ཐོབ་བྱ་འབྲས་བུ།

རྩ་བའི་ས་བཅད་གསུམ་པ་འབྲས་བུ་ཆོས་སྐུ་བཤད་པ་ལ། འབྲེལ་བཀོད་པའི་སྒོ་ནས་མཚམས་སྦྱར་བ་དང་། མཚོན་བྱེད་ཀྱི་ཆོས་རྒྱས་པར་བཤད་པ་གཉིས། དང་པོ་ནི། སྐད་ཅིག་མ་གཅིག་པའི་མངོན་པར་རྫོགས་པར་བྱང་ཆུབ་པ། ཞེས་པའི་སྐབས་སུ་གཉིས་ཀྱི། དང་པོ་འབྲས་བུ་ཆོས་སྐུ་ལ། མཚན་ཉིད་དང་དབྱེ་བ་གཉིས། དང་པོ་གོང་དུ་བསྟན་ཟིན། དབྱེ་ན། སྐུ་བཞིའོ། །ངག་དོན་ནི། རྗེ་བཙུན་བྱམས་མགོན་ཆོས་ཅན། སྐད་ཅིག་མའི་སྦྱོར་བའི་འོག་ཏུ་འབྲས་བུ་ཆོས་སྐུ་བཤད་པའི་རྒྱུ་མཚན་ཡོད་དེ། དེ་གཉིས་དངོས་རྒྱུ་དང་དངོས་འབྲས་སུ་འབྲེལ་བའི་ཕྱིར།

གཉིས་པ་ལ། བསྡུ་བ་སྤྱིར་བསྟན་པ་དང་། དཀའ་གནས་བྱེ་བྲག་ཏུ་བཤད་པ་གཉིས། དང་པོ་ནི། ཆོས་སྐུ་མཚོན་བྱེད་ཀྱི་ཆོས་རྣམ་པ་བཞི་གསུངས་པ་དེ་ཡང་བསྡུ་ན། རང་དོན་ཆོས་སྐུ་དང་། གཞན་དོན་གཟུགས་སྐུ་གཉིས་སུ་འདུས། དང་པོ་ལ། སྤངས་པ་དང་། རྟོགས་པ་གཉིས་ལས། དང་པོའི་དབང་དུ་བྱས་ནས་ངོ་བོ་ཉིད་སྐུ། གཉིས་པའི་དབང་དུ་བྱས་ནས་རྟོགས་ཡེ་ཆོས་སྐུ་བཞག །དང་པོ། ཐུབ་པའི་ངོ་བོ་ཉིད་སྐུ་ནི། ཞེས་སོགས་ཀྱིས་བསྟན། གཉིས་པ་ལ། ཆོས་སྐུའི་རང་བཞིན། ཡོན་ཏན་གྱི་ཁྱད་པར། རྩོད་པ་སྤོང་བ་དང་གསུམ། དང་པོ་ནི། བྱང་ཆུབ་ཕྱོགས་མཐུན་ཚད་མེད་དང་། ཞེས་སོགས། གཉིས་པ་ལ། ཉོན་མོངས་པ་མེད་པ་དང་། སྨོན་ནས་མཁྱེན་པའི་ཡོན་ཏན་གཉིས། དང་པོ་ནི། ཉན་ཐོས་ཉོན་མོངས་ཞེས་སོགས། གཉིས་པ་ནི། སངས་རྒྱས་སྨོན་ནས་ཞེས་སོགས། གསུམ་པ་ལ། ཆོས་སྐུ་ཁྱབ་པ་ལ་རྩོད་པ་སྤོང་བ་དང་། ཁྱབ་རྟག་གཉིས་ཀ་ལ་རྩོད་པ་སྤོང་བ་གཉིས། དང་པོ་ལ། རྩོད་ལན་གཉིས་ལས། དང་པོ་ནི། རྟོགས་ཡེ་ཆོས་སྐུ་དེས་སེམས་ཅན་ཐམས་ཅད་ལ་སངས་རྒྱས་ཀྱི་སྐུ་སྣང་བའི་བདག་རྐྱེན་བྱེད་པར་ཐལ། དེ་སེམས་ཅན་གྱི་དོན་མཛད་པའི་བརྩེ་བ་སྙིང་རྗེ་ཆེན་པོ་དང་དུས་རྟག་ཏུ་ལྡན་པའི་ཕྱིར། ཞེ་ན། ལན་ལ། སྐལ་ལྡན་ལ་སྣང་བའི་རྒྱུ་མཚན་དང་། སྐལ་མེད་ལ་མི་སྣང་བའི་དཔེ་གཉིས། དང་པོ་ནི། རྒྱུ་ནི་ཡོངས་སུ་ཞེས་སོགས། གཉིས་པ་ནི། ལྷ་ཡི་རྒྱལ་པོས་ཞེས་སོགས། གཉིས་པ་ལ། རྩོད་ལན་གཉིས། དང་པོ་ནི། ཆོས་སྐུ་ཆོས་ཅན། ཁྱབ་པ་ཞེས་བརྗོད་མི་རིགས་པར་ཐལ། ཤཱཀྱ་སེང་གེ་ལ་སོགས་པ་རྣལ་འབྱོར་བ་སོ་སོར་ངེས་པའི་རྒྱུད་ལ་ཡོད་པའི་ཕྱིར། རྟག་པ་ཞེས་བརྗོད་མི་རིགས་པར་ཐལ། སྐད་ཅིག་གིས་འཇིག་པའི་ཕྱིར། ཞེ་ན། ལན་ནི། དེ་ལྟར་མཛད་པ་ཞེས་སོགས། གཉིས་པ་གཟུགས་སྐུ་ལ། གདུལ་བྱ་དག་པ་འབའ་ཞིག་ལ་སྣང་བའི་ཆ་དང་། དག་མ་དག་སྣ་ཚོགས་ལ་སྣང་བའི་སྐུ་གཉིས་སུ་ཡོད་ཅིང་། དང་པོའི་དབང་དུ་བྱས་ནས་ལོངས་སྐུ་དང་། གཉིས་པའི་དབང་དུ་བྱས་ནས་སྤྲུལ་སྐུ་བཞག །དང་པོ་ལ། ངོ་བོ་མདོར་བསྟན་པ་དང་། ཡོན་ཏན་རྒྱས་པར་བཤད་པ་གཉིས། དང་པོ་ནི། མཚན་ནི་སུམ་ཅུ་ཞེས་སོགས། གཉིས་པ་ལ། མཚན་དང་དཔེ་བྱད་ཀྱི་ཡོན་ཏན་གཉིས། དང་པོ་ལ། ངོ་བོ་དང་། རྒྱུ་གཉིས། དང་པོ་ནི། ཕྱག་ཞབས་འཁོར་ལོས་ཞེས་སོགས་གཉིས་པ་ལ། བསྟན་བཤད་གཉིས། དང་པོ་ནི། འདི་ལ་མཚན་ནི་ཞེས་སོགས། གཉིས་པ་ནི། སྔ་མ་སྐྱེལ་མ་ཞེས་སོགས། གཉིས་པ་ནི། ཐུབ་པའི་སེན་མོ་ཞེས་སོགས། གཉིས་པ་སྤྲུལ་སྐུ་ནི། གང་གི་སྲིད་པ་ཞེས་སོགས། སྐུ་དེ་དག་གི་མཛད་པ་ཕྲིན་ལས་ཐུན་མོང་དུ་འཆད་པ་ནི། དེ་བཞིན་འཁོར་བ་ཞེས་སོགས་ཀྱིས་བསྟན། སྐུ་གསུམ་དུ་གྲངས་ངེས་པ་འཕགས་པ་གྲོལ་སྡེ་ལ་སོགས་པ་ལྟར་ན། འབྲས་བུ་ཆོས་སྐུ་ལ། རང་དོན་ཆོས་སྐུ། ལོངས་སྐུ། སྤྲུལ་སྐུ་གསུམ་ཡོད་ཅིང་། ངོ་བོ་མདོར་བསྟན་པའི་ཚུལ་གྱིས་འཆད་པ་ནི། ཐུབ་པའི་ངོ་བོ་ཞེས་སོགས། དེའི་ཡོན་ཏན་རྒྱས་པར་བཤད་པ་ནི། བྱང་ཆུབ་ཕྱོགས། ཞེས་སོགས། གཉིས་པ་ངོ་བོ་མདོར་བསྟན་འཆད་པ་ནི། མཚན་ནི་སུམ་ཅུ་ཞེས་སོགས། དེའི་ཡོན་ཏན་རྒྱས་པར་བཤད་པ་ནི། ཕྱག་ཞབས་འཁོར་ལོས་ཞེས་སོགས། གསུམ་པའི་ངོ་བོ་མདོར་བསྟན་འཆད་པ་ནི། གང་གི་སྲིད་པ་ཞེས་སོགས། དེའི་ཡོན་ཏན་རྒྱས་པར་བཤད་པ་ནི། དེ་བཞིན་འཁོར་བ་ཞེས་སོགས་ཀྱིས་བསྟན་པར་བཞེད་དེ། དེ་དག་གིས་གདུལ་བྱ་དབང་རྟུལ་རྗེས་སུ་བཟུང་བའི་ཕྱིར་དུ་མངོན་པར་རྟོགས་པ་བརྒྱད་ཀྱི་ལམ་རིམ་རྒྱས་པར་བཤད་པ་ཡིན་ལ། དབང་འབྲིང་རྗེས་སུ་བཟུང་བའི་ཕྱིར་དུ་མངོན་པར་རྟོགས་པ་དྲུག་གི་ལམ་རིམ་ནི། མཚན་ཉིད་དེ་ཡི་སྦྱོར་བ་དང་། ཞེས་སོགས། མངོན་པར་རྟོགས་པ་གསུམ་གྱི་ལམ་རིམ་ནི། ཡུལ་ནི་རྣམ་པ་ཞེས་སོགས་ཀྱིས་བསྟན། བཤད་པ་མཐར་ཕྱིན་པའི་བྱ་བ་ནི། ལ་ལ་ལས་དོན་ཞེས་སོགས་ཀྱིས་བསྟན་ཏོ། །

གཉིས་པ་ལ། ཀླུ་སྒྲུབ་ཀྱིས་མཆོད་རྟེན་བརྒྱད་བསྟོད་དུ། དང་པོར་བྱང་ཆུབ་མཆོག་ཏུ་ཐུགས་བསྐྱེད་དེ། །བསྐལ་པ་གྲངས་མེད་གསུམ་དུ་ཚོགས་བསགས་ཤིང་། །བར་དུ་གཅོད་པའི་བདུད་བཞི་འཇོམས་མཛད་པའི། །བཅོམ་ལྡན་སེང་གེ་དེ་ལ་ཕྱག་འཚལ་ལོ། །ཞེས་པ་ལྟར། དང་པོར་བྱང་ཆུབ་ཏུ་ཐུགས་བསྐྱེད་ཚུལ། བར་དུ་ཚོགས་གཉིས་བསགས་ཚུལ། མཐར་སངས་རྒྱས་པའི་ཚུལ། འབྲས་བུ་སངས་རྒྱས་ཀྱི་རྣམ་གཞག །མཛད་པ་ཕྲིན་ལས་ཀྱི་རྣམ་གཞག་དང་ལྔ། དང་པོ་ནི། བདག་ཅག་གི་སྟོན་པ་འདི་ལ་མཚོན་ན། ངེས་དོན་དུ་བསྐལ་པ་གྲངས་མེད་པའི་སྔོན་རོལ་ནས་བླ་ན་མེད་པའི་བྱང་ཆུབ་བརྙེས་སུ་ཟིན་ཀྱང་། གནས་སྐབས་ཚུལ་བསྟན་གྱི་དབང་དུ་བྱས་ནས། བསྐལ་བཟང་ལྟར་ན། ང་ནི་སྔོན་ཚེ་དམན་པར་གྱུར་པའི་ཚེ། །དེ་བཞིན་གཤེགས་པ་ཤཱཀྱ་ཐུབ་ཆེན་ལ། །འཇམ་གང་ཞིག་ནི་དབུལ་བར་བྱས་ནས་ཀྱང་། །དང་པོར་བྱང་ཆུབ་མཆོག་ཏུ་སེམས་བསྐྱེད་དོ། །ཞེས་གསུངས་པ་ལྟ་བུའོ། །

