འདྲེན་མཆོག་ཀརྨ་ཨ་རཱ་གས་རྫོགས་ཆེན་པ་སུན་དྷ་བི་དྷ་ར་ལ་འཕྲིན་ཡིག་གནང་བ།
འདྲེན་མཆོག་ཀརྨ་ཨ་རཱ་གས་རྫོགས་ཆེན་པ་སུན་དྷ་བི་དྷ་ར་ལ་འཕྲིན་ཡིག་གནང་བ་བཞུགས་སོ། །
པདྨའི་རྡོར་གསུང་གནམ་ཆོས་ཐུགས་གཏེར་དང་། །རིག་འཛིན་རྣམ་གསུམ་ཞལ་འཆམས་རྗེ་འབངས་སོགས། །སེམས་དཔའ་ཆེན་པོའི་སྤྲུལ་སྐུ་སྦས་པའི་ཚུལ། །སྐལ་ལྡན་སྐྱེས་བུ་ལོ་བརྒྱར་ཞབས་བརྟན་གསོལ། །འཁོར་བའི་དོན་རིག་ཞེན་པ་གཏིང་ནས་ལོག །འཆི་བ་སྙིང་ནས་གཟེར་བས་སྒྲུབ་ལ་བརྩོན། །ཐོས་བསམ་སྤེལ་མར་བྱས་པས་གོལ་ས་ཆོད། །སྒྲུབ་བརྒྱུད་བསྟན་པའི་རྒྱན་ཁྱོད་རྒྱལ་གྱུར་ཅིག། རང་དོན་ཚགས་ཚུད་ཆོས་ཉིད་བདེན་པ་རྟོགས། །མ་རྟོགས་འགྲོ་ལ་བཟོད་མེད་སྙིང་རྗེ་ཡིས། །འཆད་རྩོད་བརྩམས་ལ་ཐོགས་པ་མི་མངའ་བ། །
འགྲོ་ལ་ཟབ་རྒྱས་ཆོས་ཆར་དབབ་ཏུ་གསོལ། ༈ །དེ་ལྟར་ཤིས་པ་བརྗོད་ནས་ཞུ་བའི་འབྲས། །བློ་སེམས་མི་དང་མི་མཐུན་དམ་པའི་རྟགས། །གསུང་ལྟར་ཁྱེད་ལ་བློ་བཅོས་ཚུད་དཀའ་ཞིང་། །དེ་སྔོན་གང་མཛད་བྱང་ཆུབ་ལམ་སོང་བས། །ད་ཡང་ཉིད་ཀྱི་ཐུགས་ཐག་གང་བཅད་ལ། །ཁོ་བོས་གེགས་དང་བཤོལ་འདེབས་བྱ་མི་སྤོབས། །ཉིད་ཀྱི་བཞེད་པ་གང་ཡིན་མཐར་ཕྱིན་ནས། །རང་རེ་ཕ་པད་ལུས་འདི་དངོས་མཇལ་ནས། །ཟབ་རྒྱས་ཆོས་ཀྱི་སྐྱེལ་མའང་ཞུ་བ་དང་། །སྔ་ཕྱིར་ཉིད་ཀྱི་བཀའ་ཤོག་བྱུང་རྣམས་ལ། །ཉམས་དགའི་
བགྲོ་གླེང་ཞག་མང་སྦྲེལ་ཆོག་པ། །པད་འབྱུང་ཡི་དམ་ཚོགས་ལ་གསོལ་བ་འདེབས། །ཊཱཀི་བཀའ་སྲུང་རྣམས་ལ་ཕྲིན་ལས་བསྐུལ། །གེགས་མེད་འགྲུབ་པར་ཨོ་རྒྱན་ཆེན་པོ་མཁྱེན། །བསམ་ཆུང་ཁོ་བོའི་བསམ་པ་ལྟར་བྱེད་ན། །སྔར་དུས་རྒྱ་གར་ཆོས་ཀྱི་འབྱུང་གནས་ཏེ། །པཎ་གྲུབ་མཇལ་ཞིང་ཟབ་རྒྱས་གདམས་པ་ཐོབ། །ད་ནི་ཆོས་ནུབ་མུན་གླིང་མུ་སྟེགས་ཡུལ། །མ་ཧཱ་བྷོ་དྷིའི་ཞལ་ལ་སོལ་བས་བྱུག །བྱང་ཆུབ་ཤིང་མཆོག་སྟ་རེས་བརྩིགས་ཞེས་ཐོས། །གྲུབ་ཆེན་ནམ་མཁའ་འཇིགས་མེད་བྱོན་དུས་ཀྱང་། །ངན་དགུ་བྱུང་རབ་རྣམ་ཐར་ནང་ན་གསལ། །ཁྱེད་ཀྱང་དེ་ལས་ལྷག་རྒྱུ་མེད་པ་དང་། །ཁྱི་ཕག་བྱི་བ་གླང་བཞི་སྐུ་སྐག་ཆེ། །འཇམ་དབྱངས་གསུངས་ལ་བདེན་པ་མེད་མི་སྲིད། །ཐུབ་པས་མཛད་པ་སྟོན་པའི་གནས་མཆོག་ལ། །དད་པས་མཇལ་ན་སྒྲིབ་སྦྱང་ལོས་འོང་སྟེ། །ཕན་ཡོན་འདི་ཡོད་གསལ་ཁ་ངས་མ་མཐོང་། །ཙཱ་རི་མཆིམས་ཕུ་ཟབ་བུ་ལ་སོགས་ཀྱི། །ཕན་ཡོན་གུ་རུའི་གསུང་རྣམས་གསལ་ལྟར་ཡིན། །ཕལ་པས་རྒྱ་གར་འཁོར་མཁན་མང་འདུག་སྟེ། །དམ་ཆོས་ཤོ་ལོ་ཀ་གཅིག་ཐོབ་པའམ། །རྣམ་རྟོག་བོགས་སྐྱེད་བྱུང་
ཚུལ་ག་ལ་ཞིག །རྨིས་ལྟས་དག་སྣང་ཙམ་ཡང་བྱུང་མཁན་དཀོན། །རང་རེའི་བློ་ཕུག་ཨོ་རྒྱན་ཆེན་པོ་ཡིན། །ཨོ་རྒྱན་སྐུ་ཚབ་སྤྲུལ་པ་གཏེར་སྟོན་ཡིན། །དེ་སྔོན་འགའ་རེ་མཇལ་ཡང་ཆོག་ཤེས་མེད། །དགེ་བའི་བཤེས་གཉེན་ཡང་ཡང་མཇལ་བ་ལ། །ཆོག་ཤེས་མེད་པར་གྱིས་ཞེས་ཐུབ་པས་གསུངས། །ཨོ་རྒྱན་གསུང་ཚབ་ཟབ་གཏེར་ལྷད་མེད་ཡིན། །ཐོས་པས་མི་ངོམས་བྱང་ཆུབ་སེམས་དཔའི་ལུགས། །རྒྱ་གར་རྒྱ་ནག་ཐམས་ཅད་འཁོར་བ་བས། །གཏེར་ཆོས་ལྷད་མེད་སྣ་ཁ་གཅིག་ཐོབ་ན། །རང་གཞན་གཉིས་དོན་ནོམ་པ་དེ་ཡི་ཆེ། །བྷི་མའི་སྤྲུལ་པ་བཟང་པོ་རྡོ་རྗེ་དེས། །གསང་གཏེར་ཐོན་ནས་གསང་ཞིང་སྤེལ་ཡོད་ཟེར། །དེ་ལ་སྣ་གཅིག་ཐོབ་ན་ཅི་མ་རུང་། །དབུས་གཞུང་དགྲ་དང་དོལ་གྱི་ཕུ་ཤེད་ན། །བེ་རོའི་སྤྲུལ་པ་འགྱུར་མེད་རྡོ་རྗེ་དེས། །གཏེར་ཁ་གསུམ་ཐོན་འགྲོ་དོན་བྱེད་སྐབས་ལགས། །པོ་ཏི་གཅིག་ནི་ཁོ་བོས་ཀྱང་ནི་མཐོང་། །ཐེ་ཚོམ་མི་འདུག་ལིས་གཅིག་འབྲེལ་པའང་ཞུས། །དེ་ཡི་གཏེར་ཆོས་མང་ཞིག་ཐོབ་ན་ཨང་། །དེ་ནས་ཁམས་སུ་ཕེབས་ན་ལེགས་མོད་ཀྱི། །ད་རུང་གནས་ཀྱི་བློ་ཁ་མ་རྫོགས་
