ལྟ་བུ་བྱུང་བའི་སྡེ་དང༌། སྐྱེས་པའི་རབས་ཀྱི་སྡེ་འཁོར་དང་བཅས་པ་འདི་ནི་འདུལ་བའི་སྡེ་སྣོད་དོ། །ཞེས་སོ། །གླེང་གཞི་ནི་གཙོ་བོ་དང༌། གཞན་གསུམ་ནི་འཁོར་ཡིན་ལ། སྐྱེས་རབས་ལ་སོགས་པར་བྱང་ཆུབ་སེམས་དཔའི་སྡོམ་པའི་ཚུལ་ཁྲིམས་ཀྱང་སྟོན་པས་སོ། །ཤིན་ཏུ་རྒྱས་པའི་སྡེ་དང་རྨད་དུ་བྱུང་བའི་ཆོས་ཀྱི་སྡེ་གང་ཡིན་པ་འདི་ནི། བྱང་ཆུབ་སེམས་དཔའི་མདོའི་སྡེ་སྣོད་དོ། །ཞེས་ཀུན་བཏུས་ལས་གསུངས་པ་ནི། རྨད་དུ་བྱུང་ཡང་བྱང་ཆུབ་སེམས་དཔའི་མཐུ་བསམ་གྱིས་མི་ཁྱབ་ཅིང་རྒྱ་ཆེ་བ་རྣམས་ཁྱད་པར་དུ་སྟོན་པའི་ཕྱིར་རོ། །གཏན་ལ་ཕབ་པར་བསྟན་པའི་སྡེ་ནི་ཐེག་པ་ཆེ་ཆུང་གཉིས་ཀའི་ཆོས་མངོན་པའི་སྡེ་སྣོད་དོ། །ཞེས་གསུངས་པ་ནི་ཤེས་བྱའི་མཚན་ཉིད་ཕྱིན་ཅི་མ་ལོག་པར་ཕྱེ་ནས་སྟོན་པས། ཆོས་རབ་ཏུ་རྣམ་འབྱེད་ཀྱི་རྒྱུ་བྱེད་པའི་ཕྱྀར་རོ། །ཉན་ས་ལས། དེ་ལ་རེ་ཞིག་མདོ་སྡེ་དང༌། དབྱངས་ཀྱིས་བསྙད་པའི་སྡེ་དང༌། ལུང་དུ་བསྟན་པའི་སྡེ་དང༌། ཚིགས་སུ་བཅད་པའི་སྡེ་དང༌། ཆེད་དུ་བརྗོད་པའི་སྡེ་དང༌། རྟོགས་པ་བརྗོད་པའི་སྡེ་དང༌། དེ་ལྟ་བུ་བྱུང་བའི་སྡེ་དང༌། སྐྱེས་པ་རབས་ཀྱི་སྡེ་དང༌། ཤིན་ཏུ་རྒྱས་པའི་སྡེ་དང༌། རྨད་དུ་བྱུང་བའི་ཆོས་ཀྱི་སྡེ་ཞེས་གང་གསུངས་པ་དེ་ནི་མདོ་སྡེ་ཡིན་ནོ། །གླེང་གཞིའི་སྡེ་ཞེས་གང་གསུངས་པ་དེ་ནི་འདུལ་བ་ཞེས་བྱ་བའོ། །གཏན་ལ་དབབ་པར་བསྟན་པའི་ཞེས་གང་གསུངས་པ་དེ་ནི་ཆོས་མངོན་པ་ཞེས་བྱ་སྟེ། ཞེས་གསུངས་པས་ཉན་ཐོས་ཀྱི་སར་གླེང་གཞི་འདུལ་བ་དང་གཏན་ལ་ཕབ་པ་མངོན་པ་དང་གཞན་རྣམས་མདོ་སྡེར་ཡང་གསུངས་ལ། དེ་དག་ཀྱང་གཙོ་ཆེ་བའི་དབང་དུ་བྱས་པའོ། །ཞེས་ས་བཟང་གིས་གསུངས་སོ། །ཡང་ཉ་ཊཱིཀ་ལས། ཆོས་ཀྱི་ཕུང་བོ་དེ་དག་ཀྱང་སྡེ་སྣོད་གསུམ་དུ་བཞག་སྟེ། མདོ་དབྱངས་ལུང་ཚིགས་ཆེད་བརྗོད་ཀྱི་སྡེ་ལྔ་ཉན་ཐོས་ཀྱི་མདོ་སྡེར་འདུ། གླེང་རྟོགས་དེ་སྐྱེས་བཞི་གཉིས་ཀའི་འདུལ་བའི་སྡེ་སྣོད་དུ་བམ་པོ་བཞི་བཅུ་བར་བཤད། འདུ། ཤིན་སྨད་གཉིས་བྱང་སེའི་མདོ་སྡེར་འདུ། གཏན་ཕབ་གཉིས་ཀའི་མངོན་པའི་སྡེ་སྣོད་དུ་བསྡུས་སོ་ཞེས་སོགས་དང༌། ཡུམ་འབུམ་ལྡན་མ་སོགས་བྱང་སེའི་ཤིན་ཏུ་རྒྱས་པའི་སྡེ་སྣོད་དུ་བསྡུས་ཞེས་སོ། །ཞེས་གསུངས་པའི་དགོངས་པ་ཡང་ཀུན་བཏུས་ལྟར་རོ། །གསུང་རབ་ཡན་ལག་བཅུ་གཉིས་ལས་དང་པོ་ལྔ་ལ་ཐེག་པ་ཆེ་ཆུང་གཉིས་ཀའི་སྡེ་སྣོད་ཆ་ཡོད་ལ། ཀུན་བཏུས་ལས། མདོའི་སྡེ་དང༌། དབྱངས་ཀྱིས་བསྙད་པའི་སྡེ་དང༌། ལུང་བསྟན་པའི་སྡེ་དང༌། ཚིགས་སུ་བཅད་པའི་སྡེ་དང༌། ཆེད་དུ་བརྗོད་པའི་སྡེ་གང་ཡིན་པ་འདི་ནི་ཉན་ཐོས་ཀྱི་མདོ་སྡེའི་སྡེ་སྣོད་དོ། །ཞེས་པའི་དགོངས་པ་ཡང་ཉན་ཐོས་ཀྱི་སྡེ་སྣོད་ལ་ཡོད་པའི་ཆ་དག་ཡིན་ཏེ། ས་བཟང་ཀུན་བཏུས་འགྲེལ་བ་ལས། མདོའི་སྡེ་དང་དབྱངས་ཀྱིས་བསྙད་པའི་སྡེ་དང་ལུང་བསྟན་པའི་སྡེ་དང་ཚིགས་སུ་བཅད་པའི་སྡེ་དང་ཆེད་དུ་བརྗོད་པའི་སྡེ་གང་ཡིན་པ་འདི་དག་ནི་ཉན་ཐོས་ཀྱི་མདོའི་སྡེ་སྣོད་དོ། །ཞེས་པ་ནི་ཉན་ཐོས་ལའང་དེ་རྣམས་ཡོད་པའི་ཆ་གང་ཡིན་པ་རྣམས་ཏེ། ཐེག་ཆེན་པ་ལ་དེ་རྣམས་ཡོད་པ་ནི་ཤིན་ཏུ་རྒྱས་པ་དང་རྨད་དུ་བྱུང་བར་འདུས་སོ། །ཞེས་གསུངས་སོ། །ཐེག་མཆོག་དབུ་མའི་ཟིན་བྲིས་ལས། མདོ་སྡེ་ནི་ཉན་ཐོས་ཀྱི་མདོ་སྡེ་སྟེ། ཞེས་གསུངས་པ་ཡང་དེ་བཞིན་ནོ། །དེ་ནས་བཞི་ནི་ཐེག་པ་ཆེ་ཆུང་གཉིས་ཀའི་སྡེ་སྣོད་ཡང་ཡོད་དེ། ས་བཟང་ཀུན་བཏུས་འགྲེལ་བ་ལས། གླེང་གཞིའི་སྡེ་དང་རྟོགས་པ་བརྗོད་པའི་སྡེ་དང་དེ་ལྟ་བུ་བྱུང་བའི་སྡེ་དང་སྐྱེས་པ་རབས་ཀྱི་སྡེ་འཁོར་དང་བཅས་པ་འདི་ནི་ཐེག་པ་ཆེ་ཆུང་གཉིས་ཀའི་འདུལ་བའི་སྡེ་སྣོད་ཅེས་བྱ་སྟེ། ཞེས་གསུངས་སོ། །སྐྱེས་པ་རབས་ཀྱི་སྡེ་ལ་ཐེག་མཆོག་དབུ་མའི་ཟིན་བྲིས་ལས། བྱང་ཆུབ་སེམས་དཔའི་སྐྱེས་རབས་རྣམས་སོ། །ཞེས་གསུངས་པས་དེ་ལ་བྱང་སེམས་ཀྱི་སྐྱེ་རབས་ཀྱིས་ཁྱབ་མ་ཁྱབ་དཔྱད་པར་བྱའོ། །དེ་ནས་གཉིས་ནི་ཐེག་ཆེན་གྱི་སྡེ་སྣོད་ཡིན་ཏེ། ཀུན་བཏུས་ལས།ཤིན་ཏུ་རྒྱས་པའི་སྡེ་དང༌། རྨད་དུ་བྱུང་བའི་ཆོས་ཀྱི་སྡེ་གང་ཡིན་པ་འདི་ནི་བྱང་ཆུབ་སེམས་དཔའི་མདོ་སྡེའི་སྡེ་སྣོད་དོ། །ཞེས་དང༌། ཐེག་མཆོག་དབུ་མའི་ཟིན་བྲིས་ལས། ཤིན་ཏུ་རྒྱས་པའི་སྡེ་ནི་ཐེག་པ་ཆེན་པོའི་མདོ་སྡེ་རྣམས་སོ། །ཞེས་གསུངས་སོ། །ཡང་མྱ་ངན་ལས་འདས་པ་ཆེན་པོའི་མདོ༼འི་ཤོག་གྲངས་ཉིས་བརྒྱ་གོ་གཅིག་༽ལས། ཡང་རྣམ་པ་གཉིས་ཏེ། མདོ་སྡེ་བཅུ་གཅིག་དང༌། ཤིན་ཏུ་རྒྱས་པའི་མདོ་སྡེའོ། །དེ་ལ་མདོ་སྡེ་བཅུ་གཅིག་ནི་འཇིག་པ་དང་འགོག་པའོ། །ཤིན་ཏུ་རྒྱས་པའི་མདོ་སྡེ་ནི་འཇིག་པ་དང་འགོག་པ་མེད་པ་སྟེ། ཞེས་པ་ནས། རིགས་ཀྱི་བུ་ཡོངས་སུ་མྱ་ངན་ལས་འདས་པ་ཆེན་པོའི་མདོ་ནི་དེ་བཞིན་གཤེགས་པ་ཐམས་ཅད་ཀྱིས་དགོངས་ཏེ་གསུངས་པའི་སྙིང་པོའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་རྣམས་མདོ་སྡེ་བཅུ་གཅིག་མངའ་མོད་ཀྱི་དེ་དག་ལ་སངས་རྒྱས་ཀྱི་རང་བཞིན་དང༌། དེ་བཞིན་གཤེགས་པའི་རྟག་པ་དང་བདེ་བ་དང་བདག་དང་ཡོངས་སུ་དག་པ་མི་འཆད་ན། སངས་རྒྱས་བཅོམ་ལྡན་འདས་རྣམས་མཐའ་ཡུན་དུ་མྱ་ངན་ལས་མི་འདའ་བས། དེའི