གསུམ་པ་དེ་ལ་རྩོད་པ་སྤོང་བ།

གསུམ་པ་དེ་ལ་རྩོད་པ་སྤོང་བ་ལ།

ཁ་ཅིག་ན་རེ། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཆོས་ཅན། རིགས་གཅིག་ཡིན་པར་ཐལ། ལྡོག་པ་རིགས་གཅིག་ཡིན་པའི་ཕྱིར། འདོད་ན། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཆོས་ཅན། རིགས་གཅིག་མ་ཡིན་པར་ཐལ། རིགས་ཐ་དད་ཡིན་པའི་ཕྱིར། མ་གྲུབ་ན། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཆོས་ཅན། རིགས་ཐ་དད་ཡིན་པར་ཐལ། རྫས་རིགས་ཐ་དད་ཡིན་པའི་ཕྱིར་ན་མ་ཁྱབ། མ་གྲུབ་ན། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཆོས་ཅན། རྫས་རིགས་ཐ་དད་ཡིན་པར་ཐལ། རང་གི་ཉེར་ལེན་ཐ་དད་ལས་སྐྱེས་པའི་འདུས་བྱས་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། རང་གི་ཉེར་ལེན་ཐ་དད་ལས་སྐྱེས་པའི་འདུས་བྱས་ཡིན་པར་ཐལ། རང་གི་ཉེར་ལེན་སོ་སོ་ལས་སྐྱེས་པ་གང་ཞིག ཐ་དད་པའི་འདུས་བྱས་ཡིན་པའི་ཕྱིར། རྟགས་དང་པོ་མ་གྲུབ་ན། ཙནྡན་གྱི་ཀ་བ་དང་ཤུག་པའི་ཀ་བ་གཉིས་ཉེར་ལེན་སོ་སོ་ལས་སྐྱེས་པ་ཡིན་པར་ཐལ། ཙནྡན་གྱི་ཀ་བ་དེ་རང་རྒྱུ་ཙནྡན་ལས་སྐྱེས་པ་ཡིན་ཀྱང༌། ཤུག་པ་ལས་སྐྱེས་པ་མིན། ཤུག་པའི་ཀ་བ་དེ་རང་རྒྱུ་ཤུག་པ་ལས་སྐྱེས་པ་ཡིན་ཀྱང་ཙནྡན་ལས་སྐྱེས་པ་མ་ཡིན་པའི་ཕྱིར། ཁ་ཅིག་ན་རེ། ཤེས་བྱ་དང་རྟག་པ་གཉིས་ཆོས་ཅན། རྫས་གཅིག་ཡིན་པར་ཐལ། རྫས་སོ་སོ་བ་མ་ཡིན་པའི་ཆོས་ཡིན་པའི་ཕྱིར་ན་མ་ཁྱབ། མ་གྲུབ་ན། ཤེས་བྱ་དང་རྟག་པ་གཉིས་ཆོས་ཅན། རྫས་སོ་སོ་བ་མ་ཡིན་པའི་ཆོས་ཡིན་པར་ཐལ། རྫས་སོ་སོ་བ་མ་ཡིན་པ་གང་ཞིག ཆོས་ཡིན་པའི་ཕྱིར། རྟགས་དང་པོ་མ་གྲུབ་ན། ཤེས་བྱ་དང་རྟག་པ་གཉིས་ཆོས་ཅན། རྫས་སོ་སོ་བ་མ་ཡིན་པར་ཐལ། རྫས་ཐ་དད་མ་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། རྫས་ཐ་དད་མ་ཡིན་པར་ཐལ། རྫས་མ་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། རྫས་མ་ཡིན་པར་ཐལ། དངོས་མེད་ཀྱི་ཆོས་ཡིན་པའི་ཕྱིར། ཁ་ཅིག་ན་རེ། བདག་མེད་དང་བདག་གཉིས་ཆོས་ཅན། རང་ལྡོག་ཐ་དད་ཡིན་པར་ཐལ། རང་ལྡོག་སོ་སོ་བའི་ཆོས་ཡིན་པའི་ཕྱིར། མ་གྲུབ་ན། བདག་མེད་དང་བདག་གཉིས་ཆོས་ཅན། རང་ལྡོག་སོ་སོ་བའི་ཆོས་ཡིན་པར་ཐལ། རང་ལྡོག་སོ་སོ་བ་ཡིན་པའི་ཕྱིར། མ་གྲུབ་ན། དེ་གཉིས་ཆོས་ཅན། རང་ལྡོག་སོ་སོ་བ་ཡིན་པར་ཐལ། རང་ལྡོག་གཅིག་མ་ཡིན་པའི་ཕྱིར་ན་མ་ཁྱབ། མ་གྲུབ་ན། དེ་གཉིས་ཆོས་ཅན། རང་ལྡོག་གཅིག་མ་ཡིན་པར་ཐལ། ཁྱོད་ཀྱི་རང་ལྡོག་མེད་པའི་ཕྱིར། མ་གྲུབ་ན། བདག་མེད་དང་བདག་གཉིས་ཆོས་ཅན། ཁྱོད་ཀྱི་རང་ལྡོག་མེད་པར་ཐལ། ཁྱོད་མེད་པའི་ཕྱིར། ཁ་ཅིག་ན་རེ། དངོས་པོ་ཁོ་ན་དང་དངོས་པོ་གཉིས་ཆོས་ཅན། རྫས་ཐ་དད་ཡིན་པར་ཐལ། རྫས་གཅིག་མ་ཡིན་པའི་ཕྱིར་ན་སྤྱིར་མ་ཁྱབ། མ་གྲུབ་ན། དངོས་པོ་ཁོ་ན་དང་དངོས་པོ་གཉིས་ཆོས་ཅན། རྫས་གཅིག་མ་ཡིན་པར་ཐལ། རྫས་མ་ཡིན་པའི་ཕྱིར་རོ།། །།