རྫོགས་ཆེན་ངོ་སྤྲོད་སྐལ་ལྡན་སྙིང་ནོར། ཁྲག་འཐུང་བདུད་འཇོམས་རྡོ་རྗེ།

༄༅། །རྫོགས་ཆེན་ངོ་སྤྲོད་སྐལ་ལྡན་སྙིང་ནོར་བཞུགས་སོ། །བླ་མ་ལ་ཕྱག་འཚལ་ལོ། །དེའང་ཨོ་རྒྱན་ཆེན་པོའི་ཞལ་ནས། ཆོས་ཀྱི་རྩ་བ་མ་གཅོད་སེམས་ཀྱི་རྩ་བ་ཆོད། །སེམས་ཀྱི་རྩ་བ་ཆོད་ན་གཅིག་ཤེས་ཀུན་གྲོལ་འགྱུར། །སེམས་ཀྱི་རྩ་བ་མ་ཆོད་ཀུན་ཤེས་གཅིག་སྡུག་གྱུར། །ཞེས་གསུངས་པས། སེམས་དོན་ཉམས་ལེན་དངོས་ལ་འཇུག་པའི་ཚེ། ལུས་དྲང་པོར་བསྲང་། རླུང་རང་བབས་སུ་གློད། མིག་གདངས་ཟུམ་མཉམ་པ་མདུན་གྱི་ནམ་མཁར་ཅེ་རེ་བལྟ། སེམས་ཀྱིས་མ་གྱུར་སེམས་ཅན་ཐམས་ཅད་ཀྱི་དོན་དུ་རང་རིག་ཀུན་ཏུ་བཟང་པོའི་རང་ཞལ་བལྟ་སྙམ་དུ། རྩ་བའི་བླ་མ་དང་ཨོ་རྒྱན་པདྨ་དབྱེར་མེད་ལ་གསོལ་བ་དྲག་ཏུ་བཏབ། མཐར་ཐུགས་ཡིད་བསྲེས་ཏེ་མཉམ་པར་བཞག །དེ་ལྟར་བཞག་དུས་རིག་པ་སྟོང་གསལ་དེའི་ངང་དུ་ཡུན་རིང་མི་གནས་པ་སེམས་ཚབ་ཚུབ། ཟང་ཟིང་། བྲང་བྲིང་། སྤྲེའུ་འདྲ་བ་ཞིག་ལངས་ནས་འོང་། དེ་སེམས་ངོ་མ་རེད། རྣམ་རྟོག་ཟེར་བ་དེ་རེད། ཁོའི་རྗེས་སུ་ཤོར་ན་རྣམ་རྟོག་འདིས་མི་དྲན་བསམ་པ་དང་། མི་དགོས་བསམ་པ། མི་བྱེད་བསམ་པ་ནི་གཅིག་ཀྱང་མེད། སྔར་ཡང་འཁོར་བའི་རྒྱ་མཚོའི་ནང་དུ་ནག་ཐིམ་གྱིས་ཁོས་འཕངས་པ་ཡིན། ཕྱིན་ཆད་ཀྱང་འཕེན་ཐག་ཆོད་རེད། ད་ནི་རྣམ་རྟོག་འཁྲུལ་པ་ནག་འབྱམས་འདི་དང་མཚམས་བཅད་ན་དགའ། མཚམས་ཆོད་དུས་རིག་པ་ཁོ་ཅི་འདྲ་ཞིག་འདུག་ཟེར་ན། སྟོང་སང་ངེ་། ཧ་ཆད་དེ། ཡང་ཁྲོལ་ལེ། བདེ་ལྷང་ངེར། དངོས་པོའི་མཚན་མ་ཅན་དུ་གྲུབ་མ་མྱོང་བ། འཁོར་འདས་ཀྱི་ཆོས་ཐམས་ཅད་ལ་མ་ཁྱབ་པ་མེད་པ། ཡེ་ནས་རང་དང་ལྷན་སྐྱེས་སུ་འབྲལ་མ་མྱོང་བ། བྱ་རྩོལ་བློ་ཡུལ་ལས་འདས་པ་ཞིག་འདུག །ད་འོ་ན། རིག་པ་རང་ངོ་ཤེས་དུས་ཅི་འདྲ་ཞིག་འདུག་ཟེར་ན། རང་རིག་རང་ངོ་ཤེས་ཀྱང་བརྗོད་མི་ཤེས་པ་ལྐུགས་པའི་རྨི་ལམ་ལྟ་བུ། སྐྱོང་མཁན་རང་དང་བསྐྱང་རྒྱུའི་རིག་པ་གཉིས་སོ་སོར་འབྱེད་མི་ཤེས་པ་ཞིག་འདུག །དེ་ལྟ་བུའི་རིག་པ་ཀློང་ཡངས་ཆེན་པོའི་ཐོག་ཏུ་རང་བབས་སུ་རྗེན་ནེར་བཞག་ཙ་ན། སྔར་སྐད་ཅིག་ཙམ་སྡོད་མི་ཐུབ་པའི་མི་དྲན་དགུ་དྲན་མི་བྱེད་དགུ་བྱེད་རྣམ་རྟོག་ཕུང་རྒན་ཁོ་ལ་ཅི་བྱེད་འདུ་བྱེད་མེད་པར་རིག་པ་སྤྲིན་བྲལ་ནམ་མཁའ་ལྟ་བུའི་ཀློང་དུ་རྣམ་རྟོག་འགྱུ་བ་ཡལ་ཤོར། འཐོར་ཤོར། ཞིག་ཤོར་ནས་རྣམ་རྟོག་ཁོའི་དབང་ཤེས་ཐམས་ཅད་རིག་པ་ལ་ཤོར། རིག་པ་རང་གནས་ཆོས་སྐུའི་ཡེ་ཤེས་རྗེན་ལྷང་ངེར་གདའ་ཡི། འོ་ན་དེ་ལྟ་བུའི་རིག་པ་དེ་སུས་ངོ་སྤྲད། ཐག་གང་ལ་གཅོད། གདེང་ཇི་ལྟར་འཆའ་ཟེར་ན། རིག་པ་དང་པོ་བླ་མས་ངོ་སྤྲད་པས་རང་ངོ་རང་གིས་ཤེས་ནས། ངོ་རང་ཐོག་ཏུ་འཕྲོད། འཁོར་འདས་ཀྱི་ཆོས་ཇི་ལྟར་སྣང་ཡང་རིག་པ་རང་གི་རྩལ་ལས་མ་འདས་ན། ཐག་རིག་པ་གཅིག་ཐོག་ཏུ་ཆོད། རྣམ་རྟོག་གང་ཤར་ཐམས་ཅད་རྒྱ་མཚོའི་རྦ་རླབས་རྒྱ་མཚོར་ཐིམ་པ་ལྟར། གདེང་གྲོལ་ཐོག་ཏུ་བཅད་པས། བསྒོམ་བྱ་སྒོམ་བྱེད་ལས་འདས་པ་སྒོམ་འཛིན་གྱི་བློ་དང་བྲལ་བ་ཞིག་གདའ། འོ་དེ་འདྲ་ཡིན་ན་མ་བསྒོམས་ཀྱང་ཆོག་འདུག་མོད་ཟེར་ན། འོ་དེ་འདྲ་ག་ལ་ཡིན། རིག་པ་ངོ་ཤེས་པ་ཙམ་གྱིས་གྲོལ་བའི་ས་ལ་སླེབས་པ་མིན། ངེད་རང་ཚོ་ཚེ་རབས་ཐོག་མེད་ནས་འཁྲུལ་པའི་བག་ཆགས་ཀྱི་སྦུབས་སུ་འཐིམ། སྔར་ནས་ད་བར་རྣམ་རྟོག་ཁོའི་སྐྱག་འོག་ཏུ་མི་ཚེ་འཁྱོལ། འཆི་དུས་གར་འགྲོ་འདིར་འགྲོ་མེད་པར་ལས་ཀྱི་རྗེས་སུ་འབྲངས་ནས་སྡུག་བསྔལ་མྱོང་དགོས་པ་རེད། དེས་ན་ད་ལྟ་རིག་པ་ངོ་འཕྲོད་པ་དེའི་རྒྱུན་བསྐྱངས་ནས་བསྒོམ་དགོས་པ་ཡིན། ཀུན་མཁྱེན་ཆེན་པོས། རང་ངོ་འཕྲོད་ཀྱང་གོམས་འདྲིས་མ་བཏང་ན། །རྣམ་རྟོག་དགྲས་ཁྱེར་གཡུལ་ངོའི་བུ་ཆུང་འདྲ། །ཞེས་གསུང་། སྤྱིར་སྒོམ་པ་ཞེས་པ་འདི། རང་བབས་གཉུག་མའི་དྲན་པས་རྒྱུན་བསྐྱངས་ཏེ་རིག་པ་ཡེངས་མེད་འཛིན་མེད་དུ་བཞག་ནས་གཉུག་མའི་གཤིས་སུ་གོམས་འདྲིས་གཏོང་བ་འདི་ལ་ཟེར། གོམས་འདྲིས་གཏོང་ཚུལ་ཡང་། སྒོམ་པའི་ཚེ་རྣམ་རྟོག་ཤར་ནའང་ཤར་དུ་ཆུག །དགྲ་རུ་བལྟ་མི་དགོས། ཤར་ཐོག་ཏུ་གློད། མ་ཤར་ན་ཨེ་འཆར་མེད། མ་ཤར་བའི་ཐོག་ཏུ་ཞོག །ལར་སྒོམ་གྱི་ཚེ་རྣམ་རྟོག་རགས་པ་ཞིག་ཐོལ་གྱིས་ཤར་བྱུང་ན། དེ་ངོས་ཟིན་སླ་མོད། རྣམ་རྟོག་ཕྲ་མོ་འགའ་ཙམ་ཤར་ཟིན་རྗེས་བར་དུ་ཧ་མ་གོ་བ་ཞིག་ཡོང་། དེ་ལ་རྣམ་རྟོག་འོག་འགྱུ་ཟེར། འདིས་སྒོམ་གྱི་འཇབ་རྐུན་བྱེད་འོང་བས་དྲན་པས་རྒྱང་སོ་འཛུགས་པ་གལ་ཆེ་ཟེར། དྲན་པས་རྒྱུན་འདི་ཟ་ཉལ་འགྲོ་འདུག་མཉམ་རྗེས་གང་གི་སྐབས་སུའང་ཡོད་པ་ཞིག་བྱུང་ན་དེ་ག་རང་ཡིན། སློབ་དཔོན་ཆེན་པོས། བརྒྱ་བཤད་སྟོང་དུ་ལབ་ཀྱང་གོ་བ་གཅིག །གཅིག་ཤེས་ཀུན་གྲོལ་རང་རིག་རང་ངོ་སྐྱོངས། །ཞེས་གསུངས། ཡང་མ་བསྒོམ་ན་གདེང་མི་ཐོབ། བསྒོམ་ན་གདེང་ཐོབ་འོང་ཞེས་པའི་གདེང་དེ་ཇི་ལྟར་ཞིག་ཐོབ་རྒྱུ་ཡོད་ཟེར་ན། དེ་ལྟར་བརྩོན་འགྲུས་དྲག་པོས་བསྒོམས་པས་གོམས་པ་མངོན་དུ་གྱུར་པའི་རང་རྟགས་སུ་གཉིས་སྣང་ཨ་འཐས་ཀྱི་ཞེན་འཛིན་དམ་བྲིང་ངེ་བ་འདི་རིམ་པར་ཇེ་ལྷོད་དང་དགའ་སྡུག་རེ་དོགས་རྩོལ་སྒྲུབ་མང་པོ་འདི་ཇེ་ཉུང་དུ་འགྲོ། བླ་མ་ལ་མོས་གུས་ཇེ་ཆེ་དང་། གདམས་ངག་ལ་སྙིང་ནས་ཡིད་ཆེས་སྐྱེ། ཅི་ཞིག་ན་གཉིས་འཛིན་ཨ་འཐས་ཀྱི་བློ་འདི་རང་ཡལ་ལ་སོང་ནས། གསེར་དང་ས་རྡོ་མཉམ། ཟན་དང་སྐྱག་པ་མཉམ། ལྷ་དང་འདྲེ་མཉམ། དགེ་བ་དང་སྡིག་པ་མཉམ་ཞིང་ཁམས་དང་དམྱལ་བ་མཉམ། འདམ་ཁ་མི་ཤེས་པ་ཞིག་ཡོང་གི་ཡོད་པ་རེད། དེ་འདྲ་མ་བྱུང་གི་བར་གཉིས་སྣང་གི་འཛིན་པ་ཁོའི་ངོ་ལ་དགེ་བའང་ཡོད། སྡིག་པའང་ཡོད། ཞིང་ཁམས་ཀྱང་ཡོད། དམྱལ་བའང་ཡོད། བདེ་སྡུག་ལས་འབྲས་ཐམས་ཅད་བསླུ་བ་མེད་པར་ཡོད་པས་ན། སློབ་དཔོན་ཆེན་པོས། ལར་ལྟ་བ་ནམ་མཁའ་བས་ཀྱང་མཐོ། །ལས་རྒྱུ་འབྲས་བག་ཕྱེ་བས་ཀྱང་ཞིབ། །ཅེས་གསུངས། དེས་ན་ང་རྫོགས་པ་ཆེན་པོ་ཡིན། སྒོམ་ཆེན་ཡིན་ཞེས་ཁ་སྐྱུ་དྲི་བ་ལེ། རྐུབ་རྒྱོབ་དྲི་ཚུབས་སེ་ཉལ་བསྡད་པས་ཡོང་བ་མིན། དད་མོས་དམ་ཚིག་རྣམ་པར་དག་པས་གཞི་བཟུང་། ཐང་ལྷོད་མེད་པའི་བརྩོན་འགྲུས་དྲག་པོས་གཞུང་བསྲུང་། དོན་མེད་ཚེ་འདིའི་བྱ་བ་ཐམས་ཅད་ཆམ་གྱིས་བཞག་ནས་བསྒོམ་ནུས་ན་ཟབ་ལམ་རྫོགས་པ་ཆེན་པོའི་ཁྱད་ཆོས་སྐྱེ་བ་ཕྱི་མ་ལ་ལྟོས་མི་དགོས་པར་ཚེ་འདི་ཉིད་ལ་གདོད་མའི་བཙན་ས་ཟིན་ངེས་ཡིན་ནོ། །ཞེས་སྐལ་ལྡན་སྙིང་ནོར་གདམས་ངག་དམར་རྗེན་ལག་བཅིངས་སུ་ཛྙཱ་ནས་སྨྲས་པའོ། །བདག་གི་བླ་མའི་ཞལ་ནས་རྒན་བུ་བདག་ལ། བླ་མ་མ་གཏོགས་བསམ་རྒྱུ་མེད་པ། གསོལ་འདེབས་མ་གཏོགས་འདོན་རྒྱུ་མེད་པ། བྱར་མེད་མ་གཏོགས་སྐྱོང་རྒྱུ་མེད་པའི་ངང་དུ་སྡོད་ཁུལ་ཡིན། ད་ལྟ་གཏད་མེད་རྒྱ་ཡན་གུ་ཡངས་བློ་བདེའི་ངང་དུ་ཡོད་གསུངས། བསམ་དོན་གཏན་འདུན་བསྒྲུབ་པ་ལ། །རྫོགས་ཆེན་གདམས་ཟབ་གཅིག་པུས་ཆོག །གོ་བདེའི་ངག་འཁྲིད་བརྗོད་པ་འདི། །བདུད་འཇོམས་སྨྱོན་པས་བྲིས་ཏེ་སྤྲད། །དགེའོ།། །།