ལེའུ་བཅུ་གསུམ་པ།

༈ དེ་ལྟར་གཞི་ལམ་གྱི་མཚན་ཉིད་ལེགས་པར་རྟོགས་པར་བྱས་ནས། མཐར་ཕྱིན་པར་གྱུར་ཚེ་འབྲས་བུ་སྐུ་དང་ཡེ་ཤེས་ཇི་ལྟར་ཐོབ་ཚུལ་ནི། གཞན་གང་ལས་ཀྱང་མ་བྱུང་སྟེ་རང་གི་སེམས་ཀུན་གཞིའི་རྙོགས་པ་དྭངས་ཤིང་། སེམས་ཞེས་མ་རིག་གཏི་མུག་གི་སེམས་དང་། གཞི་དེ་ལས་བྱུང་བའི་སེམས་བྱུང་ངམ་རྣམ་རྟོག་ནི་འཁོར་བའི་རྒྱུ་རྐྱེན་ལས་མ་འདས་པའི་ཕྱིར་དེ་དག་ཆོས་ཀྱི་དབྱིངས་སུ་ཞི་བ་ཡིན་ལ་གང་དུ་ངེས་མེད་ཀྱི་གཞི་ལས་གཞི་སྣང་ཅུང་ཟད་གཡོས་པའི་སྐྱོན་གྱིས་ང་བདག་ཏུ་འཛིན་པའི་བག་ཆགས་ཀྱིས་སྦགས་པའི་ཤེས་བྱའི་ཆ་འཛིན་པར་བྱེད་པའི་ཚོགས་བརྒྱད་ཉེར་ལེན་གྱི་སྤྲིན་དང་འདྲ་བ་རྣམས། རང་བཞིན་རྣམ་པར་དག་པའི་དབྱིངས་སུ་ཡེ་ཤེས་ཀྱི་སྙིང་པོའི་ཉི་མ་ནུབ་པ་མེད་པ་ནི། སྒྲིབ་པ་གང་ཡང་མེད་པ་རང་བཞིན་ཀྱི་འོད་དུ་གསལ་བའི་གློ་བུར་གྱི་དྲི་མ་མུན་པ་དང་འདྲ་བའི་ཆ་དང་བཅས་པ་སྤང་པ་ནི། ངོ་བོ་ཡེ་ནས་དག་པ་དང་། གློ་བུར་གྱི་དྲི་མ་དག་པ་སྟེ། དག་པ་གཉིས་ལྡན་ནི་བྱང་ཆུབ་མཆོག་གི་དངོས་པོར་གྲུབ་པ་ལ་གདོད་མའི་སངས་རྒྱས་ཞེས་སྨོན་པ་མེད་པའི་དབྱིངས་འགྱུར་བ་མེད་པ་སྟེ་ཉ་རྒྱས་ཟླ་བ་སྤྲོས་པ་ཞེས་འོད་དཀར་ཕྱིར་གསལ་བ་ཅན་ཡང་། སྟོང་གི་ཆ་ལ་འོད་དཀར་དབྱིངས་སུ་ནུབ་པ་ལྟར། རྣམ་པ་ཀུན་ཏུ་མི་རྟོག་ཅིང་ཆོས་ཉིད་ལ་འཕོ་འགྱུར་མེད་ཅིང་དབྱིངས་ཀྱི་རྟག་པ་ཞེས་ནམ་མཁའ་འཕོ་འགྱུར་དང་གཞོམ་གཞིག་བྲལ་བ་ནི་མི་འགྱུར་རྡོ་རྗེའི་སྐུ་ཞེས་འདོད་དོ། །རྣམ་པ་ཀུན་གྱི་མཆོག་ལྡན་ནི། ཤེས་རབ་སྟོང་པ་ཉིད་རྣམ་པར་རྟོག་པ་ཐམས་ཅད་ཞི་བའི་དབྱིངས་ཡིན་ལ། དེ་ནི་སྟོབས་བཅུ་སོགས་སངས་རྒྱས་ཀྱི་ཡོན་ཏན་རྒྱ་མཚོ་ཀུན་མངོན་པར་ཆུབ་ཀྱང་། སྣང་ཆ་ལ་ངོ་བོར་མ་འདྲེས་ཤིང་སྤང་རྟོགས་ཀྱི་ཡོན་ཏན་རྣམས་ཡོངས་སུ་རྫོགས་པའི་ཆ་ནས་གཞལ་བ་མངོན་པར་བྱང་ཆུབ་ཀྱི་སྐུར་བཞག་པའོ། །དེ་ཡང་ཤེས་བྱའི་ཡུལ་ལ་བློའི་འཇུག་པ་ཞི་ཞིང་། ཤེས་བྱེད་ཀྱི་བློ་ལ་ཡང་གཉིས་སུ་འཛིན་པའི་ཀུན་རྫོབ་སྤངས་པ་ཡིན་པས། སོ་སོ་རང་གི་རིག་པ་གཉིས་འཛིན་ལས་གྲོལ་བ་དེ་རྟག་ཆད་ཀྱི་མཐར་མ་ལྷུང་ཞིང་། ཀུན་རྫོབ་ཀྱི་ཆོས་རྣམས་ནང་དབྱིངས་སུ་ཐིམ་པའི་རང་གདངས་ཐིམ་ལ་མ་རྨུགས་པ་ཤིན་ཏུ་ཕྲ་བའི་ཡེ་ཤེས་ནི་ཇི་ལྟ་བ་དོན་དམ་མཁྱེན་པ། ཇི་སྙེད་པ་ཀུན་རྫོབ་གཟིགས་པ་སྟེ། མཁྱེན་ཆ་འགག་པ་མེད་པ་སྐུ་དང་ཡེ་ཤེས་ཀྱི་རྟེན་དུ་གྱུར་པ་ནི་ཤིན་ཏུ་མཉམ་པར་བཞག་པ་སྟེ། འདུ་འཛི་དང་ལེ་ལོའི་དབང་དུ་མ་གྱུར་པའི་མཉམ་རྗེས་རིས་མེད་ཀྱི་རྟོགས་པ་ཐོབ་པ་རྣམས་ཀྱིས་མཐོང་བ་ཡིན་ལ། གང་ལ་ཞི་བ་ཆོས་ཀྱི་སྐུ་ཞེས་བརྗོད་པའི་སོ་སོ་རང་གིས་རིག་པར་བྱ་བ་རྒྱལ་བའི་ཁམས་བདེ་གཤེགས་སྙིང་པོ་ནི། གཅིག་ཅེས་ཚུར་བཅད་རྒྱུ་དང་། དུ་མར་ཞེས་ཕར་བཅད་རྒྱུ་མ་ཡིན་ཞེས། དངོས་པོ་དང་། དངོས་མེད་ལས་ཀྱང་འདས་པ་ནམ་མཁའ་ལྟར་རྣམ་པར་མི་རྟོག་པ་མཚན་མའི་ཆོས་ཀྱིས་གོས་པ་མེད་ཅིང་རྣམ་འགྱུར་དང་སྤྲོས་པ་ཐམས་ཅད་ཞི་བའི་དབྱིངས་དེ་ཉིད། ངག་གིས་བརྗོད་པའི་ཡུལ་ལས་འདས་ཤིང་། དོན་དམ་གྱི་བདེན་པས་བསྡུས་པ་ཡིན་ལ་རྟོག་དཔྱོད་རྣོན་པོ་དང་། ཐ་སྙད་གཏན་ཚིགས་ཀྱིས་ཀྱང་མི་མཚོན་ལ། བློའི་བསྒྱུར་བཀོད་དང་ཐེ་ཚོམ་དང་སྙམ་བྱེད་སོགས་དཔེ་དང་འགལ་བའི་ཕྱིར་ས་བཅུའི་དབང་ཕྱུག་སྟེ་བྱང་ཆུབ་སེམས་དཔའ་ཆེན་པོ་དག་གིས་ཀྱང་སྤྱོད་ཡུལ་མིན་ཞིང་། འདྲེན་པ་ཞེས་སངས་རྒྱས་རྣམས་ལ་མངོན་སུམ་དུ་གྱུར་པའི་གནས། ཟབ་ཞི་སྟེ་རྫོགས་པ་ཆེན་པོའི་ལྟ་བསྒོམ་གཞོན་ནུ་བུམ་པའི་ཁང་བཟང་མཛེས་པའི་ནང་ན་དུས་གསུམ་གྱི་སངས་རྒྱས་རྣམས་ནི་རྟག་པར་བཞུགས་ཀྱང་། རྣམ་པའི་ཆ་ནས་གཉིས་འཛིན་བྲལ་ཕྱིར་གཅིག་གིས་གཅིག་མི་གཟིགས་པ་ལྟར་ཡང་རང་བཞིན་སྤྲོས་བྲལ་གྱི་དབྱིངས་ན་དགོངས་པའི་ཀློང་གཅིག་ཏུ་འཁྱིལ་བ་ཡིན་ཞིང་། མཁྱེན་པའི་ཆ་འགག་པ་མེད་པའི་རང་གདངས་རྙོགས་པ་མེད་པ་ལས། ཐུགས་རྗེའི་རྩལ་ཕྱིར་གསལ་བ་ལོངས་སྤྱོད་རྫོགས་པའི་སྐུ་ཡིན་ཏེ། དེ་ཡང་གནས་དང་དུས་དང་སྟོན་པ་དང་ཆོས་དང་འཁོར་ཏེ་ངེས་པ་ལྔ་ལྡན་སྐུ་དང་ཞིང་ཁམས་ཞེས་པ་ནི། ནམ་མཁའི་གར་ཁྱབ་སངས་རྒྱས་ཀྱི་ཆོས་སྐུ་དང་ལོངས་སྐུའི་ཁྱབ་ཅིང་། སེམས་ཅན་གྱིས་གར་ཁྱབ་སྤྲུལ་སྐུ་དང་ཕྲིན་ལས་ཀྱི་ཁྱབ་པ་ཡིན་ལ། སྐུ་གསུམ་གྱི་རྒྱལ་བ་དེ་རྣམས་མཚན་བཟང་པོ་སོ་གཉིས་དང་། དཔེ་བྱད་བཟང་པོ་བརྒྱད་ཅུ་སོགས་སངས་རྒྱས་ཀྱི་ཡོན་ཏན་རྒྱ་མཚོའི་བདག་ཉིད་ཅན་དུ་བཞུགས་པའོ། །གནས་ནི་ལྷུན་གྲུབ་ལོངས་སྤྱོད་རྫོགས་པ་སྟེ། འོག་མིན་སྟུག་པོ་བཀོད་པའི་ཞིང་ཁམས་ཞེས་མཐའ་དབུས་ལས་འདས་པ། ཡེ་ཤེས་ལྔའི་རང་མདངས་ཀྱི་འོད་དང་འོད་ཟེར་གསལ་འཚེར་འབར་བ་ཡང་། མཁའ་དབྱིངས་དབང་པོའི་མཚོན་ཆ་སྟེ་འཇའ་ཚོན་སྣ་ལྔས་བཀབ་པ་བཞིན་དང་། དེ་ཡང་མནན་ན་ནེམ་ཞིང་བཏེགས་ན་འཕར་བ་ལྟ་བུའི་བློས་གཞལ་དུ་མེད་པའི་ཁང་མཛེས་ཕྱོགས་བཞི་སྒོ་འཕར་རྣམ་པ་བཞི་དང་ལྡན་པ་རྟ་རྐང་རྣམ་པ་བརྒྱད་དང་ལྡན་ཞིང་ཡེ་ཤེས་ལྔའི་རྩིག་པ་ ཕ་གུ་དང་ དྲྭ་ཕྱེད་དང་ མདའ་ཡབ་དང་ པུ་ཤུ་ཅན་གྱི་སྣམ་བུར་འདོད་པའི་ཡོན་ཏན་གྱི་བདག་ཉིད་མིག་ཡངས་མ་སྟེ། མཆོད་པའི་ལྷ་མོ་སྣ་ཚོགས་བདེ་སྟོང་གི་མཆོད་སྤྲིན་རྩེ་ཞིང་དགའ་བའི་རྣམ་འགྱུར་གཡོ་བའི་ཆོ་འཕྲུལ་ཅན་རྣམས་དང་། གཞན་ཡང་རྔ་ཡབ་ འཕན་གདུགས་ རྒྱལ་མཚན་ནོར་བུའི་ཏོག་གིས་མཛེས་པ་ བླ་བྲེ་དང་ ཟར་ཚགས་དང་ གཙང་ཁང་ཕྱུར་བུར་མཛེས་པ་ ཆུ་ཞིང་སྲིད་དུ་མི་མངོན་པར་གང་དུ་བལྟས་པ་སྣང་ཡུལ་དུ་གང་ཡང་གྲངས་ཀྱིས་མི་གཏུགས་ནམ་མཁའི་དབྱིངས་སྣོད་དུ་གྱུར་པ་བཞིན་དུ། རྟེན་གཞི་གཞལ་མེད་ཁང་པ་རེ་རེའི་ནང་། བརྟེན་པའི་གཙོ་བོ་རྒྱལ་བ་རིགས་མཆོག་ལྔའི་གདན་ཁྲི་ནི་འཕྲོག་བྱེད་ནི་སེང་གེ་དང་། གཉིས་འཐུང་གླང་པོ་ཆེ། ཅང་ཤེས་རྟ་ ཟློས་གར་ཅན་རྨ་བྱ་ ཤང་ཤང་ཏེའུ་རྣམས་ནི་སྔོན་གྱི་བྱང་ཆུབ་སེམས་དཔའ་ལམ་ལ་སློབ་པ་རྣམས་ཀྱི་གདན་ཁྲིའི་མཛེས་རྒྱན་བྱེད་པའི་སྨོན་ལམ་བཏབ་པ་ལས་བྱུང་བ་མ་གཏོགས་དུད་འགྲོ་རང་རྒྱུད་པ་མིན་པ་ཤེས་དགོས་སོ། །དེ་ལྟར་རིན་པོ་ཆེ་སྣ་ཚོགས་ཀྱི་ཁྲི་རྒྱན་དང་བཅས་པའི་སྟེང་ན། ཆུ་སྐྱེས་ཞེས་སྣ་ཚོགས་པདྨ་དང་། ཉི་མ་དང་ཟླ་བའི་གདན་སུམ་བརྩེགས་ཀྱི་སྟེང་ན། འདས་མ་འོངས་ད་ལྟ་སྟེ་དུས་གསུམ་གཞི་ལ་རྫོགས་པ་ཀུན་ཏུ་བཟང་པོའི་དུས་ཞེས་འཕོ་འགྱུར་བྲལ་བའི་མཚན་རྫོགས་ཀྱི་སྟོོན་པ་ལྔ་ནི་ རྣམ་པར་སྣང་མཛད་དང་ མེ་བསྐྱོད་རྡོ་རྗེ་དང་ རིན་ཆེན་འབྱུང་ལྡན་དང་ སྣང་བ་མཐའ་ཡས་སམ་འོད་མཚན་སྟོང་འབར་དང་ དོན་ཡོད་གྲུབ་པ་ལྔ་ནི། རང་རང་རིགས་ཀྱི་ཡུམ་དང་བཅས་པ་རྣམས་ནི་ཁ་སྦྱོར་བདུན་གྱི་བདག་ཉིད་ཆེན་པོར་བཞུགས་པ་ཡིན་ལ། སྟོན་པ་རང་ལས་མི་གཞན་པའི་སེམས་དཔའ་དང་སེམས་མའི་འཁོར་རྣམས་དང་སྒོ་བ་བཞི་དངདེ་བཞིན་སོ་སོའི་ཡུམ་དང་བཅས་པའོ། །དེ་ཡང་རང་བཞིན་རྫོགས་པ་ཆེན་པོའི་ཆོས་ཀྱི་འཁོར་ལོ་ནི། སྒྲ་ཚིག་དང་མཚན་མའི་ཡུལ་ལས་འདས་པར་བསྐོར་ཞིང་། གཞལ་ཡས་ཁང་ཆེན་པོའི་སྟེང་ཁང་ཞི་བ་བྱང་ཆུབ་སྙིང་པོའི་གནས་ཞེས་བྱ་བ་ན། དབང་མཛད་ཞི་བའི་ལྷ་ཚོགས་བཞི་བཅུ་རྩ་གཉིས་ལས། དམ་པའི་སྟངས་དཔྱལ་གཉིས་ནི་ཞེས། ཀུན་བཟང་ཡབ་ཡུམ་ཡིན་ལ། དེ་ནི་ཞི་བའི་ལྷ་ཚོགས་ཀྱི་སྤྲུལ་གཞི་སྟེ། ཀུན་ལ་ཞེས་འཁོར་འདས་གཉིས་ཀར་ཁྱབ་པར་བརྡལ་བས་ཆོས་ཀྱི་སྐུ་ཡིན་ལ། འགྲོ་བ་རིགས་དྲུག་སོ་སོའི་གནས་སུ་སྤྲུལ་པ་དེ་དག་གི་དོན་མཛད་པའི་རིག་པའི་སྐྱེས་བུ་བཅོམ་ལྡན་འདས་ཐུབ་དྲུག་ནི་གོང་གི་རྒྱལ་བ་རིགས་ལྔའི་སྤྲུལ་པ་ཤར་བ་ཡིན་ཞིང་། རང་སྣང་ལོངས་སྐུའི་ཞིང་ན་ལྷ་ཚོགས་སུམ་ཅུ་རྩ་བཞི་ཡོད་པ་ལས། གཙོ་བོ་རིགས་ལྔ་ཡབ་ཡུམ་བཅུ་ལ་སེམས་དཔའ་སེམས་མ་བཅུ་དྲུག་དང་། སྒོ་བ་ཡབ་ཡུམ་བརྒྱད་དང་ཉེར་བཞི་པོ་དེ་ནི་འཁོར་གྱི་ཚུལ་དུ་ཡོད་པའོ། །དེ་རྣམས་དོན་ལ་ཕུང་པོ་ལྔ་རྒྱལ་བ་རིག་ལྔ་ཁམས་ལྔ་ཡུམ་ལྔ་དབང་ཡུལ་སྐྱེ་མཆེད་སེམས་དཔའ་སེམས་མ་སྒོ་བཞི་སྒོ་བ་ཡབ་ཡུམ་བརྒྱད་ལ་སོགས་པར་གནས་སུ་དག་པའི་ལྷ་རྣམས་གདན་གསུམ་ཚང་པའི་དཀྱིལ་འཁོར་ཆེན་པོ་ཡིན་ནོ། །འདི་དག་ནི་ཞི་ཁྲོ་སྒྱུ་འཕྲུལ་དྲྭ་བ་དང་། སངས་རྒྱས་མཉམ་སྦྱོར་བླ་ན་མེད་པའི་རྒྱུད་ལས་ལུས་གྲུབ་ཀྱི་དཀྱིལ་འཁོར་ཇི་སྙེད་ཅིག་བསྟན་པ་དང་རྣམ་དག་མཚུངས་བ་ཡིན་ལ། གཞན་ཡས་ཁང་ཆེན་པོའི་འོག་ཁང་ཚོགས་ཆེན་འདུས་པའི་ཕོ་བྲང་ནི། འབར་བའི་གཞལ་ཡས་ཏེ་དྲག་པོའི་གཞལ་ཡས་ཁང་ཕྱི་ནང་རིམ་པ་དགུ་དང་ལྡན་པ་ལ། སྒོ་ཁྱམས་ཡང་དེ་བཞིན་ཡོད་པའི་དགུ་པའི་ཕྱི་མར་རྒྱུའི་རྟ་བབ་སྒོ་བདུན་དང་། འབྲས་བུའི་ཆོས་ཀྱི་མཚོན་བྱེད་རྟ་བབ་སྒོ་སྟེང་ཡོད་པའི་རྒྱུ་འབྲས་གཉིས་ལྡན་ཚུལ་གྱིས། ཕོ་བྲང་དབུས་མའི་ནང་གི་འོག་གཞི་རྡོ་རྗེ་བྲག་ཆེན་དང་པདྨ་སྟོང་བརྡལ་གྱི་གཞི་ལ་ཐབས་ཤེས་ཉི་ཟླ་བརྩེགས་པའི་གདན་ལ། དབང་ཕྱུག་ཁྱོ་ཤུག་ནི་ཞེས་པ་ཡང་། ལྷ་ཆེན་བརྒྱད་ཀླུ་ཆེན་བརྒྱད། གཟའ་ཆེན་བརྒྱད་དེ་དྲེགས་པ་ཕོ་མོ་ཉི་ཤུ་རྩ་བཞིའོ། །ཕོ་རྣམ་ཁ་སྦུབས་དང་། མོ་རྣམས་གན་རྐྱལ་བསྒྱེལ་བའི་སྟེང་དུ་དཔའ་གཏུམ་སྟག་དང་། འཇིགས་བྱེད་སེང་གེ། གདུག་པ་གཟིག་དང་ནི། གཏུམ་པ་དོམ་དང་། སྟོབས་ཆེན་གླང་པོ་དང་། བརྗིད་པའི་མ་ཧེ་དང་། འཛིན་པའི་ཆུ་སྲིན་དང་། ཞེ་སྡང་ལྟོ་འགྲོ་སྟེ། བྱོལ་སོང་གཙོ་བོ་བརྒྱད་པོ་དེ་ཡང་རིག་པ་འཛིན་པའི་ལམ་ལ་སྦྱངས་མཐར་ཤེས་བྱའི་སྒྲིབ་པ་འདག་པའི་ཕྱིར་ལྷ་རྣམས་ཀྱི་གདན་བྱས་ཏེ་དེ་དག་རེ་རེས་ཀྱང་། དྲེགས་པ་ཕོ་མོ་དེ་དག་གི་རྒྱུད་ཀྱི་ཉོན་མོངས་པ་སྦྱང་བའི་ཐབས་སུ་ཡན་ལག་བཞིའི་སྡེར་མོས་བཟུང་ཞིང་མནན་པའི་ཚུལ་བྱས་པ་ནི་གཞུང་གི་དགོངས་དོན་ཡིན་ལ། དེ་ཡང་དྲེགས་པ་ཕོ་མོ་དེ་དག་རྣམས་ཁྲོ་སྡང་གི་སེམས་ཀྱིས་མ་མིན་པར་ཞི་ཞིང་བྱམས་པའི་ཐུགས་ཀྱིས་དེ་དག་གི་ལས་ཉོན་རྒྱུན་གཅོད་པའི་ཕྱིར། དེ་དག་ཅུང་ཟད་ཀྱང་འགུལ་དབང་མེད་པར་བརྫིས་པའི་སྟེང་དུ་བཞུགས་པའོ། །དེ་ལྟར་གདུལ་བྱ་འདུལ་བྱེད་ཆེད་དུ་ཁྲི་གདན་སོགས་ཡོངས་རྫོགས་པའི་སྟེང་དུ། འཁོར་བ་དང་མྱ་ངན་ལས་འདས་པ་ཀུན་གྱི་སྤྱི་དཔལ་དུ་གྱུར་པ་བཅོམ་ལྡན་འདས་སྲིད་ཞིའི་ཁམས་ན་ཆེ་བའི་ཆེ་མཆོག་ཧེ་རུ་ཀ་སྐུ་མདོག་ཨིནྡྲ་ནཱི་ལའི་མདངས་ཞེས་རྣམ་མཁའ་གཡའ་དག་པ་ལྟ་བུ་ལ། ཉི་མ་བྱེ་བའི་འོད་ལས