དཔལ་ལྡན་ལྷ་མོ་བདུད་རྩི་སྨན་གྱི་རྒྱལ་མོའི་གཏོར་ཆོག་བསྡུས་པ།
དཔལ་ལྡན་ལྷ་མོ་བདུད་རྩི་སྨན་གྱི་རྒྱལ་མོའི་གཏོར་ཆོག་བསྡུས་པ་བཞུགས་སོ། །
མདུན་དུ་དུར་ཁྲོད་ཆེན་པོའི་ནང་། །མེ་འབར་ཁྲག་ཞག་རྒྱ་མཚོའི་དབུས། །ཐོད་པ་སྐམ་རློན་གཞལ་ཡས་སུ། །ཨོཾ་ལས་དུད་སོལ་ལྷ་མོ་ནག་།ཞལ་གཅིག་ཕྱག་བཞི་རལ་གྲི་དང་། །ཐོད་ཁྲག་ཤཀྟི་རྩེ་གསུམ་འཛིན། །དུར་ཁྲོད་ཚེས་བརྒྱན་མི་རོ་གསོལ། །བ་གླང་ལྤགས་པ་རེ་ལྡེ་བགོས། །སྦྲུལ་རྒྱན་ཞབས་གཉིས་ལྕགས་སྒྲོག་གསོལ། །བོང་བུ་གྲྭ་དམར་ཆིབས་པའོ། །ཐུགས་ཀར་འོད་དབུས་སྔགས་ཕྲེང་གསལ། །ཧཱུྃ་ལས་ཧཱུྃ་བྱུང་བྷ་གར་ཐིམ། །ཧཱུཾ་ལཱ་སྱ་རཱ་ག་ས་མཱ་ཡ་ཧཱུཾ། བྷྱོཿ རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེ་
མཐིང་དཀྱིལ་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནང་། །།གྲུ་གསུམ་འབར་བའི་ཀློང་དཀྱིལ་ནས། །དཔལ་ལྡན་ལྷ་མོ་དུད་སོལ་མ། །ཞལ་གཅིག་ཕྱག་བཞི་བོང་བུ་ཆིབས། །སྐུ་མདོག་ནག་པོ་འཇིགས་པའི་གཟུགས། །འཁོར་ཡང་ནག་མོ་འབུམ་དང་བཅས། །གནས་འདིར་ཉིད་དུ་གཤེགས་སུ་གསོལ། །ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་ཨེ་ཨ་ར་ལི་ཧྲི་ཧཱུྃ་ཛཿ པདྨ་མ་ཀ་ལཱ་ཡེ་ཧཱུཾ། དཔལ་ལྡན་ལྷ་མོ་ཁྱོད་ཀྱིས་བདག་ལ་སྐུ་མྱུར་དུ་སྟོན་ཅིག །གལ་ཏེ་སྐུ་མི་སྟོན་ན་བདག་གི་ཡིད་ལ་ཅི་འདོད་པ་
དེ་འགྲུབ་པར་གྱིས་ཤིག །ཨོཾ་ས་མ་ཡ་ཧ་ན་ཧ་ན་མ་ཏི་ཀྲ་མ་ནི་ཧཱུཾ་ཕཊ། ཨོཾ་དེ་བི་ཀཱ་ལི་ས་པཱ་རི་ཝཱ་ར་ཨབྷཾ་སོགས་ནས། ཤཔྟ་པྲ་ཏཱིཙྪ་ཨཱཧཱུཾ། ཨོཾ་ཨཱཿཧཱུྃ་ཧ་ཧོ་ཧི༔ གསུམ། ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ་ཧཱུཾ། ས་པཱ་རི་ཝཱ་ར་ཨི་དཾ་བྷ་ལིཾ་ཏ་ཁ་ཁ་ཁཱ་ཧི་ཁཱ་ཧི། ལན་གསུམ། པཉྩ་ཨ་མྲྀ་ཏ་ཨོཾ་ཨཱཧཱུཾ། །དཔལ་ལྡན་ལྷ་མོ་དུད་པའི་སོལ་བ་མ། སྙིང་འཕྲོག་མ་གསུམ། རིགས་བཞིའི་ལྷ་མོ་བཞི། དུར་ཁྲོད་ཀྱི་མ་མོ་བརྒྱད། །ཕྲ་མེན་མ་བརྒྱད། །སྒོ་མ་བཞི། སྲིད་པའི་མ་མོ་བྱེ་བ་འབུམ་སྡེའི་ཚོགས་དང་བཅས་པ་རྣམས་ལ་འབུལ་ལོ། །མཉེས་རབ་ཀྱི་ཕུད། དགྱེས་རབ་ཀྱི་མཆོད་པ་དམ་པ་མཛོད་ལ། སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། ཁྱད་པར་དུ་བདག་ཅག་དཔོན་སློབ་ཡོན་མཆོད་བསྲུང་བྱ་མི་ནོར་འཁོར་དང་བཅས་པ་ཐམས་ཅད་ལ། མི་ནད་ཕྱུགས་ནད་ནད་རིགས་བཞི་བརྒྱ་རྩ་བཞི་ཞི་ཞིང་མི་འབྱུང་བ་དང་། ཚེ་དང་བསོད་ནམས་བསྟན་པ་དར་ཞིང་རྒྱས་པའི་ཕྲིན་ལས་མཛོད་ཅིག །བྷྱོ༔ ཕྱོགས་བཅུའི་འཇིག་རྟེན་བདུད་རྩིའི་བཅུད་བསྡུས་ལ། །ཟླ་བའི་དཀྱིལ་འཁོར་དག་ལ་ཐིམ་པར་མཛད། །བདུད་རྩི་རླངས་པ་
དཀར་པོའི་ཕྱོགས་རྣམས་ཀྱིས། །བཞི་བརྒྱ་རྩ་བཞིའི་ནད་རྣམས་ཚར་གཅོད་མ། །བདུད་རྩི་སྨན་གྱི་རྒྱལ་མོ་ཁྱོད་ལ་བསྟོད། །རྣལ་འབྱོར་བདག་དང་བདག་གི་འཁོར་རྣམས་ལ། །ཞལ་ནས་བདུད་རྩི་ཆར་གྱི་རྒྱུན་ཕོབ་ལ། །ནད་སོགས་སྡུག་བསྔལ་ཚོགས་ནི་ཞི་བར་མཛོད། །དེ་ཡིས་རྒྱུན་ཁྱེར་ལྷ་མོའི་གཏོར་ཆོག་ཚང་། །ཐུན་མཇུག་རྒྱུན་ཁྱེར་བསྙེན་པ་བྱེད་འདོད་ན། །རང་ཉིད་ཡི་དམ་གང་ཡིན་གསལ་བའི་མདུན། །ལྷ་མོའི་ཐུགས་ཀར་ཧཱུཾ་མཐར་སྔགས་གཡོན་འཁོར། །ཧཱུྃ་གི་ཟླ་ཚེས་ཟླ་བར་གྱུར་པ་ལས། །བུམ་པའི་བདུད་རྩི་འོ་མའི་མདོག་འདྲ་བས། །ལྷ་མོའི་ཞལ་དུ་ཞུགས་ནས་སྐུ་ལུས་གང་། །ལྷ་མོའི་སྐུ་མདོག་དུང་གི་མདོག་ལྟར་གྱུར། བདུད་རྩིའི་མ་ཤོང་ཞལ་ནས་སྐྱུགས་པའི་ཚུལ། །ཆར་དྲག་གམ་ནི་ཆུ་བོའི་རྒྱུན་བཞིན་བབས། །བདག་དང་བསྲུང་བྱ་ཀུན་གྱི་ཚངས་བུག་ཞུགས། །ལུས་གང་ཡམས་ནད་རིམས་ནད་ཐམས་ཅད་དང་། །མཁའ་འགྲོའི་རླངས་པ་མ་མོའི་རྫུ་འཕྲུལ་རྣམས། །རླངས་པ་སྔོ་དམར་ཚུལ་དུ་ཕྱིར་ཐོན་ཡལ། །དེ་ལྟར་བསྒོམ་ཞིང་བསྙེན་པ་ཅི་ནུས་དང་། །ནད་གདོན་སརྦ་ཤཱནྟཾ་ཀུ་རུ་ཡེ་སྭཱ་ཧཱ། །ཞེས་པས་ཤམ་བུ་བཏགས་པ་བཟླས་པར་བྱ། །ཕྱར་དར་ལ་སོགས་རྟེན་རྫས་ཡོད་ན་ནི། །ལྷ་མོ་འཁོར་བཅས་དེ་ལ་ཐིམ་པར་བསམ། །རྟོགས་པ་མཐོ་ཞིང་རྩ་རླུང་བསྒོམ་པ་ཡི། །ལྷ་མོ་རང་གི་ལྟེ་བར་ཐིམ་པར་བསམ། །དེ་ལྟར་མིན་ན་བྱང་ཤར་ཕྱོགས་
གཤེགས་བསམ། །ཞེས་ཨ་རཱ་གས་མཛད་པའོ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།