ཡལ་འདབ་གོ་གཅིག་པ་ནས་བརྒྱ་ཐམ་པའི་བར།
༈ ཡལ་འདབ་གོ་གཅིག་པ་ནི། ལས་༼ཨ༽བརྒྱའི་སྡོམ་བཅུ་པར་འབྱུང་སྟེ། དགེ་སློང་དག་སྔོན་བྱུང་བ་འདས་པའི་དུས་ན་རྒྱལ་པོའི་ཕོ་བྲང་བཞི་ལྡན་ན་རྒྱལ་པོ་ཤི་བི་ཞེས་པས་རྒྱལ་སྲིད་བྱེད་དོ། །དེའི་རིང་ལ་འབྱོར་པ་དང་། རྒྱས་པ་དང་། བདེ་བ་དང། ལོ་ལེགས་པ་དང་། སྐྱེ་བོ་མང་པོས་གང་བ། འཁྲུགས་རྩོད་དང་། ཆོམ་རྐུན་དང་།
ནད་མུག་མེད་པ། འབྲས་སཱ་ལུ་དང་། བུ་རམ་ཤིང་དང་། བ་ལང་དང་། མ་ཧེ་དང་ལྡན་ལ་ཆོས་བཞིན་དུ་རྒྱལ་སྲིད་བྱེད་པས་ཚེར་མ་བྱ་བ་འགའ་ཡང་མེད་དོ། །རྒྱལ་པོ་དེ་ཡང་། བྱམས་སྙིང་རྗེ་དང་ལྡན་པ། གཏོང་བ་ལ་དགའ་བ་ཞིག་སྟེ། སྦྱིན་པ་དག་བྱིན་ཅིང་བསོད་ནམས་དག་བྱས་ནས། ཟས་འདོད་པ་ལ་ཟས། སྐོམ་འདོད་པ་ལ་སྐོམ། གོས་འདོད་པ་ལ་གོས། རྒྱན་དང་མལ་སྟན་དང་བཞོན་པ་འདོད་པ་ལ་དེ་དང་དེ། ཡོ་བྱད་གཞན་འདོད་པ་ལ་ཡོ་བྱད་གཞན་དག་སྦྱིན་པར་བྱེད། ནད་པ་ལ་སྨན་པ་དང་ནད་གཡོག་བསྐོས་ཏེ་གསོ་བ་དང་། བཟའ་བཅའ་མང་པོས་ཐ་ན་ནམ་མཁའ་དང་ས་གཞི་དང་ཆུ་ལ་གནས་པའི་སྲོག་ཆགས་ཕྲ་མོ་ཚུན་ལ་སྦྱིན་པ་འགྱེད་ཅིང་མདོར་ན་མགོན་མེད་པ་རྣམས་ཀྱི་རིམ་གྲོ་འབའ་ཞིག་ལྷུར་ལེན་ནོ། །དེས་ཡིད་དམ་བཅས་ནས་འཇིག་རྟེན་ཐམས་ཅད་དགེ་བཅུའི་ལམ་ལ་བཀོད་པས་ཤི་འཕོས་པའི་སེམས་ཅན་ཕལ་ཆེར་ལྷའི་རིས་སུ་སྐྱེས་པས་ལྷའི་གནས་རྣམས་གང་བར་གྱུར་ཏོ། །དེའི་ཚེ་ལྷའི་དབང་པོས་བསམ་པ། རྒྱལ་པོ་ཤི་བི་འདིས་ཚངས་པའམ་བརྒྱ་བྱིན་སུ་ཞིག་བསྒྲུབ་པ་ཡིན་སྙམ་ནས་བརྟག་པ་ན། བླ་ན་མེད་པའི་བྱང་ཆུབ་སྒྲུབ་པ་མཐོང་སྟེ་སེམས་བརྟན་ནམ་མི་བརྟན་བརྟག་པའི་ཕྱིར། ལྷ་དབང་རང་ཉིད་སྲིན་པོའི་གཟུགས་སུ་སྤྲུལ་ནས་རྒྱལ་པོ་ཤི་བིའི་ཁང་བཟང་གི་ཆར་ཁེབས་ལ་འདུག་སྟེ། ཚིགས་སུ་བཅད་པའི་ཕྱེད་སྨྲས་པ། ཀྱེ་མ་འདུ་བྱེད་རྣམས་མི་རྟག །སྐྱེ་ཞིང་འཇིག་པའི་ཆོས་ཅན་ཡིན། །ཞེས་སྨྲས་ནས་ཅང་མི་ཟེར་རོ། །རྒྱལ་པོ་ཤི་
བིས་དེ་ཐོས་ནས་བསམ་པ། གཅིག་ཏུ་ན་ནི་མྱ་ངན་ལས་འདས་པའི་རྟེན་ཅིང་འབྲེལ་བར་འབྱུང་བའི་སྒོ་ཕྱེའོ། །གཅིག་ཏུ་ན་ནི་ཡང་དག་པར་རྫོགས་པའི་བྱང་ཆུབ་ཀྱི་ལམ་བསྟན་ཏོ་སྙམ་ནས་རིངས་པར་དེའི་དྲུང་དུ་སོང་སྟེ་བླ་གོས་ཕྲག་པ་གཅིག་ཏུ་གཟར་ནས་ཐལ་མོ་སྦྱར་བ་བཏུད་དེ། གྲོགས་པོ་ཚིགས་སུ་བཅད་པ་དེ་ཚང་བར་སྨྲོས་ཤིག་དང་། བདག་སློབ་མར་བཟུང་ངོ་། །དེས་སྨྲས་པ། བདག་ནི་བཀྲེས་སྐོམ་གྱིས་གཟིར་བས་ན་ཁྱོད་སློབ་མར་བཟུང་བས་ཅི་ཕན། བྱང་ཆུབ་སེམས་དཔས་སྨྲས་པ། གྲོགས་པོ་སྨྲོས་ཤིག་དང་ཁ་ཟས་ཅི་འདོད་པ་དབུལ་ལོ། །དེ་ན་རེ། ང་ཡི་ཁ་ཟས་ནི་ཁྱོད་ཀྱིས་སྦྱིན་པར་དཀའ་སྟེ། མི་འཕྲལ་དུ་བསད་པའི་ཤ་དྲོན་མོ་དང་ཁྲག་དྲོན་མོའམ། བྱང་ཆུབ་སེམས་དཔས་སྨྲས་པ། དེ་ལྟ་ན་བདག་གི་ཤ་ཁྲག་སྦྱིན་གྱི་ཚིགས་བཅད་སྨྲོས་ཤིག་གསུངས་ནས་འདི་སྙམ་སྟེ་བདག་གིས་གཞན་སུ་ལ་ཡང་གནོད་པ་མི་བྱེད་ཀྱི་རང་གི་ལུས་ཡོངས་སུ་གཏོང་བའི་དུས་ལ་བབ་བོ་སྙམ་མོ། །ལྷའི་དབང་པོ་སྲིན་པོའི་གཟུགས་སུ་སྤྲུལ་པ་དེས་སྨྲས་པ། ཀྱེ་མ་འདུ་བྱེད་རྣམས་མི་རྟག །སྐྱེ་ཞིང་འཇིག་པའི་ཆོས་ཅན་ཡིན། །སྐྱེས་ནས་འགག་པར་འགྱུར་བ་སྟེ། །དེ་དག་ཉེ་བར་ཞི་བ་བདེ། །བྱང་ཆུབ་སེམས་དཔས་དེ་ཐོས་ནས་རབ་ཏུ་དགའ་ཞིང་མགུ་སྟེ་མཚོན་རྣོན་པོས་རང་གི་ཤ་རྣམས་བཅད་ཅིང་དེ་ལ་བྱིན་ནས་སྨོན་ལམ་བཏབ་པ། དགེ་བ་འདིས། བདག་འཇིག་རྟེན་ལོང་བ་འདྲེན་པ་མེད་པ་སྟོན་པ་མེད་པར། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རིག་པ་དང་ཞབས་སུ་ལྡན་པ།
བདེ་བར་གཤེགས་པ། འཇིག་རྟེན་མཁྱེན་པ། སྐྱེས་བུ་འདུལ་བའི་ཁ་ལོ་སྒྱུར་བ། བླ་ན་མེད་པ། ལྷ་དང་མི་རྣམས་ཀྱི་སྟོན་པ་སངས་རྒྱས་བཅོམ་ལྡན་འདས་སུ་གྱུར་ཅིག་ཅེས་དང་། སྦྱིན་པ་རྒྱ་ཆེན་གྱུར་པ་འདི་ཡིས་ནི། །སྲིད་པ་དག་ཏུ་རང་བྱུང་སངས་རྒྱས་ཤོག །སྔོན་གྱི་རྒྱལ་དབང་རྣམས་ཀྱིས་མ་བསྒྲལ་བའི། །སྐྱེ་བོ་ཕལ་ཆེན་བརྒལ་ནས་བསྒྲལ་བར་བགྱི། །ཞེས་རྫོགས་པའི་བྱང་ཆུབ་ཏུ་སེམས་བསྐྱེད་ནས། གྲོགས་པོ་བདག་གི་ལུས་འདི་ཇི་ལྟར་དགའ་བ་གྱིས་ཤིག་གསུངས་ནས་ལུས་ཕྱེད་ཀྱི་ཤ་ཟ་རུ་གཞུག་གོ །དེར་བྱང་ཆུབ་སེམས་དཔའ་དེས་སེམས་བསྐྱེད་མ་ཐག་ཏུ་ས་རྣམ་པ་དྲུག་ཏུ་གཡོས་སོ། །ནམ་མཁའ་ལ་འཁོད་པའི་ལྷ་རྣམས་ཀྱིས་ཀྱང་མེ་ཏོག་གི་ཆར་ཕབ་ནས་ལེགས་སོ་ཞེས་བྱ་བ་བྱིན་ཏོ། །དེ་ནས་ལྷའི་དབང་པོ་བརྒྱ་བྱིན་མཆོག་ཏུ་ངོ་མཚར་སྐྱེས་ནས་སྨྲས་པ། གྲོགས་པོ་ཁྱོད་ཀྱི་ཤ་ཡོངས་སུ་རྫོགས་པ་བདག་གིས་ཟོས་ན་སེམས་མི་དགའ་བ་ཅུང་ཟད་སྐྱེས་སམ། བྱང་ཆུབ་སེམས་དཔས་སྨྲས་པ། བདག་གི་ཤ་རྣམས་བཅད་ཅིང་བཟའ་བའི་ཚེ་བདག་ལ་སེམས་མི་དགའ་བ་ཅུང་ཟད་ཙམ་ཡང་མ་སྐྱེས་ཏེ། བདག་གིས་སྡུག་བསྔལ་མྱོང་བ་ན། སེམས་ཅན་དམྱལ་བ་དང་། དུད་འགྲོ་དང་། ཡི་དྭགས་སུ་སྐྱེས་པའི་སེམས་ཅན་འབའ་ཞིག་ལ་སྙིང་རྗེའི་དབང་དུ་གྱུར་ཏོ། །དེས་སྨྲས་པ། ཚིག་དེ་ལ་སུ་ཞིག་ཡིད་ཆེས། བྱང་ཆུབ་སེམས་དཔས་སྨྲས་པ། འདི་ལྟར་བདག་གི་ལུས་ཀྱི་ཤ་རྣམས་