དང་། །ཟབ་བུའི་གཏེར་ལུང་བཅུ་གསུམ་རེ་རེ་ལའང་། །ཞག་པོ་འགའ་ཟུང་གནས་འབྲེལ་མཛད་པ་ན། །ཉམས་རྟོགས་བོགས་དང་ཞལ་གཟིགས་ལུང་བསྟན་སོགས། །ངོ་མཚར་འབྱུང་ཞིང་ཟབ་བུའི་སྟོད་དེ་ན། །ཁ་བྱང་གཏེར་སྟོན་ངེས་པ་མེད་པ་ཡི། །ལས་ཅན་ལག་ཏུ་སོན་རྒྱུའི་གཏེར་ཁ་མང་། །ལུང་བསྟན་བྱུང་ན་འདོན་རུང་ཐོབ་ཀྱང་སྲིད། །ལུང་བསྟན་མེད་ན་མཐོང་ཡང་འདོན་མི་རུང་། །དེ་ནས་ཁམས་སུ་ཅིས་ཀྱང་འབྱོན་དགོས་ཏེ། །རང་དོན་གྲུབ་ནས་གཞན་དོན་མི་མཛད་པ། །ཐེག་དམན་ཉན་ཐོས་ལམ་གྱི་གོལ་ས་ཆེ། །རྫོགས་སངས་རྒྱས་ནས་འགྲོ་དོན་མ་གཏོགས་པ། །མཛད་རྒྱུ་གཞན་ནི་ཡོད་སྐད་མ་ཐོས་སོ། །དེང་སང་ཁྲིམས་ཆེན་རྫོགས་ལྡན་དུས་མཚུངས་ཡང་། །ཆས་ཀ་ལེགས་པོ་ཅུང་ཟད་འདུག་མཐོང་ནས། །བླ་མ་འགའ་ཞིག་ལྐོག་བསད་བྱས་པའང་ཐོས། །ཁྲམ་པ་གཞན་ནས་འོང་ནི་མི་དགོས་པར། །གྲོགས་ཀྱི་ཨ་ཅོའི་སྙིང་ལ་བདུད་ཞུགས་སྐད། །དེ་ཕྱིར་གྲྭ་པ་ཐམས་ཅད་མ་གཏོགས་པར། །གང་དུ་འབྱོན་ཡང་དཔོན་སློབ་མཉམ་དུ་བྱོན། །ཁམས་སུ་འབྱོན་པ་ཟང་ཟིང་དོན་གཉེར་མིན། །དབང་ལུང་རྒྱ་མཚོ་དེ་དག་སྤེལ་
ཐུབ་ན། །འགྲོ་ལ་ཆོས་སྦྱིན་ཨོ་རྒྱན་བསྟན་ལ་ཕན། །བསྟན་འགྲོའི་དོན་འགྲུབ་རང་དོན་མཆོག་དེ་ཡིན། །བླུན་བསྒོམ་ས་ཆོག་བརྒྱ་བས་དེ་ཉིད་ལྷག །རང་རེ་ཕ་པད་རྣམས་ཀྱང་ཞལ་འཛོམ་ཞིང་། །དེ་ནས་རིམ་གྱིས་འབྲི་སྨད་ཕྱོགས་སུ་ཕེབས། །རྙིང་མ་སོར་བཞག་དགོན་པ་བརྒྱ་ལྷག་དང་། །བཙུན་པ་སྟོང་ཕྲག་མང་པོ་ཡོད་འདུག་པས། །ཐམས་ཅད་དབང་ལུང་ཞུ་ལ་ཆོག་ཤེས་མེད། །ཀུན་གྱི་སྐྱབས་གནས་མི་འགྱུར་རྡོ་རྗེ་ལགས། །དེ་ཕྱིར་རང་ཚང་རྙིང་མའི་ཆོས་ལུགས་བརྩི། །དེ་ཕྱོགས་ཕེབས་ན་བསྟན་ལ་ཕན་ཐོགས