སྡེ་སྣོད་གསུམ་ཞྭའི་བཤད་པ།
༄༅། །སྡེ་སྣོད་གསུམ་ཞྭའི་བཤད་པ། །རྟག་ཏུ་བདེ་ཆེན་འཁོར་ལོ་གང་། །མཛེས་པའི་རྒྱན་དུ་བཞུགས་པ་དེ། །རིགས་བརྒྱའི་ཁྱབ་བདག་རྡོ་རྗེ་འཆང་། །མཚུངས་པ་མེད་པའི་མགོན་དེ་ལགས། །དེ་ཉིད་ཕྱི་ལྟར་མཚོན་བྱེད་པ། །རྒྱ་གར་པཎ་ཞྭ་མཛེས་པ་ལ། སྡེ་སྣོད་རིན་ཆེན་གསུམ་འཛིན་པའི། །བརྡ་རུ་རིམ་པ་གསུམ་དུ་བྱས། །ཆོས་ཉིད་འགྱུར་མེད་མཚོན་པའི་ཕྱིར། །མཐིང་ནག་དར་གྱི་ཆུ་སྒྲིལ་དང་། །ཐུགས་རྗེས་འགྲོ་ལ་ཆགས་པའི་བརྡར། །ཞྭ་ཉིད་ཁ་དོག་དམར་པོར་བྱས། རྩེ་མོ་ཤེས་རབ་རང་བཞིན་ཏེ། ལྟ་བ་ཡས་ནས་འབེབས་ཕྱིར་རྣོ། །བར་རིམ་བདེ་སྟོང་ཏིང་འཛིན་ལ། །རྒྱུན་ཆད་མེད་ཕྱིར་འཁྱུད་མོར་འཁོར། །འོག་རིམ་ཚུལ་ཁྲིམས་བསླབ་པ་ལ། །ཉེས་སྐྱོན་མེད་ཕྱིར་པདྨས་མཚོན། །དེ་ལྟའི་བསྟན་པ་རིན་ཆེན་གང་། །ལྷད་མེད་གསེར་དང་འདྲ་བས་ནི། །གསེར་གྱི་ཐ་གུའི་རེ་ཁ་དང་། །རྣམ་འགྱུར་དག་གིས་མཛེས་པར་བྱས། །གང་ལ་བརྟེན་ནས་གྲུབ་བརྙེས་པ། །ཟམ་མ་ཆད་ཕྱིར་སྲུབ་ཐག་སྦྲེལ། །དེས་ན་ལམ་དང་འབྲས་བུའི་ཆོས། །མ་ལུས་མཚོན་པའི་ཞྭ་མོ་འདི། །སྔ་འགྱུར་ལུགས་བཟང་འཛིན་རྣམས་ཀྱི། །ཅོད་པཎ་ཡིན་པར་གཞུང་ལས་བཤད། །ད་ལྟ་ཁོ་བོའི་སྐལ་བར་ཐོབ། །དེས་ན་མཚོན་བྱེད་རྟགས་ཀྱི་རྫས། །གང་འདི་ཁྱོད་ལ་སྦྱིན་བྱས་པས། །མཚོན་དོན་རྣམས་ཀྱང་འཛིན་པར་མཛོད། །ཅེས་པའང་བཙུན་པ་གཞན་ཕན་པས་སྤྲིང་བ་དགེ། །།