གཅོད་ཅིང་། རྒྱུས་པ་དང་རྩ་བྲང་བྲེང་ཙམ་ལུས་པ་ན། སེམས་མི་དགའ་བ་ཅུང་ཟད་ཙམ་ཡང་མ་སྐྱེས་ཏེ། ངན་སོང་གསུམ་གྱི་འགྲོ་བ་འབའ་ཞིག་ལ་སྙིང་རྗེའི་དབང་དུ་གྱུར་ན། བདེན་པ་དང་བདེན་པའི་ཚིག་དེ་དག་གིས་བདག་གི་ལུས་སྔ་མ་ཁོ་ན་བཞིན་དུ་གྱུར་ཅིག །ཅེས་བརྗོད་མ་ཐག་ཏུ་བྱང་ཆུབ་སེམས་དཔའི་ལུས་སྔ་མ་བཞིན་དུ་གྱུར་ཏོ། །དེ་ནས་དབང་པོ་བརྒྱ་བྱིན་ཡི་རངས་ཏེ། ཆ་ལུགས་མི་སྣང་བར་བྱས་ནས། རང་གི་གཟུགས་སུ་བསྟན་ཏེ་བྱང་ཆུབ་སེམས་དཔའི་རྐང་པ་ལ་ཕྱག་འཚལ་ནས་སྨྲས་པ། བདག་གིས་ཁྱོད་ལ་གནོད་པའི་བསམ་པས་མི་དགའ་བ་བྱས་པ་ནི་མ་ཡིན་གྱིས། ཁྱོད་ཉིད་ཀྱི་སྤྲོ་བ་བསྐྱེད་པའི་ཕྱིར་བདག་གིས་ཁྱོད་མི་དགའ་བར་བྱས་པར་ཟད་དོ། །ཁྱོད་ཀྱི་བརྩོན་འགྲུས་དང་སྤྲོ་བ་འདི་འདྲ་བ་ལས་ནི། གདོན་མི་ཟ་བར་རྫོགས་པའི་སངས་རྒྱས་སུ་འགྱུར་གྱུར་གྱིས། དེའི་ཚེ་བདག་དྲན་པར་མཛོད་ཅིག །དེ་ནས་ལྷའི་དབང་པོས་བྱང་ཆུབ་སེམས་དཔའ་ལ་བཟོད་པ་གསོལ་ནས། དེ་ཉིད་དུ་མི་སྣང་བར་གྱུར་ཏོ། །དེའི་ཚེ་རྒྱལ་པོ་ཤི་བི་བྱང་ཆུབ་སེམས་དཔའི་སྤྱོད་པ་ལ་གནས་པ་གང་ཡིན་པ་དེ་ནི་ང་ཉིད་དེ། དེའི་ཚེ་ཡང་ང་ལེགས་པར་སྨྲ་བས་སྨྲ་བ་དང་། ལེགས་པར་སྨྲ་བར་འདོད་པར་གྱུར་ན། ད་ལྟར་དེ་བཞིན་གཤེགས་པར་གྱུར་པ་ན་ལེགས་པར་སྨྲ་བས་སྨྲ་བ་དང་། ལེགས་པར་སྨྲ་བར་འདོད་པར་ཅི་སྟེ་མི་མཛད། དེ་ཅིའི་ཕྱིར་ཞེ་ན། དགེ་སློང་དག་ང་ནི་ཆོས་དང་པོ་བྱེད་པ་ཡིན་པའི་ཕྱིར་རོ། །
༈ ཡལ་འདབ་གོ་གཉིས་པ་ནི། སྔོན་ཝཱ་རཱ་ཎ་སཱིར་དེད་དཔོན་མཛའ་བོ་ཞེས་ཕྱུག་ཅིང་ནོར་མང་ལ་ལོངས་སྤྱོད་ཆེ་བ་ཞིག་ཡོད་པ་དེས་རིགས་མཉམ་པ་ལས་ཆུང་མ་བླངས་ནས་དགའ་མགུར་སྤྱད་པས་བུ་བྱུང་ཡང་ཤི་ནས། བུ་འདོད་པས་ལྷ་ལ་གསོལ་ཡང་། བུ་མ་གསོས་པས། གཞན་ཞིག་གིས། ད་སྟེ་ཁྱོད་ལ་བུ་བཙས་ན་བུ་མོའི་མིང་དུ་ཐོགས་ཤིག་དང་རིང་དུ་འཚོ་བར་འགྱུར་རོ་ཞེས་བསྒོའོ། །རེ་ཞིག་དེའི་ཆུང་མར་བུ་གཟུགས་བཟང་བ་ཞིག་བཙས་ཏེ། བཙས་སྟོན་བྱས་ནས་མིང་མཛའ་བོའི་བུ་མོ་ཞེས་བཏགས། དེའི་ཕ་རྒྱ་མཚོ་ཆེན་པོར་ཞུགས་ནས་དེ་ཉིད་དུ་ཤིའོ། །དེ་ནས་མཛའ་བོའི་བུ་མོས། མ་ལ། བདག་གི་ཕ་སྔོན་ལས་གང་གིས་འཚོ། བདག་ཀྱང་དེ་བཞིན་དུ་བསྒྲུབ་བོ་ཟེར། མས་བསམ་པ། རྒྱ་མཚོ་ཆེན་པོར་འཇུག་པའི་ཚོང་པ་ཡིན་ཞེས་སྨྲས་ན་འདིའང་དེ་ཉིད་དུ་ཤི་བར་འགྱུར་རོ་སྙམ་སྟེ། ཁྱོད་ཀྱི་ཕ་འབྲུ་འཚོང་བ་སྟེ། ཁྱོད་ཀྱང་དགའ་ན་འབྲུ་འཚོང་བར་གྱིས་ཤིག །དེས་འབྲུའི་ཚོང་ཁང་བརྩིགས་ཏེ་ཐོག་མའི་ཉིན་ཀརྴ་པ་ཎ་བཞི་རྙེད་པ་མ་ལ་བྱིན་ནོ། །རེ་ཞིག་གཞན་ཞིག་གིས། ཁྱོད་ཀྱི་ཕ་ནི་དྲི་འཚོང་བའོ་ཞེས་སྨྲས་པས། དེས་འབྲུ་འཚོང་བ་བཏང་ནས་། དྲི་འཚོང་སྟེ་ཉི་མ་དང་པོ་ལ་ཀརྴ་པ་ན་བརྒྱད་རྙེད་པ་དེ་དག་མ་ལ་བྱིན་ཏོ། །ཡང་གཞན་ཞིག་གིས། ཁྱོད་ཀྱི་ཕ་ནི་གསེར་འཚོང་བའོ་ཞེས་སྨྲས་པས།
དེས་དྲི་འཚོང་བ་བཏང་ནས། གསེར་འཚོང་བའི་ཉིན་དང་པོ་ལ་ཀརྴ་པ་ན་བཅུ་དྲུག་རྙེད་པ་དེ་དག་མ་ལ་བྱིན་ཏོ། །ཕྱིར་ཉིན་ཀརྴ་པ་ན་སུམ་ཅུ་རྩ་གཉིས་རྙེད་དེ། དེ་དག་ཀྱང་མ་ལ་བྱིན་ཏོ། །དེ་ནས་གསེར་འཚོང་ཕྲག་དོག་ཅན་དག་གིས། གྲོང་ཁྱེར་ཐམས་ཅད་ཀྱི་གསེར་འདིས་བསྡུས་སོ་སྙམ་ནས། མཛའ་བོའི་བུ་མོ་ལ། ཁྱོད་ཀྱི་ཕ་སྔོན་རྒྱ་མཚོ་ཆེན་པོར་འཇུག་པའི་ཚོང་པ་ཡིན་ན། ཁྱོད་སུས་འདི་འདྲ་བ་ངན་པས་འཚོ་བ་ལ་འཇུག་ཏུ་བཅུག་ཅེས་སྨྲས་པ་དང་། དེ་མ་ལ། བདག་གི་ཕ་རྒྱ་མཚོ་ཆེན་པོར་འཇུག་པའི་ཚོང་པ་ཡིན་ཞེས་ཐོས་ཀྱི། བདག་ཀྱང་རྒྱ་མཚོ་ཆེན་པོར་འཇུག་གོ་སྨྲས་སོ། །མ་ན་རེ། བུ་དེ་ནི་བདེན་མོད། ཁྱོད་ནི་གཞོན་ལ་བུ་གཅིག་པུ་ཡིན་པས་ཁོ་མོ་བོར་ནས་རྒྱ་མཚོ་ཆེན་པོར་མ་འགྲོ་ཞིག །དེས་མའི་ཚིག་མ་ཉན་པར། རྒྱ་མཚོ་ཆེན་པོར་འགྲོ་འདོད་པ་རྣམས་དོང་ངོ་ཞེས་བསྒྲགས་ནས་ཚོང་པ་ལྔ་བརྒྱས་བསྐོར་ཏེ་ཆས་པ་དང་། མས་མཆི་མས་བརྣངས་བཞིན་དུ་དེའི་རྐང་པ་གཉིས་ལས་བཟུང་སྟེ། ཁོ་མོ་བོར་ནས་མ་འགྲོ་ཞིག་ཅེས་སྨྲས་པས་དེས་ཁྲོས་ནས་མའི་མགོ་རྐང་པས་ཕུལ་ཏེ་སོང་ངོ་། །མ་ན་རེ། བུ་ཁྱོད་ལ་ལས་འདི་རྣམ་པར་སྨིན་པ་མ་གྱུར་ཅིག །ཅེས་བྱས་སོ། །རིམ་གྱིས་རྒྱ་མཚོའི་འགྲམ་དུ་ཕྱིན་ནས་གྲུ་བོ་ཆེ་ཉོས་ཏེ་ཚོང་པ་ལྔ་བརྒྱ་རྒྱ་མཚོའི་ནང་དུ་ཞུགས་པ་དང་། ཆུ་སྲིན་ཉའི་རིགས་ཀྱིས་གྲུ་དེ་མ་རུང་བར་བྱས་པས་མཛའ་བོའི་བུ་མོ་གྲུ་ཚལ་ཞིག་ལ་འཇུས་ནས་མཐར་ཕྱིན་ཏེ་སྐམ་ལ་སོང་བ་དང་། དགའ་བ་ཞེས་བྱ་བའི་གྲོང་ཁྱེར་མཐོང་ནས་དེར་སོང་བ་ན་ལྷའི་བུ་མོ་གཟུགས་
