འཕགས་པ་བགྲེས་མོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ།

༄༅། །འཕགས་པ་བགྲེས་མོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་བཞུགས་སོ། །

རྒྱ་གར་སྐད་དུ། ཨཱརྻ་མ་ཧཱ་ལ་ལི་ཀ་པརི་པྲྀཙྪ་ནཱ་མ་མ་ཧཱ་ཡ་ན་སཱུ་ཏྲ། བོད་སྐད་དུ། འཕགས་པ་བགྲེས་མོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ། །སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡུལ་བྲྀ་ཛི་ན་ཡུལ་རྒྱུ་བ་རྒྱུ་ཞིང༌། དགེ་སློང་ཉིས་བརྒྱ་ལྔ་བཅུའི་དགེ་སློང་གི་དགེ་འདུན་ཆེན་པོ་དང༌། བྱང་ཆུབ་སེམས་དཔའ་སེམས་དཔའ་ཆེན་པོ་རབ་ཏུ་མང་པོ་དང་ཐབས་གཅིག་ཏུ་གྲོང་ཁྱེར་ཆེན་པོ་ཡངས་པ་ཅན་ག་ལ་བ་དེར་གཤེགས་པ་དང༌། དེའི་ཚེ་གྲོང་གི་བུད་མེད་རྒན་མོ་གཏུགས་པ་འཁོགས་པ་ན་ཚོད་ལས་འདས་པར་གྱུར་པ། སྐྱེས་ནས་ལོ་བརྒྱ་ཉི་ཤུ་ལོན་པ་ཞིག་དགོན་པ་ན་རྩྭ་སྡུད་ཅིང་འདུག་སྟེ། བུད་མེད་དེས་བཅོམ་ལྡན་འདས་མཛེས་པ། དད་པར་བྱེད་པ། དབང་པོ་དུལ་བ། ཐུགས་དུལ་བ་དུལ་བ་དང་ཞི་གནས་མཆོག་བརྙེས་པ། སྦས་པ་སྐྱོན་མེད་པ། མཚོ་ལྟར་དྭངས་ཤིང་གསལ་ལ་རྙོག་པ་མེད་པ་གསེར་གྱི་མཆོད་སྡོང་ལྟར་མངོན་པར་འཕགས་པ་དཔལ་གྱི་ལྷམ་མེ། ལྷན་ནེ། ལྷང་ངེ་བ། སྐྱེས་བུ་ཆེན་པའི་མཚན་སུམ་ཅུ་རྩ་གཉིས་ཀྱིས་ལེགས་པར་བརྒྱན་པ། ཐག་རིང་པོ་ནས་བྱོན་པ་མཐོང་ངོ༌། །མཐོང་ནས་ཀྱང་སེམས་དད་པར་གྱུར་ནས། དད་པའི་སེམས་ཀྱིས་བཅོམ་ལྡན་འདས་ག་ལ་བ་དེར་སོང་སྟེ། ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས་ཕྱོགས་གཅིག་ཏུ་འདུག་སྟེ། བུད་མེད་དེས་བཅོམ་ལྡན་འདས་ག་ལ་བ་དེར་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སྐྱེ་བ་གང་ནས་མཆི། རྒ་བ་གང་ནས་མཆིས་གང་དུ་མཆི། བཅོམ་ལྡན་འདས་ན་བ་གང་ནས་མཆི། འཆི་བ་གང་ནས་མཆི་གང་དུ་མཆི། བཅོམ་ལྡན་འདས་གཟུགས་གང་ནས་མཆི། ཚོར་བ་དང་འདུ་ཤེས་དང་འདུ་བྱེད་རྣམས་དང༌། རྣམ་པར་ཤེས་པ་གང་ནས་མཆི་གང་དུ་མཆི། བཅོམ་ལྡན་འདས་སའི་ཁམས་གང་ནས་མཆི། ཆུའི་ཁམས་དང་མེའི་ཁམས་དང་རླུང་གི་ཁམས་དང་ནམ་མཁའི་ཁམས་དང༌། རྣམ་པར་ཤེས་པའི་ཁམས་གང་ནས་མཆི་གང་དུ་མཆི། བཅོམ་ལྡན་འདས་མིག་གང་