དཔལ་སྤྲུལ་རིན་པོ་ཆེར་ཕུལ་བའི་ཞུ་ཡིག
༄༅།།དཔལ་སྤྲུལ་རིན་པོ་ཆེར་ཕུལ་བའི་ཞུ་ཡིག། དཀའ་དྲིན་མཚུངས་མེད་སྤྲུལ་སྐུ་རིན་པོ་ཆེའི་ཞབས་དྲུང་དུ། གུས་གསོལ། དེང་གི་ཆར་ཉིད་རིན་པོ་ཆེ་སྐུ་ཁམས་དྭངས་ཤིང་ཐུགས་དམ་འཕེལ་བར་བཞུགས་པ་ནས་རྗེས་བརྩེའི་གསུང་བྲིས་རྟེན་བཅས་ཉམས་མེད་གནང་འབྱོར་སྙིང་ནས་དད་སྤྲོ་འཕེལ་ལགས། །འདིར་ཡང་རང་ངོས་ནས་འདུ་བ་སྙོམས་བཞིན་སྤྲུལ་སྐུ་གཉིས་ལ་རྙིང་རྒྱུད་ཀྱི་བཀླག་ལུང་འབུལ་གྱིན་ཡོད་སྐབས་ལགས། །མཚམས་ཞུས། ན་ནིང་འདིར་སླེབས་ནས་སྐྱབས་རྗེ་གྲུབ་པའི་དབང་པོ་དེ་ཉིད་ཀྱིས་ཐུགས་བརྩེ་སྔར་ནས་ཡུན་རིང་འདྲིས་པ་ལྟ་བུའི་ནང་ཉམས་ཀྱི་བཀའ་མཆིད་ལྷུག་པར་སྩལ་བ་སོགས་ཀྱིས་རྗེས་སུ་བཟུང་བཞིན་སྙིང་ཐིག་གསར་རྙིང་གི་དབང་ལུང་ཇི་རིགས་དང་སྔོན་འགྲོའི་ཁྲིད་བཅས་ཞིབ་རྒྱས་ཐོབ། དེ་སྐབས་ནས་རྒྱུན་དུ་ནི་ལོ་ཤས་བཞུགས་རྒྱུ་ལྟ་བུའི་གསུང་ཕྲོས་གནང་བཞིན་པ་ལ། སྐབས་སྐབས་སུ་ནི་སྟག་ལོ་འདིར་ཁོང་ལ་སྐུ་གེགས་ཤིན་ཏུ་ཆེ་བས་ཅི་འགྱུར་མི་ཤེས་གསུང་བའི་གསུང་ཡང་ལན་གྲངས་མང་ཙམ་གསུངས། ཕྲན་ལ་ནི་ཁྱོད་ཟླ་བ་དགུ་པ་ལས་མི་འགྱང་བར་ཤོག་གསུང་བཞིན་ད་རེས་སླེབས་ཚོད་བཟང་། སྟག་ལོ་འདིར་ང་མ་ཤི་ན་ལོ་གསུམ་སྡོད་དགོས། ཤི་སོང་ན་འགྲོ་སྡོད་ཅི་དགོས་ཁྱོད་རང་དབང་ཆེ་གསུང་། ཟླ་བ་བཅུ་གཅིག་པའི་ཚེས་བཅུར་ལྷ་སྒང་ཇོ་བོའི་དྲུང་དུ་རིགས་འདུས་ཀྱི་ཚོགས་འཁོར་རྒྱས་པ་ཞིག་གནང་། དེ་ཉིན་ཐུགས་དགྱེས་ཉམས་ཆེ་བཞིན་ངང་རང་རེ་དཔོན་སློབ་ལས་སྨོན་གྱིས་འདྲེལ་ལེགས། ཉམས་ཆགས་ཀྱི་སྐྱོན་མེད་ཅིང་། ཕྱི་མ་རྔ་ཡབ་དཔལ་གྱི་རི་བོར་འདི་བཞིན་ཚོགས་པའི་རྟེན་འདྲེལ་བསླུ་བ་མེད་པའི་སྨོན་ལམ་ཁོ་བོས་འདེབས་གསུང་སྨོན་ལམ་གྱི་མཐའ་རྒྱས་མར་མེ་སྨོན་ལམ་བཅས་སྤྲོས་སྤྲོས་མཛད་སོང་། དེ་རྗེས་ཕྲན་ནི་ལྷ་སྒང་དུ་མཎྜལ་བསྐང་བ་འདྲ་བསགས་ནས་བསྡད་བཏང་། སྐྱབས་རྗེ་དཔོན་སློབ་སྐྱེར་ནང་དགོན་དང་། སྐུ་ནང་སོགས་ལ་ཕེབས་སོང་བས། སྐུ་ནང་ཕེབས་སྐབས་ཟླ་བ་བཅུ་གཉིས་པའི་ཚེས་བཅུ་དྲུག་བཅུ་བདུན་གྱི་སྐོར་ཞིག་ནས་གསོལ་བཅས་ཞིག་གིས་རྐྱེན་བྱས་བསྙུན་ཚུལ་བསྟན་ནས་ཉེར་གསུམ་ཙམ་ལ་ལྷ་སྒང་དུ་ཕེབས་བྱུང་། དེ་ནས་ཡར་དྭངས་ལྟ་བུར་ཡོད་འཕྲོར་ལྕགས་ལ་ཚང་ནས་ནན་བསྐུལ་གྱིས་མདོ་ལ་ཕེབས་སོང་བས། དེ་རྗེས་ཟླ་བ་གཉིས་པའི་ཉི་ཤུའི་ཐོ་རང་ཙམ་ལ་གཞན་དོན་དུ་དགོངས་སོང་བ་ཡིན་འདུག །དེ་རྗེས་ཕྲན་ནི་ཕོ་བྲང་ལྔ་རྩེར་གནས་སྐོར་ཞིག་ལ་སོང་ནས་ད་ལྟ་ནི་ལྷ་སྒང་དུ་རྙིང་རྒྱུད་ཀྱི་ལུང་འདོན་གྱིན་ཡོད་ལགས། །ལྔ་ལྡན་པདྨ་འོད་ཀྱི་ཕོ་བྲང་ནས། །སྙིགས་མའི་འགྲོ་ངོར་མངལ་གྱི་པདྨོ་ལས། །སླར་ཡང་མི་ཡི་ཟོལ་གྱིས་ཕེབས་པ་གང་། །ཨོ་རྒྱན་གཉིས་པ་གྲུབ་པའི་དབང་པོ་དེའི། །ཞལ་མཐོང་གསུང་གི་བདུད་རྩིར་ལོངས་སྤྱོད་པའི། །སྐལ་བཟང་མངོན་སུམ་ཐོབ་པས་སྲིད་པ་འདིར། །སྐྱེས་པའི་དལ་རྟེན་ལན་གཅིག་དོན་ཡོད་པར། །གྱུར་སྙམ་སྐབས་རེར་ཡིད་ལ་སྤྲོ་བ་འཕེལ། །འོན་ཀྱང་སྤྲིན་བར་ཉི་འོད་མཐོང་བ་བཞིན། །རིང་དུ་བསྟེན་པའི་ལས་སྐལ་མ་ལྡན་པས། །སྔོན་ཆད་བདག་གིས་ནོང་པ་ཅི་བགྱིས་ཅེས། །ཉིང་འཁྲུལ་ལམ་དུའང་རང་ལ་སྨོད་བཞིན་མཆིས། །དེ་ལྟ་ནའང་ཚིག་ལ་མི་ལྟོས་པར། །བརྡ་དང་བྱིན་རླབས་ཁོ་ནས་རྗེས་འཛིན་པའི། །འཕགས་ཆེན་རྣམས་ཀྱི་རྣམ་ཐར་སྤྱོད་ཡུལ་ལ། །ངེས་པའི་ཤེས་པ་ད་གཟོད་ཅུང་ཟད་རྙེད། །ཡུལ་མེད་རང་གསལ་རྗེན་པའི་མཉམ་བཞག་དང་། །ངོ་ཤེས་ངང་ལ་སྐྱོང་བའི་རྗེས་ཐོབ་བཅས། །མྱོང་ཚོར་མཚན་མ་ཕྲ་མོ་དང་འགྲོགས་པས། །ད་དུང་གཉུག་མའི་གཤིས་ལ་སྒྲིབ་མཐོང་ནས། །ད་ནི་འཕྲོ་གནས་གཉིས་མེད་གང་ལྟར་ཡང་། །འཛིན་པས་མ་བཅིང་གཉེན་པོས་མ་བཅུན་པའི། །རང་བབས་ཤེས་པ་གཉིས་སྣང་ལས་འདས་པ། །སོ་མའི་ངང་དེར་རང་འགྲོས་སྐྱོང་བ་ལགས། །རང་ཞལ་མཁའ་འགྲོའི་སྟོང་སྲོག་ཐོབ་པ་དེས། །ཁབ་ལེན་རྡོ་ལ་ལྕགས་ཕྱེ་འདུ་བ་བཞིན། །རིགས་ཅན་དྲྭ་བའི་སྤྲིན་གྱི་པདྨོའི་རྫིང་། །དབང་མེད་འབྱེད་དང་སྡུད་བཞིན་གཏིབ་སྲུང་ཡང་། །མིང་གི་རྟོག་པ་སྤང་བར་མ་ནུས་པས། །ཆོས་བརྒྱད་རེ་དོགས་དྲྭ་བ་མ་ཆོད་དེ། །མཚོ་གླིང་གྲུ་གཟིང་རྡོ་ལ་ཐོགས་བཞིན་མཆིས། །འདི་ལ་རྣོ་གཅོད་འཕྲུལ་གྱི་ཐབས་ཤིག་ཞུ། །གྱི་ལིང་སྒྲོག་བཀྲོལ་ལྟ་བུའི་བཀའི་མཆིད་ཅིག །སྙིང་གི་བདུད་རྩིར་ཐོབ་པར་གྱུར་ན་ཀོ །གླང་ཆེན་རྩལ་གྱིས་རབ་ལ་གཅོད་པ་བཞིན། །ཡབ་མེས་རྣམས་ཀྱི་ཤུལ་དེར་ཅིས་མི་སྙོགས། །ཨ་ལ་མཚར་གཏམ་ཕུལ་བར་ཐུགས་དགོངས་མི་ཁྲེལ་བ་དང་། སླད་མའི་ཆར་ཡང་ཐུགས་བརྩེས་ནམ་ཡང་མི་འདོར་བའི་བཀའ་དྲིན་བྱང་ཆུབ་སྙིང་པོའི་བར་དུ་ཞུ། འདེགས་ལྷ་གོས། གསོལ་འབྲས་ཕྲན་བུ་རྟགས་ལྡན་བཅས་པད་རྡོར་གྱིས་ཟླ་བ་དྲུག་པའི་ཚེས་གསུམ་ལ་ལྷ་སྒང་པདྨ་དྲྭ་བ་ནས་གུས་པས་ཕུལ།།