ལེགས་ཤིང་བལྟ་ན་སྡུག་པ་བཞི་བྱུང་སྟེ་བདེ་བར་འོངས་སམ། བདག་ཅག་གི་བཟའ་བཏུང་དང་གོས་དང་རིན་པོ་ཆེའི་ཁང་པ་འདི་དག་བཞེས་ལ་བདག་ཅག་དང་ལྷན་ཅིག་བཞུགས་ཤིག །དེས་དེ་དག་དང་ལྷན་ཅིག་ལོ་བརྒྱ་སྟོང་མང་པོར་བདེ་བ་མྱོང་ངོ། །དེ་དག་གིས་ལྷོ་ཕྱོགས་ཀྱི་ལམ་དུ་མ་འགྲོ་ཞིག་ཅེས་བསྒོའང་མ་ཉན་པར་སོང་ངོ་། །དེ་རྟག་ཏུ་ར་རོ་ཞེས་བྱ་བའི་གྲོང་ཁྱེར་མཐོང་ནས་དེའི་སྒོར་ཕྱིན་པ་དང་། སྔར་གྱི་དེ་བས་གཟུགས་མཛེས་པའི་ལྷ་མོ་བརྒྱད་བྱུང་སྟེ། ཚུར་སྤྱོན། བདེ་བར་བྱོན་ཏམ། བདག་ཅག་གི་བཟའ་བཏུང་དང་གོས་དང་རིན་པོ་ཆེའི་ཁང་པ་འདི་དག་བཞེས་ལ་ལྷན་ཅིག་བཞུགས་ཤིག །དེས་དེ་དག་དང་ལྷན་ཅིག་ལོ་བརྒྱ་སྟོང་མང་པོར་བདེ་བ་མྱོང་ངོ་། །དེ་དག་གིས་ཀྱང་ལྷོ་ཕྱོགས་སུ་མ་འགྲོ་ཞིག་ཅེས་བསྒོའང་འགྲོ་འདོད་ནས། དགའ་བ་ཅན་ཞེས་བྱ་བའི་གྲོང་ཁྱེར་མཐོང་ནས་དེའི་སྒོར་སོང་བས་སྔར་བས་ཀྱང་གཟུགས་མཛེས་པའི་ལྷ་མོ་བཅུ་དྲུག་བྱུང་སྟེ། ཚུར་སྤྱོན། བདེ་བར་བྱོན་ཏམ། བདག་ཅག་གི་བཟའ་བཏུང་སོགས་སྔར་བཞིན་བརྗོད་ནས་ལྷོ་ཕྱོགས་སུ་མ་འགྲོ་ཞིག་ཅེས་བསྒོའང་འགྲོ་འདོད་ནས་སོང་བ་དང་། བླ་མའི་ཚངས་པ་ཞེས་བྱ་བའི་ཁང་བཟང་མཐོང་ནས་དེའི་སྒོར་ཕྱིན་པ་དང་། དེ་བས་ཀྱང་གཟུགས་མཛེས་པའི་ལྷ་མོ་སུམ་ཅུ་རྩ་གཉིས་བྱུང་སྟེ། ཚུར་སྤྱོན། བདེ་བར་བྱོན་ཏམ། བདག་ཅག་གི་བཟའ་བཏུང་དང་གོས་དང་རིན་པོ་ཆེའི་ཁང་པ་འདི་དག་བཞེས་ལ་ལྷན་ཅིག་བཞུགས་ཤིག །དེས་དེ་དག་དང་ལྷན་ཅིག་ལོ་བརྒྱ་སྟོང་མང་པོར་བདེ་བ་མྱོང་ངོ་། །དེ་དག་གིས་ཀྱང་ལྷོ་ཕྱོགས་སུ་
མ་འགྲོ་ཞིག་ཅེས་བསྒོའང་འགྲོ་འདོད་ནས་སོང་བ་དང་། ལྕགས་ཀྱི་ཁང་པ་ཞིག་མཐོང་ནས་དེ་ན་ཞུགས་མ་ཐག་སྒོ་བཅད་དོ། །དེ་བཞིན་དུ་སྒོ་སུམ་རིམ་གྱིས་ནང་དུ་ཞུགས་པ་དང་ཐམས་ཅད་སྒོ་བཅད་དོ། །དེ་ན་སྐྱེས་བུ་ལུས་རབ་ཏུ་ཆེ་བ་ཞིག་གི་མགོ་ལ་ལྕགས་ཀྱི་འཁོར་ལོ་འབར་བ་མེ་ལྕེ་གཅིག་ཏུ་གྱུར་པ་ཞིག་འཁོར་ཞིང་འདུག་སྟེ། མགོ་ལས་རྣག་ཁྲག་བྱུང་བ་ཟས་སུ་ཟ་བ་མཐོང་ནས། ཁྱོད་ཅིའི་ཕྱིར་འདི་འདྲ་གྱུར་ཅེས་དྲིས་པས། ངས་མ་ལ་གནོད་པར་བྱས་པའི་ཕྱིར་རོ་ཟེར། མཛའ་བོའི་བུ་མོའི་ལས་ཀྱང་མངོན་སུམ་དུ་སྨིན་ཏེ། བདག་གིས་ཀྱང་མ་ལ་གནོད་པ་བྱས་པའི་ལས་ཀྱིས་ཁྲིད་ནས་འདིར་འོངས་སོ་སྙམ་པ་དང་། དེ་མ་ཐག་ནམ་མཁའ་ལས། གང་བཅིངས་པ་དེ་ནི་ཐར། གང་མ་བཅིངས་པ་དེ་ནི་བཅིངས་སོ་ཞེས་པའི་སྒྲ་བྱུང་མ་ཐག་ཏུ་མཛའ་བོའི་བུ་མོའི་སྤྱི་བོར་འཁོར་ལོ་དེ་བྱུང་ངོ་། །དེ་ནས་སྐྱེས་བུ་དེས་མཛའ་བོའི་བུ་མོ་སྡུག་བསྔལ་བར་མཐོང་ནས། རྟག་ཏུ་དགའ་དང་དྲེགས་བྱེད་ཅིང་། །སྐྱིད་པ་བྱེད་པ་བོར་བྱས་ཏེ། །ཚངས་པ་བླ་མའི་ཁང་པ་ནས། །ཅི་ཡི་ཕྱིར་ནི་ཁྱོད་འདིར་འོངས། །སྨྲས་པ། རྟག་ཏུ་དགའ་དང་དྲེགས་བྱེད་ཅིང་། །སྐྱིད་པ་བྱེད་པ་བོར་བྱས་ཏེ། །ཚངས་པ་བླ་མའི་ཁང་པ་ནས། །འདིར་ནི་འོང་བར་འདོད་གྱུར་པ། །ཡུན་རིང་པོ་ཡི་ལས་ཀྱིས་གཉེར། །ལས་ཀྱིས་རིང་ནས་གཉེར་ནས་ཀྱང་། །གང་དུ་ལས་ཀྱིས་གཉེར་བ་དེར། །ལས་ཀྱང་རྣམ་པར་སྨིན་པར་འགྱུར། །ལས་གང་རྣམ་པར་སྨིན་གྱུར་པ། །འཁོར་ལོ་འབར་བ་རབ་འབར་བ། །བདག་གི་སྲོག་ལ་གནོད་གྱུར་ཏེ། །ཀླད་ལ་འཁོར་ལོ་
འབར་བར་གྱུར། །མི་དེས་སྨྲས་པ། ཁྱོད་ཀྱིས་ངན་པའི་སེམས་བསྐྱེད་དེ། །དཀའ་བ་བྱེད་པའི་མ་ཡི་མགོར། །ཁྱོད་ཀྱིས་རྡོག་པས་བརྒྱབ་པས་ན། །དེ་ཡི་ལས་ཀྱི་འབྲས་བུ་ཡིན། །སྨྲས་པ། འཁོར་ལོ་འབར་བ་རབ་འབར་བ། །བདག་གི་སྲོག་ལ་གནོད་བྱེད་པ། །ལོ་གྲངས་སྟོང་ཕྲག་ཇི་སྲིད་དུ། །ང་ཡི་ཀླད་ན་འཁོར་བར་འགྱུར། །མི་དེས་སྨྲས་པ། ལོ་གྲངས་སྟོང་ཕྲག་དྲུག་ཅུ་དང་། །ལོ་གྲངས་བརྒྱ་ཡི་བར་དུ་ནི། །འབར་བའི་ལྕགས་ཀྱི་འཁོར་ལོས་ཀྱང་། །ཁྱོད་ཀྱི་མགོ་ལ་འཇོག་པར་བྱེད། །དེས་དེ་ལ། གཞན་ཡང་འདིར་འོངས་པ་ཡོད་དམ། མི་དེས་སྨྲས་པ། གང་གིས་འདི་འདྲའི་ལས་བྱས་པ་རྣམས་འོང་བར་འགྱུར་རོ། །དེ་ནས་མཛའ་བོའི་བུ་མོ་སྡུག་བསྔལ་གྱིས་གཟིར་བ་དང་སེམས་ཅན་རྣམས་ལ་སྙིང་རྗེ་བསྐྱེད་ནས། ངས་སེམས་ཅན་ཐམས་ཅད་ཀྱི་ཕྱིར་དུ་འཁོར་ལོ་འདི་བཟོད་པར་བྱ་ཡིས། གཞན་གང་གིས་འདི་འདྲའི་ལས་བྱས་པ་དེ་དག་འདིར་མ་འོངས་ཤིག་ཅེས་སྨྲས་མ་ཐག་ཏུ་དེའི་མགོ་ལས་འཁོར་ལོ་དེ་ཤིང་ཏ་ལ་བདུན་ཙམ་དུ་ནམ་མཁའ་ལ་འཕགས་ནས་འདུག་པ་དང་། དེའང་ཤི་འཕོས་ནས་དགའ་ལྡན་དུ་སྐྱེས་སོ། །དེའི་དུས་ཀྱི་མཛའ་བོའི་བུ་མོ་དེ་ནི་ང་ཡིན་ཏེ། མ་ལ་ཀརྴ་པ་ན་བྱིན་པས་གྲོང་ཁྱེར་ཆེན་པོ་བཞིར་བདེ་བ་མྱོང་ངོ་། །མ་ལ་གནོད་པ་ཅུང་ཟད་བྱས་པས་དེ་ལྟ་བུའི་སྡུག་བསྔལ་མྱོང་ངོ་། །དེ་བས་ན་ཕ་མ་ལ་ཕན་པར་བྱ་ཡི། གནོད་པར་མ་བྱེད་ཅིག །དེ་བས་ན་ཚུལ་ཁྲིམས་རབ་ཏུ་ཉམས་པར་གྱུར་ཀྱང་རྣམ་པ་ལྔ་ལ་བསྙེན་བཀུར་བྱ་སྟེ། ཕ་དང་། མ་དང་། མཁན་པོ་དང་། །སློབ་དཔོན་དང་། །ནད་པའོ། །
༈ ཡལ་འདབ་གོ་གསུམ་པ་ནི། ཁྱིམ་བདག་མགོན་མེད་ཟས་བྱིན་ལ། བུ་མོ་མ་ག་དྷཱ་བཟང་མོ་ཞེས་བུད་མེད་ཀྱི་ཡོན་ཏན་ཐམས་ཅད་དང་ལྡན་ཞིང་དགེ་བའི་རྩ་བ་ཆེར་བསགས་པ་ཞིག་ཡོད་དོ། །གྲོང་ཁྱེར་བུ་རམ་ཤིང་འཕེལ་ན་ཚོང་དཔོན་གྱི་བུ་ཁྱུ་མཆོག་སྦྱིན་ཞེས་བྱ་བ་ཡོད་པས་གཅེར་བུ་པ་རྣམས་ལས་མ་ག་དྷཱ་བཟང་མོའི་ཆེ་བ་ཐོས་ཏེ་རང་ཉིད་གཅེར་བུ་པའི་ཆ་བྱད་དུ་བརྫུས་ནས། མཉན་ཡོད་དུ་སོང་ནས། མ་ག་དྷཱ་བཟང་མོ་བལྟ་བའི་ཕྱིར་ཁྱིམ་བདག་མགོན་མེད་ཟས་སྦྱིན་གྱི་ཁྱིམ་དུ་སློང་བར་སོང་བ་ན། མ་ག་དྷཱ་བཟང་མོས་ཀྱང་ཁ་ཟས་སྦྱིན་པར་ཕྱིན་པས། ཁྱུ་མཆོག་སྦྱིན་དེ་ལ་དགའ་བས། སྙུག་ཐགས་ཀྱི་ཞྭའི་ནང་དུ་ཁ་ཟས་བླངས་སོ། །དེར་མ་ག་དྷཱ་བཟང་མོས་ཤེས་བཞིན་མེད་པར་སློང་མོ་ལེན་པ་འདི་སུ་ཞིག་སྙམ་ནས། ཚིག་རྩུབ་པོས་སྤྱོས་པ་ན། དེ་ཡང་གདོང་སྨད་ནས་སོང་སྟེ་གྲོང་ཁྱེར་བུ་རམ་ཤིང་འཕེལ་དུ་སླེབ་མ་ཐག །ཁྱིམ་བདག་མགོན་མེད་ཟས་སྦྱིན་ལ་མ་ག་དྷཱ་བཟང་མོ་སློང་བར་བཏང་། ཟས་སྦྱིན་གྱིས་འདི་འོས་པ་མིན་ཀྱང་མི་གསོལ་བའི་ཐབས་མེད་སྙམ་ནས་བཅོམ་ལྡན་འདས་ལ་ཞུས་པས། གལ་ཏེ་མ་ག་དྷཱ་བཟང་མོ་གྲོང་ཁྱེར་བུ་རམ་ཤིང་འཕེལ་དུ་སོང་ན་སྐྱེ་བོ་མང་པོ་ལ་ཕན་པ་དང་བདེ་བའི་རྒྱུར་འགྱུར་བ་ཤེས་སོ། །ཞེས་གསུངས་པ་ཐོས་ནས་ཉེ་དུ་རྣམས་མ་གོ་བར་བྱས་
ཏེ་བུ་རམ་ཤིང་འཕེལ་དུ་བག་མར་བཏང་ངོ་། །དེར་མ་ག་དྷཱ་བཟང་མོ་ཁྱིམ་གྱི་བྱ་བ་ལ་ཞུགས་ནས་མི་རིང་བ་ན། སྒྱུག་མོ་ན་རེ། དེང་མཆོད་གནས་བཤོས་གསོལ་བས་བལྟ་བར་ཤོག་ཅིག་ཟེར་བས། དེར་ཉན་ཐོས་ཆེན་པོ་དག་བྱོན་ནོ་སྙམ་ནས་སོང་བ་ན། མུ་སྟེགས་གཅེར་བུ་པ་ནགས་ཀྱི་མ་ཧེ་འདྲ་བ་མགོ་བོའི་སྐྲ་བཏོགས་པ་དག་མཐོང་ནས། ངོ་ཚ་ཞིང་གདོང་པ་ཕྱིར་ཕྱོགས་ནས་འདི་ལྟ་བུ་ཡང་མཆོད་གནས་ཡིན་ན་མཆོད་གནས་མིན་པ་ཇི་ལྟ་བུ་ཞིག་སྨྲས་པས། སྒྱུག་མོ་ན་རེ། ཁྱེད་ཀྱི་ཡུལ་ན་ཆེས་ཁྱད་པར་དུ་འཕགས་པ་འགའ་ཞིག་ཡོད་དམ། དེས་སྨྲས་པ་ཡོད་དེ། སངས་རྒྱས་བཅོམ་ལྡན་འདས་སོ་ཞེས་སོགས་རྒྱས་པར་བཤད་དོ། །དེ་དག་ན་རེ། འོ་ན་ནང་པར་ཁོ་ན་སངས་རྒྱས་བཅོམ་ལྡན་འདས་དེ་ངེད་རྣམས་ཀྱིས་མཐོང་བའི་ཐབས་ཡོད་དམ། བཟང་མོས་སྨྲས་པ། བཤོས་གཙང་སྦྱོར་ཞིག་དང་སང་སྤྱན་དྲང་ངོ་བྱས་ནས་ཁང་ཐོག་ཏུ་མཆོད་པ་རྣམས་བཤམས། གསོལ་བ་བཏབ་པས། མཆོད་རྫས་རྣམས་ནམ་མཁའ་ལ་སོང་བ་དང་། སྟོན་པའི་སྤྱན་སྔར་བྱུང་བ་ན་ཀུན་དགའ་བོས་དྲི་བ་ཞུས་ཤིང་། འདི་ནས་དཔག་ཚད་བརྒྱ་དྲུག་ཅུ་ན་གྲོང་ཁྱེར་བུ་རམ་ཤིང་འཕེལ་ནས་འོངས་སོ་ཞེས་སོགས་དང་། དེར་སང་ཉིན་རྫུ་འཕྲུལ་གྱིས་བགྲོད་དགོས་པར་བཀའ་སྩལ་པ་དང་། ཚེ་དང་ལྡན་པ་གང་པོ་ཀུནྡ་ཨུཏྤ་ཏས་རྫུ་འཕྲུལ་གསར་དུ་བསྒྲུབས་པ་སོགས། སྔར་སློབ་མ་ལྟ་བུར་གཤེགས་པའི་སྐབས་ཀྱིས་འགྲེ་ལ། དེ་ནས་དེའི་ནང་པར། དགེ་སློང་རྣམས་རྫུ་འཕྲུལ་གྱི་རྣམ་པར་འཕྲུལ་པས་ཡང་དག་པར་ཆས་ཏེ། ཀུན་ཤེས་ཀཽ་ཌི་ནྱ་ནི། རྟ་མཆོག་
གིས་དྲངས་པའི་ཤིང་རྟ་ལ་ཞུགས་ཏེ་གློག་འགྱུ་ཞིང་ཆར་འབེབས་པ་དང་བཅས་ཏེ་བྱོན་པ་ན། མ་ག་དྷཱ་བཟང་མོའི་གྱོས་སྒྱུག་དང་། རྒྱལ་པོ་ལ་སོགས་པར་ཡུལ་དེའི་སྐྱེ་བོ་རྣམས་ཀྱིས་མཐོང་ནས། མ་ག་དྷཱ་བཟང་མོ་ལ། ཁྱེད་ཀྱི་སྟོན་པ་འདི་ཡིན་ནམ་དྲིས་པས། མ་ཡིན་ཏེ་འདི་ནི་ཀུན་ཤེས་ཀཽ་ཌི་ནྱའོ། །དེ་བཞིན་དུ་དྲི་བ་དང་བརྡའ་སྤྲད་པ་གཞན་ལའང་སོ་སོར་སྦྱར་ཏེ། འོད་སྲུང་ཆེན་པོ་ནི་བྲག་རི་ཤིང་དང་བྱ་དང་མེ་ཏོག་དང་འབབ་ཆུ་སྣ་ཚོགས་ཀྱིས་བརྒྱན་པ་ལ་བཞུགས་ཏེ་ནམ་མཁའ་ལས་བྱོན་ཏོ། །ཤཱ་རིའི་བུ་ནི་སེངྒེས་དྲངས་པའི་ཤིང་རྟ་ལ་བཅིབས་ཏེ་བྱོན་ཏོ། །མོའུ་འགལ་བུ་ནི་གླང་པོ་ཆེ་ས་སྲུང་ལ་ཆིབས་པར་སྤྲུལ་ཏོ། །མ་འགགས་པ་ནི་གསེར་གྱི་པདྨ་ཤིང་རྟའི་འཕང་ལོ་ཙམ་པ། དངུལ་གྱི་གེ་སར་དང་། བཻ་ཌཱུརྱའི་སྡོང་པོ་ཅན་གྱི་ལྟེ་བ་ལ་བཞུགས་ཏེའོ། །བྱམས་མའི་བུ་གང་པོ་ནི་བྱ་ཁྱུང་གིས་དྲངས་པའི་ཤིང་རྟ་ལའོ། །རྟ་ཐུལ་ནི་ལྷུང་བཟེད་ཐོགས་ཏེ་སྤྱོད་ལམ་ཞི་བས་ཐམས་ཅད་དད་པ་བསྐྱེད་ཅིང་བྱོན་ཏོ། །ཉེ་བར་འཁོར་ནི་གསེར་གྱི་ཏ་ལའི་ནགས་ཀྱི་གསེབ་ལས་སོ། །ཀ་ཏའི་བུ་ནི་བཻཌཱུརྱའི་ཁང་བརྩེགས་ཀྱི་ནང་དུ་ཞུགས་ཏེའོ། །གསུས་པོ་ཆེ་ནི་ཁྱུ་མཆོག་གི་ཤིང་རྟས་སོ། །སྲུང་དབང་གི་བུ་ནི་ངང་པའི་ཤིང་རྟས་སོ། །རྣ་བ་བྱེ་བ་ཉི་ཤུ་པ་ནི་རི་དྭགས་ཀྱི་ཚོགས་ཀྱིས་ཁྱབ་པའི་ནགས་ཚལ་དང་བཅས་ནས་སོ། །སྒྲ་གཅན་ཟིན་ནི་འཁོར་ལོས་སྒྱུར་པའི་རྒྱལ་པོ་འཁོར་དང་བཅས་པའི་ཆ་བྱད་ཀྱིས་སོ། །དེ་དག་ལ་སོགས་པ་ལྔ་བརྒྱའི་བར་དུ་སྣ་ཚོགས་པའི་ཆོ་འཕྲུལ་གྱིས་བྱོན་ཏོ། །
དེ་ནས་བཅོམ་ལྡན་འདས་ཀྱི་སྐུ་ལས་འོད་ཟེར་གསེར་མདོག་ལྟ་བུ་སྤྲོས་ཏེ་ཛམྦུའི་གླིང་ཐམས་ཅད་ཁྱབ་པར་མཛད་ཅིང་། མཉན་ཡོད་ནས་བུ་རམ་ཤིང་འཕེལ་གྱི་བར་དུ། ཐག་རིང་བ་དང་། རི་ལ་སོགས་པ་གང་གིས་ཀྱང་སྒྲིབ་པ་མེད་པར་ཕན་ཚུན་གྱི་མི་ཐམས་ཅད་ཀྱིས་དངོས་པོ་ཕྲ་མོ་ཐམས་ཅད་ཀྱང་མཐོང་བར་བྱིན་གྱིས་བརླབས་སོ། །བཅོམ་ལྡན་འདས་ནམ་མཁའ་ལ་གཤེགས་པ་ན་ཕྱག་ན་རྡོ་རྗེ་སྐུ་ཡི་ཕྱི་བཞིན་དུ་འོང་ལ། སྟེང་ནས་གནས་གཙང་མའི་ལྷ་རྣམས་དང་། འོག་ནས་འདོད་ཁམས་ཀྱི་ལྷ་རྣམས་དང་། གཡས་ནས་ཚངས་པ་དང་། གཡོན་ནས་བརྒྱ་བྱིན་དང་། མཐའ་བསྐོར་དུ་དྲི་ཟའི་རྒྱལ་པོ་ཟུར་ཕུད་ལྔ་པ་དང་། ཤིན་ཏུ་དགའ་བ་དང་། མིག་སྦྱིན་ལ་སོགས་པ་དྲི་ཟ་རྣམས་ཀྱིས་རོལ་མོ་སྣ་ཚོགས་པ་ཕུལ། གཞན་ཡང་ལྷ་དང་ཀླུ་ལ་སོགས་པ་སྡེ་བརྒྱད་རྣམས་ཀྱིས་མཆོད་པ་དཔག་ཏུ་མེད་པ་དང་བཅས་ཏེ་བྱོན་པ་ན། མཉན་ཡོད་ནས་བུ་རམ་ཤིང་འཕེལ་གྱི་བར་དེར། མི་དང་མི་མ་ཡིན་པའི་སྲོག་ཆགས་སྟོང་ཕྲག་བདུན་ཅུ་རྩ་བདུན་བདེན་པ་ལ་བཀོད་ནས། གྲོང་ཁྱེར་བུ་རམ་ཤིང་འཕེལ་ལ་སྒོ་བཅོ་བརྒྱད་ཡོད་པའི་སྒོ་རེ་རེ་ནས་བཅོམ་ལྡན་འདས་རེ་རེ་བྱོན་པའི་ཆོ་འཕྲུལ་བསྟན་ཏེ་མ་ག་དྷཱ་བཟང་མོའི་ཁྱིམ་དུ་བྱོན་ནས་གདུགས་ཚོད་གསོལ་ཏོ། །དེར་སྐྱེ་བོའི་ཚོགས་ཀྱིས་བཅོམ་ལྡན་འདས་མ་མཐོང་ནས་ཁྱིམ་གཞིག་པར་བརྩམས་པ་ན། ཁྱིམ་དེ་དང་གྲོང་ཁྱེར་དེ་ཤེལ་གྱི་རང་བཞིན་དུ་བྱིན་གྱིས་བརླབས་ནས་ཐམས་ཅད་ཀྱིས་མཐོང་བར་མཛད་པས་མ་བཤིག་གོ །དེ་ནས་བཅོམ་ལྡན་འདས་ཀྱིས་ཡུལ་དེར་ཉིན་ཞག་མང་པོར་
