གཉིས་པ་མི་ཉམས་པར་བསྲུང་ཚུལ་ལ་ལྔ་ལས།
གཉིས་པ་མི་ཉམས་པར་བསྲུང་ཚུལ་ལ་ལྔ་ལས།
དང་པོ་ཕྱིའི་རྐྱེན་གཞན་ལ་བརྟེན་ནས་བསྲུང་ཚུལ་ནི། གནས་ཀྱི་བླ་མ་མཚན་ཉིད་དང་ལྡན་པ་སོགས་ལས་སྡོམ་པའི་མི་མཐུན་ཕྱོགས་སོགས་བླང་དོར་གྱི་གནས་རྣམས་ཞིབ་ཏུ་དྲིས་ནས་ཚུལ་བཞིན་དུ་བསྲུང་བའོ། །གཉིས་པ་ནང་གི་བསམ་པ་ཕུན་ཚོགས་ལ་བརྟེན་ནས་བསྲུང་ཚུལ་ནི། འདུལ་བའི་བསླབ་བྱ་རྣམས་དྲན་ཤེས་བག་ཡོད་ཀྱི་སྒོ་ནས་བསམ་པ་བརྟན་པོས་རྒྱུན་མི་ཆད་པར་བསྲུང་བའོ། །གསུམ་པ་མི་མཐུན་ཕྱོགས་ངོ་ཤེས་པའི་སྒོ་ནས་བསྲུང་ཚུལ་བཤད་པ་ལ། ཁྱིམ་པའི་ཕྱོགས་ཀྱི་སྡོམ་པའི་མི་མཐུན་ཕྱོགས་དང༌། རབ་བྱུང་གི་སྡོམ་པའི་མི་མཐུན་ཕྱོགས་གཉིས། དང་པོ་ནི། བླང་དོར་རབ་གསལ་ལས། ཉིན་ཞག་གཅིག་གི་བར་དུ་སྲོག་གཅོད་དང༌། །མ་བྱིན་ལེན་དང་འཁྲིག་པ་རྫུན་དང་ནི། །ཆང་དང་ཕྱི་དྲོའི་ཁ་ཟས་མལ་ཆེ་མཐོ། །གླུ་གར་ལ་སོགས་སྤོང་བ་བསྙེན་གནས་ལགས། །ཞེས་པ་ལྟར་བསྙེན་གནས་གྱི་སྡོམ་པའི་མི་མཐུན་ཕྱོགས་ནི་རྩ་བ་བཞི་དང་ཡན་ལག་བཞི་དང་བརྒྱད་དོ། །བླང་དོར་རབ་གསལ་ལས། ཇི་སྲིད་འཚོ་ཡི་བར་དུ་སྲོག་གཅོད་དང༌། །མ་བྱིན་ལེན་དང་ལོག་པར་གཡེམ་པ་དང༌། རྫུན་དུ་སྨྲ་དང་མྱོས་པར་འགྱུར་བའི་ཆང༌། །སྤོང་བ་ཡོངས་རྫོགས་དགེ་བསྙེན་སྡོམ་པར་གསུངས། །ཞེས་པ་ལྟར་དགེ་བསྙེན་གྱི་སྡོམ་པའི་མི་མཐུན་ཕྱོགས་ལ་ལྔ་ལས། རྩ་བ་བཞི་དང༌། ཆང་དང་ལྔའོ། །ཆང་ནི་ཕབས་བཏབ་པའི་འབྲུའི་ཆང་དང༌། དེའི་སྦང་མ་དང༌། ཕབས་མ་བཏབ་པ་རྒུན་ཆང་དང༌། བུར་ཆང་དང༌། དེའི་སྙིགས་མ་དང༌། མེ་ཏོག་གི་ཆང་སོགས་བཅོས་པའི་ཆང་དེ་དག་ཤེས་བཞིན་དུ་འཐུང་ན་མིད་ཐེབས་རེ་རེ་ལ་ལྟུང་བ་རེ་རེའོ། །སྐབས་གཞན་ཐམས་ཅད་དུ་དེ་ལྟར་ཤེས་པར་བྱའོ། །དེ་ལྔ་ཙམ་ཇི་སྲིད་འཚོའི་བར་དུ་སྲུང་བར་ཁས་ལེན་པ་ཡིན་པའི་ཆ་ནས་དགེ་བསྙེན་དུ་བཞག་སྟེ། ཇི་སྐད་དུ་མངོན་པ་མཛོད་ལས། སྤང་བྱ་ལྔ་བརྒྱད་བཅུ་དང་ནི། །ཐམས་ཅད་སྤོང་བ་མནོས་པ་ལས། །དགེ་བསྙེན་དང་ནི་བསྙེན་གནས་དང༌། །དགེ་ཚུལ་དང་ནི་དགེ་སློང་ཉིད། །ཅེས་པ་ལྟར་རོ། །དགེ་བསྙེན་ལ་དབྱེ་བ་ནི། མཚལ་མིན་པའི་འདུལ་བ་བདུད་རྩིའི་ཉིང་ཁུ་ལས། དགེ་བསྙེན་ལ་སྐྱབས་འགྲོའི་དགེ་བསྙེན། སྣ་གཅིག་སྤང་བ། སྣ་འགའ་སྤང་བ། ཕལ་ཆེར་སྤང་བ། ཡོངས་སུ་རྫོགས་པ། ཚངས་སྤྱོད་ཀྱི་དགེ་བསྙེན། ཡན་ལག་བརྒྱད་ཇི་སྲིད་འཚོའི་བར་བསྲུང་བ་གོ་མིའི་དགེ་བསྙེན་དང་བདུན་ལ་ཕ་མ་གཉིས་སོ། །འོ་ན་དགེ་བསྙེན་གྱི་བསླབ་གཞི་ལྔ་ལས་ཕྱོགས་གཅིག་སོགས་སྤང་བ་སོགས་ལ་དགེ་བསྙེན་གྱི་སྡོམ་པ་དང་ལྡན་ནམ་ཞེ་ན། ས་བཟང་གི་མངོན་པ་ཀུན་བཏུས་ཀྱི་འགྲེལ་བ་ལས། དགེ་བསྙེན་གྱི་བསླབ་པའི་གཞི་ལྔ་ལས་ཕྱོགས་གཅིག་སྲོག་གཅོད་སྤང་པ་ལྟ་བུ་ལ་སློབ་ན་དགེ་བསྙེན་གྱི་སྡོམ་པ་དང་ལྡན་ཞེས་བྱའམ་ལྡན་པ་མ་ཡིན་པ་ཞེས་བྱ་ཞེ་ན། མིང་ཆེན་གྱི་མདོར། བཙུན་པ་ཇི་ཙམ་གྱིས་ན་སྣ་གཅིག་སྤྱོད་པའི་དགེ་བསྙེན་དུ་འགྱུར་བ་ལགས་ཞེས་སོགས་ཞུས་པའི་ ལན་དུ། བསླབ་པ་སྣ་གཅིག་སྲུང་ན་སྣ་གཅིག་སྤྱོད་དང༌། གཉིས་སྲུང་ན་ཕྱོགས་གཅིག་སྤྱོད་པ་དང༌། གསུམ་མམ་བཞི་སྲུང་ན་ཕལ་ཆེར་སྤྱོད་པ་དང༌། ལྔ་ཅར་སྲུང་ན་ཡོངས་སུ་རྫོགས་པར་སྤྱོད་པའི་དགེ་བསྙེན་དུ་གསུངས་པས། གང་བླངས་པ་སྲུང་བའི་ཆ་ནས་སྡོམ་པ་དང་ལྡན་པ་ཞེས་བྱ་སྟེ། ལྷག་མི་སྲུང་བའི་ཆ་ནས་ཚུལ་ཁྲིམས་འཆལ་བ་ཞེས་ཀྱང་བྱའོ། །བསླབ་བྱ་གཞན་མི་སྲུང་ཡང་གསུམ་ལ་སྐྱབས་སུ་སོང་ན། སྐྱབས་གསུམ་འཛིན་པའི་དགེ་བསྙེན་དུ་གསུངས། ཞེས་གསུངས་པ་ལྟར་ཤེས་པར་བྱའོ། །