གསུམ་པ་མཚན་ཉིད་བཤད་པ།

གསུམ་པ་མཚན་ཉིད་བཤད་པ་ལ།

སོ་སོར་ཐར་བའི་སྡོམ་པའི་མཚན་ཉིད་དང༌།དབྱེ་བ་སོ་སོའི་མཚན་ཉིད་བཤད་པ་དང་གཉིས། དང་པོ་ནི་ལུས་ངག་གི་གཞན་གནོད་གཞི་བཅས་ལས་ལོག་པའི་འདོད་པའི་སས་བསྡུས་ཀྱི་ངེས་འབྱུང་གི་སྡོམ་པ་དེ། སོ་ཐར་གྱི་སྡོམ་པའི་མཚན་ཉིད་ཡིན་ཏེ། ལུས་ངག་གི་ཞེས་པས་ཡིད་སྡོམ་དང་སོ་ཐར་གྱི་སྡོམ་པའི་གཞི་མཐུན་གཅོད།གཞན་གནོད་གཞི་བཅས་ལས་ལོག་ཅེས་པས་གཞན་སྡེའི་ཚུལ་ཁྲིམས་དང་རྩ་བཞིའི་གཞི་ཕྱི་དྲོའི་ཁ་ཟས་སོགས་བཅས་པའི་ཁ་ན་མ་ཐོ་བ་གཅོད། འདོད་པའི་སས་བསྡུས་ཞེས་པས་བསམ་གཏན་དང་ཟག་མེད་ཀྱི་སྡོམ་པ་གཉིས་གཅོད། ངེས་འབྱུང་སྨོས་པས་ལེགས་སྨོན་འཇིགས་སྐྱོབ་སོགས་སོ་ཐར་གྱི་ཚུལ་ཁྲིམས་ཡིན་པ་གཅོད་དོ། །དེ་ཙམ་གྲུབ་མཐའ་བཞི་འདྲ་བ་ཡིན་ཏེ། མཛོད་རང་འགྲེལ་ལས། སོ་སོར་ཐར་བའི་སྡོམ་པ་ནི་འདི་བ་རྣམས་ཀྱི་འདོད་པ་ན་སྤྱོད་པའི་ཚུལ་ཁྲིམས་སོ། །བྱེ་བྲག་སྨྲ་བའི་ལུགས་ལ་དེའི་ཟུར་ལ་གཟུགས་ཞེས་བརྗོད་ནའང་ཆོག སོ་ཐར་གྱི་སྡོམ་པ་ལ་གཞན་གནོད་གཞི་བཅས་སྤོང་བའི་སྡོམ་པས་ཁྱབ་བར་ཐལ། རྣམ་འབྱེད་འགྲེལ་བ་ལས། རང་བཞིན་གྱི་ཁ་ན་མ་ཐོ་བ་དང་བཅས་པ་ཨ་མྲའི་ཚལ་ལྟ་བུ། བཅས་པའི་ཁ་ན་མ་ཐོ་བ་དང་བཅས་པ་སྨྱུག་མའི་ཚལ་ཞེས་པ་ལྟ་བུ། ཞེས་དང༌། མཛོད་འགྲེལ་གནད་སྒྲོན་ལས། འཆལ་བའི་ཚུལ་ཁྲིམས་ཀྱི་རྒྱུན་སྡོམ་ཞིང་འགོག་པས་ན་སྡོམ་པའོ། །ཞེས་དང༌། མཚོ་ཊཱིཀ་༣༡ལས། སྤོང་བ་བདུན་འཁོར་དང་བཅས་ཞེས་གསུངས་ན་གཙོ་བོ་ནི་གང་འཁོར་ནི་གང་ཞེ་ན་རང་བཞིན་གྱི་ཁ་ན་མ་ཐོ་བ་ལུས་ངག་གི་བདུན་པོ་སྤོང་བ་ནི་གཙོ་བོ་ཡིན་ལ། ཆང་འཐུང་བ་ལ་སོགས་པ་བཅས་པའི་ཁ་ན་མ་ཐོ་བ་སྤོང་བ་ཐམས་ཅད་འཁོར་ཡིན་ཏེ། ཞེས་དང༌། མཆིམས་མཛོད་༣༥༣ལས། དེ་ལ་གནོད་པ་ནི་ལུས་ངག་གི་མི་དགེ་བ་བདུན་དང་གཞི་ནི་ཡིད་ཀྱི་གསུམ་མམ། ཡང་ན་གནོད་པ་རང་བཞིན་དང་གཞི་བཅས་པའི་ཁ་ན་མ་ཐོ་བའོ། །ཞེས་དང༌། མཆིམས་མཛོད་༣༥༣ལས། རྣམ་པར་རིག་བྱེད་མིན་པ་དེ་ནི་རྣམ་པ་གསུམ་དུ་ཤེས་པར་བྱ་སྟེ། གང་ཞེ་ན། གཞན་ལ་གནོད་པ་གཞི་དང་བཅས་པ་སྤོང་ཞིང་འཆལ་བའི་ཚུལ་ཁྲིམས་ཀྱི་རྒྱུན་སྡོམ་ཞིང་འགོག་པས་ན་སྡོམ་པ་དང༌། གནོད་པ་གཞི་དང་བཅས་པ་ལ་རྒྱུན་དུ་ཞུགས་པ་ནི་སྡོམ་མིན་དང༌། གནོད་པའམ་གནོད་པའི་གཞི་དག་ཕྱོགས་རེ་སྤོང་བའམ་ཕྱོགས་རེ་ལ་འཇུག་ན་སྡོམ་པ་དང་སྡོམ་མིན་གཉིས་ལས་གཞན་པའི་བར་མ་ཡིན་ནོ། །ཞེས་གསུངས་པའི་ཕྱིར། འདོད་ན། དགེ་བསྙེན་བསྙེན་གནས་དགེ་ཚུལ་དགེ་སློབ་མའི་སྡོམ་པ་དེ་དག་ཆོས་ཅན། སོ་ཐར་གྱི་སྡོམ་པ་མ་ཡིན་པར་བར་མའི་དགེ་བ་ཡིན་པར་ཐལ། གཞན་གནོད་གཞི་བཅས་སྤོང་བ་མ་ཡིན་པ་གང་ཞིག དེའི་ཕྱོགས་རེ་སྤོང་བ་དེ་ཡིན་པའི་ཕྱིར་ཏེ། མཛོད་འགྲེལ་གནད་སྒྲོན་ལས། སྤང་བྱ་ལྔ་བརྒྱད་བཅུ་དང་ནི། །ཐམས་ཅད་སྤོང་བ་མནོས་པ་ལས། །དགེ་བསྙེན་དང་ནི་བསྙེན་གནས་དང༌། །དགེ་ཚུལ་ཆེད་དང་དགེ་སློང་ཉིད། །སྤང་བར་བྱ་བ་ལྔ་པོ་ལས་སླར་ལྡོག་པ་ཡང་དག་པར་བླངས་པས་ནི་དགེ་བསྙེན་གྱི་སྡོམ་པ་དང༌། ཞེས་དང༌། མཚོ་ཊཱིཀ་༣༡ལས། དགེ་ཚུལ་ལ་སོགས་པ་དག་གི་སྡོམ་པ་ནི་སྤོང་བ་བཞིའི་མཚན་ཉིད་ཅན་ཡིན། ཞེས་སོགས་གསུངས་པའི་ཕྱིར་ཟེར་བ་དང༌། བཅས་པ་མ་མཛད་པའི་སྔ་རོལ་གྱི་དགེ་སློང་གི་སྡོམ་པ་སོགས་སོ་ཐར་གྱི་སྡོམ་པ་ལ་སྡོམ་པའི་མཚན་ཉིད་དེ་ཚང་མ་ཚང་དང་དེ་དུས་སུ་དགེ་ཚུལ་དང་དགེ་སློང་གི་སྡོམ་པའི་ཁྱད་པར་སོགས་ལ་དཔྱད། དགེ་ཚུལ་གྱི་སྡོམ་པ་སྤོང་བ་བཞི་ཙམ་གྱི་མཚན་ཉིད་ཡིན་པ་མི་འཐད་པར་ཐལ། དགེ་ཚུལ་གྱིས་ཀྱང་དགེ་སློང་ཕ་ཁྲིམས་ཉིས་བརྒྱ་ང་གསུམ་ལས་ལྟུང་མེད་ཕྱེད་བཅུ་བདུན་མ་གཏོགས་གཞན་རྣམས་ངེས་པར་སྤོང་དགོས་པའི་ཕྱིར་ཟེར་ན་དཔྱད་པར་བྱའོ། ། གཞན་ཡང་ངེས་འབྱུང་གི་བསམ་པ་མེད་པར་སོ་ཐར་གྱི་སྡོམ་པ་མི་སྐྱེ་བ་ཡིན་ཏེ། མདོ་རྩ་བ་ལས། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ། ཞེས་དང༌། ཊཱི་ཀ་ལས། མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མི་སྐྱེ་བས། ཞེས་དང༌། རྒྱ་ཆེར་འགྲེལ་ལས། མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་སྐྱེ་བ་ནི་མེད་དོ། །ཞེས་དང༌། ཕྲན་ཚེགས་འགྲེལ་བ་ལས། ཐར་བའི་བསམ་པའི་སྒོ་ནས་སྡོམ་པ་འཐོབ་པ་ཡིན་ལ། ཐར་པའི་བསམ་པ་མེད་པར་སྡོམ་པ་མི་འཐོབ། ཅེས་དང༌། འདུལ་བའི་ལག་ལེན་རིན་པོ་ཆེའི་གཏེར་༡༣༥ལས། དེ་ཐམས་ཅད་མྱང་འདས་ཀྱི་བསམ་པས་ཟིན་པ་དགོས་ཏེ། ཚེ་འདིའི་སྡུག་བསྔལ་དང་བྲལ་འདོད་དམ། ཕྱི་མ་ངན་སོང་གིས་འཇིགས་ནས་བསྲུང་པ་འཇིགས་སྐྱོབ་ཀྱི་ཚུལ་ཁྲིམས། ཚེ་འདིར་བདེ་བ་ཐོབ་འདོད་དམ། ཕྱི་མར་ལྷ་མིའི་དཔལ་འདོད་ནས་ལེན་པ་ལེགས་སྨོན་གྱི་ཚུལ་ཁྲིམས་ཏེ། དེ་གཉིས་ངེས་འབྱུང་གི་བསམ་པ་ཉམས་པས་སོ་ཐར་གྱི་སྡོམ་པར་མི་འགྱུར། སོ་ཐར་གྱི་སྡོམ་པར་འགྱུར་བ་ལ། ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ། ཞེས་གསུངས་པས་མྱང་འདས་ཀྱི་བསམ་པ་བརྟན་པོས་ཟིན་དགོས་ཤིང་ཞེས་གསུངས་པའི་ཕྱིར་ཟེར་ན། འདོད་མི་ནུས་ཏེ། མཚོ་ཊཱིཀ་༦༩ལས། ལུང་གཞི་ནས། ཀུན་དགའ་བོའི་ཚ་བོ་བྱིས་པ་གཉིས་དང་ཕྲན་ཚེགས་ནས་མཛེས་དགའ་བོ་དང༌། རྣམ་འབྱེད་ནས་འཆར་ཀ་དང་ཉེ་སྡེ་སྟེ། གང་ཟག་དེ་རྣམས་ལ་ཆོས་ཅན། སྡོམ་པ་མ་སྐྱེས་པར་ཐལ། སྡོམ་པ་ལེན་དུས་ན་མྱ་ངན་ལས་འདས་པའི་བསམ་པ་མེད་པའི་ཕྱིར་ཏེ། དང་པོ་གཉིས་ལྟོ་ཕྱིར་རབ་ཏུ་བྱུང་བ་དང་དེའི་འོག་མ་གཉིས་ངོ་མ་བཟློག་པར་རབ་ཏུ་བྱུང་བ་དང༌། ཉེ་སྡེ་སྲོག་བྱོལ་ལ་རབ་ཏུ་བྱུང་བའི་ཕྱིར་ཏེ། རྟགས་ལུང་གིས་གྲུབ་ཅིང༌། ཁྱབ་པ་ཁས་བླངས་སོ། །འདོད་ན། རབ་བྱུང་གི་ཆ་ལུགས་ཅན་སྡོམ་པ་མེད་པས་དགྲ་བཅོམ་པ་ཐོབ་པར་མི་རིགས་པ་ལས་དེ་ཐམས་ཅད་ཀྱིས་དགྲ་བཅོམ་ཐོབ་པར་ལུང་ལས་གསུངས་པ་དང་འགལ་ལོ། །རྣམ་པར་གཏན་ལ་དབབ་པ་བསྡུ་བ་ལས་ཀྱང༌། བདག་ཁྱིམ་འདི་ན་གནས་ན་དཀའ་བས་འཚོ་བར་འགྱུར་བས་བདག་རབ་ཏུ་བྱུང་ལ་ཚེགས་ཆུང་ངུས་འཚོ་བར་བྱ་ཞིང༌། ཇི་སྲིད་འཚོའི་བར་ཏུ་ཚངས་པའི་སྤྱོད་པ་སྤྱད་པར་བྱའོ། །སྙམ་ནས་རབ་ཏུ་བྱུང་བ་ནི་༼འཇིགས་སྐྱོབ་ཀྱི་དྲི་མས་གོས་པས།༽གཅིག་ཏུ་ཡོངས་སུ་དག་པ་མ་ཡིན་ཞིང༌། དེ་ནི་བསྙེན་པར་རྫོགས་པ་མ་ཡིན་པར་ཡང་བརྗོད་པར་མི་བྱའོ། །ཞེས་གསུངས་པ་དང་འགལ་ལོ། །དེང་སང་གི་རབ་བྱུང་རྣམས་ཆོས་ཅན། ཕལ་ཆེར་ལ་སྡོམ་པ་མ་སྐྱེས་པར་ཐལ། ཕལ་ཆེར་ལ་མྱ་ངན་ལས་འདས་པའི་བསམ་པ་བརྟན་པོ་མེད་པའི་ཕྱིར་རོ། །ཞེས་པ་ནས། མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མི་སྐྱེ་ཞེས་གསུངས་པ་དེ་ཐམས་ཅད་ངེས་འབྱུང་གི་སྡོམ་པ་མི་སྐྱེ་ཞེས་བསྟན་པ་སྟེ། མདོ་རྩ་འགྲེལ་དུ་སྡོམ་པ་སྐྱེ་མི་སྐྱེ་བཤད་པ་ཐམས་ཅད་ངེས་པར་འབྱུང་བའི་ཚུལ་ཁྲིམས་ཀྱི་དབང་དུ་བྱས་ཏེ་གསུངས་པའི་ཕྱིར་རོ། །གཉིས་པ་རང་ལུགས་བཞག་པ་ནི་མྱ་ངན་ལས་འདས་པའི་བསམ་པ་བརྟན་པོ་མེད་པར་སྡོམ་པ་མནོས་ན་ངེས་འབྱུང་གི་སྡོམ་པ་མི་སྐྱེ་ཡང་སྡོམ་པ་ཙམ་པོ་ཞིག་ནི་སྐྱེ་སྟེ་སྔར་གྱི་གཞུང་དེ་དག་གིས་གྲུབ་བོ། །ཞེས་གསུངས་པའི་ཕྱིར་ཟེར་ན། མཚོ་སྣ་བས་དེ་ལྟར་གསུངས་པ་ལ་དཔྱད་ན་ཕྱི་རོལ་བའི་རྒྱུད་ལ་སོ་ཐར་གྱི་སྡོམ་པ་མེད་པའི་རྒྱུ་མཚན་ངེས་འབྱུང་གི་བསམ་པ་མེད་པའི་རྒྱུ་མཚན་གྱིས་མ་ཡིན་པར་ཐལ། འདོད་པའི་ཕྱིར། འདོད་མི་ནུས་ཏེ། མཛོད་རང་འགྲེལ་ལས། ཅི་ཕྱི་རོལ་པ་དག་ལ་ཡང་དག་པར་བླང་བ་ལས་བྱུང་བའི་ཚུལ་ཁྲིམས་ཡོད་དམ་ཞེ་ན་ཡོད་མོད་ཀྱི་སོ་སོར་ཐར་བའི་སྡོམ་པ་ནི་མ་ཡིན་ནོ། །ཅིའི་ཕྱིར་ཞེ་ན། དེ་ནི་སྲིད་པ་ལ་བརྟེན་པའི་ཕྱིར། ཞེས་དང༌། མཆིམས་མཆན་༣༥༧ལས། ཕྱི་རོལ་པ་རྣམས་ལ་སོ་ཐར་མེད་དམ་ཡོད་ཅེ་ན། དེ་དག་ལ་ཡང་མི་དགེ་བ་སྡོམ་པ་ཙམ་ཡོད་མོད་ཀྱི་སོ་སོར་ཐར་བའི་སྡོམ་པ་ནི་མེད་དེ། དེ་དག་ནི་ལོག་ལྟ་ལ་སོགས་པས་ཉམས་པའི་ཕྱིར་དང༌། སྲེད་པའི་ཁྱད་པར་ཁོ་ན་ལ་ཐར་བར་འདུ་ཤེས་པས་སྲིད་པ་ལ་བརྟེན་པའི་ཕྱིར་གཏན་དུ་སྡིག་པ་ལས་སོ་སོ་ཐར་བར་བྱེད་པ་མ་ཡིན་ནོ། །ཞེས་གསུངས་པའི་ཕྱིར་དང༌། ཚུལ་ཁྲིམས་དེ་ངེས་འབྱུང་གི་བསམ་པས་མ་ཟིན་ན་འཇིགས་སྐྱོབ་དང་ལེགས་སྨོན་གྱི་ཚུལ་ཁྲིམས་གང་རུང་དུ་འགྱུར་བའི་ཕྱིར་ཏེ། མཛོད་རང་འགྲེལ་ལས། འཇིགས་པའི་ཚུལ་ཁྲིམས་ནི། འཚོ་བ་མེད་པ་དང༌། ཚིགས་སུ་བཅད་པ་མེད་པ་དང་ཆད་པ་དང་ངན་འགྲོས་འཇིགས་ནས་སྲུང་བ་གང་ཡིན་པའོ། །ལེགས་སུ་སྨོན་པའི་ཚུལ་ཁྲིམས་ནི་སྲིད་པ་དང་ལོངས་སྤྱོད་དང་བཀུར་སྟི་ལ་ཆགས་ནས་སྲུང་བ་གང་ཡིན་པའོ། །ཞེས་གསུངས་པའི་ཕྱིར་ཟེར་ན་རང་ལུགས་ལ་སོ་ཐར་གྱི་སྡོམ་པ་དངོས་ཡིན་པ་ལ་འཁོར་བ་ལ་ཡིད་སྐྱོ་བ་སྐྱེས་ནས་དེ་ལས་ཐར་འདོད་ཀྱི་བློས་ཟིན་པ་དགོས་སོ། ། སྒྲུབ་བྱེད་སྔར་གྱི་ལུང་དེ་དག་དང༌། འདུལ་བའི་ལག་ལེན་རིན་པོ་ཆེའི་གཏེར་༡༣༥ལས། མྱང་འདས་ཀྱི་བསམ་པས་ཟིན་པ་དགོས་ཏེ། ཚེ་འདིའི་སྡུག་བསྔལ་དང་བྲལ་འདོད་དམ། ཕྱི་མ་ངན་སོང་གིས་འཇིགས་ནས་བསྲུང་པ་འཇིགས་སྐྱོབ་ཀྱི་ཚུལ་ཁྲིམས། ཚེ་འདིར་བདེ་བ་ཐོབ་འདོད་དམ། ཕྱི་མར་ལྷ་མིའི་དཔལ་འདོད་ནས་ལེན་པ་ལེགས་སྨོན་གྱི་ཚུལ་ཁྲིམས་ཏེ། དེ་གཉིས་ངེས་འབྱུང་གི་བསམ་པ་ཉམས་པས་སོ་ཐར་གྱི་སྡོམ་པ་མི་འགྱུར།སོ་ཐར་གྱི་སྡོམ་པར་འགྱུར་བ་ལ། ངེས་པར་འབྱུང་པའི་ཚུལ་ཁྲིམས་ཀྱི་དབང་དུ་བྱས་ཏེ། ཞེས་གསུངས་པས་མྱང་འདས་ཀྱི་བསམ་པ་བརྟན་པོས་ཟིན་དགོས་ཤིང༌། དེ་ཡང་