བཞུགས་ཏེ། མ་ག་དྷཱ་བཟང་མོ་ལ་སོགས་པ་སྐྱེ་བོའི་ཚོགས་དཔག་ཏུ་མེད་པ་ལ་ཆོས་བསྟན་པས་ལུས་ཅན་བགྲང་བར་དཀའ་བ་ཞིག་འབྲས་བུ་བཞི་ཐོབ་པ་དང་བྱང་ཆུབ་གསུམ་ལ་གཞོལ་པར་གྱུར་ཏོ། །དེའི་སྔོན་འབྱུང་ནི། སངས་རྒྱས་འོད་སྲུང་གི་དུས། རྒྱལ་པོ་ཀྲྀ་ཀྲིའི་བུ་མོ་གསེར་གྱི་ཕྲེང་བ་དང་ལྡན་པ་ཞིག་བཙས་ཏེ་མིང་ཡང་དེར་བཏགས། དེ་ཆེར་སྐྱེས་པ་ན་གྲོགས་མོ་ལྔ་བརྒྱ་དང་བཅས་པས་ཇི་སྲིད་འཚོའི་བར་དུ་སངས་རྒྱས་འཁོར་བཅས་ལ་བསྙེན་བཀུར་བྱས། སྐབས་དེར་རྒྱལ་པོ་ལ་རྨི་ལྟས་བཅུ་བྱུང་བ་བྲམ་ཟེ་མཚན་མཁན་ལ་དྲིས་པས་དེ་རྣམས་ཀྱིས་བུ་མོ་གསེར་ཕྲེང་ལ་སྡང་བའི་སེམས་ཀྱིས་སྨྲས་པ། ལྷ་ཁྱོད་ཀྱི་སྙིང་དང་འདྲ་བའི་མི་གང་ལགས་པ་དེའི་སྙིང་བཏོན་ནས་སྦྱིན་སྲེག་ལ་ཕུལ་ཞིག་ཟེར། རྒྱལ་པོ་ཡི་མུག་པ་ན། གསེར་ཕྲེང་གིས་གོ་སྟེ། ལྷ་ཉི་མ་ཤར་བར་སྒྲོན་མེའི་དགོས་པ་ཅི་མཆིས་རྫོགས་པའི་སངས་རྒྱས་ལ་ཞུས་ཤིག་སྨྲས་པས། རྒྱལ་པོས་སྟོན་པ་ལ་དྲི་བ་ཞུས་པ་ན། རྒྱལ་པོ་ཆེན་པོ་མ་འཇིགས་ཤིག །ཁྱོད་ཀྱི་ཡུལ་འཁོར་མི་ཉམས་ལ་སྲོག་གི་བར་ཆད་དུ་ཡང་མི་འགྱུར་གྱིས། རྒྱལ་པོ་ཆེན་པོ་གཞན་དུ་ན་མ་འོངས་པའི་ཚེ་སྐྱེ་དགུའི་ཚེ་ལོ་བརྒྱ་ཐུབ་པ་ན་ཤཱཀྱ་ཐུབ་པ་ཞེས་བྱ་བའི་སངས་རྒྱས་ཤིག་འབྱུང་སྟེ། དེའི་ཕྱི་མའི་དུས་ན་ཉན་ཐོས་རྣམས་ལུས་མ་བསྡམས་པ། སེམས་མ་བསྡམས་པ། ཚུལ་ཁྲིམས་མ་བསྡམས་པ། ཤེས་རབ་མ་བསྡམས་པ་འབྱུང་བར་འགྱུར་ཏེ། དེ་རྣམས་གཉེན་གྱི་ཚོགས་སྤངས་ནས་རབ་ཏུ་འབྱུང་ཡང་གཙུག་ལག་ཁང་ལ་ཁྱིམ་གྱི་
འདུ་ཤེས་འཇོག་པས་ཆགས་པར་འགྱུར་ཏེ། གླང་པོ་ཆེ་སྐར་ཁུང་ནས་བྱུང་བ་ལ་མཇུག་མ་ཐོགས་པ་རྨིས་པ་ནི་དེའི་སྔ་ལྟས་སོ། །རྒྱལ་པོ་ཆེན་པོ་ཁྱོད་ཀྱིས་སྐོམ་པའི་ཕྱི་ནས་ཁྲོན་པ་སྙེགས་པར་རྨིས་པ་དེ་ནི། དེ་རྣམས་གཙུག་ལག་ཁང་གི་ནང་ན་ལྷན་ཅིག་གནས་པ་རྣམས་ལ་ཆོས་སྟོན་ཀྱང་དེ་རྣམས་ཉན་པར་མི་འདོད་ཅིང་ཡིད་ལ་མི་འཇོག་པའི་སྔ་ལྟས་སོ། །ཕྱེ་བྲེ་གང་དང་མུ་ཏིག་བྲེ་གང་བརྗེས་པར་རྨིས་པ་ནི། དེ་ཡི་ཉན་ཐོས་རྣམས་ཀྱིས། གང་བཟའ་བ་ཙམ་གྱི་དོན་དུ་དབང་པོ་དང་སྟོབས་དང་བྱང་ཆུབ་ཀྱི་ཡན་ལག་རིན་པོ་ཆེ་རྣམས་ཡང་དག་པར་སྟོན་པར་འགྱུར་བ་དེའི་སྔ་ལྟས་སོ། །ཙནྡན་དང་ཤིང་མཉམ་པར་འཚོང་བ་རྨིས་པ་དེ་ནི། ཉན་ཐོས་རྣམས་ཀྱིས་མུ་སྟེགས་ཀྱི་ཚིག་གང་ཡིན་པ་བཟུང་ནས་སངས་རྒྱས་ཀྱི་བཀའ་དང་སྙོམས་པར་འགྱུར་བ་དེའི་སྔ་ལྟས་སོ། །ཀུན་དགའ་ར་བ་འབྲས་བུ་ཕུན་སུམ་ཚོགས་པ་མ་བྱིན་པར་ལེན་པ་རྣམས་ཀྱིས་འཕྲོག་པར་རྨིས་པ་དེ་ནི། དེ་ཡི་ཉན་ཐོས་དབང་ཤེས་མ་བསྡམས་པ་དག་གིས། དགེ་འདུན་རྣམས་ཀྱི་མེ་ཏོག་གི་མཆོག་དང་། འབྲས་བུའི་མཆོག་རྣམས་འཚོ་བའི་ཕྱིར་དགེ་འདུན་ལས་བླངས་ནས་ཁྱིམ་པ་རྣམས་ལ་སྟེར་བར་འགྱུར་བ་དེའི་སྔ་ལྟས་སོ། །གླང་པོ་ཕྲུ་གུས་སྤོས་ཀྱི་གླང་པོ་སྐྲག་པར་བྱེད་པ་རྨིས་པ་དེ་ནི་དེ་ཡི་ཉན་ཐོས་ཚུལ་ཁྲིམས་འཆལ་བ་དག་གིས་དགེ་སློང་ཚུལ་ཁྲིམས་ཅན་དག་ཟིལ་གྱིས་གནོན་པར་འགྱུར་ཏེ་དེའི་སྔ་ལྟས་སོ། །སྤྲེའུ་མི་གཙང་བས་གོས་གཞན་ལ་སྐུས་པར་རྨིས་པ་དེ་ནི། དེ་ཡི་ཉན་ཐོས་སྡིག་པའི་ཆོས་ཅན་དག་གིས་ཚུལ་ཁྲིམས་དང་ལྡན་པ་རྣམས་ལ་
སྐུར་པ་འདེབས་པར་འགྱུར་ཏེ་དེའི་སྔ་ལྟས་སོ། །སྤྲེའུ་རྒྱལ་པོར་དབང་བསྐུར་བ་རྨིས་པ་དེ་ནི། དེའི་ཚེ་རྨོངས་པ་རྣམས་རྒྱལ་པོར་འགྱུར་ཏེ་དེའི་སྔ་ལྟས་སོ། །རས་གཅིག་མི་བཅོ་བརྒྱད་ཀྱིས་སོ་སོར་དྲས་ཀྱང་སོ་སོར་མ་རལ་བ་རྨིས་པ་ནི། དེ་ཡི་བསྟན་པ་སྡེ་བཅོ་བརྒྱད་དུ་གྱེས་ཀྱང་རྣམ་པར་གྲོལ་བའི་རས་ནི་རལ་བར་མི་འགྱུར་ཏེ། དེའི་སྔ་ལྟས་སོ། །སྐྱེ་བོའི་ཚོགས་ཆེན་པོ་གཅིག་ཏུ་འདུས་ནས་འཐབ་པ་དང་རྩོད་པ་དང་གཡུལ་འགྱེད་པ་དང་། མཚང་འབྲུ་བར་རྨི་ལམ་དུ་མཐོང་བ་ནི། དེ་ཡི་བསྟན་པ་རྩོད་པས་ནུབ་པར་འགྱུར་ཏེ་དེའི་སྔ་ལྟས་སུ་ཡིན་ནོ། །རྒྱལ་པོ་ཆེན་པོ་དེ་ལྟར་མི་བཟད་པ་རྣམས་མ་འོངས་པའི་དུས་ན་འབྱུང་བར་འགྱུར་རོ། །གསུངས། གསེར་ཕྲེང་བཏགས་ནས་སྐྱེ་བ་ནི། སྔོན་ཞིང་པ་ཞིག་གི་ཆུང་མ་གྱུར་ཏེ། རང་སངས་རྒྱས་ཀྱི་མཆོད་རྟེན་ལ་ཁ་དོག་སྣ་ཚོགས་པའི་མེ་ཏོག་གི་ཕྲེང་བ་བྱས་ནས་བཏགས་པས་ཡིན་ནོ། །༈ ཡལ་འདབ་གོ་བཞི་པ་ནི། མདོ་སྡེ་༼ས༽རྟོགས་བརྗོད་བརྒྱ་པ་ལས་འབྱུང་བ་ནི། སངས་རྒྱས་མགོན་མེད་ཟས་བྱིན་གྱི་ཀུན་དགའ་ར་བ་ན་བཞུགས་སོ། །ཡུལ་དེར་ཆར་མི་འབབ་ཅིང་ཐན་པ་ཆེས་པས་མུ་གེ་མི་བཟད་པ་བྱུང་ཞིང་། ལྟས་མཁན་རྣམས་ཀྱིས་ཀྱང་ཆར་མི་འབབ་པར་བསྟན་ཏོ། །མཉན་ཡོད་ན་ཁྱིམ་བདག་ཕྱུག་ཅིང་ནོར་མང་ལ་ལོངས་