གཉིས་པ་ལ། གང་གསོག་པར་བྱ་བའི་ཚོགས་ཀྱི་ངོ་བོ། ཇི་ཙམ་དུ་བསགས་པའི་དུས། ཇི་ལྟར་བསགས་པའི་ཚུལ་དང་གསུམ། དང་པོ་ནི། བསོད་ནམས་དང་ཡེ་ཤེས་ཀྱི་ཚོགས་གཉིས་ཏེ། རིན་ཆེན་ཕྲེང་བ་ལས། སངས་རྒྱས་རྣམས་ཀྱི་གཟུགས་སྐུ་འདིར། །བསོད་ནམས་ཚོགས་ལས་བྱུང་བ་སྟེ། །ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་བྱུང་། །ཞེས་སོ། །དེ་ཡང་རྒྱན་ལས། སྦྱིན་དང་ཚུལ་ཁྲིམས་བསོད་ནམས་ཀྱི། །ཚོགས་ཡིན་ཤེས་རབ་ཡེ་ཤེས་ཀྱི། །གསུམ་པོ་གཞན་ནི་གཉིས་ཀ་སྟེ། །ལྔ་ཆར་ཡང་ནི་ཡེ་ཤེས་ཚོགས། །ཞེས་སོ། །གཉིས་པ་ནི། མདོ་དང་བསྟན་བཅོས་ཕལ་ཆེ་བ་ལས་གྲངས་མེད་གསུམ་དུ་ཚོགས་བསགས་པ་བཤད་དེ། ཚོགས་ལམ་ས་དང་པོ་ལ་གྲངས་མེད་གཅིག །གཉིས་པ་ནས་བདུན་པའི་བར་ལ་གྲངས་མེད་གཅིག །དག་པ་ས་གསུམ་ལ་གྲངས་མེད་གཅིག་ཏུ་ཚོགས་བསགས་པར་བཤད་པའི་ཕྱིར། གཞན་ཡང་གྲངས་མེད་བདུན་དང་བཅུར་བཤད་པ་སོགས་དུ་མ་ཡོད་ཅིང་། དེ་དག་ཀྱང་ཚོགས་གསོག་པ་པོའི་གང་ཟག་གི་དབང་པོའི་ཁྱད་པར་ལ་དགོངས་པ་ཡིན་ནོ། །གསུམ་པ་ནི། སྟོན་པ་འདི་སྔོན་གཞོན་ནུ་བརྩོན་འགྲུས་སྤྱོད་དུ་གྱུར་པའི་ཚེ་དེ་བཞིན་གཤེགས་པ་ཕུང་པོ་ཆེན་པོ་འཇིག་རྟེན་དུ་བྱོན་པ་ལ་བསྙེན་བཀུར་ཞིང་དགེ་བའི་རྩ་བ་བསྐྲུན་པ་ནས་བརྩམས་ཏེ་བསྐལ་པ་གྲངས་མེད་གཅིག་ཏུ་ཚོགས་བསགས་པས་ས་དང་པོ་ཐོབ་པར་བཤད། དེའི་རྗེས་སུ་ཚོང་དཔོན་ཤེས་རབ་བཟང་པོར་གྱུར་པའི་ཚེ། དེ་བཞིན་གཤེགས་པ་དཀོན་མཆོག་ཡན་ལག་འཇིག་རྟེན་དུ་བྱོན་པ་ལ་བསྙེན་བཀུར་ཞིང་དགེ་བའི་རྩ་བ་བསྐྲུན་པ་ནས་བརྩམས་ཏེ་བསྐལ་པ་གྲངས་མེད་གཅིག་ཏུ་ཚོགས་བསགས་པས་ས་བདུན་པའི་བར་དུ་ཐོབ་པར་བཤད། དེའི་རྗེས་སུ་བྲམ་ཟེའི་ཁྱེའུ་ཆོས་ཀྱི་སྤྲིན་ཞེས་བྱ་བར་གྱུར་པའི་ཚེ་སངས་རྒྱས་མར་མེ་མཛད་འཇིག་རྟེན་དུ་བྱོན་པ་ལ་བསྙེན་བཀུར་ཞིང་དགེ་བའི་རྩ་བ་བསྐྲུན་པ་ནས་བརྩམས་ཏེ་བསྐལ་པ་གྲངས་མེད་གཅིག་ཏུ་ཚོགས་བསགས་པས་ས་བརྒྱད་པ་ལ་སོགས་པའི་རྟོགས་པ་ཐོབ་པར་བཤད་དེ། ལུང་ལས། གང་ཚེ་མར་མེ་མཛད་ཀྱིས་ང་། །ལུང་བསྟན་གྱུར་པ་དེ་ཡི་ཚེ། །ས་བརྒྱད་པ་ནི་ཐོབ་འགྱུར་ཏེ། །དབང་བཅུ་དག་ཀྱང་ཐོབ་པར་གྱུར། །ཞེས་སོ། །

གསུམ་པ་ལ། ཇི་ལྟར་འཚང་རྒྱ་ཚུལ་དང་། སྤྲུལ་སྐུ་འཇིག་རྟེན་དུ་བྱོན་ཚུལ་གཉིས། དང་པོ་ནི། ལང་གཤེགས་ལས། གཙང་མའི་གནས་རྣམས་སྤངས་པ་ཡི། །འོག་མིན་གནས་མཆོག་ཉམས་དགའ་བར། །ཡང་དག་སངས་རྒྱས་དེར་སངས་རྒྱས། །སྤྲུལ་པ་པོ་གཅིག་འདིར་འཚང་རྒྱ། །ཞེས་དང་། སྟུག་པོ་བཀོད་པ་ལས། སངས་རྒྱས་ཐམས་ཅད་འོག་མིན་དུ། །སངས་རྒྱས་མ་གྱུར་འདོད་ཁམས་སུ། །སངས་རྒྱས་མཛད་པ་མི་མཛད་དོ། །ཞེས་སོ། །གཉིས་པ་ནི། བསྐལ་པ་བཟང་པོ་འདི་ལ་མཚོན་ན། སངས་རྒྱས་སྟོང་ལ་སོགས་པ་འབྱོན་པར་བཤད། དུས་ནམ་གྱི་ཚེ་འབྱོན་ན། གནས་པའི་བསྐལ་པ་ལ་མར་འགྲིབ་ཀྱི་དུས་རྣམས་སུ་འབྱོན་པར་བཤད། ཚུལ་ཇི་ལྟར་འབྱོན་ན། རྒྱུད་བླ་མ་ལས། ཐུགས་རྗེ་ཆེན་པོས་འཇིག་རྟེན་མཁྱེན། །འཇིག་རྟེན་ཀུན་ལ་གཟིགས་ནས་ནི། །ཆོས་ཀྱི་སྐུ་ལས་མ་གཡོས་པར། །སྤྲུལ་པའི་རང་བཞིན་སྣ་ཚོགས་ཀྱིས། །སྐྱེ་བ་མངོན་པར་སྐྱེ་བ་དང་། །དགའ་ལྡན་གནས་ནས་འཕོ་བ་དང་། །ལྷུམས་སུ་ཞུགས་དང་བལྟམས་པ་དང་། །བཟོ་ཡི་གནས་ལ་མཁས་པ་དང་། །བཙུན་མོའི་འཁོར་དགྱེས་རོལ་པ་དང་། །ངེས་འབྱུང་དཀའ་བ་སྤྱོད་པ་དང་། །བྱང་ཆུབ་སྙིང་པོར་གཤེགས་པ་དང་། །བདུད་སྡེ་བཅོམ་དང་རྫོགས་པར་ནི། །བྱང་ཆུབ་ཆོས་ཀྱི་འཁོར་ལོ་དང་། །མྱ་ངན་འདས་པར་གཤེགས་མཛད་རྣམས། །ཡོངས་སུ་མ་དག་ཞིང་རྣམས་སུ། །སྲིད་པ་ཇི་སྲིད་གནས་པར་སྟོན། །ཞེས་པས་མཚོན་ནོ། །

བཞི་པ་ལ། སྐུའི་བསྡུ་བ། སོ་སོའི་རང་བཞིན། གྲངས་ངེས་ཀྱི་རྣམ་གཞག་དང་གསུམ། དང་པོ་ནི། རང་དོན་ཆོས་སྐུ་དང་། གཞན་དོན་གཟུགས་སྐུ་གཉིས་སུ་འདུས་ཤིང་། ཆོས་ཉིད་ཀྱི་སྐུ་དང་། ཆོས་ཅན་གྱི་སྐུ་གཉིས་སུ་ཡང་འདུས་ཏེ། རྒྱུད་བླར། རང་དོན་གཞན་དོན་དོན་དམ་སྐུ་དང་ནི། །དེ་ལ་བརྟེན་པ་ཀུན་རྫོབ་སྐུ་ཉིད་དེ། །ཞེས་དང་། བདག་ཉིད་ཀྱི་ནི་འབྱོར་པའི་གནས། །དམ་པའི་དོན་གྱི་སྐུ་ཡིན་ཏེ། །དྲང་སྲོང་རྣམས་ཀྱི་བརྡ་ཡི་སྐུ། །ཕ་རོལ་ཕུན་སུམ་ཚོགས་པའི་གནས། །ཞེས་སོ། །

གཉིས་པ་ལ་བཞི་ལས། དང་པོ་ངོ་བོ་ཉིད་སྐུ་ནི། ཐུབ་པའི་ངོ་བོ་ཉིད་སྐུ་ནི། །ཞེས་པའི་སྐབས་སུ་གཉིས་ཀྱི། དང་པོ་ངོ་བོ་ཉིད་སྐུ་ལ། ཁྱད་ཆོས་སྤྱིར་བསྟན་པ་དང་། མཚན་ཉིད་བསྡུས་ཏེ་བསྟན་པ་གཉིས། དང་པོ་ལ། འདུས་མ་བྱས་པ། ཐ་དད་མེད་པ། མཐའ་གཉིས་སུ་འཛིན་པ་མེད་པ། རྣམ་པར་དག་པ། འོད་གསལ་བའི་ཁྱད་ཆོས་དང་ལྔ། དང་པོ་ནི། རང་དོན་དོན་དམ་པའི་སྐུ་ལ། ཐོག་མར་སྐྱེ་བ། བར་དུ་གནས་པ། མཐར་འགག་པ་དང་བྲལ་བའོ། །གཉིས་པ་ནི། དབྱིངས་དང་ཡེ་ཤེས་དབྱེར་མི་ཕྱེད་པའི་ཚུལ་གྱིས་ལྡན་པའོ། །གསུམ་པ་ནི། བདག་དང་བདག་མེད་ཀྱི་སྤྲོས་པའི་མཐའི་གཉིས་འཛིན་སྤངས་པའོ། །བཞི་པ་ནི། སྒྲིབ་པ་གསུམ་དང་བྲལ་བའི་གློ་བུར་རྣམ་དག་གི་ཡོན་ཏན་ནོ། །ལྔ་པ་ནི། དྲི་མ་མེད་ཅིང་རྣམ་རྟོག་མེད་པའི་ཆོས་ཀྱི་དབྱིངས་ཀྱི་རང་བཞིན་ནོ། །རྒྱུད་བླར། དེ་ལ་སངས་རྒྱས་རྣམས་ཀྱི་ནི། །ངོ་བོ་ཉིད་སྐུ་མཚན་ཉིད་ལྔ། །མདོར་ན་ཡོན་ཏན་ལྔ་དང་ནི། །ལྡན་པ་ཉིད་དུ་རིག་པར་བྱ། །ཞེས་པའི་རྒྱས་བཤད་དུ། འདུས་མ་བྱས་ཤིང་རྣམ་དབྱེར་མེད། །མཐའ་གཉིས་དག་ནི་རྣམ་པར་སྤངས། །ཉོན་མོངས་ཤེས་བྱ་སྙོམས་འཇུག་གི །སྒྲིབ་གསུམ་ལས་ནི་ངེས་གྲོལ་ཏེ། །དྲི་མེད་རྣམ་པར་རྟོག་མེད་དང་། །རྣལ་འབྱོར་རྣམས་ཀྱི་ཡུལ་ཡིན་ཕྱིར། །ཆོས་དབྱིངས་ངོ་བོ་ཉིད་ཀྱིས་ནི། །དག་པའི་ཕྱིར་ན་འོད་གསལ་བ། །ཞེས་སོ། །གཉིས་པ་ནི། རང་དོན་ཆོས་སྐུ་གང་ཞིག །སྤངས་པ་མཐར་ཐུག་གི་ཆོས་ཉིད་དུ་གྱུར་པའི་བྲལ་འབྲས། མཚན་གཞི། སངས་རྒྱས་སའི་སྒྲིབ་གཉིས་སྤངས་པའི་སྤངས་པ་ལྟ་བུའོ། །རྒྱུད་བླའི་ཊཱི་ཀར། མཐར་ཐུག་གི་སྤངས་རྟོགས་དབྱེར་མེད་ཅེས་པའི་དོན་ནི། མཐར་ཐུག་གི་རྟོགས་པ་གློ་བུར་བའི་དྲི་མ་མ་ལུས་པ་དང་བྲལ་བའི་བྲལ་ཆ་དེ་ཉིད་མཐར་ཐུག་གི་སྤངས་པ་ཡིན་ལ། དེ་དང་མཐར་ཐུག་གི་སྤངས་པ་གཉིས་བློས་ཐ་དད་དུ་ཕྱེ་བ་མ་གཏོགས། དོན་ལ་ངོ་བོ་ཐ་དད་མེད་ཅེས་པའི་དོན་ནོ། །ངག་དོན་ནི། དག་པ་གཉིས་ལྡན་གྱི་ཆོས་ཉིད་ཆོས་ཅན། ངོ་བོ་ཉིད་སྐུ་ཡིན་ཏེ། སྟོབས་དང་མི་འཇིགས་པ་ལ་སོགས་པའི་ཡོན་ཏན་དུ་མ་ལྡན་པའི་དག་པ་གཉིས་ལྡན་གྱི་ཆོས་ཉིད་ཀྱི་སྐུ་ཡིན་པའི་ཕྱིར།

གཉིས་པ་ཆོས་སྐུ་ལ། རང་བཞིན་དང་། ཡོན་ཏན་གྱི་ཁྱད་པར་གཉིས། དང་པོ་ནི། དེ་ལྟར་སྐུ་དང་པོ་བསྟན་ནས་གཉིས་པ་ཆོས་ཀྱི་སྐུ། ཞེས་པའི་སྐབས་སུ་གཉིས་ཀྱི། དང་པོ་རྟོགས་ཡེ་ཆོས་སྐུ་ལ། ངོ་བོ། དབྱེ་བ། སོ་སོའི་རང་བཞིན། ཤེས་བྱ་མཁྱེན་ཚུལ་དང་བཞི། དང་པོ་ལ། ཁྱད་ཆོས་སྤྱིར་བསྟན་པ་དང་། མཚན་ཉིད་བསྡུས་ཏེ་བསྟན་པ་གཉིས། དང་པོ་ལ། ངོ་བོའི་ཁྱད་པར། གནས་གྱུར་གྱི། མཛད་པའི། ཡུལ་ཅན་གྱི། རྒྱུའི་ཁྱད་པར་དང་ལྔ། དང་པོ་ནི། གཟུང་འཛིན་གཉིས་སུ་མེད་པའི་སེམས་དང་སེམས་བྱུང་གིས་བསྡུས་པ་སྟེ། གཉིས་སུ་མེད་པའི་སེམས་དང་སེམས་ལས་བྱུང་བ། ཞེས་སོ། །གཉིས་པ་ནི། སྤང་བྱས་བསྡུས་པའི་ཟག་བཅས་མ་ལུས་པ་དང་བྲལ་བ་སྟེ། གནས་གྱུར་པས་གྱུར་པ་ཐམས་ཅད་ཀྱང་ཆོས་ཀྱི་སྐུར་མངོན་པར་བརྗོད་པ་ཡིན་ནོ། །ཞེས་སོ། །གསུམ་པ་ནི། གཞན་སྣང་གཟུགས་སྐུ་གཉིས་སུ་སྣང་བ་མ་འགགས་པས་སེམས་ཅན་གྱི་དོན་མཛད་པ་ཡིན་ཏེ། ཀུན་རྫོབ་ཏུ་ཡེ་ཤེས་ཁོ་ན་ལོངས་སྤྱོད་རྫོགས་པའི་སྐུ་ལ་སོགས་པར་སྣང་བ་བསྐྱེད་པའི་སྒོ་ནས། ཞེས་སོ། །བཞི་པ་ནི། སངས་རྒྱས་ཁོ་ནའི་ཐུན་མོང་མ་ཡིན་པའི་མངོན་སུམ་གྱི་སྤྱོད་ཡུལ་ཏེ། སངས་རྒྱས་དང་བྱང་ཆུབ་སེམས་དཔའ་དང་། ཉན་ཐོས་ལ་སོགས་པའི་སྤྱོད་ཡུལ་དུ་རྣམ་པར་བཞག་པ་ཡིན་ནོ། །ཞེས་སོ། །ལྔ་པ་ལ། སྤྱིའི་རྒྱུ་དང་། སོ་སོའི་རྒྱུ་གཉིས། དང་པོ་ནི། ཆོས་ཀྱི་སྐུ་ནི་མདོར་བསྡུ་ན། །རྒྱལ་པོ་ཡེ་ཤེས་ཚོགས་ལས་འབྱུང་། །ཞེས་སོ། །གཉིས་པ་ནི། རྒྱན་ལས། འཛིན་པའི་ཕྱིར་དང་སེམས་མཉམ་ཕྱིར། །ཡང་དག་ཆོས་རབ་བསྟན་ཕྱིར་དང་། །བྱ་བ་སྒྲུབ་པ་ཉིད་ཀྱི་ཕྱིར། །ཡེ་ཤེས་བཞི་པོ་ཡང་དག་འབྱུང་། །ཞེས་སོ། །གཉིས་པ་ནི། ཤེས་བྱ་ཐམས་ཅད་མངོན་སུམ་དུ་རྟོགས་པ་མཐར་ཐུག་གི་མཁྱེན་པ། དེ་དང་རྣམ་མཁྱེན། ཀུན་མཁྱེན། སངས་རྒྱས་ཀྱི་ཡེ་ཤེས་རྣམས་དོན་གཅིག་གོ །གཉིས་པ་ནི། མེ་ལོང་ལྟ་བུ་ལ་སོགས་པ་བཞི་སྟེ། རྒྱན་ལས། མེ་ལོང་ཡེ་ཤེས་མི་གཡོ་སྟེ། །ཡེ་ཤེས་གསུམ་ནི་དེ་ལ་བརྟེན། །མཉམ་པ་ཉིད་དང་སོ་སོར་རྟོགས། །བྱ་བ་གྲུབ་པ་ཁོ་ནའོ། །ཞེས་སོ། །གསུམ་པ་ནི། ཆོས་ཐམས་ཅད་མེ་ལོང་དུ་འཆར་བའི་གཟུགས་བརྙན་ལྟར་སྣང་ལ་རང་བཞིན་མེད་པར། འཁོར་འདས་ཀྱི་ཆོས་ཐམས་ཅད་བདེན་མེད་མཉམ་པ་ཉིད་དུ་ཇི་སྙེད་པའི་ཆོས་རྣམས་མ་འདྲེས་པར་སོ་སོར་མངོན་སུམ་དུ་རྟོགས་པ་མཐར་ཐུག་པའི་ཡེ་ཤེས། སེམས་ཅན་མ་ལུས་པའི་དོན་སྒྲུབ་པའི་མཐར་ཐུག་གི་ཡེ་ཤེས་རྣམས་རིམ་བཞིན་མཚན་ཉིད་ཡིན་ལ། དེས་ན་དེ་བཞི་ངོ་བོ་གཅིག་ལ་ལྡོག་པའི་སྒོ་ནས་སོ་སོ་བ་ཕྱེ་བ་ཡིན་ནོ། །བཞི་པ་ནི། སངས་རྒྱས་ཀྱི་ཡེ་ཤེས་ཡིན་ན་ཇི་ལྟ་ཇི་སྙེད་འདས་མ་འོངས་ཀྱི་ཆོས་ཐམས་ཅད་ཅིག་ཅར་དུ་མངོན་སུམ་དུ་མཁྱེན་པས་ཁྱབ་སྟེ། མདོ་ལས། འདོད་ཆགས་དང་བཅས་པའི་སེམས་ལ་འདོད་ཆགས་དང་བཅས་པའི་སེམས་སོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །འདོད་ཆགས་དང་བྲལ་བའི་སེམས་ལ་འདོད་ཆགས་དང་བྲལ་བའི་སེམས་སོ་ཞེས་ཡང་དག་པ་ཇི་ལྟ་བ་བཞིན་དུ་རབ་ཏུ་ཤེས་སོ། །ཞེས་དང་། རྒྱན་ལས། སངས་རྒྱས་རྣམས་ནི་མངོན་སུམ་མཁྱེན། །དུས་ལ་ཡེ་ཤེས་མ་བསྒྲིབས་སོ། །ཞེས་སོ། །ངག་དོན་ནི། སངས་རྒྱས་སའི་ཟག་མེད་ཀྱི་ཡེ་ཤེས་སྡེ་ཚན་ཉེར་གཅིག་ཆོས་ཅན། རྟོགས་པ་ཡེ་ཤེས་ཆོས་སྐུ་ཡིན་ཏེ། ཟག་བཅས་མ་ལུས་པ་ཟག་མེད་དུ་གནས་གྱུར་པའི་མཐར་ཐུག་གི་ཡེ་ཤེས་ཡིན་པའི་ཕྱིར། གཉིས་པ་ལ། ཟད་པར། ཟིལ་གནོན། ཉོན་མོངས་མེད་པའི་ཏིང་ངེ་འཛིན་བཤད་པ་དང་གསུམ། དང་པོ་ནི། ཟད་པར་བཅུ་ཡི་བདག་ཉིད་དང་། །ཞེས་པའི་སྐབས་སུ་གཉིས་ཀྱི། དང་པོ་ཟད་པར་གྱི་ཏིང་ངེ་འཛིན་ལ། ལུས་རྟེན། སེམས་རྟེན། བརྟེན་པ་ཟད་པར་གྱི་ཏིང་ངེ་འཛིན་དང་གསུམ། དང་པོ་ནི། དང་པོ་བརྒྱད་སྔར་མེད་གསར་དུ་སྐྱེ་བ་འདོད་པའི་རྟེན་ལ་སྐྱེ་དགོས་ཏེ། གཙོ་བོར་ཐོས་བསམ་གྱི་མཐུ་ལས་སྐྱེ་དགོས་པའི་ཕྱིར། ཐོབ་ཟིན་གནས་པ་གཟུགས་ཀྱི་རྟེན་ལ་ཡང་ཡོད། ཕྱི་མ་གཉིས་ཁམས་གསུམ་གྱི་རྟེན་ལ་དངོས་སུ་སྐྱེ་བ་ཡོད་དེ། གཟུགས་མེད་ཅེས་བྱ་ཁམས་གསུམ་གྱི། །རྟེན་ཅན་ལྷག་མ་མི་ལས་སྐྱེ། །ཞེས་སོ། །གཉིས་པ་ནི། ཀུན་བཏུས་ལས། ཐམས་ཅད་ཀྱང་བསམ་གཏན་གྱི་དངོས་གཞིའི་སེམས་ལ་བརྟེན་པར་བཤད། མཛོད་ལྟར་ན། དང་པོ་བརྒྱད་བསམ་གཏན་གྱི་དངོས་གཞི། ཕྱི་མ་གཉིས་གཟུགས་མེད་ཀྱི་སེམས་ལ་བརྟེན་པར་བཤད། གསུམ་པ་ལ། མཚན་ཉིད། སྒྲ་བཤད། དབྱེ་བ། ཁྱད་ཆོས་དང་བཞི། དང་པོ་ནི། བདག་རྐྱེན་བསམ་གཏན་དང་གཟུགས་མེད་ཀྱི་དངོས་གཞི་གང་རུང་ལ་བརྟེན་ནས་རང་གི་དམིགས་ཡུལ་གྱི་གཙོ་བོ་དེས་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་མཚུངས་ལྡན་དང་བཅས་པ། གཉིས་པ་ནི། དམིགས་པ་རྒྱུན་མི་ཆད་པར་ཁྱབ་པར་སྤྲོ་ནུས་པས་ན་ཟད་པར་ཞེས་བྱའོ། །གསུམ་པ་ལ། ཟད་པར་སའི། ཆུ། མེ། རླུང་། སྔོན་པོ། སེར་པོ། དམར་པོ། དཀར་པོ། ནམ་མཁའ། ཟད་པར་རྣམ་ཤེས་ཀྱི་ཏིང་ངེ་འཛིན་དང་བཅུ། དང་པོའི་མཚན་ཉིད། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་རང་གི་དམིགས་ཡུལ་དུ་གྱུར་པའི་ས་དེ་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་མཚུངས་ལྡན་དང་བཅས་པ། དེས་བར་པ་བདུན་ལ་རིགས་འགྲེ། ཕྱི་མ་གཉིས་ཀྱི་མཚན་ཉིད། བདག་རྐྱེན་གཟུགས་མེད་ཀྱི་དངོས་གཞིའི་སེམས་ལ་བརྟེན་ནས་རང་གི་དམིགས་ཡུལ་དུ་གྱུར་པའི་ནམ་མཁའ་དེ་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་མཚུངས་ལྡན་དང་བཅས་པ། དེ་ལ་བརྟེན་ནས་རང་གི་དམིགས་ཡུལ་དུ་གྱུར་པའི་རྣམ་ཤེས་དེ་ཤེས་བྱ་ཐམས་ཅད་ལ་ཁྱབ་པར་སྤྲོ་ནུས་པའི་ཏིང་ངེ་འཛིན་མཚུངས་ལྡན་དང་བཅས་པ། བཞི་པ་ལ། བསྡུ་བ། སྦྱོང་བའི་ཚུལ། སྒོམ་པའི་བྱེད་ལས་དང་གསུམ། དང་པོ་ནི། བཅུ་པོ་བསྡུ་ན། རེག་བྱའི་སྐྱེ་མཆེད། གཟུགས་ཀྱི་སྐྱེ་མཆེད། ཆོས་ཀྱི་སྐྱེ་མཆེད། རྣམ་ཤེས་ཀྱི་སྐྱེ་མཆེད་ལ་དམིགས་པའི་ཟད་པར་བཞིར་འདུ་སྟེ། དང་པོ་བཞི་རེག་བྱའི་སྐྱེ་མཆེད་ཀྱི་ཡུལ་ཅན། བར་པ་བཞི་གཟུགས་ཀྱི་སྐྱེ་མཆེད་ཀྱི་ཡུལ་ཅན། ཐ་མ་གཉིས་ཆོས་ཀྱི་སྐྱེ་མཆེད་དང་རྣམ་ཤེས་སྐྱེ་མཆེད་ཀྱི་ཡུལ་ཅན་ཡིན་པའི་ཕྱིར། དེ་ཡང་རེག་བྱ་དང་། གཟུགས་ཀྱི་སྐྱེ་མཆེད་ལ་ཟད་པར་འཇོག་པའི་རྒྱུ་མཚན་ཡོད་དེ། དེ་གཉིས་རང་བཞིན་ཐམས་ཅད་ལ་ཁྱབ་པ་དང་། གཟུགས་ཅན་གྱི་ཁམས་ཀུན་ཏུ་སྤྲོ་ནུས་པའི་ཕྱིར། ཁྱད་པར་དུ་འབྱུང་བ་ལ་ཟད་པར་འཇོག་པའི་རྒྱུ་མཚན་ཡོད་དེ། རྟེན་འབྱུང་བ་མེད་པར་བརྟེན་པ་འབྱུང་འགྱུར་སྤྲོ་མི་ནུས་པའི་ཕྱིར། ཆོས་ཀྱི་སྐྱེ་མཆེད་ཀྱི་ནང་ནས་ནམ་མཁའ་དང་རྣམ་ཤེས་ལ་ཟད་པར་འཇོག་པའི་རྒྱུ་མཚན་ཡོད་དེ། ནམ་མཁའ་ནི་བརྟན་གཡོ་ཀུན་ལ་ཁྱབ་པ་དང་། རྣམ་ཤེས་ནི་ཤེས་བྱ་ཐམས་ཅད་ཀྱི་ཡུལ་ཅན་དང་། རྒྱུན་དང་བཅས་པའི་ཤེས་པ་ཡིན་པའི་ཕྱིར། དབང་པོ་ལྔ་ལ་ཟད་པ་མི་འཇོག་སྟེ། ཕྱི་རོལ་དུ་སྤྲོ་བར་མི་ནུས་པ་དང་། ཆོས་གཞན་འཛིན་ནུས་ཀྱི་ཡུལ་ཅན་མ་ཡིན་པའི་ཕྱིར། དྲི་རོ་གཉིས་ལ་དེར་མི་འཇོག་སྟེ། ཁམས་གོང་དུ་ཁྱབ་པར་སྤྲོ་མི་ནུས་པའི་ཕྱིར་ཏེ། འདོད་པའི་སས་བསྡུས་པའི་ཕྱིར། སྒྲ་དང་སེམས་བྱུང་ལ་དེར་མི་འཇོག་སྟེ། རྒྱུན་མེད་པའི་ཕྱིར། གཉིས་པ་ལ། སྦྱང་བ་བྱས་པའི་སྦྱོང་ཚུལ་དང་། དེ་མ་བྱས་པའི་སྦྱོང་ཚུལ་གཉིས། དང་པོ་ནི། སྔར་གོམས་པར་བྱས་པའི་སྟོབས་ཀྱིས་སོ་སོའི་དམིགས་པ་ཅུང་ཟད་ཙམ་མཐོང་བ་ལས་དེ་དང་དེའི་ཏིང་ངེ་འཛིན་མངོན་དུ་འགྱུར་བ་སྟེ། དཔེར་ན། འཕགས་པ་ལེགས་འོངས་ཀྱིས། སྔོན་ཟད་པར་སྔོན་པོའི་ཏིང་ངེ་འཛིན་གོམས་པར་བྱས་པའི་སྟོབས་ཀྱིས་ཨུཏྤལ་སྔོན་པོ་མཐོང་བ་ཙམ་གྱིས་ཟད་པར་སྔོན་པོའི་ཏིང་ངེ་འཛིན་སྐྱེས་པར་བཤད་པ་བཞིན་ནོ། །གཉིས་པ་ལ། དམིགས་པའི་རྟེན་ངོས་བཟུང་། སེམས་གཏོད་པའི་ཚུལ། མཚན་མའི་ཁྱད་པར་དང་གསུམ། དང་པོ་ནི། ཟད་པར་བཅུའི་དམིགས་པའི་རྟེན་གོ་རིམ་བཞིན། རྒྱ་མཚོའི་སྟེང་དུ་ཟམ་པ་ལྟ་བུ་དང་། སྣོད་གཙང་མ་དྲི་མ་མེད་པ་ཆུས་བཀང་བ་ལྟ་བུ་དང་། ཐབ་ཁུང་གྲུ་བཞི་པར་འོག་ཏུ་བུད་ཅིང་སྟེང་དུ་མེ་འབར་བ་ལྟ་བུ་དང་། རང་གི་ལུས་ཀྱི་ཡན་ལག་ལ་རེག་པར་གྱུར་པའི་སྐར་ཁུང་ལས་བྱུང་བའི་རླུང་ལྟ་བུ་དང་། སྔོན་པོ། སེར་པོ། དཀར་པོ། དམར་པོ་རྣམས་ཟླུམ་པོར་བྱས་ཏེ་ཚོན་གཞན་གྱིས་བཅད་པ་དང་། མཐོ་གང་སོར་བཞི་ཙམ་གྱི་བུ་ག་ནམ་མཁའི་མཐོངས་གཏོད་པ་དང་། བུམ་ནང་གི་མར་མེའི་འོད་བུ་ག་ནས་རྩིག་ངོས་ལ་ལོག་པ་ལྟ་བུའོ། །གཉིས་པ་ནི། དམིགས་རྟེན་དེ་དག་ལ་ཡིད་གཏད་དེ་མ་ཡེངས་པར་རྩེ་གཅིག་ཏུ་བསྒོམ་པའོ། །གསུམ་པ་ལ། འཛིན་པའི་མཚན་མ་དང་། སྣང་བའི་མཚན་མ་གཉིས། དང་པོ་ནི། དམིགས་རྐྱེན་དེ་དག་ཡིད་ལ་བྱས་ཏེ། སྒོམ་པའི་ཚེ་བར་ཆད་ཀྱི་མཚན་མ་བྱུང་ཚུལ་རིམ་བཞིན་ས་དུམ་བུ་དུམ་བུར་ཆད་དེ་སྤྲོར་མི་ནུས་པ་དང་། ཆུ་ཆུ་བུར་འདྲེས་པའི་གཡོ་བའི་རྣམ་པ་ཅན་དང་། མེ་ལྕེ་ཆད་ཅིང་གཞན་དུ་གཡོ་བ་དང་། རླུང་ལ་འོ་མ་བསྐོལ་བ་ས་ལ་ཕོག་མ་ཐག་པའི་རླངས་པ་འཐུལ་བ་དང་། སྔོ་སོགས་བཞི་ལ་ཕན་ཚུན་དུམ་བུར་ཆད་དེ་མེ་ཏོག་སྡོང་བུ་མེད་པ་ལྟ་བུ་དང་། ནམ་མཁའ་ལ་རྩིག་པའི་བུ་ག་ལྟ་བུར་གྱུར་ཏེ་སྐྱེད་ཀྱང་མི་འཕེལ་བ་དང་། རྣམ་ཤེས་ལ་ས་ལ་བྱས་པའི་དཀྱིལ་འཁོར་དང་འདྲ་བར་ཐོགས་བཅས་སུ་སྣང་བའོ། །གཉིས་པ་ནི། དམིགས་རྟེན་དེ་དག་ལ་ཡིད་གཏད་དེ་བསྒོམས་པས་གྲུབ་པའི་མཚན་མ་བྱུང་ཚུལ་ནི། དང་པོའི་སྐབས་སུ་དམིགས་ཡུལ་ས་དེ་འབྲེལ་ཆགས་སུ་ཇི་ལྟར་འདོད་བཞིན་དུ་སྤྲོ་ནུས་པ་དང་། གཉིས་པ་ལ། ཆུ་མི་གཡོ་ཞིང་གཞན་ལ་ཁྱབ་པར་སྤྲོ་ནུས་པ་དང་། གསུམ་པ་ལ། མེ་ནམ་མཁའ་ལ་གནས་པའི་ཟླ་བ་དམར་པོ་ཟླུམ་པོ་ལྟ་བུ་གཞན་ལ་ཁྱབ་པར་སྤྲོ་ནུས་པ་དང་། བཞི་པ་ལ། རླུང་ཇི་ལྟར་གནས་པ་ལྟར་འདུག་ཅིང་གཞན་ལ་ཁྱབ་པར་སྤྲོ་ནུས