ནས་མཆི། རྣ་བ་དང་སྣ་དང་ལྕེ་དང་ལུས་དང༌། ཡིད་གང་ནས་མཆི་གང་དུ་མཆི། བཅོམ་ལྡན་འདས་ཀྱིས་བཀའ་སྩལ་པ། སྲིང་མོ་སྐྱེ་བ་གང་ནས་ཀྱང་མི་འོང༌། རྒ་བ་གང་ནས་ཀྱང་མི་འོང་གང་དུ་འང་མི་འགྲོའོ། །སྲིང་མོ་ན་བ་གང་ནས་ཀྱང་མི་འོང༌། འཆི་བ་གང་ནས་ཀྱང་མི་འོང་གང་དུའང་མི་འགྲོའོ། །སྲིང་མོ་གཟུགས་གང་ནས་ཀྱང་མི་འོང༌། ཚོར་བ་དང་འདུ་ཤེས་དང་འདུ་བྱེད་རྣམས་དང༌། རྣམ་པར་ཤེས་པ་གང་ནས་ཀྱང་མི་འོང༌། གང་དུ་ཡང་མི་འགྲོའོ། །སྲིང་མོ་སའི་ཁམས་གང་ནས་ཀྱང་མི་འོང༌། ཆུའི་ཁམས་དང༌། མེའི་ཁམས་དང༌། རླུང་གི་ཁམས་དང་ནམ་མཁའི་ཁམས་དང༌། རྣམ་པར་ཤེས་པའི་ཁམས་གང་ནས་ཀྱང་མི་འོང་གང་དུའང་མི་འགྲོའོ། །སྲིང་མོ་མིག་གང་ནས་ཀྱང་མི་འོང༌། རྣ་བ་དང་སྣ་དང་ལྕེ་དང་ལུས་དང༌། ཡིད་གང་ནས་ཀྱང་མི་འོང་གང་དུའང་མི་འགྲོའོ། །སྲིང་མོ་འདི་ལྟ་སྟེ་དཔེར་ན། གཙུབ་ཤིང་དང་གཙུབ་སྟན་ལ་ཡང་བརྟེན། དེ་སྐྱེད་པ་མིའི་རྩོལ་བ་ལ་ཡང་བརྟེན་ན་མེ་འབྱུང་སྟེ། མེ་དེ་ཡང་རྩ་དང་ཤིང་དེ་བསྲེགས་ནས་རྒྱུ་མེད་པ་དང་ཤི་བར་འགྱུར་ཏོ། །སྲིང་མོ་འདི་ཇི་སྙམ་དུ་སེམས། མེ་དེ་གང་ནས་འོང་གང་དུ་སོང་གསོལ་པ། བཅོམ་ལྡན་འདས་ཞུགས་དེ་ནི་ཚོགས་པའི་དབང་གིས་བྱུང༌། ཚོགས་པ་དང་བྲལ་བས་འགགས་ཏེ་འགུམ་མོ། །བཀའ་སྩལ་པ། སྲིང་མོ་དེ་བཞིན་དུ་ཆོས་ཐམས་ཅད་ཀྱང་ཚོགས་པའི་དབང་གིས་འབྱུང་ཚོགས་པ་དང་བྲལ་བས་འགགས་ཏེ། འདི་ལ་ཆོས་གང་ཡང་གང་ནས་ཀྱང་འོང་བའམ་གང་དུ་ཡང་འགྲོ་བ་མེད་དོ། །སྲིང་མོ་འདི་ལྟ་སྟེ། མིག་དང་གཟུགས་ལ་བརྟེན་ནས་མིག་གི་རྣམ་པར་ཤེས་པ་འབྱུང་ཡང༌། མིག་གི་རྣམ་པར་ཤེས་པ་དེ་ལ་སྐྱེད་པར་བྱེད་པ་ཡང་མེད། འགག་པར་བྱེད་པ་ཡང་མེད། གང་ཡང་གསོག་པ་མེད། ཕུང་པོ་གང་ལས་ཀྱང་འོང་བའམ་འགྲོ་བ་ཡང་མེད། མིག་གི་རྣམ་པར་ཤེས་པའི་རྐྱེན་གྱིས་ལས་མངོན་པར་འདུས་བྱས་ནས་ཁམས་གསུམ་དུ་འབྲས་བུ་གསུམ་གྱིས་འབྲས་བུ་ཉེ་བར་སྟོན་ཏེ། འབྲས་བུ་དེ་ཡང་སྟོང་པ་དང་འོང་བ་མེད་པ། འགྲོ་བ་མེད་པ། སུས་ཀྱང་མ་སྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །དེ་བཞིན་དུ་རྣ་བ་དང༌། སྒྲ་དང༌། སྣ་དང་དྲི་དང༌། ལྕེ་དང་རོ་དང༌། ལུས་དང་རེག་བྱ་དང༌། ཡིད་དང་ཆོས་རྣམས་