སྤྱོད་ཆེ་བ་ཞིག་ཡོད་པའི་ཆུང་མ་ལ་བུ་བཙས་པ་ན་དེ་ཁོ་ནའི་ཉིན་པར་ནས་ཆར་གྱི་རྒྱུན་ཆེན་པོ་བབ་པས་བུ་དེ་བསོད་ནམས་ཆེ་བར་གྲགས་པས་མིང་གྲགས་བཤེས་སུ་བཏགས་སོ། །དེ་ཆེར་སྐྱེས་ནས་སངས་རྒྱས་ལ་དད་པས་རབ་ཏུ་བྱུང་ནས་དགྲ་བཅོམ་པ་ལྷ་དང་མིའི་མཆོད་པའི་གནས་སུ་གྱུར། དེའི་མཆེ་བ་གཉིས་ལས་ཆུ་ཡན་ལག་བརྒྱད་དང་ལྡན་པ་འབྱུང་སྟེ། དེ་ལ་སྐོམ་གྱི་གནོད་པ་མེད་པས་ཚ་བའི་དུས་སུ་དགེ་སློང་སྐོམ་པ་རྣམས་གུང་སྐྱེམས་ལ། དགེ་འདུན་གྱི་ནང་དུ་འདུ་བའི་ཚེ་དེ་མི་འོང་ངོ་། །དེའི་དོན་དགེ་སློང་བློ་མཐུན་པ་རྣམས་ཀྱིས་དྲིས་པས་གོ་སྟེ། ངོ་མཚར་སྐྱེས་ནས་སྟོན་པ་ལ་སྔོན་འབྱུང་ཞུས་པ་ན། སངས་རྒྱས་འོད་སྲུང་ཝཱ་རཱ་ཎ་སཱིར་བཞུགས་པའི་སྐབས་ཚོང་དཔོན་གྱི་བུ་ཞིག་དགེ་སློང་རྒན་པ་ཞིག་ལས་རབ་ཏུ་བྱུང་ཡང་། དེ་ལེ་ལོ་ཅན་ཞིག་སྟེ་གཞན་ལ་བསྙེན་བཀུར་བྱེད་མི་འདོད་དོ། །དེས་དགེ་སློང་ཆེས་རྒན་པ་རྣམས་ཀྱི་བསྙེན་བཀུར་བདག་གིར་བྱས་ཤིང་ང་རྒྱལ་སྐྱེས་པས་བསོད་ནམས་ཟད་དེ་ནད་ཀྱིས་བཏབ་པར་སྨན་མར་འཐུངས་པས་མཚན་མོ་ཤིན་ཏུ་སྐོམ་སྟེ། རང་གི་ཆུ་སྣོད་རྩར་སོང་ཡང་ཆུ་མ་མཐོང་ཞིང་། དེ་བཞིན་མཁན་པོ་སློབ་དཔོན། དགེ་འདུན་སོགས་ཀྱི་དྲུང་དུ་སོང་ཡང་ཆུ་མ་རྙེད་པས། ཆུ་ཀླུང་ཆེན་པོ་ཟློག་བྱེད་ཀྱི་འགྲམ་དུ་ཕྱིན་པ་ན་ཆུ་བོ་དེ་ཡང་སྐོམ་སྟེ་གྲམ་པ་སྐྱ་ཁྲོལ་དུ་མཐོང་བས་རང་གི་ལས་ཤེས་ནས། ཆུ་བོ་དེའི་ཕ་རོལ་ན་ཤིང་སྡོང་ཞིག་ཡོད་པར་འཛེགས་ཏེ། ཡལ་ག་ལ་རས་ཤིག་ཡིད་ཆེས་པའི་ཕྱིར་བཏགས་སོ། །ཕྱི་ཉིན་དགེ་འདུན་རྣམས་ལ་རྒྱུ་མཚན་ཞིབ་པར་སྨྲས་པས་དེ་དག་
ཀྱང་སྐྱོ་བ་སྐྱེས་ཤིང་། མཁན་པོ་སོགས་ཀྱིས་ཆུ་བྱིན་པ་ཡང་སྔར་བཞིན་མ་མཐོང་བས་དེ་ཚུལ་སངས་རྒྱས་ལ་ཞུས་པ་ན་གཎྜི་རྡུངས་ཤིག་ཅེས་བཀའ་སྩལ་ཏོ། །དེར་སངས་རྒྱས་ལ་སོགས་པ་དགེ་སློང་གི་དགེ་འདུན་འདུས་པ་ན། གཏམ་དེ་ཕྱོགས་སུ་ཁྱབ་པས་སེམས་ཅན་འབུམ་ཕྲག་དུ་མ་ཡང་འདུས་སོ། །དེའི་མཁན་པོས་དགེ་སློང་དེ་ལ་རིལ་བ་སྤྱི་བླུགས་ཆུས་བཀང་བ་བྱིན་ནས། བུ་ཆུ་འདི་དགེ་འདུན་ལ་བྲིམས་ཤིག་བརྗོད་པ་ན། འབྲས་བུ་མངོན་སུམ་དུ་མཐོང་བས་སྐྱོ་བར་གྱུར་པ་དེ་ཉིད་ཀྱིས་བཅོམ་ལྡན་འདས་དང་ཉན་ཐོས་རྣམས་ལ་དད་པ་བསྐྱེད་ནས་བསམ་པ་དྲག་པོས་ཆུ་དེ་དགེ་འདུན་ལ་བྲིམས་སོ། །དེ་ནས་བཅོམ་ལྡན་འདས་ཀྱིས་དེ་ལ་ཕན་གདག་པའི་ཕྱིར་ཕྱག་གླང་པོ་ཆེའི་སྣ་ལྟ་བུ་བརྐྱངས་ནས་འཇིགས་པ་ཐམས་ཅད་དབུགས་འབྱིན་པར་བྱེད་པའི་ཕྱག་གིས་ཆུ་དེ་བཞེས་ནས། ཉན་ཐོས་ཆེན་པོ་རྣམས་ཀྱིས་བླངས་ན་འོན་ཀྱང་ཟད་པར་མ་གྱུར་ཏོ། །དགེ་འདུན་ཐམས་ཅད་ལ་བྲིམས་ན་ཡང་ཟད་པར་མ་གྱུར་ཏོ། །དེ་ནས་ལྷ་དང་མི་རྣམས་དད་པར་བྱེད་པའི་ཆོ་འཕྲུལ་ཡ་མཚན་ཅན་དེ་མཐོང་ནས་སྲོག་ཆགས་འབུམ་ཕྲག་དུ་མས་བདེན་པ་མཐོང་བར་གྱུར་ཏོ། །དེའི་རྒྱུད་ལ་ཡང་དགེ་བའི་རྩ་བ་རྣམས་སོར་ཆུད་པར་གྱུར་ཏོ། །གང་གི་ཚེ་ནད་སོས་པ་དེའི་ཚེ་དེས་སངས་རྒྱས་ལ་སོགས་པ་དགེ་སློང་གི་དགེ་འདུན་ཆུས་མི་བྲེལ་བར་བྱས་ཏེ། ལོ་ཁྲི་ཉིས་སྟོང་གི་བར་དུ་དེས་དགེ་སློང་རྣམས་ལ་ཆུ་བྲིམས་སོ། །དེ་ནས་ཕྱིས་རེ་ཞིག་ན་འཆི་བའི་ཚེ་སྨོན་ལམ་བཏབ་པ། དགེ་བའི་རྩ་བ་དང་།
སེམས་བསྐྱེད་པ་དང་། སྦྱིན་པར་བྱ་བའི་ཆོས་ཡོངས་སུ་གཏོང་བ་འདིས་ན། བཅོམ་ལྡན་འདས་འོད་སྲུང་གིས་བྲམ་ཟེའི་ཁྱེའུ་བླ་མ་ལ། བྲམ་ཟེའི་ཁྱེའུ་ཁྱོད་མ་འོངས་པ་སྐྱེ་དགུའི་ཚེ་ལོ་བརྒྱ་ཐུབ་པ་ན་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཤཱཀྱ་ཐུབ་པ་ཞེས་བྱ་བར་འགྱུར་རོ་ལུང་བསྟན་པ་གང་ཡིན་པ་དེ་བདག་གིས་མཉེས་པར་བྱེད་པར་གྱུར་ཅིག །མི་མཉེས་པར་བྱེད་པར་མ་གྱུར་ཅིག །བདག་གི་མཆེ་བའི་ཕྲག་ནས་ཀྱང་ཆུ་ཡན་ལག་བརྒྱད་དང་ལྡན་པ་འབྱུང་བར་གྱུར་ཅིག་ཅེས་སྨོན་ལམ་བཏབ་པའོ། །༈ ཡལ་འདབ་གོ་ལྔ་པ་ནི། མདོ་སྡེ་མཛངས་༼ཨ༽བླུན་ལེའུ་གཉིས་པ་ནས་འབྱུང་བ་ཅུང་ཟད་བསྡུ་ན། སངས་རྒྱས་མཉན་ཡོད་ན་བཞུགས་ཏེ་ཀུན་དགའ་བོ་དང་བཅས་བསོད་སྙོམས་ལ་གཤེགས་སོ། །གྲོང་ཁྱེར་དེ་ན་རྒན་མོ་ཞིག་ལ་བུ་རྟག་ཏུ་རྐུན་བྱེད་པ་གཉིས་ཡོད་པ་ནོར་བདག་གིས་ཟིན་ནས་ཁྲིམས་དང་སྦྱར་ཏེ་གསོད་སར་ཁྲིད་པ་ན། སངས་རྒྱས་མཐོང་ནས་རྒན་མོ་མ་སྨད་གསུམ་ཀས་སྐྱབས་ཞུས་པས། སངས་རྒྱས་ཀྱིས་ཀུན་དགའ་བོ་རྒྱལ་པོ་ལ་ཞུར་བཏང་བས་གནང་ནས་བུ་གཉིས་རབ་ཏུ་བྱུང་སྟེ་དགྲ་བཅོམ། མ་རྒན་ཡང་ཆོས་ཐོས་པས་ལན་ཅིག་ཕྱིར་མི་ལྡོག་པར་གྱུར་ཏོ། །སྔོན་འབྱུང་ནི། སྔོན་འདས་པའི་དུས་བསྐལ་པ་གྲངས་མེད་པའི་ཕ་རོལ་ན།
འཛམ་བུའི་གླིང་འདིར་རྒྱལ་པོ་ཤིང་རྟ་ཆེན་པོ་ཞེས་བྱ་བ་ཞིག་ཡོད་དེ། རྒྱལ་པོ་དེས་རྒྱལ་ཕྲན་ལྔ་སྟོང་སྙེད་ལ་དབང་བྱེད་དོ། །རྒྱལ་པོ་དེ་ལ་སྲས་གསུམ་ཡོད་དེ། སྒྲ་ཆེན་པོ། ལྷ་ཆེན་པོ། སེམས་ཅན་ཆེན་པོ་ཞེས་བྱ་ལ། ཐ་ཆུང་ནི་ཆུང་ངུ་ནས་བྱམས་པ་དང་སྙིང་རྗེ་ལྡན་ཏེ། ཐམས་ཅད་ལ་བུ་གཅིག་པ་དང་འདྲའོ། །དེའི་ཚེ་རྒྱལ་པོ་དེ་བློན་པོ་དང་བཅས། བཙུན་མོ་དང་སྲས་སུ་བཅས་ཏེ་ཕྱི་རོལ་དུ་འཆག་ཅིང་དོང་བ་ལས། ཅུང་ཟད་ཅིག་ངལ་གསོ་བའི་བར་དུ་སྲས་གསུམ་པོ་ཚལ་གྱི་ནང་དུ་སོང་བ་ལས། སྟག་མོ་ཞིག་བུ་བྱུང་ནས་ཞག་མ་ལོན་པ་བཀྲེས་སྐོམ་གྱིས་ཉེན་ཏེ། ཕྱིར་ཡང་བུ་ཟ་བ་ལ་ཐུག་པ་ཞིག་མཐོང་ནས། རྒྱལ་བུ་སེམས་ཅན་ཆེན་པོས་ཕུ་བོ་དག་ལ་སྨྲས་པ། སྟག་མོ་འདི་ནི་ཤིན་ཏུ་སྡུག་བསྔལ་གྱིས་གཟིར་ཏེ། ཉམ་ཆུང་ལ་རིད་པས་ཤི་ལ་ཐུག་པ་འདི་ལྟ་བུ། བུ་བྱུང་མ་ཐག་པ་ཡང་ཟ་བར་འདོད་དོ། །ཞེས་སྨྲས་པ་ན། ཕུ་བོ་གཉིས་ཀྱིས་ཁྱོད་ཟེར་བ་བདེན་ནོ་ཞེས་ཟེར་རོ། །ནུ་བོས། ཡང་སྨྲས་པ། སྟག་མོ་འདིས་ཟས་ཅི་ཟ། དེ་དག་ན་རེ། འདི་བསད་མ་ཐག་པའི་ཤ་རློན་པ་དང་། ཁྲག་དྲོན་མོས་ཚིམ་པར་འགྱུར་རོ། །ཡང་སྨྲས་པ་གང་སུ་ཡང་རུང་སྟེ། དེ་ལྟ་བུའི་དངོས་པོས་འདིའི་སྲོག་སྐྱབས་ཏེ་མི་ཉམས་པར་བྱེད་ནུས་པ་ཡོད་དམ། ཕུ་བོ་གཉིས་ན་རེ། དེ་ནི་ཤིན་ཏུ་ཡང་དཀའ་བས་མེད་དོ། །དེ་ནས་སེམས་ཅན་ཆེན་པོས་འདི་སྙམ་མོ། །བདག་ཡུན་རིང་པོ་ནས་འཁོར་བ་ན་འཁོར་ཞིང་། ལུས་སྲོག་གྲངས་མེད་པ་ཞིག་ཆུད་གསོན་ཏེ། དུག་གསུམ་གྱི་ཕྱིར་ལུས་སྲོག་འགའ་ཞིག་བཏང་ཡང་ཆོས་ཀྱི་ཕྱིར་དུ་མ་ཡིན་ནོ་སྙམ་ནས་
གསུམ་ཀར་འགྲོགས་ཏེ་སོང་བ་ལས། རིང་པོར་མ་ཕྱིན་པར་ཕུ་བོ་གཉིས་ལ་འདི་སྐད་ཅེས་སྨྲས་སོ། །མཆེད་གཉིས་སྔར་གཤེགས་དང་། བདག་དོན་ཞིག་གཉེར་ནས་སླར་འོང་ངོ་སྨྲས་ནས་ལམ་དེ་ཉིད་དུ་ཞུགས་ཏེ་སྟག་མོའི་ཚང་གང་ན་ཡོད་པར་མྱུར་དུ་སོང་ནས་སྟག་མོའི་དྲུང་དུ་ཉལ་བ་དང་། སྟག་མོ་ཁ་འཐམ་པས་ཟ་མ་ནུས་སོ། །དེའི་ཚེ་རྒྱལ་བུས་ཤིང་གི་ཚལ་བ་རྣོན་པོས་ལུས་ལ་ཁྲག་ཕྱུང་ནས། སྟག་མོ་ལ་བལྡག་ཏུ་བཅུག་པ་དང་། ཁ་ཡང་ཕྱེ་ནས་ལུས་ཀྱི་ཤ་མ་ལུས་པར་ཟོས་སོ། །ཕུ་བོ་གཉིས་ཀྱིས་བལྟས་པ་ན་རིང་ཞིག་ཏུ་མ་འོངས་པ་དང་། ཕྱིར་རྗེས་བཞིན་དུ་འཚོལ་དུ་སོང་བ་ལས་སྔར་སྨྲས་པའི་ཚུལ་བརྟགས་ན་གདོན་མི་ཟ་བར་སྟག་མོ་ལྟོགས་པས་བསད་དོ་སྙམ་དུ་དེར་ཕྱིན་ནས་བལྟས་པ་ན། ནུ་བོ་སྟག་གིས་ཟོས་པ་མཐོང་ནས། ལུས་ས་ལ་བརྡབས་ཏེ་བརྒྱལ་ལོ། །རིང་ཞིག་ནས་བརྒྱལ་སངས་པ་ན། ཆོ་ངེ་འདེབས་ཤིང་ས་ལ་འགྲེའོ། །དེའི་ཚེ་བཙུན་མོ་ཡུམ་མནལ་བའི་རྨི་ལམ་ན། ཕུག་རོན་གསུམ་ཞིག་ཀུན་ཏུ་འཕུར་ཞིང་རྩེ་བ་ལས་ནང་གི་ཆུང་ངུ་ཞིག་ཁྲས་ཁྱེར་བ་རྨིས་མ་ཐག་སད་ནས་སྐྲག་དངངས་ཏེ་རྒྱལ་པོ་ལ་བཤད་པས། བདག་གིས་གཏམ་དུ་ཐོས་ན། ཕུག་རོན་ནི་བུ་ཕོའི་བླ་སྟེ། ཕུག་རོན་ནང་གི་ཐ་ཆུང་ཁྲས་ཁྱེར་བས། བདག་གི་བུ་ནང་གི་སྡུག་པ་ལ་བཀྲ་མི་ཤིས་ངེས་སོ་ཞེས། དེ་མ་ཐག་ཕོ་ཉ་བཀྱེ་བས་རིང་པོར་མ་ལོན་པ་རྒྱལ་བུ་གཉིས་ནི་འོངས་ཀྱིས་བུ་ནང་གི་སྡུག་པ་ཅང་མ་ཉེས་སམ་ག་རེ་ཞེས་དྲིས་ན། དེ་གཉིས་མཆི་མས་བརྣངས་ཏེ་རེ་ཞིག་ལུས་ཏེ། དེ་ནས་སྟག་གིས་ཟོས་སོ་ཞེས་སྨྲས་སོ། །ལྷ་མོ་དེས་
དེ་སྐད་སྨྲས་པ་ཐོས་ནས་དངངས་ཏེ་ས་ལ་འགྱེལ་ནས་རིང་ཞིག་ལོན་པ་དང་། དབུགས་ཕྱིན་ཏེ། བུ་གཉིས་དང་བཙུན་མོ་དང་ཕོ་བྲང་གི་སླས་སུ་བཅས་ཏེ་མྱུར་བར་རྒྱལ་བུ་གང་དུ་ཚེ་འཕོས་པའི་གནས་སུ་སོང་ངོ་། །དེའི་ཚེ་སྟག་མོས་རྒྱལ་བུའི་ཤ་ནི་ཟད་པར་ཟོས་ཟིན་གྱིས། རུས་པ་དང་ཁྲག་འབའ་ཞིག་གིས་ས་ལ་རྩོག་རྩོག་པ་ལྟར་འདུག་པ་མཐོང་ངོ་། །དེ་ནས་བཙུན་མོས་ནི་མགོ་ནས་བཟུང་ངོ་། །རྒྱལ་པོས་ནི་ལག་པ་ནས་བཟུང་ཞིང་དེར་ཡང་བརྒྱལ་ནས་རིང་ཞིག་ལོན་པ་དང་ཕྱིར་སངས་སོ། །རྒྱལ་བུ་ཚེ་འཕོས་ནས་དགའ་ལྡན་དུ་སྐྱེས་སོ། །དེའི་རྒྱུ་བརྟག་པ་ན་སྟག་མོ་ལ་ལུས་བྱིན་པས་ཡིན་པར་ཤེས་ཤིང་། དེའི་རུས་བུ་ཚལ་ན་འདུག་པ་ལ་ཕ་མས་བསྐོར་ནས་མྱ་ངན་བྱེད་པ་མཐོང་སྟེ། དེ་ལ་སྤྲོ་བ་བསྐྱེད་ཅིང་གཏམ་བྱར་འགྲོའོ་སྙམ་ནས། ནམ་མཁའ་ལས་བབས་ཏེ་སྟེང་གི་ནམ་མཁའ་ལས་ཚིག་སྙན་པ་རྣམ་པ་སྣ་ཚོགས་ཀྱིས་ཕ་མ་གཉིས་ལ་སྤྲོ་བ་བསྐྱེད་དོ། །དེ་གཉིས་ཀྱིས་ནམ་མཁའ་ལ་བལྟས་ནས། ལྷ་ཁྱོད་སུ་ཞིག་ལགས། ཞེས་སྨྲས་པས། དེ་ན་རེ། བདག་ནི་རྒྱལ་བུ་སེམས་ཅན་ཆེན་པོ་ཡིན་ཏེ། བདག་གིས་ལུས་སྟག་མོ་ལྟོགས་པ་ལ་བྱིན་པས་དགའ་ལྡན་དུ་སྐྱེས་སོ། །རྒྱལ་པོ་ཆེན་པོ་འདི་ལྟར་མཁྱེན་པར་མཛོད་ཅིག་ཅི་ཙམ་སྲེད་པ་དང་བཅས་པའི་ཆོས་ནི་མཐར་འཇིག་པར་འོང་ངོ་། །སྐྱེ་བ་ཡོད་ན་ངེས་པར་འཆིའོ། །སྡིག་པ་བྱས་ན་སེམས་ཅན་དམྱལ་བར་ལྟུང་ངོ་། །དགེ་བ་བྱས་ན་མཐོ་རིས་སུ་སྐྱེ་སྟེ། སྐྱེ་བ་དང་འཇིག་པ་ཀུན་ལ་སྲིད་ན། ཅིའི་སླད་དུ་དགའ་བ་འབའ་ཞིག་གི་ཕྱིར་མྱ་ངན་གྱི་རྒྱ་མཚོར་
ལྟུང་བ་མི་ཚོར་རམ། དགེ་བའི་ཆོས་ལ་བརྩོན་འགྲུས་མཛོད། །ཅེས་སྨྲས་པ་དང་། དེའི་ཕ་མས་སྨྲས་པ། ཁྱོད་ནི་སྙིང་རྗེ་ཆེན་པོས་སྟག་མོ་གསོས་ཏེ་ཐམས་ཅད་ལ་སྙིང་བརྩེ་བ་ཡིན་ན། བདག་ཅག་བཏང་སྟེ་ཚེའི་དུས་བྱས་པས། དེང་ནི་ཁྱོད་དྲན་པའི་ཕྱིར་ཤ་ཡང་དུམ་བུ་དུམ་བུར་ཆད་པ་ཙམ་གྱི་སྡུག་བསྔལ་སྐྱེས་ན། སྙིང་རྗེ་ཆེན་པོ་སྤྱོད་པ་ཁྱོད་འདི་ལྟར་བྱ་བའི་རིགས་སམ། དེ་ནས་ཡང་ལྷ་དེས་ཚིག་སྙན་པ་རྣམ་པ་སྣ་ཚོགས་ཀྱིས་སྤྲོ་བ་བསྐྱེད་པས། དེའི་ཕ་མ་ཡང་སྤྲོ་བ་ཅུང་ཟད་སྐྱེས་ནས། རུས་བུ་རྣམས་རིན་པོ་ཆེ་སྣ་བདུན་གྱི་སྒྲོམ་དུ་བཅུག་སྟེ་སར་སྦས་པའི་སྟེང་དུ་མཆོད་རྟེན་བྱས་སོ། །ལྷ་དེ་ཡང་རང་གནས་སུ་སོང་ངོ་། །རྒྱལ་པོ་དང་འཁོར་མང་པོ་རྣམས་ཀྱང་ཕྱིར་ཕོ་བྲང་དུ་སོང་ངོ་། །དེའི་དུས་ཀྱི་རྒྱལ་པོ་ཤིང་རྟ་ཆེན་པོ་ནི་ཟས་གཙང་མ། བཙུན་མོ་ནི་སྒྱུ་མ་ལྷ་མཛེས། སྲས་སྒྲ་ཆེན་པོ་ནི་བྱམས་པ། ལྷ་ཆེན་པོ་ནི་བ་མི་སུ་ཏྲ། རྒྱལ་བུ་ཐ་ཆུང་ནི་སངས་རྒྱས་ཐུབ་པ་ཆེན་པོ། སྟག་ཕྲུག་གཉིས་ནི་མི་འདི་གཉིས་ཡིན་ནོ། །༈ ཡལ་འདབ་གོ་དྲུག་པ་གོ་སླ་ཞིང་སྔོན་འབྱུང་ནི། འདུལ་བ་༼ཁ༽སྨན་གྱི་གཞི་ལས་འབྱུང་བ་སྟེ། སྔོན་བྱུང་བ་འདས་པའི་དུས་ཝཱ་རཱ་ཎ་སཱིར་རྒྱལ་པོ་ཚངས་བྱིན་གྱིས་རྒྱལ་སྲིད་བྱེད། དེའི་བློན་པོ་ལྔ་བརྒྱ་ཆོས་མིན་སྤྱོད་པ་རྒྱལ་པོས་ཚོར་བ་སྙིང་རྗེའི་སྟོབས་ཀྱིས་བསད་མ་སྤོབས་པར་