་ཀྱང་ལྷག་པའི་གཟི་བརྗིད་ལྡན་པའི་བདུན་གསུམ་ཉི་ཤུ་རྩ་གཅིག་གི་ཞལ་རྣམས་རབ་ཏུ་འཇིགས་ཤིང་གདང་པ། ཞབས་བརྒྱད་བྱོལ་སོང་གཙོ་བོ་བརྒྱད་ཀྱི་གདན་ལ་འགྱིང་བ། གཡས་གཡོན་ཕྱག་ནི་བཞི་བཅུ་རྩ་གཉིས་ན་བདེ་གཤེགས་ཞི་བའི་ལྷ་ཚོགས་བཞི་བཅུ་རྩ་གཉིས་པོ་ཡབ་རྣམས་གཡས་དང་ཡུམ་རྣམས་གཡོན་དུ་བསྣམས་ཤིང་ངོམ་པའོ། །གནམ་ཞལ་ཡུམ་མཆོག་ཡང་དབུ་དགུ་ཕྱག་བཅོ་བརྒྱད་དེ་རྩ་བའི་ཕྱག་གཉིས་ཀྱིས་རྡོ་རྗེ་དང་དུང་ཁྲག་འཛིན་པ། ཕྱག་ལྷག་མ་གཡས་རྣམས་གནས་ཀྱི་ཀོའུ་རི་བརྒྱད་དང་། གཡོན་པ་རྣམས་ནི་ཡུལ་གྱི་སེང་ཧ་བརྒྱད་མུ་ཁ་ལ་སོགས་མ་མོ་དང་ཕྲ་མེན་རྣམས་བསྣམས་པ། ཡབ་ཡུམ་ཁྲོ་མཁར་ཚུལ་ལམ་ཞེས་པ་ནི་བདུད་རྩི་སྨན་སྒྲུབ་ཀྱི་གཞུང་ལྟར་རང་བྱུང་རྣམ་དག་བདུད་རྩིའི་ཕོ་བྲང་སྟེང་འགྲོ་འདུལ་ཁྲོ་བོའི་དཀྱིལ་འཁོར་དང་། སྐུ་གདུང་འབར་བའི་དཀྱིལ་འཁོར་དང་། མཁའ་མཉམ་ཀློང་གི་དཀྱིལ་འཁོར་དང་། འཆི་མེད་རྡོ་རྗེའི་དཀྱིལ་འཁོར་ཏེ། དཀྱིལ་འཁོར་ལྔ་དང་སྦྱོར་བ་བརྒྱད་སྨན་སྒྲུབ་གཞུང་ཤེས་པར་བྱེད་པ་ཁོ་ནའོ། །ཡང་ན་བཀའ་བརྒྱད་རྣམས་གསུམ་གྱི་གཞུང་བཞིན་ཡབ་ཡུམ་བདེ་སྟོང་ཟུང་འཇུག་གི་ཚུལ་དུ་མཉམ་པར་སྦྱོར་ཞིང་། སྲིད་པ་འགྲོ་བ་རིགས་དྲུག་དང་། ཞི་བའི་ལྷ་སྐུ་གསུམ་རྒྱལ་བའི་ཞིང་ཁམས་ཀྱི་ཆོས་ཁམས་མཐའ་ཡས་མ་ལུས་པ་བཅོམ་ལྡན་འདས་ཀྱི་ཞབས་ཀྱི་གདན་ཁྲི་ནས་བཟུང་། དབུ་རྒྱན་གྱི་འཁོར་ལོའི་བར་ལ་རང་བཞིན་གྱིས་རྫོགས་ཞེས་པ་ཡང་། འཁོར་བའི་ཆགས་གནས་དང་མཚུངས་པའི་ཞབས་ཀྱི་གདན་ཁྲིའི་དྲེགས་པ་ཉེར་བཞི་དང་། དུག་ལྔ་དུག་གསུམ་མམ་རྣམ་པར་ཤེས་པ་ཚོགས་བརྒྱད་གནས་སུ་དག་པའི་མཚོན། བྱོལ་སོང་གཙོ་བརྒྱད་ལ་སོགས་པ་རེ་ཞིག་འཁོར་བ་དང་ཆོས་མཚུངས་ཡང་དོན་ལ་དེ་ལྟར་མ་ཡིན་པས་ཁྱད་ཤེས་པར་བྱས་ནས། སོ་སོར་ཐར་པ་དང་། བྱང་ཆུབ་སེམས་དཔའ་དང་། རིག་པ་འཛིན་པ་སྔགས་ཀྱི་གཞི་ལམ་འབྲས་བུའི་ཆོས་རྣམས་དབུ་རྒྱན་འཁོར་ལོའི་བར་ལ་རང་བཞིན་གྱིས་རྫོགས་པའོ། །དབང་མཆོག་བཅོམ་ལྡན་འདས་དཔལ་ཆེན་པོ་དང་ནི་ཧེ་རུ་ཀ་དཔལ་དགུ་ནི། བཀའ་བརྒྱད་རྣམ་གསུམ་གྱི་གཞུང་བཞིན་ཕྱོགས་བཞི་མཚམས་བརྒྱད་ཀྱི་དཀྱིལ་འཁོར་བརྒྱད་ལ་འགོད་རྒྱུ་ཡིན་པའོ། །དེ་བཞིན་དུ་གློ་འབུར་བཞི་དང་གྲུ་ཆད་རྣམ་པ་བཞི་ལ། རྣམ་པར་ཤེས་པ་ཚོགས་བརྒྱད་གནས་སུ་དག་པའི་མ་མོ་ཀོའུ་རི་ལ་སོགས་བརྒྱད་དང་། དཀྱིལ་འཁོར་དང་པོ་ཞེས་དཔལ་ཆེན་གཙོ་དགུ་བཞུགས་པའི་ཁྱམས་དང་པོར་སིང་ཧ་མུ་ཁ་ལ་སོགས་ཕྲ་མེན་བརྒྱད་དང་། གཞལ་ཡས་ཁང་གཉིས་པའི་ཁྱམས་ལ། སྤོར་མ་རྣམ་པ་བརྒྱད་དང་། དེ་བཞིན་དུ་གསུམ་པའི་ཁྱམས་ལ་དབང་མོ་ཉི་ཤུ་རྩ་བརྒྱད་རྣམས་ཡིན་ལ། ཁྱམས་གསུམ་པོ་དེ་ལ་ཕྱོགས་བཞིར་སྒོ་བཞི་བཞི་དང་ལྡན་པ་ཀུན་ལ་རང་རང་གི་སྒོ་བ་བཞི་བཞིར་ལྡན་པ་དེ་དག་ཀྱང་། འབར་བའི་རྣམ་རོལ་དང་གར་དགུའི་ཉམས་ཀྱིས་བརྗིད་པ་འདི་དག་ནི་རང་སྣང་ལོངས་སྐུའི་དཀྱིལ་འཁོར་ཡིན་ཏེ། གཞི་སྣང་ལྷུན་གྲུབ་མྱ་ངན་ལས་འདས་པའི་དོན་གྱི་འོག་མིན་ཡིན་ནོ། །གཞལ་ཡས་ཁང་བཞི་པའི་ཁྱམས་ལ་མཁའ་འགྲོ་སུམ་ཅུ་རྩ་གཉིས་དང་། དེ་བཞིན་དུ་ལྔ་པའི་ཁྱམས་ལ་མ་མོ་བདུན་དང་སྲིང་མོ་བཞི་དང་། དྲུག་པའི་ཁྱམས་ལ་གིང་ཆེན་བཅུ་དྲུག་ཚན་གསུམ་སྟེ་བཅོ་བརྒྱད་དང་། བདུན་པར་ཁྲོ་བོ་ཡབ་ཡུམ་བཅུ་ཕྲག་དྲུག་དང་། བརྒྱད་པར་ཕོ་ཉ་ཉིས་བརྒྱ་དང་བཞི་བཅུ་སྟེ་ཡོངས་སུ་ཚང་བ་དང་། དགུ་པའི་ཁྱམས་ལ་མ་མོ་དྲུག་ཅུ་རྩ་བཞི་རྣམས་བཞུགས་པའོ། །དེ་དག་རྣམས་ནི་ལོག་འདྲེན་རཱུ་ཏྲ་གདུལ་བའི་ཕྱིར་དུ་སྤྲུལ་པས་བསྡུས་པའི་ཕྱིར། བགེགས་སོགས་གདུལ་བྱ་སོ་སོའི་རང་ངོར་སྣང་བ་སྟེ། དེ་ཕྱིར་རང་སྣང་གི་འོག་མིན་ལོངས་སྤྱོད་རྫོགས་པའི་དཀྱིལ་འཁོར་མིན་ལ། ཆོས་སྐུའི་ཡེ་ཤེས་ཕྱི་རུ་གསལ་བའི་གདངས་ལས། ཕུན་སུམ་ཚོགས་པ་ལྔ་ལྡན་ནི། གནས་ཕུན་སུམ་ཚོགས་པ་དབུས་སྟུག་པོ་བཀོད་པ། ཤར་མངོན་པར་དགའ་བ། ལྷོར་དཔལ་ལྡན་ ནུབ་བདེ་ཆེན་ བྱང་ལས་རབ་གྲུབ་པའོ། །སྟོན་པ་ཕུན་སུམ་ཚོགས་པ་དཔལ་རིགས་ལྔའི་སངས་རྒྱས་སོ། །འཁོར་ཕུན་སུམ་ཚོགས་པ་ཉིད་ལས་མི་གཞན་པའི་འབྲས་བུའི་སེམས་དཔའ་འོ། །ཆོས་ཕུན་སུམ་ཚོགས་པ་ཐེག་ཆེན་འབའ་ཞིག་གོ། དུས་ཕུན་སུམ་ཚོགས་པ་བསྐལ་པ་ཇི་སྲིད་གནས་ཀྱི་བར་དུའོ། །དེ་དག་ནི་ལོངས་སྐུར་རྫོགས་པའི་གནས་སོ། །གང་དུ་ཉོན་མོངས་པའི་སྒྲིབ་པ་ཤེས་བྱའི་སྒྲིབ་པ་སྟེ། དེ་གཉིས་ཀར་གཏོགས་པའི་སྒྲིབ་པ་མཐའ་དག་སྤངས་པར་གྱུར་པའི་གནས་ནི་སངས་རྒྱས་ཁོ་ནའི་རྒྱུད་ཀྱིས་བསྡུས་པའི་རོལ་པ་ཉིད་ཀྱི་ཕྱིར་གཙོ་འཁོར་མཆོག་དམན་ཐམས་ཅད་དགོངས་པ་མཉམ་པ་ཉིད་ལས་མ་མཆིས་སོ། །གཙོ་འཁོར་ཀུན་གྱི་ཐུགས་ཀྱང་རྣམ་པར་མི་རྟོག་ཅིང་། གསུང་ནི་བརྗོད་པ་དང་བྲལ་ཞིང་། སྐུ་ནི་མཚན་དང་དཔེ་བྱད་ཡོངས་སུ་རྫོགས་ཤིང་། རང་སྣང་ཡེ་ཤེས་མཐོང་བ་དག་པའི་སྤྱན་ཏེ། རང་རིག་སྒྲིབ་གཡོགས་དང་བྲལ་བའི་བལྟ་བྱ་ལྟ་བྱེད་མེད་པའི་དོན་རྟོགས་པའི་ངང་ནས་གཅིག་གིས་གཅིག་གཟིགས་པའི་ཚུལ་ལ་ནམ་ཡང་སྒྲིབ་པ་མེད་དོ། །དུས་གསུམ་གྱི་རྒྱལ་བ་རྣམས་ཀྱི་སྤྱོད་ཡུལ་རྣམ་པར་དག་པ་ནི། དེའི་གོང་ན་གཞན་མེད་པའི་ཕྱིར་དང་། བླ་ན་མེད་པའི་ཕྱིར་དང་། སྲིད་པ་དང་ཞི་བས་མ་བསྡུས་པའི་ཕྱིར་ན། དག་པའི་སེམས་ཅན་ཆེན་པོ་རྣམས་ནི་ས་བཅུའི་སེམས་དཔའ་རྣམས་ཡིན་ཏེ། དེ་རྣམས་ཀྱིས་ཀྱང་མཐོང་བར་ཇི་བཞིན་མི་ནུས་ཤིང་། རྒྱལ་བའི་ཡེ་ཤེས་དང་འགལ་བའི་སྒྲིབ་ཆ་ད་དུང་མ་སྤང་པའི་ཕྱིར། འདས་པ་དང་། མ་འོངས་པ་དང་། ད་ལྟ་སྟེ། དུས་གསུམ་འདི་ཡིན་གྱི་ངེས་པ་ལས་འདས་པའི་འོག་མིན་ཆེན་པོ་ན་བཞུགས་པའི་སངས་རྒྱས་འདས་པའི་དུས་དང་། མ་འོངས་པ་ ད་ལྟར་གྱི་དུས་ཏེ་གསུམ་དང་། མཉམ་པ་ཉིད་ཀྱི་དུས་དང་བཞིའི་བདག་ཉིད་ཅན་དེ་དག་ནི་གཙོ་འཁོར་ངོ་བོར་མཐུན་པའི་རང་སྣང་ངོ་ཞེས་པ་ནི་གཙོ་འཁོར་རྣམས་ངོ་བོ་གཅིག་ལས་གཞན་དུ་མ་གྱུར་པའི་དོན་ནོ། །དེ་ཉིད་ཀྱི་ངང་ལས་སེམས་ཅན་རྣམས་གདུལ་བའི་ཕྱིར་དུ། འདུལ་བྱེད་སྟོན་པ་རྣམ་པ་གསུམ་དུ་བཀོད་པ་ནི། རང་བཞིན་སྤྲུལ་པ་དང་། འགྲོ་བ་རིགས་དྲུག་འདུལ་ཕྱིར་སྤྲུལ་པ་དང་། སྣ་ཚོགས་གང་ལ་གང་འདུལ་དུ་སྤྲུལ་པ་དང་གསུམ་ལས། རང་བཞིན་སྤྲུལ་པ་ནི། རྒྱལ་བ་རྣམས་ཀྱི་ཡེ་ཤེས་ཀྱི་སྣང་བ་འོག་མིན་གྱི་དབྱིངས་སྣང་ལོངས་སྐུ་ནི། རྫོགས་པ་ཆེན་པོའི་ཁྱད་ཆོས་ཡིན་ཏེ། དཔེ་བྱད་ཀྱི་མངོན་རྟོགས་དྭངས་ཤེལ་གྱི་ནང་དུ་འཕྲོས་པ་ལྟ་བུས་གཟུགས་བརྙན་ནི་ཕྱེད་སྤྲུལ་ལོངས་སྐུའི་གནས་སམ། རང་བཞིན་སྤྲུལ་སྐུའི་ཞིང་ཁམས་ཡིན་ཏེ། དེ་ཡང་དབུས་ན་འོག་མིན་སྟུག་པོ་བཀོད་པ། ཤར་མངོན་པར་དགའ་བ། ལྷོ་དཔལ་དང་ལྡན་པ། ནུབ་ན་པདྨ་བརྩེགས་པ། བྱང་ན་ལས་རབ་རྫོགས་གྲུབ་པ་རྣམ་པ་ལྔ་གཟུགས་ཀྱི་རྒྱལ་པོ་སྟེ་རྣམ་པར་སྣང་མཛད་དང་། དེ་བཞིན་དུ་མངོན་དགའ་རྡོ་རྗེ་མི་བསྐྱོད་པ། ལྷོར་རིན་འབྱུང་། ནུབ་ཏུ་སྣང་མཐའ། བྱང་དུ་དོན་གྲུབ་ལ་སོགས་སྟོན་མཆོག་ལྔ་ནི། མཚན་དང་དཔེ་བྱེད་ཡོན་ཏན་རྒྱ་མཚོའི་བདག་ཉིད་ཅན་རྣམས་ནི། ཞི་བ་དང་ཁྲོ་བོ་སོགས་ཀྱི་རྣམ་འགྱུར་དཔག་ཏུ་མེད་ཅིང་། ཡེ་ཤེས་རྣམ་པ་ལྔ་པོ་རེ་རེ་ལའང་བཞི་བཞིའི་འཁོར་དང་བཅས་པའི་ཉི་ཤུ་རྩ་ལྔ་སྟེ། ཆོས་དབྱིངས་ཡེ་ཤེས་ལ་མཚོན་ན་མེ་ལོང་ མཉམ་ཉིད། སོར་རྟོགས། བྱ་གྲུབ་ཡེ་ཤེས་ཏེ། བཞི་པོ་འཁོར་གྱི་ཚུལ་དུ་ཡོད་པ་ཇི་བཞིན་གཞན་མ་རྣམས་ཀྱང་དེའི་འགྲེས་ཀྱིས་ཤེས་པར་བྱ་དགོས་ཤིང་། དེ་ཡང་ཆོས་དབྱིངས་ཡེ་ཤེས་གཡོ་བ་མེད་པ་ནི། ནམ་མཁའི་གཟུགས་བཞིན་ཀུན་རྫོབ་ཤེས་པར་བྱ་བའི་མཐའ་ལས་འདས་ཤིང་། མེ་ལོང་ཡེ་ཤེས་གཟུང་བྱ་འཛིན་བྱེད་ཀྱི་རྡུལ་དང་བྲལ་བ་ནི། མངོན་པར་འདུ་བྱ་དང་འདུ་བྱེད་མེད་བཞིན་སྣང་བ་སྣ་ཚོགས་མཆེད་པའི་གཞིར་གྱུར་ཞིང་། མཉམ་ཉིད་ཡེ་ཤེས་ནི་ཆོས་རྣམས་ཀུན་ལ་དངོས་པོ་མཚན་ཉིད་ཀྱི་དམིགས་པ་གང་ཡང་མེད་དེ། སྲིད་དང་ཞི་བ་དབྱེར་མེད་པ་ལྟར་ལགས་ཀྱང་སྤྲོས་པའི་མཚན་མ་ཞི་བའི་དབྱིངས་སུ་ཞུགས་པ་ཡིན་ཞིང་། སོར་རྟོགས་ཡེ་ཤེས་ནི་ཆོས་ཉིད་ཇི་ལྟ་བ་དང་། ཆོས་ཅན་ཤེས་བྱའི་ཇི་སྙེད་རྟོགས་པ་དང་ཐོགས་པ་མེད་པའོ། །བྱ་གྲུབ་ཡེ་ཤེས་ནི་ཕྲིན་ལས་གཞན་ལ་ཕན་པ་ཅན་ཏེེ། ཆགས་ཐོགས་སྤང་པའི་མཛད་པ་ལྷུན་གྱིས་གྲུབ་པར་འབྱུང་ཞིང་། འཁོར་ནི་ས་བཅུ་ཐོབ་པའི་བྱང་ཆུབ་སེམས་དཔའ་འབའ་ཞིག་ཡིན་ལ། སྐུ་ཡི་ཆོས་རྣམས་མཇལ་བའི་སྟེ་རྟོགས་པའི་འོད་ཟེར་བཀྱེ་བས་བྱད་ཀྱི་གྲིབ་མ་མེ་ལོང་ནང་དུ་གསལ་པ་ལྟར། ད་དུང་བདག་དང་སྟོན་པའི་ཁྱད་མཆོག་དམན་གྱི་ཁྱད་པར་མཐོང་ནས། བྱང་ཆུབ་ལ་སྒྲིབ་པ་གཏིང་དཔག་དཀའ་བ་དག་སྦྱངས་ནས། བཅུ་གཅིག་ཀུན་ཏུ་འོད་ཀྱི་ས་ལ་འགྲོ་བའོ། །དུས་ནི་ས་བཅུའི་དབང་ཕྱུག་ཆེན་པོ་རྣམས་ཏེ། ས་བཅུ་ཐོབ་པའི་འཕགས་པ་འཇིག་རྟེན་མགོན་པོ་ངོ་བོ་མེད་པའི་དབྱིངས། ཞེས་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོ་སངས་རྒྱས་ཀུན་གྱི་སྐུ་གསུང་ཐུགས་ཀྱི་ངང་ལས་མ་གཡོས་པས། སྟོན་པ་དང་འཁོར་དགོངས་པ་གཅིག་ཏུ་མ་གྱུར་གྱི་བར་དུ་འཆི་བའི་བདུད་བཅོམ་ཞིང་། འཇིག་རྟེན་གྱི་ཕུན་སུམ་ཚོགས་པ་རྣམས་འབྱོར་བཞིན། སྟོན་པའི་དགོངས་པ་དང་མཉམ་པའི་སླད་དུ་རྟག་ཅིང་། གདུལ་བྱའི་སེམས་ཅན་རྣམས་ཀྱི་གཏི་མུག་ལ་སོགས་ཉོན་མོངས་པ་ལྔ་པོ་གང་གི་གཉེན་པོར། ཆེ་བའི་ཞིང་ཁམས་དང་སྟོན་པར་བསྟན་པའི་སྐུ་ལྔ་རྒྱལ་བ་རིགས་ལྔ་དང་ཆོས་རབ་ལྔ་ཡང་། གདུལ་བྱའི་དུག་ལྔ་འདུལ་བའི་གཉེན་པོའི་ཆོས་ལྔའོ། །དུག་ལྔ་གནས་འགྱུར་ཡེ་ཤེས་རྣམ་པ་ལྔ་པོ་ཡང་། ས་དང་པོ་རབ་ཏུ་དགའ་བ་མཐོང་ལམ་ནས་བཟུང་སྟེ་ས་བཅུའི་རྒྱུན་མཐའི་བར་རྣམས་རིམ་པ་བཞིན་དུ་རྫོགས་ནས་རྫོགས་པའི་བྱང་ཆུབ་སྙིང་པོར་འགྲོ་བ་སྟེ། ཞིང་འདི་ས་བཅུའི་བྱང་ཆུབ་སེམས་དཔའ་ལས་གཞན་མ་རྣམས་ཀྱི་སྤྱོད་པའི་ཡུལ་དུ་སྣང་བ་མིན་ཞིང་། དེ་བཞིན་དུ་སྟོན་པ་ལྔ་པོ་རང་སྣང་གི་ཞིང་ཁམས་ལྟར་སྣང་ལོངས་སྤྱོད་རྫོགས་པར་གྱུར་ནའང་། འཁོར་སོགས་རང་སྣང་གཅིག་གིས་བསྡུས་པའི་ཉིད་ལས་མི་གཞན་པ་མ་ཡིན་ཞིང་། རྒྱུད་གཞན་ནས་བསྡུས་པ་ཡིན་ཕྱིར། ཕྱེད་སྣང་རང་བཞིན་སྤྲུལ་པའི་སྐུའི་ཞིང་ཁམས་ཞེས་ཉི་ཟླ་ཁ་སྦྱོར་ཆེན་པོའི་རྒྱུད་ཀྱིས་བསྟན་པ་བཞིན་ནོ། །ཁྱད་པར་དུ་ཡང་རང་བཞིན་རྫོགས་པ་ཆེན་པོའི་རང་སྣང་ཡེ་ཤེས་དཀྱིལ་འཁོར་དམ་པ་རུ་མཆོག་གཟིགས་བླ་མས་དབང་བཞི་བསྐུར་བ་མ་ཉམས་ལ། ཉིན་དུས་རང་སྣང་མངོན་སུམ་འོད་གསལ་དང་། ཞེས་པ་ སྔ་དྲོ་དང་ཕྱི་དྲོའི་བལྟ་ཚུལ་གཞུང་བཞིན་དང་། མཚན་མོ་གཉིད་ཀྱི་སྐབས་སུ་སྙིང་གའི་འོད་གསལ་ལ་གོམས་པ་རྣམས་ནི། རྫོགས་པ་ཆེན་པོའི་གཞི་ཁྲེགས་ཆོད་དང་། ལམ་ཐོད་རྒལ་གྱི་རྟོགས་པའི་རང་བཞིན་ཚད་དུ་མ་ཕྱིན་ཡང་། ཆོས་ཉིད་འགྱུར་བ་མེད་པའི་བདེན་པ་དང་། བླ་མའི་བྱིན་རླབས་བསླུ་མེད་ཀྱིས་བདེན་མཐུས་ས་ཐོབ་པ་རྣམས་དང་སྐལ་པ་མཚུངས་པར་གྱུར་ནས་གཞི་སྣང་ལྷུན་གྲུབ་ཕྱོགས་བཅུར་སྤྲུལ་པར་ཏེ་རང་བཞིན་སྤྲུལ་པའི་ཞིང་དུ་འགྲོ་བ་ཡིན་ལ། ཁྱད་པར་དུ་རྣམ་གྲོལ་དབུགས་ཆེན་འབྱིན་པའི་ཞིང་ཁམས་ནི། རང་བཞིན་སྤྲུལ་སྐུའི་ཞིང་ཁམས་ཏེ། ཤར་ནས་རིམ་པ་བཞིན་དུ་ཤེལ་དང་། སུ་ཝརྞ་སྟེ། གསེར་དང་། པད་རཱག་དང་། ཨིནྟྲ་ནཱི་ལེའི་གཞལ་མེད་ཁང་། སྒོ་བཞི་ཁྱམས་དང་བཅས་པ། སོ་སོའི་རྟ་བབས་སྣང་བྱེད་ཅེས་ཉི་མའི་མཐོང་ཁུང་བ་ལང་གི་མིག་ལྟས་མཛེས་པར་བྱས་པའི་ཟུར་བཞིར། མུ་ཏིག་གི་མཆོད་རྟེན་དང་། དྲིལ་བུ་དང་། གཡེར་ཁའི་སྦྲེལ་བའི་དཔྱང་ཐག་རླུང་གིས་བསྐྱོད་པ་འདྲ་ཞིང་། རྣམ་ཐར་གསུམ་ལྡན་ཞེས་སྟོང་པ་ཉིད་དང་། མཚན་མ་མེད་པ་ སྨོན་པ་མེད་པ་སྟེ། ཆོས་ཀྱི་དབྱིངས་ཀྱི་སྒྲ་དར་དིར་སྒྲོགས་ཞིང་། ཕྱོགས་བཞིར་སྤོས་སྤྲིན་གཡོ་བའི་བ་དན་བཞི་དང་། ཕྱི་རིམ་འཁོར་ཡུག་ཏུ་ཡན་ལག་བརྒྱད་དང་ལྡན་པའི་རྫིང་བུའི་འགྲམ་ན། ཤིང་ཏ་ལའི་ལྗོན་པ་རིན་པོ་ཆེའི་དྲྭ་བ་ཕྱེད་པའི་འཕྱང་འཕྲུལ་ཅན་དང་། བྱའི་ཚོགས་ཀྱང་འདི་ལྷར་ཤང་ཤང་ཏེའུ་རྨ་བྱ། ཀ་ཏ་རི་ ནེ་ཙོ་མི་སྐད་འབྱིན་པ་དང་། ངང་པ་གཞོན་ནུ་ རི་སྐེགས་དང་། ཟེར་མོ་ སྤབ་དང། ཀཾ་ཀ་རི་ལྷའི་བྱ་དྲིལ་བུའི་སྒྲ་ཅན། ཁུ་བྱུག་དང་། གསེར་གྱི་རྡོ་རྗེའི་གཟུགས་ཅན། ཀྲི་ཏི་པ་ གཡུ་དང་། བྱུ་རུ་དང་ ཨིནྟྲ་ནཱི་ལ་དང་ དུང་ལྟར་ཁ་དོག་ཕྱེད་པའི་བྱ་སྣ་ཚོགས་ཀྱིས་སྐད་སྙན་སྒྲོགས་ཅིང་། མགྲིན་པའི་ནང་ནས་རྒྱུད་མངས་ལྟ་བུ་ཀུན་དུ་འཁྲོལ་ཞིང་རྣ་བར་བདུད་རྩི་འབྱིན་པ། དེ་ན་བཞུགས་པའི་བྱང་ཆུབ་སེམས་དཔའ་རྣམས་ནི། ཉོན་མོངས་པའི་གནོད་པ་ཞི་བར་ནུས་པའི་ཆུ་ཀླུང་ལ་སྤྱད་པ་ཙམ་གྱིས། འདུ་བའི་ནད་མི་འབྱུང་ཞིང་། ཡིད་ལ་ཅི་བསམ་པ་དྲན་པའི་མོད་ལ་ཐོགས་པ་མེད་པར་འབྱུང་ཞིང་། དེ་ཡང་སུམ་ཅུ་རྩ་གསུམ་གྱི་ལྷ་དང་ལོངས་སྤྱོད་མཉམ་ལ། ཕྱི་རིམ་ཀུན་ཏུ་རིན་ཆེན་སྣ་བདུན་གྱི་ཕ་གུ་ཅན་ལེགས་ཤིང་ཞིང་མཆོག་དེ་ན་རིགས་བཞིའི་སྟོན་པ་ཡིས་ཉིན་མཚན་དུས་བཞིར་ཆོས་ཀྱི་སྒྲ་སྒྲོགས་པའི་རྒྱུན་མི་འཆད་ཅིང་དེ་དག་ཀུན་གྱི་བར་སྣང་གི་དབྱིངས་ན་ཧེ་རུ་ཀ་དཔལ་གྱི་ཞིང་ཁམས་ཞེས་བྱ་བ་ཡོད་ཅིང་། དེ་ལ་གསར་མའི་རྒྱུད་ཕལ་ཆེར་ན་འོག་མིན་རྣམ་པར་སྣང་མཛད་གྱི་དུར་ཁྲོད་ཅེས་ཀྱང་བཤད་ལ། རྙིང་མའི་རིང་ལུགས་ལྟར་ན། དུར་ཁྲོད་ཆེན་པོ་མེ་རི་འབར་བ་ཞེས་བྱ་བ་ན་སྟོན་པ་གཞོན་ནུ་སྟོབས་ལྡན་ཞེས་བྱ་བའི་བཅོམ་ལྡན་འདས་ལ། ལག་ན་རྡོ་རྗེ་ལ་སོགས་པའི་དཔའ་བོ་དང་མཁའ་འགྲོའི་སྤྲིན་ཕུང་འཕྲོ་བའི་དབུས་ཉིད་ན་བཞུགས་བཞིན་འབྲས་བུ་བླ་ན་མེད་པའི་ཆོས་ཀྱི་འཁོར་ལོ་བསྐོར་ཞིང་བཞུགས་པ། པདྨ་ལས་སྐྱེས་པའི་རྒྱལ་སྲས་དཔག་ཏུ་མེད་པ་དེ་དག་ཀུན་ཀྱང་ལྷ་དང་། ལྷ་མོ་དང་། ཁྱེའུ་དང་། བུ་མོའི་རྣམ་པ། དྲང་སྲོང་གྲུབ་པ་ཅན་རྣམས་ནི། རྣམ་པར་རྟོག་པ་མེད་ཅིང་སེམས་གསུམ་མེད་ལ། ཡིད་དྲུག་དང་ཉོན་མོངས་པ་དྲུག་ཀྱང་མེད་དེ། མ་རིག་པའང་མེད་ཅིང་རྐྱེན་བཞི་ཡོད་པ་མ་ཡིན། དེ་དང་མཚུངས་པར་ལྡན་པ་རྣམས་ཀྱང་མེད་དེ། དེ་ཡང་སྟོན་པ་རྡོ་རྗེ་འཆང་ཆེན་པོ་གང་གི་བྱིན་རླབས་ལས་རང་བཞིན་ཉིད་དུ་བཀོད་པ་ཡིན་ཕྱིར། དེའི་རང་བཞིན་ནི་སྤྲུལ་པའི་ཞིང་ཞེས་པ་ནི་སྟོན་པ་རྡོ་རྗེ་འཆང་གི་རྣམ་པར་འཕྲུལ་པ་ལས་བྱུང་བ་རྒྱལ་སྲས་སར་གནས་རྣམས་ལ་གྲགས་ཤིང་། དེ་ཡང་རང་བཞིན་རྫོགས་པ་ཆེན་པོའི་གསང་ལམ་དུ་གང་ལས་བཤད་ན། རིག་པ་རང་ཤར་ཆེན་པོའི་རྒྱུད་ལས་བསྟན་པ་ལགས་ཤིང་། གཞན་དུ་ན་བདེ་ཆེན་མཁའ་ལ་སྤྱོད་པ་དང་། ས་སྤྱོད་ཅེས་སུ་གྲགས་པ་དོན་གྱི་འོད་གསལ་ཡིན་པ་ལ། དབང་ཐོབ་ལྷན་ཅིག་སྐྱེས་མའི་ཌཱཀྐི་མ་རྣམས་དང་། ཡུལ་ཆེན་ཉེར་བཞིར་སྐྱེས་ཤིང་སྤྱོད་པའི་ཞིང་སྐྱེས་མ་ལ་སོགས་དཔའ་བོ་དང་རྣལ་འབྱོར་མའི་ཚོགས་རྣམས་དང་སྐལ་པ་མཉམ་པའི་རིག་འཛིན་གྱི་གྲལ་གང་དུ་ལམ་གྱི་འཕྲོ་སྦྱང་ཕྱིར། རིག་པ་འཛིན་པའི་རྡོ་རྗེའི་བླ་མ་ཞེས་གསང་སྔགས་རྡོ་རྗེ་ཐེག་པའི་དོན་སྟོན་པར་བྱེད་པའི་བླ་མ་རྣམས་ནི་རབ་ཏུ་བཞུགས་ནས་སྔགས་ཀྱི་ལྟ་བ་དང་། སྤྱོད་པ་རླབས་པོ་ཆེ་ལ་སྤྱོད་པ་ཡིན་ལ། འདི་དག་རང་སྣང་དགེ་བའི་ས་བོན་རྣམ་པར་དག་པ་དང་། བསྐྱེད་རིམ་དང་རྫོགས་རིམ་ཟབ་མོའི་བརྟུལ་ཞུགས་མཐར་ཕྱིན་པའི་དོན་འབྲས་ནི། གསང་སྔགས་གྲུབ་པ་རྣམས་ལ་སྣང་བ་ལས་རྟོག་འདོད་ཅན་ཞེས་རང་འདོད་ཁོ་ནའི་ཕྱིན་ཏུ་ཡོད་པའི་ཕྱོགས་དང་རིས་ཆད་ཅན་དུ་བསམ་པར་མི་བྱའོ། །དེ་ཉིད་ངང་ལས་རང་སྣང་ལོངས་སྤྱོད་རྫོགས་པའི་སངས་རྒྱས་རྣམས་ཀྱི་ཡི་གེའི་སྤྲིན་གྱི་འོད་ཟེར