དཔལ་ལྡན་ལྷ་མོའི་མངོན་རྟོགས།
དཔལ་ལྡན་ལྷ་མོའི་མངོན་རྟོགས་ནི། བྷྱོ །མདུན་དུ་དུར་ཁྲོད་ཆེན་པོའི་ནང་། །མེ་འབར་ཁྲག་ཞག་རྒྱ་མཚོའི་དབུས། །ཐོད་པ་སྐམ་རློན་གཞལ་ཡས་སུ། །ཨོ་ལས་དུད་སོལ་ལྷ་མོ་ནག །ཞལ་གཅིག་ཕྱག་བཞི་རལ་གྲི་དང་། །ཐོད་ཁྲག་ཤཀྟི་རྩེ་གསུམ་འཛིན། །དུད་ཁྲོད་ཆས་ལྡན་མི་རོ་གསོལ། །བ་གླང་ལ་སོགས་རེ་ལྡེ་གསོལ། །སྦྲུལ་རྒྱན་ཞབས་གཉིས་ལྕགས་སྒྲོག་གསོལ། །བོང་བུ་གྲྭ་དམར་ཆིབས་པའོ། །སྙིང་འཕྲོག་མ་གསུམ་རིགས་བཞི་དང་། །མ་མོ་བརྒྱད་དང་ཕྲ་མེན་བརྒྱད། །སྒོ་ཟམ་བཞི་སོགས་འཁོར་བཅས་གསལ། །གནས་གསུམ་ཡི་གེ་ཧཱུྃ་ཡིག་ལས། །འོད་འཕྲོས་འཁོར་བཅས་སྤྱན་དྲངས་གྱུར། ། བྷྱོཿ རི་རབ་ཆེན་པོའི་བྱང་ཤར་མཚམས། །གཡུ་མཚོ་མུ་ལེའུ་མཐིང་གི་དབུས། །རིན་ཆེན་ལྔ་ལྡན་གཞལ་ཡས་ཁང་། །དེ་དབུས་སྲིད་གསུམ་ཐོད་མཁར་ནང་། །གྲུ་གསུམ་འབར་བའི་གཞལ་ཡས་ནས། །དཔལ་ལྡན་ལྷ་མོ་དུད་སོལ་མ། །སྐུ་མདོག་ནག་པོ་འཇིགས་པའི་གཟུགས། །ཞལ་གཅིག་ཕྱག་བཞི་བོང་བུ་ཆིབས། །འཁོར་ཡང་ནག་མོ་འབུམ་སྡེའི་ཚོགས། །གནས་འདིར་ཉིད་དུ་
གཤེགས་སུ་གསོལ། །ༀ་ཧཱུྃ་ཤྲི་ཡ་དེ་ཝི་ཀཱ་ལ་ཨེ་ཨ་ར་ལི་ཧྲི་ཧྲི་ཛཿ པདྨ་ཀ་མ་ལཱ་ཡེ་སྟེ། དཔལ་ལྡན་ལྷ་མོ་ཁྱོད་ཀྱིས་བདག་ལ་སྐུ་མྱུར་དུ་སྟོན་ཅིག །གལ་ཏེ་མི་སྟོན་ན་བདག་གི་ཡིད་ལ་ཅི་འདོད་པ་དེ་མྱུར་དུ་འགྲུབ་པར་གྱུར་ཅིག །ཨོཾ་ས་མ་ཡ་ཧ་ན་ཧ་ན་མ་ཏི་ཀྲ་མ་ནི་ཧཱུྃ་ཧཱུྃ་ཕཊ། དེ་བི་ཀཱ་ལི་ས་པཱ་རི་ཝཱ་ར་ཨརྒྷཾ་་སོགས། ཨོཾ་ཨཱཿཧཱུྃ་ཧ་ཧོ་ཧི༔ ཨོཾ་ཧཱུྃ་ཤྲཱི་ཡ་དེ་ཝི་ཀཱ་ལི་ཀཱ་ལི་མ་ཧཱ་ཀཱ་ལི་ཧཱུྃ་བྷྱོ། ཨི་དཾ་བྷ་ལིཾ་ཏ་ཁཱ་ཧི། པཉྩ་ཨ་མྲྀ་ཏ་ཨོཾ་ཨཱཧཱུཾ། དཔལ་ལྡན་ལྷ་མོ་དུད་པའི་སོལ་བ་མ། །སྙིང་འཕྲོག་མ་གསུམ། རིགས་བཞིའི་ལྷ་མོ། དུར་ཁྲོད་ཀྱི་མ་མོ་བརྒྱད། །ཕྲ་མེན་མ་བརྒྱད། །སྒོ་མ་བཞི་འཁོར་མ་མོ་བྱེ་བ་འབུམ་སྡེའི་ཞལ་དུ་ཨི་དཾ་བྷ་ལིཾ་ཏ་ཁཱ་ཧི། འདོད་གསོལ་ནི། སྤྱིར་སངས་རྒྱས་ཀྱི་བསྟན་པ་དར་ཞིང་རྒྱས་པ་དང་། ཁྱད་པར་དུ་བདག་ཅག་དཔོན་སློབ་བསྲུང་བྱ་མི་ནོར་འཁོར་དང་བཅས་པ་ལ། མི་ནད་ཕྱུགས་ནད་ཡམས་ནད་རིམས་ནད་ནད་རིགས་བཞི་བརྒྱ་རྩ་བཞིའི་གནོད་པ་ཞི་བ་དང་། ཚེ་དང་བསོད་ནམས་རྒྱས་པ་དང་། ཆག་ཆེན་ཉམ་ང་བཀྲ་མི་ཤིས་པ་ཐམས་ཅད་བཟློག་པའི་ཕྲིན་ལས་མཛོད་ཅིག །དེ་ནས་བསྟོད་པ་ནི། བྷྱོཿ རྒྱ་
མཚོའི་ཀློང་ན་མེ་འབར་ཁྱོད། །མཚོ་རྣམས་སྐེམ་པར་ནུས་པ་སྟེ། །བུད་མེད་ཐམས་ཅད་ཞི་མཛད་སྟེ། །ལྷ་ཆེན་སྐུ་ཡི་ཕྱེད་དུ་བཞུགས། །རྫོང་དང་སྐག་བཟློག་ནག་མོ་ཆེ། །ལྷ་དང་ལྷ་མིན་ཕྱག་བྱས་མ། །མི་ནད་གང་ཡིན་ཁྱོད་མིང་ཤེས། །དེ་ལ་འཇིགས་པ་མེད་པར་མཛོད། །གཤིན་རྗེའི་ལྕམ་མོ་བདུད་ཀྱི་ཡུམ། །འདོད་པའི་ཁམས་ཀྱི་དབང་ཕྱུག་མ། །ནད་དོ་ཅོག་གི་བདག་མོ་སྟེ། །སངས་རྒྱས་བསྟན་པ་སྲུང་བ་ཡི། །དཔལ་ལྡན་ལྷ་མོ་ཁྱོད་ལ་བསྟོད། །ཅེས་པ་འདི་ཡང་རཱ་ག་ཨ་སྱས་སྦྱར་བའོ། །སརྦ་མངྒ་ལཾ།། །། ༧ ཁམས་སྟོད་ནང་ཆེན་འབང་སྒང་བཟོ་རིག་གནས་མདོ་གསང་སྔགས་ཆོས་འཕེལ་གླིང་དཔེ་རྙིང་ཉམས་གསོ་ཁང་གིས་བསྒྲིགས་ཏེ་པར་བསྐྲུན་ཞུས།།