གསོལ་འདེབས་དྲང་སྲོང་བདེན་ཚིག་སྐལ་ལྡན་དགའ་སྟོན་ཡོད༔

ཨེ་མ་ཧོ༔ སྐྱེ་སྔོན་ལྷ་དང་བླ་མས་རྗེས་སུ་བཟུང༔ ད་ལྟའི་ལས་འཕྲོ་རྣམ་དཀར་ཆོས་ལ་སད༔ པདྨས་རྗེས་བརྩེ་དགོངས་པའི་གཏེར་ལ་དབང༔ རིག་འཛིན་ཆོས་དབང་ས་ར་ཧི་ཏ་ལ༔ གསོལ་བ་འདེབས་སོ་བྱིན་རླབས་ཡེ་ཤེས་སྩོལ༔ བདག་གི་སྐྱེ་བའི་ཕྲེང་བ་ཐམས་ཅད་དུ༔ མཆོག་གསུམ་བླ་མས་རྗེས་སུ་འཛིན་གྱུར་ཅིག༔ གནས་སྐབས་བར་ཆད་བདུད་ཀྱི་གཡུལ་ལས་རྒྱལ༔ མཐར་ཐུག་དོན་གཉིས་ལྷུན་གྱིས་གྲུབ་པར་ཤོག༔ ཅེས་པའི་གསོལ་འདེབས་སྨོན་ཚིག་འདི༔ བཙུན་པ་རིག་འཛིན་རྡོ་རྗེ་ཡི༔ ཐུགས་ཀྱི་བཞེད་པ་བསྐང་བའི་ཕྱིར༔ བླ་གཟུགས་གཞན་ཕན་བཟང་པོས་སྤེལ༔ སརྦ་མངྒ་ལམ༔