རྡོ་རྗེའི་གནས་བཞི་པ། སྨིག་རྒྱུ་ལྟ་བུའི་ལེའུ།

དེ་ལྟར་འོང་བ་མེད་པ་ལས། འགྲོ་བ་མེད་པའི་ངོ་བོ་ཉིད་དུ་ཆོས་ཐམས་ཅད་སྨིག་རྒྱུ་ལྟར་བསྟན་པ་ནི། ཡང་འདིར་རྒྱལ་བས་སྨིག་རྒྱུ་ལྟ་བུ་ཞེས། །གསུངས་པ་དེ་ཡང་ཇི་བཞིན་བཤད་ཀྱིས་ཉོན། །འདི་ལྟར་སྣང་སྲིད་འཁོར་འདས་ཀྱི་ཆོས་ཐམས་ཅད་སྣང་ལ་རང་བཞིན་མེད་པ་སྨིག་རྒྱུ་ལྟ་བུ་སྟེ། ཡུམ་བར་མ་ལས། རབ་འབྱོར་ཆོས་ཐམས་ཅད་གདོད་མ་ནས་འགྲོ་བ་མེད་པའི་ཕྱིར་སྨིག་རྒྱུ་ལྟ་བུའོ་ཞེས་གསུངས་པའི་དོན་གཞི་དང་ལམ་དང་འབྲས་བུ་གསུམ་གྱིས་བསྟན་པ་ལས། དང་པོ་གཞི་འགྲོ་བ་མེད་པའི་སྨིག་རྒྱུ་ལྟ་བུ་ལྟ་བས་ཐག་བཅད་པ་ནི། ཇི་ལྟར་སོས་ཀའི་ཉི་མ་ཕྱེད་དུས་ན། །ཐང་རྣམས་སྨིག་རྒྱུ་ཆུ་ཡི་ཕུང་པོ་བཞིན། །སེམས་ལ་བདག་འཛིན་ཤིན་ཏུ་གོམས་པའི་མཐུས། །སྲིད་པའི་འཁྲུལ་སྣང་སྨིག་རྒྱུ་ལྟ་བུ་སྣང་། །སོས་ཀའི་ཚེ་ཐང་ཀ་རིང་པོའི་སྟེང་ཐམས་ཅད་ན་ཉི་མའི་འོད་ཟེར་ཤར་བ་དང་། རང་གི་མིག་ཚ་བས་གདུང་སྟེ་བན་ཀན་འཕུར་བྱེད་ཀྱི་རླངས་འགྱུར་བ་གཉིས་བསྡོངས་པ་ལས། ཆུའི་འབབ་སྲོལ་ལྟར་སྣང་ཡང་ཆུ་ནི་མེད་དོ། །དེ་བཞིན་དུ་རིག་པའི་ངོ་བོ་གདོད་མ་ནས་དག་པའི་རང་བཞིན་ཡང་། རྐྱེན་བདག་ཏུ་རྟོག་པའི་ཆ་ཕྲ་མོ་དང་། རང་གདངས་ཡུལ་དུ་སྣང་བའི་ཐང་ཀ་འཇམ་པོ་སྟོང་པ་ལས། འཁྲུལ་སྣང་སྨིག་རྒྱུའི་ཆུ་ལྟར་རང་ཤར་ནས། ཁམས་གསུམ་རིགས་དྲུག་ཏུ་འཁོར་བ་ཡང་། རང་བཞིན་མེད་པའི་གཟུགས་བརྙན་མེད་པ་གསལ་བར་སྣང་བ་ཙམ་དུ་ཤེས་པར་བྱ་སྟེ། འཕགས་པ་ཏིང་འཛིན་རྒྱལ་པོའི་མདོ་ལས། ཇི་ལྟར་སོས་ཀའི་ཉི་མ་ཕྱེད་དུས་ན། །སྐྱེས་བུ་སྐོམ་པས་གདུང་ཞིང་འགྲོ་བ་དག །སྨིག་རྒྱུ་ལ་ནི་ཆུ་ཡི་ཕུང་པོར་མཐོང་། །ཆོས་རྣམས་ཐམས་ཅད་དེ་བཞིན་ཤེས་པར་གྱིས། །ཞེས་སོ། །ཇི་ལྟར་སྣང་བཞིན་པའི་དུས་ནས་ངོ་བོ་ཉིད་མེད་དོ་ཞེས་བསྟན་པ་ནི། །འདི་ལ་ངོ་བོ་ངོས་གཟུང་འགའ་མེད་དེ། །རང་བཞིན་གཉིས་མེད་སྟོང་པ་ཞི་བའི་ཆོས། །མ་སྐྱེས་ནམ་མཁའ་འདྲ་ཞིང་བདག་མེད་ལ། །སྐྱེ་མེད་བསམ་ཡུལ་འདས་པ་ཤེས་པར་བྱ། །སྣང་བཞིན་པའི་ངོ་བོ་ཉིད་ལ་རྡུལ་ཕྲན་དང་། ཕྱོགས་ཆ་(༤༩)དང་། ཁ་དོག་དང་། དབྱིབས་ལ་སོགས་པ་རྟོགས་པ་ན། ཕྱི་དང་ནང་གི་ཆོས་ཐམས་ཅད་ནམ་མཁའ་དང་འདྲ་བར་མཐོང་སྟེ། འཕགས་པ་དཀོན་མཆོག་སྒྲོན་མེའི་མདོ་ལས། ཆོས་རྣམས་ཐམས་ཅད་བདེ་བར་གཤེགས་དང་འདྲ། །ཞེས་པ་དང་། ཕྱིར་མི་ལྡོག་པ་འཁོར་ལོའི་མདོ་ལས། མ་རིག་ནམ་མཁའ་ཇི་བཞིན་ཏེ། །ཆོས་རྣམས་ཐམས་ཅད་མཚན་ཉིད་མེད། །ཅེས་སོ། །སྣང་བ་ཉིད་ནས་སྟོང་པའི་ཕྱིར། །རང་བཞིན་མེད་པར་བསྟན་པ་ནི། །ཇི་ལྟར་སྣང་འདི་སྣང་བའི་དུས་ཉིད་ནས། །སྐྱེ་བར་སྣང་ཡང་མ་སྐྱེས་སྨིག་རྒྱུ་ལ། །གནས་པར་སྣང་ཡང་མ་སྐྱེས་སྨིག་རྒྱུ་འདྲ། །འགག་པར་སྣང་ཡང་མི་འགག་སྨིག་རྒྱུ་བཞིན། །སྣང་ལ་རང་བཞིན་མེད་པར་ཤེས་པར་བྱ། །འདི་ལྟར་སྣ་ཚོགས་སུ་སྣང་བའི་དུས་ཉིད་ནས། དེ་རང་གི་ངོ་བོ་མ་གྲུབ་སྟེ། ཕྱི་སྣོད་ཀྱི་འཇིག་རྟེན་ཆགས་པ་དང་། མེ་ཏོག་ལ་སོགས་སྐྱེ་བ་དང་། ནང་བཅུད་ཀྱི་སེམས་ཅན་ཀུན་ཏུ་རྟོགས་པ་ཐམས་ཅད་སྐྱེ་བར་སྣང་དུས་ཉིད་ནས་སྐྱེ་བ་མེད་དེ། སྐྱེས་པ་ཡུལ་དང་སྐྱེར་སྣང་རིག་པའི་ངོ་བོར་མ་གྲུབ་པའི་ཕྱིར། དེ་བཞིན་དུ་ཡོད་ཡོད་སྲ་སྲ་ལྟར་གནས་པར་སྣང་དུས་ཉིད་ནས་གནས་པ་དང་གནས་མཁན་མ་གྲུབ་པ་ཉིད་དང་། འཇིག་རྟེན་ཞིག་ནས་སྟོང་པ་དང་། སེམས་ཅན་དུ་རྟོག་ཚོགས་འགྲོ་བར་སྣང་དུས་ཉིད་ནས་འགག་པ་དང་འགྲོ་བ་མེད་པས། སྨིག་རྒྱུའི་ཆུ་ལྟར་སྣང་ལ་རང་བཞིན་མེད་པར་ཤེས་པར་བྱ་སྟེ། དགོངས་འདུས་ལས། ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་རྣམས་ཀྱི་གསང་། །སྐྱེ་བ་མེད་ལས་ཐམས་ཅད་སྐྱེས། །སྐྱེས་ཙམ་ཉིད་ནས་སྐྱེ་བ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །གནས་པ་མེད་ལ་ཐམས་ཅད་གནས། །གནས་ཙམ་ཉིད་ནས་གནས་པ་མེད། །ཨེ་མ་ཧོ་ངོ་མཚར་རྨད་ཀྱི་ཆོས། །རྫོགས་པའི་སངས་རྒྱས་ཀུན་གྱི་གསང་། །འགྲོ་འོང་མེད་ལ་འགྲོ་དང་འོང་། །འགྲོ་འོང་ཉིད་ནས་འགྲོ་འོང་མེད། །ཅེས་སོ། །

