ལྷ་ཆེན་དབང་ཕྱུག་ཆེན་པོའི་རྟགས་བསྟོད་པདྨ་ར་གའི་ཕྲེང་བ་བཞུགས་སོ།།

ཧྲཱིཿ ཆོས་རྣམས་ཐམས་ཅད་མི་དམིགས་སྤྲོས་བྲལ་ཡང་། །དག་པ་རབ་འབྱམས་བཀོད་པ་ཆེན་པོའི་དབུས། །པདྨ་ར་ག་ལས་གྲུབ་གཞལ་མེད་ཁང་། །དབྱིབས་ནི་ཟླ་གམ་རིན་ཆེན་སྒོ་གཅིག་པ། །འོད་ཟེར་སྣ་ཚོགས་ཕྱོགས་བཅུ་ཀུན་ཏུ་འཕྲོ། །གདུགས་དང་རྒྱལ་མཚན་བ་དན་གཡེར་ཁས་སྤྲས། །སྣ་ཚོགས་དར་གྱི་ལྡ་ལྡིའི་ཀུན་ནས་མཛེས། །ཡིད་བཞིན་ནོར་བུའི་དྲྭ་བ་དྲྭ་ཕྱེད་ཀྱི། །ཕྱོགས་མཚམས་འཁོར་ཡུག་ཀུན་ཏུ་མཛེས་པར་སྤྲས། །རིན་ཆེན་ཁྲི་རྐང་ཆུ་སྐྱེས་གེ་སར་དབུས། །འགྱུར་མེད་བདེ་བ་ཆེན་པོའི་རང་མདང་ལས། །ཡེ་ཤེས་རྩལ་གྱི་ཆུ་ཟླའི་རོལ་གར་བཞིན། །འཇིག་རྟེན་མེས་པོ་ཁམས་གསུམ་ཀུན་གྱི་བདག །དབང་ཕྱུག་ཆེན་པོ་ཤྲཱི་རལ་བ་ཅན། །སྐུ་མདོག་དམར་པོ་གཟི་བརྗིད་འབར་བ་ནི། །འགྲོ་བའི་ཚོགས་ལ་རྗེས་སུ་ཆགས་པའི་རྟགས། །འཇིགས་པའི་སྐུ་མཆོག་རི་རབ་ཟོམ་དང་མཉམ། །སྣང་སྲིད་ཐམས་ཅད་དབང་དུ་སྡུད་པའི་རྟགས། །སྤྱན་གསུམ་ཕྱོགས་བཅུར་ས་ལེར་གཟིགས་པ་ནི། །ཕྱོགས་སྐྱོང་གདོན་རྣམས་མ་ལུས་འདུལ་བའི་རྟགས། །དབུ་སྐྲ་རལ་བའི་ཐོར་ཚུགས་བཅིངས་པ་ནི། །ལྷ་ཆེན་མ་ལུས་དབང་དུ་སྡུད་པའི་རྟགས། །ཟུར་ཕུད་ཟླ་བ་ཚེས་པས་བརྒྱན་པ་ནི། །བསྟན་པ་གཉན་པོ་རྟག་ཏུ་སྐྱོང་བའི་རྟགས། །རིག་ལྔའི་སྲོག་ཞུ་དབུ་ལ་བརྒྱན་པ་ནི། ། སངས་རྒྱས་རིགས་ལྔའི་དབང་བསྐུར་མཛད་པའི་རྟགས། །ཕྱག་གཡས་ལྕགས་ཀྱུ་མཁའ་ལ་འཕྱར་བ་ནི། །གདུག་ཅན་དམ་ཉམས་སྲོག་ལ་རྔམ་པའི་རྟགས། །གཡོན་པས་རླུང་གི་ཞགས་པ་བསྣམས་པ་ནི། །སྲིད་པ་གསུམ་པོ་དབང་དུ་སྡུད་པའི་རྟགས། །སྣ་ཚོགས་དར་གྱི་སྟོད་གཡོག་བྱས་པ་ནི། །ཕྲིན་ལས་རབ་འབྱམས་ཐོགས་པ་མེད་པའི་རྟགས། །ཨུཏྤལ་དམར་པོའི་དོ་ཤལ་བྱས་པ་ནི། །རྟག་ཏུ་འགྲོ་བའི་དོན་ལ་བརྩོན་པའི་རྟགས། །གཅེར་བུ་ལིངྒ་གྱེན་དུ་བསྒྲེངས་པ་ནི། །དགའ་བ་བཞི་ཡི་དངོས་གྲུབ་སྟེར་བའི་རྟགས། །གཡས་བསྐུམ་གཡོན་བརྐྱང་དོར་སྟབས་བཞུགས་པ་ནི། །གནོད་བྱེད་རྒབ་འདྲེ་རིང་དུ་བསྐྲད་པའི་རྟགས། །པདྨ་དམར་པོའི་གདན་ལ་བཞུགས་པ་ནི། །ཁམས་གསུམ་འཁོར་བའི་སྐྱོན་གྱི་མ་གོས་རྟགས། །ཉི་མའི་དཀྱིལ་འཁོར་གདན་དུ་བཏིང་བ་ནི། །ཆགས་པ་ཆེན་པོས་དབང་དུ་སྡུད་པའི་རྟགས། །མྱུར་མགྱོགས་གློག་དང་འདྲ་བའི་མཐུ་རྩལ་ཅན། །ཆེ་བའི་ཆེ་མཆོག་དབང་ཕྱུག་ཆེན་པོ་ནི། །འཇིགས་བྱེད་འཇིགས་པར་བྱེད་པའི་མཐུ་ཆེན་པོ། །ཁམས་གསུམ་དབང་སྡུད་སྲིད་གསུམ་ཟིལ་གྱིས་མནན། །གཟི་བརྗིད་དཔལ་འབར་ཁྱོད་ལ་ཕྱག་འཚལ་བསྟོད། །དབང་ཕྱུག་ཆེན་པོའི་སྐུ་ཡི་གཡོན་ཟུར་ན། །ཡུམ་ཆེན་ལྷ་མོ་ཨུ་མ་དེ་ཝ་ནི། །དམར་གསལ་མཛེས་འཛུམ་ལང་ཚོ་ཆགས་པའི་ཉམས། །ཕྱག་གཡས་ལྕགས་ཀྱུ་གཡོན་པས་ཞགས་པ་བསྣམས། །དར་དང་མེ་ཏོག་དམར་པོའི་རྒྱན་གྱིས་སྤྲས། །རྟག་ཏུ་ཡབ་ལ་ཆགས་ཤིང་འདུད་པའི་ཚུལ། །གསང་བའི་ཡུམ་ཆེན་ཁྱོད་ལ་ཕྱག་འཚལ་བསྟོད། །ཧྲཱིཿ ཤར་གྱི་ཕྱོགས་ཀྱི་ལྷ་མོ་འགུགས་བྱེད་མ། །སྐུ་མདོག་དམར་པོ་པདྨ་ར་གའི་མདོག །ཞལ་གཅིག་ཕྱག་གཉིས་ལྕགས་ཀྱུ་ཞགས་པ་བསྣམས། །ཁམས་གསུམ་འགུགས་པར་བྱེད་མཛད་ཁྱོད་ལ་བསྟོད། །ལྷོ་ཡི་ཕྱོགས་ཀྱི་ལྷ་མོ་མཆིང་བྱེད་མ། །སྐུ་མདོག་དམར་བོ་བྱུ་རུའི་མདོག་འདྲ་བ། །ཞལ་གཅིག་ཕྱག་གཉིས་ལྕགས་ཀྱུ་ཞགས་པ་བསྣམས། །ཚེ་བསོད་སྙན་གྲགས་རྒྱས་མཛད་ཁྱོད་ལ་བསྟོད། །ནུབ་ཀྱི་ཕྱོགས་ཀྱི་ལྷ་མོ་རྨོངས་བྱེད་མ། །སྐུ་མདོག་དམར་པོ་བྷིན་ཧུ་ག་ཡི་མདོག །ཞལ་གཅིག་ཕྱག་གཉིས་ལྕགས་ཀྱུ་ཞགས་པ་བསྣམས། །ཟས་ནོར་ལོངས་སྤྱོད་སྤེལ་མཛད་ཁྱོད་ལ་བསྟོད། །བྱང་གི་ཕྱོགས་ཀྱི་ལྷ་མོ་མྱོས་བྱེད་མ། །སྐུ་མདོག་དམར་པོ་བསྐལ་བའི་མེ་ལྟར་འབར། །ཞལ་གཅིག་ཕྱག་གཉིས་ལྕགས་ཀྱུ་ཞགས་པ་བསྣམས། །མི་མཐུན་རྐྱེན་ངན་བརླག་མཛད་ཁྱོད་ལ་བསྟོད། །དབང་ཕྱུག་ཆེན་པོའི་བཀའ་ཡི་ལས་བྱེད་ཚོགས། །ཅི་བགྱིའི་བཀའ་ཉན་ལས་རྣམས་བསྒྲུབ་མཛད་པའི། །ཁམས་གསུམ་དྲེགས་པའི་དམག་ཚོགས་བསམ་མི་ཁྱབ། །མཐུ་སྟོབས་དབང་ཕྱུག་རྣམས་ལ་བདག་བསྟོད་དོ། །དབང་ཆེན་རྟ་མཆོག་རོལ་བའི་ཆོ་འཕྲུལ་ལས། །དབང་གི་བཀའ་སྡོད་དྲེགས་པ་ཡོངས་ཀྱི་གཙོ། །དབང་ཕྱུག་ཆེན་པོ་ཤྲཱི་རལ་བ་ཅན། །འཇིག་རྟེན་མེས་པོ་ཁམས་གསུམ་ཀུན་གྱི་བདག །རིག་འཛིན་སྒྲུབ་པའི་རྣལ་འབྱོར་བདག་ཅག་གི །ཁྱོད་ལ་རྟག་ཏུ་མཆོད་དང་བསྟོད་པའི་མཐུས། །ལྷ་མཆོག་ཁྱོད་ཀྱི་ཐུགས་རྗེའི་འོད་ཟེར་གྱི། །དེང་ནས་བྱང་ཆུབ་སྙིང་པོ་མ་ཐོབ་བར། །རིག་འཛིན་སྒྲུབ་པོ་བདག་ལ་རྗེས་དགོང་སྟེ། །སྲུང་མའི་དབང་པོ་ཁྱོད་དང་མི་འབྲལ་ཞིང་། །བྱང་ཆུབ་སྒྲུབ་ལ་བར་དུ་གཅོད་པའི་བགེགས། །གེགས་བྱེད་ཉེས་པའི་སྤྲིན་ཚོགས་དབྱིངས་ཞི་ནས། །མདོར་ན་ཅི་བསམ་ཡིད་བཞིན་འགྲུབ་པ་དང་། །རྟག་ཏུ་བསྲུང་ཞིང་སྐྱོབ་པའི་སྡོང་གྲོགས་མཛོད། །ཅེས་ལྷ་ཆེན་དབང་ཕྱུག་ཆེན་པོའི་རྟགས་བསྟོད་པདྨ་ར་གའི་ཕྲེང་བ་ཞེས་བྱ་བ་འདི་ནི་རྫོགས་སྤྲུལ་ལྔ་པ་ཐུབ་བསྟན་ཆོས་ཀྱི་རྡོ་རྗེས་བསྟན་ལ་ཕན་པའི་ལྷག་བསམ་རྣམ་པར་དག་པས་རུ་དམ་ཨོ་རྒྱན་བསམ་གཏན་ཆོས་གླིང་གི་ཕོ་བྲང་ཆེན་པོའི་ཡང་རྩེ་འཆི་མེད་གྲུབ་པའི་དགའ་ཚལ་དུ་བྲིས་པ་དགེའོ། །