ངེས་འབྱུང་སྐྱོ་ཤས་སྐྱེ་བའི་མགུར་རི་ཁྲོད་དགོན་པ་མ་ཞེས་བྱ་བ།

ལེའུ་དང་པོ། ངེས་འབྱུང་ཆོས་ལ་བསྐུལ་བ།

༄༅། །ངེས་འབྱུང་སྐྱོ་ཤས་སྐྱེ་བའི་མགུར་རི་ཁྲོད་དགོན་པ་མ་ཞེས་བྱ་བ་བཞུགས་སོ། །

༈ ན་མོ་གུ་རུ་བྷྱཿ ཆོས་རྗེ་རྒྱལ་སྲས་ཆེན་པོ་ཉིད་ལྷུན་གྲུབ་གླིང་གི་དབེན་གནས་ན་བཞུགས་པའི་དུས་སུ་ཕྱོགས་རིས་ནས་འདུས་པའི་དད་ལྡན་རྣམས་ཀྱིས། བླ་མ་རིན་པོ་ཆེས་མདོའི་གྲོང་དང་སྡེ་དགོན་གྱི་གནས་གང་ནའང་བདེ་བ་མི་གདའ་བས། སེམས་ཉིད་རྟོགས་པའི་སྒོམ་ཆེན་པ་རི་ཁྲོད་འགྲིམ་པ་ལས་སྐྱིད་པ་མ་མཐོང་བས། ངེས་འབྱུང་སྐྱོ་ཤས་སྐྱེ་བ། རི་ཁྲོད་དགོན་པའི་ཡོན་ཏན་དྲན་པ་གཅིག་མགུར་དུ་བཞེངས་པར་ཞུ་ཞེས་གསོལ་བ་བཏབ་པའི་དུས་སུ། རི་ཁྲོད་དགོན་པ་མ་ཞེས་བྱ་བ་ངེས་འབྱུང་སྐྱོ་ཤས་སྐྱེ་བ་འདི་གསུངས་སོ། །དྲིན་ཅན་བླ་མ་རིན་པོ་ཆེ། །འདི་ནས་བྱང་ཆུབ་སྙིང་པོའི་བར། །མི་འབྲལ་སྤྱི་གཙུག་རྒྱན་དུ་བཞུགས། །གསོལ་བ་འདེབས་སོ་བྱིན་གྱིས་རློབས། །གསོན་དང་དད་ལྡན་སྐྱེ་བོ་ཀུན། །གང་ལ་བལྟས་ཀྱང་སྙིང་པོ་མེད། །སྙིང་ནས་དམ་ཆོས་བྱེད་རེ་རན། །རི་ཁྲོད་དབེན་པ་འགྲིམ་དུ་གཤེགས། །ད་རེས་ལམ་སྣ་མ་ཟིན་ན། །མི་ལུས་ཐོབ་ཀྱང་དོན་རེ་ཆུང་། །ཟབ་མོའི་དེ་ཉིད་སྒོམ་རེ་རན། །རི་ཁྲོད་དབེན་པ་འགྲིམ་དུ་གཤེགས། །འཁྲུལ་མེད་བཙན་ས་མ་ཟིན་ན། །དལ་འབྱོར་ཐོབ་ཀྱང་ཆུད་རེ་གསན། །ཆོས་སྐུའི་གཏན་ཡུལ་འཛིན་རེ་རན། །རི་ཁྲོད་དབེན་པ་འགྲིམ་དུ་གཤེགས། །སྣང་བ་ཆོས་ལ་མ་བསྒྱུར་ན། །དབང་པོ་ཚང་ཡང་དོན་རེ་ཆུང་། །ཉིན་མཚན་ཆོས་ལ་བརྩོན་རེ་རན། །རི་ཁྲོད་དབེན་པ་འགྲིམ་དུ་གཤེགས། །རྟག་ཏུ་དགེ་ལ་མ་འབད་ན། །མཐོ་རིས་ཐོབ་ཀྱང་དོན་རེ་ཆུང་། །ཚོགས་གཉིས་ལས་ལ་འབད་རེ་རན། །རི་ཁྲོད་དབེན་པ་འགྲིམ་དུ་གཤེགས། །མི་དགེ་སྡིག་པ་མ་སྤངས་ན། །མི་ལུས་སྐྱེས་ཀྱང་དོན་རེ་ཆུང་། །ལས་ངན་སྡིག་སྒྲིབ་སྦྱང་རེ་རན། །རི་ཁྲོད་དབེན་པ་འགྲིམ་དུ་གཤེགས། །དགེ་བའི་བཤེས་ཀྱིས་མ་ཟིན་ན། །རྗེ་དཔོན་བཟང་ཡང་དོན་རེ་ཆུང་། །མཚན་ལྡན་བླ་མ་མཇལ་རེ་རན། །རི་ཁྲོད་དབེན་པ་འགྲིམ་དུ་གཤེགས། །དམ་པའི་གྲོགས་དང་མ་འཕྲད་ན། །མཛའ་བཤེས་མང་ཡང་དོན་རེ་ཆུང་། །ཆོས་མཛད་གྲོགས་དང་འགྲོགས་རེ་རན། །རི་ཁྲོད་དབེན་པ་འགྲིམ་དུ་གཤེགས། །ཟབ་མོའི་ཆོས་དང་མ་མཇལ་ན། །ཐ་སྙད་མང་ཡང་དོན་རེ་ཆུང་། །སྙིང་པོའི་དམ་ཆོས་ཚོལ་རེ་རན། །རི་ཁྲོད་དབེན་པ་འགྲིམ་དུ་གཤེགས། །རང་བྱུང་སེམས་ཉིད་མ་མཐོང་ན། །འཁྲུལ་པའི་གཟའ་ཚང་མཐུན་ཡང་འབྲལ། །འབྲལ་མེད་དོན་ལ་སྦྱོར་རེ་རན། །རི་ཁྲོད་དབེན་པ་འགྲིམ་དུ་གཤེགས། །ཆོག་ཤེས་ནོར་དང་མི་ལྡན་ན། །སྒྱུ་མའི་ནོར་རྫས་སྤངས་ནས་འགྲོ། །གསོག་འཇོག་ཆགས་ཞེན་བསྐྱུར་རེ་རན། །རི་ཁྲོད་དབེན་པ་འགྲིམ་དུ་གཤེགས། །རིག་(༡༩)པའི་གཏན་ཡུལ་མ་ཟིན་ན། །ས་མཁར་མཐོན་པོ་བརྩིགས་ཀྱང་འཇིག །ཆོས་དབྱིངས་གནས་ལ་བརྟེན་རེ་རན། །རི་ཁྲོད་དབེན་པ་འགྲིམ་དུ་གཤེགས། །སྐུ་གསུམ་ཞིང་ཁམས་མ་སྦྱངས་ན། །གྲོང་ཡུལ་སྡེ་དགོན་འགའ་ཡང་འདོར། །མཐར་ཐུག་ཟད་སར་ཕྱིན་རེ་རན། །རི་ཁྲོད་དབེན་པ་འགྲིམ་དུ་གཤེགས། །འཆི་མེད་བཙན་ས་མ་ཟིན་ན། །སྐྱེས་པའི་ལུས་འདི་ཐ་མ་འདོར། །སྐྱེ་མེད་ཆོས་ལ་སྦྱང་རེ་རན། །རི་ཁྲོད་དབེན་པ་འགྲིམ་དུ་གཤེགས། །དབེན་པའི་རི་ངོགས་མ་བསྟེན་ན། །སྡེ་དགོན་གྲོང་ཡུལ་ཉོན་མོངས་འཕེལ། །གཅིག་པུར་དབེན་པར་གནས་རེ་རན། །རི་ཁྲོད་དབེན་པ་འགྲིམ་དུ་གཤེགས། །རི་ཁྲོད་དགོན་པ་མ་ལས། ངེས་འབྱུང་ཆོས་ལ་བསྐུལ་བའི་ལེའུ་སྟེ་དང་པོའོ།། །།