ཡུལ་སྤྱུགས་པ། བྱེ་མའི་གླིང་དུ་ཚད་པས་གདུང་སྟེ་ཆུ་མ་མཐོང་ཞིང་། བཀྲེས་ཤིང་སྐོམ་པས་ཉན་ཏེ་སྡུག་བསྔལ་གྱི་སྐད་བཏོན་པ། ཕྱོགས་དེར་བྱང་ཆུབ་སེམས་དཔའ་གླང་པོའི་ཚུལ་འཛིན་པས་ཐོས་ཏེ་ཆུ་དང་མེ་ཏོག་འབྲས་བུ་རྩ་བ་སོགས་ཀྱིས་ཚིམ་པར་བྱས་ཤིང་ངལ་སོས་པ་ན། གླང་པོ་མཆོག་དེས་སྨྲས་པ། རི་སུལ་འདིའི་ཕ་རོལ་ངོས་ན་གླང་པོ་ཆེའི་རོ་ཞིག་ཡོད་པ་བླངས་ན་འཚོ་བར་འགྱུར་རོ། །ཞེས་ལུང་བསྟན་ཏེ། རང་ཉིད་དེ་ཕྱོགས་སུ་རི་རྩེར་འཛེགས་ནས་སྨོན་ལམ་བཏབ་སྟེ་མཆོངས་ནས་ཤིའོ། །བློན་པོ་རྣམས་ཀྱིས་རོ་དེ་བཙལ་བ་ན་སྔར་གྱི་གླང་ཆེན་དུ་ཤེས་ནས་འགྱོད་ཅིང་གདུང་བས་རོ་ལ་བལྟ་མ་འདོད་པར་གནས་གཙང་མའི་ལྷ་རྣམས་ཀྱིས་ལུང་བསྟན་པས། དེ་དག་གིས་དེའི་རྒྱུ་ལྟོ་ཕྱུང་ནས་བཀྲུས་ཏེ་ཆུས་བཀང་ནས་རྩ་བ་དང་འབྲས་བུ་རྣམས་ཁྱེར་ནས་རོ་ལ་མཆོད་པ་བྱས་ནས་གླང་པོ་བདག་ཉིད་ཆེན་པོས་རང་ཡོངས་སུ་བཏང་ནས་བདག་ཅག་སྲོག་ཕྱིན་པས། བདག་ཉིད་ཆེན་པོ་དེ་སངས་རྒྱས་པ་ན་བདག་ཅག་ཀྱང་དེའི་ཆོས་ཀྱིས་ཉོན་མོངས་ཐམས་ཅད་སྤངས་ནས་སྲིད་པ་མཐའ་ཅན་དུ་གྱུར་ཅིག །ཅེས་སྨོན་ལམ་བཏབ་པའི་གླང་པོ་ནི་སངས་རྒྱས་དང་། བློན་པོ་ལྔ་བརྒྱ་བྲམ་ཟེ་ལྔ་བརྒྱ་ཡིན་གསུངས་སོ། །
༈ ཡལ་འདབ་གོ་བདུན་པ་དང་གོ་བརྒྱད་པ་གོ་སླའོ། །༈ ཡལ་འདབ་གོ་དགུ་པ་ནི། མདོ་སྡེ་༼ཨཾ༽རྟོགས་བརྗོད་བརྒྱ་པར་འབྱུང་སྟེ་ཝཱ་རཱ་ཎ་སཱིར་རྒྱལ་པོ་པདྨ་ཞེས་དད་པ་དང་ལྡན་པ་དགེ་ཞིང་བསམ་པ་བཟང་བས་རང་གཞན་ཕན་པ་ལ་ཞུགས་པ་སྦྱིན་པ་རྒྱ་ཆེར་གཏོང་བ་ཞིག་ཡོད། ཡུལ་དེར་མི་ནད་ཆེན་པོ་བྱུང་སྟེ། སེམས་ཅན་ཕལ་ཆེར་སྐྱ་རྦབ་ཀྱི་ནད་ཀྱིས་བཏབ་པ་ན། རྒྱལ་པོ་སྙིང་རྗེ་ཆེ་བས་སྨན་པར་བསྒོ་ནས་ཡུན་དུ་གསོས་ཀྱང་འཚོ་བར་མ་ནུས་པར། དེའི་རྒྱུ་དྲིས་པས། སྨན་པ་རྣམས་ཀྱིས་ཉ་ཆེན་རོ་ཧི་ཏའི་ཤས་ཕན་པར་བསྟན་ཀྱང་། དེ་ནི་ཤིན་ཏུ་རྙེད་པར་དཀའ་བས་མ་རྙེད་པ་ན། སླར་ཡང་རྒྱལ་པོར་ནད་པའི་ཚོགས་འདུས་ཏེ་བདག་ཅག་ལ་ནད་འདི་ལས་ཡོངས་སུ་བསྐྱབ་ཅིང་སྲོག་སྩལ་དུ་གསོལ་ཞེས་ཉམ་ཐག་པའི་ཚུལ་གྱིས་ཞུས་པ་ན། རྒྱལ་པོར་སྙིང་རྗེའི་ཤུགས་དྲག་ཏུ་སྐྱེས་པས། ཅི་སེམས་ཅན་འདི་རྣམས་མ་འཚོ་ན་བདག་འཚོ་བ་དོན་མེད་དོ་སྙམ་ནས། སྦྱིན་པ་རྒྱ་ཆེར་གཏོང་ཞིང་། བུ་ཐུ་བོ་རྒྱལ་པོར་བཅུག །བརྟུལ་ཞུགས་ཡན་ལག་བརྒྱད་པ་བླངས་ནས་ཁང་བཟང་གི་སྟེང་དུ་སོང་སྟེ། མཆོད་པས་མཆོད་ཅིང་ཤར་ཕྱོགས་སུ་ཁ་བལྟས་ཏེ་སྨོན་ལམ་བཏབ་པ་བདེན་པ་དང་བདེན་པའི་ཚིག་གང་གིས་སེམས་ཅན་རྣམས་ཤིན་ཏུ་ཕོངས་པར་གྱུར་ཏེ། ནད་ཀྱིས་ཡོངས་སུ་གཟིར་བ་མཐོང་ནས་བདག་གིས་རང་གི་སྲོག་ཕོངས་པ་ཡོངས་སུ་བཏང་བས།
བདག་ཆུ་ཀླུང་ཟློག་བྱེད་འདིའི་ནང་དུ་ཉ་རོ་ཧི་ཏར་སྐྱེ་བར་ཤོག་ཅིག །ཅེས་སྨྲས་ཏེ་ཁང་བཟང་གི་སྟེང་ནས་བདག་ཉིད་ཀྱིས་མཆོངས་སོ། །དེར་ལྷུང་བའི་མོད་ལ་ཤི་ནས་སྨོན་པ་བཞིན་སྐྱེས་པ་ན། ལྷ་རྣམས་ཀྱིས་ཡུལ་ཀུན་ཏུ་ཐོས་པར་བྱས་པས་སྐྱེ་བོ་ཕལ་མོ་ཆེས་ལག་ན་མཚོན་ཆ་ཐོགས་ནས། ཉའི་ཤ་རྣམས་གཅོད་ཅིང་ཟ་བ་ན། བྱང་ཆུབ་སེམས་དཔའ་བྱམས་དང་སྙིང་རྗེས་དགའ་བ་ལྷག་པར་རྒྱས་ཏེ། ལོ་བཅུ་གཉིས་ཀྱི་བར་དུ་སྦྱིན་ནས་ནད་ཀྱི་རྒྱུན་ཆད་པ་ན། ཉ་དེས་སྨྲས་པ། ང་ནི་རྒྱལ་པོ་པདྨ་ཡིན་པས་ཁྱེད་རྣམས་ཀྱི་དོན་དུ་རང་གི་སྲོག་ཡོངས་སུ་བཏང་ནས་ལུས་བྱིན་པས་ང་ལ་སེམས་དགའ་བར་གྱིས་ཤིག་དང་། ང་སངས་རྒྱས་པ་ན་ཁྱེད་རྣམས་མྱ་ངན་ལས་འདས་པ་ཡང་དག་པའི་མཐར་ཐུག་པ་གྲུབ་པ་དང་བདེ་བ་ལ་འགོད་པར་བྱའོ་ཞེས་སྨྲས་པ་ན། སྐྱེ་བོའི་ཚོགས་དེ་དག་དང་། རྒྱལ་པོ་བློན་པོ་ཕོ་བྲང་འཁོར་གྱི་མི་རྣམས་ཀྱིས་དད་པ་རྙེད་ནས་མཆོད་པ་རྒྱ་ཆེར་བྱས་ནས་དེ་སངས་རྒྱས་པའི་ཉན་ཐོས་སུ་སྨོན་ལམ་བཏབ་བོ། །༈ ཡལ་འདབ་བརྒྱ་པ་ནི། འདུལ་བ་ལུང་ལས། རྒྱལ་པོ་གསལ་རྒྱལ་གྱིས། སྟོན་པས་བླ་ན་མེད་པའི་བྱང་ཆུབ་ཀྱི་ཕྱིར་ཐོག་མར་སངས་རྒྱས་གང་ལ་བསོད་སྙོམས་ཕུལ་ལགས་ཞེས་ཞུས་པས། སྟོན་པས་བཀའ་སྩལ་པ། སྔོན་ཡངས་པ་ཞེས་བྱ་བའི་གྲོང་ཁྱེར་ན་རྫ་མཁན་
ཡངས་པའི་འོད་ཅེས་བྱ་བ་དེས། སྟོན་པ་ཤཱཀྱ་ཐུབ་པ་ཆེན་པོ་ཞེས་བྱ་བ་འཇིག་རྟེན་དུ་བྱོན་པ་དང་མཇལ་ཏེ་བསོད་སྙོམས་ཕུལ་ནས་ཞབས་ལ་གཏུགས་ཏེ་སྨོན་ལམ་བཏབ་པ། བདག་ཀྱང་རབ་ཏུ་སྦྱིན་པ་འདི་ཡིས་ཤཱཀྱའི་རིགས་སྐྱེས་པ། །ཡོན་ཏན་རིགས་དང་རུས་དག་མཉམ་པའི་སངས་རྒྱས་ཉིད་གྱུར་ཅིང་། །བདག་གིས་ཚངས་པའི་འཇིག་རྟེན་བར་གྱི་ཉམ་ཐག་འཆི་བ་ཡི། །ཕ་རོལ་ཞི་བ་རྒྱ་ཆེན་འཇིགས་པ་མེད་པར་སྒྲོལ་བར་ཤོག །ཅེས་ཐུགས་བསྐྱེད་པར་གསུངས་།