་འགྲོ་བ་རིགས་དྲུག་གི་གནས་སུ། སྦྱང་གཞི་བདེ་གཤེགས་སྙིང་པོ་ལ། སྦྱང་བྱ་ཉོན་མོངས་པ་དྲུག་གི་ས་བོན་བག་ཆགས་དང་བཅས་པ་སྦྱང་ཕྱིར། རྒྱལ་བ་རྣམས་ཀྱི་ཐུགས་རྗེ་འོད་ཟེར་རབ་ཏུ་འཕྲོས་པས། མངོན་རྟོགས་ནི་འཇིག་རྟེན་འདུལ་བྱེད་སྤྲུལ་པའི་སྐུ་མཆོག་ནི་གནས་རིགས་དྲུག་གི་གདུལ་བྱའི་འགྲོ་བ་རྣམས་ཀྱི་སྣང་བ་ལ། རང་རང་མིང་གི་མངོན་བརྗོད་ནི། ལྷ་དང་། མི་དང་། ལྷ་མ་ཡིན་དང་། དུད་འགྲོ་དང་། ཡི་དྭགས་དང་། དམྱལ་བ་སྟེ། འགྲོ་བ་རིགས་དྲུག་པོའི་རྗེས་སུ་འགྲོ་བའི་འདུལ་བྱེད་ཀྱི་གཉེན་པོ་རིག་པའི་སྐྱེས་བུ་ཐུབ་པ་དྲུག་པོ་ཕྱོགས་བཅུ་མཐའ་ཡས་མུ་མེད་པའི་སྟོང་གསུམ་འཇིག་རྟེན་གྱི་ཁམས་སྟོང་ཆེན་ཇི་སྙེད་དང་མཉམ་པར་རབ་ཏུ་སྤྲུལ་ནས། གདུལ་བ་བཞིའི་འགྲོ་བ་བསམ་གྱིས་མི་ཁྱབ་པའི་དོན་མཛད་ཅིང་། དེ་ནས་ང་བསོད་ནམས་ཆེན་པོས་འདུལ་བ་ནི། སྐུའི་མཛད་པ་ཆེན་པོ་བཅུ་གཉིས་ཡིན་ལ། གསུང་གི་མཛད་པ་ནི། ཐེག་པ་གསུམ་མམ་གཅིག་ནི་རྫོགས་པ་ཆེན་པའོ། །དེ་དག་གང་ཡང་འདུ་ཤེས་ཀྱི་རྗེས་སུ་འགྲོ་ཞིང་སེམས་ཅན་རྣམས་ཀྱི་ཉོན་མོངས་པ་བརྒྱད་ཁྲི་བཞི་སྟོང་གི་གཉེན་པོར་དགོངས་ཏེ་གསུངས་པ་ལ། ཆོས་ཀྱི་སྒོ་འཕར་རམ། སྒོ་མོ་བརྒྱད་ཁྲི་བཞི་སྟོང་གི་གྲངས་སུ་ངེས་པ་དང་། མ་ངེས་གསུངས་པ་ལྟར་སྣང་ཡང་། སྒྲ་ཚིག་རང་མཚན་པ་མ་ཡིན་ཞིང་། གདུལ་བྱའི་སེམས་ཅན་རྣམས་ཀྱི་ཁམས་ལ་རྒྱལ་བ་རྣམས་ཀྱི་ཐུགས་རྗེ་དང་། བྱིན་རླབས་ཀྱི་མཐུས་རྣམ་པར་རིག་པ་ཉིད་དང་མཐུན་པར་ཤར་བའོ། །ཐུགས་ཀྱི་གདུལ་བ་ནི། འདས་མ་འོངས་ད་ལྟ་དུས་གསུམ་ཆགས་ཐོག་མེད་ཅིང་གཟིགས་པ་ཡིན་ལ། དུས་ཀྱང་འདི་ཙམ་ཞེས་སོ་སོར་མི་རྟོག་ཅིང་དུས་མེད་དུས་ཞེས་ངོས་འཛིན་བྲལ་བའོ། །རང་བཞིན་གདོད་མའི་གནས་སྐབས་ནི། ཀུན་ཏུ་བཟང་པོའི་དུས་ལས་གཞན་ཞིག་མི་མངའ་བ་དང་། དེ་ཡང་གཞན་གྱི་སེམས་རྒྱུད་མཁྱེན་པ་དང་། དེ་བཞིན་དུ་རྫུ་འཕྲུལ་ཆེན་པོའི་སྤྱན་དང་། སྙན་ལ་སོགས་པ་མངོན་པར་ཤེས་པ་དྲུག་པོ་དུས་ལས་ཡོལ་བ་མེད་པའོ། །ཕྲིན་ལས་ཀྱིས་འདུལ་བ་ནི། གང་ལ་གང་འདུལ་སྐུ་དཔག་ཏུ་མེད་པ་དང་། ཞིང་དཔག་ཏུ་མེད་པ་དང་། ཀུན་ཏུ་ཐུགས་ཀྱིས་མི་ཁྱབ་པ་མེད་པ་དང་། ཀུན་ཏུ་ཞལ་ཞེས་མདུན་རྒྱབ་དང་གཡས་གཡོན་སོགས་ཀྱི་འཛིན་པ་དག་པའི་ཕྱིར་དང་། ཀུན་ཏུ་གསུང་གི་གསང་བ་བསམ་གྱིས་མི་ཁྱབ་པའི་ཚིག་གི་དངོས་འཛིན་སོགས་ལས་འདས་པའི་ཕྱིར་དང་། སྐུ་གསུང་ཐུགས་ཀྱི་འགྲོ་བ་རྣམས་ལ་དངོས་སུ་དོན་མཛད་པ་ཡིན་ལ། ཕྲིན་ལས་ཀྱི་དངོས་དང་བརྒྱུད་དེ་ཀུན་ནས་ཀུན་ཏུ་མཛད་པ་དང་། དེ་ལྟར་དུ་རྒྱལ་བ་ཀུན་གྱི་ཐུགས་ཀྱི་དབྱིངས་ལས་སྤྲུལ་པའི་སྐུ་མཆོག་རྣམས་ཀྱི་ནི། ཆོས་ཉིད་ལ་ལྟོས་པའི་ཇི་ལྟ་བའི་ཡེ་ཤེས་དང་། ཆོས་ཅན་ལ་ལྟོས་པའི་ཇི་སྙེད་མཁྱེན་པའི་ཡེ་ཤེས་གཉིས་ཀྱིས་གདུལ་བྱའི་རྒྱུད་འགྲོལ་ཞིང་ཉེ་བར་ཞི་བ་དང་། མ་འདྲེས་པ་ལ་སོགས་པའི་ཆོས་ཚུལ་དཔག་མེད་སྟོན་ཅིང་དེ་ལས་ཡང་སྤྲུལ་གྱི་རྣམ་པ་བརྗོད་ཀྱི་མི་ལང་བར་འཕྲོས་ཤིང་། འགྲོ་བ་རིགས་དྲུག་གི་གནས་རིགས་དེ་སྙེད་དུ། ལྷ་རྣམས་གདུལ་བར་བྱེད་པའི་ཆེད་དུ། ཚངས་པ་དང་། དབང་པོ་དང་། བདེ་འབྱུང་ལ་སོགས་པ་དང་། མི་ལ་ཉན་ཐོས་དང་། རང་རྒྱལ་དང་། བྱང་སེམས་དང། འཁོར་ལོས་སྒྱུར་དང་། དེ་བཞིན་དུ་ལྷ་མ་ཡིན་ལ་ཐག་བཟང་རིས་དང་། བྱ་ལ་ཡང་ཤིང་རྟ་མོ་དང་། རི་དྭགས་ལ་ཕན་པའི་ཕྱིར་དུ། སེང་གེའི་རྒྱལ་པོ་ཡི་དམ་བརྟན་པ་སོགས་མདོར་ན་དམྱལ་བ་ཡི་དྭགས་གང་དང་གང་ཡང་འདུལ་བྱེད་དེ་དང་། དེ་ལྟ་བུའི་གཟུགས་སུ་སྤྲུལ་ནས་སེམས་ཅན་གྱི་དོན་ལ་ནམ་ཡང་གཡེལ་བ་མེད་བཞིན་འདི་ནི་འཇིག་རྟེན་དྲུག་ཅེས་འགྲོ་བ་རིགས་དྲུག་གི་ཞིང་ཁམས་རྣམས་སུ་ ལས་དང་བག་ཆགས་དང་། དགེ་སྡུག་གི་རྒྱུ་འབྲས་ཀྱི་གནས་རིགས་ཀྱང་བདེ་བ་ལྟར་སྣང་བ་དང་། སྡུག་བསྔལ་ལྟར་སྣང་བ་ནི། མཐོ་བ་ལྷ་གནས་གསུམ་དང་། དམན་པ་ངན་སོང་གསུམ་ལྟར་སྣང་བའི་དོན་ལ། རང་སྣང་དང་མཐུན་པའི་སྟོན་པ་ནི། ཐུབ་པ་དྲུག་ཡིན་ཏེ་དེ་དག་གི་འགྲོ་བའི་དོན་མཛད་ཅིང་། ཆོས་ཀྱང་མ་ངེས་ཏེ་གདུལ་བྱའི་འགྲོ་བ་རྣམས་ཀྱི་བློ་རྟོག་མང་ཉུང་ལྟར་དེ་དང་མཐུན་པའི་ཆོས་བསྟན་པ་ཡིན་ལ། དུས་ཀྱང་སོ་སོ་རང་རང་གི་བསྐལ་པའི་རྗེས་སུ་འགྲོ་བ་ཡིན་ཞིང་། མ་དག་ཞིང་གི་འགྲོ་བ་ལ་དེ་ལྟར་སྣང་ཞིང་། གང་ཞིག་རྨི་ལམ་གྱི་ནང་དུ་སངས་རྒྱས་མཐོང་ཞིང་དེ་ཉིད་རྨི་ལམ་ལྟ་བུར་སྤྲུལ་པའི་ཆོས་བསྟན་ཡང་། དེ་ལ་ངོ་བོ་ཉིད་མེད་ཅིང་། རང་བཞིན་ཅི་ལ་ཡང་མ་གྲུབ་པ་ལ། བདག་ཏུ་འཛིན་པ་མེད་ཅིང་སྟོང་པ་ཉིད་དེ་གསོག་ཏུ་ཅེས་རྫུན་དུ་རིག་པར་བྱ་ཞེས། ཟབ་མོའི་མདོ་སྡེ་དུ་མ་ལས་གསུང་པས་ནི། །འཁོར་བའི་སྡུག་བསྔལ་དང་མྱ་ངན་ལས་འདས་པའི་བདེ་བ་གཉིས་ཀ་རྨི་ལམ་ལྟ་བུའི་རོལ་པ་ཉིད་ལ་སྣང་བས་སངས་རྒྱས་ངོ་བོར་དག་ནའང་། སྤྲུལ་པ་ནི་གདུལ་བྱའི་སེམས་ཉིད་ལྟར་སྣང་བའི་ཕྱིར་ན། མ་དག་པ་ཐུགས་རྗེས་རོལ་པའི་སྤྲུལ་པ་ཡང་། ཇི་སྲིད་འཁོར་བ་དང་མཐུན་པའི་རྗེས་སུ་འགྲོ་བའི་རྒྱུན་མི་ཆད་ཅིང་། དེ་ཉིད་ཀྱི་ངང་ནས་སྣ་ཚོགས་སྤྲུལ་པ་ནི་རང་བཞིན་དུ་བྱོན་པ་དང་། རྒྱལ་བའི་སྐུ་གསུང་ཐུགས་རྟེན་གནས་རིགས་རྣམས་ལ་རང་བྱུང་དུ་མངོན་པ་དང་། དེ་ལས་ཀྱང་ད་ལྟའི་གནས་འདུས་ལ་སོགས་པའང་དེ་དང་མཚུངས་ཤིང་ལག་པས་འདུ་བྱེད་ལས་བྱུང་བ་ནི། འབུར་དུ་བྱས་པ་དང་། རིས་སུ་བྲིས་པ་དང་། གནྡྷོ་ལ་ཞེས་གཙུག་ལག་ཁང་དང་། ཁང་བཟང་དང་། སྐྱེད་མོས་ཚལ་དང་། མྱ་ངམ་གྱི་ཐང་ལ་སྤྲུལ་པའི་གྲོང་ཁྱེར་དང་། པདྨ་དང་། དཔག་བསམ་གྱི་ཤིང་དང་། ཡིད་བཞིན་གྱི་ནོར་བུ་དང་། གྲུ་གཟིངས་དང་། ཟམ་པ་དང་། ཤིང་རྟ་དང་། ཟས་དང་གོས་ལ་སེམས་མེད་བེམ་པོའི་ཚུལ་དུ་སྣང་བ་དང་། སྐྱེ་བ་མུ་གེས་གདུང་བར་ཉ་བོ་ཆེ་དང་། ནད་ཀྱིས་གདུང་པ་ལ་སྲོག་ཆགས་དེས་པ་དང་། སྲིན་མོའི་གླིང་དུ་རྟ་ཅང་ཤེས་བཱ་ལ་ཧ་དང་། མི་གཙང་བའི་འདམ་དུ་གསེར་གྱི་བུང་བ་སོགས་སྤྲུལ་པ་སྣ་ཚོགས། རྣམ་པ་ཀུན་ཏུ་བདེ་བར་བྱེད་པའི་གཞིར་རྟོག་པ་བཟང་ངན་གང་ཡང་མེད་ཅིང་། གཡོ་བ་མེད་པ་ལྟ་བུའི་དོན་ཆེན་གྱི་ནི་ཞེས་ཐར་པ་དང་ཐམས་ཅད་མཁྱེན་པའི་གོ་འཕང་ཐོབ་པའི་དཔལ་དུ་ཉེ་བར་གནས་ཤིང་། གལ་ཏེ་གདུལ་བར་བྱ་བའི་དུས་ཡོལ་ན་ཞེས། གདུལ་བྱ་མེད་ན་འདུལ་བྱེད་ཀྱི་སྟོན་པ་དབྱིངས་སུ་ནུབ་པའི་མཚན་དཔེ་ནི། ཇི་ལྟར་ཆུ་སྣོད་མེད་པར་གྱུར་ཚེ་ཆུ་ཟླའི་གཟུགས་བརྙན་ཡང་། སྤྲུལ་གཞིའི་ཟླ་བ་ཉིད་ལ་ཐིམ་པ་ལྟར་གདུལ་བྱའི་སེམས་ཅན་རྣམས་ལ་གང་ལ་གང་འདུལ་གྱི་ཚུལ་དུ་སྣང་བས་བསྡུས་པའི་སྤྲུལ་པ་རྣམས་ནི། རང་སྣང་ལོངས་སྤྱོད་རྫོགས་པའི་དབྱིངས་སུ་ཐིམ་པ་ནི། དེ་ཡང་གནམ་སྟོང་ཟླ་བ་གཅིག་ཤོས་ནས་ཞེས། ཉ་ཟླ་གནམ་སྟོང་ཟླ་བ་ལ་གཅིག་ཏུ་ཐིམ་པ་མེད་ཀྱང་འོད་དཀར་ཕྱིར་གསལ་གདངས་ནང་དབྱིིངས་སྤྲོས་པ་མེད་པའི་ངང་དུ་ཐིམ་པ་ལྟར། ལོངས་སྤྱོད་རྫོགས་པའི་རང་སྣང་སྐུ་དང་ཞིང་ཁམས་སུ་གསལ་བ་དེའང་། ཆོས་ཀྱི་སྐུའི་ཡེ་ཤེས་ཆེན་པོར་འཁྱིལ་པ་དེ་ཉིད་ལས། དབུ་མ་པ་རྣམས་འཇུག་པ་ཆོས་ཀྱི་དབྱིངས་སུ་ཞི་བའི་འགོག་པ་དམ་པ་ཞེས་འདོད་ལ། དོན་དུ་ནི་ཉན་རང་གི་འགོག་པ་དང་མི་མཚུངས་པ་ནི་ཤེས་དགོས་ཤིང་། འདིར་ནི་སོ་སོ་རང་རིག་ཡེ་ཤེས་ཉིད་ནི་ཕྲ་བའི་ཡེ་ཤེས་ནང་གསལ་ཆོས་ཀྱི་དབྱིངས་ཏེ། ཐིམ་ལ་ཞེས་གཟུགས་སྐུ་གཉིས་ཀྱི་སྣང་ཆ་ཆོས་སྐུར་ཐིམ་ཡང་། དེ་ཉིད་ནི་མ་རྨུགས་པ་ཞེས་གཞོན་ནུ་བུམ་པའི་སྐུ་ནི་ཤེལ་ནང་དུ་བསྡུས་ཚེ་འཇའ་ཚོན་ཁོང་ན་གསལ་བ་བཞིན་ལགས་མོད་ཀྱང་། གང་གི་གདུལ་བྱ་སྣང་བའི་མོད་དེ་ཉིད་ལ་འགག་པ་མེད་པ་ཐུགས་རྗེའི་ཡེ་ཤེས་མཆེད་པའི་གཞི་དེ་ཉིད་ནི། ཤིན་ཏུ་མཉམ་པར་བཞག་པའི་ཆོས་ཉིད་གཏིང་གསལ་ནི། འབྲས་བུ་འཁོར་འདས་རྒྱབ་གྱེས་པའི་ལྷུན་གྲུབ་ཆེན་པོའི་གོ་འཕང་ཡིན་ནོ། །ཡོན་ཏན་རིན་པོ་ཆེའི་མཛོད་ཀྱི་ལེའུ་བཅུ་གསུམ་པའི་བསྡུས་འགྲེལ་ལོ། ༈ དེ་ལྟར་ཡོན་ཏན་རིན་པོ་ཆེའི་མཛོད་ཀྱི་བསྟན་བཅོས་ཀྱི་རྩ་བ་མཛད་ཟིན་ནས་གཤམ་དུ་སྦྱར་བྱང་གསུང་པ། བདག་རྒྱུད་སྣོད་ཀྱི་དཔྱད་པ་རྫོགས་གྱུར་ནས། འཇིག་རྟེན་མགོན་པོ་དྲི་མེད་འོད་ཟེར་གྱི། ཞལ་མཐོང་ཐུགས་རྗེས་དབུགས་འབྱིན་མ་ཐོབ་ན། ལམ་མིན་གཡང་སར་དལ་རྟེན་སྟོང་ལོག་བྱས། ཞེས་པ་ནི། བདག་རྒྱུད་སྣོད་ཀྱི་ཞེས་རང་རྒྱུད་ན་ཡོད་པའི་དྲང་ངེས་ཀྱི་དཔྱད་ཡོངས་སུ་རྫོགས་པར་བྱས་པ་ཡང་། རྒྱལ་དབང་དྲི་མེད་འོད་ཟེར་གྱི་ཐུགས་རྗེ་དང་སྟོབས་ལས་བྱུང་བ་ཡིན་ཏེ། གང་གི་ཞལ་མཐོང་བ་དང་། བྱིན་གྱིས་བརླབས་ནས་དབུགས་དབྱུང་ཐོབ་པར་མ་གྱུར་ན། འཁོར་བའི་ལམ་ལྔའི་གནས་སུ་དལ་རྟེན་སྟོང་ལོག་བྱས་ཀྱང་། དེ་ལས་ལྡོག་ཏེ་ཀུན་མཁྱེན་ཆོས་ཀྱི་རྒྱལ་པོའི་བཀའ་དྲིན་ལས་འདི་ལྟ་བུའི་གཞུང་བཟང་རྩོམ་པ་སྤོབ་པར་ཐོབ་པ་ཡིན་ལ། དེ་ཕྱིར་འདི་ལ་ལེགས་པར་བཤད་པའི་ཆ། །བླ་མའི་བྱིན་རླབས་སྒོམ་བྱུང་ཤེས་རབ་ལས། །ཐོས་བསམ་རྟོག་གེའི་རིག་པས་མ་བསྐྱེད་པས། །རང་རང་འདོད་གཞུང་ཕྱོགས་དང་འགལ་ན་འཆགས། །ཅེས་པ་ནི། དེ་ཡང་ཐོག་མཐའ་བར་གསུམ་དགེ་བའི་གཞུང་བཟང་དྲི་མ་མེད་པ་འདི་ཉིད་ནི། བླ་མ་དམ་པའི་བྱིན་རླབས་དང་། སྔོན་སྦྱངས་ཀྱི་ལས་འཕྲོ་སད་ནས་བསྒོམ་བྱུང་གི་ཤེས་རབ་གཏིང་རྡོལ་བའི་རྩལ་དུ་ཤར་བ་ལགས་ཀྱང་། དེང་དུས་བོད་ལུགས་ཁོ་ནའི་གྲུབ་མཐའ་རང་འདོད་ཀྱིས་བཟུང་བའི་ཐོས་བསམ་ཚིག་ལ་གྲིམ་ཞིང་དོན་དང་མི་མཐུན་པའི་རྟོག་གེའི་རིག་པས་མ་བསྐྱེད་པས། རང་རང་སོ་སོའི་ཕྱོགས་འཛིན་གྱིས་འདོད་གཞུང་དག་དང་ཕྱོགས་འགལ་སྲིད་ན་འཆགས་ཞེས་དགོངས་པ་ཅན་གྱིས་གསུངས་སོ། །ཆོས་ཚུལ་རྒྱ་མཚོ་གཏིང་དཔག་དཀའ་བའི་དོན། །མཉམ་པར་བཞག་པ་ཁོ་ནའི་ཁྱད་ཆོས་ལས། །ཇི་ལྟ་ཇི་སྙེད་མཁྱེན་པའི་ཡེ་ཤེས་གནས། །ཡང་དག་མཐོང་ལ་ནམ་ཡང་བསླུ་བ་མེད། །ཅེས་པ་ནི། སྤྱིར་མདོ་སྔགས་ཀྱི་ཆོས་ཚུལ་རྒྱ་མཚོ། རྒྱ་ཆེ་ཞིང་དཔག་པར་དཀའ་བའི་དོན་ཇི་ལྟ་བར་རྟོགས་པ་ཡང་། རང་སེམས་ཀྱི་གནས་ལུགས་ཇི་བཞིན་དུ་རྟོགས་ནས་ཀློང་དུ་གྱུར་ཞིང་མཐར་མ་ཕྱིན་གྱི་བར་དུ། མཉམ་པར་བཞག་པ་ཁོ་ནའི་ཁྱད་ཆོས་ལས་ཇི་ལྟ་བ་དང་ཇི་སྙེད་མཁྱེན་པའི་ཟག་པ་མེད་པའི་ཡེ་ཤེས་ཀྱི་གནས་ཡང་དག་པ་ཇི་བཞིན་པར་མཐོང་བ་ལ་ནམ་ཡང་བསླུ་བ་མེད་ཅེས་གསུངས་པ་བཞིན་སྒྲ་ཇི་བཞིན་པར་རྟོགས་པའོ། །དགེ་བ་འདི་ཡིས་བདག་དང་སེམས་ཅན་རྣམས། །རྒྱལ་བའི་རིང་ལུགས་ནོར་བ་མེད་པའི་ལམ། །སྒྲིབ་གཉིས་རྙོགས་པ་དྭངས་པའི་གཟིངས་ཞུགས་ནས། །བྱང་ཆུབ་ཞི་བ་རིན་ཆེན་གླིང་ཕྱིན་ཤོག །དེ་ལྟ་བུའི་དགེ་བའི་རྩ་བ་འདི་ལ་བརྟེན་ནས་བདག་དང་མཁའ་མཉམ་གྱི་སེམས་ཅན་ཐམས་ཅད། སྔ་འགྱུར་རྒྱལ་བ་ཀུན་བཟང་རྡོ་རྗེ་འཆང་ཆེན་པོའི་རིང་ལུགས་ནོར་བ་མེད་པའི་ལམ་མཆོག། ནང་རྒྱུད་སྡེ་གསུམ་ཞེས་སྒྲིབ་པ་གཉིས་ཀྱི་རྙོགས་པ་དྭངས་པའི་རྒྱ་མཚོར་རིམ་གཉིས་ཀྱི་གཟིངས་ལ་ཞུགས་ནས། བྱང་ཆུབ་སེམས་དཔའ་ཞི་བ་རིན་པོ་ཆེའི་གླིང་ཞེས་རྒྱལ་བ་རྣམ་ཀྱི་གྲོལ་གཞི་མངོན་དུ་འགྱུར་བར་ཤོག་ཅེས་སྨོན་ལམ་བཏབ་པའོ། །ནགས་མཐོང་རི་དྭགས་དཀྱུ་བའི་སྨན་ལྗོངས་ན། །དུས་བཞིའི་མངོན་རྟགས་ངོམ་པའི་ལྗོན་པ་ནི། །དྲང་སྲོང་རྣམས་ལ་མི་སྙན་སྒྲོགས་མ་བྱེད། །སྙིང་ལ་འབབ་པར་སྨྲ་བའི་བྱ་ཚོགས་ཀྱང་། །དབེན་པའི་གནས་མིའི་རྒྱུ་འགྲུལ་མེད་ཅིང་བྱ་རིགས་དང་། རི་དྭགས་ཁོ་ནས་བཟུང་བའི་གནས་ལ་བསྟོད་བསྔགས་བརྗོད་དེ་དེར་གཤེགས་ནས་རིམ་གཉིས་ལ་བརྩོན་པ་ལས། །སྦྲུལ་གདུག་འཁྲི་ཤིང་ལྟ་བུའི་འཁོར་བ་འདིར། །སྐྱོ་བའི་ངེས་འབྱུང་ཤིང་རྟས་ཡིད་འདྲེན་པའི། །ཅ་ཅོ་ཤིན་ཏུ་ཞི་བ་སྒྲོག་ཐོས་ནས། །དབང་པོ་ཉེ་བར་ཞི་བའི་དཔལ་ཐོབ་ཤོག །སྦྲུལ་གདུག་པ་ཅན་གྱི་འཁྲི་ཤིང་ལྟར་སྐྱོན་དང་ལྡན་པའི་འཁོར་བའི་གནས་འདིར་སྐྱོ་ཤེས་ངེས་འབྱུང་དྲག་པོའི་ཤིང་རྟས་ཡིད་འདྲེས་པའི་རྣམ་གཡེང་དང་འདུ་འཛི་ལ་རྒྱབ་ཀྱིས་ཕྱོགས་བཞིན། དབང་པོ་ཡུལ་ལྔར་རྒྱུ་བ་ལྡོག་ཏེ། རང་སེམས་གཅིག་ཏུ་གནས་ཤིང་རང་བཞིན་མེད་པ་རྟོགས་པའི་དོན་ལ་གནས་པར་ཤོག་ཅིག་ཅེས་སྨོན་པའོ། །ལྟ་བ་ཡིད་བྱེད་རླུང་གིས་མ་དཀྲུགས་ལ། །སྤྱོད་པ་རྒྱལ་སྲས་དམ་པའི་རྗེས་འགྲོ་བས། །ནམ་ཡང་གཞན་གྱི་ཁུར་དུ་མི་འགྲོ་ཞིང་། །རླབས་ཆེན་ཕྲིན་ལས་འགྲོ་བའི་དཔལ་དུ་ཤོག །ད་དུས་ཀྱི་སྒོམ་ཆེན་དུ་རློམ་པའི་བསམ་གཏན་པ་ཕལ་མོ་ཆེ་ལྟ་བ་ཡིད་བྱེད་དང་མ་བྲལ་བའི་གཉིས་འཛིན་དམ་པོ་དང་། དེ་བཞིན་དུ་དམིགས་པ་ཤིན་ཏུ་འཐས་པ་ལ་མཆོག་ཏུ་འཛིན་པ་དང་། སྤྱོད་པ་བཅོས་མ་སྣ་ཚོགས་ཀྱིས་སེམས་རྣལ་དུ་ཕེབ་མི་བཅུག་པ་སོགས་སྐྱོན་རྣམས་དོར་ནས། ལྟ་སྒོམ་སྤྱོད་འབྲས་གསུམ་པོ་གེགས་དང་གོལ་སའི་འཕྲང་ལས་གྲོལ་ཞིང་། རབ་འབྱམས་ཕྲིན་ལས་ཀྱི་འཇུག་པ་རྒྱ་ཆེ་ཞིང་རྒྱུན་མི་ཆད་བ་འགྲོ་བའི་དཔལ་དུ་འགྱུར་བར་ཤོག་ཅིག། ཅེས་རང་གཞན་དོན་གཉིས་ལྷུན་གྲུབ་ཏུ་འབྱུང་བའི་སྨོན་ལམ་བཏབ་པའོ། །ཡོན་ཏན་རིན་པོ་ཆེའི་མཛོད་དགའ་བའི་ཆར་ཞེས་བྱ་བ། ལ་སྟོད་ཆོས་རྗེ་བྲག་ཕུག་པས་བསྐུལ་བའི་ངོར། སངས་རྒྱས་གཉིས་པ་པདྨ་སམ་བྷ་ཝའི་ཞབས་རྡུལ་ལ་སྤྱི་བོ་རེག་པའི་རྫོགས་ཆེན་པ་རང་བྱུང་རྡོ་རྗེ་མཁྱེན་བརྩེའི་འོད་ཟེར་གྱིས་དཔལ་ལྡན་པདྨ་འོད་གླིང་དུ་སྦྱར་བའོ། །འདིར་སྨྲས་པ། ས་བཅུའི་བྱང་ཆུབ་སེམས་དཔའ་འཇམ་དཔལ་དབྱངས། །གདུལ་བྱའི་ཆེད་དུ་བྷོ་ཊའི་རྒྱལ་ཁམས་སུ། །བྱོན་ནས་མཁན་སློབ་རྣམ་གཉིས་ལ་སོགས་པའི། །རྒྱ་གར་པཎ་ཆེན་མང་པོ་སྤྱན་དྲངས་ནས། །མདོ་སྔགས་བསྟན་པ་ཟླ་ཉའི་དཀྱིལ་འཁོར་ལྟར། །མཐའ་འཁོབ་སྨག་རུམ་བསལ་བའི་གཉེན་གྱུར་པ། །འདི་འདྲ་སངས་རྒྱས་འཇིག་རྟེན་བྱོན་དང་མཚུངས། །དེ་ཕྱིར་བཀའ་དྲིན་དྲན་བཞིན་གསོལ་བ་འདེབས། །འཕགས་པའི་ཡང་སྤྲུལ་ཆོས་རྒྱལ་ཆེན་པོ་དེ། །སླར་ཡང་བསམ་བཞིན་མི་ཡི་སྲིད་བཟུང་པ། །རིག་འཛིན་ཆེན་པོ་འཇིགས་མེད་གླིངཔ་ཞེས། །ཨུ་རྒྱན་དྲི་མེད་འོད་ཟེར་དངོས་མཇལ་བཞིན། །སྔ་འགྱུར་བསྟན་པ་འོད་ཟེར་འབུམ་ལྡན་དལ། །བོད་འདིར་ཕྱི་དར་ཆོས་ལས་ཕྱིས་དར་བའི། །ཆུ་འཛིན་རབ་ཏུ་འཁྲིགས་པའི་མཐུས་སྒྲིབ་ནས། །གསལ་མ་ནུས་པ་སྔོན་སྨོན་འཐོར་རླུང་གིས། །སྒྲིབ་བྱེད་ནམ་མཁའི་ན་བུན་མཐར་བསྐྲད་ནས། །རྫོགས་པ་ཆེན་པོའི་འོད་ཟེར་སྟོང་འབར་གཟི། །རྙིང་བསྟན་ཆུ་སྐྱེས་ཚལ་ཆེན་བཞད་པ་དང་། །ཆབས་གཅིག་རིང་ལུགས་བསྟན་པའི་དྲི་བཟང་སྤྲོས། །དེ་ཕྱིར་མདོ་སྔགས་ཆོས་ཀྱི་གན་མཛོད་རྒྱ། །ཡོན་ཏན་རིན་ཆེན་མཛོད་ཀྱི་སྒོ་ཕྱེས་ནས། །རྗེས་འཇུག་སྐལ་ལྡན་ཚོགས་ལ་འཛད་མེད་གཏེར། །སྦྱིན་འདི་བསྟན་པའི་བཙས་སུ་གདོན་མི་ཟ། །འོན་ཀྱང་སྙིགས་མའི་དུས་ཀྱི་སེར་གཟུགས་རྣམས། །ཐོས་བསམ་སྒོམ་ལ་གཡེལ་ཞིང་ཚིག་དོན་འཆོལ། །གཞུང་བཟང་འདི་འདྲ་འདོར་བར་ཕངས་ནས་སུ། །བླུན་པོ་འཇུག་པ་བདེ་ཕྱིར་བྱིས་པའི་བློས། །བརྩམས་པར་ཐ་མི་དད་ཀྱངབློོ་ངན་དྲིས། །མ་གོས་དམ་པ་གསུམ་གྱིས་ཟིན་རློམ་བཞིན། །མིག་ཤེས་ཡུལ་ལ་འཇུག་པའི་མཐའ་བྲལ་ཡང་། །གཞན་གྱི་ངག་ནས་ཚིག་བླངས་འདིར་བཀོད་དོན། །གཞུང་འདི་སྔ་མ་སློབ་འདོད་འགའ་ཞིག་ལ། །བསླབ་ཀྱང་དོན་དུ་གཉེར་བ་ཕལ་མོ་ཆེར། །མ་བསླབ་བསླབ་ཀྱང་མཐའ་རུ་མ་ཕྱིན་པའི། །སྐྱོན་སྤང་ཕྱིར་དུ་སྙིང་རུས་བསྐྱེད་ནས་སུ། །སྤེལ་བ་ཡི་གེ་གཉིས་པ་འབེབ་བྱེད་གང་། །དམ་ལྡན་ཀུན་བཟང་ཕུན་ཚོགས་ཞེས་བགྱི་བས། །བརྩོན་པ་བསྐྱེད་ནས་བྲིས་འདིའི་རྣམ་དཀར་དགེས། །བསྟན་འགྲོ་ཡོངས་ལ་ཕན་པའི་རྒྱུར་གྱུར་ཅིག། དགེའོ། དགེའོ། དགེའོ།། །།སརྦ་མངྒ་ལམ།། །།