ཚུལ་དེ་ལྟ་བུའི་ངོ་བོ་ཉིད་ལས་སྤྱོད་པ་རྣམ་སྦྱོང་གི་ཆོས་སུ་བསྟན་པ་ཡང་། དགའ་དང་མི་དགའ་བདེ་སྡུག་བཟང་ངན་ཀུན། །སྨིག་རྒྱུ་འདྲ་ཞིང་སྟོང་ལ་བདག་མེད་དེ། །ཕྱི་ནང་སྣང་སྲིད་ཆོས་ཀུན་སྨིག་རྒྱུ་འདྲ། །མེད་བཞིན་སྣང་ལ་རང་བཞིན་གདོད་ནས་དག །ཡེ་སྟོང་མཐའ་དབུས་མེད་ཅེས་རྟོགས་པར་བྱ། །ཕྱི་ནང་གི་ཆོས་རྣམས་རང་བཞིན་མེད་པ་ཡིན་པའི་ཕྱིར་དགག་སྒྲུབ་དང་དགྲ་གཉེན་ལ་སོགས་པ་ཐམས་ཅད་ལ་རང་གྲོལ་སྨིག་རྒྱུ་འདྲ་བས་ལམ་དུ་བྱ་ཞིང་། གདོད་མ་ནས་སྟོང་པའི་རང་གདངས་ཤར་བ་ཙམ་དུ་རྟོགས་པར་བྱའོ། །དེའི་ཕྱིར་ན། གཉིས་མེད་གཉིས་སུ་འཛིན་པ་སྨིག་རྒྱུ་བཞིན། །དོན་མེད་དགག་སྒྲུབ་ཞེན་པས་མ་འཆིངས་པར། །རང་སེམས་གཉིས་མེད་(༥༠)སྨིག་རྒྱུ་ལྟ་བུར་ལྟོས། །འདི་ནི་དུས་གསུམ་རྒྱལ་བའི་དགོངས་པ་ཡིན། །བདག་གཞན་དགག་སྒྲུབ་ཏུ་ཞེན་པ་རང་མཚན་པ་མི་རིགས་ཏེ། ཆོས་ཐམས་ཅད་སྨིག་རྒྱུ་ལྟར་སྣང་ལ་རང་བཞིན་མ་གྲུབ་པའི་ཕྱིར་རོ། །ཡེ་ཤེས་སྣང་བ་རྒྱན་གྱི་མདོ་ལས། འཇམ་དཔལ་སྨིག་རྒྱུ་ནི་སྣང་ལ་རང་བཞིན་མེད་པའོ། །དེ་བཞིན་དུ་ཆོས་ཐམས་ཅད་སྣང་ལ་རང་བཞིན་མེད་པའོ་ཞེས་སོ། །ལམ་ཉམས་སུ་བླང་བ་ནི། དེ་ནས་ཇི་ལྟར་བསྒོམ་པའི་རིམ་པ་ཡང་། །སྔོན་འགྲོ་སྔར་བཞིན་སྨིག་རྒྱུའི་གསོལ་བ་གདབ། །བླ་མའི་རྣལ་འབྱོར་སྔར་དང་འདྲ་བ་ལས། ཆོས་ཐམས་ཅད་སྨིག་རྒྱུ་ལྟ་བུར་འབྱོངས་པར་མཛད་དུ་གསོལ་ཞེས་ཁྱད་པར་དུ་བྱའོ། །དེ་ནས། དངོས་གཞི་ཆོས་ཀུན་སྨིག་རྒྱུ་ལྟ་བུའི་ངང་། སེམས་ཀྱི་འབྱུང་འཇུག་རེ་དོགས་བྲལ་བར་གཞག །མཚན་མོའང་སྔར་བཞིན་བརྟགས་ན་སྨིག་རྒྱུར་འཆར། །ཉིན་པར་གྱི་སྣང་བ་སྨིག་རྒྱུ་ཡིན་ལ། རང་བཞིན་ཅི་ཡང་མེད་དོ་སྙམ་ནས་སེམས་ཕྱིར་འབྱུང་བ་འཕྲོ་བ་དང་། ནང་དུ་འཇུག་པ་ཡིད་རྩེ་གཅིག་སྡུད་པ་མེད་པའི་ངང་ལ་གློད་ནས། རིག་པའི་རང་གདངས་ངོས་བཟུང་ལ་ཡང་ཡང་དུ་སྐྱོང་ངོ་། །མཚན་མོའི་དུས་སུ་སྔར་བཞིན་ཉལ་བ་ལས། རྩ་དབུ་མ་གཅིག་ཏུ་གསལ་གདབ་པའི་ངང་ལ་གཉིད་ལོག་པས་སྨིག་རྒྱུ་ལྟ་བུའི་རྨི་ལམ་ཟིན་ནས་སྤྲུལ་བསྒྱུར་ནུས་པ་དང་། ཉེ་འཁོར་དུ་མཐོང་ཐོས་མ་འགགས་ལ་གཉིད་མ་སད་པ་དང་། དུ་བ་དང་སྨིག་རྒྱུ་དང་མེ་ཁྱེར་ལ་སོགས་པའི་སྣང་བ་དཔག་ཏུ་མེད་པ་འཆར་རོ། །འབྲས་བུ་ནི། གང་ལའང་མ་ཞེན་བདག་འཛིན་ངང་གིས་གྲོལ། །གཟུངས་སྤྲིན་མངོན་ཤེས་ཏིང་འཛིན་ཁོང་ནས་འཆར། །རྒྱལ་བའི་གོ་འཕང་མྱུར་དུ་འགྲུབ་པས་ན། །རང་བཞིན་སྨིག་རྒྱུ་ལྟ་བུའི་དོན་སྒོམས་ཤིག །གནས་སྐབས་སུ་ཆོས་ཐམས་ཅད་སྨིག་རྒྱུ་ལྟར་རྟོགས་པས་ཆགས་སྡང་ལས་གྲོལ་ཞིང་། གཟུངས་དང་། ཏིང་ངེ་འཛིན་དང་། སྤྱན་དང་། མངོན་པར་ཤེས་པ་འཆར་རོ། །དེ་ལ་ཚིག་དོན་གྱི་ཆོས་འཛིན་པ་མི་བརྗེད་པར་བསྟན་པའི་ཕྱིར་གཟུངས་ཏེ། སུ་སི་ཏི་ཀ་ར་ལེགས་པར་གྲུབ་པའི་རྒྱུད་ལས། གཟུངས་ནི་གང་ཕྱིར་རྣམ་གསུམ་གཟུངས། །ཚིག་དང་དོན་དང་གཉིས་ཀ་དང་། །ལེགས་པ་ལས་ནི་ཉམས་པ་ལས། །འཛིན་པའི་ཕྱིར་ན་གཟུངས་ཞེས་བྱ། །ཞེས་སོ། །ཏིང་ངེ་འཛིན་རིག་པའི་ངང་དྭངས་རྩེ་གཅིག་པ་དང་། དོན་གང་ལ་མཉམ་གཞག་གི་ངང་རྩེ་གཅིག་པའོ། །ཏིང་ངེ་འཛིན་རྒྱལ་པོ་ལས། གསེར་གྱི་ཁ་དོག་ལྟ་བུའི་སྐུ་ལུས་ཀྱི། །འཇིག་རྟེན་མགོན་པོ་ཀུན་ནས་རབ་མཛེས་པ། །དམིགས་པ་འདི་ལ་གང་གིས་སེམས་འཇོག་པ། །བྱང་ཆུབ་སེམས་དཔའ་དེ་མཉམ་གཞག་ཅེས་བྱ། །ཞེས་པ་ལྟ་བུའོ། །སྤྱན་ནི་སྒྲིབ་པས་ཆོད་པའི་ཕ་རོལ་ཐོགས་མེད་དུ་མཐོང་བ་ལ་སོགས་པའོ། །མངོན་ཤེས་ནི་ཚེ་རབས་ཤེས་པ་ལ་སོགས་པ་སྟེ། དོན་ཅི་ཡིན་པ་མངོན་དུ་ཤེས་པའོ། །རྣམ་གྲོལ་ཡོན་ཏན་མཚོ་ཆེན་ལས་འཁྲུངས་པ། །དཔག་མེད་ཞིང་གི་དམ་པ་སྐྱེ་དགུའི་གཙོ། །མ་ལུས་བདེ་འབྱུང་བདེ་གཤེགས་དབང་པོ་དང་། །སྐལ་བ་གཅིག་པས་བདུད་རྩི་ཐོབ་པར་ཤོག །དག་པ་ཞིང་ཁམས་རིན་ཆེན་ས་གཞི་ལ། །(༥༡)གཞལ་མེད་ཁང་བརྩེགས་ཡིད་འོང་ཉམས་དགའ་བར། །ཆོས་རྔ་སྒྲོགས་པས་སེམས་གཙང་རྙོག་པ་མེད། །འོད་དཔག་མེད་པའི་གནས་རབ་མཐོང་བར་ཤོག །སྣ་ཚོགས་སྣང་ལ་རང་བཞིན་དག་པའི་དངོས། །མ་སྐྱེས་སྟོང་པའི་ཚུལ་འདིར་ཀུན་ཞུགས་ཏེ། །འཁོར་བའི་འཁྲུལ་སྣང་ཕྱམ་གཅིག་སྟོངས་ནས་ནི། །ཟག་མེད་ཞི་བ་མྱ་ངན་འདས་ཐོབ་ཤོག །རྫོགས་པ་ཆེན་པོ་སྒྱུ་མ་ངལ་གསོ་ལས། སྨིག་རྒྱུ་ལྟ་བུའི་ལེའུ་སྟེ་རྡོ་རྗེའི་གནས་བཞི་པའི་འགྲེལ་པའོ།། །།