ལེའུ་གཉིས་པ། སྙིང་ནས་སྐྱོ་ཤས་བསྐྱེད་པ།

ཡང་དེའི་ཚེ་དུས་ངན་འཁོར་བར་སྐྱོ་བའི་མགུར་འདི་གསུངས་སོ། །སྣང་བ་འདི་ཡི་འགྱུར་ལུགས་སམ། །སྐྱོ་ཤས་འདི་ཡི་སྐྱེ་ལུགས་སམ། །རི་ཁྲོད་དགོན་པ་འགྲིམ་དུ་གཤེགས། །དུས་ཚོད་འདི་ཡི་ངན་ལུགས་སམ། །མཐའ་དབུས་མེད་པའི་འཁྲུགས་ལུགས་སམ། །འཕོ་འདེགས་འདི་ཡི་ཆེ་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །ཚེ་སྲོག་འདི་ཡི་གཡོ་ལུགས་སམ། །འཆི་རྐྱེན་འདི་ཡི་མང་ལུགས་སམ། །ན་ཤི་འདི་ཡི་མོད་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །ཡོད་པ་འདི་ཚོའི་སེར་སྣ་འམ། །མེད་པ་འདི་ཚོའི་རྩོལ་སྒྲུབ་བམ། །ཆེ་ཆུང་མེད་པའི་འདོད་པ་འམ། །རི་ཁྲོད་དབེན་པ་འགྲིམ་དུ་གཤེགས། །གྲོང་ཡུལ་རྣམས་ཀྱི་རྒུད་ལུགས་སམ། །མཐའ་མི་ཧོར་སོག་མང་ལུགས་སམ། །ཁྲལ་དམག་འདི་ཡི་ཆེ་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །སྐྱེ་བོ་རྣམས་ཀྱི་རྩོད་ལུགས་སམ། །བཟང་དྲིན་ཉེས་ཀྱི་འཇལ་ལུགས་སམ། །དད་མེད་སྡིག་ལ་རྔམས་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །འཇིག་རྟེན་ཡོངས་ཀྱི་རྒྱལ་ཁྲིམས་སམ། །ཡོད་མིན་མེད་མིན་གཟུགས་བརྙན་ནམ། །ངན་བྱེད་ངོ་སོའི་མཐོ་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །དུས་བཞིའི་རིམ་པ་འཆོར་ལུགས་སམ། །ཆར་ཆུ་སྒང་གཤོངས་ཆེ་ལུགས་སམ། །ནད་དང་མུ་གེ་མང་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །སྡེ་དགོན་རྣམས་ཀྱི་འཁྲུགས་ལུགས་སམ། །ཆོས་པ་རྣམས་ཀྱི་ཆགས་སྡང་ངམ། །འདོད་ཡོན་འདུ་འཛིའི་གཉེར་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །བཙུན་པ་ནོར་ལ་གདུང་ལུགས་སམ། །ཚོང་དང་སོ་ནམ་བུན་སྐྱེད་དམ། །ཆོས་མིན་བྱ་བྱེད་མང་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །ནོར་ཕྱིར་ངོ་ཚ་གཏོང་ལུགས་སམ། །གཡོ་སྒྱུ་ཟོལ་ཁྲམ་ཆེ་ལུགས་སམ། །སྡོམ་དང་དམ་ཚིག་འཆལ་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །ཆེ་ཆུང་མེད་པའི་འདོད་པ་འམ། །འདུལ་ཁྲིམས་ཁྱད་དུ་གསོད་པ་འམ། །རྟགས་ཙམ་འཛིན་པའི་མང་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །འཁྲུལ་སྣང་བདེན་པར་འཛིན་ལུགས་སམ། །ཆོས་དང་རང་རྒྱུད་འཛོལ་ལུགས་སམ། །ཐ་མལ་ངང་དུ་འཆི་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །མི་ཤེས་རྨོངས་པ་མང་ལུགས་སམ། །ཤེས་ཀྱང་སྒྲུབ་པ་ཉུང་ལུགས་སམ། །དད་དང་ངེས་འབྱུང་མེད་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །ཆོས་ལྟར་བཅོས་པ་མང་(༢༠)ལུགས་སམ། །ཆོས་བཞིན་མཛད་པ་ཉུང་ལུགས་སམ། །ཆོས་བརྒྱད་ཁུར་པོ་ཆེ་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །བསམས་ཤིང་སྐྱོ་བ་སྐྱེ་ལུགས་སམ། །གཞིག་ཅིང་སྙིང་པོ་མེད་ལུགས་སམ། །བརྟགས་ཤིང་དགོས་མེད་སྐྱེ་ལུགས་སམ། །རི་ཁྲོད་དབེན་པ་འགྲིམ་དུ་གཤེགས། །རི་ཁྲོད་དགོན་པ་མ་ལས། སྙིང་ནས་སྐྱོ་ཤས་བསྐྱེད་པའི་ལེའུ་སྟེ་གཉིས་པའོ།། །།