་པ་དང་། སྔོ་སོགས་བཞི་ལ་དམིགས་རྟེན་ནོར་བུའི་རྔ་ཡབ་ལྟར་སྣང་ལ་དེས་ཁྱབ་པར་སྤྲོ་ནུས་པ་དང་། དགུ་པ་ལ། ནམ་མཁའི་དཀྱིལ་འཁོར་ལྟར་ཐམས་ཅད་ལ་ཁྱབ་པར་སྤྲོ་ནུས་པ་དང་། བཅུ་པ་ལ། སྣང་བའི་ཚོགས་རྒྱ་ཆེན་པོས་གཟུགས་ཅན་ཐམས་ཅད་གསལ་བར་བྱེད་པ་ལྟ་བུའོ། །གསུམ་པ་ནི། ཟད་པར་གྱི་ཏིང་ངེ་འཛིན་དེ་དག་གྲུབ་པའི་བྱེད་པ་རིམ་བཞིན། གཟུགས་ཅན་གྱི་དངོས་པོ་རྣམས་གཅིག་མང་པོ་དང་། མང་པོ་གཅིག་ཏུ་སྒྱུར་བར་ནུས་པ་དང་། ཆུ་ལ་ཡང་བྱིང་བ་མེད་པར་གོམ་པ་འདོར་ནུས་པ་དང་། བདུད་ཀྱི་གཞལ་ཡས་ཁང་སྲེག་པའི་མེ་སྤྲོ་ནུས་པ་དང་། རླུང་ལྟར་མྱུར་དུ་འགྲོ་བ་དང་། གཟུགས་སོགས་སྔོན་པོར་སྤྲུལ་ཞིང་མུན་པའི་རང་བཞིན་དུ་བྱེད་པ་དང་། སེར་པོར་སྤྲུལ་ཞིང་གསེར་དུ་བསྒྱུར་བ་དང་། དེ་བཞིན་དུ་དམར་པོ་དང་། དཀར་པོར་སྤྲུལ་ཞིང་ཇི་ལྟར་འདོད་པ་ལྟར་སྤྲུལ་ནུས་པ་དང་། རྩིག་པ་སོགས་ལ་ཐོགས་མེད་དུ་འགྲོ་བ་དང་། གཟུགས་ལྡང་བ་ཡང་བར་བྱེད་ཅིང་གཉིད་དང་རྨུགས་པ་རྒྱང་རིང་དུ་བྱེད་པའོ། །ངག་དོན་ནི། སངས་རྒྱས་སའི་ཟད་པར་གྱི་སྐྱེ་མཆེད་བཅུ་ཆོས་ཅན། རྟོགས་པ་ཡེ་ཤེས་ཆོས་སྐུ་ཡིན་ཏེ། རྣམ་མཁྱེན་ཡིན་པའི་ཕྱིར། གཉིས་པ་ནི། ཟིལ་གྱིས་གནོན་པའི་སྐྱེ་མཆེད་ནི། ཞེས་པའི་སྐབས་སུ་གཉིས་ཀྱི། དང་པོ་ཟིལ་གནོན་གྱི་ཏིང་ངེ་འཛིན་ལ། མཚན་ཉིད། དབྱེ་བ། དོགས་གཅོད་དང་གསུམ། དང་པོ་ནི། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་གཟུགས་ཅན་གྱི་རྣམ་ཐར་སྔོན་དུ་སོང་བའི་སྟོབས་ཀྱིས་རང་གི་དམིགས་ཡུལ་དུ་གྱུར་པའི་གཟུགས་དེས་ཆོས་གཞན་ཟིལ་གྱིས་གནོན་པར་ནུས་པའི་ཏིང་ངེ་འཛིན་མཚུངས་ལྡན་དང་བཅས་པ། གཉིས་པ་ལ། དབྱིབས་དང་། ཁ་དོག་ཟིལ་གནོན་གྱི་སྐྱེ་མཆེད་གཉིས། དང་པོའི་མཚན་ཉིད། ཟིལ་གནོན་གྱི་སྐྱེ་མཆེད་གང་ཞིག །རང་གི་དམིགས་ཡུལ་དུ་གྱུར་པའི་དབྱིབས་ཀྱི་གཟུགས་དེས་ཆོས་གཞན་ཟིལ་གྱིས་གནོན་པར་ནུས་པའི་ཏིང་ངེ་འཛིན་མཚུངས་ལྡན་དང་བཅས་པ། དབྱེ་ན། གཟུགས་ཅན་གྱི་གཟུགས་ཆེན་པོ། ཆུང་ངུ་། གཟུགས་ཅན་མ་ཡིན་པའི་གཟུགས་ཆེན་པོ། ཆུང་ངུ་། ཟིལ་གྱིས་གནོན་པའི་སྐྱེ་མཆེད་དང་བཞི། དང་པོ་གཉིས་ཀྱི་མཚན་ཉིད། དབྱིབས་ཟིལ་གནོན་གྱི་སྐྱེ་མཆེད་གང་ཞིག །རྣལ་འབྱོར་པ་རང་ཉིད་གདུལ་བྱ་གཞན་ངོར་སྣང་བ་དང་བཅས་པའི་སྒོ་ནས་རང་གི་དམིགས་ཡུལ་དུ་གྱུར་པའི་གཟུགས་ཆེན་པོ་དེས། གཟུགས་ཆུང་ངུ་དེས་ཆོས་གཞན་སོགས་གོང་དང་འདྲ། ཕྱི་མ་གཉིས་ཀྱི་མཚན་ཉིད། དེ་གང་ཞིག །རྣལ་འབྱོར་པ་རང་ཉིད་གདུལ་བྱ་གཞན་ངོར་མི་སྣང་བའི་སྒོ་ནས་རང་གི་དམིགས་ཡུལ་དུ་སོགས། གཉིས་པའི་མཚན་ཉིད། དབྱེ་གཞི་གང་ཞིག །རྣལ་འབྱོར་པ་རང་ལ་ནང་གཟུགས་ཅན་མ་ཡིན་པར་འདུ་ཤེས་པའི་སྒོ་ནས་རང་གི་དམིགས་ཡུལ་དུ་གྱུར་པའི་ཁ་དོག་གི་གཟུགས་དེས་ཆོས་གཞན་སོགས་རིགས་འགྲེ། དབྱེ་ན། སྔོན་པོ། སེར་པོ། དམར་པོ། དཀར་པོ་ཟིལ་གྱིས་གནོན་པའི་སྐྱེ་མཆེད་དང་བཞི། མཚན་ཉིད་རིམ་བཞིན། ཁ་དོག་ཟིལ་གནོན་གྱི་སྐྱེ་མཆེད་གང་ཞིག་རང་གི་དམིགས་ཡུལ་དུ་གྱུར་པའི་སྔོན་པོ། སེར་པོ། དམར་པོ། དཀར་པོ་དེས་ཆོས་གཞན་སོགས་འགྲེ། དེ་ཡང་དབྱིབས་ཟིལ་གནོན་གྱི་སྐྱེ་མཆེད་དང་པོ་གཉིས་གཟུགས་ཅན་གཟུགས་ལ་ལྟ་བའི་རྣམ་ཐར་གྱི་རྒྱུ་ལས་བྱུང་། ཕྱི་མ་གཉིས་གཟུགས་ཅན་མ་ཡིན་པ་གཟུགས་ལ་ལྟ་བའི་རྣམ་ཐར་གྱི་རྒྱུ་ལས་བྱུང་། ཁ་དོག་ཟིལ་གནོན་གྱི་སྐྱེ་མཆེད་བཞི་ནི་སྡུག་པའི་རྣམ་ཐར་གྱི་རྒྱུ་ལས་བྱུང་བ་ཡིན་ནོ། །གསུམ་པ་ནི། རྣམ་ཐར། ཟིལ་གནོན། ཟད་པར་གསུམ་ལ་ཁྱད་པར་ཅི་ཡོད་ཅེ་ན། དང་པོའི་སྐབས་སུ་རང་གི་དམིགས་ཡུལ་དེ་མཛེས་མི་མཛེས་སྣ་ཚོགས་སུ་ལྟ་བར་བྱེད། གཉིས་པའི་སྐབས་སུ། དེའི་སྟེང་དུ་ཆོས་གཞན་ཟིལ་གྱིས་གནོན་པར་ནུས་པ་ཡིན། གསུམ་པའི་སྐབས་སུ། རང་གི་དམིགས་པ་གཅིག་ཉིད་ཀྱིས་ཆོས་ཐམས་ཅད་ལ་ཁྱབ་པར་སྤྲོ་ནུས་པ་ཡིན། དེས་ན་གསུམ་པོ་འདི་སྔ་མ་ལས་ཕྱི་མ་འབྱུང་བ་ཡིན་ཏེ། མཛོད་འགྲེལ་ལས། ཟིལ་གྱིས་གནོན་པའི་སྐྱེ་མཆེད་རྣམས་ནི་རྣམ་པར་ཐར་པ་འཇུག་པར་བྱེད་པ་ཅན་ཡིན་ལ། ཟད་པར་གྱི་སྐྱེ་མཆེད་རྣམས་ནི་ཟིལ་གྱིས་གནོན་པའི་སྐྱེ་མཆེད་འཇུག་པར་བྱེད་པ་ཅན་ཡིན་ཏེ། གོང་ནས་གོང་དུ་ཁྱད་པར་དུ་འཕགས་པའི་ཕྱིར་རོ། །ཞེས་སོ། །ངག་དོན་ནི། སངས་རྒྱས་སའི་ཟིལ་གནོན་གྱི་སྐྱེ་མཆེད་བརྒྱད་ཆོས་ཅན། རྟགས་གསལ་གོང་འདྲ། གསུམ་པ་ནི། ཉན་ཐོས་ཉོན་མོངས་མེད་པའི་ལྟ། །ཞེས་པའི་སྐབས་སུ་གཉིས་ཀྱི། དང་པོ་ཉོན་མོངས་པ་མེད་པའི་ཏིང་ངེ་འཛིན་ལ། མཚན་ཉིད་དང་། དབྱེ་བ་གཉིས། དང་པོ་ནི། བདག་རྐྱེན་བསམ་གཏན་གྱི་དངོས་གཞིའི་སེམས་ལ་བརྟེན་ནས་ཉོན་སྒྲིབ་སྤངས་པའི་མི་སློབ་པའི་ཏིང་ངེ་འཛིན་མཚུངས་ལྡན་དང་བཅས་པ། དབྱེ་ན། ཉན་ཐོས་དང་། སངས་རྒྱས་སའི་དེ་གཉིས། དང་པོའི་མཚན་ཉིད། དེ་གང་ཞིག །ཉན་ཐོས་མི་སློབ་པའི་རྒྱུད་ཀྱི་ཏིང་ངེ་འཛིན་མཚུངས་ལྡན་དང་བཅས་པ། མཚན་གཞི། གཉིས་ཀའི་ཆ་ལས་རྣམ་པར་གྲོལ་བའི་ཉན་ཐོས་དགྲ་བཅོམ་པའི་རྒྱུད་ཀྱི་མཁྱེན་པ་ལྟ་བུ། གཉིས་པའི་མཚན་ཉིད། སྒྲིབ་གཉིས་བག་ཆགས་དང་བཅས་པ་ཟད་པར་སྤངས་པའི་ཏིང་ངེ་འཛིན་མཚུངས་ལྡན་དང་བཅས་པ། མཚན་གཞི། རྣམ་མཁྱེན་ལྟ་བུའོ། །ངག་དོན་ནི། སངས་རྒྱས་སའི་ཉོན་མོངས་པ་མེད་པའི་ཏིང་ངེ་འཛིན་ཆོས་ཅན། ཉན་ཐོས་ཀྱི་ཉོན་མོངས་པ་མེད་པའི་ཏིང་ངེ་འཛིན་ལས་ཁྱད་པར་དུ་འཕགས་པ་ཡིན་ཏེ། གདུལ་བྱ་གཞན་རྒྱུད་ཀྱི་ཉོན་མོངས་པ་དྲུངས་ནས་འབྱིན་པར་བྱེད་པའི་མཐར་ཐུག་གི་ཏིང་ངེ་འཛིན་ཡིན་པའི་ཕྱིར།

གསུམ་པ་ལོངས་སྐུ་ནི། མཚན་ནི་སུམ་ཅུ་རྩ་གཉིས་དང་། །ཞེས་པའི་སྐབས་སུ་གཉིས་ཀྱི། དང་པོ་ལོངས་སྐུ་ལ། ཁྱད་ཆོས་སྤྱིར་བསྟན་པ། མཚན་ཉིད་བསྡུས་ཏེ་བསྟན་པ། ཡོན་ཏན་གྱི་ཁྱད་པར་དང་གསུམ། དང་པོ་ལ། སྐུ། གསུང་། ཐུགས། མཛད་པ། སྣང་ཚུལ་གྱི་ཁྱད་ཆོས་ལྔ། དང་པོ་ནི། མཚན་དཔེའི་འོད་ཟེར་གྱི་སྐུ་མངའ་བ། གཉིས་པ་ནི། ཐེག་ཆེན་གྱི་ཆོས་སྣ་ཚོགས་ལ་ལོངས་སྤྱོད་པ། གསུམ་པ་ནི། གཞན་དོན་ལ་བརྩོན་པའི་རྣམ་གྲོལ་གྱི་ཐུགས་རྗེ་མངའ་བ། བཞི་པ་ནི། ཡིད་བཞིན་གྱི་ནོར་བུ་ལྟར་མཛད་པ་ལྷུན་གྱིས་གྲུབ་པ། ལྔ་པ་ནི། ཁ་དོག་དང་དབྱིབས་སྣ་ཚོགས་སུ་སྣང་ཡང་མཚན་མར་མ་གྲུབ་པའོ། །རྒྱུད་བླ་ལས། སྣ་ཚོགས་དམ་ཆོས་འོད་ཟེར་མངའ་བའི་སྐུས། །འགྲོ་བའི་རྣམ་གྲོལ་དོན་སྒྲུབ་ལ་བརྩོན་པ། །མཛད་པ་ཡིད་བཞིན་ནོར་བུའི་རྒྱལ་བཞིན་ཏེ། །སྣ་ཚོགས་དངོས་དང་དེ་ཡི་རང་བཞིན་མིན། །ཞེས་སོ། །གཉིས་པ་ནི། ངེས་པ་ལྔ་ལྡན་གྱི་མཐར་ཐུག་གི་གཟུགས་སྐུ། ངེས་པ་ལྔ་ནི། ངོ་བོ་ངེས་པ་མཚན་དཔེས་བརྒྱན་པ། ཆོས་ངེས་པ་ཐེག་ཆེན་གྱི་ཆོས་ཁོ་ན་གསུངས་པ། འཁོར་ངེས་པ་བྱང་འཕགས་ཁོ་ནས་བསྐོར་བ། གནས་ངེས་པ་འོག་མིན་སྟུག་པོ་བཀོད་པ་ཁོ་ནར་བཞུགས་པ། དུས་ངེས་པ་འཁོར་བ་མ་སྟོངས་ཀྱི་བར་དུ་སྐུའི་སྣང་བ་མི་སྡུད་པར་བཞུགས་པའོ། །དབྱེ་ན། སར་གནས་ཀྱི་སེམས་དཔའ་མཐའ་དག་ལ་སྣང་བའི་ལོངས་སྐུ་ཙམ་དང་། ས་བཅུ་པ་ཡན་ཆད་ཀྱི་སྤྱོད་ཡུལ་དུ་གྱུར་པའི་ལོངས་སྐུ་མཚན་ཉིད་པ་གཉིས་ཡོད། གསུམ་པ་ལ། མཚན་དཔེའི་ཡོན་ཏན་དང་། གནས་ངེས་པ་བྱེ་བྲག་ཏུ་བཤད་པ་གཉིས། དང་པོ་ལ། རྒྱུ། མཚན་ཉིད། དབྱེ་བའོ། །དང་པོ་ནི། སྦྱིན་པ་དང་ཚུལ་ཁྲིམས་ཀྱིས་བསྡུས་པའི་བསོད་ནམས་ཀྱི་ཚོགས་རྒྱ་ཆེན་པོ་ནི་མཚན་དཔེའི་རྒྱུར་བཤད་ཅིང་། ཉེ་བའི་རྒྱུ་ནི། ཆོས་སྨྲ་བའི་གང་ཟག་ལ་བསྙེན་བཀུར་ཕུན་སུམ་ཚོགས་པ་བྱེད་པ་སྟེ། མདོ་ལས། གདན་རྒྱུ་སྣ་ཚོགས་ཆོས་ཀྱི་གདན་དུ་བཏིང་། །གཞན་ལ་སྟི་སྟངས་བྱེད་ལ་སྐྱོ་ངལ་མེད། །ཆོས་སྨྲ་བ་ལ་འཐབ་མོ་ངོར་མི་རྒོལ། །འདི་དག་མཚན་རྣམས་ཕུན་སུམ་ཚོགས་པའི་རྒྱུ། །ཞེས་སོ། །གཉིས་པ་ནི། རང་མཚན་དང་དཔེ་བྱད་གང་རུང་དུ་འགྲུབ་བྱེད་ཀྱི་རྒྱུ་ཕུན་ཚོགས་ལ་བརྟེན་ནས་བྱུང་ཞིང་། རང་གང་ལ་ལྡན་པའི་རྟེན་གྱི་གང་ཟག་གཙོ་བོར་སངས་རྒྱས་སུ་མཚོན་པར་བྱེད་པའི་གཟུགས་ཅན་གྱི་ཡོན་ཏན། གསུམ་པ་ནི། མཚན་བཟང་པོ་སུམ་ཅུ་རྩ་གཉིས་དང་། དཔེ་བྱད་བཟང་པོ་བརྒྱད་ཅུའོ། །དེ་གཉིས་ཀྱི་ཁྱད་པར་ཡང་། མཚན་ནི་སྐུ་མཛེས་པར་བྱེད་པའི་གཙོ་བོ་ཡིན་ལ། དཔེ་བྱད་ནི་དེའི་ཆ་ཤས་ཏེ་འཁོར་ཡིན་ནོ། །གཉིས་པ་ལ། ཐ་སྙད་རྣམ་འཇོག་དང་། དོན་ཡིན་ལུགས་ཀྱི་དབང་དུ་བྱས་པ་གཉིས། དང་པོ་ནི། གཟུགས་ཁམས་ཀྱི་གནས་འོག་མིན་ལས་ཉིས་འགྱུར་གྱིས་སྤགས་པ་ན་ས་མཐའི་སེམས་དཔའ་རྣམས་གང་དུ་འཚང་རྒྱ་བའི་གནས་དབང་ཕྱུག་ཆེན་པོའི་འོག་མིན་ཞེས་གྲགས་པ་སྟེ། ལང་གཤེགས་ལས། རིན་ཆེན་སྣ་ཚོགས་མཛེས་པ་ཡི། །འོག་མིན་གནས་ནི་ཉམས་དགའ་བར། །གཙང་མའི་གནས་ཀྱི་སྟེང་བཞུགས་ནས། །ཞེས་དང་། ཀ་མ་ལ་ཤཱི་ལས། འོག་མིན་ཞེས་བྱ་བ་ནི་ལྷ་དག་སྟེ། དེ་དག་གི་ཕྱོགས་གཅིག་ན་གཙང་མའི་ལྷ་རྣམས་ཡོད་དོ། །དེར་འཕགས་པ་ཉིད་འབའ་ཞིག་གནས་སོ། །དེ་དག་གི་སྟེང་ན་དབང་ཕྱུག་ཆེན་པོའི་གནས་ཞེས་བྱ་བ་ཡོད་དེ། དེར་ས་བཅུ་པ་ལ་བཞུགས་པའི་བྱང་ཆུབ་སེམས་དཔའ་སྲིད་པ་ཐ་མ་བ་ཁོ་ན་སྐྱེ་བ་བཞེས་པ་ཡིན་ལ། འདིར་ནི་དེ་ལྟ་བུའི་སྤྲུལ་པ་དམིགས་པ་ཡིན་ནོ། །ཞེས་སོ། །གཉིས་པ་ནི། སྲིད་པ་ཐ་མའི་བྱང་སེམས་ཀྱིས་ལོངས་སྐུ་མངོན་དུ་བྱས་པའི་ཚེ། མ་དག་པའི་འཁྲུལ་སྣང་འདི་དག་འགགས་ནས་རང་ཉིད་གང་དུ་གནས་པའི་ཞིང་དེ་དག་པའི་ཞིང་དུ་སྣང་བ་ལ་འོག་མིན་ཞེས་བྱ་སྟེ། དྲི་མ་མེད་པར་གྲགས་པའི་མདོ་ལས། བཙུན་པ་ཤཱ་རིའི་བུས་སྨྲས་པ། བདག་གིས་ས་ཆེན་པོ་འདི་མཐོ་དམན་དང་གཡང་ས་དང་ལྗན་ལྗིན་གྱིས་གང་བར་མཐོང་ངོ་། །ཞེས་ཟེར་རོ། །སངས་རྒྱས་མྱ་ངན་མེད་པའི་ཞིང་ནས་འོང་བའི་ཚངས་པ་རལ་པ་ཅན་གྱིས་སྨྲས་པ། བདག་གིས་ནི་བཅོམ་ལྡན་འདས་ཤཱཀྱ་ཐུབ་པའི་ཞིང་འདི་ཉིད་གཞན་འཕྲུལ་དབང་བྱེད་ཀྱི་ལྷའི་གནས་ཀྱི་བཀོད་པ་ཕུན་སུམ་ཚོགས་པ་བཞིན་དུ་ཡོངས་སུ་དག་པར་མཐོང་ངོ་། །ཞེར་ཟེར་རོ། །དེ་ནས་བཅོམ་ལྡན་འདས་ཀྱིས་འཁོར་གྱི་དཀྱིལ་འཁོར་རྣམས་ལ་སངས་རྒྱས་ཀྱི་ཞིང་འདིའི་རང་བཞིན་བསྟན་པར་མཛད་པས། ཐམས་ཅད་ཀྱིས་ཤར་ཕྱོགས་ཀྱི་སངས་རྒྱས་རིན་པོ་ཆེའི་རྒྱན་བཀོད་པའི་ཞིང་ཁམས་བཞིན་ཡོངས་སུ་དག་པར་མཐོང་བར་གྱུར་པ་དེའི་ཚེ། བཅོམ་ལྡན་འདས་ཀྱིས་བཀའ་སྩལ་པ། ངའི་སངས་རྒྱས་ཀྱི་ཞིང་འདི་ནི་རྟག་ཏུ་འདི་འདྲ་སྟེ། ཁྱོད་རྣམས་ཀྱིས་མི་མཐོང་ངོ་། །ཞེས་གསུངས་པས་མཚོན་ནོ། །དེས་ན་གོང་དུ་གཙང་མའི་འོག་མིན་གྱི་སྟེང་ན་ཡོད་པར་གསུངས་པའང་། ས་དང་པོའི་བདེན་པ་མཐོང་བའི་གནས་གཙང་མའི་འོག་མིན་ཡིན་ལ། གང་དུ་འཚང་རྒྱ་བའི་གནས་འོག་མིན་ཆེན་པོ་འདི་ཉིད་ཡིན་པས་རིམ་བཞིན་མངོན་དུ་གྱུར་དགོས་པ་ལ་དགོངས་ནས་སྟེང་འོག་གི་རྣམ་གཞག་མཛད་པ་ཡིན་ནོ། །ངག་དོན་ནི། ལོངས་སྐུ་ཆོས་ཅན། མཐར་ཐུག་གི་གཟུགས་སྐུ་ཡིན་ཏེ། ངེས་པ་ལྔ་ལྡན་གྱི་སྐུ་ཡིན་པའི་ཕྱིར།

བཞི་པ་ནི། གང་གིས་སྲིད་པ་ཇི་སྲིད་བར། ཞེས་པའི་སྐབས་སུ་གཉིས་ཀྱི། དང་པོ་སྤྲུལ་སྐུ་ལ། ངོ་བོ། དབྱེ་བ། དོགས་གཅོད་དང་གསུམ། དང་པོ་ལ། ཁྱད་ཆོས་སྤྱིར་བསྟན་པ་དང་། མཚན་ཉིད་བསྡུས་ཏེ་བསྟན་པ་གཉིས། དང་པོ་ནི། ཁྱད་ཆོས་བཞི་དང་ལྡན་ཏེ། དང་པོར་གདུལ་བྱ་རྣམས་མྱང་འདས་ཀྱི་ལམ་ལ་འགོད་པ། བར་དུ་ཐེག་ཆེན་དུ་སྨིན་པ། མཐར་བྱང་ཆུབ་ཏུ་ལུང་སྟོན་པ། དེའི་ཆེད་དུ་ཕྲིན་ལས་རྒྱུན་མི་ཆད་པ་བཞི་དང་ལྡན་པའི་ཕྱིར་ཏེ། རྒྱུད་བླར། འཇིག་རྟེན་ཞི་བའི་ལམ་ལ་འཇུག་པ་དང་། །རབ་ཏུ་སྨིན་དང་ལུང་སྟོན་རྒྱུ་ཡི་གཟུགས། །གང་ཡིན་དེ་ལའང་འདིར་ནི་རྟག་གནས་ཏེ། །ནམ་མཁའི་ཁམས་སུ་གཟུགས་ཀྱི་ཁམས་བཞིན་ནོ། །ཞེས་སོ། །གཉིས་པ་ནི། འཇིག་རྟེན་གྱི་ཁམས་སྣ་ཚོགས་སུ་སྐུའི་བཀོད་པ་སྣ་ཚོགས་ཀྱི་སྒོ་ནས་སེམས་ཅན་གྱི་དོན་དངོས་སུ་མཛད་པའི་མཐར་ཐུག་གི་གཟུགས་སྐུ། གཉིས་པ་ལ། བཟོ། སྐྱེ་བ། མཆོག་གི་སྤྲུལ་སྐུ་དང་གསུམ། དང་པོ་ནི། དྲི་ཟའི་རྒྱལ་པོ་རབ་དགའ་འདུལ་བའི་ཕྱིར་དུ་པི་ཝཾ་མཁན་དུ་སྤྲུལ་པ་ལྟ་བུ། གཉིས་པ་ནི། གདུལ་བྱའི་དོན་དུ་རི་བོང་ལ་སོགས་པ་སྐུའི་བཀོད་པ་སྣ་ཚོགས་སུ་སྟོན་པ་སྟེ། དཀོན་མཆོག་སྒྲོན་མེའི་མདོ་ལས། དེ་དག་དཀོན་པར་ལྗོན་ཤིང་ཆེན་པོར་གྱུར། །སྨན་དང་མི་ཟད་རིན་ཆེན་གཏེར་རྣམས་དང་། །ཡིད་བཞིན་ནོར་བུར་འདོད་སྦྱིན་སྙིང་རྗེ་དང་། །ལམ་གོལ་ལོང་བ་རྣམས་ལ་ལམ་སྟོན་འགྱུར། །ཞེས་སོ། །གསུམ་པ་ནི། འཛམ་བུའི་གླིང་དུ་མཛད་པ་བཅུ་གཉིས་ཀྱི་ཚུལ་སྟོན་པའི་སྤྲུལ་སྐུའོ། །རྒྱན་ལས། བཟོ་དང་སྐྱེ་དང་བྱང་ཆུབ་ཆེ། །མྱ་ངན་འདས་པ་རྟག་སྟོན་པས། །སངས་རྒྱས་སྤྲུལ་པའི་སྐུ་འདི་ནི། །རྣམ་པར་གྲོལ་བའི་ཐབས་ཆེན་པོ། །ཞེས་སོ། །ཊཱི་ཀར། འགའ་ཞིག་ཏུ་གཟུགས་སྐུ་གཉིས་སངས་རྒྱས་སུ་བཤད་པ་དང་། གསེར་འོད་དམ་པ་ལས་མ་ཡིན་པར་བཤད་པ་དང་། མདོ་འགའ་ཞིག་ཏུ་སངས་རྒྱས་མེད་པར་བཤད་པ་རྣམས་ནི་དྲང་དོན་དང་། གནས་སྐབས་ཀྱི་ངེས་དོན་དང་། མཐར་ཐུག་གི་ངེས་དོན་ཏེ། གསུངས་སོ། །དེའི་དོན་ནི། རིམ་པ་བཞིན་དུ། ཀུན་རྫོབ་ཏུ་གཟུགས་སྐུ་གཉིས་འགྲོ་བའི་དོན་མཛད་པའི་སྐུ་ཡིན་པ་དང་། དོན་ལ་གཟུགས་སྐུ་གཉིས་ཀྱང་ཡེ་ཤེས་ཀྱི་རང་བཞིན་ཡིན་པ་དང་། དོན་དམ་པར་སངས་རྒྱས་དང་སེམས་ཅན་ཞེས་ཐ་དད་དུ་མ་དམིགས་པའི་དོན་ནོ། །ངག་དོན་ནི། སྟོན་པ་ཤཱཀྱ་ཐུབ་པ་ཆོས་ཅན། མཆོག་གི་སྤྲུལ་པའི་སྐུ་ཡིན་ཏེ། གདུལ་བྱའི་འཁོར་བ་ཇི་སྲིད་བར་སྐུའི་བཀོད་པ་སྣ་ཚོགས་ཀྱི་སྒོ་ནས་འགྲོ་བའི་དོན་དངོས་སུ་མཛད་པའི་མཐར་ཐུག་གི་གཟུགས་སྐུ་ཡིན་པའི་ཕྱིར།

གསུམ་པ་ནི། གཞན་དག་ན་རེ། དེ་དག་གི །ཞེས་པའི་སྐབས་སུ་གཉིས་ཀྱི། དང་པོ་སྐུའི་གྲངས་ངེས་ལ། གསུམ་དུ་འདོད་པའི་ལུགས། བཞིར་འདོད་པའི་ལུགས། འཐད་ཕྱོགས་ངོས་བཟུང་བ་དང་གསུམ། དང་པོ་ལ། སྒྲུབ་བྱེད་དང་། རྒྱན་འདིར་སྐུ་གསུམ་དུ་བསྟན་ཚུལ་གཉིས། དང་པོ་ནི། སྐུ་གསུམ་གྱི་མདོ་ལས། བྱང་ཆུབ་སེམས་དཔའ་སའི་སྙིང་པོ་སྟན་ལས་ལངས་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་ལ་སྐུ་དུ་མངའ། བཅོམ་ལྡན་འདས་ཀྱིས་བཀའ་སྩལ་པ། སའི་སྙིང་པོ། དེ་བཞིན་གཤེགས་པ་ལ་སྐུ་གསུམ་མངའ་སྟེ། ཆོས་ཀྱི་སྐུ་དང་། ལོངས་སྤྱོད་རྫོགས་པའི་སྐུ་དང་། སྤྲུལ་པའི་སྐུའོ། །རིགས་ཀྱི་བུ། དེ་བཞིན་གཤེགས་པའི་སྐུ་རང་བཞིན་གྱིས་རྣམ་པར་དག་པ་ནི་ཆོས་ཀྱི་སྐུའོ། །ཏིང་ངེ་འཛིན་རྣམ་པར་དག་པ་ནི་ལོངས་སྤྱོད་རྫོགས་པའི་སྐུའོ། །སྤྱོད་པ་རྣམ་པར་དག་པ་ནི་སངས་རྒྱས་ཀྱི་སྤྲུལ་པའི་སྐུའོ། །ཞེས་དང་། རྒྱུད་བླར། དེ་དབྱེ་ཟབ་དང་རྒྱ་ཆེ་དང་། །བདག་ཉིད་ཆེན་པོའི་ཡོན་ཏན་གྱི། །ཆོས་ཀྱི་རབ་དབྱེ་རང་བཞིན་ལ། །སོགས་པའི་སྐུ་གསུམ་དག་གིས་འཇུག །ཅེས་སོ། །གཉིས་པ་ནི། སྐུ་གསུམ་པོ་རེ་རེ་ཡང་བསྟན་བཤད་གཉིས་གཉིས་ཀྱི་སྒོ་ནས་བསྟན་པ་ཡིན་ཏེ། ཐུབ་པའི་ངོ་བོ་ཉིད་སྐུ་ནི། ཞེས་པས་ངོ་བོ་ཉིད་སྐུའི་ངོ་བོ་མདོར་བསྟན། ཟག་པ་མེད་པའི་ཆོས་གང་དག །ཅེས་པའི་ཟག་མེད་ཀྱི་ཡོན་ཏན་རྒྱས་པར་བཤད་པ་ལ། བྱང་ཆུབ་ཕྱོགས་མཐུན་ཚད་མེད་དང་། །ཞེས་སོགས། མཚན་ནི་སུམ་ཅུ་རྩ་གཉིས་དང་། །ཞེས་སོགས་ཀྱིས་ལོངས་སྐུའི་ངོ་བོ་མདོར་བསྟན། དེའི་མཚན་དཔེའི་ཡོན་ཏན་རྒྱས་པར་བཤད་པ་ནི། ཕྱག་ཞབས་འཁོར་ལོའི། ཞེས་སོགས། གང་གིས་སྲིད་པ་ཇི་སྲིད་བར། །ཞེས་སོགས་ཀྱིས་སྤྲུལ་སྐུའི་ངོ་བོ་མདོར་བསྟན། ཐུབ་པའི་སྤྲུལ་སྐུ་རྒྱུན་མི་ཆད། །ཅེས་པའི་ཕྲིན་ལས་རྒྱས་པར་འཆད་པ་ནི། དེ་བཞིན་འཁོར་བ་ཇི་སྲིད་འདིའི། །ཞེས་སོགས་ཀྱིས་བསྟན་གསུངས་ཏེ། འདི་ནི་འཕགས་པ་གྲོལ་སྡེའི་རྗེས་སུ་འབྲང་ནས་མཁས་པ་གཡག་རོང་ཟུང་ལ་སོགས་པ་བཞེད་དོ། །གཉིས་པ་ལ། སྒྲུབ་བྱེད་དང་། རྒྱན་འདིར་སྐུ་བཞིར་བསྟན་ཚུལ་གཉིས། དང་པོ་ནི། སངས་རྒྱས་ཀྱི་སའི་མདོ་ལས། ཆོས་ལྔས་སངས་རྒྱས་ཀྱི་ས་བསྡུས་པ་ཡིན་ཏེ། ལྔ་གང་ཞེ་ན། ཆོས་ཀྱི་དབྱིངས་རྣམ་པར་དག་པ་དང་། མེ་ལོང་ལྟ་བུའི་ཡེ་ཤེས་དང་། མཉམ་པ་ཉིད་ཀྱི། སོ་སོར་རྟོག་པའི། བྱ་བ་གྲུབ་པའི་ཡེ་ཤེས་སོ། །ཞེས་སོགས་ཀྱི་དོན་རྒྱན་དུ་འཆད་པ་ལ། དབྱིངས་ལ་གསུམ་དུ་ཡོད་ཚུལ་ནི། སངས་རྒྱས་རྣམས་ཀྱི་སྐུ་དབྱེ་བ། །རང་བཞིན་ལོངས་སྤྱོད་རྫོགས་པ་དང་། །གཞན་ནི་སྤྲུལ་པའི་སྐུ་ཡིན་ཏེ། །དང་པོ་གཉིས་པའི་རྟེན་ཡིན་ནོ། །ཞེས་སོ། །སློབ་དཔོན་གྱི་དགོངས་པ་ཡང་དེ་ཉིད་ཡིན་ཏེ། དེ་ཡང་ངོ་བོ་ཉིད་ཀྱི་སྐུ་ལ་སོགས་པའི་དབྱེ་བས་རྣམ་པ་བཞི་ཡིན་པས། ཞེས་དང