་ཆེ། །ཀཾ་པོ་གངས་དང་ཉེ་བའི་ས་ཆ་ན། །སངས་རྒྱས་གླིང་པའི་སྤྲུལ་སྐུ་འཆུགས་མེད་པར། །གསང་མཚན་སྨུག་ནག་ནམ་མཁའི་རྡོ་རྗེ་སྟེ། །ཀློང་གསལ་བཱི་མ་སྙིང་ཐིག་ལ་སོགས་པ། །གཏེར་ཆེན་ཐོན་ནས་འགྲོ་དོན་བྱེད་སྐབས་ལགས། །ཆོས་སྐལ་དམ་རྫས་བརྟན་བཞུགས་གནང་སྦྱིན་བཅས། །ཕྱིར་ལ་ཡིག་འབྲེལ་མེད་ཀྱང་ཡར་ལ་བསྐུར། །གཏེར་ཆོས་གཏད་རྒྱ་གནང་ཞིང་རྟགས་བཟང་བྱུང་། །ཁྱེད་རང་དཔོན་སློབ་གཉིས་ཀྱང་ཟབ་གཏེར་གྱི། །ཆོས་སྐལ་ལེན་རིགས་རང་སྐལ་ཅིག་ལ་གཅོད། །རྒས་
པོ་ང་ཡི་ཉལ་བསམ་ལང་མོན་ཡིན། ༈ །ཁྱི་ལོའི་ལོ་མཇུག་སྤར་ཁ་རང་ཐོག་དང་། །བནྡེ་གིན་ཐོག་རྩུབ་པར་བཤད་པའི་ཕྱིར། །ཚེས་གྲངས་དྲུག་དང་བཅུ་བཞི་ཉེར་གཉིས་དང་། །གནམ་གང་མི་རུང་དེ་མན་གང་འདོད་ལ། །རང་ཉིད་ཀིང་ཀང་ལ་སོགས་གཤིན་རྗེར་བསྒོམ། །མདུན་དུ་གིན་རི་བཙུན་གཟུགས་གླང་ཆེན་ཞོན། །ལག་ན་པོ་ཏི་འཛིན་པ་གཅིག་གིས་ནི། །ས་ཡི་གནོད་པ་ཟློག་པར་བྱེད་བསྒོམས་ཤིང་། །ཨོཾ་གི་རིམ་ཧཱུྃ། ཅུང་ཟད་བཟླས་པས་ཁྱི་ལོའི་སྐག་འགྱུར་རོ། །ཕག་ལོ་ཟིན་ཐོག་སྤར་ཁ་དགྲ་ཐོག་རྩུབ། །ཚེས་གྲངས་ངེས་མེད་རང་ཉིད་གཤིན་རྗེར་བསྒོམ། །མདུན་དུ་བོང་བུ་ལ་ཞོན་ཟིན་ལྗང་མོ། །ལག་གཉིས་གཅུས་ཏེ་ཤིང་ལོ་བཟུང་བྱས་ནས། །ཤིང་གི་གནོད་པ་ཟློག་པར་བྱེད་བསྒོམ་ཞིང་། །ཨོཾ་ཟི་སྭཱ་ཧཱ། །ཅུང་ཟད་བཟླས་པས་སྤར་ཁའི་དགྲ་ནག་འགྱུར། །བྱི་བ་ལོ་པ་སྤར་ཁའི་དུར་མིག་རྩུབ། །སྔོན་ལྟར་རང་ཉིད་གཤིན་རྗེ་གཤེད་བསྒོམ་མདུན། །ཟོན་ནི་བུད་མེད་སེར་མོ་མཛོ་མོ་ཞོན། །ལག་ན་རླུང་རྐྱལ་རླུང་གི་བུ་ཡུག་འཛིན། །རླུང་གི་གནོད་པ་ཟློག་པར་བྱེད་བསྒོམ་ཞིང་། །ཨོཾ་ཟོན་ཡ་ཧཱུྃ་ཕཊ། ཚེས་
