གཞུང་གི་མཚན་དང་མཆོད་བརྗོད།
མཁས་ཤིང་དངོས་གྲུབ་བརྙེས་པའི་རྡོ་རྗེ་སློབ་དཔོན་འཇམ་དབྱངས་དགྱེས་པའི་བློ་གྲོས་མཚོ་སྐྱེས་བཞད་པའི་སྒྲ་དབྱངས་ཀྱི་རྟོགས་བརྗོད་མདོར་བསྡུས་པ་སྐལ་བཟང་མགུལ་རྒྱན་ཞེས་བྱ་བ་བཞུགས་སོ། །
དགེ་ལེགས་ཡོན་ཏན་བྱེ་བའི་རོལ་མཚོ་སྤངས་རྟོགས་མཐར་ཕྱིན་རྫོགས་སངས་རྒྱས།། སྒྲིབ་གཉིས་མུན་འཇོམས་སྲིད་ཞིའི་འཇིགས་འཕྲོག་བདེན་གཉིས་ངོ་བོ་དམ་པའི་ཆོས། །རིག་གྲོལ་ཡོན་ཏན་དཔལ་གྱི་མེ་ཏོག་རབ་མཛེས་དགེ་འདུན་དཔག་བསམ་དབང་། །རིན་ཆེན་གསུམ་ཞེས་གྲགས་པའི་གདུགས་དཀར་ཀུན་གྱི་ཉེར་འཚོའི་གཞི་དེར་འདུད། །ཐུབ་བསྟན་རིན་ཆེན་གསལ་བའི་སྒྲོན་མེ་མཁས་པའི་ཁྱུ་མཆོག་ཞི་བ་འཚོ། །རྒྱལ་ཀུན་འདུས་ཞལ་གྲུབ་བརྒྱའི་གཙུག་རྒྱན་ཚེ་དབང་རིག་འཛིན་པདྨ་འབྱུང་། །ཐུགས་བསྐྱེད་སྨོན་པས་རྒྱལ་བསྟན་འདྲེན་མཛད་མེས་དབོན་གསུམ་དང་ལོ་པཎ་ཚོགས། །གངས་ཅན་འགྲོ་ལ་བཀའ་དྲིན་ཟླ་མེད་གྱུར་པའི་གནས་དེར་གུས་ཕྱག་འཚལ། །ཤེས་བྱ་ཀུན་མཁྱེན་མཁྱེན་པའི་རང་གཟུགས་མཚམས་སྤྲིན་མདངས། །བདུད་བཞི་ལས་རྒྱལ་རྒྱལ་བའི་སྲས་པོ་འཇམ་པའི་དབྱངས། །སྨྲ་བའི་རོལ་མཚོ་མཚོ་བྱུང་ལྷ་མོ་ངག་གི་གཏེར། །བདག་གིས་ཁྱོད་བསྟེན་བསྟེན་པའི་འབྲས་བུ་དུས་འདིར་སྩོལ། །
འཇམ་དཔལ་དབྱངས་དངོས་མཁྱེན་བརྩེའི་རང་བཞིན་བསྟན་འགྲོའི་གཉེན། །ཡོན་ཏན་རྒྱ་མཚོ་བློ་གྲོས་མཐའ་ཡས་སྨྲ་བའི་དབང་། །བློ་བཟང་རྒྱ་མཚོ་བློ་གྲོས་མཐའ་ཡས་སྨྲ་བའི་དབང་། །རྣམ་གསུམ་གྱིས་མཚོན་སློབ་ཚོགས་རྒྱུ་སྐར་ཕྲེང་བར་བསྔགས། །རྣམ་དག་བསྟན་པའི་གཉེན་ཁ་མཆོག་ཏུ་འཛིན། །རྣམ་བཞའི་ཕྲིན་ལས་བུམ་བཟུང་རྗེས་འགྲོ་བ། །རྣམ་མང་བསྟན་སྲུང་རྒྱ་མཚོའི་ཚོགས་རྣམས་ཀྱིས། །རྣམ་དཀར་ལས་འདི་སྒྲུབ་པའི་སྡོངས་གྲོགས་མཛོད། །མཁས་བཙུན་བཟང་པོའི་རྟོགས་བརྗོད་བུམ་བརྒྱ་སྐྱེས། །ཟོག་པོའི་ངང་ཚུལ་སྨྲ་བའི་ཞ་ཉེ་གཉིས། །དཔྱད་ན་རིན་ཐང་ཉེ་བའི་ཆར་ཕོད་མིན། །སྙིགས་མ་ལས་ཀྱང་ཆེར་སྙིགས་གནས་སྐབས་འདིར། །པདྨའི་རིང་ལུགས་ཉི་ལྟར་གསལ་བའི་ཚུལ། །རྣམ་ཐར་མིཀྟི་ཀ་ཡི་སེ་མོ་དོ། །
སྐལ་བཟང་མགུལ་བའི་རྒྱན་དུ་སྤེལ་ཅིག་དང་། །ཐུབ་བསྟན་མཛེས་པའི་དཔལ་དུ་འགྱུར་རོ་ཞེས། །བཀའ་བབ་བདུན་ལྡན་རྡོ་རྗེ་གཟི་བརྗིད་ཀྱི། །བཀའ་ལུང་བདུད་རྩི་སྙིང་དབུས་སིམ་པའི་མོད། །བརྩམ་པའི་དམ་བཅའ་རྡོ་བར་རི་མོ་བྲིས། །དེས་ན་དཔལ་ལྡན་བླ་མ་ཡི། །རྟོགས་བརྗོད་སྒྲོ་སྐུར་བྲལ་བའི་གཏམ། །གཟུར་གནས་སྐྱེ་བོ་དགྱེས་བསྐྱེད་པའི། །མཆོད་སྤྲིན་ནམ་མཁའི་མཛོད་དུ་སྤེལ། །ཞེས་ཡུལ་དམ་པ་ལ་མཆོད་པར་བརྗོད་པ་དང་བརྩམ་པར་དམ་བཅའ་བ་ནི་ལེགས་བཤད་འབྱུང་བའི་སྒོ་ཡིན་ཏེ། ཡུལ་དམ་པ་ལ་བརྟེན་པ་ནི་གནས་སྐབས་དང་མཐར་ཐུག་གི་འདོད་པའི་དོན་ཡིད་བཞིན་དུ་འགྲུབ་པ་དང་། དམ་བཅས་པས་ཀྱང་བྱ་བ་མཐར་ཕྱིན་པའི་དགོས་པ་ཡོད་དེ། རྒྱུད་བླ་མ་ལས། བློ་ལྡན་རྒྱལ་བས་ཡུལ་འདི་ལ་མོས་པ། །སངས་རྒྱས་ཡོན་ཏན་ཚོགས་ཀྱི་སྣོད་གྱུར་ཏེ། །བསམ་མེད་ཡོན་ཏན་ཚོགས་ལ་མངོན་དགའ་བས། །སེམས་ཅན་ཀུན་གྱི་བསོད་ནམས་ཟིལ་གྱིས་གནོན། །ཞེས་ཚད་མེད་པའི་བསོད་ནམས་མངའ་བར་གསུངས་པ་དེ་ཡང་། བསོད་ནམས་ལྡན་པའི་མི་ཡིས་བྱ་བ་ཐམས་ཅད་འགྲུབ། །ཅེས་པ་ལྟར་དང་།
ཙནྡྲ་གོ་མིས། བདེན་དང་གཞུང་ལ་དགའ་བའི་གཟི་བརྗིད་ལྡན་པ་རྣམས། །སྲོག་ནི་བདེ་བླག་གཏོང་བར་བྱེད་ཀྱིས་དམ་བཅས་མིན། །ཞེས་དང་། སློབ་དཔོན་དཎྜིས། ཤིས་བརྗོད་ཕྱག་བྱ་དངོས་པོ་ནི། །ངེས་པར་བསྟན་པའང་དེ་ཡི་སྒོ། །ཞེས་གསུངས་པ་ལྟར་གྱིས་སྔོན་དུ་ལམ་ཡངས་པར་བྱས་ནས།