་། དེ་ལྟར་སྐུ་དང་པོ་བསྟན་ནས་གཉིས་པ་ཆོས་ཀྱི་སྐུ། ཞེས་དང་། དེ་ལྟར་སྐུ་གསུམ་པ་བསྟན་ནས་བཞི་པ་སྤྲུལ་པའི་སྐུ། ཞེས་སོགས་གསུངས་པའི་ཕྱིར། གཉིས་པ་ནི། གོང་དུ་བསྡུ་བ་འཆད་པའི་སྐབས་སུ་བསྟན་པ་ལྟར་ཡིན་ཏེ། འདི་ནི་མཁན་པོ་རྣམ་སྣང་མཛད་ཀྱི་རྗེས་སུ་འབྲང་ནས་མཁས་པ་མང་པོ་བཞེད་དོ། །གསུམ་པ་ལ། ཐ་སྙད་རྣམ་འཇོག་དང་། དོན་གནས་ཚོད་ཀྱི་དབང་དུ་བྱས་པ་གཉིས། དང་པོ་ནི། སྐུ་བཞིར་གྲངས་ངེས་པ་འཐད་དེ། རང་དོན་ཆོས་སྐུ་ལ་སྤངས་རྟོགས་གཉིས། གཞན་དོན་གཟུགས་སྐུ་ལ་ལོངས་སྤྲུལ་གཉིས་སུ་ཡོད་པའི་ཕྱིར། གཉིས་པ་ནི། གསུམ་དུ་ངེས་པ་འཐད་དེ། ཆོས་སྐུ་ལ་གློ་བུར་གྱི་དྲི་མ་མ་ལུས་པ་དང་བྲལ་བའི་ཆ། གདུལ་བྱ་དག་པ་འབའ་ཞིག་གི་ངོར་ལོངས་སྐུར་སྣང་བའི་ཆ། གདུལ་བྱ་སྣ་ཚོགས་པའི་ངོར་སྐུའི་བཀོད་པ་སྣ་ཚོགས་སུ་སྣང་བའི་ཆ་གསུམ་ཡོད་ཅིང་། དེ་གསུམ་གྱི་དབང་དུ་བྱས་ནས་སྐུ་གསུམ་དུ་བཞག་པའི་ཕྱིར། དེས་ན་ལུགས་འདི་ལ་གཟུགས་སྐུ་གཉིས་ཀྱང་ཡེ་ཤེས་སུ་ཁས་ལེན་དགོས་ཏེ། རྒྱན་ལས། ཡེ་ཤེས་ཀུན་གྱི་རྒྱུ་མཚན་ཕྱིར། །ཡེ་ཤེས་འབྱུང་གནས་ཆེན་པོ་འདྲ། །ལོངས་སྤྱོད་རྫོགས་པའི་སངས་རྒྱས་ཉིད། །ཡེ་ཤེས་གཟུགས་བརྙན་འབྱུང་ཕྱིར་ཏེ། །ཞེས་ལོངས་སྐུ་མེ་ལོང་ལྟ་བུའི་ཡེ་ཤེས་སུ་བཤད་པ་དང་། ཆོས་ཀྱི་བཤེས་གཉེན་གྱིས། སྤྲུལ་སྐུ་བྱ་བ་གྲུབ་པའི་ཡེ་ཤེས་སུ་བཤད་པའི་ཕྱིར་དང་། ཀུན་རྫོབ་ཏུ་ཡེ་ཤེས་ཁོ་ན་ལོངས་སྤྱོད་རྫོགས་པའི་སྐུ་ལ་སོགས་པར་སྣང་བ་བསྐྱེད་པའི་སྒོ་ནས། ཞེས་སོགས་གསུངས་པའི་ཕྱིར། ངག་དོན་ནི། སངས་རྒྱས་ཀྱི་སྐུ་ཆོས་ཅན། ཁྱོད་ལ་དབྱེ་ན་གསུམ་དུ་ངེས་ཏེ། ཁྱོད་ལ་དབྱེ་ན་ཆོས་སྐུ། ལོངས་སྐུ། སྤྲུལ་སྐུ་གསུམ་དུ་ངེས་པའི་ཕྱིར།

ལྔ་པ་ནི། དེ་བཞིན་འཁོར་བ་ཇི་སྲིད་འདིའི། །ཞེས་པའི་སྐབས་སུ་གཉིས་ཀྱི། དང་པོ་སངས་རྒྱས་ཀྱི་ཕྲིན་ལས་ལ། །མཚན་ཉིད་དང་། དབྱེ་བ་གཉིས། དང་པོ་ནི། རང་གི་བདག་རྐྱེན་རྫོགས་པའི་སངས་རྒྱས་ལས་བྱུང་བའི་རྣམ་དཀར་གྱི་ལས། གཉིས་པ་ལ། ཡུལ་གྱི་སྒོ་ནས། དཔེའི་སྒོ་ནས། རྟེན་གྱི་སྒོ་ནས། འཇུག་ཚུལ་གྱི་སྒོ་ནས་དབྱེ་བ་དང་བཞི། དང་པོ་ལ། འདིར་བསྟན་གྱི་ཕྲིན་ལས་ཉེར་བདུན་ཡོད། བསྡུ་ན། གདུལ་བྱ་ལམ་གྱི་རྟེན་ལ་འགོད་པ། ལམ་ལ་འགོད་པ། ལམ་གྱི་འབྲས་བུ་ལ་འགོད་པ་དང་གསུམ་དུ་འདུས། གཉིས་པ་ལ། སྐུ་སྟོན་པ་བརྒྱ་བྱིན་དང་མཚུངས་པ། གསུང་ལེགས་པར་འདོམས་པ་རྔ་བོ་ཆེ་དང་མཚུངས་པ། ཐུགས་མཁྱེན་བརྩེས་ཁྱབ་པ་སྤྲིན་དང་། སྐུའི་སྤྲུལ་པ་སྟོན་པ་ཚངས་པ་དང་། ཡེ་ཤེས་སྤྲོ་བ་ཉི་མ་དང་། ཐུགས་ཀྱི་གསང་བ་ནོར་བུ་དང་། གསུང་གི་གསང་བ་སྒྲ་བརྙན་དང་། སྐུའི་གསང་བ་ནམ་མཁའ་དང་། ཐུགས་རྗེའི་འཇུག་ཚུལ་ས་གཞི་དང་མཚུངས་པའི་ཕྲིན་ལས་སོ། །བསྡུ་ན། སྐུ་གསུང་ཐུགས་ཀྱི་མཛད་པ་གསུམ་དུ་འདུས། རྒྱུར་བླར། བརྒྱ་བྱིན་རྔ་སྤྲིན་ཚངས་པ་དང་། །ཉི་མ་ནོར་བུ་རིན་ཆེན་བཞིན། །དེ་བཞིན་གཤེགས་པ་སྒྲ་བརྙན་བཞིན། །ནམ་མཁའ་དང་ནི་ས་བཞིན་ནོ། །ཞེས་སོ། །གསུམ་པ་ལ། བྱེད་པ་པོ་དང་། བྱ་བ་ཡུལ་ལ་ཡོད་པའི་ཕྲིན་ལས་གཉིས། དང་པོ་ནི། སངས་རྒྱས་ཀྱི་མཁྱེན་པ་ལྟ་བུ། གཉིས་པ་ནི། སངས་རྒྱས་ལ་དད་པ་དང་ལྡན་པའི་སེམས་ཅན་གྱི་དགེ་རྩ་ལྟ་བུ། བཞི་པ་ལ། ལྷུན་གྱིས་གྲུབ་པ་དང་། རྒྱུན་མི་ཆད་པ་གཉིས། དང་པོ་ནི། སངས་རྒྱས་ཀྱི་ཕྲིན་ལས་ཁྱད་ཆོས་ལྔའི་སྒོ་ནས་ལྷུན་གྱིས་གྲུབ་སྟེ། གདུལ་བྱའི་ཁམས་ཀྱི་རབ་དབྱེ་ཤེས་པ། འདུལ་བའི་ཐབས་ཤེས་པ། འདུལ་བའི་བྱ་བ་མངོན་མཐོ་དང་ངེས་ལེགས་ལ་འགོད་པ། གང་ན་ཡོད་པའི་ཡུལ། ནམ་གྱི་ཚེ་འདུལ་བའི་དུས་སུ་གཤེགས་པ་ལ་ལྷུན་གྱིས་གྲུབ་པར་འཇུག་པའི་ཕྱིར་ཏེ། རྒྱུད་བླར། གདུལ་བྱའི་ཁམས་དང་འདུལ་བའི་ཐབས་དང་ནི། །གདུལ་བྱའི་ཁམས་ཀྱི་གདུལ་བའི་བྱ་བ་དང་། །དེ་ཡི་ཡུལ་དང་དུས་སུ་གཤེགས་པ་ལ། །ཁྱབ་བདག་རྟག་ཏུ་ལྷུན་གྱིས་གྲུབ་པར་འཇུག །ཅེས་སོ། །གཉིས་པ་ནི། རྒྱུ་གསུམ་གྱི་སྒོ་ནས་སངས་རྒྱས་ཀྱི་ཕྲིན་ལས་རྒྱུན་མི་ཆད་པར་འཇུག་སྟེ། སྔོན་སློབ་པ་ལམ་གྱི་གནས་སྐབས་སུ་གཞན་དོན་འབའ་ཞིག་བྱེད་པར་དམ་བཅས་པ་དང་། བདག་དང་སེམས་ཅན་རྣམས་བདེ་བར་གཤེགས་པའི་སྙིང་པོ་ཅན་དུ་མཚུངས་པར་གཟིགས་པ་དང་། གདུལ་བྱའི་འཁོར་བ་མ་སྟོངས་ཀྱི་བར་དུ་མཛད་པ་ཡོངས་སུ་མ་རྫོགས་པའི་ཕྱིར་ཏེ། རྒྱུད་བླར། གཞན་གྱི་དབང་གིས་ངེས་འབྱུང་དང་། །བདག་དང་སེམས་ཅན་མཚུངས་གཟིགས་དང་། །མཛད་པ་ཡོངས་སུ་མ་རྫོགས་ཕྱིར། །འཁོར་བ་སྲིད་དུ་མཛད་མི་ཆད། །ཅེས་སོ། །མདོར་ན་རྫོགས་པའི་སངས་རྒྱས་ཀྱི་ཕྲིན་ལས་ནི། ངོ་བོ་གདུལ་བྱ་གང་ལ་གང་ཕན་པ། རྣམ་པ་འབད་རྩོལ་གྱི་མཚན་མ་མེད་པར་ལྷུན་གྱིས་གྲུབ་པ། དུས་འཁོར་བ་མ་སྟོངས་ཀྱི་བར་དུ་རྒྱུན་མི་ཆད་པ། རྒྱ་ཆེ་བ་ནམ་མཁའི་མཐའ་ཀླས་པའི་སེམས་ཅན་ལ་ཁྱབ་པ་སྟེ། ཁྱད་ཆོས་བཞི་ལྡན་གྱི་ཚུལ་གྱིས་འཇུག་པ་ཡིན་ཏེ། རྒྱུར་བླར། དེ་ལྟར་ནམ་མཁའི་མཐའ་ཀླས་ཀྱི། །འགྲོ་ལ་རྟག་ཏུ་ལྷུན་གྲུབ་པར། །ཐོགས་མེད་བློ་ལྡན་དེ་ཡིས་ནི། །སེམས་ཅན་དོན་ནི་ཡང་དག་འཇུག །ཅེས་གསུངས་པ་ལྟར་རོ། །ངག་དོན་ནི། ཆོས་སྐུའི་ཕྲིན་ལས་ཆོས་ཅན། རྒྱུན་མི་ཆད་པ་ཡིན་ཏེ། གདུལ་བྱའི་འཁོར་བ་ཇི་སྲིད་མ་སྟོངས་ཀྱི་བར་དུ་རྒྱུན་ཆགས་སུ་འབྱུང་བའི་ཕྱིར། སྤྱི་དོན་སྙིང་པོར་དྲིལ་བ་བདུད་རྩིའི་ཉིང་ཁུ་ལས། འབྲས་བུ་ཆོས་སྐུ་བཤད་པའི་སྐབས་ཏེ་བརྒྱད་པའོ།། །།