ཀརྨ་ནོར་བུ་ལ་གདམས་པའི་མགུར་མ།
༄༅། །ཀརྨ་ནོར་བུ་ལ་གདམས་པའི་མགུར་མ་བཞུགས་སོ། །ཕ་ཨོ་རྒྱན་རྗེ་ལ་གསོལ་བ་ཐོབ། །བུ་སྒྲུབ་རྒྱུད་ཡོངས་ཀྱི་བསྟན་པ་ཟུང་། །ནང་གཡོ་སྒྱུའི་རང་མགོ་མ་བསྐོར་བར། །དོན་ཕྱག་རྒྱ་ཆེན་པོའི་ཉམས་ལེན་སྐྱོངས། །ལྷ་ཡེ་ཤེས་ཉི་མའི་སྐྱབས་གནས་ལ། །བྲོས་དགོས་ན་འབྲོས་རྒྱུ་མི་འདུག་ལགས། །གབ་དགོས་ན་གབ་རྒྱུ་མི་འདུག་ལགས། །སྐུང་དགོས་ན་སྐུང་རྒྱུ་མི་འདུག་ལགས། །ད་རང་སེམས་རང་གིས་གཏན་ལ་ཕོབ། །དུས་དེང་སང་མི་རྣམས་ཞེ་སྡང་ཆེ། །ཕྱིའི་དགྲ་ལ་ཞེ་སྡང་མི་སྐྱེ་བར། །ནང་དགྲ་ཆེན་གྱི་ཞེ་སྡང་དེ་འདུལ་ལ་ཤོག །ཕྱིའི་རྒྱུ་ནོར་དེ་ནང་ལ་མི་གསོག་པར། །ནང་སེམས་ཉིད་ཀྱི་ཡིད་བཞིན་ནོར་བུ་ལ། །ཡེངས་མེད་ཀྱི་བྱི་དོར་གྱིས་དང་ནི། །ཚེ་འདི་ཕྱི་གཉིས་ཀྱི་ཕན་བདེ་ཡིན། །མིང་ཀརྨ་ཞེས་པ་ཨེ་གོ་འདུག འོག་རྟ་མཁལ་དེད་པའི་ཀརྨ་མིན། །མ་འགྲོ་བའི་ཕན་བདེ་སྒྲུབ་དང་
ནི། །ད་ཀརྨ་ཞེས་པའི་མིང་དོན་མཚུངས། །མིངནོར་བུ་ཐོག་པ་ཨེ་གོ་འདུག །ཕྱི་ནོར་ཆུང་གསོག་པའི་ནོར་བུ་མིན། །སེམས་ཡིད་བཞིན་ནོར་བུ་བོར་བ་ལ། །ད་ཕྱི་ནང་དུ་བཙལ་ནས་རྙེད་དགོས་བརྟག །སེམས་ཡིད་བཞིན་ནོར་བུ་རྙེད་ན་ནི། །ད་དར་ཟབ་ཕལ་གྱིས་དོ་ཟླ་མིན། །ཕྱི་རྒྱུ་ནོར་ཕལ་གྱིས་དོ་ཟླ་མིན། །དུས་ད་ལྟ་རང་དབང་ཡོད་དུས་འདིར། །སྐྱབས་གཏེར་དྲུང་རྣམ་གཉིས་མདུན་ནས་ནི། །གདམས་ངག་གི་ཞུན་ཐར་ཆོད་ལ་ཤོག །འཛིན་མེད་ཀྱི་ནམ་མཁའ་འཕྱོ་ལ་ཤོག །ཡེ་ཤེས་ཀྱི་ཉི་མ་དེ་འཆར་ནས་འོང་། །ཐུགས་རྗེའི་ཟེར་ཐག་དེ་སྤྲོ་ནས་འོངས། །དེ་སྐད་ཀྱི་སྨྱོ་ཚིག་ཐོལ་བྱུང་དེ། །གང་ཤར་ལ་དབང་དུ་འབྱོར་བ་ཡིས། །ཀརྨ་ཡི་ནོར་བུ་དེ་ལ་གདམས།། །།