་ཕྱིར་མདོ་སྡེ་འདི་ནི་དེ་བཞིན་གཤེགས་པས་དགོངས་ཏེ་གསུངས་པའི་སྙིང་པོ་ཞེས་བྱའོ། །ཞེས་ཤིན་ཏུ་རྒྱས་པའི་སྡེ་སྣོད་ལས་གཞན་བཅུ་གཅིག་གི་ཁམས་དེ་བཞིན་གཤེགས་པའི་སྙིང་པོ་གསལ་བར་མ་བསྟན་པར་གསུངས་སོ། །རྨད་དུ་བྱུང་བའི་ཆོས་ཀྱི་སྡེ་ཉན་ཐོས་ཀྱི་སྡེ་སྣོད་ཡོད་མེད་དཔྱད་རྒྱུ་ཅུང་ཟད་སྣང་སྟེ། གཞི་བསྡུ་བ་ལས། ཡན་ལག་བཅུ་གཉིས་ལས། ཤིན་ཏུ་རྒྱས་པའི་ཡན་ལག་མ་གཏོགས་པ་ནི། ཉན་ཐོས་དང་ལྡན་པའོ། །ཞེས་གསུངས་པ་ལྟར་བྱང་སར་ཡང་གསུངས་ལ། དེ་ནས་གཅིག་ནི་ཐེག་པ་ཆེ་ཆུང་གཉིས་ཀའི་སྡེ་སྣོད་ཡིན་ཏེ། ཀུན་བཏུས་ལས། གཏན་ལ་དབབ་པར་བསྟན་པའི་སྡེ་ནི་གཉིས་ཀའི་ཆོས་མངོན་པའི་སྡེ་སྣོད་དོ། །ཞེས་གསུངས་སོ། །ཡང་མྱ་ངན་ལས་འདས་པ་ཆེན་པོའི་མདོ་ལས། མདོ་སྡེ་བཅུ་གཉིས་ལས་ནི་མདོའི་སྡེ་འབྱུང་ངོ༌། །མདོའི་སྡེ་ལས་ཤིན་ཏུ་རྒྱས་པའི་སྡེ་འབྱུང་ངོ༌། །ཤིན་ཏུ་རྒྱས་པའི་མདོའི་སྡེ་ལས་ནི་ཤེས་རབ་ཀྱི་ཕ་རོལ་ཏུ་ཕྱིན་པ་འབྱུང་ངོ༌། །ཤེས་རབ་ཀྱི་ཕ་རོལ་ཏུ་ཕྱིན་པ་ལས་ནི་ཡོངས་སུ་མྱ་ངན་ལས་འདས་པ་ཆེན་པོ་མར་གྱི་སྙིང་པོ་ལྟ་བུ་འབྱུང་ངོ༌། །ཞེས་གསུངས་པའི་དོན་དེ་གོང་དུ་བཤད་པ་དག་དང་འགལ་མེད་དུ་བསྒྲུབ་ཚུལ་ཤེས་པར་བྱའོ། །བཅུ་གཉིས་ཀྱི་ངོས་འཛིན་མདོ་དང་བསྟན་བཅོས་ལས་དུ་མར་གསུངས་ལ། ས་སྡེ་གཅིག་ལ་ཡང་སྣ་ཚོགས་བཤད་པ་རྟེན་གཞི་མདོའི་དབང་གིས་ཡིན་པར་སྣང་ངོ༌། །རྒྱས་པར་གཞན་སྟོང་བགྲོ་གླེང་ཐེངས་གཉིས་པའི་དྲིས་ལན་དུ་སྔར་བཤད་ཟིན་པས་དེར་ཤེས་པར་བྱའོ། །བཀའ་མིན་པའི་བསྟན་བཅོས་ལ་མཚན་ཉིད་དབྱེ་བ་གཉིས་ལས། དང་པོ་ནི། རང་རྩོམ་པ་པོ་སེམས་ཅན་གྱི་བརྩམས་པའི་འཆོས་སྐྱོབ་ཀྱི་ཡོན་