བརྒྱད་བཅུ་དྲུག་ཉེར་བཞི་མིན་དུས་སུ། །ཅུང་ཟད་བཟླས་པས་སྤར་ཁའི་དུར་སྐག་འགྱུར། །གླང་གི་ལོ་པ་རང་ལོའི་སྐག་ཡིན་པས། །ཚེས་གཉིས་བཅུ་གཉིས་ཉེར་དྲུག་མིན་དུས་སུ། །ཨོཾ་ཉ་ཅི་སྭཱ་ཧཱ། ཅུང་ཟད་བཟླས་པས་གླང་ལོའི་རང་སྐག་འགྱུར། །སྟོང་ཉིད་རྟོགས་ཚེ་ཕྲིན་ལས་རྟེན་འབྲེལ་མཁས། །རྟེན་འབྲེལ་ཁྱད་མི་གསོད་པ་མཁས་པའི་ལུགས། ༈ །དུས་ཕྱིས་བདག་ཀྱང་ཨ་ཏིའི་ཆོས་ལ་མོས། །སྔར་མེད་ཡང་ཏིག་པོ་ཏི་ལ་སོགས་ཐོབ། །རྫོགས་ཆེན་རང་གི་ཉམས་བླངས་གཞན་ལ་སྤེལ། །རིག་པ་ཚད་ཕེབ་འདྲ་བའང་འགའ་བྱུང་སོང་། །དེ་ཕྱིར་ཐེ་ཚོམ་ལོག་ལྟ་མ་ཡིན་ཏེ། །བདག་རང་ཤེས་རབ་ཆུང་བས་མ་གོའི་སྐྱོན། །ཅོ་འདྲི་མ་ཡིན་ངེས་པར་དོགས་གཅོད་རྒྱུ། །བླ་མ་མཁས་པར་མཇལ་ཚེ་དོགས་གཅོད་མཛོད། །དཀོན་མཆོག་བརྩེ་སར་སེམས་ཅན་སོ་སོ་ཡི། །སྣང་བ་མི་མཐུན་སྣ་ཚོགས་གསུངས་མོད་ཀྱིས། །འཛམ་གླིང་མི་རྣམས་ལས་མཐུན་སེམས་ཅན་ཏེ། །བསྐལ་པ་ཆགས་འཇིག་མི་མཐུན་མཐོང་མི་སྲིད། །ཐུབ་པ་བྱམས་པ་གཉིས་ཀྱི་བསྟན་པའི་བར། །བསྐལ་པ་འཇིག་པ་གསུང་འདི་ཅི་ལ་
དགོངས། །འདི་ནས་རྒྱ་གར་རྡོ་རྗེ་གདན་གྱི་བར། །དཔག་ཚད་ལྔ་བརྒྱ་ཡོད་སར་ཀུན་གྱིས་བཞེད། །མངོན་དགའ་བདེ་བ་ཅན་སོགས་ཞིང་ཁམས་བཞི། །དཔག་ཚད་ལྔ་བརྒྱའི་ས་ན་ཡོད་གསུངས་ཤིང་། །བདེ་བ་ཅན་ནི་བཻཌཱུར་ས་གཞི་ལ། །མི་ཀུན་གསེར་མདོག་མཚན་དཔེས་བརྒྱན་གསུངས་ན། །ཐམས་ཅད་དམར་པོ་ཡིན་པར་བཤད་འདི་ཅི། །ལུས་ཀྱི་གནས་ཚུལ་མི་ལའང་གྲོད་པ་ཡོད། །དགའ་རབ་རྡོ་རྗེའི་གསུང་འདི་ཅི་ལ་དགོངས། །སེམས་ཀྱི་ངོ་བོ་རིག་པ་དབྱེར་མེད་པ། །སེམས་ཉིད་རྫོགས་པའི་སངས་རྒྱས་ཡིན་པ་ནི། །གུར་བརྟག་སམ་གསུམ་བླ་མེད་རྒྱུད་མཐུན་ན། །མཁའ་འགྲོ་ཀློང་གསལ་རྒྱུད་དང་མ་མཐུན་པས། །འདི་གཉིས་མཐུན་པའི་གོ་བ་ཚོལ་དགོས་སོ། །བཀའ་དང་བཀའ་གཉིས་འགལ་ཞེས་སྨྲས་ན་ནི། །དམ་ཆོས་སྤང་བའི་ལས་སུ་འགྲོ་བར་བཤད། །ཐེག་པ་སོ་སོའི་ལུགས་ཡིན་སྨྲ་མི་རུང་། །ཐུབ་པས་ཐེག་པ་གཅིག་ལས་མ་གསུངས་སྐད། །འཇིག་རྟེན་ཁམས་སུ་མདོ་སྡེ་གང་གསུངས་པ། །ཚིག་ནི་ཐ་དད་དོན་ནི་བཞི་ཞེས་གསུངས། །བསྐལ་མགོན་དྲུག་ཅུ་ཞེས་པའི་སངས་རྒྱས་རྣམས། །འདས་པའི་སངས་
རྒྱས་ཡིན་ནམ་མ་འོངས་ཡིན། །གདུང་འཕེལ་ཞེས་པ་འཁོར་གྱི་དགྲ་བཅོམ་མམ། །རྟོགས་པ་མཆོག་ཐོབ་ཡིན་ནམ་སངས་རྒྱས་ཡིན། །སྟོན་པ་བཅུ་གཉིས་བསྐལ་པ་འདིར་བྱོན་ན། །ཐུབ་དབང་མ་གཏོགས་བསྐལ་བཟང་སངས་རྒྱས་སུ། །མི་རྩི་བ་ཡི་དོན་དེ་ཅི་ལ་དགོངས། །སྟོན་པ་འདི་མཇུག་ཚེ་ལོ་བརྒྱ་པའི་མཐའ། །བསྟན་པའི་བཙས་གཏེར་ཞིང་ཁམས་གཞན་འཕོ་གསུངས། །བྱམས་པ་མན་ཆད་རྫོགས་ཆེན་དར་མི་དར། །ལང་ཀར་གཤེགས་པར་འོད་དང་པདྨོ་སོགས། །ཕྱི་རོལ་པ་ཡི་ལམ་ལ་ཁྲིད་བྱེད་ཅེས། །མདོ་ཡི་ཚིག་འདི་ཐོད་རྒལ་ལམ་འདི་ལ། །མི་གནོད་པ་ཡི་ལུང་རིགས་ཚོལ་གལ་ཆེ། །ཕྱི་ཡི་ཞིང་ཁམས་ནང་གི་ལུས་མཐུན་པར། །ཞི་བ་འོག་དང་ཁྲོ་བོ་སྟེང་ཡིན་པའི། །རིགས་པས་ཞི་ཁྲོའི་དཀྱིལ་འཁོར་བསྒོམ་ཚེ་ཡང་། །ཞི་བ་འོག་དང་ཁྲོ་བོའི་དཀྱིལ་འཁོར་སྟེང་། །ཁང་པའི་བརྩེགས་འདྲ་བྱས་འདུག་འཐད་མི་འཐད། །བཏགས་གྲོལ་བཏགས་ན་སྡིག་པ་འགྱུར་ཆེ་བས། །འཆི་ཁ་བར་དུ་མི་རུང་བདེན་མི་བདེན། །བུམ་སྒྲུབ་ནང་དུ་སྡིག་ཅན་མ་ཡིན་པའི། །ཤ་སྣ་སྙེད་ཚད་བསྲེ་ཟེར་རུང་མི་རུང་། །དཀྱིལ་
འཁོར་དབུས་སུ་བུམ་པ་འཇོག་པའི་དུས། །མདུན་བསྐྱེད་བུམ་བསྐྱེད་གཉིས་པོ་ཇི་ལྟར་བསྒོམ། །བུམ་པ་ལྷ་ཁང་གསེར་ཏོག་ལྟར་བསྒོམ་མམ། །བདག་མདུན་བར་དུ་རྡོ་རྭ་མེ་རི་སོགས། །སྲུང་འཁོར་གཉིས་ཀྱི་བར་དུ་ཆོད་མི་ཆོད། །དབང་བསྐུར་དུས་སུ་སློབ་མ་གང་དུ་བསྒོམ། །རྒྱལ་བ་གཅིག་གི་དཀྱིལ་འཁོར་བཤམས་ནས་ཀྱང་། །རྒྱལ་བ་ཀུན་གྱི་ལས་གཞུང་བསྲང་གསུངས་ན། །དེ་དག་སོ་སོའི་དཀྱིལ་འཁོར་གང་དུ་བསྒོམ། །མེ་ཏོག་ཕྲེང་མཛེས་ལུས་དཀྱིལ་ཡིན་གསུངས་ན། །རྩ་གནས་ལྷ་བཀོད་ཡིན་ནམ་ཇི་ལྟར་བསྒོམ། །སྒྱུ་ལུས་བཀོད་པའི་གྲོང་ཁྱེར་ལ་གནས་པའི། །ཞེས་པ་ལྷག་མའི་ཚིག་ལ་བྱུང་བ་དེ། །ལྷག་མ་རང་གི་བཟའ་བཏུང་ཡིན་ལགས་སམ། །རིག་འཛིན་སྲོག་སྒྲུབ་བསང་མཆོད་སྐབས་སུ་ནི། །བགེགས་རིགས་སྟོང་ཕྲག་བརྒྱད་ཅུ་བསང་ཟེར་དང་། །ངར་གླུད་དཀོན་མཆོག་གསུམ་ལ་མཆོད་ཟེར་བ། །འདི་འདྲ་བྲིས་པས་ཡི་གེ་ནོར་བའམ། གཅོད་ལུགས་ལྷ་འདྲེའི་འཛིན་པ་གཅོད་ཕྱིར་ཡིན། །རྟོགས་པ་ཡེངས་དང་མ་ཡེངས་ཁྱད་མེད་པའི། །གོ་བ་མ་ཡིན་ངེས་ཤེས་གདེང་ཐོབ་ཀྱང་། །ཡུན་རིང་ཡེངས་ནས་འཁྲུལ་
པར་འབྱམས་འགྲོ་བ། །འདི་ཉིད་འཁྲུལ་པ་ཡིན་ནམ་མ་འཁྲུལ་ཡིན། །ཡེངས་པས་ངོ་བོ་ངན་དུ་མ་སོང་ཞིང་། །མ་ཡེངས་སྒྲིབ་ཀྱང་བཟང་དུ་མི་འགྲོ་བས། འདི་ལ་དྲན་པའི་གསལ་འདེབས་དགོས་མི་དགོས། །རང་བཞིན་ཡོངས་སུ་ཤེས་ན་གདེང་བཅས་ནས། །ཆོས་མེད་རོ་ཉལ་བྱས་ན་ཅི་འདྲ་འཁམ། །ཚེ་མཚམས་དམ་བཅའ་བྱས་བཞིན་རྣམ་གཡེང་ཆེ། །རང་གི་ཐུགས་ལ་དགེ་སྦྱོར་བློས་གཏོང་ནས། །བུག་སྒོའི་ནང་ནས་དབང་ལུང་ཁྲིད་ཀྱི་རྒྱུན། །ཆུ་བོའི་རྒྱུན་འདྲ་འགྲོ་བའི་དོན་ཡིན་ནམ། །བདུད་ཀྱི་བར་ཆད་མགོ་བསྐོར་གང་ཡིན་ཨང་། །ངས་ནི་ཚེ་གཅིག་སངས་རྒྱས་མ་ཐོབ་ཚར། །རྫོགས་ཆེན་ལུགས་ཀྱི་གང་ཟག་ཉེར་གཅིག་གིས། །ཡང་མཐའ་སྤྲུལ་སྐུའི་ཞིང་དུ་དབུགས་ཕྱུང་བ། །དེ་ཀ་ཙམ་ཞིག་སེམས་ལ་འཆག་ཡོད་ཀྱི། །བདེ་བ་ཅན་མ་གཏོགས་པའི་ཞིང་གཞན་དུ། །ས་ཐོབ་མིན་པ་མི་སྐྱེ་ལབ་སྒྲོན་གསུངས། །དེ་ཕྱིར་བདེ་བ་ཅན་དུ་ཕྱིན་པའི་ཐབས། །བཟང་པོ་རྡོ་རྗེ་འགྱུར་མེད་རྡོ་རྗེ་ནས། །སྣང་མཐའ་སྤྲུལ་སྐུའི་སྒྲུབ་ཐབས་བྱུང་ན་རབ། །མི་སྣང་ན་ཡང་ལོངས་སྐུ་ཚེ་དཔག་གི །སྤྲོས་མེད་དབང་ལུང་ཆ་ཚང་
ལེའུ་ཁ་རེ། །བྱང་གཏེར་འོད་དཔག་སྒྲུབ་ཐབས་ཡོད་འདུག་པ། །དེ་འདྲ་ཆོས་ཀྱི་སྐྱོལ་མ་བྱུང་ན་ཨང་། །ཉིད་ཀྱང་རབ་ཏུ་འཇའ་ལུས་རྡོ་རྗེའི་སྐུ། །ཐ་ན་རང་གཞན་དོན་གཉིས་མཐར་ཕྱིན་ཕྱིར། །དགོང་མོ་བཅུ་ཕྲག་བརྒྱད་ལྷག་བཞུགས་གནས་ཕྱིར། །བསྐྱེད་རིམ་ཡང་ཏིག་ཡི་དམ་བསྒྲུབ་པ་དང་། །རྫོགས་རིམ་བུམ་ཆེན་ནམ་མཁའི་བཅུད་ལེན་འཚལ། །སྲོག་ནི་རླུང་ཡིན་ཚེ་ནི་དྲོད་ཡིན་གསུངས། །སྐུ་ཚེ་རླུང་ཡིན་ཟེར་བ་ཧ་ཧ་ཧ། །ཁྱེད་ཀྱི་གནས་ཆེན་རི་སྟོང་བས་མཐའ་རུ། །དཀའ་ཐུབ་ཆུ་འཐུང་རྡེལ་འཆའ་བྱེད་ཟློསྐབས་སུ། །ཟང་ཟིང་སྐྱེས་ཀྱི་བབ་ཐོབ་ག་ལ་ཡོད། །གལ་ཏེ་ཡོད་ན་ཡང་དག་བྱེད་ན་ཡང་། །འབུལ་སྐྱེལ་ཐུར་དུ་བྱེད་པ་སུ་ཡི་ལུགས། །བགེགས་རིགས་སྟོང་ཕྲག་བརྒྱད་དུ་བསང་ཟེར་དེས། །ཁོ་བོ་ལོངས་སྤྱོད་ཡུལ་དུ་དཀོར་གྱི་ནུབ། །མཐུན་རྐྱེན་བསྐུར་རྒྱུ་བྱུང་ན་བབ་མོད་ཀྱང་། །རྐྱེན་ངན་མང་ཞིང་མེད་རབ་ཤེར་སྙིང་འདྲ། །གསེར་ཉག་ཡོད་ན་འོས་ཀྱང་རི་བོང་རྭ། །བྱིན་རླབས་རྟེན་དང་བཀྲ་ཤིས་ཁ་བཏགས་དང་། གཡུ་ཆེན་ཉེར་གཅིག་གཡུ་ཕྲན་ཉི་ཤུ་བཞི། །གཡུ་ཆུང་ང་དགུ་བསྡོམས་པས་བརྒྱ་དང་དགུ། །ཁྱི་ལོ་
ས་ག་ཟླ་བའི་ཉེར་དགུར་ཕུལ། །ཕྱིར་ལ་གནང་བའི་བཀའི་ཆ་བྱིན་རླབས་རྟེན། །མ་ཉམས་མ་གོད་ཁྲ་མ་ནང་ལྟར་འཕྲོད། །བླ་མེད་བྱང་ཆུབ་ཐོབ་པའི་རྒྱུ་རུ་།མ་མཇལ་བར་དུ་སྲུང་འཁོར་བསྒོམ་པ་དང་། །བཀའ་སྲུང་རྣམས་ལ་བཞེད་དགོངས་འགྲུབ་པ་ཡི། །དུས་མཆོད་སྐབས་སུ་ཕྲིན་ལས་བཅོལ་བར་བྱ། །དགེའོ།། །།ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།