ལེའུ་གསུམ་པ། དམ་ཆོས་སྙིང་ནས་བསྐུལ་བ།

ཡང་དེའི་ཚེ་མདོ་དོན་ཆོས་ལ་བསྐུལ་བའི་མགུར་འདི་གསུངས་སོ། །ཡང་ཅིག་གསོན་དང་སྐལ་ལྡན་ཀུན། །བརྒྱ་ལ་རེས་འགའི་མི་ལུས་འདི། །དོན་མེད་ཆུད་ཟོས་བྱེད་པ་མང་། །རི་ཁྲོད་དགོན་པ་འགྲིམ་དུ་གཤེགས། །འཁོར་བ་པ་ལ་བདེ་བ་མེད། །སྡུག་པར་འདུག་ཀྱང་སུན་མཁན་མེད། །བྱ་དགོས་ཆོས་ལ་ཉན་མཁན་མེད། །རི་ཁྲོད་དགོན་པ་འགྲིམ་དུ་གཤེགས། །ཚེ་འདིའི་བྱ་བས་བསླུས་བསླུས་ནས། །ཕྱི་མའི་བདེ་བ་གཉེར་མཁན་མེད། །དོན་ཆུང་ལས་ལ་མི་ཚེ་ཟད། །རི་ཁྲོད་དགོན་པ་འགྲིམ་དུ་གཤེགས། །མི་རྣམས་ཕལ་ཆེར་ཅེར་རེ་ལོང་། །དོན་ཆེན་བཞག་ནས་དོན་ཆུང་གཉེར། །འཆི་དུས་དོན་མེད་སྟོང་བར་འགྲོ། །རི་ཁྲོད་དགོན་པ་འགྲིམ་དུ་གཤེགས། །དབང་པོ་ཚང་ཡང་སྙིང་མེད་མང་། །ཡར་འགྲོའི་ཆོས་ལ་བྱེད་མཁན་མེད། །མར་འགྲོའི་སྡིག་པ་སུས་ཐོབ་བྱེད། །རི་ཁྲོད་དགོན་པ་འགྲིམ་དུ་གཤེགས། །ཚེ་འདིའི་སྣང་བ་དར་ཅིག་ལ། །གཏན་དུ་འཁྲུལ་པའི་ལས་ངན་སོག །འཆི་ཁར་འགྱོད་ཀྱང་ཕན་པ་མེད། །རི་ཁྲོད་དགོན་པ་འགྲིམ་དུ་གཤེགས། །སྒྱུ་མའི་ནོར་ལ་སྙིང་པོ་མེད། །ཡོད་ཅིང་ཇེ་དགོས་སྲེད་པ་འཕེལ། །རང་གིས་བསགས་པ་གཞན་གྱིས་སྤྱོད། །རི་ཁྲོད་དགོན་པ་འགྲིམ་དུ་གཤེགས། །མཛའ་བཤེས་འཁོར་གྱིས་དགོས་པ་མེད། །ཚེ་འདིར་འཆིང་ཞིང་ཟག་པ་འཕེལ། །མཐུན་པར་འགྲོགས་ཀྱང་ཐ་མར་འབྲལ། །རི་ཁྲོད་དགོན་པ་འགྲིམ་དུ་གཤེགས། །བྱས་པའི་ལས་ལ་ཟིན་པ་མེད། །བྱས་ཤིང་བྱ་དགོས་དེ་བས་མང་། །འཁྲུལ་པའི་སྣང་བས་ཉིན་མཚན་འདའ། །རི་ཁྲོད་དགོན་པ་འགྲིམ་དུ་གཤེགས། །ཚེ་འདིའི་ཆོས་ལ་སྙིང་པོ་མེད། །གང་ལྟར་བྱས་ཀྱང་བདེ་བ་མེད། །ཇི་ལྟར་བྱས་ཀྱང་ལེགས་པ་མེད། །རི་ཁྲོད་དགོན་པ་འགྲིམ་དུ་གཤེགས། །མང་པོའི་གནས་ན་འདུ་འཛིས་གཡེངས། །སྡེ་དགོན་ཡིན་ཡང་ཕན་པ་མེད། །ཆགས་སྡང་ཕྱོགས་རིས་ཟག་པ་འཕེལ། །རི་ཁྲོད་དགོན་པ་འགྲིམ་དུ་གཤེགས། །སྙིང་ནས་དམ་ཆོས་མཛད་པ་ཀུན། །ཚེ་འདིའི་བྱ་བ་བློས་བཏང་ལ། །ཐར་པའི་དམ་ཆོས་སྒྲུབ་པའི་ཕྱིར། །རི་ཁྲོད་དགོན་པ་འགྲིམ་དུ་གཤེགས། །རི་ཁྲོད་དགོན་པ་མ་ལས། དམ་ཆོས་སྙིང་ནས་བསྐུལ་བའི་ལེའུ་སྟེ་གསུམ་པའོ།། །།

ལེའུ་བཞི་པ། གནས་ཀྱི་ཡོན་ཏན་བརྗོད་པ།

ཡང་དེའི་ཚེ་རི་ཁྲོད་དབེན་པའི་ཡོན་ཏན་མགུར་དུ་གསུངས་པ། རི་ངོགས་དབེན་པའི་གནས་མཆོག་ན། །ཚེ་འདིའི་རྣམ་གཡེང་འདུ་འཛི་མེད། །ཕྱི་མའི་དམ་ཆོས་ངང་གིས་འགྲུབ། །རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །སྐྱེ་བོ་མང་པོ་བསྟེན་འདྲིས་མེད། །ཕན་ཚུན་དགག་སྒྲུབ་ཟུག་རྔུ་བྲལ། །(༢༡)རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །གཅིག་པུར་སྒྲུབ་པ་ངང་གིས་འཕེལ། །ངོ་སྲུང་སེམས་འཛིན་སྡུག་བསྔལ་མེད། །རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །འཁྲུལ་པའི་བྱ་བྱེད་ངང་གིས་ཉུང་། །མ་ཟིན་དོགས་པའི་སྡུག་བསྔལ་མེད། །རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །གང་བྱུང་ཆོག་ཤེས་ནོར་གྱིས་ཕྱུག །མ་ལྡང་དོགས་པའི་སྡུག་བསྔལ་མེད། །རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །དུས་བཞིར་འགྱུར་བའི་རིམ་པ་ཡིས། །མི་རྟག་སྐྱོ་ཤས་ངང་གིས་འཕེལ། །རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །དད་དང་ངེས་འབྱུང་གསར་དུ་སྐྱེ། །བླ་མ་མཁའ་འགྲོས་བྱིན་གྱིས་རློབས། །རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །ཉམས་རྟོགས་ཡོན་ཏན་གོང་འཕེལ་བས། །ཆོས་ཉིད་རིག་པའི་གཏན་ཡུལ་ཟིན། །རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །སྔོན་གྱི་རྒྱལ་བའི་ཡོན་ཏན་དང་། །གྲུབ་ཐོབ་གོང་མའི་ཡོན་ཏན་ཡང་། །དབེན་པ་བརྟེན་ལས་བྱུང་བར་གསུངས། །རི་ཁྲོད་དགོན་པ་འགྲིམ་དུ་གཤེགས། །རི་ངོགས་དབེན་པའི་གནས་མཆོག་ན། །ཆོས་ལ་བསྐུལ་བའི་རིམ་པ་འདི། །གུ་ཡངས་ཡན་པ་བློ་བདེ་ཡིས། །སྐལ་ལྡན་རྣམས་ཀྱི་སྙན་དུ་འབུལ། །དགེ་བས་མ་གྱུར་འགྲོ་བ་ཀུན། །ཉིན་མཚན་ཆོས་ཀྱིས་འདའ་བར་ཤོག །མངོན་པར་བྱང་ཆུབ་སངས་རྒྱས་ནས། །གཞན་དོན་མཛད་པ་མཐའ་ཡས་ཤོག །རི་ཁྲོད་དགོན་པ་མ་ལས། གནས་ཀྱི་ཡོན་ཏན་བརྗོད་པའི་ལེའུ་སྟེ་བཞི་པའོ།། །།

ངེས་འབྱུང་སྐྱོ་ཤས་བསྐྱེད་པའི་རི་ཁྲོད་དགོན་པ་མ་ཞེས་བྱ་བའི་མགུར། ཐེག་པ་མཆོག་གི་རྣལ་འབྱོར་པ་ཡན་པ་བློ་བདེས་ལྷུན་གྲུབ་གླིང་གི་དབེན་གནས་སུ་གསུངས་པ་དགེའོ།། །།