ལ་བརྟེན་ནས་ཡིད་ཀྱི་རྣམ་པར་ཤེས་པ་འབྱུང་ཡང༌། ཡིད་ཀྱི་རྣམ་པར་ཤེས་པ་དེ་ལ་སྐྱེད་པར་བྱེད་པ་ཡང་མེད། འགག་པར་བྱེད་པ་ཡང་མེད། གང་ཡང་སོགས་པ་མེད། ཕུང་པོ་གང་ལས་ཀྱང་འོང་བའམ་འགྲོ་བ་ཡང་མེད་ལ། ཡིད་ཀྱི་རྣམ་པར་ཤེས་པའི་རྐྱེན་གྱིས་ལས་མངོན་པར་འདུས་བྱས་ནས་ཁམས་གསུམ་དུ་འབྲས་བུ་རྣམ་པ་གསུམ་གྱིས་འབྲས་བུ་ཉེ་བར་སྟོན་ཏེ། འབྲས་བུ་དེ་ཡང་སྟོང་པ། འོང་བ་མེད་པ། འགྲོ་བ་མེད་པ། སུས་ཀྱང་མ་སྐྱེས་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །སྲིང་མོ་འདི་ལྟ་སྟེ་དཔེར་ན། ཤིང་དང་ལྤགས་པ་དང་དབྱུགས་གུ་ལ་ཡང་བརྟེན། དེ་སྐྱེད་པའི་མིའི་རྩོལ་བ་ལ་བརྟེན་ནས་རྔའི་སྒྲ་འབྱུང་སྟེ། རྔའི་སྒྲ་དེ་འདས་པ་ཡང་སྟོང༌། མ་འོངས་པ་ཡང་སྟོང༌། ད་ལྟར་བྱུང་བ་ཡང་སྟོང་སྟེ། སྒྲ་ནི་ཤིང་ལ་ཡང་མི་གནས། ལྤགས་པ་ལ་ཡང་མི་གནས། དབྱུགས་གུ་ལ་ཡང་མི་གནས། མིའི་ལག་པ་ལ་ཡང་མི་གནས་མོད་ཀྱི། འོན་ཀྱང་དེའི་རྐྱེན་གྱིས་སྒྲ་འདོགས་ཏེ། གང་སྒྲ་དེ་འདོགས་པ་ཡང་སྟོང་པ། འོང་བ་མེད་པ། འགྲོ་བ་མེད་པ། སུས་ཀྱང་མ་སྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །སྲིང་མོ་དེ་བཞིན་དུ་ཆོས་ཐམས་ཅད་ནི་རྐྱེན་གྱི་ཁ་ན་ལས་པ་སྟེ། འདི་ལྟར་མ་རིག་པ་དང༌། སྲེད་པ་དང་ལས་དང་རྣམ་པར་ཤེས་པའོ། །ཆོས་དེ་དག་ཡོད་ན་འཆི་འཕོ་དང་སྐྱེ་བ་འདོགས་ཏེ། གང་འཆི་འཕོ་དང་སྐྱེ་བ་འདོགས་པ་དེ་ཡང་སྟོང་པ། འོང་བ་མེད་པ་འགྲོ་བ་མེད་པ། སུས་ཀྱང་མ་སྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །སྲིང་མོ་དེ་ལྟར་སུས་རྔ་སྒྲའི་ཚུལ་རབ་ཏུ་ཤེས་པ་དེས་སྟོང་པ་ཉིད་རབ་ཏུ་ཤེས་སོ། །སུས་སྟོང་པ་ཉིད་རབ་ཏུ་ཤེས་པ་དེས་མྱ་ངན་ལས་འདས་པ་རབ་ཏུ་ཤེས་སོ། །སུས་མྱ་ངན་ལས་འདས་པ་རབ་ཏུ་ཤེས་པ་དེ་ཐ་སྙད་རྣམ་པ་སྣ་ཚོགས་ཀྱིས་ཐ་སྙད་འདོགས་ཀྱང་དངོས་པོ་གང་ལ་ཡང་མངོན་པར་ཞེན་པ་མེད་དེ། བདག་གི་འདི་དང་དེ་ནི་བདག་གོ་ཞེ་འམ། སེམས་ཅན་ནོ་ཞེ་འམ། སྲོག་གོ་ཞེ་འམ། གསོ་བའོ་ཞེ་འམ་སྐྱེས་བུའོ་ཞེ་འམ། གང་ཟག་གོ་ཞེ་འམ། ཤིང་ལས་སྐྱེས་སོ་ཞེ་འམ། ཤེད་བུའོ་ཞེ་འམ། བྱེད་པ་པོ་ཞེའམ། བྱེད་དུ་འཇུག་པ་པོ་ཞེ་འམ། ལེན་པ་པོ་ཞེ་འམ། འདོར