ཕྲེང་བ་བྱིན་རླབས།
ཡང་གསང་མཁའ་འགྲོའི་ཐུགས་ཐིག་ལས༔ ཀུན་ལ་སྦྱར་དུ་རུང་བ་ཡི༔ སྔགས་ཀྱི་ཕྲེང་བ་བྱིན་རླབས་ནི༔ དངོས་གྲུབ་འབྱུང་བའི་གཏེར་ཁ་ཡིན༔ སྔགས་འདྲེན་རྣལ་འབྱོར་སྙིང་ལ་ཆོངས༔ སྔགས་ཀྱི་དམ་ཚིག་མང་ན་ཡང༔ སྔགས་ཕྲེང་དམ་ཚིག་རྩ་བ་ཡིན༔ ཀུན་གྱི་སྤྱི་ཆིངས་ཨེ་མ་ཧོ༔ ལས་བཞིའི་ཕྲེང་བ་གང་ཡིན་པ༔ བ་ཡི་རྣམ་ལྔ་དྲི་བཟང་དྲུག༔ བསྲེས་པའི་གཙང་ཆུས་ལེགས་བཀྲུས་ཏེ༔ སྭཱ་བྷ་ཝས་སྟོང་པར་སྦྱང༔ སྟོང་པའི་ངང་ལས་སྔགས་ཕྲེང་དེ༔ ཕྲེང་ཐག་འོད་ལྔའི་ཟེར་ཐིག་ཀློང༔ མདོ་འཛིན་ཡི་དམ་དཔལ་ཆེན་པོ༔ ཕྲེང་བ་འཁོར་གྱི་རྣམ་པར་གསལ༔ ཡེ་ཤེས་ལྷ་ཚོགས་སྤྱན་དྲང་བསྟིམས༔ གུ་རུ་དྷེ་ཝ་ཌཱཀྐི་ནི་ས་པ་རི་ཝ་ར་བཛྲ་ས་མ་ཡཱ་ཛ་ཛ༔ ཛཿཧཱུྃ་བཾ་ཧོ༔ ཏིཥྛ་ལྷན༔ ཨོཾ་རུ་ཙི་ར་མ་ཎི་པྲ་ཝརྡྷ་ན་ཡེ་སྭཱཧཱ༔ དབྱངས་དང་གསལ་བྱེད་རྟེན་འབྲེལ་སྙིང༔ བདུན་བདུན་བརྗོད་པས་སྔགས་ཕྲེང་ལ༔ མེ་ཏོག་འཐོར་ཞིང་རབ་ཏུ་གནས༔ ཤིས་པ་བརྗོད་པས་མཐའ་བརྒྱན་ནོ༔ དེ་ནས་སྔགས་འབྲུ་གཅིག་བགྲང་ཡང༔ བརྒྱ་སྟོང་ཁྲི་འབུམ་འགྱུར་དང་བཅས༔ བྱིན་རླབས་ཡེ་ཤེས་འབྱུང་བར་འགྱུར༔ ས་མ་ཡཱ༔ བཙུན་པ་རིག་འཛིན་དོན་འགྲུབ་ཀྱི༔ ཕྲེང་བ་བྱིན་རླབས་ཆ་རྐྱེན་དུ༔ རྣལ་འབྱོར་ས་ར་ཧི་ཏ་ཡིས༔ ལྷག་བསམ་དག་པས་བྲིས་པ་དགེ༔