འཁོར་བའི་ཉེས་དམིགས་རིག་ནས་སྤང་བར་འདོད་པ་དང༌། མྱང་འདས་ཀྱི་ཡོན་ཏན་རིག་ནས་ཐོབ་པར་འདོད་པ་དགོས། ཞེས་གསུངས་སོ། །འོན་ཀྱང་ཁ་ཅིག་ངེས་འབྱུང་བསམ་པ་མི་དགོས་པར་འདོད་པ་དང༌། ཁ་ཅིག་ངེས་འབྱུང་བསམ་པ་དགོས་ཀྱང་བཅོས་མིན་གྱི་མྱོང་བ་ཐོན་པའི་ངེས་འབྱུང་མི་དགོས་པར་འདོད་པ་དང༌། ཁ་ཅིག་སྡོམ་པ་ལེན་དུས་སུ་ངེས་འབྱུང་ཤུགས་དྲག་དགོས་ཀྱང་བརྟན་པ་མི་དགོས་པར་འདོད་པ་སོགས་མང་བས་དམ་པ་རྣམས་དོགས་པའི་གནས་ཡིན་པས་དཔྱད་པར་བྱའོ། །ཡང་སོ་ཐར་གྱི་སྡོམ་པ་སོགས་སྡོམ་པ་སོ་སོའི་མཚན་ཉིད་ཡོད་དེ། རང་འགྲེལ་༣༤༤ལས། སོ་སོར་ཐར་བའི་སྡོམ་པ་ནི། འདི་བ་རྣམས་ཀྱི་འདོད་པ་ན་སྤྱོད་པའི་ཚུལ་ཁྲིམས་སོ། །བསམ་གཏན་གྱི་སྡོམ་པ་ནི་གཟུགས་ན་སྤྱོད་པ་རྣམས་ཀྱི་ཚུལ་ཁྲིམས་ཡིན་ནོ། །ཟག་པ་མེད་པའི་སྡོམ་པ་ནི་ཟག་པ་མེད་པའི་ཚུལ་ཁྲིམས་ཡིན་ནོ། །ཞེས་དང༌། མཚོ་ཊཱིཀ་༢༠ལས།སོ་སོར་ཐར་པའི་སྡོམ་པའི་མཚན་ཉིད་ནི། བྱེ་བྲག་སྨྲ་བ་ལྟར་ན་ཉེས་པར་སྤྱོད་པ་ལས་མི་མཐུན་ཕྱོགས་ཀྱི་དངོས་གཞི་ཡིན་པའི་གཟུགས་དགེ་བ་གང་ཞིག ཁམས་གོང་མའི་སེམས་དང་ལྷན་ཅིག་འབྱུང་བའི་རྒྱུ་འབྲས་མ་ཡིན་པའོ། །ཞེས་དང༌། མངོན་རྒྱན་༣༥༤ལས། དགེ་སློང་གི་སྤོང་བདུན་དང༌། ཟག་བཅས་ཀྱི་མཉམ་བཞག་ལས་སྐྱེས་པའི་སྤོང་བདུན་དང༌། ཟག་མེད་མཉམ་བཞག་ལས་སྐྱེས་པའི་སྤོང་བདུན་རྣམས་མཚན་གཞི། སོ་ཐར་དང༌། བསམ་གཏན་དང༌། ཟག་མེད་ཀྱི་སྡོམ་པའི་ཐ་སྙད་བྱ་རུང༌། མཚན་ཉིད་རིམ་པ་ལྟར་འདོད་པའི་དགེ་བ་གཟུགས་ཅན་གང་ཞིག་ངེས་པ་ལྔ་དང་བྲལ་བ་དང༌། སེམས་ཀྱི་རྗེས་འབྲང་གི་གཟུགས་ཟག་བཅས་དང༌། སེམས་ཀྱི་རྗེས་འབྲང་གི་གཟུགས་ཟག་མེད་དོ། །ཞེས་གསུངས་པ་ལྟར་ཡིན་པའི་ཕྱིར་རོ། ། དེ་དག་གི་སྒོ་ནས་བསྙེན་གནས་ཀྱི་སྡོམ་པ་སོགས་ངེས་པ་ལྔ་བྲལ་ཡིན་མིན་དཔྱད་པར་བྱའོ། །