སྔ་འགྱུར་བསྟན་པའི་སྣང་བྱེད་ཆེན་པོ་རྫོགས་ཆེན་དགེ་མང་རིན་པོ་ཆེའི་མཆོག་གི་སྤྲུལ་པའི་སྐུས་གསུང་བསྐུལ་ཕེབས་པའི་ཞུས་ལེན།
མ་ཧཱ་གུ་རུ་ཐོད་ཕྲེང་རྩལ་ལ་འདུད། །པདྨ་ཀུན་ཏུ་འཆང་གིས་བྱིན་གྱིས་རློབས། །རིག་པའི་ངོ་བོ་འཁོར་འདས་ཀུན་ལ་ཁྱབ། །ཆོས་རྣམས་ཀུན་གྱི་གནས་ལུགས་དེ་བཞིན་ཉིད། །སྨྲ་བསམ་བརྗོད་པ་ཀུན་གྱི་ཡུལ་ལས་འདས། །ཀ་དག་ནམ་མཁའ་དང་མཚུངས་འདུས་མ་བྱས། །མ་བཅོས་རང་བྱུང་སྤྲོས་པའི་མཐའ་དང་བྲལ། །གདོད་ནས་མ་འཁྲུལ་གྲོལ་བར་བྱ་བའང་མེད། །རིགས་པའི་རང་བཞིན་ཡེ་ནས་འོད་དུ་གསལ། །ཅིར་ཡང་མ་ཡིན་རང་རྩལ་ཅིར་ཡང་འཆར། །ཡེ་ཤེས་ཡིན་པས་སྐུ་དང་ཞིང་ཁམས་ཤར། །ཉོན་མོངས་བྱེ་བས་གཡོགས་ཀྱང་སྒྲིབ་པ་མེད། །གནས་ལུགས་མངོན་ཏུ་གྱུར་ཀྱང་དག་པ་མེད། །རིག་པའི་རྩལ་ལ་རང་ངོ་མ་ཤེས་པའི། །སྐད་ཅིག་རྟོག་པས་གཟུང་འཛིན་གཉིས་སུ་འཁྲུལ། །འཁོར་འདས་རྒྱབ་གྱེས་སྲིད་པ་གསུམ་དུ་འཁྱམས། །བདག་ཅེས་བྱ་བ་གཞི་ནས་མ་གྲུབ་ཀྱང་། བདག་ཏུ་འཛིན་པས་ཀུན་གྱི་འཁྲུལ་གཞི་བྱས། །འཛིན་རྟོག་དེ་ལ་སེམས་ཞེས་ཐ་སྙད་གདགས། །སེམས་ལས་སེམས་བྱུང་མུ་མཐའ་མེད་པར་འཕེལ། །ངོས་མ་ཟིན་པས་སྡུག་བསྔལ་གཟེབ་ཏུ་ཆུད། །སེམས་ཀྱི་མཚང་རིག་འཛིན་པ་ཕུག་རྡིབས་ན། །རང་གྲོལ་རིག་པ་རང་ས་ཟིན་པར་འགྱུར། །ལུང་རིགས་དུ་མས་གནས་ལུགས་དཔྱོད་པ་ཡང་། །ཕྱོགས་མཐོང་ཙམ་ལས་ཇི་བཞིན་རྟོགས་མི་
འགྱུར། །དོན་དམ་བློ་ཡི་ཡུལ་ལས་ཤིན་ཏུ་འདས། །སོར་རྟོག་ཉིད་ཀྱང་དོན་ལ་སེམས་ཡིན་པས། །གདོད་མའི་གནས་ལུགས་སྒྲིབ་པའི་གེགས་སུ་འགྱུར། །འཁོར་འདས་བདེན་གཉིས་གྲོལ་འཁྲུལ་རྟོགས་མ་རྟོགས། །གཟུང་འཛིན་ཕྱོགས་སུ་གཏོགས་ཚད་སེམས་ཡིན་པས། །དེ་དོན་བསྒོམ་པས་འཁྲུལ་ལ་ཉིང་འཁྲུལ་བསྣན། །བདག་ཏུ་འཛིན་པའི་རྩ་བ་མ་སྟོངས་པ། །ནམ་ཡང་གནས་ལུགས་དངོས་ལ་རེག་མི་ནུས། །འོན་ཀྱང་སེམས་ལ་བརྟེན་པའི་འཇོག་ཚུལ་ཀུན། །དང་པོའི་ལས་ཅན་དྲང་བའི་ཐབས་སུ་གསུངས། །བློ་འདས་རྫོགས་པ་ཆེན་པོའི་རྣལ་འབྱོར་པས། །སེམས་ལ་དགག་སྒྲུབ་མི་བྱེད་ཡན་གར་བཞག །རིག་པ་གཤིས་ཀྱི་གནས་ལུགས་རང་བབས་བསྐྱང་། །ཐ་མལ་ཤེས་པ་མ་བཅོས་མ་བསླད་པ། །སྟོང་གསལ་ཟང་ཐལ་རིག་པའི་སྙིང་པོ་ཅན། །རང་གི་མོས་གུས་བླ་མའི་བྱིན་བརླབས་དང་། །ལས་འཕྲོ་སད་པས་དེ་ཉིད་རྗེན་པར་མཐོང་། །དེ་ཚེ་འཁོར་འདས་ཆོས་ལ་སྤྲོས་པས་ཆོད། །སྒོམ་དང་མི་སྒོམ་བློ་ཡི་ཤུན་པ་བྲལ། །ཡེངས་དང་མ་ཡེངས་རྟོག་པའི་སྦུབས་ལས་གྲོལ། །ཀུན་གཞི་ལུང་མ་བསྟན་དང་མ་འདྲེས་པ། །ས་ལེ་སང་ངེ་ཝ་ལེ་ཧྲིག་གེ་བ། །འཛིན་སྟངས་བྲལ་བདེ་ལས་གཞན་མི་བཙལ། །གནས་ལུགས་རང་ངོ་ཇི་བཞིན་ཤེས་པ་ནི། །ཐོག་མར་ཆོས་ཉིད་མངོན་སུམ་མཐོང་བ་ཡིན། །
གོམས་ཤིང་འདྲིས་པས་ཡིད་ཆེས་བརྟན་ཐོབ་ནས། །ཉམས་མྱོང་སྣ་ཚོགས་གོང་དུ་འཕེལ་བ་སྟེ། །ཐ་མལ་གཤིས་ཐོག་ལྷན་གྱིས་ཕེབས་པ་ནི། །བར་དུ་རིག་པ་ཚད་ལ་ཕེབ་པའོ། །རང་བྱུང་ཡེ་ཤེས་བྲི་དང་གང་མེད་པར། །ཆོས་དབྱིངས་ཡངས་པ་ཆེན་པོར་ཕྱམ་བརྡལ་བ། །ཐ་མ་ཆོས་ཉིད་ཟད་པའི་སྣང་བ་ཞེས། །ཀ་དག་ཁྲེགས་ཆོད་ལུགས་ཀྱི་སྣང་གཞི་ནི། །མཐའ་རུ་ཕྱིན་པས་གདོད་མའི་ཟད་སར་སྐྱོལ། །དེ་ལྟར་རྟོགས་པའི་བློ་བདེའི་རྣལ་འབྱོར་པ། །བདག་ཏུ་རྟོག་པ་ཆོས་ཀྱི་དབྱིངས་སུ་སྟོང་། །འགྱུ་སྟོང་སེམས་ཀྱི་རྩ་བ་རང་སར་ཆོད། །གཟུང་འཛིན་འཁྲུལ་སྣང་སྐྱེ་འགག་མེད་པར་ཐིམ། །ཡིད་དང་ཆོས་སུ་བཏགས་པའི་མདུད་པ་ཞིག །མཐར་གྱིས་གདོད་མའི་གྲོལ་གཞིར་ཕྱིན་པར་འགྱུར། །ཉམས་སུ་ལེན་ལ་མང་དུ་སྨོས་མི་དགོས། །ང་དང་ང་ཡིར་འཛིན་དང་ཉོན་མོངས་སོགས། །དང་པོའི་ཐོལ་སྐྱེས་ཤེས་པ་སྐད་ཅིག་མ། །འཁྲུལ་གྲོལ་རྩ་བ་ཡིན་པས་དེ་མ་ཐག །རིག་པའི་ངང་དུ་རང་ཤར་རང་གྲོལ་ན། །ཆོས་སྐུའི་དགོངས་པ་ལོགས་སུ་ཚོལ་མི་དགོས། །རིག་པའི་རང་ངོ་རྟག་ཏུ་ཟིན་པ་ལས། །ལྷག་པའི་ལྟ་སྒོམ་གང་ཡང་མི་དགོས་ཀྱང་། །རྣམ་གཡེང་དབང་སོང་དྲན་པས་མ་ཟིན་ན། །ངོ་ཤེས་ཙམ་ལས་བརྟན་པ་མི་ཐོབ་པས། །གཡེང་སྦང་དབེན་པར་རྩེ་གཅིག་སྒོམ་པ་
གཅེས། །གཞུང་ལུགས་བཤད་ཉན་ཐོས་བསམ་བྱེད་པ་དག །ལུང་གི་བསྟན་པ་ཡིན་པས་ངོ་མཚར་ཡང་། །གྲུབ་མཐའི་བློ་ཡིས་ཡང་དག་དོན་ལ་སྒྲིབ། །སྒོམ་སྒྲུབ་དོར་ན་སྙིང་པོས་སྟོང་པའི་ཕྱིར། །རྟོགས་པའི་རྒྱུན་ཆད་བྱིན་རླབས་ཆུ་བོ་འགྲིབ། །གནྡྷོ་ལ་ཡིས་སེང་གེའི་གསོབ་བཞིན་ཏུ། །ཕྱག་རྫོགས་པ་ཡང་མིང་ཙམ་ཉིད་དུ་འགྱུར། །ལྟ་བ་མཐོ་ལ་སྤྱོད་པ་ཞིབ་པ་ཉིད། །མདོ་རྒྱུད་ལམ་གྱི་སྙིང་པོར་བསྔགས་པའི་ཕྱིར། །ལྟ་བའི་ཕྱོགས་སུ་སྤྱོད་པ་མ་ཤོར་ཅིང་། །སྤྱོད་པའི་ཕྱོགས་སུ་ལྟ་བ་མ་ལྷུང་བར། །སྲས་བཅས་རྒྱལ་བ་དགྱེས་པའི་ལམ་ལ་འཇུག །ཚིག་གི་སྤྲོས་པའི་ཕ་མཐའ་མི་ཆོད་པས། །དོན་དམ་གནད་དུ་དྲིལ་བའི་ཉམས་ལེན་མཐིལ། །སྟོང་ཉིད་སྙིང་རྗེ་ཟུང་དུ་འཇུག་ལ་འདུས། །སྟོང་ཉིད་དཔྱད་ནས་ཕྱི་རུ་མི་བཙལ་བར། །ནང་དུ་རང་སེམས་རྩ་བ་ལེགས་ཆོད་ན། །ཆོས་ཀུན་རང་གི་སེམས་ལས་མ་འདས་པས། །ཆུ་བརྒྱ་ཟམ་པ་གཅིག་གི་འོག་ཏུ་འདུས། །སྐྱེས་ཆེན་སྤྲུལ་བའི་སྐུ་མཆོག་ཉིད་ལྟ་བུར། །ཐ་ཤལ་བདག་འདྲས་འདི་གསོལ་མི་འོས་ཀྱང་། །ཐུགས་བརྩེའི་བཀའ་མཆིད་ཕེབ་ལེན་མ་ལྡོག་ཙམ། གང་ཤར་གང་དྲན་བཟོ་མེད་བྲིས་ནས་ཕུལ། །ཆོས་སྤྱན་ཡངས་པའི་འབབས་སྟེགས་མཛད་ནས་ཀྱང་། །དོན་གཉིས་ལྷུན་གྱིས་གྲུབ་པའི་རྒྱུ་རུ་ཤོག །ཅེས་སྔ་འགྱུར་བསྟན་པའི་སྣང་བྱེད་ཆེན་པོ་རྫོགས་
ཆེན་དགེ་མང་རིན་པོ་ཆེའི་མཆོག་གི་སྤྲུལ་པའི་སྐུས་གསུང་བསྐུལ་ཕེབས་བའི་ཞུས་ལེན་ཏུ་འོད་གསལ་རྡོ་རྗེ་རྩེ་མོ་ལ་མོས་པ་ལམ་དུ་བྱེད་པ་བློ་གྲོས་མཐའ་ཡས་ཀྱིས་ཕུལ་བ་དགེ་ལེགས་འཕེལ། །