་བ་པོ་ཞེས་དེ་མངོན་པར་ཞེན་པ་མེད་པར་ཆོས་སྟོན། ཆོས་རབ་ཏུ་སྟོན། ཡང་དག་པའི་མཐའ་སྟོན། ཡང་དག་པའི་མཐའ་རབ་ཏུ་སྟོན་ཏོ། །སྲིང་མོ་འདི་ལྟ་སྟེ་དཔེར་ན། རི་མོ་མཁན་ནམ་རི་མོ་མཁན་གྱི་སློབ་མ་ཞིག་གིས་རས་བཅོས་མ་ཤིན་ཏུ་བྱི་དོར་བྱས་པའམ། ཤིང་ལེབ་བམ་རྩིག་ངོས་ཤིན་ཏུ་བྱི་དོར་བྱས་པ་ཞིག་ལ། ཚོན་སྣ་ཚོགས་འགྱེད་ཅིང༌། གཟུགས་ཀྱི་རྣམ་པ་གང་དང་གང་འདོད་པ་འདི་ལྟ་སྟེ། སྐྱེས་པའི་གཟུགས་ཀྱི་རྣམ་པའམ། བུད་མེད་ཀྱི་གཟུགས་ཀྱི་རྣམ་པའམ། གླང་པོ་ཆེའི་གཟུགས་ཀྱི་རྣམ་པའམ། རྟའི་གཟུགས་ཀྱི་རྣམ་པའམ། བོང་བུའི་གཟུགས་ཀྱི་རྣམ་པ་དེ་དང་དེ་དག་ཡན་ལག་དང༌། ཉིང་ལག་དང་དབང་པོ་ཐམས་ཅད་མི་ཚང་བ་མེད་པར་ཚེགས་ཆུང་ངུས་མངོན་པར་སྒྲུབ་ཅིང་འབྲི་སྟེ། མངོན་པར་སྒྲུབ་པར་བྱེད་ཀྱང༌། དེ་ལ་ཆོས་གང་ཡང་རི་མོ་མཁན་གྱི་ལག་པའམ། སེམས་ལས་གཟུགས་སུ་འཕོས་པ་མེད་མོད་ཀྱི། འོན་ཀྱང་དེའི་རྐྱེན་གྱིས་གཟུགས་འདོགས་ཏེ། གང་གཟུགས་དེ་འདོགས་པ་དེ་ཡང་སྟོང་པ། འགྲོ་བ་མེད་པ། སུས་ཀྱང་མ་སྐྱེད་པ། སུས་ཀྱང་མ་བཀག་པ་སྟེ། སྲིང་མོ་ཆོས་ཐམས་ཅད་ནི་རང་བཞིན་གྱིས་འགགས་པའོ། །སྲིང་མོ་དེ་བཞིན་དུ་བསོད་ནམས་ཉེ་བར་འགྲོ་བའི་མངོན་པར་འདུ་བྱེད་པ་རྣམས་ཡོད་ན། འདི་ལྟ་སྟེ། ལྷའམ་མིའི་ནང་དུ་བསོད་ནམས་སུ་ཉེ་བར་འགྲོ་བའི་ལུས་མངོན་པར་གྲུབ་ཀྱང༌། དེ་ལ་གང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བའི་འཕོ་བ་ནི་རྡུལ་ཙམ་ཡང་མེད་མོད་ཀྱི། འོན་ཀྱང་མངོན་པར་འདུ་བྱེད་པའི་རྐྱེན་གྱིས་སྐྱེ་བ་སྣ་ཚོགས་ཡོད་དེ། སྐྱེ་མཆེད་ཡོད་པས་ལུས་སུ་རྣམ་པར་རིག་གོ །དེ་བཞིན་དུ་བསོད་ནམས་མ་ཡིན་པར་ཉེ་བར་འགྲོ་བའི་འདུ་བྱེད་རྣམས་ཡོད་ན། འདི་ལྟ་སྟེ་སེམས་ཅན་དམྱལ་བའམ། དུད་འགྲོའི་སྐྱེ་གནས་སམ། གཤིན་རྗེའི་འཇིག་རྟེན་ནམ། ལྷ་མ་ཡིན་རྣམས་སུ་བསོད་ནམས་མ་ཡིན་པའི་ལུས་མངོན་པར་གྲུབ་ཀྱང༌། དེ་བ་གང་འཇིག་རྟེན་འདི་ནས་འཇིག་རྟེན་ཕ་རོལ་ཏུ་འཕོ་བའི་འཕོ་བ་ནི་རྡུལ་ཙམ་ཡག་མེད་མོད་ཀྱི། འོན་ཀྱང་མངོན་པར་འདུ་བྱེད་པའི་རྐྱེན་གྱིས་སྐྱེ་བ་སྣ་ཚོགས་ཡོད་དེ། སྐྱེ་མཆེད་ཡོད་པས་ལུས་སུ་རྣམ་པར་རིག་གོ །སྲིང་མོ་འདི་ལྟ་སྟེ། དཔེར་ན། ཀླུ་རྣམས་ཀྱི་ཀླུའི་མཐུས་སྤྲིན་གྱི་ཚོགས་རྒྱ་ཆེན་པོ་འབྱུང་སྟེ། སྤྲིན་གྱི་དྲ་བ་དེ་དག་གིས་ཁེབས་པར་བྱས་ནས། ཆར་ཆེན་པོ་རྒྱ་ཆེར་བབས་ཏེ། ཆར་ཆེན་པོ་རྒྱ་ཆེར་བབས་ཀྱང་སྒང་དང་གཤོང་ངོམས་པར་བྱེད་དེ། སྒང་དང་གཤོང་ངོམས་པར་བྱས་ནས་སླར་འགྲོ་ཡང༌། དེ་དག་ཀླུའི་ལུས་སམ་སེམས་ལས་བྱུང་བ་ཡང་མེད་མོད་ཀྱི། ཀླུ་རྣམས་ཀྱི་ཀླུའི་མཐུ་ཉིད་ཀྱིས་སྤྲིན་གྱི་ཚོགས་རྒྱ་ཆེན་པོ་འབྱུང་ངོ༌། །སྲིང་མོ་དེ་བཞིན་དུ་བསོད་ནམས་སུ་ཉེ་བར་འགྲོ་བའི་མངོན་པར་འདུ་བྱེད་པ་ཡོད་ན། འདི་ལྟ་སྟེ། ལྷའམ་མིའི་ནང་དུ་བསོད་ནམས་སུ་ཉེ་བར་འགྲོ་བའི་ལུས་རྣམས་མངོན་པར་འགྲུབ་བོ། །དེ་བཞིན་དུ་བསོད་ནམས་མ་ཡིན་པར་ཉེ་བར་འགྲོ་བའི་འདུ་བྱེད་རྣམས་ཡོད་ན། འདི་ལྟ་སྟེ་སེམས་ཅན་དམྱལ་བའམ། དུད་འགྲོ་སྐྱེ་གནས་སམ། གཤིན་རྗེའི་འཇིག་རྟེན་ནམ། ལྷ་མ་ཡིན་རྣམས་སུ་བསོད་ནམས་མ་ཡིན་པར་ཉེ་བར་འགྲོ་བའི་ལུས་མངོན་པར་གྲུབ་ཀྱང༌། དེ་ལ་མངོན་པར་དུ་བྱ་བ་ཡང་སྟོང་པ། མངོན་པར་འདུ་བྱེད་པ་པོ་ཡང་སྟོང་པ། མངོན་པར་དུ་བྱེད་པའི་འབྲས་བུ་ཡང་སྟོང་པའོ། །སྲིང་མོ་མི་གཡོ་བར་ཉེ་བར་འགྲོ་བའི་མངོན་པར་འདུ་བྱེད་པ་ཡོད་ན། གཟུགས་མེད་པ་རྣམས་སུ་རྣམ་པར་ཤེས་པ་མཚམས་སྦྱོར་ཏེ། གང་གིས་རྣམ་པར་ཤེས་པ་དེ་གཟུགས་མེད་པ་རྣམས་སུ་མཚམས་སྦྱོར་བདེ་ཡང་སྟོང་པ། གང་རྣམ་པར་ཤེས་པ་དེ་གཟུགས་མེད་པ་རྣམས་སུ་མཚམས་སྦྱོར་བ་དེ་ཡང་སྟོང་པའོ། །དེ་ཅིའི་ཕྱིར་ཞེ་ན། སྲིང་མོ་ཆོས་ཐམས་ཅད་ནི་ངོ་བོ་ཉིད་ཀྱིས་སྟོང་པའི་ཕྱིར་ཏེ། འོན་ཀྱང་ཆོས་རྣམས་འདོགས་སོ། །མཁས་པ་རྣམས་ནི་དེ་ལ་མངོན་པར་མི་ཞེན་ཏེ། མངོན་པར་ཞེན་པ་མེད་པས་མི་རྩོད་དོ། །རྩོད་པ་མེད་པ་ནི་དགེ་སྦྱོང་གི་ཆོས་ཀྱི་མཆོག་གོ །གསོལ་པ། འདི་ལྟར་བཅོམ་ལྡན་འདས་ཀྱིས་ཆོས་ཟབ་མོབཀའ་སྩལ་པས། བཅོམ་ལྡན་འདས་ཡང་བདག་ཆོས་འདི་དག་ལ་ཤེས་རབ་ཀྱི་མིག་འཇུག་སྟེ། སླར་ཡང་ཡིད་གཉིས་མ་མཆིས་ཐེ་ཚོམ་མ་མཆིས་སོ། །བཅོམ་ལྡན་འདས་བདག་སྔོན་ནི་ཆོས་འདི་དག་མ་ཐོས་པས་ཐེ་ཚོམ་མཆིས་སོ། །ད་ནི་བདག་རྒས་བདག་འཁོགས། བདག་སྡུག་བསྔལ། བདག་དབུལ་བདག་མགོན་མ་མཆིས་ཏེ། བདག་མི་འཚོ་ཞིང་འགུམ་མི་མངའོ། །བཅོམ་ལྡན་འདས་བདག་གིས་ཆོས་འདི་ཐོས་པས་འདི་ན་རྒས་པའམ་དབུལ་བའམ། བདེ་བའམ་ནད་མ་མཆིས་པའི་ན་བའམ། ཕྱུག་པའམ་དབུལ་བ་གང་ཡང་མ་མཆིས་སོ་ཞེས་བདག་ཏུ་འདུ་ཤེས་པ་དང་བྲལ་བར་གྱུར་ཏོ། །དེ་ནས་བཅོམ་ལྡན་འདས་ལ་ཚེདང་ལྡན་པ་ཀུན་དགའ་བོས་འདི་སྐད་ཅེས་གསོལ་ཏོ། །བཅོམ་ལྡན་འདས་གང་གི་སླད་དུ་བཅོམ་ལྡན་འདས་ཀྱིས་ཆོས་ཀྱི་རྣམ་གྲངས་ཟབ་མོ་འདི་ལྟ་བུ་བཀའ་སྩལ་ལ། དེས་ཀྱང་འདི་རབ་ཏུ་བཙལ་བས་བུད་མེད་འདི་ནི་བསོད་ནམས་དང་ལྡན་པ། མཁས་པ་ཤེས་རབ་ཀྱི་རང་བཞིན་ཅན་ལགས་པ་སྙམ་བདག་བགྱིད་དོ། །བཅོམ་ལྡན་འདས་ཀྱིས་བཀའ་སྩལ་པ། ཀུན་དགའ་བོ་དེ་དེ་བཞིན་ནོ། །ཀུན་དགའ་བོ་ཇི་སྐད་སྨྲས་པ་དེ་དེ་བཞིན་ཏེ། བུད་མེད་འདི་ནི་བསོད་ནམས་དང་ལྡན་པ་མཁས་པ་ཤེས་རབ་ཀྱི་རང་བཞིན་ཅན་ནོ། །ཀུན་དགའ་བོ་བུད་མེད་འདི་ཚེ་རབས་ལྔ་བརྒྱའི་བར་དུ་ངའི་མར་གྱུར་ཏེ། ཀུན་དགའ་བོ་ངས་ཚེ་རབས་དེ་དང་དེ་དག་ཏུ་ཡང་བུད་མེད་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་དགེ་བའི་རྩ་བ་བསྐྱེད་དོ། །ཀུན་དགའ་བོ་ང་བུད་མེད་འདི་ལ་ཤིན་ཏུ་ཕངས་པར་བྱ་བ་དང༌། དད་པ་དང་གུས་པར་གྱུར་ཏོ། །འདི་ཡང་བདག་གི་བུ་སྤྱོད་པའི་སྤྱོད་པ་དེ་ལ་བདག་གིས་ཀྱང་སྤྱད་དེ། ཐེག་པ་དེ་བས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་འཚང་རྒྱ་བར་བྱའོ་སྙམ་མོ། །གསོལ་པ། བཅོམ་ལྡན་འདས་འདི་ཅིའི་སླད་དུ་འདི་ལྟར་དབུལ་བར་གྱུར། བཅོམ་ལྡན་འདས་ཀྱིས་བཀལ་སྩལ་པ། ཀུན་དགའ་བོ་བྱང་ཆུབ་སེམས་དཔའི་སྤྱོད་པ་སྤྱད་པ་ན། གང་གི་ཚེ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་འཁོར་བ་འཇིག་གི་བསྟན་པ་ལ་རབ་ཏུ་བྱུང་བར་གྱུར་པ་དེའི་ཚེ། ཀུན་དགའ་བོ་བུད་མེད་འདི་ངའི་མར་གྱུར་ཏེ། དེས་མ་བཏང་ནས་དེའི་ཕྱིར་ང་ཟ་གཅིག་ཟན་བཅད་པ་དང༌། དེའི་འོག་ཏུ་འདིས་འདོད་པས་ང་བཏང་བར་གྱུར་ཏེ། ཀུན་དགའ་བོ་འདི་ལས་དེའི་རྣམ་པར་སྨིན་པས་འདི་ལྟར་དབུལ་བར་གྱུར་ཏོ། །ཀུན་དགའ་བོ་འདི་ནི་འདིའི་དབུལ་བའི་མཐའ་མ་ཡིན་ཏེ། ཀུན་དགའ་བོ་བུད་མེད་འདི་ཤི་འཕོས་ནས་བཅོམ་ལྡན་འདས་ཡང་དག་པར་རྫོགས་པའི་སངས་རྒྱས་འོད་དཔག་མེད་ཀྱི་སངས་རྒྱས་ཀྱི་ཞིང་འཇིག་རྟེན་ཁམས་བདེ་བ་ཅན་དུ་བུད་