ཏན་གཉིས་དང་ལྡན་པའི་རྗོད་བྱེད་རྣམ་དག་དེ། བཀའ་མིན་པའི་བསྟན་བཅོས་ཀྱི་མཚན་ཉིད་ཡིན་ཏེ། ཉ་ཊཱིཀ་ལས། བཀའ་མིན་པའི་ནང་རིག་བསྟན་བཅོས་ཀྱི་མཚན་ཉིད། རྫོགས་པའི་སངས་རྒྱས་མིན་པའི་རྩོམ་པ་པོ་རྣམ་གཡེང་མེད་པའི་ཡིད་ཅན་གྱིས་བཀའི་དོན་བཤད་པ་ཐར་བ་ཐོབ་པའི་ལམ་དང་རྗེས་སུ་མཐུན་པའི་རབ་ཏུ་བྱེད་པ་སྟེ། རྒྱུད་བླར། གང་ཞིག་རྒྱལ་བ་སྟོན་པ་འབའ་ཞིག་གི །དབང་བྱས་རྣམ་གཡེང་མེད་ཡིད་ཅན་གྱིས་བཤད། །ཐར་བ་ཐོབ་པའི་ལམ་དང་རྗེས་མཐུན་པ། །དེ་ཡང་དྲང་སྲོང་བཀའ་བཞིན་སྤྱི་བོས་བླང༌། །ཞེས་སོ། །ལུས་ངག་ཡིད་དྲང་བོར་གནས་ཤིང་སྲོང་བས་དྲང་སྲོང་ཞེས་སྒྲ་སྦྱོར་བམ་གཉིས་ལས་ཏེ་འདིར་ནི་སངས་རྒྱས་ལ་ཟེར་རོ། །ཞེས་དང༌། ཀུན་བཏུས་ས་འགྲེལ་ལས། བསྟན་བཅོས་ལའང་མཚན་ཉིད་ནི། རྩོམ་པ་པོ་ཚད་མར་གྱུར་པས་བཀའི་དགོངས་འགྲེལ་དུ་བྱས་པའི་ངག་གང་ཞིག བྱེད་ལས་བཀའ་དང་མཐུན་པ་སྟེ། ཞེས་གསུངས་པའི་ཕྱིར་རོ། །གཉིས་པ་དབྱེ་བ་ནི། དེ་གྱུར་བའི་ཐེག་པ་ཆེ་ཆུང་གི་བསྟན་བཅོས་གཉིས་དང༌། སྡེ་སྣོད་གསུམ་གྱི་སྡེ་གཏོགས་ཀྱི་བསྟན་བཅོས་གསུམ་སོགས་ཡོད་དོ། །དེས་ན། མངོན་རྟོགས་རྒྱན་ཆོས་ཅན། ཁྱོད་ལ་བསྟན་བཅོས་ཞེས་བརྗོད་པའི་རྒྱུ་མཚན་ཡོད་དེ། ཁྱོད་བླང་དོར་གྱི་གནས་ཐམས་ཅད་ནོར་བ་ཅུང་ཟད་ཀྱང་མེད་པར་སྟོན་པའི་ངག་རྣམ་དག་ཡིན་པས་ཁྱོད་ཀྱི་བསྟན་དོན་བཞིན་ཉམས་སུ་བླངས་ན་ཉོན་མོངས་པའི་དགྲ་ཐམས་ཅད་སྤོང་བར་འགྱུར་བ་དང༌། དེའི་འབྲས་བུ་ངན་འགྲོའི་འཇིགས་པ་དང་འབྲལ་བར་འགྱུར་ཕྱིར་རྒྱུད་ཉོན་མོངས་ལས་བཅོས་པ་དང་ངན་འགྲོའི་འཇིགས་པ་ལས་སྐྱོབ་པའི་ཡོན་ཏན་དང་ལྡན་པས་ན་དེ་ལྟར་བརྗོད་པའི་ཕྱིར་རོ། །