མེད་ཀྱི་དབང་པོ་ལ་འདོད་ཆགས་དང་བྲལ་ནས། སྐྱེས་པའི་དབང་པོ་ཐོབ་པར་གྱུར་ཏེ། དེར་སྐྱེས་ནས་སངས་རྒྱས་བཅོམ་ལྡན་འདས་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་ལ་མཆོད་པ་བྱེད་པར་འགྱུར། སེམས་ཅན་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་དག་བྱང་ཆུབ་ལ་འཛུད་པར་འགྱུར། སེམས་ཅན་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་དག་བྱང་ཆུབ་ལ་ཡོངས་སུ་སྨིན་པར་བྱེད་པར་འགྱུར། སེམས་ཅན་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་དག་བྱང་ཆུབ་ལ་འགོད་པར་འགྱུར། སེམས་ཅན་གྲངས་མེད་དཔག་ཏུ་མེད་ཅིང་བསམ་གྱིས་མི་ཁྱབ་པ་དག་བྱང་ཆུབ་ལ་བཀོད་ནས། ད་སྟེ་བསྐལ་པ་བརྒྱ་སྟོང་ཕྲག་དྲུག་ཅུ་རྩ་བརྒྱད་ན། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཉིད་དུ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་བྱང་ཆུབ་ཀྱི་ཡན་ལག་གི་མེ་ཏོག་བྱེད་ཅེས་བྱ་བར་གྱུར་ཏེ། ཀུན་དགའ་བོ་སུམ་ཅུ་རྩ་གསུམ་པའི་ལྷ་རྣམས་ཀྱི་ལོངས་སྤྱོད་དང༌། ཡོངས་སུ་སྤྱོད་པ་ཇི་ལྟ་བ་བཞིན་དུ་སངས་རྒྱས་ཀྱི་ཞིང་དེའི་སེམས་ཅན་རྣམས་ཀྱི་ལོངས་སྤྱོད་དང༌། ཀུན་སྤྱོད་པ་དེ་ཡང་དེ་འདྲ་བར་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ཏེ། བདེ་བར་གཤེགས་པས་དེ་སྐད་གསུངས་ནས། སྟོན་པས་གཞན་ཡང་འདི་སྐད་བཀའ་སྩལ་ཏོ། །ང་ཡི་མདུན་ན་ཐལ་སྦྱར་གང་འདུག་པ། །རྒན་མོ་འདི་ལ་ཀུན་དགའ་ཁྱོད་ལྟོས་ཤིག །འདི་ནི་མི་ཡི་དམ་པ་སངས་རྒྱས་འགྱུར། །བྱང་ཆུབ་ཡན་ལག་མེ་ཏོག་བྱེད་ཅེས་བྱ། །འདིས་ནི་བུད་མེད་དངོས་པོ་འདི་སྤངས་ནས། །བདེ་བ་ཅན་གྱི་འཇིག་རྟེན་ཁམས་སུ་འགྲོ། །རྒྱལ་བ་ཚེ་དཔག་མེད་དེབསྙེན་བཀུར་ནས། །ཁམས་གསུམ་རྒྱལ་བ་མཚུངས་མེད་སངས་རྒྱས་འགྱུར། །འཇིག་རྟེན་ཁམས་གཞན་དག་ན་གང་བཞུགས་པ། །དྲང་སྲོང་ཆེན་པོ་འཇིག་རྟེན་དོན་མཛད་པ། །རྣམ་འདྲེན་དེ་དག་ལ་ཡང་བསྙེན་བཀུར་ནས། །འདི་ནི་མཚུངས་མེད་མི་མཆོག་སངས་རྒྱས་འགྱུར། །དེ་དག་ཀུན་ལས་ཆོས་ཀྱང་ཐོས་གྱུར་ནས། །བསམ་པ་དག་པས་དེ་བཞིན་སྒྲུབ་པར་འགྱུར། བྱང་ཆུབ་སེམས་མཆོག་མི་བསྐྱོད་གནས་ནས་ནི། །སེམས་ཅན་དཔག་མེད་ཆོས་ལ་སྦྱོར་བར་བྱེད། །དེ་ཡི་ཚེ་ན་གང་དག་དམན་པ་དང༌། །སྣ་ཚོགས་ལུས་དང་ཁ་དོག་ངན་པ་དང༌། །རྨོངས་དང་འཐེང་པོ་དེ་བཞིན་ཞར་བ་དང༌། །ལག་རྡུམ་མཛེ་ཅན་དེ་དག་འབྱུང་མི་འགྱུར། །ཉི་ཟླ་མེ་དང་གློག་དང་ནོར་བུ་རྣམས། །དེ་དག་འོད་ནི་དེ་ཚེ་འབྱུང་མི་འགྱུར། །རྣམ་འདྲེན་བྱང་ཆུབ་ཡན་ལག་མེ་ཏོག་གི །ཐུབ་པའི་འོད་ཀྱིས་ཀུན་ཏུ་གསལ་བར་ཁྱབ། །སུམ་ཅུ་རྩ་གསུམ་ལྷ་མཆོག་རྣམས་ཀྱི་ནི། །ཆུ་ཞེང་རྟགས་དང་ཁ་དོག་ཅི་འདྲ་བ། །དེ་འདྲའི་རང་བཞིན་ཅན་གྱི་སྐྱེ་བོ་ཡིས། །དེ་ཚེ་མ་སྨད་ཞིང་ནི་གང་བར་འགྱུར། །དེ་ན་བདུད་མེད་བདུད་ཀྱི་རིས་ཀྱང་མེད། །བདུད་ཀྱི་བུད་མེད་བདུད་ཀྱི་ཕྱག་བརྙན་མེད། བདེ་བར་གཤེགས་པ་དེ་ནི་ཆོས་སྟོན་ཚེ། །དེ་ན་མུ་སྟེགས་ཅན་གྱི་མིང་མི་གྲག །བདེ་བར་གཤེགས་པ་དེ་ནི་ཆོས་སྟོན་ཚེ། །དེ་དུས་ཡི་དྭགས་དུད་འགྲོའི་སྐྱེ་གནས་དང༌། །སེམས་དམྱལ་ངན་སོང་རྣམས་ཀྱི་མིང་མི་གྲག །དེ་ན་བུད་མེད་མིང་ཡང་གྲགས་མི་འགྱུར། །འདི་ནི་ཉན་ཐོས་རྐྱེན་གྱིས་ཐེག་པ་ལྟར། །དེ་ཚེ་ཐེག་པ་རྣམ་པར་བཞག་པ་མེད། །ཀུན་ཀྱང་རྫོགས་པའི་བྱང་ཆུབ་སེམས་དང་ལྡན། །དེ་དག་བྱམས་ལ་གནས་ཤིང་སྙིང་རྗེ་ཅན། །ཞིང་དེར་མི་རྣམས་ཐམས་ཅད་རྟག་པར་ཡང༌། །རྫུ་ཞིང་སྐྱེ་སྟེ་མངལ་ནས་རྣམ་པར་ཐར། །སྐྱེ་དྲན་བློ་མཆོག་ལྡན་ཞིང་མཁས་པ་སྟེ། །ལེགས་པར་གསུངས་པ་ཐོས་ནས་ཐོས་པ་འཛིན། །ཞིང་གི་བཀོད་ཚུལ་ཅི་འདྲ་འབྱུང་འགྱུར་བ། །ཡོན་ཏན་བསྐལ་པར་འདིར་ནི་བརྗོད་བྱས་ཀྱང༌། །རྒྱ་མཚོ་ལས་ནི་ཆུ་ཐིགས་གཅིག་ལྟ་བུ། །དཔེ་ཙམ་དུ་ཡང་བརྗོད་པར་མི་འགྱུར་རོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་བསྩལ་ནས། ཚེ་དང་ལྡན་པ་ཀུན་དགའ་བོ་དང༌། རྒན་མོ་དང༌། བྱང་ཆུབ་སེམས་དཔའ་དེ་དག་དང༌། དགེ་སློང་དེ་དག་དང༌། ལྷ་དང་མི་དང་ལྷ་མ་ཡིན་དང་དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །འཕགས་པ་བགྲེས་མོས་ཞུས་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།། །།རྒྱ་གར་གྱི་མཁན་པོ་ཛི་ན་མི་ཏྲ་དང༌། དཱ་ན་ཤཱི་ལ་དང༌། ཞུ་ཆེན་གྱི་ལོ་ཙཱ་བ་བནྡེ་ཡེ་ཤེས་སྡེས་བསྒྱུར་ཅིང་ཞུས་གཏན་ལ་ཕབ་པའོ།། །། །མངྒ་ལཾ།། །།